Abeed Azad

നാമറിയാതെ തന്നെ നമ്മുടെ മനസ്സിനെ വേട്ടയാടിത്തുടങ്ങുന്ന ചില സിനിമകളുണ്ട്. അതുപോലെ തന്നെ സീരീസുകളും. പ്രത്യക്ഷത്തിൽ അവയിൽ ഒന്നുമില്ലായിരിക്കാം. എന്നാൽ ചില നേരങ്ങളിൽ കഥയും കഥാപാത്രങ്ങളും എത്രത്തോളം നമ്മുടെ മനസ്സിനെ സ്വാധീനിക്കുമെന്ന് പറയാനാവില്ല. അത്തരത്തിൽ ഉദാഹരണങ്ങൾ അനവധിയാണ്.



🔻ＳＴＯＲＹ ＬＩＮＥ🔻

ഒരു 12 വയസ്സുകാരി പ്രെഗ്നന്റ് ആയതിന്റെ പേരിലായിരുന്നു റോബിൻ ഗ്രിഫിനെ പോലീസ് കോട്ടേഴ്സിലേക്ക് വിളിപ്പിച്ചത്. കുട്ടികളുമായി ഇടപഴകുന്നതിൽ പ്രത്യേക പരിശീലനം സിദ്ധിച്ചിട്ടുള്ള ഗ്രിഫിന് ടൂയിയുമായി അത്രവേഗം അടുക്കാൻ സാധിച്ചില്ല. എന്നാൽ പിന്നീട് അറിയുന്ന വാർത്ത ടൂയി മിസ്സിങ്ങ് ആയി എന്നാണ്. അതോടെ ആ കേസന്വേഷണവും ഗ്രിഫിൻ നയിക്കാൻ തുടങ്ങി.

തന്റെ അമ്മയോടൊപ്പം കുറച്ചുനാൾ ചെലവഴിക്കാൻ എത്തിയ ഗ്രിഫിന് ഇതൊരു സാധാരണ കേസായിരുന്നില്ല. അവളുടെ ജീവിതത്തിലെ തന്നെ പല വഴിത്തിരിവുകളും വെളിപ്പെടുത്തലുകലും സാധ്യമാവുകയായിരുന്നു ആ അന്വേഷണങ്ങളിലൂടെ.

🔻ＢＥＨＩＮＤ ＳＣＲＥＥＮ🔻

ഒരു പ്രതീക്ഷയുമില്ലാതെ കണ്ടുതുടങ്ങി, എന്നാൽ പ്രതീക്ഷിക്കാതെ മനസ്സിനെ അലട്ടിയ സീരീസാണ് top of the lake. 55 മിനിറ്റ് നീളുന്ന 6 എപ്പിസോഡുകൾ. പതിഞ്ഞ താളത്തിലാണ് എല്ലാ എപ്പിസോഡുകളും സഞ്ചരിക്കുന്നത്. അതുകൊണ്ട് തന്നെ ഒരു ത്രില്ലർ എന്നതിലുപരി ഇമോഷണൽ ഡ്രാമയായി കൂട്ടാം ഈ സീരീസിനെ. ഏതൊരു ചിത്രവും കാണുന്നത് ലാഘവത്തോടെ തന്നെ കണ്ടുതുടങ്ങി, പതിയെപ്പതിയെ മനസ്സിനെ വേട്ടയാടിത്തുടങ്ങി ഓരോ കഥാപാത്രങ്ങളും. അത്ര ഗംഭീരമായിരുന്നു ആവിഷ്കാരം.

കഥാപാത്രങ്ങളുടെ വിന്യാസമാണ് അതിൽ ഏറ്റവും പ്രധാനം. Laketop എന്ന സ്ഥലത്ത് മാത്രം കേന്ദ്രീകരിച്ച് പറയുന്ന കഥ, അവിടെ ഓരോ കഥാപാത്രങ്ങൾക്കും അവരുടേതായ ഐഡന്റിറ്റി സൃഷ്ടിക്കുന്നുണ്ട്. അവർക്ക് ഓരോരുത്തർക്കും അവരുടേതായ നിലനിൽപ്പുണ്ട്. ഓരോ കഥകളുണ്ട്. സമയം അധികം എടുക്കാതെ തന്നെ പറഞ്ഞിട്ടുമുണ്ട്. അവരെയൊക്കെയും ബന്ധിപ്പിക്കുന്ന സംഭവവികാസങ്ങൾ കാണിക്കുന്നതിൽ സംവിധായകന്റെ മികവ് പ്രകടമാണ്.

ആദ്യ മൂന്ന് എപ്പിസോഡുകൾ കാണുമ്പോൾ മാനസികമായി അധികം അടുപ്പം തോന്നാൻ സാധ്യതയില്ല. എന്നാൽ പിന്നീടുള്ള യാത്ര അങ്ങനെയല്ല. കേന്ദ്രകഥാപാത്രങ്ങളുടെ മനഃസ്ഥിതികൾ പുറത്ത് കാണുക പിന്നീടുള്ളവയിലാണ്. അവിടെ മുതൽ നമ്മുടെ മനസ്സിന്റെ യാത്രയും അവരോടൊപ്പമാണ്. കാണാതായ ടൂയിയെ അന്വേഷിച്ച് തുടങ്ങുന്ന യാത്രയിൽ, നമ്മുടെ മനസ്സിൽ നിലനിൽക്കുന്ന ഒരേയൊരു ചോദ്യം അത് മാത്രമാവും. എന്നാൽ നാലാം എപ്പിസോഡ് മുതൽ ചോദ്യങ്ങളുടെ എണ്ണവും കൂടിക്കൂടി വരും. അവസാനം അവക്കെല്ലാം ഉത്തരം കിട്ടുമ്പോൾ ഒരു ഞെട്ടലാവും ഫലം.

ഏറ്റവും ഒടുവിലത്തെ എപ്പിസോഡ് കരുതിവെച്ചിരിക്കുന്നത് രഹസ്യങ്ങളുടെ കൂമ്പാരമാണ്. പലയിടത്തും മനസ്സിൽ ഒരു മുറിവ് കോറിയിട്ടുകൊണ്ട് മുന്നേറുന്ന കഥ അവസാനിക്കുന്നത് മികച്ച ഒരു ട്വിസ്റ്റിലാണ്. ഒരുപക്ഷെ ആരും തീരെ പ്രതീക്ഷിക്കാത്ത ഒന്നാവും അത്. കൂടെ ഒരു ചോദ്യവും മനസ്സിൽ ഉദിക്കുന്നുണ്ട്. വെറുപ്പ് തോന്നിയ പലരോടും ഒരു ഇഷ്ടം ജനിപ്പിക്കുകയും ചെയ്യും അത്.

🔻ＯＮ ＳＣＲＥＥＮ🔻

ഗ്രിഫിന്റെയും ടൂയിയുടെയും പ്രകടനങ്ങൾ വളരെ മികച്ച് നിൽക്കുന്നുണ്ട്.അവരാണ് ഏറ്റവും കൂടുതൽ മനസ്സിൽ ഇടം പിടിക്കുന്നത്. അതോടൊപ്പം മാറ്റ് പരമാവധി വെറുപ്പ് സമ്പാദിക്കാനും പ്രയത്നിച്ചു. മറ്റ് കഥാപാത്രങ്ങളും ആവശ്യപ്പെട്ടുന്ന തരത്തിൽ പ്രകടനങ്ങൾ ