Abeed Azad

🔻പത്താം ക്ലാസ് വരെ പഠിച്ചിരുന്നത് മിക്സഡ് സ്‌കൂളിലായിരുന്നു. എന്നാൽ +1ന് അഡ്മിഷൻ കിട്ടിയതാകട്ടെ ഒരു ബോയ്സ് സ്‌കൂളിലും. വാർത്ത അറിഞ്ഞപ്പോൾ നല്ല വിഷമം ആയിരുന്നു. പക്ഷെ അത് മറക്കാൻ സ്‌കൂളിലെ ആദ്യ ദിവസം തന്നെ ധാരാളമായിരുന്നു. പിന്നീട് പിന്നിട്ട രണ്ട് വർഷങ്ങൾ.. ഒരിക്കലും മറക്കാനാവാത്ത, വീണ്ടും തിരിച്ചുകിട്ടിയെങ്കിയിൽ എന്നാഗ്രഹിച്ച ഒരു കാലഘട്ടമായിരുന്നു അത്. ജൂൺ സിനിമ കണ്ടപ്പോൾ പലപ്പോഴും ആ ഓർമ്മകളിലേക്ക് തിരികെ നടക്കുകയായിരുന്നു.

🔻ജൂൺ എന്ന പെൺകുട്ടിയുടെ ജീവിതമാണ് സിനിമ കൈകാര്യം ചെയ്യുന്നത്. അവളുടെ ഹയർ സെക്കണ്ടറി ജീവിതം മുതൽ പല ഘട്ടങ്ങളിലൂടെ കഥ പറഞ്ഞ് പോവുന്നു സംവിധായകൻ. തന്റെ കഴിവുകളെ കുറിച്ചും ഭംഗിയെ കുറിച്ചും ഇപ്പോഴും അപകർഷത പേറി നടക്കുന്ന ജൂണിന്റെ ജീവിതത്തിലെ രസകരമായ ചില ഏടുകൾ ഭംഗിയായി അവതരിപ്പിച്ചിരിക്കുകയാണ് നവാഗതനായ അഹമ്മദ് കബീർ.

🔻ഞാനെന്ന കാണിക്ക് ഒരുപാട് നൊസ്റ്റാൾജിയ സമ്മാനിച്ച ആദ്യപകുതിയായിരുന്നു ചിത്രത്തിന്റേത്. സ്‌കൂളിൽ നടന്ന ഫെസ്റ്റുകളും കൂട്ടുകൂടിയുള്ള തമാശകളും അടുത്തുള്ള ഗേൾസ് സ്‌കൂളിലുള്ള വായീനോട്ടവുമൊക്കെ ഒരു പുഞ്ചിരിയോടെ ഓർക്കാൻ സാധിച്ചിടത്ത് നല്ല രീതിയിൽ ആസ്വദിച്ച ആദ്യപകുതിക്ക് വിരാമമാവുന്നു. കഥയിൽ കാര്യമായ പുതുമയൊന്നും ഇല്ലെങ്കിലും അത് നമ്മെ അലട്ടാത്ത വിധം തന്മയത്വത്തോടെ കൈകാര്യം ചെയ്തിട്ടുണ്ട്.അത് തന്നെയാണ് ജൂണിന്റെ ഏറ്റവും മികച്ച കാര്യവും.

🔻എന്നാൽ രണ്ടാം പകുതി ആദ്യ പകുതിയോളം ഒഴുക്കുള്ളതായിരുന്നില്ല. ഇടക്ക് അൽപ്പം തട്ടിയും തടഞ്ഞും മുന്നോട്ട് പോയ കഥ തെല്ല് വിരസത നൽകി. ചില കാര്യങ്ങൾ ക്ലൈമാക്സിലടക്കം മനഃപൂർവ്വം സൃഷ്ടിച്ചത് പോലെ തോന്നി. കുറച്ചുകൂടി ഭംഗിയാക്കാമായിരുന്നു ആ ഭാഗങ്ങൾ. എങ്കിലും സ്ത്രീകേന്ദ്രീകൃതമായി കഥ പറയുന്ന ചിത്രങ്ങൾ വിരളമായത് കൊണ്ട് തന്നെ മൊത്തത്തിൽ നോക്കുമ്പോൾ തൃപ്തി തന്നെയാണ് ഫലം. പ്രണയം, സൗഹൃദം, വൈകാരിക ബന്ധങ്ങൾ തുടങ്ങിയവയെല്ലാം കൈകാര്യം ചെയ്ത വിധം ലളിതവും എന്നാൽ മനോഹരവുമാണ്. ഒടുവിൽ മോശമല്ലാത്ത ഒരു ക്ലൈമാക്സ് കൂടിയാവുമ്പോൾ പുഞ്ചിരിയോടെ കണ്ടിറങ്ങാം ജൂണും.

