Abeed Azad

💢സിനിമ കണ്ട് കഴിഞ്ഞ ശേഷം ഒരുപാട് നേരം ഗൂഗിളിൽ തന്നെയായിരുന്നു. മനസ്സിലായി കാര്യമത്രയും വീണ്ടും വീണ്ടും പരതി. പരിമിതമായ അറിവിനുള്ളിൽ ഞാൻ കണ്ട ഏറ്റവും വലിയ ആസൂത്രിത കൊലപാതകത്തിന്റെ ചുരുളഴിച്ചിൽ അത്രകണ്ട് ആകാംഷ പകർന്നിരുന്നു.

💢അമേരിക്കയുടെ ചരിത്രത്തിലെ തന്നെ ഏറ്റവും വലിയ കറുത്ത അധ്യായമായിരുന്നു ജോൺ F കെന്നഡിയുടെ മരണം. അദ്ദേഹം അമേരിക്കക്കാർക്ക്  വെറുമൊരു പ്രസിഡന്റ് മാത്രമായിരുന്നില്ല. അമേരിക്കൻ പൗരന്മാർക്ക് ഒരുപാട് പ്രിയങ്കരനായിരുന്ന നേതാവ് കൂടിയായിരുന്നു. വർണ്ണവിവേചനമടക്കം ഒരുപാട് കൊള്ളരുതായ്മകൾക്ക് അമേരിക്കയിൽ അറുതി വരുത്തുന്നതിൽ അദ്ദേഹത്തിന്റെ പങ്ക് വിസ്മരിക്കാനാവാത്തതാണ്. പ്രസിഡന്റ് ആയി സ്ഥാനമേറ്റ് മൂന്നാം വർഷം ഒരു പബ്ളിക് ഇന്ററാക്ഷൻ മോട്ടോർക്കേഡിൽ അദ്ദേഹം വെടികൊണ്ട് മരിക്കുമ്പോൾ അമേരിക്കയിൽ തന്റേതായ വ്യക്തിമുദ്ര പതിപ്പിച്ചിരുന്നു അദ്ദേഹം.

മരിച്ച് മണിക്കൂറുകൾക്ക് ശേഷം തന്നെ പ്രതിയെ അറസ്റ്റ് ചെയ്തു. ലീ ഓസ്‌വേൾഡായിരുന്നു പ്രതി. എന്നാൽ വിചാരണ ചെയ്യാൻ സാധിക്കുന്നതിന് മുമ്പ് തന്നെ അദ്ദേഹം കൊല്ലപ്പെട്ടതും ചരിത്രത്തിൽ രേഖപ്പെടുത്തിയിരുന്നു. അതോടെ കേസ് ക്ളോസ് ചെയ്തു.

കേസന്വേഷിച്ച Warren Commission സമർപ്പിച്ച കേസ് റിപ്പോർട്ടിൽ തൃപ്തനല്ലായിരുന്ന ഡിസ്ട്രിക്ട് അറ്റോർണി ജിം ഗാരിസൺ ലഭ്യമായ തെളിവുകൾ നിരത്തി തന്റേതായ തിയറി ഉണ്ടാക്കാൻ ശ്രമിക്കുന്നു. ആ കൊലപാതകം ഒരാളുടെ മാത്രം വിക്രതി ആയിരുന്നോ.? അതോ ഒരുപറ്റം കുറ്റവാളികളുടെ ഗൂഡാലോചനയുടെ ഫലമായിരുന്നോ കെന്നഡിയുടെ കൊലപാതകം.? ഉത്തരങ്ങൾ അറിയാൻ JFK ഒന്ന് കണ്ടാൽ മതി.

💢മേൽ പറഞ്ഞത് തന്നെയാണ് സിനിമയുടെ കഥ. ഗാരിസൺ യാഥാർത്ഥ കഥാപാത്രം തന്നെയാണ്. എന്നാൽ ഈ സിനിമയിൽ അദ്ദേഹം സത്യത്തെ തേടുന്ന ഒരു ബിംബം മാത്രമാണ്. കെന്നഡി മരണപ്പെട്ട കാലഘട്ടത്തിൽ ലഭിച്ചിരുന്ന തെളിവുകൾക്ക് പരിതിമിയുണ്ടായിരുന്നു. അതിന് ശേഷം ലഭിച്ച തെളിവുകളും ഗാരിസൺ എന്ന കഥാപാത്രത്തിലൂടെ സംവിധായകൻ ഉൾപ്പെടുത്തിയിട്ടുണ്ട്. ടെക്‌നോളജികൾ പരിമിതമായിരുന്ന കാലഘട്ടത്തിൽ ഗാരിസണും കൂട്ടാളികൾക്കും ഉണ്ടായിരുന്ന പരിമിതികൾ വളരെ വ്യക്തമായി കാണാം ചിത്രത്തിൽ. എന്നാൽ ടെക്‌നോളജി ഉപയോഗിച്ചുള്ള തെളിവുകളെല്ലാം യാഥാർഥ്യമാണെന്നുള്ളതാണ് ഞെട്ടിച്ച മറ്റൊരു സംഗതി. പ്രത്യേകിച്ച് കെന്നഡി കൊല്ലപ്പെടുന്ന വീഡിയോ ടേപ്പ്.

💢ആ റാലിക്കിടയിൽ 'Zapruder' എന്ന വ്യക്തി തന്റെ 8 mm ക്യാമറയിൽ പകർന്ന വീഡിയോ ചിത്രത്തിൽ ഉപയോഗിച്ചിരിക്കുന്നത് കണ്ടാൽ അത്ഭുതം തോന്നും. സിനിമയിലെ സുപ്രധാന ഘട്ടങ്ങളിലെല്ലാം ആ ഒറിജിനൽ ഫൂട്ടേജ് ഉൾപ്പെടുത്തി ആറാട്ടുനടത്തിയ സംവിധായകനെ തെല്ലൊന്നും പ്രശംസിച്ചാൽ പോര. അതിന് കാരണം സിനിമ കണ്ട് കഴിയുമ്പോൾ മനസ്സിലാവും. അതോടൊപ്പം ഓരോ കഥാപാത്രങ്ങളും ഫ്ലാഷ്ബാക്ക് പറയുന്ന രംഗങ്ങളിൽ ഫിക്ഷണൽ ഫൂട്ടേജുകൾ ഉൾപ്പെടുത്തിയത് തന്നെ ആസ്വാദനത്തെ വേറൊരു തലത്തിലേക്ക് നയിക്കുന്നുണ്ട്. പ്രത്യേകിച്ച് 'X' തന്റെ തിയറി പറയുന്നിടത്ത്. കൂടെ ന്യൂസ്പേപ്പർ കട്ടിങ്ങുകളും ചില ഘട്ടങ്ങളിൽ ഉപയോഗിച്ചിട്ടുണ്ട്.

💢ഒരു പൊളിറ്റിക്കൽ ത്രില്ലർ എന്ന നിലയിൽ അമേരിക്കയിലെ പല ഏജൻസികളെയും ചില വൻകിട മുതലാളിമാരെയും പലയിടങ്ങളിലായി ടാർഗറ്റ് ചെയ്യുന്നുണ്ട് ചിത്രം. എന്നാൽ ഗാരിസന്റെ തിയറി കാലങ്ങൾക്ക് ശേഷം ശരിയെന്ന് തെളിഞ്ഞതിനാൽ വായടച്ച് മിണ്ടാതിരിക്കുകയെ നിവൃത്തി ഉണ്ടായിരുന്നുള്ളൂ.

💢മികച്ച ചിത്രത്തിനുൾപ്പടെ 8 ഓസ്കാർ നോമിനേഷനുകളായിരുന്നു JFKക്ക് ലഭിച്ചത്. അതിൽ ഛായാഗ്രഹണത്തിനും എഡിറ്റിങ്ങിനും വിജയിക്കുകയും ചെയ്തു. എഡിറ്റിങ്ങ് സിനിമയുടെ നട്ടെല്ലാണ്. ഫ്ലാഷ്ബാക്ക് രംഗങ്ങളിലെ എഡിറ്റങ്ങ് മാത്രം മതി അത് വിലയിരുത്താൻ. അത്ര അതിഗംഭീരമായാണ് ആ രംഗങ്ങൾ ഒരുക്കിയിരിക്കുന്നത്. വെറും വിഡിയോ മാത്രമായി കാണിക്കാതെ, കഥാപാത്രങ്ങളിലേക്ക് പൂർണ്ണമായി ഫോക്കസ് ചെയ്യാതെ എല്ലാം കൃത്യമായി ബ്ലെന്റ് ചെയ്ത രംഗങ്ങൾ വിരളമായി കാണുന്ന സംഗതിയാണ്. അതോടൊപ്പം പശ്ചാത്തലസംഗീതവും ക്യാമറ വർക്കുകളും ഗംഭീരമായിരുന്നു.

💢Kevin Costner ഗാരിസണായി ജീവിച്ചപ്പോൾ മറ്റ് പല കഥാപാത്രങ്ങളും മനസ്സിൽ നിന്ന് മായാത്തവയായി. ഡേവിഡ് ഫെറിയും ഒക്കീഫീയും ശരീരഭാഷ്യം കൊണ്ടുതന്നെ മികച്ചുനിന്നു. കൂടെ 'X'ഉം.കെന്നഡിയെ കൂടുതലും ഒറിജിനൽ ഫൂട്ടേജുകൾ കൊണ്ട് തന്നെ റെപ്രസന്റ ചെയ്യുന്നുണ്ട്. അതും ഒരു പോസിറ്റിവ് ആണ്.

