Abeed Azad

🔻ലോകത്തിന്റെ ഈ പോക്കിൽ തീർത്തും അതൃപ്തയാണ് റൂത്ത്. ഈ ചിന്ത ഒരുതരം ഡിപ്രഷനിലേക്കാണ് റൂത്തിനെ നയിച്ചിരിക്കുന്നത്. താനിവിടെ ഒരിക്കലും സന്തോഷം കണ്ടെത്തില്ല എന്നൊരു തോന്നൽ. ചുറ്റുമുള്ള ആർക്കും തന്നെ സന്തോഷിപ്പിക്കാനും സാധിക്കില്ല. അവർ കൂടി തന്നെ നിരാശപ്പെടുത്തുകയാണ്. അതുകൊണ്ട് തന്നെ പേരിന് പോലും സുഹൃത്തുക്കൾ ഇല്ല റൂത്തിന്. ജീവിതം ഒരുവിധത്തിൽ മുന്നോട്ട് കൊണ്ടുപോവുമ്പോഴാണ് റൂത്തിന്റെ വീട് കൊള്ളയടിക്കപ്പെടുന്നത്. അത് വലിയൊരു മാറ്റത്തിന് വഴിതെളിക്കുന്നു.

Year : 2017
Run Time : 1h 33min

🔻തന്റെ അനുവാദമില്ലാതെ തന്റെ സാധനങ്ങൾ മറ്റൊരാൾ എടുക്കുക. അതാണ് റൂത്തിനെ ഏറ്റവും ദേഷ്യം പിടിപ്പിച്ചത്. അധികാരികളെ നീതിക്കായി സമീപിച്ചെങ്കിലും അവരുടെ തണുപ്പൻ മട്ടം ഒരിക്കലും അംഗീകരിക്കാൻ റൂത്ത് തയ്യാറായിരുന്നില്ല. ഒടുവിൽ നിയമം മാറ്റിവെച്ച് താൻ തന്നെ മുന്നിട്ടിറങ്ങിയാലേ ഇതിനൊരു പരിഹാരമാവൂ എന്ന് മനസ്സിലാക്കിയ റൂത്ത് അയൽവാസിയായ ടോണിയുമൊത്ത് കള്ളനെ തപ്പിയിറങ്ങുന്നു.

🔻ഒരു ഡ്രാമയായി തുടങ്ങിയെങ്കിലും കഥയിലേക്ക് കടന്നശേഷം വളരെ രസകരമായ ബ്ലാക്ക് ഹ്യൂമർ നിറഞ്ഞുനിൽക്കുന്ന അവതരണത്തിലൂടെയാണ് സിനിമ കടന്നുപോവുന്നത്. യാതൊരു പുതുമയുമില്ലാത്ത കഥാതന്തുവിനെ അവതരണത്തിലെ unique അപ്രോച്ചും interesting ആയ കഥാപാത്രങ്ങളുടെ സമർത്ഥമായ ഉപയോഗവും കൊണ്ട് പിടിച്ചിരുത്തുന്ന അനുഭവമാക്കി മാറ്റുന്നുണ്ട് സംവിധായകനായ Macon Blair. പതിഞ്ഞ തുടക്കത്തിന് ശേഷം നമ്മെ താല്പര്യത്തോടെ ഇരുത്തുന്നതും പുള്ളിയുടെ അവതരണത്തിലെ വൈദഗ്ധ്യമാണ്. ബ്ലാക്ക് ഹ്യൂമർ പോലും ഒരു അളവിനപ്പുറം ഉപയോഗിച്ചിട്ടില്ല എന്നതും ശ്രദ്ധേയമായ സംഗതിയാണ്.

🔻മെലനി ലിൻസ്കിയുടെ തകർപ്പൻ പ്രകടനം സിനിമയുടെ ജീവനാണ്. പല ലെയറുകൾ ഉള്ള  കഥാപാത്രത്തിനെ ഗംഭീരമായി അവതരിപ്പിച്ചിട്ടുണ്ട് മെലനി. എലീജാ വുഡ് പലപ്പോഴും ചിരിപ്പിക്കുന്നതിൽ മുന്നിട്ട് നിൽക്കുന്നുണ്ട്. ടോണിയുടെ കഥാപാത്രം പുള്ളിയുടെ പക്കൽ ഭദ്രമായിരുന്നു. പുതുമുഖങ്ങളെന്ന് തോന്നിയവർ പോലും തങ്ങളുടെ പ്രകടനം കൊണ്ട് സിനിമയുടെ നെടുന്തൂണാവുന്നുണ്ട്.

🔻ＦＩＮＡＬ ＶＥＲＤＩＣＴ🔻

വെറൈറ്റി ആഗ്രഹിക്കുന്ന ആളാണോ, എങ്കിൽ ഈ ചിത്രം ട്രൈ ചെയ്ത് നോക്കാവുന്നതാണ്. സിനിമയെ പറ്റി യാതൊരു ഐഡിയയും ഇല്ലാതെ കണ്ടതുകൊണ്ട് തന്നെ പല കാര്യങ്ങളും സർപ്രൈസ് ആയിരുന്നു. ആസ്വാദനത്തെ വലിയ രീതിയിൽ അത് തുണച്ചിട്ടുണ്ട്. ബ്ലാങ്ക് ആയി സിനിമയെ സമീപിക്കുന്നത് തന്നെയാണ് ഏറ്റവും നല്ലത്. Netflixന്റെ ബോറൻ റിലീസുകൾക്കിടയിൽ ഇത്തരത്തിലുള്ള നല്ല സിനിമകൾ ശ്രദ്ധിക്കപ്പെടാതെ പോവുന്നത് നിരാശാജനകമാണ്.

ＡＢ ＲＡＴＥＳ ★★★½

ചിത്രം Netflixലും ടെലിഗ്രാം ചാനലിലും ലഭ്യമാണ്. Abi Suggests

🔻മോഷണശ്രമത്തിനിടെ പിടിക്കപ്പെട്ട് ജയിലിൽ ആയതാണ് ലിനോ. മെക്കാനിക്ക് എന്ന നിലയിൽ വിദഗ്ധനായ ലിനോയെ തങ്ങളുടെ ടാസ്ക്  ഫോഴ്സിലെക് റെക്കമെന്റ് ചെയ്തത് ഫോഴ്‌സിനെ നയിക്കുന്ന Charas ആയിരുന്നു. അങ്ങനെ എല്ലാവരുമായും സൗഹൃദത്തിൽ കഴിഞ്ഞിരുന്ന ലിനോ വീണ്ടും മറ്റൊരു കേസിൽ പ്രതിയാക്കപ്പെട്ടിരിക്കുകയാണ്. ഫോഴ്‌സിലെ ഒരാൾ കൊല്ലപ്പെട്ടിരിക്കുന്നു. ഇനി തന്റെ നിരപരാധിത്വം തെളിയിക്കുക മാത്രമാണ് ലിനോയുടെ മുന്നിലുള്ള വഴി.

Year : 2020
Run Time : 1h 32min

🔻കഥയിൽ പുതുമകൾ കാര്യമായി ഇല്ലെങ്കിലും അതിര് കവിയാത്ത അവതരണമാണ് സിനിമയെ ആസ്വാദ്യകരമാക്കുന്നത്. മോഡിഫൈ ചെയ്ത കാറുകളും തകർപ്പൻ ഡ്രൈവർമാരും ഒരുപാടുണ്ടെങ്കിലും അനാവശ്യമായി ഒരൊറ്റ ചേസിങ്ങ് പോലും ഉൾപ്പെടുത്തിയിട്ടില്ല എന്നത് എടുത്ത് പറയേണ്ടതാണ്. മാത്രമല്ല ഒന്നര മണിക്കൂർ കൊണ്ട് കാര്യങ്ങൾ വെടിപ്പായി അവതരിപ്പിക്കുകയും ചെയ്തിട്ടുണ്ട്. നായകന് ഓവർ ഹീറോയിസമോ exaggerated എന്ന് തോന്നുന്ന രംഗങ്ങളോ ഇല്ലെന്നുള്ളതും ആശ്വാസമാണ്. എങ്കിലും ഒരു ത്രില്ലറിന് വേണ്ട ചേരുവകൾ ഭംഗിയായി കഥയിൽ ലയിപ്പിച്ചിട്ടുമുണ്ട് സംവിധായകൻ.

🔻പോലീസ് സ്റ്റേഷനിലെ ആക്ഷൻ രംഗങ്ങളും ക്ലൈമാക്സിലെ ചേസിങ്ങ് സീനുമൊക്കെ സിനിമയുടെ സ്വഭാവത്തോട് അങ്ങേയറ്റം ചേർന്ന് നിൽക്കുന്നതാണ്. ആക്ഷൻ കൊറിയോഗ്രാഫി നിലവാരം പുലർത്തിയിട്ടുണ്ട്. അതുപോലെ തന്നെ ഛായാഗ്രഹണവും പശ്ചാത്തലസംഗീതവും.