🔻രജിഷയുടെ പ്രകടനം തന്നെ ചിത്രത്തിന്റെ നട്ടെല്ല്. പല കാലഘട്ടങ്ങളിലൂടെ സഞ്ചരിക്കുമ്പോഴുള്ള പക്വതയും പക്വതയില്ലായ്മയും  തന്റെ ബോഡി ലാംഗ്വേജിൽ ഭംഗിയായി പ്രകടമാക്കി രജിഷ. അതിനൊപ്പം ജോജുവും തന്റെ വേഷം മികച്ചതാക്കി. രജിഷയോടൊപ്പം രണ്ട് കാലഘട്ടങ്ങളിൽ പ്രത്യക്ഷപ്പെട്ടവരുടെ മാറ്റങ്ങൾ അത്ഭുതപ്പെടുത്തും വിധം വിശ്വസനീയമായിരുന്നു. ഭൂരിഭാഗവും പുതുമുഖങ്ങളാണെങ്കിൽ കൂടി ഏവരും തങ്ങളുടെ വേഷങ്ങൾ വൃത്തിയായി കൈകാര്യം ചെയ്തു. Special Mention For Arjun Ashokan.

🔻പലപ്പോഴും സന്ദർഭങ്ങളുടെ ശ്വാസമാവുന്ന പശ്ചാത്തലസംഗീതവും പാട്ടുകളും സിറ്റുവേഷനോട് യോജിച്ച് നിന്നു. കൂടെ മനോഹരമായി ഒപ്പിയെടുത്ത ഫ്രയിമുകളും. ഇവയും സിനിമയുടെ ഭാഗമായി തന്നെ നിലകൊണ്ടു.

🔻ＦＩＮＡＬ ＶＥＲＤＩＣＴ🔻

ഫീൽ ഗുഡ് സിനിമകൾ ഇഷ്ടപ്പെടുന്നവർക്ക് നല്ലൊരു അനുഭവം തന്നെയായിരിക്കും ജൂൺ സമ്മാനിക്കുക. ചൂടുകാലത്ത് ഒരു മഴ നനഞ്ഞ് കയറിവന്ന സുഖം. മനസ്സിനെ സ്വസ്ഥമാക്കാൻ, ഫ്രീ മൈന്റോടെ എഞ്ചോയ് ചെയ്യാൻ നല്ലൊരു ചോയ്‌സ്. ചിലപ്പോ നൊസ്റ്റാൾജിയയും സമ്മാനിച്ചേക്കും ജൂണിന്റെ ജീവിതം. ജീവിതത്തിൽ നമ്മളറിയാത്ത ഒരുപാട് സർപ്രൈസുകൾ കാത്തിരിപ്പുണ്ട് എന്ന ബോധ്യപ്പെടുത്താൻ കൂടിയാണ് ഈ ചിത്രം.

ＡＢ ＲＡＴＥＳ ★★★☆☆

🔻കാൾ-ആസാദ് കൂട്ടുകെട്ടിനെ ഡാനിഷ് സിനിമയിലെ ഹോംസ്-വാട്സൺ ജോഡി എന്ന് വിളിക്കാനാണ് എനിക്കിഷ്ടം. ഇരുവരും തമ്മിൽ വലിയ അന്തരമുണ്ടെങ്കിലും ര കൂട്ടുകെട്ടുകൾ എന്നും പ്രിയങ്കരമാണ്. ആദ്യ മൂന്ന് ഭാഗങ്ങളും വളരേയേറെ ആസ്വദിച്ച് കണ്ടതാണ്. അതിൽ ഏറ്റവും പ്രിയപ്പെട്ടത് മൂന്നാം ഭാഗവും. അതുകൊണ്ട് തന്നെ ഈ ഭാഗവും വളരെ ആകാംഷയോടെയാണ് സമീപിച്ചത്.

