Abeed Azad

മമ്മൂട്ടി ആരാധകർ ഇത്രത്തോളം കാത്തിരുന്ന ഒരു ദിനം വേറെയുണ്ടാവില്ല..ഇമ്മാതിരി ഹൈപ്പോടുകൂടി ഒരു മമ്മൂട്ടി ചിത്രം റിലീസിനായി ഒരുങ്ങിയിട്ടുമില്ല..റിലീസിന് മുമ്പ് തന്നെ ഒരുപിടി റേക്കോർഡുകൾ കൈയ്യിലൊതുക്കിയാരുന്നു Great Father തീയേറ്ററിലെത്തിയത്..ടിക്കറ്റ് നേരത്തെ ലഭിച്ചിട്ടും തീയേറ്ററിനുള്ളിൽ കയറിയ എന്റെ അവസ്ഥ ചോദിച്ചാൽ ഒന്നേ പറയാനുള്ളൂ..'ചത്തില്ല'..
സസ്പെൻസ് നിലനിർത്തിയ ഫസ്റ്റ് ലുക്ക് പോസ്റ്ററും മോഷൻ പോസ്റ്ററും ഫാൻസുകാരും ട്രോളൻമാരും ഒരുപോലെ ആഘോഷമാക്കിയ ടീസറുകളും ഉയർത്തിയിരുന്ന പ്രതീക്ഷ ചില്ലറയല്ല..ഒരു പുതുമുഖ സംവിധായകൻ ആയിട്ടുകൂടി ഇത്രയേറെ പ്രതീക്ഷകൾ നൽകിയത് അതിന്റെ അവതരണ ശൈലിയും പിന്നെ ആഗസ്റ്റ് സിനിമാസിന്റെ ബാനറുമായിരുന്നു.. പിന്നെ ലീക്കായ രംഗം കൂടി കണ്ടപ്പോൾ ഒരു മാസ് ചിത്രം എന്നതിലുപരി ഫാമിലി എലമെന്റ്സ് കൂടി ചിത്രത്തിൽ കാണുമെന്ന് ഉറപ്പിച്ചിരുന്നു..
സാറയുടെ അഛൻ മാത്രമല്ല ഡേവിഡ് നൈനാൻ,അവളുടെ ഏറ്റവും അടുത്ത സുഹൃത്ത് കൂടിയാണ്..അങ്ങനെ ആകെ മൊത്തത്തിൽ തന്റെ പപ്പയെ അങ്ങേയറ്റം സ്നേഹിക്കുന്ന മകൾ പപ്പയെ ഒരു സൂപ്പർ ഹീറോ ആയാണ് കണക്കാക്കുന്നത്..ഭാര്യ മിഷേലും കൂടെയുള്ള കുടുംബം വളരെ രസകരവും സന്തുഷ്ടവുമായ കുടുംബ ജീവിതമാണ് നയിച്ച് വരുന്നത്.. എന്നാൽ ഇവർക്കിടയിലേക്ക് അപ്രതീക്ഷിതമായ ഒരു സംഭവം കടന്നു വരുകയാണ്.. അതോടെ എല്ലാ സന്തോഷവും തകിടം മറിയാൻ അധികം സമയം വേണ്ടി വന്നില്ല..
ഗോപി സുന്ദർ ഒരുക്കിയ ഗാനങ്ങൾ നന്നായിരുന്നു.. പ്രത്യേകിച്ച് വിജയ് യേശുദാസ് ആലപിച്ച ഗാനം.. പശ്ചാത്തല സംഗീതം ഒരുക്കിയത് സുഷിൻ ശ്യാമാണ്.. മികച്ച് നിന്നെങ്കിലും എവിടെയൊക്കെയോ ചില ചേർച്ചയില്ലായ്മ അനുഭവപ്പെട്ടു.. റോബി വർഗീസ് നിർവ്വഹിച്ച ഛായാഗ്രഹണം വളരെ മികച്ചതായിരുന്നു..
പോരായ്മ തോന്നിയ ഭാഗങ്ങളും ചിത്രത്തിൽ ഉണ്ടായിരുന്നു.. മമ്മൂട്ടിയുടെ 'കെട്ടഴിക്കൽ' രംഗമാണ് ഒട്ടും സഹിക്കാൻ പറ്റാഞ്ഞത്.. എന്തുകൊണ്ട്‌ പടിക്കൽ കൊണ്ട് പോയി കലമുടച്ചു എന്ന ചോദ്യം മനസ്സിൽ ഉയർത്തിയ രംഗം.. പിന്നെ രണ്ടാം പകുതി പ്രേക്ഷകനിൽ ഉണ്ടാക്കിയ ത്രിൽ അവസാനം അതേ അളവ് തന്നെ നിലനിർത്തിക്കൊണ്ട് സമാഹരിക്കുവാനായി എന്ന് തോന്നിയില്ല..ഇത്തിരി ലളിതമാക്കിയതായി തോന്നി..എന്നാലും ഇത്രയും മികച്ച ഘടകങ്ങൾ ഉള്ള ചിത്രത്തിൽ ഇവ കാര്യമാക്കേണ്ടതില്ല എന്നതും മറ്റൊരു വശം..


എസ്രയും മെക്സിക്കൻ അപാരതയും ഇറങ്ങിയ സമയത്ത് ചിലർ കാണിച്ച പിതൃശൂന്യ പരിപാടികൾ ഇവിടെ ആവർത്തിക്കാതിരിക്കട്ടെ എന്ന് പ്രാർഥിക്കുന്നു..
' ഡേവിഡ് നല്ല സ്റ്റൈല്ലായിട്ട് സിഗററ്റ് വലിക്കും'
My Rating:: ★★★½

മഴവിൽ മനോരമയിലെ 'D2' കണ്ടിട്ടുള്ളവർ പെട്ടെന്ന് മറക്കാത്ത 2 മുഖങ്ങളാണ് ആദിലിന്റെയും പേർളിയുടെയും..അമ്മാതിരി വെറുപ്പിക്കലാണ് പരിപാടിയുടെ അവതാരകരായിരുന്ന ഇരുവരും കാഴ്ച്ചവെച്ചത്..ഇരുവരും ആദ്യമായി ഒന്നിച്ചഭിനയിച്ച ചിത്രമാണ് 'കാപ്പിരി തുരുത്ത്'
ഡച്ച്-ബ്രിട്ടീഷ് ഭരണത്തിനു കീഴിലായിരുന്ന സമയത്തെ കൊച്ചിയുടെ കഥയാണ് ചിത്രം പറയുന്നത്.. സംഗീതത്തെ നെഞ്ചോട് ചേർത്ത കൊച്ചിയുടെയും കൊച്ചിക്കാരുടെയും കഥ..നാനാജാതിമതസ്ഥരും കൊച്ചിയിൽ ആ കാലഘട്ടത്തിൽ ജീവിച്ചിരുന്നെങ്കിലും എല്ലാവരും സ്വന്തം കൂടപ്പിറപ്പുകളെ പോലെയാണ് കഴിഞ്ഞിരുന്നത്..എല്ലാ മതസ്ഥരുടെയും കലകളെയും അവർ വളരെയധികം ആസ്വദിച്ചിരുന്നു..ആ സമയത്ത് കൊച്ചിയുടെ പ്രിയ ഗായകനായിരുന്നു മെഹബൂബ്..അവിടുത്തെ ഓരോ മണൽത്തരി പോലും ഒരേ സ്വരത്തിൽ ഏറ്റുപാടിയതായിരുന്നു അദ്ധേഹത്തിന്റെ പാട്ടുകൾ..
ഒരു ഗായകനെ തേടിയുള്ള പ്രയാണവും തുടർന്ന് അദ്ധേഹത്തിന്റെ ഭൂതകാലത്തിലേക്കുമുള്ള ഒരു എത്തിനോട്ടമാണ് ചിത്രത്തിന്റേത്..ചിത്രത്തിന്റെ കഥ വികസിക്കുന്നത് സദാശിവനിലൂടെയും അദ്ധേഹത്തിന്റെ ജൂതയായ പത്‌നിയിലൂടെയുമാണ്..അവരെക്കൂടാതെ വളരെയേറെ കഥാപാത്രങ്ങളുമുണ്ട് ചിത്രത്തിൽ..മെഹബൂബ് കഴിഞ്ഞാൽ നാട്ടുകാർക്ക് സ്വീകാര്യനായ പാട്ടുകാരനാണ് സദാശിവൻ..അദ്ധേഹത്തിന്റെ ജീവിതത്തിൽ സംഭവിക്കുന്ന ചില അപ്രതീക്ഷിത സംഭവങ്ങളാണ് ചിത്രത്തിൽ കാണിക്കുന്നത്..
നവാഗതനായ സഹീർ അലിയാണ് ചിത്രം സംവിധാനം ചെയ്തിരിക്കുന്നത്.. തിരക്കഥയും സംഭാഷണവുമൊക്കെ ഒരുക്കിയിരിക്കുന്നത് അദ്ധേഹം തന്നെ..ആദ്യ ചിത്രത്തിനായി ഇത്തരമൊരു വ്യത്യസ്ത പ്രമേയം തിരഞ്ഞെടുത്തതിൽ അഭിനന്ദനം അർഹിക്കുന്നു സംവിധായകൻ..കൊച്ചിയിലെ പല പഴയ വ്യവസ്ഥകളും വരച്ചുകാട്ടുന്നുണ്ട് സംവിധായകൻ..സംഭാഷണങ്ങളിൽ ചെറിയ നാടകീയത അനുഭവപ്പെടുന്നുണ്ടെങ്കിലും ചിലതൊക്കെ നന്നായിരുന്നു..
കേന്ദ്രകഥാപാത്രങ്ങളെ അവതരിപ്പിച്ചിരിൽ നിന്ന് ഞാൻ പ്രതീക്ഷിച്ചതല്ല എനിക്ക് ലഭിച്ചത്..ആദിലും പേർളിയും ശരാശരിക്ക് മുകളിൽ പ്രകടനം കാഴ്ച്ചവെച്ചു..വലിയ ഭാവപ്രകടനങ്ങൾ ഒന്നുമിലെങ്കിലും ഇരുവരും നന്നായിരുന്നു..മറ്റു കഥാപാത്രങ്ങളിൽ മുഖ്യമായി സിദ്ധീഖ് മികച്ച് നിന്നു..ചില സംഭാഷണങ്ങളിൽ അതീവ നാടകീയത പ്രകടമായിരുന്നെങ്കിലും അഭിനയം നന്നായിരുന്നു..ലാൽ, ഇന്ദ്രൻസ്, സുരഭി ലക്ഷ്മി,ശിവജി ഗുരുവായൂർ എന്നിവർ മറ്റ് പ്രമുഖ കഥാപാത്രങ്ങളെ അവതരിപ്പിച്ചു..
മികച്ച ഛായാഗ്രഹണമായിരുന്നു ചിത്രത്തിന്റേത്..മനോഹരമായ പല ഫ്രെയിമുകളുമുണ്ടായിരുന്ന ചിത്രത്തിന് വേണ്ടി ക്യാമറ ചലിപ്പിച്ചത് Praveen Chakrapaniയാണ്..സംഗീതത്തിന് അതീവ പ്രാധാന്യമുള്ള ചിത്രത്തിന്റെ ഗാനങ്ങൾ ഒരുക്കിയിരിക്കുന്നത് Rafeeq Yusaf ആണ്.. കേൾക്കാൻ ഇമ്പമുള്ളതും സന്ദർഭത്തോട് ചേർന്നു നിൽക്കുന്നതുമായ ഗാനങ്ങളാണ് അദ്ധേഹം തിട്ടപ്പെടുത്തിയത്.. പശ്ചാത്തല സംഗീതം ഒരുക്കിയത് Madhu Paul ആണ്.. ചിലയിടങ്ങളിൽ ഒരു ചേർച്ചയില്ലായ്മ തോന്നിയെങ്കിലും ബാക്കിയുള്ളിടത്ത് തരക്കേടില്ലായിരുന്നു..എഡിറ്റിംഗ് കാര്യമായി നന്നായെന്ന് തോന്നിയില്ല..
സംഗീതാത്മകവും കലാമൂല്യമുള്ളതുമായ നല്ലൊരു ചിത്രമാണ് സംവിധായകൻ ഒരുക്കിയിരിക്കുന്നത്..ആദ്യ സംരംഭമെന്ന നിലയിലെ ചില പോരായ്മകൾ ഒഴിച്ചാൽ മികച്ച പ്രമേയവും ഭംഗിയുള്ള അവതരണവും ഒരു തവണയെങ്കിലും കാണാൻ പ്രേരകമാവുന്ന ഒരു കൊച്ചു ചിത്രമാണ് കാപ്പിരി തുരുത്ത്..
My Rating:: ★★★☆☆