💢തന്റെ ഓരോ ചിത്രം കൊണ്ടും പ്രേക്ഷകരുടെ ഇഷ്ടം കവരുന്ന നടനാണ് Dong-seok Ma. കട്ട ഹീറോയിസം കാണിച്ചും ചിലയിടങ്ങളിൽ നർമം പകർന്നുമൊക്കെ പുള്ളിക്കാരൻ നിറഞ്ഞാടുമ്പോൾ അറിയാതെ നമ്മളും കട്ട ഫാനായാൽ അത്ഭുതമില്ല. ഒരു മുഴുനീള കോമഡി റോളിൽ ഇഷ്ടതാരത്തെ കാണാനാവുമെന്ന പ്രതീക്ഷയിലാണ് ഈ ചിത്രത്തെ സമീപിച്ചത്.

💢തങ്ങളുടെ അച്ഛൻ മരിച്ചെന്ന വാർത്തയാണ് ആ സഹോദരങ്ങളെ വർഷങ്ങൾക്ക് ശേഷം ആ വീട്ടിലേക്ക് തിരികെകൊണ്ടുവന്നത്. ഇരുവരും തമ്മിൽ പരസ്പരം കോണ്ടാക്റ്റ് പോലുമില്ല. എങ്കിലും മരണാനന്തരചടങ്ങുകൾക്ക് പങ്കെടുക്കാൻ രണ്ട് പേരും വീട്ടിലേക്ക് പുറപ്പെട്ടു. മനസ്സിൽ മറ്റ് പല ഉദ്ദേശങ്ങളുമായിരുന്നു എന്നത് വേറൊരു കാര്യം.

യാത്രക്കിടയിൽ സാഹചര്യവശാൽ ഒരു സ്ത്രീ കൂടി അവരെ അനുഗമിക്കുന്നു. തുടർന്നുണ്ടാകുന്ന അവരുടെ അനുഭവങ്ങളാണ് ചിത്രത്തിലൂടെ പറയുന്നത്.

💢സിനിമയുടെ തുടക്കമൊക്കെ രസകരമായിരുന്നു. പ്രത്യേകിച്ച് Dongന്റെ കഥാപാത്രത്തെ പരിചയപ്പെടുത്തുന്നത്. തുടർന്നും അതുപോലെ തന്നെ പ്രതീക്ഷ നൽകിയാണ് മുന്നോട്ട് പോയത്. എന്നാൽ ഒരു പരിധി കഴിഞ്ഞപ്പോൾ ആകെ കൈവിട്ടുപോയി. കോമഡിയും ഫാന്റസിയും മെലോഡ്രാമയും ആകെക്കൂടി ബ്ലെന്റ് ചെയ്ത് ആസ്വാദ്യകരമല്ലാതാക്കിയിട്ടുണ്ട് പാതി തൊട്ട്. അതിനിടയിലും ചില നല്ല മുഹൂർത്തങ്ങൾ ഉണ്ടെങ്കിലും ഈ ബ്ലെന്റിനിടയിൽ മുങ്ങിപ്പോയെന്ന് പറയേണ്ടി വരും.

💢ചില ആചാരങ്ങളെപ്പറ്റിയും അനുഷ്ടാനങ്ങളെപ്പറ്റിയുമൊക്കെ പറയുന്ന രംഗങ്ങൾ നന്നായി ആസ്വദിക്കാനാവുന്നുണ്ട്. അതോടൊപ്പം ഒരു പരിധി വരെ ഫാന്റസിയും. എന്നാൽ അതൊരു നൂല് വിട്ട പട്ടം പോലെ പാറിപ്പോവുന്നിടത്ത് സിനിമയോടുള്ള താൽപര്യം നഷ്ടമാവുന്നു. പിന്നീട് ക്ലൈമാക്സിലെ ചില സീനുകൾ മാത്രമാണ് നന്നായി തോന്നിയത്.

💢Dang പതിവ് പോലെ സ്‌ക്രീൻ പ്രസൻസ് കൊണ്ട് തന്റെ റോൾ ഭംഗിയാക്കിയിട്ടുണ്ട്. കോമഡിയെല്ലാം വളരെ തന്മയത്വത്തോടെ കൈകാര്യം ചെയ്തു. കൂടെയുള്ളവരും മോശമെന്ന് പറയാനാവില്ല. എങ്കിലും അതിനോളം മികച്ച് നിൽക്കുന്നില്ല.

🔻ＦＩＮＡＬ ＶＥＲＤＩＣＴ🔻

ഓർത്തുവെക്കാൻ യാതൊന്നും സമ്മാനിക്കാതെ, ശരാശരിയോ അതിൽ താഴെയോ മാത്രം ആസ്വാദനം നൽകുന്ന ചിത്രം. Dangന്റെ പെർഫോമൻസ് ഹൈലൈറ്റായി നിൽക്കുമ്പോൾ അദ്ദേഹത്തിന്റെ ആരാധകർക്ക് ആസ്വദിക്കാൻ സാധിച്ചേക്കും.

ＭＹ ＲＡＴＩＮＧ :: ★★½

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

സിനിമകൾക്കും പുസ്തകങ്ങൾക്കും വെറും കാഴ്ചാനുഭവം എന്നതിനപ്പുറം ഒരു മാജിക്ക് ഉണ്ട്. നമ്മളറിയാതെ തന്നെ നമുക്ക് ചുറ്റുമുള്ള സൗഹൃദം അവ വളർത്തും. സൗഹൃദവലയം നാം വിചാരിക്കുന്നതിനപ്പുറം വലുതാകും. സ്വന്തം ജീവിതം തന്നെയാണ് അതിനനുഭവം. 


💢ഒരു ബുക്ക് ക്ലബ്ബിന് "potato peel pie society' എന്നൊക്കെ ആരെങ്കിലും പേരിടുവോ. അതായിരുന്നു മനസ്സിൽ ആദ്യം വന്ന ചോദ്യം. എന്നാൽ അതിന്റെ പുറകിലുമുണ്ട് രസകരമായ ഒരു കഥ. അതിനപ്പുറം കുറെ ജീവിതങ്ങളും. ആ ക്ലബ്ബ്‌ പിന്നീടവരുടെ ജീവശ്വാസമായി മാറിയതിന്റെ കഥ.


💢2008ൽ പബ്ലിഷ് ചെയ്ത ഇതേ പേരിലുള്ള പുസ്തകത്തിന്റെ ദൃശ്യാവിഷ്കാരമാണ് Mike Newell സംവിധാനം ചെയ്ത ഈ ചിത്രം. ലണ്ടനിൽ എഴുത്തുകാരിയായി പ്രശസ്തിയാർജ്ജിക്കുന്ന ജൂലിയറ്റിന് ആ കത്ത് കണ്ടമാത്രയിൽ ഒരു പ്രത്യേകത തോന്നിയിരുന്നു. അതിലുണ്ടായിരുന്ന അഡ്രസ്സ് അവൾക്ക് തീരെ പരിചിതമല്ലായിരുന്നു. കത്ത് തുറന്നപ്പോഴുള്ള സംഗതികൾ അതിലും വിചിത്രം. Guernsey ഐലന്റിലുള്ള ഒരു കൂട്ടം പുസ്തകപ്രേമികളാണ് തനിക്ക് കത്തെഴുതിയിരിക്കുന്നത്. അവർ ആ ക്ലബ്ബ് രൂപീകരിച്ച കഥയൊക്കെ ജൂലിയറ്റിന് വളരെ രസകരമായി തോന്നി. തുടർന്ന് അവർ തമ്മിലുള്ള സൗഹൃദവും വർധിച്ചു.

രണ്ടാം ലോക മഹായുദ്ധത്തിന്റെ നിഴലിൽ കഴിയുന്ന ആ ദ്വീപിലെ ആൾക്കാരെ പറ്റി ജൂലിയറ്റിന് കൂടുതൽ കൗതുകമായി. അവരെ സന്ദർശിക്കാനായി അവിടേക്ക് ചെല്ലുന്ന ജൂലിയറ്റിനെ കാത്തിരിക്കുന്നത് സന്തോഷകരമായ ദിനങ്ങൾ ആയിരുന്നില്ല. അതിലൂടെ, ദ്വീപിലുള്ളവരിലൂടെ കഥ വികസിക്കുന്നു.

💢പുസ്തകങ്ങൾ സിനിമയാക്കുമ്പോൾ ഭൂരിഭാഗവും അവയുടെ ആത്മാവ് നഷ്ടപ്പെട്ടായിരിക്കും. ബുക്ക് വായിച്ചിട്ടുള്ള പലരുടെയും അഭിപ്രായം കേട്ടിട്ടുള്ളതാണ്. സ്വന്തമായി അനുഭവവും ഉണ്ട്. എന്നാൽ ഈ സിനിമയെ പറ്റി യാതൊന്നും അറിയാതെ, പുസ്തകത്തിൽ നിന്ന് ഒരുക്കിയതാണെന്ന വിവരം കണ്ണിൽ പെടാതെ കണ്ടതാണ്. എന്നാൽ കണ്ടുകഴിഞ്ഞപ്പോൾ ഒരു സംശയം തോന്നി വിക്കിയിൽ നോക്കിയപ്പോഴാണ് സംഗതി പിടികിട്ടിയത്. മനസ്സിന് മികച്ച അനുഭൂതി നൽകിയ ഹൃദ്യമായ അനുഭവമായിരുന്നു ഈ ചിത്രം. അതിന് കാരണങ്ങൾ അനവധിയാണ്.