Year : 2018
Run Time : 1h 59min

🔻കാളും ആസാദും തങ്ങളുടെ ഡിപ്പാർട്ട്മെന്റിൽ നിന്ന് പിരിയാൻ ഇനി അവശേഷിക്കുന്നത് അഞ്ച് ദിവസം മാത്രമാണ്. ആസാദിന് നല്ലൊരു ഭാവി ആഗ്രഹിച്ചാണ് കാൾ ആ റിക്വസ്റ്റ് കൊടുക്കുന്നത്. ആ സമയത്താണ് ഒരു ഫ്ലാറ്റിൽ ടേബിളിന് ചുറ്റും 3 മൃതദേഹങ്ങൾ കണ്ടെത്തുന്നത്. അതിന്റെ പഴക്കമാവട്ടെ 12 വർഷവും.

🔻സിനിമയിൽ ഏറ്റവും ഇഷ്ടപ്പെട്ട കാര്യം എന്തെന്നാൽ ത്രില്ലർ ഫോർമാറ്റിലേക്ക് കഥയെ മാറ്റാനുള്ള ബോധപൂർവ്വമായ ശ്രമങ്ങൾ ഇല്ലെന്നതാണ്. ഇപ്പോഴും ഒരേ താളത്തിലാണ് കഥയുടെ സഞ്ചാരം. എന്നാൽ കഥ പറയുന്ന രീതിയിൽ നമ്മൾ കണ്ണ് ചിമ്മാതെ കണ്ടിരിക്കും. മുൻ ചിത്രങ്ങളേക്കാൾ ആകാംഷയും ആവേശവും പകരുന്നിടത്ത് സീരീസിലെ ഏറ്റവും ഇഷ്ടപ്പെട്ട ചിത്രമായി മാറുന്നുണ്ട് Journal 64. ഒപ്പം ഗൗരവകരമായ പ്രമേയം കൂടി കൈകാര്യം ചെയ്യുന്നു എന്ന കാര്യം കൂടിയാവുമ്പോൾ. അതിലേക്ക് കൂടുതൽ കടക്കുന്നില്ല. കഥയുടെ ഒഴുക്കിനും ആസ്വാദനത്തിനും അത് തടസ്സമായേക്കും.

🔻വലിയ സസ്പെൻസ് നിലനിർത്തിക്കൊണ്ട് സീരീസിലെ ഒരു സിനിമയും ഒരുക്കിയിട്ടില്ല. ഇവിടെയും അത് തന്നെ കഥ. പക്ഷെ കാണുന്നവരിൽ ക്രിയേറ്റ് ചെയ്യുന്ന ഡാർക്ക് മൂഡ് ഇവിടെ താരതമ്യേന കുറവാണ്. മഞ്ഞ് വീണുകിടക്കുന്ന പ്രദേശത്ത് ഡാർക്ക് അറ്റ്മോസ്ഫിയർ ക്രിയേറ്റ് ചെയ്യാതിരുന്നത് നന്നായി എന്നാണ് അഭിപ്രായം. പകരം അന്യായ വിഷ്വൽ ബ്യൂട്ടി കാത്തിരിപ്പുണ്ട്. മഞ്ഞിൽ പൊതിഞ്ഞ് കിടക്കുന്ന ചില ഷോട്ടുകൾ അപാരമായിരുന്നു. ഒടുവിലേക്ക് വരുമ്പോൾ ടൈറ്റായി വരുന്ന പ്ലോട്ട് നല്ലൊരു ത്രില്ലർ തന്നെ ഒരുക്കുന്നുണ്ട്.

🔻ＦＩＮＡＬ ＶＥＲＤＩＣＴ🔻

Department Q സീരീസിന്റെ ആരാധകർക്ക് തൃപ്തി നൽകുന്ന കിടിലൻ സിനിമ തന്നെയാണ് Journal 64. കാളിനെയും ആസാദിനെയും ഇനിയും ഒരുമിച്ച് സ്‌ക്രീനിൽ കാണുമോ എന്നറിയില്ല. പക്ഷെ ഇനിയും അവർ വരണമെന്ന ആഗ്രഹം അവശേഷിപ്പിക്കും ചിത്രം എന്നുറപ്പ്.