🔻ＦＩＮＡＬ ＶＥＲＤＩＣＴ🔻

ഒന്നര മണിക്കൂർ ഭേദപ്പെട്ട ഒരു ത്രില്ലർ അനുഭവം നൽകുന്നുണ്ട് Lost Bullet. നായകനെ അമാനുഷികനായി ചിത്രീകരിക്കാതെ നിരപരാധിത്വം തെളിയിക്കാനായി കഷ്ടപ്പെടുന്ന ഒരുവനായി മാത്രം അവതരിപ്പിച്ചത് നല്ലൊരു നീക്കമായിത്തോന്നി. മടുപ്പില്ലാതെ ഒറ്റയിരുപ്പിന് കണ്ടുതീർക്കാൻ നല്ലൊരു ചോയ്‌സ് തന്നെയാണ് ഈ ചിത്രം.

ＡＢ ＲＡＴＥＳ ★★★☆☆

ചിത്രം Netflixലും ടെലിഗ്രാം ചാനലിലും ലഭ്യമാണ്. Abi Suggests

🔻ചില കഥാപാത്രങ്ങളുടെ ദയനീയത കണ്ട് നിയന്ത്രിക്കാനാവാത്ത വിധം കരഞ്ഞിട്ടുണ്ടോ? നിസ്സഹായരായി നിൽക്കുന്ന അവരെക്കണ്ട് നെഞ്ച് പിടഞ്ഞിട്ടുണ്ടോ? കേവലം കെട്ടുകഥയിലെ സൃഷ്ടി എന്നതിനപ്പുറം ഇവരൊക്കെ നമ്മളെപ്പോലെ ചൂടും ചൂരുമുള്ള മനുഷ്യരാണെന്ന് അറിയുമ്പോൾ സ്തംഭിച്ച്  നിന്നുപോയിട്ടുണ്ടോ? ഈ സീരീസ് കണ്ടുകഴിഞ്ഞപ്പോൾ മേല്പറഞ്ഞതൊക്കെയും അനുഭവിച്ചറിഞ്ഞ അവസ്ഥയായിരുന്നു ഒരു പ്രേക്ഷകന് എന്ന നിലയിലും ഒരു മനുഷ്യൻ എന്ന നിലയിലും എന്റെ അവസ്ഥ.!!

Year : 2019
Episodes : 4
Run Time : 1h-1h 10min

🔻1989ലെ ഒരു രാത്രി. ജോഗിങ്ങിനായി പുറത്തേക്കിറങ്ങിയ 28കാരി ക്രൂരമായി പീഡനത്തിനിരയായി മരണത്തോട് മല്ലടിക്കുകയാണ്. ആരാണീ കുറ്റകൃത്യത്തിന് പിന്നിലെന്ന് ഒരു തുമ്പും കിട്ടാതിരുന്ന പോലീസിന്റെ മുന്നിലേക്കാണ് ഒരു പറ്റം ടീൻസ് അതേ രാത്രി ആ പ്രദേശത്ത് നടത്തിയ അഴിഞ്ഞാട്ടം പരാതിയായി എത്തുന്നത്. അന്വേഷണത്തിനായി ഇറങ്ങിയ പോലീസിന്റെ പിടിയിൽ കുറച്ചുപേർ അകപ്പെട്ടെങ്കിലും ഭൂരിഭാഗം ആൾക്കാരും രക്ഷപ്പെട്ടിരുന്നു. അറസ്റ്റ് ചെയ്യപ്പെട്ടവരാകട്ടെ 14നും 16നും ഇടയിലുള്ളവരും കറുത്തവരും. പീഡനത്തിനിരയായി ആ സ്ത്രീയെ കണ്ടെത്തിയ പ്രദേശത്ത് നിന്ന് അധികദൂരം സെൻട്രൻ പാർക്കിനില്ലാത്തതിനാൽ സംശയത്തിന്റെ ചൂണ്ടുവിരൽ നീണ്ടത് അഞ്ച് കുട്ടികളിലേക്കാണ്. ഭാവിയിൽ അവർ അറിയപ്പെട്ടത് 'Central Park Five' എന്ന പേരിലും.

🔻ഇത്തരത്തിൽ നീചമായ ഒരു പ്രവർത്തിയിൽ പങ്കാളികളാവാൻ ശാരീരികമായും മാനസികമായും പൂർണ്ണമായി പാകപ്പെടാത്തവർക്ക് മേലാണ് പോലീസ് ആ കുറ്റകൃത്യം ചുമത്താൻ ശ്രമിച്ചത് എന്നതായിരുന്നു ഈ കേസിലെ കൗതുകകരമായ വസ്തുത. മണിക്കൂറുകളോളം ചോദ്യം ചെയ്യലിന് വിധേയരായ പ്രായപൂർത്തിയാവാത്ത കുട്ടികൾ മാനസികമായി ഒരുപാട് അസ്വസ്ഥനായിരുന്നു. പോലീസുകാർ മുതലെടുത്തതും ഈ അസ്വസ്ഥതയെയാണ്. ഒന്നും ചെയ്യാതെ, തങ്ങൾക്ക് തൊട്ടപ്പുറത്ത് എന്താണ് സംഭവിച്ചതെന്ന് പോലും അറിയാത്ത 5 കുട്ടികൾ. അവരുടെ ഭാവി തന്നെ താറുമാറാവാൻ ആ രാത്രി മാത്രം മതിയായിരുന്നു.

🔻അമേരിക്കയിൽ തുടർന്നുവരുന്ന racial discriminationന്റെ ഇരകളാണ് ഈ അഞ്ച് പേർ എന്ന് ചുരുക്കത്തിൽ നമുക്ക് പറയാൻ സാധിക്കും. യാതൊരു തെളിവുകളും ഇല്ലാതെ, അന്ന് രാത്രി വീടിന് പുറത്തായിരുന്നു എന്ന ഒറ്റ കാരണം കൊണ്ട് അവരെ കുറ്റവാളികളായി കരുതുമ്പോഴും സംഭവസ്ഥലത്ത് നിന്ന് ലഭിച്ച തെളിവുകൾ യഥാർത്ഥ കുറ്റവാളികളിലേക്ക് നയിച്ചേക്കുമെന്ന ബോധ്യം ഉണ്ടാവുമ്പോഴും അവയൊക്കെയും അവഗണിച്ച് ഇവരെ തടങ്കലിലിടാൻ പോലീസിനെ പ്രേരിപ്പിച്ചത് വർണ്ണവിവേചനം തന്നെയാണ് എന്ന് നിസ്സംശയം പറയാം.  അതിനായി ഘോരഘോരം  പ്രസംഗിച്ച ഒരു മഹാൻ കൂടിയുണ്ട്. Donald Trump. അവരെ തൂക്കിലേറ്റാനായി തനിക്ക് സാധിക്കും വിധം ആ കേസിന് പബ്ലിസിറ്റി കൊടുക്കുകയായിരുന്നു ആ രാഷ്ട്രീയക്കാരൻ. ഇവയൊക്കെയും ബാധിച്ചത്  ആരോപണവിധേയരായവരുടെയും അവരുടെ കുടുംബത്തിന്റെയും ഭാവിയെ മാത്രമായിരുന്നു എന്നതാണ് വസ്തുത.

🔻ഗംഭീര അവതരണമികവ് കൊണ്ട് ഒരിക്കൽ പോലും ഒരു ഡ്രാമയായി ഫീൽ ചെയ്യാതെ ത്രില്ലറിലേക്കും ഇമോഷണൽ റോളർ കോസ്റ്റർ റൈഡിലേക്കും സീരീസിനെ അപ്ലിഫ്റ്റ് ചെയ്യുകയാണ് സംവിധായകൻ. കഥാപാത്രങ്ങളുടെ വൈകാരികചുഴിയിൽ പൂർണ്ണമായും നമ്മൾ അകപ്പെട്ടുപോവുന്നിടത്താണ് അവർ അത്രമേൽ നമ്മെ വേട്ടയാടുന്നത്. ഇമോഷണലി വളരെ ഡിസ്റ്റർബിങ്ങ് ആയ ഫീൽ നൽകുന്നുണ്ട് സീരീസ് പലപ്പോഴും. കോടതി വാദങ്ങളും വിധി പറയുന്ന രംഗവുമൊക്കെ വേറൊരു തലത്തിലേക്ക് സീരീസിനെ ഉയർത്തുകയാണ്. അവരെപ്പോലെ നമ്മളും നിസ്സഹായരായിപ്പോവുന്ന അവസ്ഥ അത്രമേൽ ദയനീയമാണ്. കണ്ണിൽ നിന്ന് വെള്ളം പൊടിയും വിധം നമ്മൾ അതിൽ പെട്ടുപോയിരിക്കും എന്നതാണ് സത്യം.