💢ആദ്യ രംഗം തന്നെ സിനിമ തുടർന്ന് കാണാൻ കൗതുകം ജനിപ്പിക്കും വിധമായിരുന്നു. തുടർന്നുള്ള ഓരോ മുഹൂർത്തങ്ങളും വളരെയേറെ രസകരമായിരുന്നു. ഒരുപരിധി കഴിഞ്ഞ് പ്രതീക്ഷിക്കാത്ത പല കാര്യങ്ങളിലേക്കും കടക്കുമ്പോൾ ജൂലിയറ്റിനെ പോലെ തന്നെ നമുക്കും ആകാംഷയാണ്. ആ കൂട്ടായ്മയെപ്പറ്റിയും അതിലൂടെയുണ്ടായ സൗഹൃദങ്ങളെപ്പറ്റിയും കൂടുതൽ അറിയാനുള്ള ജിഞ്ജാസ സൃഷ്ടിക്കാൻ ഓരോ രംഗങ്ങൾക്കും സാധിക്കുന്നുണ്ട്. അത്തരത്തിലാണ് കഥ പറയുന്ന രീതി ചിട്ടപ്പെടുത്തിയിരിക്കുന്നത്.

💢ഗംഭീര വിഷ്വലുകളാൽ സമൃദ്ധമാണ് ഓരോ രംഗങ്ങളും. ആ ദ്വീപിലെ ഓരോ കാഴ്ചകളും അതിമനോഹരമായി തോന്നുന്നുണ്ട്. ചില രംഗങ്ങളും സംഭാഷണങ്ങളുമൊക്കെ പ്രത്യേകത നിറഞ്ഞതായി ഫീൽ ചെയ്യുന്നുണ്ട്. അതൊക്കെയും സിനിമയുടെ മനോഹാരിത കൂട്ടുന്നുണ്ട്. അതോടൊപ്പം ലില്ലി ജെയിംസിന്റെ ക്യൂട്ടിനെസ്സ് എല്ലാ രംഗങ്ങളിലും കണ്ണിന് കുളിർമയാവുന്നുണ്ട്.

🔻ＦＩＮＡＬ ＶＥＲＤＩＣＴ🔻

പ്രതീക്ഷിക്കാതെ ലഭിച്ച മനോഹരമായ അനുഭവമായിരുന്നു ഈ പുസ്തകക്കൂട്ടം സമ്മാനിച്ചത്. ഇങ്ങനെയൊന്ന് തുടങ്ങിയാലോ എന്ന് മനസ്സ് ചിന്തിക്കും വിധം ഹൃദ്യമായ അനുഭവം. കുറെയേറെ സന്തോഷങ്ങളും ഒരിത്തിരി നൊമ്പരവും ചില മുഹൂർത്തങ്ങൾ സമ്മാനിക്കുമ്പോൾ ഒരുപാട് പ്രിയപ്പെട്ട ഒന്നായി മാറുന്നു ഈ ചിത്രം.

ＭＹ ＲＡＴＩＮＧ :: ★★★½

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

കഥ നടക്കുന്നത് ഏത് രാജ്യത്താണെന്ന് സീരീസിന്റെ ഒരു ഭാഗത്തും പറയുന്നില്ല. എന്നാൽ ചില ഡയലോഗുകളിൽ നിന്ന് അത് വ്യക്തമാണ്. കഥാപാത്രങ്ങളുടെ പേരുകളിൽ പോലും ചില സന്ദർഭങ്ങളിൽ പല ചിന്തകളും സംവിധായകൻ ഒരുക്കുന്നുണ്ട്. അത്തരത്തിൽ ശക്തമായ രാഷ്ട്രീയത്തിന്റെ വക്താവാകുന്നിടത്താണ് ഗൗൾ പ്രസക്തിയാർജിക്കുന്നത്.


💢ഒരു ഡിസ്റ്റോപ്പിയൻ കാലഘട്ടത്തിലാണ് കഥ തുടങ്ങുന്നത്. നിദയും വാപ്പ ഷാനവാസും യാത്ര ചെയ്യുമ്പോൾ പട്ടാളക്കാർ തടയുന്നു. അവരുടെ ചോദ്യത്തിൽ നിന്നാണ് ഇന്ത്യയെ തന്നെ പ്രതിനിധാനം ചെയ്യുന്നതാണെന്ന് വ്യക്തമാകുന്നത്. കാറിൽ ബീഫ് ഉണ്ടോ എന്നാണ് അവരുടെ ചോദ്യം. അതിന് ശേഷമുള്ള ചില ചോദ്യങ്ങൾ മതങ്ങൾക്കും മതപഠനങ്ങൾക്കും ഏർപ്പെടുത്തിയിരിക്കുന്ന കർശനനിയന്ത്രണങ്ങൾക്ക് നേരെയാണ് വിരൽ ചൂണ്ടുന്നത്. പൗരന്മാർക്ക് മേൽ ഭരണകൂടം ഏർപ്പെടുത്തിയിരിക്കുന്ന വിലക്കുകൾ, നിയന്ത്രണങ്ങൾ ജനജീവിതം ദുസ്സഹമാക്കിയിട്ടുണ്ട്. ഇതിനെതിരെ പ്രതിഷേധിക്കുന്നവരെല്ലാം തീവ്രവാദികളോ രാജ്യദ്രോഹികളോ ആയി മുദ്രകുത്തപ്പെടും. അവരെ മനം മാറ്റാനുള്ള വഴികൾ വേറെയും ഒരുക്കിവെച്ചിട്ടുണ്ട്.

💢മാംസം ഭക്ഷിക്കുന്ന ജിന്നിനെയാണ് ഗൗൾ എന്ന് വിളിക്കുക. ഒരുതരത്തിൽ തിന്മയുടെ പ്രതിരൂപമാണ് ഗൗൾ. എന്നാൽ ഇവിടെ മറ്റൊരർത്ഥം കൂടി സംവിധായകൻ നൽകുന്നുണ്ട്. നിരപരാധികളുടെ രോഷത്തിൽ നിന്നും, അവരുടെ നിസ്സഹായതയിൽ നിന്നും ഉയർത്തെഴുന്നേൽക്കുന്ന പ്രതിഷേധമാണ് ഗൗൾ. രാജ്യത്തിനെതിരെ ചെറുവിരൽ ആനക്കുന്നവരെ വരെ തീവ്രവാദിയായി മുദ്രകുത്തുമ്പോൾ, വെളിച്ചം കാണാത്ത വിധം അവർ തുറങ്കിലടക്കപ്പെടുമ്പോൾ, തീവ്രമായ ശിക്ഷകൾക്ക് വിധേയരാകേണ്ടി വരുമ്പോൾ അവരിൽ നിലകൊള്ളുന്ന പ്രതിഷേധത്തിന്റെ അഗ്നി ഗൗളായി രൂപം പ്രാപിക്കും.

💢മറ്റുള്ളവരെ അടിച്ചമർത്തുന്നതിൽ സന്തോഷം കണ്ടെത്തുകയാണ് ഭരണകൂടം. കേണൽ ഡകൂണയും ലക്ഷ്മിയുമൊക്കെ ആ ഭരണകൂടത്തിന്റെ പ്രതിരൂപങ്ങളാണ്. തന്റെ പൂർവ്വികന്മാരുടെ ചെയ്തികളിൽ, നിരപരാധികളെ കൊന്നൊടുക്കുന്നതിൽ സന്തോഷം കണ്ടെത്തുന്നുണ്ട് ഡകൂണ. അതോടൊപ്പം ലക്ഷ്മിയെ ബാക്കിയുള്ളവർ അനുസരിക്കുന്ന രംഗത്തിലും അവിടെയുള്ളവരുടെ പേരുകൾ ശ്രദ്ധിച്ചാൽ കാരണമെന്തെന്ന് മനസ്സിലാക്കാം. അത്തരത്തിൽ ചെറിയ ആശയങ്ങൾ പോലും പലയിടത്തും കൈമുതലാക്കുന്നുണ്ട് ഗൗൾ.

💢ആദ്യ എപ്പിസോഡ് ആ ഡിസ്റ്റോപ്പിയൻ കാലഘട്ടത്തെ പരിചയപ്പെടുത്താനാണ് പാതിയോളം ഉപയോഗിച്ചിരിക്കുന്നത്. ശേഷം കാര്യത്തിലേക്ക് കടക്കുന്നുണ്ട്. ഹൊറർ എന്ന ലേബലാണെങ്കിലും ഭയപ്പെടുത്തുന്ന രംഗങ്ങളില്ല. പകരം അന്തരീക്ഷം മുഴുവൻ ഭയപ്പാടാണ്. സംഭവം അരങ്ങേറുന്നത് തന്നെ ഇരുട്ടാൽ ചുറ്റപ്പെട്ട പ്രദേശത്താണ്. പുറത്തെന്താണ് നടക്കുന്നതെന്ന് അറിവില്ല. ബൾബുകളുടെ വെളിച്ചം മാത്രമാണ് ആശ്രയം. പിന്നീട് ഓരോ കഥാപാത്രങ്ങളെ പരിചയപ്പെടുത്തുന്നിടത്ത് കഥ വികസിക്കുന്നു. വെറും മൂന്ന് എപ്പിസോഡിൽ തീർക്കാവുന്ന കഥയായിട്ട് കൂടി നല്ല രീതിയിൽ ആകാംഷ നൽകുന്നുണ്ട് അവതരണമികവ്.