ＡＢ ＲＡＴＥＳ ★★★★☆

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻ഒരു പണിഷ്മെന്റായിരുന്നു അസ്ഗറിന് എമർജൻസി സർവ്വീസസിലെ ആ പോസ്റ്റിങ്ങ്‌. പലരും സഹായം ചോദിക്കാനും അതിലേറെ കളിയാക്കാനുമായി വിളിക്കുന്ന ആ ഫോൺ കോൾ അറ്റന്റ് ചെയ്യൽ മനസ്സില്ലാമനസ്സോടെ അദ്ദേഹം നിർവ്വഹിക്കുകയായിരുന്നു. എന്നെങ്കിലും അവിടുന്ന് ഒരു മോചനം അയാൾ ആഗ്രഹിച്ചിരുന്നു. എന്നാൽ ആ ഫോൺ കൊളോട് കൂടി അസ്ഗറിന്റെ ജീവിതം തന്നെ മാറിമറിയുന്നു.

Year : 2018
Run Time : 1h 25min

🔻ഒരേയൊരു മുറി. അത് മാത്രമാണ് നമുക്ക് സിനിമയിലുടനീളം കാണാനാവുക.ആ എമർജൻസി റൂമിൽ പലരായി കടന്നുപോവുമ്പോഴും അസ്ഗറിനെ മാത്രം ഫോക്കസ് ചെയ്ത് കഥ പറയുകയാണ്. തന്റെ ഡ്യൂട്ടി അവസാനിക്കാറായപ്പോഴേക്കും അസ്ഗറിന് വന്ന ആ ഫോൺ കോളിലായി അദ്ദേഹത്തിന്റെ മനസ്സ് മുഴുവൻ. ഓരോ സംഭാഷണങ്ങളിലും ടെൻഷൻ ക്രിയേറ്റ് ചെയ്യുന്ന ഓരോ ഗംഭീര ത്രില്ലറായിരുന്നു പിന്നെ അവിടെ അരങ്ങേറിയത്.

🔻സിംഗിൾ റൂം ഡ്രാമകളും ത്രില്ലറുകളും ഒരുപാട് നാം കണ്ടിട്ടുള്ളതാണ്. അവയോടൊപ്പം അല്ലെങ്കിൽ അവയേക്കാൾ നമ്മെ വരിഞ്ഞുമുറുക്കുന്ന, നായകന്റെ മനസ്സ് മുറുകുന്നത് പോലെ കാണികളുടെയും ശ്രദ്ധകേന്ദ്രം അതിലേക്ക് ആകർഷിക്കുക എന്ന ശ്രമകരമായ ദൗത്യത്തിൽ 101 ശതമാനം വിജയിച്ചത് കാഴ്ചയിൽ നമുക്കറിയാൻ സാധിക്കും. അത്ര ഗംഭീരമായി ഫോൺ വിളികളിലൂടെ ഭീകരത സൃഷ്ടിക്കാൻ അദ്ദേഹത്തിന് സാധിച്ചിട്ടുണ്ട്.

🔻ക്ലൈമാക്സ് നൽകിയ നടുക്കം ചില്ലറയല്ല. അതിൽ നിന്ന് വേഗം മുക്തമാവാനും സാധിച്ചില്ല. ഈയടുത്ത് ഏറ്റവും ഞെട്ടിച്ച ഒരു ക്ലൈമാക്സ് ആയി മാറി ഈ ചിത്രത്തിലേത്. മനസ്സിനെ ഡിസ്റ്റർബ് ചെയ്യാൻ സാധിക്കും വിധം ആ ഫോൺ കോളിലെ നരേട്ടീവിന് സാധിക്കുന്നുണ്ട്. കൊച്ചുകുട്ടി പോലും അവരുടെ സംഭാഷണശൈലി ക്രമപ്പെടുത്തിയ രീതി അപാരം തന്നെ. നായകനെ ഫോക്കസ് ചെയ്ത 2-3 ഷോട്ടുകൾ ഉണ്ട്. ഇപ്പൊ എന്തും സംഭവിക്കാം എന്ന തോന്നൽ വലിയ അളവിൽ തന്നെ സൃഷ്ടിക്കുന്നുണ്ട് അവ. BGM എവിടെയും ഉപയോഗിച്ചിട്ടില്ല. മുഴുവൻ റിയലിസ്റ്റിക്ക് അന്തരീക്ഷത്തിൽ അവതരിപ്പിക്കാനാണ് സംവിധായകൻ ശ്രമിച്ചിട്ടുള്ളത്.