🔻കുറ്റാരോപിതരുടെ ജയിൽവാസവും അതിന് ശേഷമുള്ള ജീവിതവുമൊക്കെ കൃത്യമായി point-out ചെയ്യാൻ പിന്നണിയിലുള്ളവർക്ക് സാധിച്ചിട്ടുണ്ട്. ജയിൽവാസത്തിന് ശേഷം അവരുടെ ജീവിതം എത്രത്തോളം ദുർഘടമായിരുന്നെന്നത് നാം കാണേണ്ട കാഴ്ച തന്നെയാണ്. ജയിലിൽ അവരനുഭവിച്ച യാതനകളും അതിനെ തരണം ചെയ്യാനെടുത്ത രീതികളുമൊക്കെ അവതരിച്ച് ഫലിപ്പിക്കുന്നതിൽ അണിയറപ്രവർത്തകർ വിജയിച്ചിട്ടുണ്ട്. വൈകാരിക രംഗങ്ങൾ പരിധി കവിഞ്ഞ് ഡ്രമാറ്റിക്ക് ആക്കാതിരുന്നത് ആസ്വാദനത്തിന് നന്നേ ഗുണം ചെയ്തിട്ടുണ്ട്. റിയലിസ്റ്റിക്ക് ആയ അവതരണം പലയിടങ്ങളിലും സീരീസിന്റെ മേന്മ വർദ്ധിപ്പിച്ചിട്ടുണ്ട്. അവസാന രണ്ട് എപ്പിസോഡുകളിൽ അത് അടുത്തറിയാൻ സാധിക്കും.

🔻അപാര പെർഫോമൻസുകളുടെ അടയാളപ്പെടുത്തൽ കൂടിയാണ് ഈ സീരീസ്. ഓരോരുത്തരെയും എടുത്ത് പറയാൻ നിന്നാൽ ഉടനെങ്ങും തീരാത്തത് കൊണ്ട് അതിന് മുതിരുന്നില്ല. അഞ്ച്  പേരുടെ കഥാപാത്രങ്ങളെ രണ്ട് കാലഘട്ടങ്ങളിലായി അഭിനയിച്ച് ഫലിപ്പിച്ചവർ തങ്ങളുടെ ഭാഗം ഗംഭീരമാക്കിയിട്ടുണ്ട്. വൈകാരിക രംഗങ്ങളൊക്കെ top notch perfomance എന്ന് തന്നെ വിശേഷിപ്പിക്കാം. പല റോളുകളിലായി തിളങ്ങിയവർ ഇനിയും ഒരുപാടുണ്ട്. ടെക്നിക്കലി മികച്ചുനിൽക്കുന്നവയാണ് ഛായാഗ്രഹണവും പശ്ചാത്തലസംഗീതവും. പല രംഗങ്ങളെയും വൈകാരികമായി ഉയർത്തുന്നതിൽ അവയൊക്കെയും വലിയ പങ്ക് വഹിച്ചിട്ടുണ്ട്.

🔻ＦＩＮＡＬ ＶＥＲＤＩＣＴ🔻

Depressing, haunting, heart breaking and terrifying flick. Netflixന് ഏറ്റവും കൂടുതൽ കാഴ്ചക്കാരെ സമ്മാനിച്ച സീരീസുകളിൽ ഒന്നായി മാറാൻ 'When they see us'ന് അധികം സമയം വേണ്ടിവന്നില്ല. ജീവിതത്തിൽ തീർച്ചയായും കണ്ടിരിക്കേണ്ടവയിൽ ഒന്നായി ഞാൻ നിർദ്ദേശിക്കുന്ന സീരീസുകളിൽ മുന്തിയ സ്ഥാനം ഈ സീരീസിനുണ്ടാവും. ചുരുക്കിപ്പറഞ്ഞാൽ 'MUST WATCH, MUST WATCH, MUST WATCH'.!!

ＭＹ ＲＡＴＩＮＧ :: ★★★★½

സീരീസ് Netflixലും ടെലിഗ്രാം ചാനലിലും ലഭ്യമാണ്. Abi Suggests

🔻തന്റെ ഭാര്യയുടെ ക്യാൻസർ ആയിരുന്നു ജോസഫിനെ മാറിചിന്തിക്കാൻ പ്രേരിപ്പിച്ചത്. കൈക്കൂലി വാങ്ങിക്കാത്ത ഓഫീസറായി അഭിമാനത്തോടെ ജീവിതം നയിച്ചപ്പോഴും മനസ്സിൽ സന്തോഷവും സമാധാനവും മാത്രമായിരുന്നു. എന്നാൽ ഈ സാഹചര്യത്തിൽ മറ്റ് വഴികൾ അയാൾക്ക് മുന്നിലില്ല. അദ്ദേഹത്തിന്റെ പ്ലാൻ അനുസരിച്ച് ഒറ്റക്ക് ഇത്തരമൊരു ക്രൈം ചെയ്യുകയെന്നത് സാധ്യവുമല്ല. ഇനിയിപ്പോ മുന്നിൽ ഒറ്റ വഴിയേ ഉള്ളൂ. ഒരു കൂട്ടാളിയെ തപ്പുക.

Year : 2020
Run Time : 2h 13min

🔻ഹൈപ്പർ ലിങ്കിങ്ങ് സിനിമകൾ സൂക്ഷ്മതയോടെ കൈകാര്യം ചെയ്തില്ലെങ്കിൽ ആസ്വാദനത്തിനെ നന്നായി ബാധിക്കും. അതിനെ വളരെ സിമ്പിളായി എന്നാൽ രസകരമായി കൈകാര്യം ചെയ്തിടത്താണ് മായാബസാർ ഏറെ തൃപ്തി നൽകിയ സിനിമയായി മാറിയത്. ഒരു  ക്രൈം ആണെന്ന ചിന്ത നമ്മിൽ ജനിപ്പിക്കാതെ നർമ്മം കലർന്ന അവതരണത്തിലൂടെ വളരെ രസകരമായി പറഞ്ഞുവെക്കുന്നുണ്ട് കാര്യങ്ങൾ. ചില സമയങ്ങളിൽ അറിയാതെ തന്നെ ചിരിച്ചുപോവും നമ്മൾ. Forced ആയി തോന്നാത്ത നർമ്മങ്ങളും കഥാപാത്രങ്ങളും സിനിമയുടെ പ്രത്യേകതയാണ്. എല്ലാം തന്നെ സാഹചര്യത്തോട് ചേർന്ന് നിൽക്കുന്നവയാണ്. കഥാപാത്രങ്ങളെ ലിങ്ക് ചെയ്യുന്ന പോയിന്റൊക്കെ അത്യന്തം രസകരമാണ്. കഥയിൽ ആവശ്യമായ, എന്നാൽ അവതരണത്തിൽ ഒരൽപം വലിച്ചുനീട്ടി എന്ന് തോന്നിയ ലവ് ട്രാക്ക് മാത്രമാണ് അതിന് അപവാദം.

🔻Raj B Shettyയാണ് സിനിമയിൽ ഏറ്റവും തകർത്തത്. തുടക്കം തന്നെ പരിചയപ്പെടുത്തുന്നതും പുള്ളിയുടെ കഥാപാത്രത്തെയാണ്. പ്രകാശ് രാജിന്റെ റോളും നന്നായി ചിരിപ്പിക്കുണ്ട്. ഡാർക്ക് ഹ്യൂമർ വർക്ഔട്ട് ആവുന്നത് പുള്ളിയുടെ കഥാപാത്രത്തിലൂടെയാണ്. ബാക്കിയുള്ള അഭിനേതാക്കളും തങ്ങളുടെ റോളുകൾ ഭംഗിയാക്കിയിട്ടുണ്ട്.

🔻ＦＩＮＡＬ ＶＥＲＤＩＣＴ🔻

കന്നഡ ഇൻഡസ്ട്രിയിൽ നിന്ന് നല്ലൊരു ത്രില്ലർ മായാബസാറിലൂടെ ലഭിക്കുകയാണ്. ഡാർക്ക് മൂഡിലുള്ളതല്ല, ഡാർക്ക് ഹ്യൂമർ നിറഞ്ഞ ഒന്നാണെന്ന് പ്രത്യേകം ഓർമിപ്പിക്കുന്നു. നല്ല രസികൻ രംഗങ്ങളും കഥാപാത്രങ്ങളുമൊക്കെയായി സമയം പോവുന്നതറിയില്ല.