💢രാധിക ആപ്‌തെക്ക് യാതൊരു വെല്ലുവിളിയും ഉയർത്തുന്നില്ല നിദ എന്ന കഥാപാത്രം. എന്നാൽ കിട്ടിയത് ഭംഗിയാക്കി. നിദ കഴിഞ്ഞാൽ ഓർമ്മയിൽ നിൽക്കുക ലക്ഷ്മി എന്ന കഥാപാത്രം മാത്രമാണ്. മറ്റുള്ളവർക്കൊന്നും യാതൊന്നും ചെയ്യാനുണ്ടായിരുന്നില്ല.

🔻ＦＩＮＡＬ ＶＥＲＤＩＣＴ🔻

വെറുമൊരു സീരീസ് എന്നതിലുപരി മികവുറ്റ ആശയങ്ങളുടെ ശക്തമായ അവതരണം കൂടിയാണ് ഗൗളിന് മുതൽക്കൂട്ട്. രാജ്യത്തിന്റെ അനുവാദത്തോടെ പൗരന്മാരെ ക്രൂരമായി ചൂഷണം ചെയ്യുമ്പോൾ ഓരോരുത്തരിലെയും ഗൗൾ ഉണരുകയാണ്. നിദയുടെയും. അതൊരു രണ്ടാം ഭാഗമായി ഭവിക്കട്ടെ എന്ന് ആത്മാർത്ഥമായി ആഗ്രഹിക്കുന്നു.

ＭＹ ＲＡＴＩＮＧ :: ★★★½

രണ്ടാം ലോക മഹായുദ്ധം അവശേഷിപ്പിച്ച ഒരു മുറിപ്പാടാണ് കൊറിയയുടെ വിഭജനം. നോർത്ത് കൊറിയ- സൗത്ത് കൊറിയ എന്നിങ്ങനെ ഒരു രാജ്യത്തെ രണ്ടായി പിളർന്നപ്പോൾ അവിടെ വൃണപ്പെട്ടത് ഒന്നായി നിന്നിരുന്ന ഒരു ജനതയുടെ മനസ്സ് കൂടിയാണ്. അവരെ രണ്ടായി പിരിച്ചപ്പോൾ അത്ര നാൾ സഹോദരങ്ങളായി ഒരുമിച്ച് നടന്നവരിൽ പോലും ശത്രുത ജനിക്കുകയായിരുന്നു.


💢ഇരു കൊറിയൻ കരകളിലും ഏറ്റവും പ്രചാരമുള്ള കായിക ഇനമാണ് 'ടേബിൾ ടെന്നീസ്. അതുകൊണ്ട് തന്നെയാണ് ആദ്യമായി ഇരു രാജ്യങ്ങളും ഒരുമിക്കാൻ ഈ കായിക ഇനം കാരണമായതും. 1991ൽ അരങ്ങേറിയ ടേബിൾ ടെന്നീസ് ടൂർണ്ണമെന്റിൽ ആദ്യമായി 'കൊറിയ' എന്ന പേരിൽ ഒരു ടീമിറങ്ങി. എന്നാൽ കാര്യങ്ങൾ വിചാരിക്കുന്നത് പോലെ എളുപ്പമല്ല.

💢1987 കാലഘട്ടത്തിൽ ഉണ്ടായ ചില ബോംബിങ്ങുകളാണ് അങ്ങനെയൊരു ഉദ്യമത്തിന് സാക്ഷ്യം വഹിച്ചത്. അതിന് ശേഷമുണ്ടായ ചില ചർച്ചകളുടെ അവസാനഘട്ട തീരുമാനമായിരുന്നു ഇരു രാജ്യങ്ങളുടെ ടീമുകളും ചേർത്ത് ഒരൊറ്റ കൊറിയൻ ടീമിനെ ഇറക്കുകയെന്നത്. ടേബിൾ ടെന്നീസിൽ ഇരു രാജ്യങ്ങളും അതികായന്മാരായിരുന്നെങ്കിലും അവർക്ക് മുന്നിൽ വന്മതിൽ പോലെ നിന്ന രാജ്യമാണ് ചൈന. ഫൈനലിൽ തോറ്റ് മടങ്ങേണ്ട ചരിത്രമായിരുന്നു എന്നും കൊറിയയുടേത്. രണ്ട് കൊറിയയിലെ ശക്തരായ കളിക്കാർ ഉണ്ടെങ്കിലും ചൈനക്ക് മുന്നിൽ ദുർബ്ബലരാവുകയായിരുന്നു. അതുകൊണ്ട് തന്നെ രാജ്യത്തിന്റെ ഐക്യം ഊട്ടിയുറപ്പിക്കാനും ടീമിനെ ശക്തിപ്പെടുത്താനും ഈ തീരുമാനത്തിനാവും എന്ന് കരുതി.

ടൂർണമെന്റിന് രണ്ട് മാസം മുമ്പ് മാത്രം ഈ തീരുമാനമറിഞ്ഞ കായികതാരങ്ങളുടെ മാനസികാവസ്ഥ ഒന്ന് ഊഹിച്ച് നോക്കാവുന്നതേ ഉള്ളൂ. പലതവണ എതിരെ പൊരുതിയവർ ഇനിമുതൽ തോളോട് തോൾ ചേർന്ന് പൊരുതണമെന്ന പ്രഖ്യാപനം അവരിൽ എത്രത്തോളം ആഘാതം ഉണ്ടാക്കിക്കാണും. തുടർന്നുള്ള രണ്ട് കൂട്ടരുടെയും മാനസികമായ തയ്യാറെടുപ്പുകളാണ് ചിത്രം കൈകാര്യം ചെയ്യുന്നത്. ചരിത്രത്തിൽ രേഖപ്പെടുത്തിയ സംഭവം കൂടിയാവുമ്പോൾ അതിന് മാറ്റ് കൂടും.

💢ഒരു സ്പോർട്ട്സ് മൂവി എന്ന നിലയിലും ഇമോഷണൽ ഡ്രാമ എന്ന നിലയിലും തിളങ്ങുന്നുണ്ട് As-One. യഥാർത്ഥ സംഭവമാകുമ്പോൾ കാര്യങ്ങൾ നമുക്ക് നേരത്തെ വ്യക്തമാണ്. ആ ഗെയിമിൽ എന്താണ് സംഭവിച്ചതെന്നും എങ്ങനെയാണ് കൊറിയക്കാരുടെ ഇടയിൽ മാറ്റമുണ്ടാക്കിയതുമെന്നൊക്കെ പകൽ പോലെ വ്യക്തം. എന്നിട്ടും മികച്ച രീതിയിൽ അവ സ്‌ക്രീനിൽ പകർത്താൻ സംവിധായകനായിട്ടുണ്ട്. പ്രേക്ഷകനെ പിടിച്ചിരുത്തുന്നതും അവതരണത്തിലെ മിടുക്ക് തന്നെ.

💢ഇരു കൊറിയകളിലെയും നമ്പർ വൺ താരങ്ങളായിരുന്നു Hyun Jung Hwa, Li Bun Hui എന്നിവരെ മുൻനിർത്തിയാണ് കഥ പറയുന്നത്. കൂടെ മറ്റ് താരങ്ങളുമുണ്ട്. ടൂർണമെന്റിന് രണ്ട് മാസം മാത്രം ശേഷിക്കെ ഇരു കരയിലെയും കളിക്കാർ എങ്ങനെ പൊരുത്തപ്പെട്ടുവരുന്നു എന്നൊക്കെ സരസമായി കാണിക്കുന്നുണ്ട്. ഓരോ സന്ദർഭങ്ങളും നമുക്ക് ഊഹിക്കാമെങ്കിലും അതൊരു പോരായ്മയായി തോന്നില്ല. സിനിമയുടെ അവസാനഭാഗങ്ങൾ ഇമോഷണലായി ഒരുപാട് മുന്നിട്ട് നിക്കുന്നുണ്ട്. ഒരുപാട് പരിമിതികൾ ഉള്ള നോർത്ത് കൊറിയയിൽ മറ്റുള്ളവരെ ബന്ധപ്പെടുന്ന കാര്യം പോലും ദുർഘടം പിടിച്ചതാവുമ്പോൾ വീണ്ടും കണ്ടുമുട്ടുമോ ഇല്ലയോ എന്ന ചോദ്യം മനസ്സിനെ അലട്ടുന്നുണ്ട്.

💢സ്പോർട്ട്സിന് പ്രാധാന്യം നൽകി തന്നെയാണ് കഥയുടെ പോക്ക്. ടേബിൾ ടെന്നീസ് ഗെയിമിലെ രംഗങ്ങളിൽ അത് പ്രകടവുമാണ്. താരങ്ങളിൽ നല്ല മെയ്‌വഴക്കം ഓരോ രംഗങ്ങളിലും പ്രകടമായിരുന്നു. ചിത്രീകരണത്തിന് ഏകദേശം 4 മാസം മുമ്പ് മുതൽ താരങ്ങൾ ടേബിൾ ടെന്നീസ് പരിശീലിച്ചിരുന്നു. അതിന് അവരെ സഹായിച്ചത് ജീവിതത്തിലെ യഥാർത്ഥ താരങ്ങളും. അതുകൊണ്ട് തന്നെ അത്തരം രംഗങ്ങൾ നല്ല രീതിയിൽ ആസ്വദിക്കാൻ കഴിയുന്നുണ്ട്.