ഒരു നുണ നമ്മുടെ ജീവിതത്തെ എങ്ങനെയൊക്കെ ബാധിക്കാം..?..അല്ലെങ്കിൽ അത് നമ്മുടെ ജീവിതത്തിൽ എന്തൊക്കെ മാറ്റങ്ങൾക്ക് വഴി പാകാം..?..ഒരു നുണയല്ലേ, കൂടി വന്നാൽ എന്താവാൻ..അതും ഒരു കുട്ടി പറയുന്നതാണെങ്കിൽ ആരും മുഖവിലക്കെടുക്കാറേ ഇല്ല..അല്ലെങ്കിൽ അതിന്റെ ഫലം കൂടിവന്നാൽ എത്ര നാളത്തേക്ക് നീണ്ടുപോവാൻ.. എല്ലാം പഴയത് പോലെ ആവാൻ അധികം സമയത്തിന്റെ ആവശ്യമൊന്നുമില്ല..എന്നാൽ Lucasന്റെ ജീവിതത്തിൽ സംഭവിച്ചത് ഇവയൊന്നും ആയിരുന്നില്ല..
ഡെൻമാർക്കിലെ ഒരു ചെറിയ പട്ടണത്തിൽ കിന്റർ ഗാർഡൻ അധ്യാപകനായി ജോലി നോക്കുകയാണ് ലൂക്കാസ്..വിവാഹബന്ധം വേർപ്പെടുത്തി ഒറ്റക്ക് താമസിക്കുന്ന ലൂക്കാസിന് ആശ്വാസമായുള്ളത് അടുത്ത സുഹൃത്തുക്കളും ഇടക്കിടെ വരുന്ന മകന്റെ ഫോൺകാളുകളുമാണ്..സൗമ്യതയും സ്നേഹവും നിറഞ്ഞ പെരുമാറ്റം കൊണ്ട് ഏവരുടെയും മനസ്സ് കീഴടക്കിയ വ്യക്തി എന്ന നിലയിൽ ഏവർക്കിടയിലും സ്വീകാര്യനുമാണ് അദ്ധേഹം..അങ്ങനെ സന്തോഷകരമായ ജീവിതം നയിച്ചുകൊണ്ടിരിക്കുമ്പോഴാണ് അത് സംഭവിക്കുന്നത്..
തന്റെ ആത്മാർഥ സുഹൃത്ത് Theoയുടെ മകളും കിന്റർ ഗാർഡനിൽ തന്റെ വിദ്യാർഥിനിയുമായ Clara lucasനെ പറ്റി ഗൗരവകരമായ ഒരു 'ചെറിയ' നുണ പറയുന്നത്..തുടർന്ന് Lucasന്റെ ജീവിതത്തിലുണ്ടാവുന്ന സങ്കീർണ്ണമായ മാറ്റങ്ങളാണ് The Hunt എന്ന ചിത്രത്തിൽ പറയുന്നത്..
Thomas Vinterberg സംവിധാനം ചെയ്ത ചിത്രത്തിന്റെ തിരക്കഥ ഒരുക്കിയിരിക്കുന്നത് Tobias Lindholm,Thomas Vinterberg എന്നിവർ ചേർന്നാണ്..മികച്ചത് എന്ന് നിസ്സംശയം പറയാവുന്ന ഒന്ന്..ഒരു ചെറിയ ആശയത്തെ ഇത്ര വിപുലമായ രീതിയിൽ പറഞ്ഞ് ഫലിപ്പിച്ച ചിത്രം സംവിധായകന്റെ മികച്ച സൃഷ്ടികളിൽ ഒന്ന് തന്നെ..കഥാപാത്രത്തിന്റെ പല അവസ്ഥകളിലൂടെയാണ് ചിത്രം സഞ്ചരിക്കുന്നത്..മികച്ച തിരക്കഥയിൽ പണിതുയർത്തിയ ഒരു ചിത്രം എന്ന നിലയിൽ പ്രശംസ അർഹിക്കുന്നു ചിത്രം..
കേന്ദ്രകഥാപാത്രമായ Lucasനെ സ്ക്രീനിൽ ഗംഭീരമാക്കിയത് Mads Mikkelsen ആണ്..അതിഗംഭീര പ്രകടനമാണ് അദ്ധേഹം കാഴ്ച്ചവെച്ചത്..കഥാപാത്രം ആവശ്യപ്പെടുന്ന എല്ലാ ഘടകങ്ങളും വളരെ പക്വതയോടെ മികച്ച രീതിയിൽ അദ്ധേഹം അവതരിപ്പിച്ചു.. കാണികളിൽ തങ്ങിനിൽക്കുന്ന ഒരു കഥാപാത്രമായി Lucas..Clara ആയി വേഷമിട്ടത് Annika Wedderkopp  ആണ്.. നിഷ്കളങ്കത തുളുമ്പുന്ന ഒരു കുട്ടിയുടെ ഭാവങ്ങൾ മനോഹരമാക്കി Annika..Lucasനോടൊപ്പം തന്നെ Claraയും മികച്ച് നിന്നു ചിത്രത്തിൽ..Lasse Fogelstrøm,Alexandra Rapaport,Thomas Bo Larsen എന്നിവർ ചിത്രത്തിലെ മറ്റ് പ്രമുഖ കഥാപാത്രങ്ങളെ അവതരിപ്പിച്ചു..
Nikolaj Egelund ഒരുക്കിയ പശ്ചാത്തല സംഗീതം ചിത്രത്തിന്റെ മൂഡിനെ പ്രേക്ഷകനോട് അടുപ്പിക്കുന്നതിൽ വളരെ സഹായകമായി..Charlotte Bruus Christensenനിർവ്വഹിച്ച ഛായാഗ്രഹണവും മനോഹരമായ ഫ്രെയിമുകളാൽ സമ്പുഷ്ടമായിരുന്നു..
വളരെ പതിഞ്ഞ വേഗത്തിൽ മുന്നോട്ട് പോവുന്ന ചിത്രമാണ് The Hunt.. അതുകൊണ്ട് തന്നെ ചിലയിടങ്ങളിൽ ഇഴച്ചിൽ തോന്നിയേക്കാം.. എന്നാലും ക്ഷമയോടെ കണ്ടിരിക്കുന്നവർക്ക് മികച്ച ഒരു അനുഭവമാണ് ചിത്രം സമ്മാനിക്കുക.. ആയതിനാൽ തന്നെ ചിത്രം കാണാൻ ശ്രമിക്കുക..
My Rating:: ★★★★☆

Chan Kwai-Bun ഡിപ്പാർട്ട്പ്പെന്റിലെ ബുദ്ധിമാനും  സമർത്ഥനുമായ പോലീസ് ഉദ്യോഗസ്ഥനാണ്.. മറ്റുള്ളവരേക്കാൾ വ്യത്യസ്തമായ രീതിയിലും വേഗതയിലുമാണ് അദ്ധേഹം കേസന്വേഷണം നടത്തുന്നത്..ഒരു പ്രത്യേക കഴിവും ഉണ്ട് അദ്ധേഹത്തിന്..മറ്റുള്ളവരുടെ Inner Personalities കാണാനുള്ള കഴിവ്..
വിരമിച്ചതിന് ശേഷം അദ്ധേഹത്തിന് മറ്റൊരു കേസിൽ പങ്കാളിയാവേണ്ടി വരുന്നു..Ho Ka-On അന്വേഷിക്കുന്ന ഒരു പോലീസുകാരന്റെ മിസ്സിംഗ് കേസ്.. ആ കേസന്വേഷണം അദ്ധേഹത്തിന്റെ ജീവിതത്തെ എങ്ങനെ ബാധിക്കുന്നു എന്നതാണ് Mad Detective എന്ന ചിത്രത്തിൽ കാണിക്കുന്നത്..
Johnnie To, Wai Ka-Fai എന്നിവർ ചേർന്നാണ് ചിത്രം സംവിധാനം ചെയ്തിരിക്കുന്നത്..Wai Ka-Fai, Aul Kin-Yeeയും തയ്യാറാക്കിയ തിരക്കഥയാണ് ചിത്രത്തിന്റെ നട്ടെല്ല്..ഏത് നിമിഷവും പാളിപ്പോകാവുന്ന തിരക്കഥ വളരെ തന്മയത്വത്തോട് കൂടി മികച്ച രീതിയിൽ അവർ തയ്യാറാക്കി..സംവിധാനമികവ് കൂടി ആയപ്പോൾ ചിത്രം മികച്ച ഒരു ത്രില്ലറായി..
Sean Lau അവതരിപ്പിച്ച ഇൻസ്പെക്ടർ Chan Kwai-Bun വളരെയേറെ സങ്കീർണ്ണതകൾ നിറഞ്ഞ ഒരു കഥാപാത്രമായാണ് തോന്നിയത്.. കഥാപാത്രം ആവശ്യപ്പെടുന്ന തരത്തിലുള്ള ഉഗ്രൻ പ്രകടനമാണ് Lau കാഴ്ച്ചവെച്ചത്.. ചിത്രത്തിന്റെ ശ്രദ്ധാകേന്ദ്രവും അദ്ധേഹം തന്നെയായിരുന്നു..Lam Ka-Tung ജീവൻ നൽകിയ ഇൻസ്പെക്ടർ Hoയും മികച്ച കഥാപാത്രമായിരുന്നു..Andy On അവതരിപ്പിച്ച -ve ടച്ചുള്ള കഥാപാത്രവും മികച്ച് നിന്നു..Kelly Lin, Seut Lam, Jay Lau എന്നിവർ മറ്റ് കഥാപാത്രങ്ങളെ അവതരിപ്പിച്ചു..
Xavier Jamauxന്റെ പശ്ചാത്തല സംഗീതവും
Cheng Siu-Keungന്റെ ഛായാഗ്രഹണവും Tina Bazന്റെ എഡിറ്റിംഗും ഒരുപോലെ ചിത്രത്തിന് ഗുണകരമായി.. ചിത്രത്തിന് വേഗത കൂട്ടുവാനും കാണികളിൽ ത്രിൽ പകരുവാനും ഇവ സഹായകമായി..
യാത്രയിലുടനീളം കാണികളെ ഒരുപോലെ 'ഇനിയെന്ത്' എന്ന് ചിന്തിപ്പിക്കുന്നുണ്ട് ചിത്രം.. ഒരു സൈക്കോളജിക്കൽ ത്രില്ലർ എന്ന നിലയിൽ ചിത്രം മേന്മ പുലർത്തുന്നുണ്ട്..ചില രംഗങ്ങൾ ഞെട്ടൽ ഉണ്ടാക്കുന്നതായിരുന്നു..ത്രില്ലർ ഗണത്തിലുള്ള ചിത്രങ്ങൾ ഇഷ്ടപ്പെടുന്നവർക്ക് തീർച്ചയായും കണ്ടിരിക്കാവുന്ന ചിത്രമാണ് Mad Detective..
My Rating::★★★½

നമ്മുടെ ജീവിതത്തിൽ എന്താണ് ഇനി സംഭവിക്കുക എന്ന് ഒരിക്കലും നമുക്ക് പ്രവചിക്കാൻ കഴിയുകയില്ല..എത്ര സന്തോഷം പകരുന്ന ജീവിതരീതി ആണെങ്കിൽ കൂടി തകിടം മറിയാൻ ഒരു നിമിഷം മതി..തിരിച്ചും അങ്ങനെ തന്നെ.. അങ്ങനെയുള്ള സന്ദർഭങ്ങളിലും നമ്മെ ജീവിക്കാൻ പ്രേരിപ്പിക്കുന്ന ഒന്നുണ്ട്.. 'പ്രതീക്ഷകൾ'.. ഇന്നല്ലെങ്കിൽ നാളെ ജീവിതം നമുക്കനുകൂലമായ പാതയിൽ സഞ്ചരിക്കുമെന്ന പ്രതീക്ഷ..അതാണ് നമ്മുടെ ജീവിതം മുന്നോട്ട് നയിക്കാൻ സഹായകമാവുന്ന ഘടകങ്ങളിൽ ഒന്ന്.
കൊച്ചിയിലെ ആസ്റ്റർ മെഡ്സിറ്റിയിൽ കോമയിൽ വെന്റിലേറ്ററിന്റെ സഹായത്തോടെ എട്ട് മാസമായി ജീവിക്കുകയാണ് പങ്കജ..ഏത് നേരവും ഭർത്താവ് ശിവ പങ്കജയുടെ ശുശ്രൂഷക്കായി ഉണ്ട്.. ആശുപത്രിയിലെ എല്ലാ ജീവനക്കാരും അദ്ധേഹത്തിന് സ്വന്തം കുടുംബാഗങ്ങളെ പോലെയാണ്..വരുന്ന സമയത്തൊക്കെ എല്ലാവരുമായും നർമ്മസംഭാഷണങ്ങളിൽ ഏർപ്പെടുകയും വിവരങ്ങൾ പങ്കുവെക്കുകയും ചെയ്യും ശിവ..അവിടെ വെച്ചാണ് ശിവ താരയെ കാണുന്നത്..ഒരു ആക്സിഡന്റിൽ പെട്ട് തലയ്ക്ക് ഗുരുതരമായി ക്ഷതമേറ്റ ഭർത്താവ് രജത്തിനെ കാണുവാനായി വന്നതാണ് താര..തുടർന്ന് ശിവയും താരയും കൂടിയുള്ള രസകരമായ പ്രയാണമാണ് 'waiting'..
Anu Menon സംവിധാനം ചെയ്ത് 2015ൽ പുറത്തിറങ്ങിയ ചിത്രമാണ് waiting.. James Ruzicka,Anu Menon എന്നിവരാണ് ചിത്രത്തിന്റെ തിരക്കഥ ഒരുക്കിയിരുന്നത്.. ചെറിയൊരു പ്ലോട്ടിൽ മനോഹരമായി ഒരുക്കിയ ഒരു ഫീൽ ഗുഡ് മൂവിയാണ് waiting.. ചിത്രത്തിൽ ഡയലോഗുകൾ തയ്യാറാക്കിയിരിക്കുന്നത് AtiKa chouhan ആണ്.. ഊർജ്ജസ്വലവും പ്രചോദനം പകരുന്നതുമായ ഡയലോഗുകളാണ് ചിത്രത്തിന്റേത്..
ചിത്രത്തെ മുന്നോട്ട് നയിക്കുന്നത് 2 കഥാപാത്രങ്ങളാണ്..ശിവയും താരയും.. അവർക്ക് സ്ക്രീനിൽ ജീവൻ നൽകിയത് Nasarudheen Shaയും Kalki Keochliനുമാണ്.. അത്യുഗ്രൻ പ്രകടനമാണ് ഇരുവരും കാഴ്ച്ചവെച്ചത്.. വളരെ എനർജെറ്റിക്ക് ആയുള്ള അഭിനയം..അത് കാണികളിൽ പകരുന്ന +ve എനർജി വലുതാണ്..ഇരുവരും തമ്മിലുള്ള കെമിസ്ട്രിയും സ്ക്രീൻ പ്രസൻസും അപാരമായിരുന്നു.. ഡയലോഗ് ഡെലിവറിയും നർമ്മസംഭാഷങ്ങളും പ്രേക്ഷകരിൽ ചിരി ഉണർത്തുന്നത് തന്നെ.. സഹതാരങ്ങളായി Rajat Kapoor,Arjun Mathur,Suhasini,Rajiv Ravindranathan എന്നിവർ വേഷമിട്ടു..മലയാളി സാന്നിധ്യങ്ങളായി Krishna Shankaറും Dinesh Naiരും ഉണ്ട് ചിത്രത്തിൽ ഉണ്ട്..
Neha Matiyani നിർവ്വഹിച്ച ഛായാഗ്രഹണവും Mickey Mccleary ഒരുക്കിയ സംഗീതവും ചിത്രത്തിന് വലിയ പിന്തുണ നൽകുന്നുണ്ട്.. ഓരോ സന്ദർഭവും അതിന്റെ ഫീലോടു കൂടിത്തന്നെ പ്രേക്ഷകരിലേക്ക് എത്തിക്കാൻ ഇരുവരും സഹായിച്ചു.. പാട്ടുകളും സന്ദർഭോജിതമായി ഉൾപ്പെടുത്തി മടുപ്പ് തോന്നിക്കാത്ത വിധം കോർത്തിണക്കിയിട്ടുണ്ട്..
ബന്ധങ്ങളുടെ വില ആഴത്തിൽ പറയുന്ന മനോഹരമായ ഒരു ചിത്രമാണ് waiting.. ചിത്രത്തിന്റെ പേര് അന്വർഥമാക്കുന്ന ക്ലൈമാക്സ് ചെറിയ രീതിയിൽ വിങ്ങലും മറ്റൊരു തലത്തിൽ പ്രതീക്ഷയും സമ്മാനിക്കുന്നു.. വലിയ പബ്ലിസിറ്റിയൊന്നുമില്ലാതെ റിലീസായ ചിത്രം പ്രേക്ഷക ശ്രദ്ധയും നിരൂപക പ്രശംസയും ഒരു പോലെ നേടിയിരുന്നു.. കണ്ടിട്ടില്ലാത്തവർ ചിത്രം കാണാൻ ശ്രമിക്കുക..
My Rating:: ★★★★☆