ＡＢ ＲＡＴＥＳ ★★★½

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻സോണി എപ്പോഴാണ് ജനിച്ചതെന്ന് എവിടെയും രേഖകളില്ല. ചെറുപ്പം മുതൽ തന്നെ ഏറെ ക്ലേശകരമായ വഴികളിലൂടെ തന്നെയാണ് അദ്ദേഹം വളർന്നു വന്നത്. ക്രൂരമായ മർദ്ദനങ്ങൾ സ്വന്തം പിതാവിൽ നിന്ന് തന്നെ ഏൽക്കേണ്ടി വന്ന, നല്ല ഓർമ്മകൾ യാതൊന്നും അവശേഷിക്കാത്ത ബാല്യത്തിലൂടെ കടന്നുവന്ന വ്യക്തി. സ്വാഭാവികമായും കുറ്റകൃത്യങ്ങളുടെ വഴിയേ അദ്ദേഹത്തിനും സഞ്ചരിക്കേണ്ടി വന്നു. എന്നാൽ ഒരു ഘട്ടത്തിൽ മനസ്സിലുണ്ടായ ചെറിയൊരു ചാഞ്ചാട്ടം അദ്ദേഹത്തിന്റെ ജാതകം തന്നെ മാറ്റിയെഴുതി. ലോകം വാഴ്ത്തിയില്ലെങ്കിൽ പോലും തന്റെ കഴിവ് കൊണ്ട് ശ്രദ്ധയാർജ്ജിച്ച ബോക്സറായി അദ്ദേഹം വളർന്നു.

Year : 2019
Run Time :1h 30min

🔻ബോക്സിങ്ങിന്റെ പര്യായമായി മാറിയ പേരാണ് മുഹമ്മദ് അലി. എന്നാൽ അദ്ദേഹം ശരവേഗത്തിൽ എങ്ങനെയാണ് റിങ്ങുകൾ കീഴടക്കിയതെന്ന് ചിന്തിച്ചിട്ടുണ്ടോ? അദ്ദേഹത്തിന്റെ വിജയത്തോടൊപ്പം ചേർത്ത് വായിക്കേണ്ട പേരാണ് സോണി ലിസ്റ്റൺ. അലിയുടെ ജീവിതത്തിൽ പ്രത്യക്ഷത്തിൽ അദ്ദേഹത്തിന് സ്വാധീനമൊന്നും ഉണ്ടായിരുന്നില്ല. എന്നാൽ സോണിയെ പരാജയപ്പെടുത്തിയതിലൂടെയാണ് അലിയുടെ കരിയർ വൻ കുതിച്ചുചാട്ടം നടത്തിയത്. തുടർന്ന് ഇരു ജീവിതങ്ങളും പ്രതീക്ഷകൾക്കുമപ്പുറം മാറ്റങ്ങളാൽ മൂടുകയായിരുന്നു.

🔻ഒരു ജിഗ്‌സോ പസിൽ പോലെ കുഴങ്ങിയ ജീവിതമായിരുന്നു സോണിയുടേത്. ആ ജീവിതമാണ് Showtimeന്റെ 90 മിനിറ്റ് നീണ്ട TV Movie നമുക്ക് കാട്ടിത്തരുന്നത്. ഒരു ഡോക്യൂമെന്ററി എന്നതിനപ്പുറം പല കാര്യങ്ങളും ചിത്രം കൈകാര്യം ചെയ്യുന്നതിൽ വിജയിച്ചിട്ടുണ്ട്. സോണിയുടെ വിവാദങ്ങൾ നിറഞ്ഞ ജീവിതത്തെ വെള്ളപൂശാതെ പെർഫെക്ട് ആയി അവതരിപ്പിച്ചിരിക്കുന്നത് കാണാം. വർഗ്ഗവിവേചനത്തിനെതിരെ പോരാടുന്നവരോട് പുച്ഛഭാവത്തിൽ സംവദിക്കുന്ന, പ്രശസ്തിക്കപ്പുറം ജനങ്ങൾ തന്നോട് സ്നേഹത്തോട് പെരുമാറണമെന്ന് മാത്രം ആഗ്രഹിച്ച ആ ജീവിതത്തെ ഗംഭീരമായി അവതരിപ്പിക്കാൻ സാധിച്ചിട്ടുണ്ട്. ഒറിജിനൽ ഫൂട്ടേജുകൾക്കൊപ്പം ഫിക്ഷണൽ ഫൂട്ടേജുകളും ഭംഗിയായി കോർത്തിണക്കിയിരിക്കുന്നത് കാണാം. അതൊക്കെയും കാണികൾക്ക് നൽകുന്ന അനുഭൂതി പറഞ്ഞറിയിക്കാൻ സാധിക്കാത്തതാണ്. പൂർണ്ണമായി ഒരു ത്രില്ലർ സ്വഭാവം സ്വീകരിക്കുന്ന ചിത്രം ഒന്നര മണിക്കൂറിൽ വെടിപ്പായി കാര്യങ്ങൾ പറഞ്ഞുവെക്കുന്നുണ്ട്.

🔻സോണിയുടെ ജീവിതം പോലെ തന്നെ മരണവും ദുരൂഹമായിരുന്നു. ദിവസങ്ങളോളം തന്റെ മുറിയിൽ മരിച്ചുകിടന്ന സോണിയുടെ ഘാതകനെ ഇതുവരെ കണ്ടെത്താനായിട്ടില്ല. സ്വാഭാവികമരണമായി വിധിയെഴുതിയെങ്കിലും അതങ്ങനെയല്ല എന്ന് വാദിക്കുന്നവരാണ് ഭൂരിഭാഗവും. അതുകൊണ്ട് തന്നെ സംശയത്തിന്റെ നിഴലിൽ നിൽക്കുന്നവർ അനവധിയാണ്. അത്ര ദുർഘടമായ ജീവിതമായിരുന്നു സോണിയുടേത്.

🔻സിനിമയുടെ എഡിറ്റിങ്ങ് എടുത്ത് പറയേണ്ടതാണ്. വളരെ ക്രിസ്പ്പ് ആയി ഉദ്വേഗജനകമായ നിമിഷങ്ങളിലൂടെ കടന്നുപോവുന്നു എന്ന് തോന്നിക്കും വണ്ണം ചടുലതയാണ് ആഖ്യാനത്തിന്. അതിനൊത്ത വേഗതയാണ് ഓരോ രംഗങ്ങൾക്കും. രോമാഞ്ചം നൽകുന്ന രംഗങ്ങളാൽ സമൃദ്ധമാണ് ചിത്രം. ബോക്‌സർ ആവണമെന്ന് മനസ്സിലുറപ്പിച്ച് മുന്നിട്ടിറങ്ങുന്ന സോണിയെ പരിചയപ്പെടുത്തുന്ന രംഗം അപാരം. അത്തരത്തിൽ ടെക്നിക്കലി വൻ മികവ് പുലർത്തുന്നുണ്ട് ചിത്രം.

🔻ＦＩＮＡＬ ＶＥＲＤＩＣＴ🔻

ഡോക്യൂമെന്ററി എന്നതിനപ്പുറം വിവാദപരമായ ജീവിതത്തെയും മരണത്തെയും തേടിയുള്ള സഞ്ചാരമാണ് ഈ TV Movieയിലൂടെ നമുക്ക് കാണാൻ സാധിക്കുക. ഒന്നര മണിക്കൂറിൽ ഒരു ത്രില്ലർ കാണും വിധം ഗംഭീരമായ അവതരണശൈലി സ്വായത്തമാക്കിയ ചിത്രം എല്ലാ തലങ്ങളിലും ഒരുപോലെ മികവ് പുലർത്തുന്നുണ്ട്. തീർച്ചയായും കണ്ടിരിക്കുക. വ്യത്യസ്തമായ ഒരനുഭവമാവും ചിത്രം സമ്മാനിക്കുക.

ＡＢ ＲＡＴＥＳ ★★★★☆

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻20 വർഷങ്ങൾക്ക് ശേഷം അതേ കൊലപാതകരീതികൾ പിന്തുടരുന്ന രണ്ട് മൃതദേഹങ്ങൾ കൂടി ലഭിച്ചിരിക്കുകയാണ്. വര്ഷങ്ങള് മുമ്പ് നടന്ന കൊലപാതകങ്ങളുടെ സൂത്രധാരൻ ഇപ്പോഴും ജയിലിൽ ആണെങ്കിലും ഒരു ഡീറ്റൈൽ പോലും കുറയാതെ അവ വീണ്ടും ആവർത്തിക്കുകയാണ്. ഒന്നുകിൽ ഇദ്ദേഹത്തിന് കൊലപാതകങ്ങളിൽ ഒരു പങ്കാളി ഉണ്ടായിരുന്നു. അല്ലെങ്കിൽ ഒരു copycat. എന്താവും സത്യം.? അത് തേടിയിറങ്ങുകയാണ് ഇസ്മായീൽ.