🔻ＦＩＮＡＬ ＶＥＲＤＩＣＴ🔻

ഡെന്മാർക്കിന്റെ ഒഫിഷ്യൽ ഓസ്കാർ എൻട്രിയായ The Guilty ഒരിക്കലും മറക്കാനാവാത്ത ഒരനുഭവമായി എന്നും നിലനിൽക്കും. വിരളമായി മാത്രം ലഭിക്കുന്ന, വ്യത്യസ്തതകൾ നിറഞ്ഞ ഒന്ന്. ചുരുങ്ങിയ സമയം കൊണ്ട് മനസ്സിനെ ടെൻഷനിലാഴ്ത്തുന്ന ചിത്രം തീർച്ചയായും കണ്ടിരിക്കേണ്ട ഒന്ന് തന്നെ.

ＡＢ ＲＡＴＥＳ ★★★★☆

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

"This is my company, it's my ship, these are my men,and I will negotiate"

താൻ നേതൃത്വം കൊടുത്ത മിഷനിലെ പാളിച്ച മൂലം തന്റെ സുഹൃത്തുക്കളുടെ ജീവനും ആരോഗ്യവും തന്റെ കരിയറും വില നൽകേണ്ടി വന്ന ആളാണ് Carl Mørck..വലിയ കാളയളവിലെ വിശ്രമ ജീവിതത്തിന് ശേഷം തന്റെ അതേ ഡിപാർട്ട്മെന്റിൽ ജോലിക്ക് കയറാൻ ശ്രമിച്ച അദ്ധേഹത്തിനെ ഡിമോട്ട് ചെയ്യുകയാണ് ഉണ്ടായത്..അതും 'Department Q'ലേക്ക്..കഴിഞ്ഞ 20 വർഷത്തിലുള്ള കേസുകൾക്ക് എന്തെങ്കിലും റിപ്പോർട്ട് എഴുതി കേസ് ഫയൽ മടക്കുക..അത്രമാത്രമാണ് അദ്ധേഹത്തിന്റെ ജോലി..
തീരേ താൽപര്യം ഇല്ലാഞ്ഞിട്ടും നിവൃത്തികേട് കൊണ്ട് ഏറ്റെടുക്കേണ്ടി വന്ന സെക്ഷനിൽ അദ്ധേഹത്തിന് ഒരു കൂട്ടുകാരനെ കിട്ടി..Assad..വളരെ സരസനും സൗമ്യനുമായ യുവാവ്..അങ്ങനെയിരിക്കെയാണ് ഒരു കേസ് അദ്ധേഹത്തിന്റെ ശ്രദ്ധയിൽ പെട്ടത്..താൻ ഏറെ അഗ്രഹിച്ചതും എന്നാൽ അന്വേഷിക്കാൻ സാധിക്കാതിരുന്നതുമായ ഒരു മിസ്സിംഗ് കേസ്..കിട്ടിയ സാഹചര്യം മുതലാക്കി അദ്ധേഹം അത് അന്വേഷിക്കാൾ ഇറങ്ങുകയാണ്..തന്റെ ഒരു തിരിച്ചുവരവ് രേഖപ്പെടുത്തുവാൻ കൂടി..