നിക്ക് കാഫ്മേയർ അതിസമർഥനായ പോലീസ് ഉദ്യോഗസ്ഥനാണ്.. തന്റെ കരിയറിലുടനീളം വിജയഗാഥ രചിച്ച വ്യക്തി.. എന്നിരുന്നാലും അദ്ധേഹത്തെ നിരന്തരം വേട്ടയാടുന്ന ഒരു സംഭവം ഉണ്ടായിട്ടുണ്ട് അദ്ധേഹത്തിന്റെ ജീവിതത്തിൽ.. തന്റെ ഒമ്പതാം വയസ്സിൽ ദുരൂഹ സാഹചര്യത്തിൽ കാണാതായ തന്റെ സഹോദരന്റെ ഓർമകൾ.. എത്ര ആഞ്ഞ് ശ്രമിച്ചിട്ടും കണ്ടെത്താനാവാത്ത ഒരു ദുരൂഹതയായി അദ്ധേഹത്തിന്റെ ജീവിതത്തിൽ ഇന്നും ആ സംഭവം അവശേഷിക്കുന്നു...
അപ്പോഴാണ് ഒരു ഒമ്പത് വയസ്സുകാരന്റെ മിസ്സിംഗ് കേസ് അദ്ധേഹത്തിന്റെ ഡെസ്ക്കിലേക്ക് വരുന്നത്.. തന്റെ സഹോദരന്റെ നിലക്കാത്ത ഓർമകൾ അദ്ധേഹത്തെ വേട്ടയാടുമ്പോൾ, പുതിയതായി വന്ന കേസിന് അതിനോട് എന്തോ സാദൃശ്യം തോന്നിയപ്പോൾ, അദ്ധേഹം കേസന്വേഷണത്തിനായി മുഴുവൻ സമയവും ചിലവഴിക്കുന്നു.. ഇതാണ് The Treatment എന്ന ചിത്രത്തിന്റെ ഇതിവൃത്തം..
Hans Herbort സംവിധാനം ചെയ്ത ബെൽജിയൻ ത്രില്ലർ ആണ് the treatment.. 2001ൽ ബ്രിട്ടീഷ് എഴുത്തുകാരൻ Mo Hayder എഴുതിയ ഇതേ പേരിലുള്ള നോവലിനെ ആസ്പദമാക്കിയാണ് ചിത്രം ഒരുക്കിയിട്ടുള്ളത്.. നോവൽ സിനിമയാക്കുന്നതിന് തിരക്കഥയിൽ Carl Joos പിന്തുണ നൽകി.. മികച്ച പ്രമേയവും തിരക്കഥയുമാണ് ചിത്രത്തിന്റേത്.. ചിത്രത്തിന്റെ നട്ടെല്ല് തിരക്കഥയും സംവിധാനമികവുമാണ്.. പതിഞ്ഞ താളത്തിലാണ് മുന്നോട്ട് പോവുന്നതെങ്കിലും ബോറടിപ്പിക്കുന്നില്ല ചിത്രം..
കേന്ദ്രകഥാപാത്രമായ നിക്കിനെ സ്ക്രീനിൽ ഗംഭീരമാക്കിയത് Geert Van Rampelberg ആണ്.. സ്ക്രീനിൽ നിറഞ്ഞ് നിന്ന പ്രകടനം.. എല്ലാ ഭാവങ്ങളും മനസ്സിലെ സംഘർഷാവസ്ഥയുമൊക്കെ മനോഹരമായി സ്ക്രീനിൽ എത്തിച്ചു അദ്ധേഹം.. അദ്ധേഹത്തിന് മികച്ച പിന്തുണയാണ് Johan Van Assche അവതരിപ്പിച്ച നെഗറ്റീവ് ടച്ചുള്ള കഥാപാത്രം.. ഒരു ഡാർക്ക് മൂഡ് ഉള്ള ചിത്രത്തിൽ അദ്ധേഹത്തിന്റെ കഥാപാത്രം ചെറുതെങ്കിലും മികച്ചു നിന്നു..Ina Geerts അവതരിപ്പിച്ച നിക്കിന്റെ സഹ ഉദ്യോഗസ്ഥയുടെ വേഷവും മിച്ചതായിരുരുന്നു..Laura Verlinden,Roel Swanenberg, Michael Vergauen എന്നിവർ മറ്റ് മുഖ്യ കഥാപാത്രങ്ങളെ അവതരിപ്പിച്ചു..
Frank Van Den Eeden ചലിപ്പിച്ച ക്യാമറ മികവുറ്റതായിരുന്നു.. ചിത്രത്തിലുടനീളം ഒരു ഡാർക്ക് ഫീൽ നൽകുന്നതിൽ അത് ഏറെ സഹായകമായി..Kieren klassen,Melcher Meimans,Chrisnanne Weigel എന്നിവർ സംയുക്തമായി നിർവ്വഹിച്ച സംഗീതം മികച്ചതായിരുന്നു.. സന്ദർഭങ്ങളോട് ഒത്ത് നിൽക്കുന്നതും ചിത്രം അവസാനിക്കുന്നത് വരെ കാണികളിൽ ദുരൂഹത നിറക്കുവാനും അത് സഹായകമായി.. എഡിറ്റിംഗും എടുത്ത് പറയേണ്ട ഘടകം തന്നെ..
ഫാസ്റ്റ് പേസിൽ നീങ്ങുന്ന ഒരു ത്രില്ലറല്ല മറിച്ച് നീരസം സമ്മാനിക്കാതെ പ്രേക്ഷകനെ ആകാംശയിലാക്കി നീങ്ങുന്ന വേഗത കുറഞ്ഞ ഒരു ത്രില്ലറാണ് ചിത്രം.. സിനിമ പരിചരിച്ച പ്രമേയം വളരെ മികച്ചതും ധൈര്യം ആവശ്യപ്പെടുന്ന ഒന്നുമായി തോന്നി.. തൃപ്തികരമായ ക്ലൈമാക്സിനോടൊപ്പം ടെയ്ൽ എന്റും മികച്ചതായിരുന്നു..എല്ലാ സിനിമാ സ്നേഹികൾക്കും കണ്ടിരിക്കാവുന്ന, അല്ലെങ്കിൽ കണ്ടിരിക്കേണ്ട ചിത്രമാണ് The treatment..
My Rating:: ★★★½

അങ്ങനെ ഏവരും പ്രതീക്ഷയോടെ കാത്തിരുന്ന Take off ഇന്ന് തീയേറ്ററുകളിൽ എത്തി..ട്രെയിലറുകളും പോസ്റ്ററുകളും ചിത്രത്തിന്റെ പ്രതീക്ഷ വാനോളം ഉയർത്തിയിരുന്നു.. ആ പ്രതീക്ഷയിൽ തന്നെ ആദ്യ ഷോയ്ക്ക് ആദ്യ ടിക്കറ്റ് കരസ്ഥമാക്കി തീയേറ്ററിൽ കയറി..
യുദ്ധഭീകരതയുടെ കാലത്ത് ഇറാഖിൽ അകപ്പെട്ട്പോയ ഇന്ത്യൻ നഴ്സുമാരുടെ യഥാർഥ സംഭവത്തിന്റെ നേർക്കാഴ്ച്ചയാണ് Take off എന്ന ചിത്രം.. കുടുംബത്തിന്റെ സകല ബാധ്യതകളും പേറി നാട്ടിൽ ഒരു നഴ്സിന് ലഭിക്കാത്ത വിലയും ശമ്പളവും ആഗ്രഹിച്ച് വിമാനം കേറിയ മാലാഖമാർ.. ആ കൂട്ടത്തിൽ ഒരുവളാണ് കേരളത്തിൽ നിന്ന് വിമാനം കേറിയ സമീറയും.. കൂടെ ഭർത്താവ് ഷഹീദും കൂടെ ജോലി ചെയ്തിരുന്ന ഒരുപറ്റം നഴ്സുമാരുമുണ്ട്.. യുദ്ധരംഗങ്ങളിലെ ദീകരത മാത്രമല്ല സമീറയുടെ കുടുംബജീവിതത്തെ പറ്റിയും ചിത്രം പറയുന്നുണ്ട്.. അവിടെ നിന്നാണ് ചിത്രത്തിന്റെ തുടക്കവും.. കഥയിലേക്ക് കൂടുതൽ കടക്കുന്നില്ല, അത് രസംകൊല്ലി ആയേക്കും..
സിനിമാരംഗത്തിൽ മുൻനിരയിലുള്ള എഡിറ്റർമാരിൽ ഒരാളായ മഹേഷ് നാരായണൻ അദ്യമായി സംവിധാനം ചെയ്ത ചിത്രമാണ് Take off.. ഒറ്റവാക്കിൽ പറഞ്ഞാൽ അതിഗംഭീരം..!!..ചിത്രം റിലീസ് ആവുന്നതിന് മുമ്പ് നൽകിയിരുന്ന വലിയ പ്രതീക്ഷകൾക്ക് ഒരു കോട്ടവും വരുത്താതെ പ്രതീക്ഷിച്ചതിനേക്കാൾ മുന്തിയ ഒരു ചിത്രമാണ് സംവിധായകൻ സമ്മാനിച്ചത്.. മഹേഷ് നാരായണും പി.വി ഷാജികുമാറും ചേർന്ന് രചിച്ച തിരക്കഥയും ഗംഭീരം.. ഇവർ തന്നെ രചിച്ച ഡയലോഗുകളും മികച്ചവ തന്നെ.. പല ഡയലോഗുകളും മനസ്സിൽ തട്ടുന്നവ ആയിരുന്നു..
കേന്ദ്രകഥാപാത്രങ്ങളിൽ മികച്ച് നിന്ന സമീറയെ സ്‌ക്രീനിൽ ഗംഭീരമാക്കിയത് പാർവ്വതിയാണ്.. തന്റെ കഴിവ് വീണ്ടും വീണ്ടും വിളിച്ചോതുന്ന അസാധ്യ പ്രകടനം.. ഭാര്യയായും അമ്മയായും മകളായും മാലാഖയായും മനസ്സ് കവരുന്ന പ്രകടനം ശരിക്കും കയ്യടി അർഹിക്കുന്നത് തന്നെ..വളരേയേറെ വൈകാരിക മുഹൂർത്തങ്ങൾ നിറഞ്ഞ കഥാപാത്രമാണ് സമീറയുടേത്.. ഭാവങ്ങൾ കൊണ്ടും ബോഡി ലാങ്വേജ് കൊണ്ടും അതിമനോഹരമാക്കി പാർവ്വതി സമീറയെ..
3 മുൻനിര നായകന്മാർ ഒരു സ്ത്രീ കേന്ദ്രീകൃത സിനിമക്കായി ഒന്നിച്ചു എന്ന പ്രത്യേകതയും ചിത്രത്തിനുണ്ട്..ശക്തമായ കയ്യടി അർഹിക്കുന്നു മൂവരും.. കൂട്ടത്തിൽ കൂടുതൽ കയ്യടി ലഭിച്ചത് ഫഹദിനാണ്.. അതിഗംഭീര പ്രകടനം..മികച്ച ഡയലോഗുകൾ ഫഹദിന്റേതായി ഉണ്ടായിരുന്നു ചിത്രത്തിൽ.. തന്റേതായ ശൈലികൊണ്ടും മാനറിസം കൊണ്ടും അവ വേറെ തലത്തിൽ എത്തിച്ചു ഫഹദ്.. കുഞ്ചാക്കോ ബോബന്റെ കരിയറിലെ തന്നെ മികച്ച ഒരു വേഷമാണ് ഷഹീദിന്റേത്.. ചോക്ലേറ്റ് ബോയ് എന്ന ഇമേജിൽ നിന്ന് മാറി വ്യക്തിത്വമുള്ള ഒരു ഭർത്താവായി ആദ്യ പകുതിയിൽ നിറഞ്ഞ് നിന്നു.. രണ്ടാം പകുതിയിലും മനുഷ്യജീവന് വിലകൽപിക്കുന്ന ഒരു നഴ്സായും തിളങ്ങി.. ആസിഫലി ചെറുതെങ്കിലും തന്റെ വേഷം മനോഹരമാക്കി..പ്രകാശ് ബെലവാഡി, പ്രേം പ്രകാശ്, ദിവ്യപ്രഭ, എറിക് സകറിയ എന്നിവർ മികച്ച പിന്തുണ നൽകി..
ടെക്നിക്കൽ സൈഡ് അപാര ഫോമിലായിരുന്നു ചിത്രത്തിലുടനീളം... ഛായാഗ്രഹണവും സംഗീതവും അതിഗംഭീരം.. സനു വർഗീസ് നിർവ്വഹിച്ച ഛായാഗ്രഹണം ചിത്രത്തെ ഒരു ദൃശ്യവിരുന്നാക്കി..പല ഫ്രെയിമുകളും മികച്ച് നിന്നു.. ഗോപി സുന്ദർ ഒരുക്കിയ പശ്ചാത്തല സംഗീതം അതിഗംഭീരം..പല സീനുകളും പശ്ചാത്തല സംഗീതത്തിന്റെ അകമ്പടിയോടെ വേറെ തലത്തിൽ എത്തി.. ഗോപി സുന്ദറും ഷാൻ റഹ്മാനും  ഒരുക്കിയ പാട്ടുകളും മികച്ച് നിന്നു.. എഡിറ്റിംഗും മികച്ച് നിന്നു..
യുദ്ധരംഗത്തെ ഭീകരത ഏതാണ്ട് അതേ ഫീലിൽ തന്നെ പ്രേക്ഷകന് സമ്മാനിക്കാൻ ചിത്രത്തിനായി.. പല രംഗങ്ങളും പ്രേക്ഷകനിൽ നടുക്കം രേഖപ്പെടുത്തും വിധമായിരുന്നു.. ഓരോ രംഗവും കാണികളിൽ ഇനിയെന്ത് എന്നുള്ള ചോദ്യവും ഉയർത്തി കൊണ്ടു പോവുന്നതായിരുന്നു.. അവസാന രംഗത്ത് ഇന്ത്യൻ പതാക കാണിച്ചത് ശരിക്കും രോമാഞ്ചമുണ്ടാക്കി..സന്തോഷം കൊണ്ടും അഭിമാനം കൊണ്ടും കണ്ണ് നിറഞ്ഞ നിമിഷം..മലയാളികൾക്ക് എക്കാലവും അഭിമാനിക്കാവുന്ന ഒരു ചിത്രമാണ് Take off.. ചിത്രം തീയേറ്ററിൽ തന്നെ കണ്ട് അനുഭവിച്ചറിയുക.. വൻ വിജയമാക്കുക.. അത് അങ്ങനെ തന്നെ ആവട്ടെ എന്ന് ആശംസിക്കുന്നു..