Year : 2019
Run Time : 1h 50min

🔻കൊലപാതകങ്ങൾ എങ്ങനെയാണ് അരങ്ങേറുന്നതെന്നും കൊല്ലേണ്ടവരെ തിരഞ്ഞെടുക്കുന്ന Pattern എങ്ങനെയെന്നും ആദ്യ രംഗത്തിൽ തന്നെ വിവരിക്കുന്നതിലൂടെ നമ്മുടെ ശ്രദ്ധ തുടക്കം തന്നെ അപഹരിക്കാൻ സിനിമാക്കാവുന്നുണ്ട്. തുടർന്ന് അവ അന്വേഷിക്കാൻ ഇസ്മായീലും ആൽബയും വരുന്നതോടെ അന്വേഷണം ചൂടുപിടിക്കുന്നു. ദുരൂഹതകളുടെ ഭണ്ഡാരം അഴിയുകയാണ് അവരിലൂടെ.

🔻ഭൂരിഭാഗവും ഒരേ പേസിൽ സഞ്ചരിക്കുന്ന ചിത്രമാണ് Twin Murders. കൊലപാതകിയെ തേടിയുള്ള പോരാട്ടങ്ങളും വഴിമുടക്കുന്ന കാര്യങ്ങളും അവരുടെ ആത്മബന്ധങ്ങളുമൊക്കെ കൃത്യമായി സന്നിവേശിപ്പിച്ചിട്ടുണ്ട് സംവിധായകൻ. കൊലപാതരീതികൾക്ക് മതപരമായ ബന്ധങ്ങൾ സ്ഥാപിക്കുന്നതിലൂടെ സിനിമയുടെ ആഖ്യാനത്തിന് വേഗതയേറുകയാണ്. ഉടൻ തന്നെ കൊലപാതകിയെ നമുക്ക് കാട്ടിത്തരികയുമാണ്. തുടർന്നങ്ങോട്ട് സസ്പെൻസ് ത്രില്ലറിന് പകരം cat & mouse ഗെയിം ആയി മാറുന്നു ചിത്രം.

🔻അവതരണത്തിലെ കൃത്യമായ വേഗതയാണ് ചിത്രത്തെ നല്ലൊരു ത്രില്ലറാക്കി മാറ്റുന്നത്. ക്ലൈമാസിൽ ഒരല്പം സിനിമാറ്റിക്ക് ലിബർട്ടി ഉപയോഗിച്ചത് പോരായ്മയായി തോന്നി എന്നതൊഴിച്ചാൽ പ്രമേയത്തിലെ ദുരൂഹതയും അത് ജനിപ്പിക്കുന്ന താൽപര്യവുമൊക്കെ ശ്രദ്ധേയമാണ്. അനാവശ്യമായ രംഗങ്ങൾ ഭൂരിഭാഗം ഒഴിവാക്കാനും ചിത്രത്തിന് സാധിച്ചിട്ടുണ്ട്. അതുകൊണ്ട് തന്നെ അന്വേഷണത്തിൽ തന്നെ ശ്രദ്ധ കേന്ദ്രീകരിക്കാനാവുന്നുണ്ട്. ഡാർക്ക് മൂഡിനോട് ചേർന്ന് നിൽക്കുന്ന അവതരണത്തിന് ടെക്നിക്കൽ വശങ്ങളുടെ പിന്തുണ ഏറെ ഗുണം ചെയ്തിട്ടുണ്ട്. Belen Reuda നല്ലൊരു വേഷം ചിത്രത്തിൽ കൈകാര്യം ചെയ്തിട്ടുണ്ട്.

🔻ＦＩＮＡＬ ＶＥＲＤＩＣＴ🔻

IMDBയിലടക്കം ഈ സിനിമക്ക് ഇത്ര റേറ്റിങ്ങ് കുറഞ്ഞെതെന്തെന്ന് ഇതുവരെ മനസ്സിലായിട്ടില്ല. പെർഫെക്റ്റ് എന്ന് പറയാൻ സാധിക്കില്ലെങ്കിലും നിരാശ നൽകാത്ത ഡീസന്റ് ത്രില്ലറാണ് Twin Murders. കൊലപാതകങ്ങളോട് മതവും സംസ്കാരവും ഇഴചേർന്ന് വരുമ്പോഴുണ്ടാകുന്ന താൽപര്യം നന്നായി ഉപയോഗിക്കാൻ സംവിധായകന് സാധിച്ചിട്ടുണ്ട്. തീർച്ചയായും കണ്ടുനോക്കുക.

ＡＢ ＲＡＴＥＳ ★★★☆☆

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻കൊറിയൻ സിനിമകൾ സജസ്റ്റ് ചെയ്യുന്ന എല്ലാ കാണികളുടെയും പോസ്റ്റിൽ ആദ്യ സ്ഥാനങ്ങളിൽ ഇടം പിടിക്കുന്ന ഒന്നാണ് ഈ ചിത്രം. അവയിൽ ഭൂരിഭാഗവും കണ്ടുകഴിഞ്ഞെങ്കിലും ഒരു കാര്യവുമില്ലാതെ ചിലത് മാറ്റിവെക്കാറുണ്ട്. Kingdom സീരീസ് കണ്ടപ്പോഴാണ് അതിന്റെ സംവിധായകനാണ് ഈ ചിത്രവും ഒരുക്കിയിരിക്കുന്നതെന്ന് മനസ്സിലായത്. പിന്നെ വൈകിപ്പിക്കാതെ തന്നെ കാണാൻ തീരുമാനിച്ചു.

Year : 2014
Run Time : 1h 51min

🔻തന്റെ അമ്മ മരിച്ച ദിവസം കാറിൽ പുറത്തേക്കിറങ്ങിയ ഡിറ്റക്റ്റീവ് Gun Soo ഒരു അപകടത്തിൽ പെടുകയാണ്. അദ്ദേഹത്തിന്റെ കാർ തട്ടി ഒരാൾ മരിച്ചിരിക്കുന്നു. എന്ത് ചെയ്യുമെന്നറിയാതെ പകച്ച് നിന്ന അദ്ദേഹത്തിന്റെ കുരുട്ടുബുദ്ധിയിൽ തെളിഞ്ഞ പദ്ധതിയിൽ മൃതദേഹം ഒഴിവാക്കാൻ ശ്രമിക്കുന്നു. അതിൽ അദ്ദേഹം വിജയിച്ചെങ്കിലും ശേഷം കാത്തിരുന്നത് അതിലും വലിയ ഊരാക്കുരുക്കുകളാണ്.

🔻ആദ്യ രംഗം തന്നെ കഥയിലേക്ക് കടക്കുകയാണ് ചിത്രം. ഒരു ത്രില്ലർ ആണെന്ന് തോന്നിച്ചെങ്കിലും അതിനേക്കാളേറെ രസിപ്പിച്ച് മുന്നേറുന്നതിലാണ് തുടക്കം കൂടുതൽ ശ്രദ്ധ കാട്ടിയത്. അമ്മ മരിച്ച വിഷമവും മൃതദേഹം മറവ് ചെയ്യുന്നതിനുള്ള ടെൻഷനുമെല്ലാമായി മുന്നേറുമ്പോഴുള്ള രംഗങ്ങളൊക്കെ അതീവ രസകരമായിട്ടാണ് ചിത്രീകരിച്ചിരിക്കുന്നത്. എന്നാൽ അതൊക്കെ പിന്നിട്ട ശേഷം അടിപൊളി ത്രില്ലറാണ് കാത്തിരുന്നത്. ചിലയിടങ്ങളിൽ ഊഹിക്കാമെങ്കിലും അതിവേഗത്തിൽ സഞ്ചരിക്കുന്ന, പ്രതീക്ഷിക്കാത്ത വഴിത്തിരിക്കുകൾ നിറഞ്ഞ ത്രസിപ്പിക്കുന്ന ത്രില്ലർ. ഒപ്പം അടിപൊളി ആക്ഷൻ രംഗങ്ങളും കൂട്ട്.

🔻Leeയുടെ കിടിലൻ സ്‌ക്രീൻ പ്രസൻസും അഭിനയവും തന്നെയാണ് സിനിമയെ ഏറെ ആസ്വാദ്യകരമാക്കിയത്. പുള്ളിയുടെ ചില expressionsഒക്കെ ചെറിയ രീതിയിലല്ല ചിരി പകരുന്നത്. ഒപ്പം വില്ലനും തകർത്തു. ചടുലത നിറഞ്ഞ അവതരണത്തിൽ ഇരുവരും നിറഞ്ഞുനിൽക്കുന്നുണ്ട്. അതിനൊത്ത പശ്ചാത്തലസംഗീതവും ഹരം പകരുന്നതാണ്.