Jussi Adler-Olsenന്റെ നോവലിനെ അടിസ്ഥാനമാക്കി Mikkel Norgaard ഒരുക്കിയ 'Department Q' സീരീസിലെ ആദ്യ ചിത്രമാണ് 'The keeper of lost causes'.. ഇതുവരെ മൂന്ന് ചിത്രങ്ങൾ റിലീസ് ആയിട്ടുള്ള സീരീസ് മികച്ച പ്രേക്ഷക പിന്തുണ നേടിയിട്ടുള്ള ഒന്നാണ്..ചിത്രത്തിന്റെ തിരക്കഥ ഒരുക്കിയിട്ടുള്ളത് Nikolaj Arcel ആണ്.. വേഗതയിൽ മിതത്വം പാലിച്ചുകൊണ്ട്, എന്നാൽ ബോറടിപ്പിക്കാതെ മുന്നോട്ടു പോവുന്ന ഒരു ത്രില്ലറാണ് ചിത്രം..വേഗത ആവശ്യപ്പെടുന്ന സ്ഥലങ്ങളിലൊക്കെ ചിത്രം വേഗത കൈവരിക്കുന്നുമുണ്ട്..തിരക്കഥയും സംവിധാനമികവും തന്നെയാണ് ചിത്രത്തിന്റെ നട്ടെല്ല്..മികച്ച തിരക്കഥയാണ് ചിത്രത്തിന് വേണ്ടി ഒരുക്കിയിരിക്കുന്നത്..സംവിധായകന്റെ സംഭാവന കൂടി ആയപ്പോൾ ചിത്രം കാണികളിൽ ത്രിൽ നിറക്കുന്ന ഒന്നായി.
കഥാപാത്രങ്ങളും അവരുടെ കാസ്റ്റിംഗും മികച്ചതായിരുന്നു.. കേന്ദ്ര കഥാപാത്രമായ Carl Mørckനെ ഗംഭീരമാക്കിയത് Nikolaj Lie Kaas ആണ്.. ഗൗരവക്കാരനും ദേഷ്യക്കാരനുമായ Carlന്റെ വേഷം അദ്ധേഹം മികച്ചതാക്കി.. സഹപ്രവർത്തകനായ Aടsadന്റെ വേഷം Fares Fares മനോഹരമാക്കി..Sonja Richter,Søren Pilmark,Troels Lyby തുടങ്ങിയവർ മറ്റു പ്രമുഖ വേഷങ്ങൾ കൈകാര്യം ചെയ്തു..
ചിത്രത്തിനോട് ചേർന്നു നിൽക്കുന്ന ഛായാഗ്രഹണവും പശ്ചാത്തലസംഗീതവുമാണ് അണിയറ പ്രവർത്തകർ ഒരുക്കിയത്..അതിനാൽ തന്നെ അത്യാവശ്യം വേഗത കൈവരിക്കുവാൻ ചിത്രത്തിന് ഇവ സഹായകമായി..എഡിറ്റിംഗും വേഗത നൽകുന്നതിൽ പങ്കാളിയായി..
വളരെ വേഗത്തിൽ സഞ്ചരിക്കുന്ന ഒരു ത്രില്ലറല്ല സംവിധായകൻ ഒരുക്കിയിരിക്കുന്നത്..മറിച്ച് ശരാശരി വേഗതയിൽൽ സഞ്ചരിച്ച് ചോദ്യങ്ങളൊന്നും തന്നെ ബാക്കി വെക്കാതെ അവസാനിക്കുന്ന ഒരു സ്ലോ പോയിസൺ എന്ന് തന്നെ വിശേഷിപ്പിക്കാം..ത്രില്ലർ പ്രേമികൾക്ക് തീർച്ചയായും തല വെക്കാവുന്ന ഒരു ത്രില്ലറാണ് ഇതെന്ന് നിസ്സംശയം പറയാം..
My Rating:: ★★★½