Hats off Mahesh Narayan.. ഇങ്ങനെയൊരു പ്രയത്നത്തിന്..ഇത്തരത്തിൽ ഒരു മികച്ച ചിത്രം പ്രേക്ഷകർക്ക് സമ്മാനിച്ചതിന്..
My Rating:: ★★★★½

Insomnia എന്നാൽ ഒറ്റവാക്കിൽ പറഞ്ഞാൽ ഉറക്കമില്ലായ്മ എന്നർത്ഥം.. ഒരു വ്യക്തിക്ക് തന്റെ ഇഷ്ടത്തിനനുസരിച്ച് ഉറങ്ങാൻ പറ്റാതിരിക്കുക,അഥവാ ഉറങ്ങിയാൽ തന്നെ അധികം നേരം തുടർച്ചയായി ഉറങ്ങാൻ സാധിക്കാതെ എഴുന്നേൽക്കേണ്ടി വരിക എന്നിവയും ഇതിൽപെടും.. ഇതിന് കാരണം ചിലപ്പോൾ സൈക്കോളജിക്കൽ സ്ട്രെസ്സോ തുടർച്ചയായ വേദനയോ ഹൃദയത്തിനുള്ള തകരാറോ അങ്ങനെ പലതാവാം.. ഇത്തരത്തിലുള്ള വ്യക്തികൾക്ക് ജോലിയിലോ പഠനത്തിലോ ഒന്നും തന്നെ ശ്രദ്ധ ചെലുത്താൻ സാധിക്കില്ല..

അലാസ്കയിൽ നടന്ന ഒരു കൊലപാതകത്തെ പറ്റി അന്വേഷിക്കാനാണ് will Dormeറും സഹപ്രവർത്തകൻ Hap Eckharടും അവിടെ എത്തിയത്.. 17 കാരിയായ Kay Connell ആണ് കൊല്ലപ്പെട്ടത്.. അന്വേഷണത്തിനിടക്ക് Dormerക്ക് പറ്റുന്ന ഒരു കൈയ്യബദ്ധം അദ്ധേഹത്തിന്റെ ജീവിതം തന്നെ മാറ്റിമറിക്കുന്നു.. കൊലപാതകിക്ക് ഒരു പിടിവള്ളിയായി ഈ സംഭവം മാറുന്നു.. തുടർന്ന് Dormeറും കൊലപാതകിയും തമ്മിലുള്ള Cat & Mouse പ്ലേ ആണ് Insomnia എന്ന ചിത്രത്തിൽ കാണിക്കുന്നത്..

Christopher Nolan സംവിധാനം ചെയ്ത മൂന്നാമത്തെ ചിത്രമാണ് Insomnia..1997ൽ പുറത്തിറങ്ങിയ ഇതേ പേരിലുള്ള നോർവേജിയൻ ചിത്രത്തിന്റെ റീമേക്ക് ആണ് ഈ ചിത്രം.. തന്റേതല്ലാത്ത ഒരു തിരക്കഥയിൽ Nolan സംവിധാനം ചെയ്തിട്ടുള്ള ഏക ചിത്രം ഇതാണ്..Hillary Seitz ആണ് ചിത്രത്തിന്റെ തിരക്കഥ ഒരുക്കിയിരിക്കുന്നത്..

പതിഞ്ഞ താളത്തിൽ തുടങ്ങുന്ന ചിത്രം ഇടക്കിടക്ക് ത്രില്ലർ സ്വഭാവത്തിലേക്ക് കടക്കുന്നുണ്ട്.. ഒരു സൈക്കോളജിക്കൽ ത്രില്ലർ ആണ് ചിത്രം.. മികച്ച തിരക്കഥയും അതിനൊത്ത മികച്ച സംവിധാനവും ചിത്രത്തെ നല്ലൊരു അനുഭവമാക്കുന്നു പ്രേക്ഷകന്..വളരെ വേഗത്തിൽ സഞ്ചരിക്കുന്ന ഒരു ത്രില്ലറല്ല മറിച്ച് പതിയെ പതിയെ പ്രേക്ഷകനെ കഥാപാത്രങ്ങളുടെ മനോവികാരങ്ങളോട് അടുപ്പിക്കുന്ന ഒരു ചിത്രമാണ് സംവിധായകൻ ഒരുക്കിയിരിക്കുന്നത്..

കേന്ദ്രകഥാപാത്രമായ Dormoറെ സ്ക്രീനിൽ ഗംഭീരമാക്കിയത് Al Pacino ആണ്.. ഗംഭീര പ്രകടനമാണ് അദ്ധേഹം കാഴ്ച്ചവെച്ചത്.. Robin williams അവതരിപ്പിച്ച Walter Finch എന്ന കഥാപാത്രമാണ് സിനിമയിലെ മുഖ്യ ആകർഷണമായ മറ്റൊരു മുഖം..ഇരുവരും കാണികളെ ശരിക്കും ഞെട്ടിക്കുന്ന പ്രകടനം പുറത്തെടുത്തു..സിനിമയെ താങ്ങി നിർത്തുന്ന താരങ്ങളും ഇവർ തന്നെ.. Hilary Swank അവതരിപ്പിച്ച Ellie Burr എന്ന കഥാപാത്രവും മികച്ച് നിന്നു..Martin Donovan,Nicky katt,Jay Brazeau,Maura Tierney എന്നിവർ മികച്ച പിന്തുണ നൽകി..

ചിത്രത്തിന്റെ പശ്ചാത്തല സംഗീതം ഒരുക്കിയിരിക്കുന്നത് David Julyan Wally ആണ്.. ചിത്രത്തിലുടനീളം ഒരു ദുരൂഹത നിറക്കാൻ അത് ശരിക്കും സഹായിച്ചു..       Wally Pfister നിർവ്വഹിച്ച ഛായാഗ്ര നല്ലത് തന്നെ.. സംവിധായകന് മികച്ച പിന്തുണ ഇരുവരും സമ്മാനിച്ചു..

വളരെ ഫാസ്റ്റ് പേസിൽ നീങ്ങുന്ന ഒരു ത്രില്ലർ എന്ന നിലയിൽ ആരും ഈ ചിത്രത്തെ സമീപിക്കരുത്.. കഥാപാത്രങ്ങളുടെ വികാരങ്ങളിലൂടി പ്രേക്ഷകനെയും സഞ്ചരിപ്പിക്കുന്ന ഒരു സൈക്കോളജിക്കൽ അറ്റെംപ്റ്റ് ആണ് സംവിധായകൻ ഇവിടെ നടത്തിയിരിക്കുന്നത്.. ആ വിധത്തത്തിൽ ചിത്രത്തെ സമീപിച്ചാൽ മികച്ച ഒരു അനുഭവം ആവും പ്രേക്ഷകന് ലഭിക്കുക..

My Rating:: ★★★½

കൊച്ചിയിലെ മച്ചാൻമാരുടെ കഥ പറഞ്ഞ ചിത്രമായിരുന്നു Honey Bee.. സംവിധായകൻ ലാലിന്റെ മകൻ ജീൻ പോൾ ലാൽ അഥവാ ലാൽ ജൂനിയറിന്റെ ആദ്യ സംവിധാനസംരംഭം.. വെള്ളമടിയും ദ്വയാർഥപ്രയോഗങ്ങളും ആവോളമാണ്ടായിരുന്ന ചിത്രത്തെ കേരളക്കര ഒന്നടങ്കം ഏറ്റെടുത്തിരുന്നു..ആസിഫലിയുടെ കരിയറിലെ തന്നെ ഏറ്റവും വലിയ വിജയമായി മാറി ചിത്രം..അതിന് ഒരു രണ്ടാം ഭാഗം കൂടി വന്നിരിക്കുന്നു.. അതേ മച്ചാൻമാരുമായി..

ആദ്യഭാഗത്തിലെ അവസാന 2 രംഗങ്ങൾ..സെബാനും എയ്ഞ്ചലും ആത്മഹത്യ ചെയ്യാൻ കടലിൽ ചാടുന്നതും പിന്നെ അച്ഛന്റെ ശവക്കല്ലറയുടെ അടുത്ത് നിന്ന് പുണ്യാളൻ ഫാമിലിയും സെബാനും കൂട്ടരും പ്രാർഥിച്ച് നിൽക്കുന്നതും.. ഈ 2 രംഗങ്ങൾക്കിടയിൽ എന്ത് സംഭവിച്ചു എന്നതാണ് Honey Bee 2.. ആത്മഹത്യാ ശ്രമത്തിൽ നിന്ന് രക്ഷപ്പെടുന്ന ഇരുവരുടെയും കല്യാണം നടത്താൻ പുണ്യാളൻ ഫാമിലി തീരുമാനിക്കുന്നു..അത് സെബാന്റെ കുടുംബത്തെ അറിയിക്കുകയും ചെയ്യുന്നു.. തുടർന്നുണ്ടാകുന്ന സംഭവ വികാസങ്ങളാണ് ചിത്രം കൈകാര്യം ചെയ്യുന്നത്..

ഉയർന്ന നിലയിലുള്ള മാതാപിതാക്കളും കുടുംബത്തിന്റെ സ്റ്റാറ്റസും ഒരു ഘട്ടത്തിൽ പ്രശ്നമായി തോന്നുന്നു സെബാന്.. അത്കൊണ്ട് തന്നെ മുന്നിൽ കാണുന്ന എല്ലാ ചെയ്തികളും അവന് പരിഹാസമായി തോന്നുന്നു.. അവനിൽ അത് കടുത്ത മാനസിക സംഘർഷം ഉണ്ടാക്കുന്നു.. അങ്ങനെ നീണ്ട് നീണ്ട് പോവുകയാണ് ചിത്രത്തിന്റെ കഥ..

ജീൻ പോൾ തന്നെയാണ് ചിത്രത്തിന്റെ രണ്ടാം ഭാഗവും തിരക്കഥയെഴുതി സംവിധാനം ചെയ്തിരിക്കുന്നത്.. മോശം തിരക്കഥ തന്നെയാണ് ചിത്രത്തിന്റേത്.. ഒരു അന്തവും കുന്തവും ഇല്ലാത്ത പോക്കും തട്ടിക്കൂട്ട് ക്ലൈമാക്സും ചിത്രത്തെ പിന്നോട്ട് വലിക്കുന്നു..വേഗത്തിൽ പോയ ആദ്യ പകുതി എടുത്തുപറയത്തക്ക മോശായി തോന്നിയില്ല.. ശരാശരിയിൽ ഒതുങ്ങിയെങ്കിലും പ്രേക്ഷകരെ ബോറടിപ്പിച്ചില്ല..എന്നാൽ ഇടവേള കഴിഞ്ഞ് അങ്ങോട്ട് എന്ത് ചെയ്യണമെന്നറിയാതെ സംവിധായകൻ കുഴങ്ങിയതായി തോന്നി.. ചുമ്മാ എന്തൊക്കെയോ കാട്ടിക്കൂട്ടി ചിത്രം അവസാനിപ്പിച്ചു..

ആദ്യഭാഗത്തിലെ പോലെ സെബാനെ അവതരിപ്പിച്ചത് ആസിഫലിയാണ്..കേന്ദ്രകഥാപാത്രമായ സെബാന്റെ മാനസിക പിരിമുറക്കങ്ങൾ  കാണുമ്പോൾ പ്രേക്ഷകനിൽ അത് എന്തോരം പിരിമുറുക്കങ്ങളാണോ ഉണ്ടാക്കിയത്.. ചില ഘട്ടങ്ങളിൽ ഒട്ടും തൃപ്തികരമായിരുന്നില്ല കഥാപാത്രത്തിന്റെ നിർവചനം..എന്നാൽ ആസിഫലി സെബാന്റെ വേഷം തെറ്റില്ലാതെ ചെയ്തു.. ആദ്യഭാഗത്തിൽ നിന്ന് അധികമായി ശ്രീനിവാസനും ലെനയും ചിത്രത്തിൽ ഉണ്ടായിരുന്നു..ഇരുവരും കിട്ടിയ വേഷം ഭംഗിയാക്കി.. പുണ്യാളൻസ് ഫാമിലിയിലെ അംഗങ്ങളെല്ലാം മികച്ച പ്രകടനം കാഴ്ച്ച വെച്ചു.. ലാൽ, സുരേഷ് കൃഷ്ണ, അമിത്, അസിം ജമാൽ എന്നിവർ തങ്ങളുടെ വേഷങ്ങൾ നല്ല രീതിയിൽ കൈകാര്യം ചെയ്തു.. ഭാവനയ്ക്ക് കാര്യമായി ഒന്നും ചെയ്യാനുള്ളതായി തോന്നിയില്ല..



ചിത്രത്തെ കുറച്ചെങ്കിലും പിടിച്ച്
നിർത്താൻ സഹായിച്ചത് ഇടക്കിടെ
വരുന്ന കോമഡികളാണ്.. എന്നാൽ ആദ്യഭാഗവുമായി താരതമ്യം ചെയ്യുമ്പോൾ കോമഡിയും കുറവായിരുന്നു.. ശ്രീനാഥ് ഭാസിയും ബാലു വർഗീസും പ്രേക്ഷകരെ ചിരിപ്പിക്കുന്നതിൽ മുഖ്യപങ്ക് വഹിച്ചു.. ദ്വയാർഥപ്രയോഗങ്ങളും ആദ്യഭാഗത്തിലേത് പോലെ തന്നെ ഇതിലും ആവോളമുണ്ടായിരുന്നു.. ബാബുരാജും സംഘവും നയിക്കുന്ന ഇംഗ്ലീഷ് ഡയലോഗുകൾ ഇടക്ക് ചിരിപ്പിക്കുകയും തുടരെ തുടരെ പ്രയോഗിച്ച് വെറുപ്പിക്കുകയും ചെയ്തു..എന്നിരുന്നാലും ചിരിക്ക് വക നൽകുന്നുണ്ട് ചിത്രം..

ചിത്രത്തിന്റെ ഛായാഗ്രഹണം നിർവ്വഹിച്ചിരിക്കുന്നത് ആൽബിയും സംഗീതം നിർവ്വഹിച്ചിരിക്കുന്നത് ദീപക് ദേവുമാണ്.. നല്ല രീതിയിൽ തന്നെ ഇരുവരും തങ്ങളുടെ ജോലി ചെയ്തു.. ആദ്യ പകുതിയിലെ ഗാനം ശരാശരിയായി തോന്നിയപ്പോൾ രണ്ടാം പകുതിയിലെ ഗാനം ലാഗടിച്ച ചിത്രത്തിന് ഒരു ഉണർവ്വേകി.. എന്നാൽ ശേഷം വീണ്ടും പഴയത് പോലെയായി.. ചിത്രത്തിന് ശേഷം ഉണ്ടായിരുന്ന ' നുമ്മട കൊച്ചി' കൂടി കേൾക്കാൻ നിൽക്കാനുള്ള ക്ഷമ ഉണ്ടായിരുന്നില്ല..