🔻ＦＩＮＡＬ ＶＥＲＤＩＣＴ🔻

ഇനിയും ഇതൊക്കെ കാണാനുണ്ടോ എന്ന ബാലിശമായ ചോദ്യം ചോദിക്കുന്നില്ല. കാണാത്ത ഒരാളെങ്കിലും ഉണ്ടെങ്കിൽ കാണാൻ ശ്രമിക്കുക. ഒരടിപൊളി ത്രില്ലർ ആണ് നഷ്ടപ്പെടുത്തുന്നത്. രണ്ട് മണിക്കൂർ രസിച്ചിരുന്ന് കാണാവുന്ന ബോറടിയൊന്നും നൽകാത്ത ഡീസന്റ് ഐറ്റം.

ＡＢ ＲＡＴＥＳ ★★★½

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻ക്രിസ്മസിന് മുമ്പുള്ള രാത്രി ആ Morgueൽ ഡോക്ടറും നേഴ്‌സും തങ്ങളുടെ ജോലികളെല്ലാം തീർത്ത് വീട്ടിലെത്താനുള്ള ഒരുക്കത്തിലാണ്. അങ്ങനെ എല്ലാം അവസാനിപ്പിച്ച് ഇറങ്ങാറാവുമ്പോഴാണ് മുഖംമൂടി ധരിച്ച 3 പേർ അവിടേക്കെത്തിയത്. കൈയിൽ തോക്കേന്തിയ അവർ ഡോക്ടറോട് ഒരു ആവശ്യം മുന്നോട്ട് വെച്ചു. ആ മോർഗിലുള്ള ഒരു മൃതശരീരത്തിൽ നിന്ന് വെടിയുണ്ട ഓപ്പറേറ്റ് ചെയ്ത് തരണമെന്ന്.

Year : 2019
Run Time : 1h 34min

🔻ചെറിയൊരു പ്രമേയത്തെ കേവലം ഒന്നര മണിക്കൂറിൽ ഒതുക്കി അവതരിപ്പിച്ചിടത്താണ് ഈ സിനിമ മോശമല്ലാത്ത അനുഭവം സമ്മാനിക്കുന്നത്. ഒരു മോർഗിൽ മാത്രം ഒതുങ്ങുന്ന ക്യാറ്റ് & മൗസ് ഗെയിം അത്യാവശ്യം വൃത്തിയായി തന്നെ അവതരിപ്പിച്ചിട്ടുണ്ട്. അതിൽ തന്നെ ബുദ്ധിപരമായ നീക്കങ്ങളും ഒപ്പം ക്ലിഷേകളും നമുക്ക് കാണാം. കഥയുടെ പോക്ക് വളരെ വേഗത്തിലായത് കൊണ്ട് അതൊന്നും വലിയ കാര്യമായി എടുക്കാനുള്ള അവസരം ലഭിക്കുന്നില്ലെന്ന് മാത്രം.

🔻രാത്രിയുടെ വന്യതയെ മോർച്ചറിയുടെ തണുപ്പിനോട് ലയിപ്പിച്ച് ഈ തീമിന് വേണ്ട കൃത്യമായ ആഖ്യാനം സംവിധായകൻ ഒരുക്കിയിട്ടുണ്ട്. ആ മോർഗിലുള്ള ഓരോ എലമെന്റും അതിനായി വഴിയൊരുക്കുന്നുണ്ട്. ഒപ്പം നമുക്ക് മുന്നിൽ നിരത്തുന്ന ചോദ്യങ്ങൾക്ക് വ്യക്തമായ ഉത്തരം നൽകാനും ഒടുക്കം സാധിച്ചിട്ടുണ്ട്. ടെക്നിക്കലി നല്ലൊരു ഔട്ട്പുട്ട് തന്നെയാണ് ലഭിച്ചിരിക്കുന്നത്. ഛായാഗ്രഹണവും പശ്ചാത്തലസംഗീതവും പ്രമേയത്തോട് ചേർന്ന് നിൽക്കുന്നുണ്ട്.

🔻ＦＩＮＡＬ ＶＥＲＤＩＣＴ🔻

കേവലം ഒന്നരമണിക്കൂർ മാത്രമുള്ള സിനിമയെ പറ്റി കൂടുതൽ പറഞ്ഞാൽ സ്പോയിലർ ആവുമെന്നത് കൊണ്ട് ഇവിടെ നിർത്തുന്നു. ചുരുങ്ങിയ സമയം മാത്രമുള്ള ഡീസന്റ് ത്രില്ലർ ആണ് നമുക്കായി കാത്തിരിക്കുന്നത്. പ്രതീക്ഷകൾ ഒന്നും വെച്ചുപുലർത്താതെ സമീപിച്ചാൽ തൃപ്തികരമായി അവസാനിപ്പിക്കാം ആ കാഴ്ച.

ＡＢ ＲＡＴＥＳ ★★★☆☆

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻പോലീസിനെയും നിയമവ്യവസ്ഥയെയും വെല്ലുവിളിക്കുന്ന, വളരെ പൈശാചികവും  ഈഗോയിസ്റ്റിക്കുമായ mindset ഉള്ള ഒരു വില്ലനെ നേരിടേണ്ടി വരികയാണ് SP ശിവാനി റോയിക്ക്. പെൺകുട്ടികളെ തട്ടിക്കൊണ്ട് പോവുകയും ക്രൂരവും മൃഗീയവുമായ രീതിയിൽ കൊലപ്പെടുത്തുകയും ചെയ്യുന്ന സൈക്കോ. കുത്തനെ കൂടിക്കൊണ്ടിരിക്കുന്ന ക്രൈം റേറ്റിന് ആക്കം കൂട്ടാതിരിക്കാൻ ആ കൊലയാളിയെ കണ്ടെത്തുകയെന്നതാണ് ഒരേയൊരു പോംവഴി.

Year : 2019
Run Time : 1h 43min

🔻ഒരു സസ്പെൻസ് ത്രില്ലറല്ല മർദാനി 2. ആദ്യ രംഗം തന്നെ വില്ലനെ കാണിക്കുകയും തുടർന്ന് കേന്ദ്രകഥാപാത്രങ്ങൾ തമ്മിലുള്ള ക്യാറ്റ് & മൗസ് ഗെയിമുമാണ് നമുക്കായി കാത്തിരിക്കുന്നത്. അങ്ങനെയൊരു പ്ലോട്ടിൽ വരാവുന്ന ക്ലിഷേകൾ പലതും ലൈവായി നിലനിൽക്കുന്നതും അവതരണത്തിലെ old school ശൈലി ആസ്വാദനത്തെ ഒരൽപം പിന്നോട്ടടിക്കുന്നതും സിനിമയിൽ പോരായ്‌മ തന്നെയാണ്. എന്നാൽ വില്ലനായി വന്ന Vishal Jethwaയുടെ ഗംഭീര പ്രകടനം നമ്മെ വിസ്മയിപ്പിക്കും. ഒപ്പം ചിത്രം മുന്നോട്ട് വെക്കുന്ന ആശയങ്ങളും gender equality, സ്ത്രീസുരക്ഷ, ഇന്ത്യയിലെ ക്രൈം റേറ്റ് തുടങ്ങിയ വിഷയങ്ങളിൽ  സൊസൈറ്റിയുമായുള്ള കലഹങ്ങളും എല്ലാ കാലഘട്ടത്തിലും പ്രസക്തിയാർജിക്കുന്ന ഒന്നാണ്. പ്ലോട്ടിനോട് ചേർന്ന് നിൽക്കാത്ത ഒറ്റ രംഗം പോലും ഒന്നേ മുക്കാൽ മണിക്കൂർ മാത്രം ദൈർഖ്യമുള്ള ചിത്രത്തിൽ കാണിച്ച് തരാനാവില്ല. അത്ര crisp യും വെടിപ്പായും ത്രില്ലർ ഒരുക്കുന്നതിൽ സംവിധായകൻ വിജയിച്ചിട്ടുണ്ട്. ഒപ്പം റാണി മുഖർജിയും മികച്ച പ്രകടനം കാഴ്ചവെച്ചിട്ടുണ്ട്.