🔻ＦＩＮＡＬ ＶＥＲＤＩＣＴ🔻

കൊറിയൻ ചരിത്രത്തിലെ നിർണ്ണായകമായ വഴിത്തിരിവുകളിൽ ഒന്നെന്ന് വിശേഷിപ്പിക്കാവുന്ന ഈ ഒത്തുചേരൽ സിനിമയായപ്പോൾ മികച്ച കാഴ്ചാനുഭവം തന്നെയായാണ് പ്രേക്ഷകർക്ക് ലഭിച്ചത്. തീക്ഷ്ണമായ മുഹൂർത്തങ്ങളാലും റ്റീബിൽ ടെന്നീസിന്റെ ആവേശത്താലും കാണികളെ പിടിച്ചിരുത്തുന്ന നല്ലൊരു ചിത്രം.

ＭＹ ＲＡＴＩＮＧ :: ★★★½

ഭൂതകാലത്തെ ഓർമ്മകൾ പലപ്പോഴും നമ്മെ വേട്ടയാടിക്കൊണ്ടിരിക്കും. അവ അങ്ങനെ സംഭവിച്ചില്ലായിരുന്നെങ്കിലോ എന്ന് നമ്മൾ ആഗ്രഹിക്കും. വിലപ്പെട്ട പലതും നഷ്ടമായതോർത്ത് വിലപിക്കും. ആ സമയത്ത് അവയൊക്കെ മാറ്റാൻ ഒരവസരം ലഭിച്ചാലോ..??


💢കൊറിയൻ സിനിമകളിൽ പല ടൈംലൈനുകളിൽ കഥ പറഞ്ഞ ചുരുക്കം ചില സിനിമകൾ മാത്രമേ കണ്ടിട്ടുള്ളൂ. അതിൽ ഇഷ്ടപ്പെട്ട ഒന്നാണ് 'Time Renegades'. Signalന്റെ മൂലകഥയും ഏതാണ്ട് അതുപോലെ തന്നെയാണെന്ന് ലളിതമായി പറയാം. കൂടുതൽ കഥയിലേക്ക് കഥക്കുന്നില്ല. ഇനി കാണുന്നവരുടെ ത്രിൽ കളയുന്നില്ല.

💢സീരീസിന്റെ ഏറ്റവും വലിയ പ്രത്യേകതയായി തോന്നിയത് അത് കാഴ്ചയിൽ നൽകുന്ന പുതുമയാണ്. പലവുരു ഉപയോഗിച്ച പ്രമേയമാണെങ്കിൽ കൂടി അതിന്റെതായ ഫ്രഷ്‌നെസ്സ് നൽകാൻ സവിധായകനായിട്ടുണ്ട്. തീരെ ഊഹിക്കാൻ പറ്റാത്ത കഥയും അവതരണവും ഓരോ എപ്പിസോഡിന്റെയും നട്ടെല്ലാവുമ്പോൾ ഞെട്ടിക്കുന്ന പല കാഴ്ചകൾക്കും സാക്ഷിയാവേണ്ടി വരുന്നു പ്രേക്ഷകർ. പ്രധാനപ്പെട്ട കഥാപാത്രങ്ങളൊക്കെയും ബ്രില്ലിയൻറ് ആയി കാണിക്കുന്നതിനാൽ ഒരു പിടിയും തരാത്ത വിധമാണ് തിരക്കഥ ഒരുക്കിയിരിക്കുന്നത്. അത് തന്നെയാണല്ലോ നമുക്ക് വേണ്ടതും. പൊടുന്നനെ ഉണ്ടാവുന്ന വഴിത്തിരിവുകൾ നമ്മിലുണ്ടാക്കുന്ന കൗതുകം ചില്ലറയല്ല.

💢ശ്രദ്ധയാർജ്ജിച്ച മറ്റൊരു കാര്യമാണ് ഭൂതകാലത്തിന്റെ വേട്ടയാടൽ. എത്രയൊക്കെ മാറ്റം വരുത്തിയാലും നമ്മൾ ആഗ്രഹിക്കുന്നത് പോലെയാവില്ല നമ്മുടെ ജീവിതം. നല്ല മാറ്റമാണെങ്കിൽ കൂടി അതിന്റെതായ പരിണിതഫലം നമുക്ക് ഭാവിയിൽ അനുഭവിക്കേണ്ടി വരിക തന്നെ ചെയ്യും. പല സന്ദർഭങ്ങളും അവ വരച്ച് കാട്ടുന്നുണ്ട്. സ്പോയിലർ ആവുമെന്നതിനാൽ അവ പരാമർശിക്കുന്നില്ല.

💢ആകാംഷയുടെ മുൾമുനയിൽ നിർത്തുന്ന 15 എപ്പിസോഡും താണ്ടി ഫിനാലെയിലേക്ക് വന്നപ്പോൾ അൽപം നിരാശയായിരുന്നു ഫലം. ബാക്കിയുള്ള എപ്പിസോഡുകളിൽ കാട്ടിയതിനേക്കാൾ എളുപ്പമാണ് കാര്യങ്ങളെങ്കിലും ആവിഷ്കാരത്തിൽ അത് പ്രകടമായിരുന്നില്ല. ഒരുതരം അലസത പല ഘട്ടങ്ങളിലും അഭിമുഖീകരിക്കേണ്ടി വരുന്നുണ്ട്. രണ്ടാം ഭാഗത്തിനായി വഴിതെളിക്കുന്നുണ്ടെങ്കിലും എവിടെ നിർത്തണമെന്ന് അറിയാത്തത് പോലെ. ബാക്കിയുള്ള എപ്പിസോഡുകളിൽ ചിലതിൽ അൽപം മെലോഡ്രാമ കടന്നുകൂടിയിട്ടുണ്ടെങ്കിലും അവ ഒരിക്കലും ആസ്വാദനത്തിന് ഭംഗം വരുത്തിയിരുന്നില്ല. എന്നാൽ ലാസ്റ്റ് എപ്പിസോഡിൽ ത്രില്ലടിപ്പിക്കുന്ന ഭാഗങ്ങൾ പോലും അമേച്വറിഷ് ആയ അവതരണം മൂലം പാളിപ്പോകുന്നതായി തോന്നി. എങ്കിലും മൊത്തത്തിൽ തൃപ്തി തന്നെയാണ് ഫലം.

💢എഡിറ്റിങ്ങും പശ്ചാത്തലസംഗീതവും പറയാതെ വയ്യ. അതിഗംഭീരമായിരുന്നു രണ്ട് വിഭാഗവും. ആദ്യഭാഗങ്ങളിൽ പാസ്റ്റും പ്രസന്റും അടിക്കടി ഒരുമിച്ച് വരുമ്പോൾ രോമാഞ്ചം കൊള്ളിക്കാൻ സാധിച്ചിട്ടുണ്ട് മികവ് പുലർത്തുന്ന എഡിറ്റിങ്ങിന്. കൂടെ സീരീസിന്റെ സിഗ്നേച്ചർ ബിജിഎം കൂടിയാവുമ്പോൾ പറഞ്ഞറിയിക്കാനാവില്ല ആ നേരമുണ്ടായ അനുഭൂതി. ഇരുകാലഘട്ടങ്ങളും എളുപ്പം മനസ്സിലാവുന്ന രീതിയിലുള്ള കളർ ടോണും കാര്യങ്ങൾ എളുപ്പമാക്കുന്നുണ്ട്.

💢Jee-hoon lee, Jin- Woong Cho എന്നിവരുടെ ഗംഭീര പ്രകടനങ്ങളും സിഗ്നലിന് മുതൽക്കൂട്ടാവുന്നുണ്ട്. Hye-Su Kim നല്ല ക്യൂട്ട് ആയിരുന്നു ഇരു കാലഘട്ടങ്ങളിലും. കൂടെ സ്റ്റൈലിഷും. പ്രകടനവും മികച്ചത് തന്നെ. ഒപ്പം കട്ട വില്ലനിസവുമായി Jang Hyun-Sung നിറഞ്ഞ് നിൽക്കുന്നുണ്ട്.

🔻ＦＩＮＡＬ ＶＥＲＤＩＣＴ🔻

"Brilliant Execution Of a Brilliant Screenplay". ഒറ്റവാക്കിൽ പറഞ്ഞാൽ അതാണ് സിഗ്നൽ. ഒരു എപ്പിസോഡ് കണ്ട് തീർത്താൽ ബാക്കിയുള്ളവയും കണ്ടിരിക്കുമെന്ന് 101% ഉറപ്പ്. അത്ര ഗംഭീര അനുഭവമാണ് ആദ്യം കണ്ട കൊറിയൻ സീരീസ് എന്ന നിലയിൽ സിഗ്നൽ നൽകിയത്. രണ്ടാമത്തെ സീസണിനായുള്ള കാത്തിരിപ്പിൽ ഞാനും കൂടുന്നു...

 ＭＹ ＲＡＴＩＮＧ::★★★★½

മനുഷ്യനും മൃഗവും തമ്മിലുള്ള സ്നേഹം പ്രമേയമാക്കിയ പല ചിത്രങ്ങളും ഇതിന് മുമ്പ് ഇറങ്ങിയിട്ടുണ്ട്. അവയെല്ലാം നമ്മുടെ മനസ്സ് കീഴടക്കിയിട്ടുമുണ്ട്. ആൽഫ പറയുന്നത് ആ സ്നേഹത്തിന്റെ ആരംഭത്തിന്റെ കഥയാണ്. അതും പല പ്രത്യേകതകളോടെ.