ഭാഗ്യത്തിന് ടീസറും ട്രെയിലറും ഒന്നും ഇല്ലാതിരുന്നത് കൊണ്ട് ചിത്രം കാണുന്നതിന് മുമ്പ് അമിതപ്രതീക്ഷ ഒന്നും ഇല്ലായിരുന്നു.. എന്നിട്ട്കൂടി ശരാശരിയിൽ താഴെ സംതൃപ്തി മാത്രമാണ് ചിത്രത്തിന് സമ്മാനിക്കാനായത്.. വലിയ പ്രതീക്ഷകളില്ലാതെ പോയാൽ ശരാശരിയോ അതിൽ താഴെയോ സംതൃപ്തി നൽകാൻ മാത്രമേ ചിത്രത്തിന് സാധിക്കൂ..

My Rating:: ★★☆☆☆

Ha-Kyungന്റെ മകളെ തട്ടിക്കൊണ്ടുപോയി കൊലപ്പെടുത്തിയിട്ട് 15 വർഷം തികയാൻ 5 ദിവസം മാത്രമാണ് അവശേഷിക്കുന്നത്.. 15 വർഷം തികയുന്നതോടെ കേസിന്റെ statute of limitations എത്തുകയും ചെയ്യും..അതുവരെ കേസ് അന്വേഷിച്ച Chung-Ho ആവട്ടെ കൊലയാളിയെ പറ്റി യാതൊരു സൂചനയും ലഭിക്കാത്തതിൽ മാതാവിനെ പോലെ തന്നെ ദു:ഖിതനാണ്.. സമയപരിധി തീരുന്നതിന് 5 ദിവസം മുമ്പ് സംഭവസ്ഥലത്ത് നിന്ന് ഒരു പൂവ് ലഭിക്കുന്നു.. പോലീസിനും Haനും കൊലപാതകിക്കും മാത്രം അറിയാവുന്ന സ്ഥലമായതിനാൽ കൊലപാതകിയെ കണ്ടെത്താമെന്ന പ്രതീക്ഷ ഇരുവരിലും വീണ്ടും മുളക്കുന്നു.. തുടർന്ന് അതിനെക്കുറിച്ച് ഊർജിതമായ അന്വേഷണം നടത്തുന്നു..
കുറച്ച് ദിവസങ്ങൾക്ക് ശേഷം ഏതാണ്ട് ഇതേ Modus Operandi തന്നെ പിന്തുടരുന്ന മിസ്സിംഗ് കേസ് കൂടി രെജിസ്റ്റർ ചെയ്യപ്പെടുന്നു..15 വർഷം മുമ്പ് നടന്ന കേസുമായുള്ള സാമ്യം ഇപ്പോൾ കേസന്വേഷിക്കുന്നവരെ Chung-Hoയുടെ അടുത്തേക്ക് എത്തിക്കുന്നു.. തുടർന്ന് കൊലപാതകിയെ കണ്ടുപിടിക്കാൻ Chung-Hoയുടെയും കൂട്ടരുടെയും ശ്രമമാണ് Montage എന്ന ചിത്രത്തിൽ കാണിക്കുന്നത്..
Jeong Keun-seob തിരക്കഥയെഴുതി സംവിധാനം ചെയ്തിരിക്കുന്ന South korean Thriller ചിത്രമാണ് Montage.. അത്യന്തം കാണികളെ ത്രില്ലടിപ്പിക്കുന്നതിൽ സംവിധായകൻ പൂർണ്ണമായും വിജയിച്ചിട്ടുണ്ട്..ഗംഭീര തിരക്കഥയും സംവിധാനവും ഒരു ത്രില്ലർ ചിത്രത്തോട് നീതി പുലർത്തുന്നത് തന്നെ.. തുടക്കത്തിലെ ഒരു പരിചയപ്പെടുത്തലിന് ശേഷം പൂർണ്ണമായും ത്രില്ലിംഗ്‌ ട്രാക്കിലേക്ക് വരുന്ന ചിത്രം ഒരു നിമിഷം പോലും വിരസത നൽകുന്നില്ല.. മാത്രമല്ല പൂർണ്ണമായും ഒരു ത്രില്ലിംഗ് അനുഭൂതി കാണികൾക്ക് സമ്മാനിക്കുന്നുമുണ്ട്..
പ്രധാനമായും 3 കഥാപാത്രങ്ങളെ കേന്ദ്രീകരിച്ചാണ് ചിത്രം മുന്നോട്ട് പോവുന്നത്.. Ha - Kyung, Chung-Ho,Han-chul എന്നിവരെ ചുറ്റിപ്പറ്റിയാണ് കഥ വികസിക്കുന്നത്.. Ha-Kyungനെ സ്ക്രീനിൽ എത്തിച്ചത് Uhm Jung-hwa ആണ്.. ഗംഭീര പ്രകടനം.. ചിത്രത്തിലുടനീളം നിറഞ്ഞ് നിന്ന കഥാപാത്രമായി Haയുടേത്.. Chung-Hoയെ അവതരിപ്പിച്ചത് Kim Sang-Kyung ആണ്.. മികച്ച പ്രകടനമായിരുന്നു ഇദ്ധേഹവും കാഴ്ച്ചവെച്ചത്.. അന്വേഷണ ഉദ്യോഗസ്ഥനായി കൈയ്യടി നേടുന്ന പ്രകടനം.. Han-chulനെ അവതരിപ്പിച്ചത് Song Young-chang ആണ്.. അദ്ധേഹവും മികച്ച് നിന്നു..Yoo Seung-mok,Jung Hae-kyun,Oh Dae-hwan എന്നിവർ മറ്റ്‌ കഥാപാത്രങ്ങളെ ഭംഗിയാക്കി..
Koo Ja-wan,Ahn Hyeon-jin എന്നിവർ ചേർന്ന് നിർവ്വഹിച്ച പശ്ചാത്തല സംഗീതവും Lee Jong-yeol കൈകാര്യം ചെയ്ത ക്യാമറയും Steve M. Choe,Park Kyung-sook എന്നിവർ സംയുക്തമായി നിർവ്വഹിച്ച എഡിറ്റിംഗും ഒന്നിനൊന്ന് മികച്ച് നിന്നു.. ചിത്രത്തിന് ചടുല വേഗത സമ്മാനിക്കുന്നിൽ എല്ലാ ഘടകങ്ങളും വളരേയധികം പിന്തുണ നൽകി..
ക്ലൈമാക്സും അതിനോടടുത്ത് നിൽക്കുന്ന രംഗങ്ങളും തികച്ചും അപ്രതീക്ഷിതമായിരുന്നു.. ശരിക്കും ഞെട്ടിച്ച് കളഞ്ഞവ..ഒരു നവാഗത സംവിധായകൻ ഒരുക്കിയ ചിത്രമാണെന്ന് തോന്നിക്കാത്ത വിധം മികച്ച കരവിരുത് പ്രകടമായ ചിത്രമാണ് Montage.. ഫിലിം ഫെസ്റ്റുകളിൽ വാരിക്കൂട്ടിയ നോമിനേഷനുകളും അവാർഡുകളും ചിത്രത്തിന്റെ പ്രതിഭ വിളിച്ചോതുന്നു..
2016ൽ Teen എന്ന പേരിൽ ഹിന്ദിയിലേക്ക് ചിത്രം റീമേക്ക് ചെയ്തിരുന്നു..ത്രില്ലർ ഗണത്തിലുള്ള ചിത്രങ്ങൾ ഇഷ്ടപ്പെടുന്നവർ തീർച്ചയായും കണ്ടിരിക്കേണ്ട ഒരു ചിത്രമാണ് Montage..
My Rating:: ★★★★☆

തമിഴ് സിനിമയിൽ ത്രില്ലറുകൾക്ക് ഇത് നല്ല കാലമാണെന്ന് തോന്നുന്നു.. വൻ താരനിരകളില്ലാതെ മികച്ച തിരക്കഥയുടെയും സംവിധാനത്തിന്റെയും പിൻബലത്തോട് കൂടി ഇറങ്ങുന്ന ത്രില്ലറ്റുകൾ പ്രേക്ഷക മനസ്സുകളിൽ ഇടം നേടുന്നു എന്നുള്ളത് ശ്രദ്ധേയമായ കാര്യമാണ്.. ധ്രുവങ്ങൾ 16, മാനഗരം തുടങ്ങിയ മികച്ച ത്രില്ലറുകളുടെ കൂട്ടത്തിലേക്ക് ഇതാ ഒന്നുകൂടി.. 'കുട്രം 23'
ACP വെട്രിമാരന് ഒരേ സമയം അന്വേഷിക്കാൻ ലഭിക്കുന്നത് 2 കേസുകളാണ്.. ജെസിക്ക എന്ന സ്ത്രീയുടെ തിരോധാനവും ഒരു പള്ളീലച്ചന്റെ കൊലപാതകവും.. ഇവ തമ്മിലുള്ള ബന്ധങ്ങളെ പഠിച്ചുകൊണ്ടിരിക്കുമ്പോഴാണ് വീണ്ടുമൊരു കൊലപാതകം കൂടി നടക്കുന്നത്.. തുടർന്ന് അതൊരു സീരിയൽ കില്ലിംഗായി മാറുകയാണ്.. പിന്നീട് മരണപ്പെടുന്നതൊക്കെ സ്ത്രീകളാണ്.. എല്ലാവരിലും പൊതുവായി കാണപ്പെടുന്ന ഒരു ഘടകവും ഉണ്ട്.. തുടർന്ന് ചിത്രം പ്രേക്ഷകരെ കൂടുതൽ എൻഗേജിംഗ് ആയി മുന്നോട്ട് നയിക്കുകയാണ്..


ഈറം എന്ന ത്രില്ലർ ചിത്രത്തിന്റെ സംവിധായകൻ Arivazhagan ആണ് Kuttram 23 ഒരുക്കിയിരിക്കുന്നത്.. തിരക്കഥയും അദ്ധേഹത്തിന്റേത് തന്നെ..മികച്ച തിരക്കഥയും സംവിധാനവും നട്ടെല്ലാക്കിയ സിനിമ കാണികളെ അത്യന്തം ഉദ്വേകജനകമായ മുഹൂർത്തത്തിലൂടെയാണ് നയിക്കുന്നത്.. ഒരു നിമിഷം പോലും ബോറടിപ്പിക്കാതെ, ഒരു രംഗം പോലും അനാവശ്യമായിരുന്നു എന്ന് തോന്നിപ്പിക്കാതെ മികച്ച രീതിയിൽ അവതരിപ്പിക്കുവാൻ അദ്ധേഹത്തിനായി.. മസാല ചേരുവകളോ ഓവർ ഹീറോയിസമോ ഡയലോഗുകളോ ഒന്നും നൽകാതെ തന്മയത്വത്തോടുകൂടിയുള്ള അവതരണം.. തികച്ചും അഭിനന്ദനം അർഹിക്കുന്നു അദ്ധേഹം..



ഭാസ്കരൻ നിർവ്വഹിച്ച ഛായാഗ്രഹണം ചിത്രത്തെ വളരേയേറെ പിന്തുണച്ചിട്ടുണ്ട്.. മികച്ച ഫ്രെയിമുകളും ആംഗിളുകളും ത്രില്ലിന്റെ വേഗതയും അളവും കൂട്ടാൻ പര്യാപ്തമായിരുന്നു.. പശ്ചാത്തല സംഗീതവും ഗാനങ്ങളും ഒരുക്കിയ വിശാൽ ചന്ദ്രശേഖർ ഉറച്ച പിന്തുണ നൽകിയിട്ടുണ്ട് സംവിധായകന്.. ചിത്രത്തിൽ ഒരു ഗാനം സുന്ദരമായി കോർത്തിണക്കിയിട്ടുണ്ട്.. ഇടക്കിടെ പശ്ചാത്തല സംഗീതമായി വന്ന ഗാനവും മികച്ചതായിരുന്നു.. എഡിറ്റിംഗും ചിത്രത്തെ ചടുല വേഗത്തിൽ സഞ്ചരിക്കുന്നതിന് സഹായിച്ചിട്ടുണ്ട്..
തുടക്കം മുതൽ ഒടുക്കം വരെ ഒരേ പേസിൽ ചിത്രം സഞ്ചരിക്കുന്നുണ്ട്.. ഞെട്ടലുളവാക്കുന്ന ഇന്റർവെൽ പഞ്ചും മികച്ച ആക്ഷൻ രംഗങ്ങളും തൃപ്തികരമായ കൈല്ലമാക്സും ചിത്രം സമ്മാനിച്ചു.. ലോ ബഡ്ജറ്റിൽ സൂപ്പർ താരങ്ങളില്ലാതെ മികച്ച ഒരു ത്രില്ലറാണ് ഒരുക്കിവെച്ചിരിക്കുന്നത്.. തീയേറ്ററിൽ തന്നെ കണ്ട് ചിത്രം ആസ്വദിക്കുക.. നിരാശ സമ്മാനിക്കുകയില്ല ചിത്രം..
My Rating:: ★★★★☆