🔻ത്രില്ലർ പ്രേമികൾക്ക് തീർച്ചയായും ഒരു തവണ കാണാനുള്ള വക മർദാനി 2 ഒരുക്കിവെച്ചിട്ടുണ്ട്. പോരായ്മകൾ ഒരുപാടുണ്ടെങ്കിലും  ചിത്രം കൈകാര്യം ചെയ്യുന്ന വിഷയത്തിന്റെ തീവ്രത കൊണ്ട് അവയൊക്കെയും മറന്ന് കളയാൻ സാധിക്കും. ഫലമോ അത്യാവശ്യം ആസ്വദിച്ച് കാണാവുന്ന ഒരു ത്രില്ലറും.

ＡＢ ＲＡＴＥＳ ★★★½

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻ചില റിവ്യൂകൾ എഴുതുമ്പോൾ കഥയെ പറ്റിയോ ജേണറിനെ പറ്റിയോ എവിടെയും പ്രതിപാദിക്കാറില്ല. റിവ്യൂ വായിക്കുന്ന ചിലർ അതൊരു പോരായ്മയായി പറയുകയും ചെയ്യാറുണ്ട്. Believe Me അത്തരം സിനിമകളെ പറ്റി ഞാൻ കൂടുതൽ എഴുതിയാൽ കാണാത്തവരോട് ചെയ്യുന്ന ഏറ്റവും വലിയ അപരാധമാവും. അത്തരത്തിലൊരു സിനിമയാണ് Mathu Vadaralaയും.

Year : 2019
Run Time : 2h 10min

🔻ഭൂരിഭാഗം സിനിമകളും ഏതെങ്കിലുമൊരു ജേണറിൽ stick on ചെയ്ത് കാണികളെ കയ്യിലെടുക്കാറാണ് പതിവ്. അല്ലെങ്കിൽ അത്തരത്തിലുള്ള അവതരണമാണ് പല സിനിമകൾക്കും ഏറ്റവും അനുയോജ്യമായത്. എന്നാൽ ചില സിനിമകളിൽ മാത്രം പല ജേണറുകൾ ബ്ലെൻഡ് ചെയ്തുള്ള അവതരണം കാണാം. അതൊരു പരീക്ഷണമാണ്. ഭൂരിഭാഗം സന്ദർഭങ്ങളിലും അത് വിജയിക്കാതെ പോവാറുണ്ട്. വിരളമായ ചില അനുഭവങ്ങൾ മാത്രം ആസ്വാദകരെ തൃപ്തിപ്പെടുത്തി നിലയുറപ്പിക്കും. അതിൽ ഏറ്റവും ബുദ്ധിമുട്ടുള്ളത് ത്രില്ലറും കോമഡിയും തമ്മിൽ കൃത്യമായി ഇഴചേർന്ന് കൊണ്ടുപോവുന്നതാണെന്ന് തോന്നിയിട്ടുണ്ട്. ഇന്ത്യൻ സിനിമകളിൽ നന്നേ കുറവുള്ള ഒരു Genre Mix ആണത്. Agent Sai Srinivasa Athreya മാത്രമാണ് ഓർമ്മയിൽ നിലനിൽക്കുന്ന കോമിക് സസ്പെൻസ് ത്രില്ലർ. ഈ സിനിമ ഒരുപടി കൂടി മുന്നോട്ട് പോയിരിക്കുകയാണ്. കോമഡിയും ത്രില്ലറും ഒപ്പം ബ്ലാക്ക് ഹ്യൂമറും കൂടി ഗംഭീരമായി കൂട്ടിയിണക്കിയിരിക്കുകയാണ് Mathu Vadarala. സത്യത്തിൽ Andhadhunന് ശേഷം ആ വിഭാഗത്തിൽ പൂർണ്ണമായി വിജയിച്ച ചിത്രമെന്ന് വിശേഷിപ്പിക്കാം ഇതിനെ.

🔻കോമഡി ഡ്രാമയിൽ തുടങ്ങി പൊടുന്നനെ ത്രില്ലറിലേക്കും അതിലൂടെ ബ്ലാക്ക് ഹ്യൂമറിലേക്കും വീണ്ടും ത്രില്ലറിലേക്കും ഒരൊറ്റ ചാട്ടമാണ് കഥ. ഇതൊക്കെ എങ്ങനെ സാധിക്കുന്നെന്ന് അമ്പരന്നു പോയി എന്നതാണ് സത്യം. ഒരു പുതുമുഖ സംവിധായകൻ കൂടിയാണെന്നറിഞ്ഞപ്പോൾ അമ്പരപ്പ് ഇരട്ടിയായി. സത്യത്തിൽ ത്രില്ലർ ആഗ്രഹിക്കുന്നവർ വ്യത്യസ്തത നിറഞ്ഞ ചിത്രങ്ങൾ കാണാൻ ആഗ്രഹിക്കുന്നവർക്കും ഒരുപോലെ ആസ്വദിക്കാവുന്ന ചിത്രമാണ് mathu Vadarala.ഇന്ത്യൻ സിനിമകളിൽ തീർത്തും അപൂർവ്വമായ അനുഭവങ്ങളിൽ ഒന്ന്. ഒപ്പം പോപ്പ് കൾച്ചർ റഫറൻസുകളും. ഒന്നുകൂടി പറയുന്നു സിനിമയെ പറ്റി യാതൊന്നും അറിയാതെ തന്നെ കാണുക. കൂടുതൽ വലിച്ച് നീട്ടുന്നില്ല.

🔻ＦＩＮＡＬ ＶＥＲＤＩＣＴ🔻

Andhadhunന് ശേഷം ഇത്രയേറെ Genre Mixകൾ സമർത്ഥമായി ഉപയോഗിച്ച സിനിമ Mathu Vadaralaയാണെന്ന് നിസ്സംശയം പറയാം. ഒരിക്കൽ പോലും കാണികളുടെ ഊഹങ്ങൾ ശരിയാണെന്ന് തോന്നിപ്പിക്കാത്ത, ഒരു ഗംഭീര സംവിധായകനെയും തിരക്കഥാകൃത്തിനെയും അടയാളപ്പെടുത്തുന്ന സിനിമ. കണ്ടില്ലെങ്കിൽ ശരിക്കും നഷ്ടമാണെന്നേ പറയാനുള്ളൂ.

ＡＢ ＲＡＴＥＳ ★★★★☆

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻ആ കൊലപാതകത്തിന് സാക്ഷികളായി ആരും തന്നെ ഉണ്ടായിരുന്നില്ല. ആ മുറിയിലേക്ക് വന്നുപോയ ഒരാളുടെ മനസ്സിൽ നിമിഷങ്ങൾ കൊണ്ട് തെളിഞ്ഞ, താടി വെച്ച മനുഷ്യന്റെ രൂപം ആ അന്വേഷണത്തെ കൊണ്ടെത്തിച്ചത് മാസങ്ങൾക്ക് മുമ്പ് നടന്ന ഒരു ബാങ്ക് റോബറിയിലാണ്. ആ റോബറിയിൽ നാലംഗ സംഘത്തിന്റെ നേതാവായി പ്രവർത്തിച്ച വാങ്ങിന്റെ മുഖമായിരുന്നു അത്. അന്വേഷണത്തിൽ ടീമിലുണ്ടായിരുന്ന ലാറി അപ്പോഴാണ് ആ മുറിയിലുള്ള മറ്റൊരാളെ കൂടി ശ്രദ്ധിച്ചത്. സംസാരിക്കാൻ കഴിവുള്ള ഒരു തത്ത. ആ കൊലപാതകം കണ്ട ഒരേ ഒരാൾ..!!

Year : 2019
Run Time : 1h 44min

🔻തത്ത ഉരിയാടുന്നത് ആകെ രണ്ട് വാക്കുകളാണ്. Idiot, Genius. ഈ രണ്ട് വാക്കുകൾ കൊണ്ട് എങ്ങനെ കുറ്റവാളികളെ കണ്ടുപിടിക്കാമെന്നായി ലാറിയുടെ ചിന്ത. മറ്റുള്ളവരെല്ലാം തകൃതിയായി കേസന്വേഷിക്കുമ്പോൾ ലാറിയുടെ നീക്കം തത്തയെ കേന്ദ്രീകരിച്ചായി. ആരായിരിക്കും ശരി.? ആരായിരിക്കും ആദ്യം വാങ്ങിനെ കണ്ടെത്തുക.?  ഉത്തരങ്ങൾ അറിയാൻ മടിക്കാതെ സിനിമ കാണുക.