💢20000 വർഷങ്ങൾക്ക് മുമ്പാണ് കഥ നടക്കുന്നത്. തങ്ങളുടെ ഇരകളെ വേട്ടയാടിപ്പിടിക്കുന്നത് പുതുതലമുറയെയും പരിശീലിപ്പിക്കാൻ ഇറങ്ങുകയാണ് ആ ഗോത്രവംശം. പുതുതലമുറയിൽ പെട്ടയാളാണ് 'Keda'യും. എന്നാൽ അക്രമം കടുത്തപ്പോൾ തന്റെ വംശത്തിൽ നിന്ന് വേർപ്പെട്ടുപോവുന്ന kedaക്ക് അഭിമുഖീകരിക്കേണ്ടി വന്നത് ഒരുപാട് പ്രശ്നങ്ങളാണ്. അപ്പോഴാണ് അവൻ ഒരു ചെന്നായക്കൂട്ടത്തിന്റെ മുമ്പിൽ വന്ന് പെട്ടതും. മൃഗങ്ങളെ ശത്രുക്കളായി മാത്രം കണ്ടിരുന്ന ആ തലമുറക്ക്, മനുഷ്യകുലത്തിന് ആദ്യമായി ഒരു ചങ്ങാതിയെ കിട്ടി. ആൽഫ.

💢വളരെ ലളിതമായ കഥ. വളരെ കുറച്ച് മാത്രം പ്രത്യക്ഷപ്പെടുന്ന സംഭാഷണങ്ങൾ. അതും പുരാതനമായ ഏതോ ഗോത്രഭാഷ. എന്നിട്ടും സിനിമ നമ്മെ വല്ലാതെ പിടിച്ചിരുത്തുന്നുണ്ട്. അതിന് കാരണങ്ങൾ പലതാണ്. ഒന്നാമതായി സാർവ്വലൗകികമായ 'സ്നെഹം' എന്ന വികാരത്തിന് ഭാഷകളില്ലല്ലോ. കേടയും ആൽഫയും മാത്രമാണ് ഭൂരിഭാഗം സമയവും സ്‌ക്രീനിൽ. എന്നാൽ ഇരുവരും തമ്മിലുള്ള രംഗങ്ങൾ മനം മയക്കുന്നതാണ്. അതോടൊപ്പം അതിഗംഭീര വിഷ്വൽസും. ഓരോ ഫ്രയിമും ഇപ്പോഴും കണ്മുന്നിലുണ്ട്. അത്ര കണ്ണഞ്ചിപ്പിക്കുന്നുണ്ട് കാഴ്ച്ചകൾ. കൂടെ മികച്ച പശ്ചാത്തലസംഗീതവും.

💢3D കാഴ്ചകൾ സിനിമക്ക് ഒരു പ്രത്യേകത സമ്മാനിക്കുന്നുണ്ട്. അത്തരത്തിലാണ് വിഷ്വൽസ് കഥ പറയുന്നത്. ട്രാജഡി ആവുമോ എന്ന് വിഷമിച്ചിരുന്ന സമയത്ത് അതിമനോഹരമായ ഒരു ക്ലൈമാക്സ് നൽകി മനസ്സിന് കുളിർമ സമ്മാനിക്കുന്നുണ്ട് ചിത്രം. ഏറ്റവും ഒടുവിലത്തെ രംഗവും സുന്ദരമായിരുന്നു. ആകെ മൊത്തത്തിൽ മികച്ച തീയേറ്റർ അനുഭവം തന്നെയായി ആൽഫ.

🔻ＦＩＮＡＬ ＶＥＲＤＩＣＴ🔻

ഏതൊരു ക്രൂരനിലും ഒളിഞ്ഞിരിക്കുന്ന മൃഗസ്നേഹത്തെ പുറത്ത് കൊണ്ടുവരാനുള്ള കെൽപ്പുണ്ട് ആൽഫക്ക്. അത്രകണ്ട് നമ്മുടെ ഹൃദയം കീഴടക്കും ഈ ചിത്രം. തീയേറ്റർ അനുഭവം ആവശ്യപ്പെടുന്ന ചിത്രം തന്നെയാണ് ആൽഫ. തീയേറ്ററിൽ തന്നെ കണ്ടാസ്വദിക്കുക.

ＭＹ ＲＡＴＩＮＧ :: ★★★½

💢ബോളിവുഡിൽ കണ്ടുമടുത്ത കാഴ്ചകളും കഥയും. ആകെയുള്ളൊരു വ്യത്യാസം കേന്ദ്രസ്ഥാനത്ത് നായകന്മാർ മാറി നായികമാർ ആയി എന്നൊന്ന് മാത്രമാണ്. പല സിനിമകളും ഇതേ കഥകൊണ്ട് തന്നെ പലപ്പോഴും രസിപ്പിച്ചിട്ടുണ്ടെങ്കിലും ആ കാര്യത്തിൽ പൂർണ്ണപരാജയമായി മാറുകയാണ് വീരേ ദി വെഡിങ്.

💢ചെറുപ്പം മുതലേ അടുത്തറിയുന്ന നാല് സുഹൃത്തുക്കൾ. അതിൽ കല്യാണമേ വേണ്ടെന്ന് വെച്ച കാളിന്ദി ഒരു പ്രത്യേക സാഹര്യത്തിൽ കല്യാണത്തിന് സമ്മതിക്കുന്നു. അവളുടെ കല്യാണത്തിന് ഒരുമിക്കുന്ന മറ്റ് മൂന്നുപേർ. അവർക്കും അവരുടേതായ കഥകളും ജീവിതവും ഉണ്ട്. അവരുടെ സൗഹൃദം കൈകാര്യം ചെയ്തുകൊണ്ട് കഥ വികസിക്കുന്നു. സോറി വികസിക്കാൻ പ്രത്യേകിച്ച് ഒരു കഥയും ഇല്ല.

💢എല്ലാ റോം കോം സിനിമകളെ പോലെ തന്നെ ഒരു വ്യത്യാസവും ഇല്ലാതെ നാം പ്രതീക്ഷിക്കുന്ന പോലെത്തന്നെയാണ് കഥയും മുന്നോട്ട് പോവുക. ചിരി പകരുന്ന ചില രംഗങ്ങൾ മാത്രമാണ് ഇടക്ക് ആശ്വാസം. പിന്നെ ചില പാട്ടുകളും. അതല്ലാതെ യാതൊരു പുതുമയും ചിത്രം കണ്ടുകഴിയുമ്പോൾ ലഭിക്കുന്നില്ല.

💢സ്വര ഭാസ്കറിന്റെ കഥാപാത്രം മറ്റുള്ളവരിൽ നിന്ന് വ്യത്യസ്തമായി നിൽക്കുന്നുണ്ട്. ചില കൗണ്ടറുകളും പുള്ളിക്കാരിയുടെ വക ഇറക്കുന്നുണ്ട്. അതോടൊപ്പം മറ്റുള്ളവരേക്കാളേറെ ശിഖ തത്സാനിയയുടെ കഥാപാത്രം സ്‌ക്രീൻ പ്രസൻസ് അപഹരിക്കുന്നുണ്ട്. അവരുടെ കഥാപാത്രങ്ങൾ മാത്രമാണ് അൽപ്പമെങ്കിലും പിടിച്ചിരുത്തുന്നത്. കരീനക്കും സോനം കപൂറിനും പ്രേക്ഷകശ്രദ്ധ ആകർഷിക്കത്തക്ക ഒന്നും ചെയ്യാൻ ഉണ്ടായിരുന്നില്ല.

🔻ＦＩＮＡＬ ＶＥＲＤＩＣＴ🔻

സ്ഥിരം കാണാൻ സാധിക്കുന്ന റോം കോം കഥയും യാതൊരു പുതുമയും സമ്മാനിക്കാത്ത അവതരണവും വീണ്ടും സ്‌ക്രീനിൽ വരുമ്പോൾ വിരസത മാത്രമാണ് സിനിമയിലുടനീളം നിലനിന്നത്. അതുകൊണ്ട് തന്നെ നിരാശ നൽകിയ അനുഭവമായി ഈ സൗഹൃദക്കഥ.

ＭＹ ＲＡＴＩＮＧ :: ★½

💢ക്രിമിനോളജി പ്രൊഫസ്സർ ആണെങ്കിലും തന്റെ ക്ളാസുകൾ കഴിഞ്ഞാൽ ലൈനിസ് നേരെ വരിക തന്റെ അച്ഛന്റെ പക്കലേക്കാണ്. ഹോസ്പിറ്റലിൽ അതീവ ഗുരുതരാവസ്ഥയിൽ കഴിയുന്ന അച്ഛനൊപ്പം സമയം ചിലവഴിക്കുകയാണ് അദ്ദേഹത്തിന് മനസ്സിൽ ഏറ്റവും സന്തോഷകരമായ കാര്യം. ഒറ്റപ്പെട്ട ജീവിതം നയിക്കുന്ന ലൈനിസിന് കൂട്ടായി മറ്റാരും ഉണ്ടായിരുന്നില്ല.