ത്രസിപ്പിക്കുന്ന ആക്ഷൻ ചിത്രങ്ങൾക്കും ത്രില്ലറുകൾക്കും പേരുകേട്ടതാണ്.. പ്രേക്ഷകരെ അങ്ങേയറ്റം ഹരം കൊള്ളിക്കുന്ന രംഗങ്ങൾ ആസ്വാദ്യകരവുമാണ്.. എന്നാൽ ചിലയിടത്തൊക്കെ ചോരചീന്തലുകൾ യാതൊരു ദയയും ദാക്ഷണ്യവും ഇല്ലാതെ കാണിക്കുകയും ചെയ്യും എന്നത് വാസ്തവം..
കൊറിയൻ ആക്ഷൻ ത്രില്ലറുകളിൽ എനിക്ക് ഇഷ്ടപ്പെട്ട ഒന്നാണ് 'The Berlin File'.. ചിത്രത്തിന്റെ പ്ലോട്ട് ഇത്തിരി സങ്കീർണ്ണമായത് കൊണ്ട് വിവരിക്കാൻ തുടങ്ങിയാൽ അങ്ങ് നീണ്ട് നീണ്ട് പോവും.. അതുകൊണ്ട് തന്നെ വളരെ ചുരുക്കി പറയാം.. ഒരു നോർത്ത് കൊറിയൻ ഏജന്റ് ഉൾപ്പെട്ട രഹസ്യ ആയുധവിൽപന.. എന്നാൽ ചതിക്കപ്പെടുന്ന അദ്ധേഹം അവിടുന്ന് രക്ഷപ്പെടുന്നു.. എന്നാൽ ഐഡന്റിറ്റി വെളിവാകുന്നു.. തന്റെ ഭാര്യ കൂടി ഉൾപ്പെട്ട ഈ സംഭവങ്ങളിൽ നിന്നും തങ്ങളെ വേട്ടയാടുന്നവരിൽ നിന്നും രക്ഷപ്പെടാനുള്ള അവരുടെ ശ്രമം..
സമ്പത്തിനും പദവിക്കും വേണ്ടിയുള്ള ചതി.. ഇതാണ് ഒറ്റവാക്കിൽ സിനിമ..തുടക്കം മുതൽ തന്നെ വളരെ വേഗത്തിലാണ് ചിത്രം സഞ്ചരിക്കുന്നത്.. അതുകൊണ്ട് തന്നെ തെല്ലും നീരസം തോന്നിയില്ല ചിത്രത്തിലുടനീളം.. ഇടക്കിടക്ക് പല വഴിത്തിരിവുകളും സിനിമയിൽ വന്ന് ചേരുന്നുണ്ട്.. ചിലയിടങ്ങളിൽ ചിത്രത്തിൽ നിന്ന് ശ്രദ്ധ തെറ്റിയാൽ ആ ഒഴുക്ക് നഷ്ടപ്പെടുമെന്ന് തോന്നി..
Ryoo Seung-wan തിരക്കഥ എഴുതി സംവിധാനം ചെയ്ത ചിത്രമാണ് The Berlin file.. ഒരു Spy movie എന്ന നിലയിൽ വളരേ മികച്ച, ത്രില്ലടിപ്പിക്കുന്ന ചിത്രമാണ് ഇത്.. തിരക്കഥയും സംവിധാനമികവും ചിത്രത്തിന് മികച്ച പിന്തുണയാണ് നൽകിയിരിക്കുന്നത്.. വളരേ വേഗതയിൽ ചിത്രത്തെ മുന്നോട്ട് കൊണ്ട് പോവാനും അത് സഹായിച്ചു..
ചിത്രത്തിന്റെ കാസ്റ്റിംഗ് മികച്ചതായിരുന്നു.. കേന്ദ്രകഥാപാത്രത്തെ അവതരിപ്പിച്ച Jung Woo-Ha ആണ് എടുത്തു പറയേണ്ട താരം.. The Chaser,The terror live,the client തുടങ്ങിയ ചിത്രങ്ങളിലൂടെ എന്റെ പ്രിയ താരമായി മാറിയ അദ്ധേഹം ഈ ചിത്രത്തിലും എന്നെ പൂർണ്ണ തൃപ്തനാക്കി.. മികച്ച അഭിനയം കാഴ്ച്ച വെച്ചു അദ്ധേഹം.. വൈകാരിക രംഗങ്ങളിലും ആക്ഷൻ രംഗങ്ങളിലുമൊക്കെ കൈയ്യടി നേടുന്നു അദ്ധേഹം.. Suk-Kyu Han അവതരിപ്പിച്ച ഭാര്യ വേഷവും മികച്ചതായിരുന്നു..Ryoo Seung-bum,Han Suk-kyu, Numan Acar, Werner Daehn എന്നിവർ മികച്ച പിന്തുണ നൽകി..
ടെക്നിക്കൽ സൈഡിൽ എല്ലാ അംഗങ്ങളും അഭിനന്ദനം അർഹിക്കുന്നു.. ഛായാഗ്രഹണവും പശ്ചാത്തല സംഗീതവും എഡിറ്റിംഗുമെല്ലാം ഒന്നിനൊന്ന് മികച്ച് നിന്നു.. ക്യാമറ ആംഗിളുകളും ഷോട്ടുകളും മികച്ച ത്രില്ലിംഗ്‌ ഫീൽ സമ്മാനിച്ചു. Young Hwan-choi ആണ് ക്യാമറ കൈകാര്യം ചെയ്തിരിക്കുന്നത്.. പശ്ചാത്തല സംഗീതം ക്യാമറയോടൊപ്പം തന്നെ മികച്ച് നിന്നു.. Yeung wook-jo ആണ് സംഗീതം നിർവ്വഹിച്ചിരിക്കുന്നത്..Kim Jae-bum, Kim Sang-bum എന്നിവർ ചേർന്ന് നിർവ്വഹിച്ചിരിക്കുന്ന എഡിറ്റിംഗ് ഗംഭീരമാണ്.. ആക്ഷൻ രംഗങ്ങളൊക്കെ ചടുല വേഗത്തിൽ കോർത്തിണക്കി കാണികളെ ശരിക്കും ത്രില്ലടിപ്പിക്കാൻ പര്യാപ്തമാണ്..
രാജ്യാന്തര ചലച്ചിത്ര മേളകളിൽ അനവധി പുരസ്കാരങ്ങളും നോമിനേഷ്ണുകളും വാരിക്കൂട്ടിയ ചിത്രം മികച്ചൊരു 'ആക്ഷൻ-ത്രില്ലർ' ആണ്.. മറ്റ് ചില ചിത്രങ്ങളുടെ നിഴൽ ഇതിൽ ഉണ്ടെന്ന് പറയപ്പെടുന്നെങ്കിൽ കൂടി..
My Rating:: ★★★½

ജർമൻ- നാസി ക്യാമ്പുകളിലേക്ക് തടവിലാക്കിക്കൊണ്ടുവരുന്നരിൽ നിന്ന് കുറച്ച് പേരെ ഒഴിച്ച് ബാക്കിയുള്ളവരെ ഉടനടി കൊല്ലാറാണ് പതിവ്.. ഒഴിച്ച് നിർത്തുന്നവരെ ഉപയോഗിച്ച് നാസികൾ ഒരു ഗ്രൂപ്പ് തുടങ്ങും.. അവർക്ക് വേണ്ടി പണിയെടുക്കാനും കൂട്ടക്കൊലയിൽ മരിച്ച് വീഴുന്നവരുടെ ശവശരീരങ്ങൾ മറവ് ചെയ്യുന്നതിനുമൊക്കെ അവരെയാണ് ഉപയോഗിക്കാറ്.. ആ കൂട്ടത്തെയാണ് Sonderkommandos എന്ന് വിളിക്കുന്നത്.. വളരെ ദയനീയമാണ് അവരുടെ അവസ്ഥ.. മരിച്ച് വീണ് കിടക്കുന്നവരിൽ തങ്ങളുടെ അടുത്ത ബന്ധുക്കളും സുഹൃത്തുക്കളുമൊക്കെ കാണും.. എന്നാൽ അതൊക്കെ കണ്ട് വിഷമം അടക്കിപ്പിടിച്ച് പണിയെടുക്കുകയല്ലാതെ അവർക്ക് മറ്റു വഴികളില്ല.. പ്രതികരിക്കാൻ തുനിഞ്ഞാൽ പ്രതിഫലം മരണം തന്നെ.. ഇതിലും ഭേദം സ്വയം ജീവനൊടുക്കലാണെന്ന് തോന്നുന്ന പല നിമിഷങ്ങളിലൂടെയും കടന്ന് പോവേണ്ടി വരും അവർക്ക്..
saul Aaslandeറും ഇത്തരത്തിൽ Sonderkommandosൽ ഒരുവനാണ്.. 1944ൽ നാസികൾ ഹങ്കറിയിൽ നിന്ന് അടിമകളാക്കി കൊണ്ടുവന്നവരിൽ ഒരുവൻ.. മരിച്ചവരുടെ വസ്ത്രങ്ങളിൽ നിന്ന് വിലപിടിപ്പുള്ള വസ്തുക്കൾ കണ്ട്പിടിക്കുക, ഗ്യാസ് ചേമ്പറിൽ കൊല്ലപ്പെട്ടു കിടക്കുന്നവരുടെ ശവശരീരങ്ങൾ അവിടെ നിന്ന് നീക്കം ചെയ്യുക, തറയിലെ ചോരപ്പാടുകൾ കഴുകി വൃത്തിയാക്കുക തുടങ്ങിയവ അദ്ധേഹത്തിന്നുള്ള അനേകം ജോലികളിൽ ചിലത് മാത്രം.. ദിവസേന എണ്ണമറ്റ മൃതദേഹങ്ങൾ കണ്ട് കണ്ട് മനസ്സ് ഏതാണ്ട് അതിനോട് പൊരുത്തപ്പെട്ട് തുടങ്ങിയ രീതിയിലാണ് അദ്ധേഹത്തിന്റെ നടപ്പും മുഖഭാവവും.. വളരെ സൗമ്യതയും പക്വതയും നിറഞ്ഞ സ്വഭാവം.. ഇത്തരത്തിലുള്ള Saulന്റെ കഥയാണ് Son of Saul..
ഒരുദിവസം ജോലിക്കിടയിൽ ഒരു കുട്ടിയെ അവശനായ നിലയിൽ ക്യാമ്പിൽ കണ്ടെത്തി.. എന്നാൽ പരിശോധനക്കെത്തിയ ഡോക്ടർ കുട്ടിയെ രക്ഷിക്കാൻ ശ്രമിക്കുന്നതിന് പകരം അവനെ കൊല്ലുന്നതാണ് Saul കണ്ടത്.. കുട്ടിയുടെ മൃതദേഹം പോസ്റ്റ്മാർട്ടം ചെയ്യുന്നതിന് പകരം മറവ് ചെയ്യുന്നതിനായുള്ള അനുവാദം ഡോക്ടറിൽ നിന്ന് Saul വാങ്ങുന്നു..തുടർന്ന് മറ്റാരും അറിയാതെ മൃതദേഹം മറവ് ചെയ്യാനുള്ള Saulന്റെ ശ്രമമാണ് ചിത്രം ദൃശ്യവത്കരിച്ചിരിക്കുന്നത്..
Laszlo Nemez ആണ് ഈ ഹങ്കേറിയൻ ചിത്രത്തിന്റെ സംവിധാനം ചെയ്തിരിക്കുന്നത്.. Clara Royeറും Laszlo Nemeസും ചേർന്നാണ് ചിത്രത്തിന്റെ തിരക്കഥ ഒരുക്കിയിരിക്കുന്നത്..
രണ്ടാം ലോക മഹായുദ്ധകാലത്തെ Auschwitz camp ആണ് സംഭവസ്ഥലം.. Saul എന്ന തടവുകാരന്റെ 2 ദിവസം.. അതാണ് ചിത്രത്തിൽ കാണിക്കുന്നത്..
Saul എന്ന തടവുകാരന് സ്ക്രീനിൽ ജീവൻ നൽകിയത് Geza Rohrig ആണ്..Saul ആയി അദ്ധേഹം ജീവിക്കുകയായിരുന്നു.. അദ്ധേഹമാണ് ചിത്രത്തിലുടനീളം സ്ക്രീനിൽ നിറഞ്ഞ് നിന്നത്..എല്ലാ ഭാവങ്ങളും അദ്ധേഹത്തിന്റെ മുഖത്ത് പ്രകടമായിരുന്നു.. Levente Molnar, Urs Rechn, Sandor Zsoter എന്നിവർ മറ്റ് പ്രമുഖ കഥാപാത്രങ്ങളെ അവതരിപ്പിച്ചത്.. എല്ലാരും ഗംഭീര പ്രകടനമായിരുന്നു..
Laszlo Melis ആണ് സംഗീതം നിർവ്വഹിച്ചിരിക്കുന്നത്..എന്നാൽ ചിത്രത്തിൽ പശ്ചാത്തല സംഗീതം വളരേ കുറച്ച് സ്ഥലത്ത് മാത്രമേ ഉള്ളൂ.. Matyas Erdely നിർവ്വഹിച്ച ഛായാഗ്രഹണം ആണ് ചിത്രത്തിന്റെ പ്രധാന ആകർഷണം.. ജർമൻ ക്യാമ്പിലെ ക്രൂര ദൃശ്യങ്ങളൊക്കെ കാണികളിൽ നോവ് ഉണർത്തുന്നുണ്ട്..
ഒട്ടേറെ ഫിലിം ഫെസ്റ്റുകളിൽ ചിത്രം പ്രദർശിപ്പിച്ചിട്ടുണ്ട്.. 2015 Cannes film festൽ  Grand Prix പുരസ്കാരം കരസ്ഥമാക്കി.. ഓസ്കാർ അവാർഡ് നിശയിൽ മികച്ച വിദേശ ചിത്രത്തിനുള്ള അവാർഡ് ചിത്രം നേടി.. Golden Globe അവാർഡിലും മികച്ച വിദേശ ചിത്രത്തിനുള്ള പുരസ്കാരവും ചിത്രത്തിന് ലഭിച്ചു..
വളരെ പതിഞ്ഞ താളത്തിലാണ് ചിത്രം തീരുന്നത് വരെ സഞ്ചരിക്കുന്നത്.. അതുകൊണ്ട് തന്നെ എല്ലാവർക്കും ഒരുപോലെ ചിത്രം ഇഷ്ടപ്പെടണമെന്നില്ല.. എന്നാൽ എല്ലാത്തരം സിനിമകളെയും സ്നേഹിക്കുന്നവർക്ക് മികച്ചൊരു ചോയ്സാണ് Son of Saul..
My Rating:: ★★★½

'ഒരമ്മ തന്റെ മകനെ രക്ഷിക്കാൻ ഏതറ്റം വരെ പോവും'.. ഒറ്റവാക്കിൽ പറഞ്ഞാൽ ഇതാണ് സൈറ ബാനു.. മഞ്ജു വാര്യർ ആണ് കേന്ദ്ര കഥാപാത്രമായ സൈറ ബാനുവിനെ അവതരിപ്പിച്ചിരിക്കുന്നത്.. 'എന്റെ സൂര്യപുത്രിക്ക്' എന്ന ചിത്രത്തിലൂടെ മലയാളികളുടെ പ്രിയ നായികയായി മാറിയ അമല രണ്ട് പതിറ്റാണ്ടിന് ശേഷം തിരിച്ചുവരവ് നടത്തുന്ന സിനിമ എന്ന പ്രത്യേകതയും സൈറ ബാനുവിനുണ്ട്.. മഞ്ജുവും അമലയും ആദ്യമായി ഒന്നിക്കുന്ന ചിത്രവും ഇത് തന്നെ.. ടീസറും ട്രൈലറും നൽകിയ പ്രതീക്ഷകളും വലുത് തന്നെ.. അങ്ങനെ ഒട്ടേറെ പ്രത്യേകതകളുമായാണ് ചിത്രം തീയേറ്ററിലെത്തിയത്.