🔻പ്രേക്ഷകനെ കബളിപ്പിക്കുക എന്ന കർത്തവ്യം കൃത്യമായി നിറവേറ്റിയ ചിത്രമാണിത്. നമ്മുടെ ശ്രദ്ധ ഒന്നിൽ കേന്ദ്രീകരിക്കുകയും മറ്റൊരു വഴിയിലൂടെ കഥ നീങ്ങുകയും ചെയ്യുന്ന സാഹചര്യങ്ങൾ ഒന്നര മണിക്കൂറിൽ നമുക്ക് നേരിടാൻ സാധിക്കും. ഒടുവിൽ ട്വിസ്റ്റ് റിവീൽ ചെയ്യുമ്പോൾ അധികമാരും ചിന്തിച്ച് കാണാൻ സാധ്യതയില്ലാത്ത ഒരു പര്യവസാനത്തിലേക്ക് കൊണ്ടെത്തിക്കുന്നുണ്ട് സംവിധായകൻ. എന്നാൽ അത് ഏത് തരത്തിൽ പ്രേക്ഷകനെ സ്വാധീനിക്കുമെന്നത് രണ്ടാമത്തെ കാര്യം.

🔻കഥ അവസാനത്തിലേക്ക് അടുക്കുമ്പോൾ ചില മുഖ്യമായ സീനുകളിലെ അവതരണം കല്ലുകടിയായി തോന്നി. അത്ര നേരം നമ്മിൽ ജനിപ്പിച്ച ജിജ്ഞാസയെ പൂർണ്ണമായി തൃപ്തിപ്പെടുത്താൻ ആവാത്ത അവതരണം മൂലം ഇമ്പാക്റ്റ് കുറഞ്ഞ ഒന്നായി മാറുന്നുണ്ട് ചില രംഗങ്ങൾ. എഡിറ്റിംഗിലാണ് അത് എടുത്തറിയാൻ സാധിക്കുക. മറ്റെല്ലാ ഘടകങ്ങളും മികച്ച് നിൽക്കുമ്പോഴും ചില രംഗങ്ങളിലെ എഡിറ്റിങ്ങ് മാത്രം പോരായ്മയായി തോന്നും.

🔻ＦＩＮＡＬ ＶＥＲＤＩＣＴ🔻

ഗംഭീര ത്രില്ലർ ഒന്നുമല്ലെങ്കിലും ഒന്നര മണിക്കൂർ കൊണ്ട് നമ്മെ തൃപ്തിപ്പെടുത്താനാവുന്നതെല്ലാം ഈ ചിത്രത്തിലുണ്ട്. സിമ്പിളായി പറഞ്ഞവസാനിപ്പിക്കാമായിരുന്ന ത്രെഡിനെ അവതരണത്തിലെ കബളിപ്പിക്കലിലൂടെ താല്പര്യമുണർത്തുന്ന ഒന്നാക്കി മാറ്റുവാനും പൂർണമായി പിടിച്ചിരുത്താവാനും സംവിധായകനായിട്ടുണ്ട്. യാതൊരു പ്രതീക്ഷയുമില്ലാതെ സമീപിച്ചാൽ തീർച്ചയായും ഇഷ്ടപ്പെടും.

ＡＢ ＲＡＴＥＳ ★★★½

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻വോയ്‌സ് ഓവറുകൾ തുരുതുരാ വന്നിട്ടും ഒരു ഘട്ടത്തിൽ പോലും മടുപ്പ് തോന്നാത്ത ആദ്യ സീരീസാവും You. സംവിധായകൻ കഥയെ കൈകാര്യം ചെയ്യുന്ന രീതി തന്നെയാണ് അതിന് കാരണം. ഒരു പെൺകുട്ടിയോട് നിങ്ങൾക്ക് ഇഷ്ടം തോന്നിയാൽ അവൾക്ക് വേണ്ടി എന്തൊക്കെ ചെയ്യാനാവും.? ബുക്ക് സ്റ്റോറിൽ ജോലി ചെയ്യുന്ന 'ജോ'വിന് ബെക്കിനെ കണ്ട ആദ്യമാത്രയിൽ തന്നെയങ്ങ് ബോധിച്ചു. തുടർന്ന് വീണ്ടും കാണാനുള്ള ശ്രമങ്ങളായി അടുത്തത്. അതങ്ങനെ തുടർന്ന് കൊണ്ടേയിരുന്നു.

Seasons : 1 & 2
Episodes : 10 Each
Run Time : 41-50 min

🔻ജോവിന്റെ പ്രണയമാണ് you ഫോക്കസ് ചെയ്യുന്നത്. പ്രണയത്തിൽ അദ്ദേഹത്തിനുള്ള ആത്മാർത്ഥതയിലൂടെയാണ് you മുന്നേറുന്നത്. തന്റെ പ്രണയിനിയുടെ ഇഷ്ടം പിടിച്ചുപറ്റാനായി ഏതറ്റം വരെയും പോകുന്ന ജോ. അവളുടെ വിജയത്തിന് തടസ്സമാവുന്നതെന്തും പിഴുതുമാറ്റാൻ തയ്യാറായി നിൽക്കുന്ന ജോ. ഇതിൽപ്പരം എന്ത് വേണം ഒരു പെൺകുട്ടിക്ക്. എന്നാൽ ചില സാഹചര്യങ്ങളിൽ അദ്ദേഹത്തിന് വലിയ ഭീഷണികൾ നേരിടേണ്ടി വരുന്നു. അതോടെ പ്രണയത്തിന്റെ രൂപവും മാറുന്നു.

🔻റൊമാന്റിക്ക് ആയി തുടങ്ങുന്ന സീരീസാണ് you. പതിയെ കഥാപാത്രങ്ങളിലേക്ക് കടന്ന് അവർ തമ്മിലുള്ള ദൃഢമായ ബന്ധം establish ചെയ്തതിന് ശേഷം മാത്രമാണ് ബാക്കി മുന്നേറ്റങ്ങളൊക്കെയും. അവിടെയാണ് കഥ ചൂട് പിടിക്കുന്നത്. ആരും സഞ്ചരിച്ചിട്ടില്ലാത്ത വഴികളിലൂടെ ജോവിന് സഞ്ചരിക്കേണ്ടി വരുന്നതോട് കൂടി സീരീസ് കൂടുതൽ ത്രില്ലിങ്ങാവുന്നു. കാഴ്ചക്കാരും ഇമ വെട്ടാതെ നോക്കിയിരിക്കും.

🔻കഥാപാത്രങ്ങളെ പറ്റി എന്ത് പറഞ്ഞാലും രണ്ട് സീസണുകളുടെയും സ്പോയിലർ ആവുമെന്നതിനാൽ അതിലേക്ക് കടക്കാൻ മുതിരുന്നില്ല. എങ്കിലും അവയെ അവതരിപ്പിച്ചിരിക്കുന്ന രീതിയെ പ്രശംസിക്കാതെ വയ്യ. ചുരുക്കം ചിലരിൽ മാത്രം കഥയെ ഒതുക്കി മികച്ച രീതിയിൽ പ്ലോട്ട് ക്രിയേറ്റ് ചെയ്യാൻ സാധിച്ചിട്ടുണ്ട് അണിയറപ്രവർത്തകർക്ക്. അതുകൊണ്ട് തന്നെ എല്ലാവരെയും പറ്റി നല്ലൊരു ഐഡിയ മനസ്സിൽ സൃഷ്ടിച്ചെടുക്കാൻ സാധിച്ചിട്ടുണ്ട്. ആസ്വാദനത്തിന് അത് ഗുണം ചെയ്തിട്ടുമുണ്ട്. പ്രതീക്ഷിക്കാതെ വന്ന ട്വിസ്റ്റുകൾ ചില ഭാഗങ്ങളുടെ മെല്ലെപ്പോക്കിനെ തുണച്ചിട്ടുണ്ട്.

🔻ഗംഭീര പ്രകടനം കൊണ്ട് സ്‌ക്രീൻ സ്‌പേസ് അപഹരിക്കുന്നത് Penn Badgley തന്നെയാണ്. പകരം വെക്കാനില്ലെന്ന് തോന്നിപ്പോവും വിധം മികച്ചത്. ഒപ്പം ബെക്കയും ചിരിയിലൂടെ മനം കവരുന്നുണ്ട്. സൗണ്ട്ട്രാക്കുകൾ മനോഹരമായിരുന്നു. നല്ല വിഷ്വലുകളും. എങ്കിലും ചിലയിടങ്ങളിൽ പ്രൊഡക്ഷൻ ക്വാളിറ്റി ഒരൽപം കൂടി ആവാമെന്ന് തോന്നി.

🔻ＦＩＮＡＬ ＶＥＲＤＩＣＴ🔻

സ്നേഹത്തിന്റെ നിറകുടമാണ് ജോ. ലോകത്തെ സകല കാമുകന്മാർക്കും ഭർത്താക്കന്മാർക്കും മാത്രകാപുരുഷോത്തമനാണ് ജോ. Be Like Joe.

ＡＢ ＲＡＴＥＳ ★★★½

സീരീസ് ടെലിഗ്രാം ചാനലിൽ ലഭ്യമാണ്. Abi Suggests