ഒരു നുണ നമ്മുടെ ജീവിതത്തെ എങ്ങനെയൊക്കെ ബാധിക്കാം..?..അല്ലെങ്കിൽ അത് നമ്മുടെ ജീവിതത്തിൽ എന്തൊക്കെ മാറ്റങ്ങൾക്ക് വഴി പാകാം..?..ഒരു നുണയല്ലേ, കൂടി വന്നാൽ എന്താവാൻ..അതും ഒരു കുട്ടി പറയുന്നതാണെങ്കിൽ ആരും മുഖവിലക്കെടുക്കാറേ ഇല്ല..അല്ലെങ്കിൽ അതിന്റെ ഫലം കൂടിവന്നാൽ എത്ര നാളത്തേക്ക് നീണ്ടുപോവാൻ.. എല്ലാം പഴയത് പോലെ ആവാൻ അധികം സമയത്തിന്റെ ആവശ്യമൊന്നുമില്ല..എന്നാൽ Lucasന്റെ ജീവിതത്തിൽ സംഭവിച്ചത് ഇവയൊന്നും ആയിരുന്നില്ല..
ഡെൻമാർക്കിലെ ഒരു ചെറിയ പട്ടണത്തിൽ കിന്റർ ഗാർഡൻ അധ്യാപകനായി ജോലി നോക്കുകയാണ് ലൂക്കാസ്..വിവാഹബന്ധം വേർപ്പെടുത്തി ഒറ്റക്ക് താമസിക്കുന്ന ലൂക്കാസിന് ആശ്വാസമായുള്ളത് അടുത്ത സുഹൃത്തുക്കളും ഇടക്കിടെ വരുന്ന മകന്റെ ഫോൺകാളുകളുമാണ്..സൗമ്യതയും സ്നേഹവും നിറഞ്ഞ പെരുമാറ്റം കൊണ്ട് ഏവരുടെയും മനസ്സ് കീഴടക്കിയ വ്യക്തി എന്ന നിലയിൽ ഏവർക്കിടയിലും സ്വീകാര്യനുമാണ് അദ്ധേഹം..അങ്ങനെ സന്തോഷകരമായ ജീവിതം നയിച്ചുകൊണ്ടിരിക്കുമ്പോഴാണ് അത് സംഭവിക്കുന്നത്..
തന്റെ ആത്മാർഥ സുഹൃത്ത് Theoയുടെ മകളും കിന്റർ ഗാർഡനിൽ തന്റെ വിദ്യാർഥിനിയുമായ Clara lucasനെ പറ്റി ഗൗരവകരമായ ഒരു 'ചെറിയ' നുണ പറയുന്നത്..തുടർന്ന് Lucasന്റെ ജീവിതത്തിലുണ്ടാവുന്ന സങ്കീർണ്ണമായ മാറ്റങ്ങളാണ് The Hunt എന്ന ചിത്രത്തിൽ പറയുന്നത്..
Thomas Vinterberg സംവിധാനം ചെയ്ത ചിത്രത്തിന്റെ തിരക്കഥ ഒരുക്കിയിരിക്കുന്നത് Tobias Lindholm,Thomas Vinterberg എന്നിവർ ചേർന്നാണ്..മികച്ചത് എന്ന് നിസ്സംശയം പറയാവുന്ന ഒന്ന്..ഒരു ചെറിയ ആശയത്തെ ഇത്ര വിപുലമായ രീതിയിൽ പറഞ്ഞ് ഫലിപ്പിച്ച ചിത്രം സംവിധായകന്റെ മികച്ച സൃഷ്ടികളിൽ ഒന്ന് തന്നെ..കഥാപാത്രത്തിന്റെ പല അവസ്ഥകളിലൂടെയാണ് ചിത്രം സഞ്ചരിക്കുന്നത്..മികച്ച തിരക്കഥയിൽ പണിതുയർത്തിയ ഒരു ചിത്രം എന്ന നിലയിൽ പ്രശംസ അർഹിക്കുന്നു ചിത്രം..
കേന്ദ്രകഥാപാത്രമായ Lucasനെ സ്ക്രീനിൽ ഗംഭീരമാക്കിയത് Mads Mikkelsen ആണ്..അതിഗംഭീര പ്രകടനമാണ് അദ്ധേഹം കാഴ്ച്ചവെച്ചത്..കഥാപാത്രം ആവശ്യപ്പെടുന്ന എല്ലാ ഘടകങ്ങളും വളരെ പക്വതയോടെ മികച്ച രീതിയിൽ അദ്ധേഹം അവതരിപ്പിച്ചു.. കാണികളിൽ തങ്ങിനിൽക്കുന്ന ഒരു കഥാപാത്രമായി Lucas..Clara ആയി വേഷമിട്ടത് Annika Wedderkopp  ആണ്.. നിഷ്കളങ്കത തുളുമ്പുന്ന ഒരു കുട്ടിയുടെ ഭാവങ്ങൾ മനോഹരമാക്കി Annika..Lucasനോടൊപ്പം തന്നെ Claraയും മികച്ച് നിന്നു ചിത്രത്തിൽ..Lasse Fogelstrøm,Alexandra Rapaport,Thomas Bo Larsen എന്നിവർ ചിത്രത്തിലെ മറ്റ് പ്രമുഖ കഥാപാത്രങ്ങളെ അവതരിപ്പിച്ചു..
Nikolaj Egelund ഒരുക്കിയ പശ്ചാത്തല സംഗീതം ചിത്രത്തിന്റെ മൂഡിനെ പ്രേക്ഷകനോട് അടുപ്പിക്കുന്നതിൽ വളരെ സഹായകമായി..Charlotte Bruus Christensenനിർവ്വഹിച്ച ഛായാഗ്രഹണവും മനോഹരമായ ഫ്രെയിമുകളാൽ സമ്പുഷ്ടമായിരുന്നു..
വളരെ പതിഞ്ഞ വേഗത്തിൽ മുന്നോട്ട് പോവുന്ന ചിത്രമാണ് The Hunt.. അതുകൊണ്ട് തന്നെ ചിലയിടങ്ങളിൽ ഇഴച്ചിൽ തോന്നിയേക്കാം.. എന്നാലും ക്ഷമയോടെ കണ്ടിരിക്കുന്നവർക്ക് മികച്ച ഒരു അനുഭവമാണ് ചിത്രം സമ്മാനിക്കുക.. ആയതിനാൽ തന്നെ ചിത്രം കാണാൻ ശ്രമിക്കുക..
My Rating:: ★★★★☆