സൈറ ബാനുവും മകൻ ജോഷ്വയും തമ്മിലുള്ള സ്നേഹബന്ധത്തിലൂടെയാണ് കഥ മുന്നോട്ട് പോവുന്നത്.. പോസ്റ്റ് വുമൺ ആയി ജോലി ചെയ്യുന്ന സ്ത്രീയാണ് സൈറ..ജോഷ്യയാവട്ടെ ലോ കോളേജ് വിദ്യാർഥിയും.. ഒരു അമ്മ-മകൻ ബന്ധത്തിന് പുറമേ മികച്ച സുഹൃത്തുക്കൾ കൂടിയാണ് അവർ..പഠനത്തിന് പുറമേ തന്റെ അച്ഛനെ പോലെ ഫോട്ടോഗ്രഫിയിലും കമ്പമുണ്ട് ജോഷ്വയ്ക്ക്.. അങ്ങനെ അവൻ ഒരു ഫോട്ടോഗ്രഫി കോണ്ടെസ്റ്റിൽ വിജയിക്കുകയും വിദേശത്ത് പഠിക്കുവാനുള്ള അവസരവും ലഭിക്കുന്നു.. എന്നാൽ അപ്രതീക്ഷിതമായി ജോഷ്വ ഒരു കേസിൽ പെടുന്നു.. തുടർന്ന് അതിൽ നിന്ന് ജോഷ്വയെ രക്ഷിക്കാൻ സൈറ ബാനു നടത്തുന്ന നിയമപോരാട്ടമാണ് ചിത്രത്തിൽ പറയുന്നത്..


ആദ്യ പകുതിയിൽ ഒരു ഫാമിലി ഡ്രാമ ആയി മുന്നേറുന്ന ചിത്രം രണ്ടാം പകുതിയിൽ ഒരു കോർട്ട് റൂം ഡ്രാമ എന്ന ശ്രേണിയിലേക്ക് വഴിതിരിയുന്നു.. ചെറിയ ഒരു സസ്പെൻസ് ത്രില്ലർ മോഡും ചിത്രം സമ്മാനിക്കുന്നു.. സൈറയും ജോഷ്വയും തമ്മിലുള്ള സ്നേഹബന്ധം മനോഹരമായി ആവിഷ്കരിച്ചിട്ടുണ്ട് ചിത്രത്തിൽ.. അതുപോലെ തന്നെ കോർട്ട് റൂം രംഗങ്ങളൊക്കെ മികച്ച രീതിയിൽ അവതരിപ്പിച്ചിട്ടുണ്ട്..
നവാഗതനായ Antony Sony ആണ് ചിത്രം സംവിധാനം ചെയ്തിരിക്കുന്നത്.. ആദ്യ ചിത്രമെന്ന നിലയിൽ സംവിധായകന്റെ മനോഹരമായ ഒരു സൃഷ്ടിയാണ് സൈറ ബാനു.. Bipin Chandran, R.J shaan എന്നിവർ ചേർന്നാണ് തിരക്കഥ തയാറാക്കിയിരിക്കുന്നത്.. സംഭാഷണം രചിച്ചിരിക്കുന്നത് Bipin Chandran ആണ്.. ചുംബന സമരവും കേരളത്തിലേക്ക് ബംഗാളികളുടെ കുത്തൊഴുക്കും ആരും തിരിഞ്ഞ് നോക്കാനില്ലാത്ത ഹിറ്റ് & റൺ കേസുകളും എല്ലാം ചിത്രം പ്രതിപാദിക്കുന്നുണ്ട്.. അവയെ കോർത്തിണക്കിയതും നല്ല രീതിയിൽ തന്നെ.. മെലോഡ്രാമയിലേക്ക് കൂപ്പ് കുത്താവുന്ന രംഗങ്ങളൊക്കെ മികച്ച രീതിയിൽ അവതരിപ്പിച്ചത് തിരക്കഥയുടെയും സംവിധാനത്തിന്റെയും മികവ് കാണിക്കുന്നു..


മഞ്ജു വാര്യർ അവതരിപ്പിച്ച സൈറ ബാനു തന്നെയാണ് ചിത്രത്തിന്റെ ഹൈലൈറ്റ്..ആദ്യ ചില രംങ്ങളിൽ ചില കോമഡികൾ പാളിപ്പോയെങ്കിലും പിന്നീടങ്ങോട്ട് മികച്ച പ്രകടനം കാഴ്ച്ചവെച്ചു.. ജോഷ്വയുടെ കാമുകിയുമായുള്ള കൂടിക്കാഴ്ച്ച രംഗത്ത് മഞ്ജുവിന്റെ മുഖത്ത് വിരിഞ്ഞ ഭാവങ്ങൾ ശരിക്കും ചിരിയുണർത്തി.. മകനുമായി പിണങ്ങുന്ന രംഗവും കോർട്ട് റൂം സീനുകളും തന്മയത്വത്തോടെ അവതരിപ്പിച്ചു.. അമലയുടെ രണ്ടാം വരവ് തന്റെ സാന്നിധ്യം അറിയിച്ച് കൊണ്ട് തന്നെ ഭംഗിയാക്കി.. ലിപ് സിങ്കിൽ പോരായ്മ ഉണ്ടായിരുന്നെങ്കിലും അഡ്വ: ആനി ജോൺ തറവാടിയുടെ വേഷം നല്ല രീതിയിൽ സ്ക്രീനിലെത്തിച്ചു.. ഷെയ്ൻ നിഗം ആണ് ജോഷ്വയുടെ വേഷം അവതരിപ്പിച്ചത്.. കിസ്മത്തിന് ശേഷം ഷെയ്ൻ ചെയ്ത നല്ല വേഷം ആയിരുന്നു ജോഷ്വ.. ഗണേഷ് കുമാർ, ജോയ് മാത്യു, ജോൺ പോൾ, നിരഞ്ജന എന്നിവർ മറ്റ് വേഷങ്ങൾ കൈകാര്യം ചെയ്തു..
മെജോ ജോസഫ് ആണ് ചിത്രത്തിന്റെ സംഗീതം കൈകാര്യം ചെയ്തിരിക്കുന്നത്.പാട്ടുകൾ ശരാശരിയിൽ ഒതുങ്ങിയപ്പോൾ പശ്ചാത്തല സംഗീതം മികച്ചു നിന്നു.. ആദ്യ പകുതിയുടേതിനേക്കാൾ മികച്ചതായിരുന്നു രണ്ടാം പകുതിയിലേത്..
ഛായാഗ്രഹണം നിർവ്വഹിച്ചിരിക്കുന്നത് Abdul Rahim ആണ്.. നല്ല രീതിയിൽ തന്നെ അത് കൈകാര്യം ചെയ്തു.. എഡിറ്റിം‌ഗ് സാഗർ ദാസ് നിർവ്വഹിച്ചു.. Eros international ആണ് ചിത്രം തിയേറ്ററിൽ എത്തിച്ചിരിക്കുന്നത്ത്..
ചിത്രത്തിന്റെ ആസ്വാദനത്തിന ചെറുതായെങ്കിലും ഭംഗം വരുത്തിയത് ചിത്രത്തിന്റെ സമയദൈർഘ്യമാണ്.. രണ്ടര മണിക്കൂർ നീളുന്ന ചിത്രം ചെറുതായി ഇഴച്ചിൽ തോന്നിച്ചു.. എന്നാൽ പിന്നീട് പേസ് വീണ്ടെടുത്ത ചിത്രം ചെറിയൊരു സസ്പെൻസ് സമ്മാനിച്ച് മുന്നേറി.. അവിടെ ചില സംശയങ്ങൾ ഉദിച്ചെങ്കിലും അവസാനം എല്ലാത്തിനും തൃപ്തികരമായ മറുപടി നൽകി തൃപ്ത്തിപ്പെടുത്തി ഭംഗിയായി അവസാനിപ്പിച്ചു.. ചെറിയൊരു സന്ദേശവും ചിത്രത്തിന് നൽകാനായി.. അങ്ങനെ ആകെത്തുകയിൽ കുടുംബത്തോടൊപ്പം ധൈര്യമായി ടിക്കറ്റ് എടുത്ത് കാണാവുന്ന നല്ലൊരു ചിത്രമാണ് സൈറ ബാനു..
അടുത്ത അഴ്ച്ച മുതൽ ഇറങ്ങാനിരിക്കുന്ന സൂപ്പർതാര ചിത്രങ്ങൾക്കിടയിൽ ഈ ആഴ്ച്ചത്തെ നല്ല നൃഷ്ടികൾ മുങ്ങിപ്പോവരുതേ എന്ന് പ്രാർഥിച്ചുകൊണ്ട് നിർത്തുന്നു..
My Rating:: ★★★½

ഇന്ത്യയുടേതിൽ നിന്നൊക്കെ വിഭിന്നമാണ് മറ്റ് പല രാജ്യങ്ങളിലേയും 'കോർട്ട് സിസ്റ്റം'.. അമേരിക്കയിൽ ജഡ്ജിയെ കൂടാതെ മറ്റ് 12 പേർ ജൂറികളായി വാദം കേൾക്കാനും വിധി പറയാനും കോടതി മുറിയിൽ കാണും..ക്രിമിനൽ കേസുകൾ കൈകാര്യം ചെയ്യുമ്പോൾ ജൂറിയും ചെറിയ കേസുകളിലൊക്കെ ജഡ്ജിയുമാവും വിധി പറയുക.. ജ്യൂറർമാരായി തിരഞ്ഞെടുക്കപ്പെടുന്ന 12 പേർ സമൂഹത്തിലെ സാധാരണ ജനങ്ങളുമായിരിക്കും.. ക്രിമിനൽ കേസുകളിൽ ജ്യൂറർമാരുടെ വിധി ഐക്യകണ്ഡേന പ്രഖ്യാപിക്കേണ്ടതാണ്..
ഒരു 18 വയസുകാരൻ തന്റെ അച്ഛനെ കുത്തി കൊലപ്പെടുത്തിയ കേസിലെ വാദമാണ് നടന്നുകൊണ്ടിരിക്കുന്നത്.. വാദങ്ങളൊക്കെ കേട്ട ശേഷം വിധി തീരുമാനിക്കുവാനായി ജഡ്ജി ജ്യൂറർമാർക്ക് സമയം അനുവദിക്കുന്നു.. ഏകകണ്ഠമായ തീരുമാനം കൈക്കൊള്ളണം എന്ന കാര്യം ജഡ്ജി അവരെ പ്രത്യേകം ഓർമിപ്പിക്കുകയും ചെയ്യുന്നു.. വിധിയുടെ ചർച്ച നടത്തുവാനായി ഒരു സ്വകാര്യ മുറിയിലേക്ക് പ്രവേശിക്കുന്ന അവർ പിന്നീട് സ്വന്തം കാര്യങ്ങൾ ചർച്ച ചെയ്യുന്നതിൽ വ്യാപൃതരാവുകയാണ്.. വിധി പ്രസ്താവിച്ച് പോയതിന് ശേഷമുള്ള അവരുടെ തിരക്കുകളെ പറ്റിയും പരിപാടികളെ പറ്റിയുമാവുന്നു പിന്നെ അവരുടെ ചർച്ച.. വേഗം കോടതി പിരിച്ച് വിട്ട് വീട് പിടിക്കാനുള്ള ധൃതിയിൽ എന്നോണം ആദ്യ വോട്ടെടുപ്പിൽ ഒരാളൊഴികെ ബാക്കി 11 പേരും 18 വയസുകാരനെ കുറ്റക്കാരനായി പ്രഖ്യാപിക്കുന്നു..കുറ്റക്കാരനല്ല എന്ന് പ്രഖ്യാപിച്ച ജൂറി അംഗത്തോട് ബാക്കിയുള്ളവരിൽ കടുത്ത അമർഷം സൃഷ്ടിക്കുവാൻ ഇത് കാരണമാവുന്നു.. തുടർന്ന് തന്റെ സാഹചര്യ തെളിവുകളിൽ ഉണ്ടായ തന്റെ സംശയങ്ങൾ ഉയർത്തിക്കാട്ടുവാൻ അയാൾ ശ്രമിക്കുന്നു.. ഇതാണ് '12 Angry Men' എന്ന ചിത്രത്തിന്റെ ഇതിവൃത്തം..
Reginald Rose ഒരുക്കിയ ഇതേ പേരിലുള്ള ഒരു ടെലിപ്ലേയെ ആധാരമാക്കിയാണ് 12 Angry Men എന്ന ചിത്രം ഒരുക്കിയിരിക്കുന്നത്.. ചിത്രത്തിന്റെ കഥയും തിരക്കഥയും രചിച്ചിരിക്കുന്നത് Reginald Rose തന്നെയാണ്.. നിർമാണത്തിലും അദ്ധേഹം പങ്ക് വഹിച്ചു.. Sidney Lumet ആണ് ചിത്രം സംവിധാനം ചെയ്തിരിക്കുന്നത്.. 96 മിനിറ്റ് ദൈർഘ്യമുള്ള ചിത്രത്തിന്റെ 3 മിനിറ്റ് ഒഴികെ ബാക്കി എല്ലാ രംഗവും ഒറ്റ മുറിയിലാണ് ചിത്രീകരിച്ചിരിക്കുന്നത്..
ചിത്രത്തെ പ്രേക്ഷകനിലോട്ട് അടുപ്പിക്കുന്ന ഘടകം അതിലെ അഭിനേതാക്കളുടെ അത്യുഗ്രൻ പ്രകടനമാണ്..സംഗീതത്തിനോ ക്യാമറക്കോ വലിയ പ്രാധാന്യം ഇല്ലാത്ത ചിത്രത്തിൽ തിരക്കഥയും ജ്യൂറി അംഗങ്ങളുടെ പ്രകടനവുമാണ് നട്ടെല്ലാവുന്നത്.. Henry Fondaയാണ് കുറ്റക്കാരനല്ല എന്ന വിധി പ്രസ്താവിക്കുന്ന ജ്യൂറി അംഗത്തെ അവതരിപ്പിക്കുന്നത്.. അതിഗംഭീര പ്രകടനമാണ് അദ്ധേഹം കാഴ്ച്ചവെച്ചത്.. Lee J.Cobb, John Fiedler, E E.G. Mashall, Martin Balsam എന്നിവരാണ് മറ്റ് അംഗങ്ങളെ അവതരിപ്പിച്ചതിൽ പ്രമുഖർ.. എല്ലാ ഭാവങ്ങളും ഉൾക്കൊണ്ടുകൊണ്ട് അവർ സ്ക്രീനിൽ ജീവിച്ചു എന്ന് തന്നെ പറയാം..
തുടക്കം പതിഞ്ഞ താളത്തിലാണെങ്കിലും ചർച്ച മുറുകുന്തോറും നമ്മളും അതിന്റെ ഒരു ഭാഗമാണെന്ന് തോന്നിപ്പോവും.. അത്ര മികച്ച തിരക്കഥയും ഡയലോഗുകളും ഡയലോഗ് ഡെലിവറിയുമാണ് ചിത്രത്തിലേത്.. പശ്ചാത്തല സംഗീതം വളരെ തുഛമായ സ്ഥലങ്ങളിൽ ഇടക്കെവിടെയൊക്കെയോ വന്നുപോയി.. എന്നാൽ അതിലൊന്നും നമ്മുടെ ശ്രദ്ധ പോവാത്ത വിധം ഗംഭീരമായി ഒരുക്കിയിരിക്കുകയാണ് ചിത്രം.. ഒറ്റ വാക്കിൽ പറഞ്ഞാൽ 'A classic of its kind'.. തീർച്ചയായും കണ്ടിരിക്കേണ്ട ചിത്രങ്ങളുടെ പട്ടികയിൽ ഇതും ഉൾപ്പെടുന്നു..
My Rating:: ★★★★½