ഒരുനാൾ തന്റെ പ്രൊഫസറായ അരിസ്റ്റോട്ടിലിസിന്റെ പക്കൽ നിന്നാണ് ആ കേസ് ഫയലിൽ പോലീസിനെ അനുഗമിക്കണമെന്ന വാർത്ത ലൈനിസ് കേട്ടത്. ഒരു കൊലപാതകരംഗത്തിലാണ് പിന്നീട് അവർ ചെല്ലുന്നത്. അതിൽ ലൈനിസിനെ ഏറ്റവുമധികം ആകർഷിച്ച ഘടകം അവിടെ എഴുതിവെച്ചിരുന്ന വചനങ്ങളായിരുന്നു. പൈതഗോറിയൻ വചനങ്ങൾ അദ്ദേഹത്തിൽ ജിഞ്ജാസ സൃഷ്ടിച്ചു. എന്നാൽ ഒരു കൊലപാതകത്തിൽ അത് അവസാനിച്ചിരുന്നില്ല. അത് തുടർന്നുകൊണ്ടേയിരുന്നു.

💢ആദ്യമായി കാണുന്ന ഗ്രീക്ക് ചിത്രമാണ് 'Eteros Ego'. ഗ്രീക്ക് എന്ന് കേൾക്കുമ്പോൾ തന്നെ മനസ്സിൽ വരിക തത്വചിന്തകന്മാരുടെയും കണക്കിൽ അഗ്രകണ്യന്മാരുടെയും പേരുകളാണ്. സിനിമയിലേക്ക് കടന്നപ്പോഴും അങ്ങനെ തന്നെ. പൈതഗോറസിനെ കൂട്ടുപിടിച്ചാണ് കൊലപാതകപാരമ്പര ബന്ധിപ്പിച്ചിരിക്കുന്നത്. കണക്കിലെ കളികൾ ഇത്തവണ ശരിക്കും ആകാംഷ സമ്മാനിക്കുന്നുമുണ്ട്. അതാണ് സിനിമയിലെ ഏറ്റവും ആകർഷകമായ ഘടകവും.

💢പതിവ് ത്രില്ലറുകളെപ്പോലെ അതിവേഗതയിലുള്ള കഥ പറച്ചിലല്ല ചിത്രത്തിന്റേത്. പതിയെ പറഞ്ഞുതുടങ്ങി പ്രേക്ഷകരെ സിനിമയുടെ പാതയിലേക്ക് കൊണ്ടുവന്ന ശേഷം താല്പര്യമുണർത്തുന്ന രീതിയിൽ ഓരോ കാര്യങ്ങളും പരിചയപ്പെടുത്തുകയാണ് സംവിധായകൻ. ഒരു നിമിഷം പോലും വിരസത നൽകാതെ, അധികം വേഗതയില്ലാതെ സഞ്ചരിക്കുന്ന ത്രില്ലറുകൾ വിരളമാണ്. അതോടൊപ്പം ഘട്ടം ഘട്ടമായുള്ള വെളിപ്പെടുത്തലുകൾ ആകാംഷയും ആവേശവും നൽകുന്നതുമാണ്.

💢അവസാനം വരെ ത്രില്ലടിപ്പിച്ച് മുന്നോട്ട് പോവുമ്പോഴും ക്ലൈമാക്സ് എല്ലാവർക്കും ഒരുപോലെ ഇഷ്ടപ്പെടുന്ന ഒന്നായി മാറുന്നില്ല. വ്യക്തിപരമായി ഇഷ്ടപ്പെട്ടെങ്കിലും മറ്റൊരു ആംഗിളിൽ നിന്ന് നോക്കുമ്പോൾ അതും ശരിയായില്ല എന്നൊരു തോന്നൽ മനസ്സിൽ അവശേഷിക്കുന്നു. അതോടൊപ്പം ഒരു ചോദ്യചിഹ്നവും. എങ്കിലും ത്രില്ലർ എന്ന രീതിയിൽ പുതിയൊരു അനുഭവമായിരുന്നു Eteros Ego.

🔻ＦＩＮＡＬ ＶＥＲＤＩＣＴ🔻

കണക്കിലെ കളികൾ കൊണ്ട് സമ്പന്നമായ ത്രില്ലർ എന്ന രീതിയിൽ വളരെയധികം ആകാംഷ പകരുന്നുണ്ട് ഈ ചിത്രം. സ്ലോ പേസ് ആണെങ്കിൽ കൂടി പ്രേക്ഷകരെ പിടിച്ചിരുത്താൻ കഴിയുന്നിടത്താണ് ചിത്രം വിജയിക്കുന്നത്. അതുകൊണ്ട് തന്നെ സിനിമ സമ്മാനിച്ചത് പൂർണ്ണ സംതൃപ്തിയാണ്. നിരാശ നൽകില്ല എന്ന് ഉറപ്പ്.

ＭＹ ＲＡＴＩＮＧ :: ★★★★☆

"എന്നാലും നിനക്കെങ്കിലും ഓർക്കായിരുന്നു"

ഈ ഡയലോഗ് മനസ്സിന് നൽകിയ നോവ് ചില്ലറയല്ല. സിനിമയിൽ ഒരു നീറ്റൽ സമ്മാനിച്ച രംഗം വേറെയില്ല. ബാക്കിയുള്ളയിടം മുഴുവൻ ആർത്തുല്ലസിച്ച് കണ്ടുതീർത്തു എന്ന് പറയുന്നതാവും സത്യം.


🔻ＳＴＯＲＹ ＬＩＮＥ🔻
      ...............................

🔻ＢＥＨＩＮＤ ＳＣＲＥＥＮ🔻

അഡ്വേഞ്ചേഴ്‌സ് ഓഫ് ഓമനക്കുട്ടൻ എന്ന ചിത്രം തീയേറ്ററിൽ നല്ല ആസ്വാദനം നൽകിയ ഒന്നായിരുന്നു. പോരായ്മകൾ ഉണ്ടെങ്കിലും രസകരമായ പ്രമേയമായിരുന്നു സിനിമയെ താങ്ങിനിർത്തിയത്. അപ്പോൾ തന്നെ നോട്ടമിട്ടതാണ് രോഹിത്ത് എന്ന സംവിധായകനെ. രണ്ടാം ചിത്രം പ്രഖ്യാപിച്ചപ്പോഴും പ്രതീക്ഷ ചില്ലറയായിരുന്നില്ല. അതുകൊണ്ടാണ് ആദ്യദിനം ടിക്കറ്റെടുത്ത്.

പോസ്റ്ററും ട്രെയിലറും പ്രതീക്ഷ നൽകിയത് പോലെ തന്നെ ഒരു അപാര ഫാന്റസി വേൾഡ് ആണ് സംവിധായകൻ ഒരുക്കിയിരിക്കുന്നത്. മരണത്താൽ ശാപം കിട്ടിയ നാടിന്റെ കഥ പറഞ്ഞ് തുടങ്ങി പിന്നീടങ്ങോട്ട് ഒരു ഫൺ റൈഡ് തന്നെയാണ്. ഒരുപാട് രസകരമായ കഥാപാത്രങ്ങളും അതിനേക്കാൾ രസകരമായ അവരുടെ വിശേഷങ്ങളുമൊക്കെയായി വേറൊരു നാട്ടിലെത്തിക്കുകയാണ് പുള്ളിയും തിരക്കഥാകൃത്ത് സമീറും ചേർന്ന്. അന്നത്തെ പ്രധാന പോരായ്മയായിരുന്ന സമയദൈർഘ്യം ഇത്തവണ എന്തായാലും ഇല്ല. രണ്ട് മണിക്കൂറിൽ സംഗതി തീർത്തിട്ടുണ്ട്.

പതിയെ കഥാപാത്രങ്ങളെ പരിചയപ്പെടുത്തിയുള്ള തുടക്കം രസകരമായ ചില മുന്നേറ്റങ്ങൾ ഓരോ പോയിന്റിൽ നല്കിവരുമ്പോഴാണ് ഇന്റർവെല്ലിൽ ഒരു ഇടിവെട്ട് ട്വിസ്റ്റ് നൽകിയത്. അതുകഴിഞ്ഞപ്പോൾ കാര്യങ്ങൾ കൂടുതൽ രസകരമായി. ഒരുപാട് ചിരിക്ക് വഴിവെക്കുന്ന സന്ദർഭങ്ങളും പുഞ്ചിരി സമ്മാനിക്കുന്ന മുഹൂർത്തങ്ങളും ചിന്തിപ്പിക്കുക്കുകയും ചിരിപ്പിക്കുകയും ചെയുന്ന  ഡയലോഗുകളും ഫാന്റസിയെന്ന ലേബലിനോട് നീതി പുലർത്തുന്ന അവതരണങ്ങളുമൊക്കെയായി ഗംഭീര അനുഭവമാകുന്നുണ്ട് ഇബ്ലീസിന്റെ വിശേഷങ്ങൾ. കൂടുതൽ കഥയിലേക്ക് കടക്കുന്നില്ല. പറഞ്ഞിട്ടും പറഞ്ഞിട്ടും മതിവരാത്ത വിശേഷങ്ങളാണ് മനസ്സിലിപ്പോഴും.

മൊത്തത്തിൽ തീയേറ്ററിൽ തന്നെ കണ്ടനുഭവിക്കേണ്ട, വർണ്ണങ്ങളുടെയും മനോഹരമായ ആശയങ്ങളുടെയും മായികലോകം തീർക്കുന്ന, ഒരുപാട് പോസിറ്റിവിറ്റി നമ്മിൽ നല്കുന്ന ഗംഭീരചിത്രമാണ് ഇബ്ലീസ്.

"രോഹിത്തേട്ടാ ഇങ്ങൾ ഇബ്‌ലീസല്ല ഒരു ജിന്നാണ്"

🔻ＯＮ ＳＣＲＥＥＮ🔻

ആസിഫ് അലിയുടെ  കഥാപാത്രത്തേക്കാൾ സ്‌ക്രീൻ പ്രസൻസ് അപഹരിക്കുന്നവയാണ് ലാലിന്റെയും സിദ്ധീഖിന്റെയും പ്രകടനവും കഥാപാത്രങ്ങളും. ഇവർ രണ്ടും ചിരിപ്പിച്ചതിന് കണക്കില്ല. ആസിഫിന് വെല്ലുലവിളി ഉയർത്തുന്ന ഒന്നും ചെയ്യാൻ ഉണ്ടായിരുന്നില്ല. വൈശാഖനെ ഭംഗിയായി സ്‌ക്രീനിൽ എത്തിച്ചിട്ടുണ്ട്. മഡോണയുടെ കഥാപാത്രം അവസാനഭാഗങ്ങളിൽ ഡയലോഗ് പോലുമില്ലാതെ ഇഷ്ടം സമ്പാദിക്കുന്നുണ്ട്. ശ്രീനാഥ്‌ ഭാസിയുടേതും രസകരമായിരുന്നു.

🔻ＭＵＳＩＣ & ＴＥＣＨＮＩＣＡＬ ＳＩＤＥＳ🔻

ഫാന്റസി എന്ന ലേബലിൽ വരുമ്പോൾ ഛായാഗ്രഹണവും സംഗീതവുമൊക്കെ ഒരുപാട് പ്രാധാന്യമുള്ളതാണ്. സ്‌ക്രീനിൽ വർണ്ണശബളമായ കാഴ്ചകൾ തീർക്കുന്ന, പശ്ചാത്തലസംഗീതം കൊണ്ടും പാട്ടുകൾ കൊണ്ടും ആ ലോകത്തെ മനോഹരമാക്കുന്നു സ്‌കിൽ ജോർജ്ജും ഡോൺ വിൻസെന്റും. എത്ര അഭിനന്ദിച്ചാലും മതിവരില്ല നിങ്ങളെ. പ്രത്യേകിച്ച ഇടവേളക്ക് ശേഷമുള്ള ആ ഗാനം. അതുപോലെ എഡിറ്റിങ്ങും രസകരമാണ്.

🔻ＦＩＮＡＬ ＶＥＲＤＩＣＴ🔻

"ചേട്ടാ ഒരു ടിക്കറ്റ് കൂടി. എനിക്കല്ല ജിന്നിനാണ്."

ＭＹ ＲＡＴＩＮＧ :: ★★★★☆

💢കൊൽക്കത്തയിലെ കൊലപാതകങ്ങളുടെ എണ്ണം ക്രമാതീതമായി വർദ്ധിച്ചുവരികയാണ്. അവയിൽ ഭൂരിഭാഗവും തെളിയിക്കപ്പെടുന്നുണ്ടെങ്കിലും ഒരു തുമ്പും കിട്ടാത്ത മറ്റൊരു വിഭാഗം കൂടിയുണ്ട്. അർധരാത്രി മാത്രം നടക്കുന്ന ചില കൊലപാതകങ്ങൾ. അവയ്ക്ക് ഇതുവരെ ഒരു തെളിവുകളും ലഭിച്ചിട്ടില്ല. കൊലപാതകരീതികൾ തമ്മിൽ ഒരു സാമ്യവും ഇല്ല. പക്ഷെ അതൊരു സീരിയൽ കില്ലിങ്ങ് ആണ്. ആ മൃതദേഹങ്ങളുടെ അടുത്ത് നിന്ന് ലഭിച്ച കവിതകുറിപ്പുകൾ സാക്ഷ്യം വെക്കുന്നത് ഒരു സീരിയൽ കില്ലിങിലേക്കാണ്.

അന്വേഷണങ്ങളിൽ മിടുക്കനായ അഭിജിത്ത് ഇത്തവണ അൽപ്പം കുഴങ്ങി നിൽക്കുകയാണ്. കേസന്വേഷണം തുടങ്ങിയിട്ട് മാസങ്ങളായെങ്കിലും ഇതുവരെ ഒരു നിഗമനത്തിൽ എത്താൻ ആയിട്ടില്ല. അതിനനുസരിച്ച് കൊലപാതകങ്ങളുടെ എണ്ണം ക്രമാതീതമായി കൂടിക്കൊണ്ടേയിരിക്കുന്നു. ഇതിൽ ആശങ്കയിലായി മേലുദ്യോഗസ്ഥൻ മറ്റൊരാളെ കൂടി അഭിജീത്തിന്റെ പിന്തുണക്കായി നിയോഗിക്കാൻ ആലോചന നടത്തുന്നു. വർഷങ്ങളിലായി സസ്പെൻഷനിലായ പ്രബീറിനെ കേസന്വേഷണത്തിനായി യൂണിഫോം ധരിപ്പിക്കുന്നു. എന്നാൽ അതൊരു നല്ല നീക്കമായിരുന്നു..?

💢ഈ സിനിമയുടെ തുടക്കം നല്ലൊരു പ്രതീക്ഷ നൽകുന്നതായിരുന്നു. ടൈറ്റിൽ എഴുതിക്കാണിക്കുന്ന രംഗങ്ങളൊക്കെയും ഒരു ത്രില്ലറിലേക്ക് നയിക്കുന്നതാവുമെന്ന  വ്യക്തമായ സൂചനയാണ് നൽകിയത്. അതുപോലെ തന്നെയായിരുന്നു തുടക്കത്തിന് ശേഷം മുന്നോട്ടുള്ള പോക്കും. എന്നാൽ പൂർണ്ണമായും ത്രില്ലറല്ല, മറിച്ച് വ്യക്തികളുടെ ജീവിതത്തിലേക്കും കഥ കടക്കുന്നുണ്ട്. ഒരുതരത്തിൽ അത് കഥയുടെ പോസിറ്റിവ് എലമെന്റ് തന്നെയാണ്. പക്ഷെ അതിന്റെ ആധിക്യം പലപ്പോഴും ത്രില്ലറെന്ന ഫീൽ നഷ്ടപ്പെടുത്തുന്നുണ്ട്.

💢സ്ലോ പേസ്ഡ് ത്രില്ലറുകൾ നല്ല രീതിയിൽ ആസ്വദിക്കുന്ന വ്യക്തിയെന്ന നിലയിൽ കഥ പറയുന്ന രീതി ആദ്യമൊരു പ്രശ്നമായി തോന്നിയതേ ഇല്ല. എന്നാൽ ത്രില്ലടിച്ച് വരുന്ന മൊമന്റുകളിൽ കൃത്യമായി അനാവശ്യമായ സീനുകളും രണ്ട് പാട്ടുകളും കുത്തിക്കയറ്റിയത് ആസ്വാദനത്തെ തന്നെ സാരമായി ബാധിച്ചു. സിനിമയിൽ തോന്നിയ ഏക നെഗട്ടീവും ആ സീനുകളും പാട്ടുകളുമാണ്. അവയ്ക്ക് ശേഷം വീണ്ടും പേസ് വീണ്ടെടുത്ത് ട്രാക്കിലാവുന്നുണ്ട് ചിത്രം.

💢കേസന്വേഷണം നടക്കുന്ന വഴികളും അത് ചെന്നെത്തുന്ന അവസാനവുമൊക്കെ തൃപ്തി നൽകുന്നതാണ്. അത് കഴിഞ്ഞുള്ള സീനുകൾ ഗംഭീരമായിരുന്നു. സിനിമയിലെ ഏറ്റവും ബെസ്റ്റ് സീൻ അത് തന്നെ. അതുവരെ കണ്ട മികവായിരുന്നില്ല ഒടുവിൽ കാണാനായത്. എന്തായാലും ഇടക്കിടെ നൽകിയ വിരസത ആ ഒറ്റ സീനിൽ മറികടക്കാനായി ചിത്രത്തിന്.

💢മുൻനിരയിൽ നിന്ന രണ്ട താരങ്ങളുടെയും പ്രകടനം തൃപ്തികരമായിരുന്നു. കൂടെ കവിയുടെയും. അതോടൊപ്പം രാത്രികാല ദൃശ്യങ്ങൾ നല്ല രീതിയിൽ പകർത്താനായിട്ടുണ്ട്. അവസാനഭാഗങ്ങളിലെ ബിജിഎം നന്നായിട്ടുണ്ട്.

🔻ＦＩＮＡＬ ＶＥＲＤＩＣＴ🔻

എഡ്ജ് ഓഫ് സീറ്റ് ത്രില്ലർ എന്ന് പറയാനാകില്ലെങ്കിലും നല്ലൊരു ത്രില്ലർ എന്ന് അവകാശപ്പെടാൻ സാധിക്കുന്ന ചിത്രമാണ് സംവിധായകൻ ഒരുക്കിയിരിക്കുന്നത്. കേസന്വേഷണത്തിലുപരി രണ്ട് അന്വേഷണ ഉദ്യോഗസ്ഥരുടെ ജീവിതത്തിലേക്കുള്ള എത്തിനോട്ടം കൂടിയാവുമ്പോൾ തൃപ്തി നൽകുന്ന ചിത്രം ബംഗാളിൽ നിന്ന് ലഭിക്കുന്നു.

ＭＹ ＲＡＴＩＮＧ:: ★★★½