രണ്ടാം ലോക മഹായുദ്ധത്തിന് ശേഷം ഡാനിഷ് സേനക്ക് മുന്നിൽ കീഴടങ്ങുന്ന ഒരുപറ്റം ജർമൻ യുവാക്കൾ.. യുദ്ധത്തിനിടയിൽ ജർമൻ സൈനികർ ഡൻമാർക്ക് കടൽ തീരത്ത് കുഴിച്ചിട്ട 2 മില്ല്യൺ മൈനുകൾ നീക്കം ചെയ്യാനായി ഡാനിഷ് സേന ഇവരെ ഉപയോഗിക്കുന്നു..സുരക്ഷാക്രമീകരണങ്ങൾ ഒന്നും തന്നെ ഇല്ലാതെ വെറും കൈകൊണ്ട് മൈനുകൾ നീക്കം ചെയ്യുക എന്ന ശ്രമകരമായ ദൗത്യത്തിന് ഇറങ്ങേണ്ടിവരുന്ന ജർമൻ യുവാക്കളുടെ ജീവിതത്തിന്റെ ദൃശ്യാവിഷ്കാരമാണ് Martin Zandvliet സംവിധാനം ചെയ്ത 'Land of Mine' എന്ന ചിത്രം.. യഥാർഥ സംഭവങ്ങളെ അടിസ്ഥാനമാക്കിയാണ് ചിത്രം ഒരുക്കിയിരിക്കുന്നത്..
ദൗത്യത്തിന് നേതൃത്വം കൊടുക്കുന്ന ഡാനിഷ് സെർജിയന്റ് Carl Rasmussenന് നാസികളോടുള്ള അമർഷവും ദേഷ്യവും പ്രകടമാക്കുന്നതാണ് ചിത്രത്തിലെ ആദ്യ സീൻ.. തുടർന്നുള്ള സീനുകളിൽ ജർമൻ യുവാക്കൾ ഡാനിഷ് മേധാവികളുടെ ക്രൂര പീഡനത്തിന് ഇരയാവാന്നതും ഭക്ഷണം പോലും ലഭിക്കാതെ കഷ്ടതകൾ സഹിച്ച് ദിവസങ്ങൾ തള്ളിനീക്കേണ്ടി വരുന്ന യുവാക്കളുടെ അവസ്ഥയും വേദനാജനകമായ രീതിയിൽ സംവിധായകൻ സക്രീനിൽ എത്തിച്ചു.. ഏതാണ്ട് 2000 ബന്ധികൾ ഉണ്ടായിരുന്ന ജർമൻ സേനയിലെ 14 യുവാക്കളുടെ കഥയാണ് ചിത്രത്തിലൂടെ പറഞ്ഞ് പോവുന്നത്..
ചിത്രത്തിൽ യുവാക്കളായി അഭിനയിച്ചതിൽ സെബാസ്റ്റ്യനായി അഭിനയിച്ച Louis Hofmann മികച്ച പ്രകടനം കാഴ്ച്ചവെച്ചു.. സെർജിയന്റായി അഭിനയിച്ച Roland Moller ഗംഭീര പ്രകടനമാണ് കാഴ്ച്ചവെച്ചത്.. പ്രേക്ഷകനിൽ ആദ്യം മുതൽക്കേ ടെൻഷൻ നിറക്കുവാൻ സംവിധായകനായി.. ഇടക്കിടെ കൊടുത്തിരുന്ന സൗണ്ട് ഇഫക്ട്സ് കാണികളിൽ ആകാംശ കൂട്ടുവാൻ സഹായിച്ചു.. മൊത്തത്തിൽ war genreയിൽ ഉൾപ്പെടുന്ന മികച്ച ചിത്രം ആണ് ' Land of Mine'
Best Foreign Language Filmനുള്ള ഓസ്കാർ അവാർഡ് നോമിനേഷൻ പട്ടികയിൽ ഇടം നേടിയ ചിത്രം സംവിധായകന്റെ മികച്ച ഒരു സൃഷ്ടി തന്നെയാണ്
My Rating :: 4.5/5