കരീം ഒരു ഓസ്ട്രിച്ച് ഫാമിൽ ജോലി ചെയ്യുന്ന ഒരു സാധാരണ കുടുംബനാഥനാണ്.. ഭാര്യയും മൂന്ന് മക്കളുമടങ്ങിയതാണ് അദ്ദേഹത്തിന്റെ കുടുംബം.. ജോലിയിൽ നിന്ന് ലഭിക്കുന്ന തുഛമായ വരുമാനത്തിൽ നിന്ന് സന്തോഷ ജീവിതം കണ്ടെത്തുന്ന ഒരു കുടുംബം.. എന്നാൽ ജീവിതം മാറിമറിയുന്നത് വളരെ പെട്ടെന്നാണ്.. തന്റെ മകളുടെ ഹിയറിംഗ് എയിഡ് പ്രവർത്തന രഹിതമാവുകയും പുതിയത് വാങ്ങാൻ വളരേയേറെ തുകയുടെ ആവശ്യം വരുകയും ചെയ്ത സാഹചര്യത്തിൽ തന്നെ അദ്ദേഹത്തിന് ജോലിയിലും തിരിച്ചടി നേരിടേണ്ടി വരുന്നു.. ഫാമിൽ നിന്ന് ഒരു ഓസ്ട്രിച്ച് രക്ഷപ്പെടുന്നത് മൂലം അദ്ധേഹത്തിന് തൊഴിൽ നഷ്ടപ്പെടുന്നു.. അതിനെ കണ്ട് പിടിക്കുന്നതിനായി അദ്ധേഹം നടത്തുന്ന പരിശ്രമം അദ്ധേഹത്തിന് ആ ജോലിയുടെ ആവശ്യകതയെ എടുത്ത് കാട്ടുന്നതാണ്.. തുടർന്ന് അദ്ധേഹം അനുഭവിക്കേണ്ടി വരുന്ന യാതനകളും പരിശ്രമവുമാണ് 'The Song of Sparrows' എന്ന ചിത്രത്തിൽ കാണിക്കുന്നത്..
യാദൃഛികമായാണെങ്കിലും ടൗണിൽ ഒരു ബൈക്ക് ടാക്സി ഡ്രൈവറായി അദ്ധേഹം ജോലി നോക്കുന്നു.. മുമ്പ് ലഭിച്ചിരുന്നനേക്കാൾ കൂടുതൽ പണം ലഭിക്കുമെന്ന് മനസ്സിലായ കരീം ജോലി ഏറ്റെടുക്കുന്നു..സമ്പത്ത് ഒരുവനെ എങ്ങനെ സ്വാർഥനും അത്യാഗ്രഹിയുമാക്കുന്നുവെന്ന് പല സന്ദർഭങ്ങളിലൂടെ സംവിധായകൻ കാട്ടിത്തരുന്നു..
ലോകപ്രശസ്ത സംവിധായകൻ Majid Majidi തിരക്കഥയെഴുതി സംവിധാനം ചെയ്ത ചിത്രമാണ് The song of Sparrows.. ചിത്രം നിർമിച്ചതും അദ്ധേഹം തന്നെ.. തന്റെ എല്ലാ ചിത്രങ്ങളിലും തന്റേതായ കയ്യൊപ്പ് പതിപ്പിച്ചിട്ടുള്ള സംവിധായകനാണ് അദ്ധേഹം.. അദ്ധേഹത്തിന് ലഭിച്ച അംഗീകാരങ്ങളും പ്രേക്ഷക പിന്തുണയും അതിന് തെളിവാണ്.. സാഹചര്യങ്ങൾക്കൊത്ത് മനുഷ്യ വികാരങ്ങൾക്ക് എന്തൊക്കെ മാറ്റം സംഭവിക്കാം എന്ന് തന്റെ സിനിമയിലൂടെ സംവിധായകൻ കാട്ടിത്തരുന്നു..
കരീമിന്റെ കഥയോടൊപ്പം തന്നെ അലങ്കാര മത്സ്യം വളർത്തി വിറ്റ് അതിലൂടെ പണം സമ്പാദിക്കണമെന്ന മകന്റെ ആഗ്രഹവും ചിത്രത്തിലൂടെ പറഞ്ഞ് പോവുന്നു,.അതിനായി അവനും സുഹൃത്തുക്കളും നടത്തുന്ന പരിശ്രമം അവരുടെ ആഗ്രഹങ്ങളും സ്വപ്നങ്ങളും എത്ര ശക്തമാണെന്ന് കാട്ടിത്തരുന്നു..
കരീം എന്ന കേന്ദ്രകഥാപാത്രത്തെ Reza Najie അവതരിപ്പിച്ചു.. കരീമായി അദ്ധേഹം ജീവിച്ചു എന്ന് തന്നെ വേണമെങ്കിൽ പറയാം. അത്ര ഗംഭീര പ്രകടനം കാഴ്ച്ചവെച്ചു അദ്ധേഹം.. മികച്ച നടനുള്ള അവാർഡുകൾ പല ഫെസ്റ്റുകളിൽ നിന്നായി അദ്ധേഹത്തെ തേടിയെത്തി.. ഭാര്യ നർഗീസായി Maryam Akbari വേഷമിട്ടു.. ഒരു കുടുംബിനിയായി Maryam സ്ക്രീനിൽ നിറഞ്ഞ് നിന്നു.. മക്കളുടെ വേഷങ്ങൾ Hamid Aghazi, Schabnan Akhlaghi, Neshat Nazari എന്നിവർ മികച്ചതാക്കി..
ഛായാഗ്രഹണവും സംഗീതവും ചിത്രത്തിനോട് നീതി പുലർത്തും വിധമായിരുന്നു.. ഇറാനിന്റെ തെരുവോരങ്ങളെല്ലാം മനോഹരമായി ക്യാമറയിൽ പകർത്തിയിട്ടുണ്ട്.. പശ്ചാത്തല സംഗീതം സാഹചര്യങ്ങളോട് ചേർന്ന് നിൽക്കുന്നത് തന്നെ..
മികച്ച അന്യഭാഷാ ചിത്രത്തിനുള്ള നോമിനേഷൾ ഓസ്കാർ അവാർഡിൽ ചിത്രം കരസ്ഥമാക്കി.. മികച്ച ഒരു സിനിമ അനുഭവം പകരുന്ന ചിത്രം എല്ലാ സിനിമാ പ്രേമികളും കണ്ടിരിക്കേണ്ട ഒന്ന് തന്നെ..
My Rating:: ★★★★☆

ചെന്നൈ മഹാനഗരം.. ഒരു 'മെട്രൊപൊളിറ്റിയൻ സിറ്റി'യുടെ മുഖമല്ലാതെ മറ്റൊരു മുഖം കൂടിയുണ്ട് ചെന്നൈക്ക്.. സ്വാർഥതയുടെയും പൈശാചികതയുടെയും മുഖം.. അങ്ങനെയുള്ള ചെന്നൈയിലൂടെയാണ് 'മാനഗര'ത്തിന്റെ കഥ മുന്നേറുന്നത്.. 4 മുഖ്യ കഥാപാത്രങ്ങളിലൂടെയാണ് ചിത്രത്തിന്റെ കഥ പറഞ്ഞുപോവുന്നത്.. എന്നാൽ അവർ തമ്മിൽ യാതൊരു തരത്തിലുള്ള ബന്ധമോ മുൻ പരിചയമോ ഇല്ല.. ഒരു ആമുഖത്തിന്റെ ആവശ്യമില്ലാതെ തന്നെ 4 കഥാപാത്രങ്ങളും ചിത്രം തുടങ്ങുന്നത് മുതൽ നമ്മോട് കൂടെ ചേരുന്നു.. അവരുടെ ജീവിതവും..
നവാഗതനായ Lokesh Kanagaraj തിരക്കഥയെഴുതി സംവിധാനം ചെയ്ത ചിത്രമാണ് 'മാനഗരം'..വ്യത്യസ്ത കഥാപാത്രങ്ങൾ ഒരു പ്രത്യേക പോയിന്റിൽ വന്ന് സംയോജിക്കുന്ന പല സിനിമകളും പല ഭാഷകളിലും നാം കണ്ടിട്ടുണ്ട്.. അത്തരത്തിലുള്ള ഒരു ' ത്രില്ലർ' ചിത്രമാണിത്..D-16 പോലെ ക്ലൈമാക്സിൽ ഒരു സസ്പെൻസ് ഒളിപ്പിച്ച് വെച്ച് കഥ പറയുന്ന രീതിയിലുള്ള ത്രില്ലറല്ല, മറിച്ച് 'ഇനിയെന്ത്' എന്ന ചോദ്യം പ്രേക്ഷകനിൽ ഓരോ നിമിഷവും ജനിപ്പിക്കുന്ന ഒരു ത്രില്ലർ ചിത്രം.. തുല്യ പ്രാധാന്യമുള്ള കഥാപാത്രങ്ങളെ കൃത്യമായ പോയിന്റിൽ കണക്ട് ചെയ്യുന്നതിൽ പ്രാഗത്ഭ്യമുള്ള ഒരു സംവിധായകന്റെ കരവിരുത് പ്രകടമായിരുന്നു.. രണ്ട് മണിക്കൂർ ഇരുപത് മിനിറ്റ് പ്രേക്ഷകനെ ത്രില്ലിന്റെ കൊടുമുടി കയറ്റുവാൻ സംവിധായകന് കഴിഞ്ഞു.. ഒരു നവാഗത സംവിധായകന്റെ ചിത്രമെന്ന് വിശ്വസിക്കാൻ പറ്റാത്തവണ്ണം ഗംഭീരം.. മികച്ച തിരക്കഥക്ക് അതിന്നൊത്ത സംവിധാനമിടുക്കും.. തമിഴ് സിനിമയ്ക്ക് പുതിയൊരു വാഗ്ദാനം തന്നെയാണ് ലോകേഷ് എന്ന സംവിധായകൻ..
ചിത്രത്തിൽ പ്രധാന കഥാപാത്രങ്ങളെ അവതരിപ്പിച്ചത് ശ്രീ, സുദീപ് കിഷൻ, രജീന കസാന്ദ്ര, മുനിഷ്കന്ദ് എന്നിവരാണ്..ഇവരിൽ എന്റെ പേഴ്സണൽ ഫേവറിറ്റ് ശ്രീ ആണ്.. ഗംഭീര അഭിനയം കാഴ്ച്ചവെച്ച ശ്രീ മറ്റുള്ളവരെക്കാൾ ഒരുപടി മുകളിലായി തോന്നി.. ബാക്കിയുള്ള താരങ്ങളും മികച്ച പ്രകടനം കാഴ്ച്ചവെച്ചു..
എടുത്തുപറയേണ്ട മറ്റൊരു സംഗതി ഛായാഗ്രഹണവും സംഗീതവുമാണ്.. ചെന്നൈയുടെ എല്ലാ മുഖങ്ങളും പ്രേക്ഷകന് വ്യക്തമാക്കിത്തരുന്ന ക്യാമറയും അതിനെക്കാൾ മികച്ച പശ്ചാത്തല സംഗീതവും ചിത്രത്തിന്റെ ആഖ്യാനരീതിക്ക് നൽകിയ പിന്തുണ ചെറുതല്ല.. പ്രേക്ഷകനെ ത്രില്ലടിപ്പിച്ച് ഇരുത്തുവാൻ രണ്ട് ഘടകങ്ങളും സംവിധായകന് സഹായകമായി..ചിത്രത്തിലെ ആകെയുള്ള ഒരു ഗാനം ഇടക്ക് കല്ലുകടിയാവാതെ മനോഹരമായി സന്ദർഭത്തിനൊത്ത് കോർത്തിണക്കിയിട്ടുണ്ട് സംവിധായകൻ..
ചെന്നൈയിലെ നഗരവാസികളുടെ പല സ്വഭാവതലങ്ങൾ സിനിമയിൽ കാണിക്കുന്നുണ്ട്.. സ്വാർഥ നിറഞ്ഞ നഗരത്തിൽ സ്വന്തം തടി രക്ഷിക്കാനായി ആത്മാർഥ സുഹൃത്തിനെ പോലും വഞ്ചിക്കുന്നവരും എന്നാൽ ആളാരാണെന്നോ പേരെന്താണെന്നോ ചോദിക്കാതെ പരസ്പരം സഹായിക്കാനുള്ള മനസ്ഥിതി ഉള്ളവരുമുണ്ട്.. ഒരാൾക്ക് എന്തെങ്കിലും അപകടം പറ്റിയാൽ അത് തന്നെ ബാധിക്കാത്തത് കൊണ്ട് അതിനോട് മുഖം തിരിച്ച് നടക്കുന്നവരുമുണ്ട്.. അങ്ങനെ പല സ്വഭാവത്തിലുള്ളവരുടെ ഒരു സംഗമമാണ് ചെന്നൈ..
പേരുകേട്ട സംവിധായകരോ ഫാൻസ് പിൻബലമുള്ള അഭിനേതാക്കളോ ഇല്ലാത്തതിനാൽ വിതരണക്കാരെ കിട്ടാത്ത അനേകം ചിത്രങ്ങളുടെ പട്ടികയിൽ 'മാനഗര'വും ഉൾപ്പെടുന്നു..മൊട്ട ശിവനെയും കെട്ട ശിവനെയുമൊക്കെ തീയേറ്ററുളിൽ എത്തിക്കുന്ന വിതരണക്കാർ ഇതുപോലെയുള്ള മികച്ച ചിത്രങ്ങളോട് വിമുഖത കാട്ടുന്നത് വളരെ പരിതാപകരവും വിഷമമുണ്ടാക്കുന്ന വസ്തുതയുമാണ്..D-16 പോലെ ഈ ചിത്രവും വൈകിയെങ്കിലും കേരളത്തിലും ആരെങ്കിലുമൊക്കെ എത്തിക്കും എന്ന പ്രതീക്ഷയോടെ മൊബൈലിൽ കണ്ട് സംതൃപ്തനാവേണ്ടി വന്ന ഒരു എളിയ സിനിമാസ്നേഹി..
My Rating:: ★★★★½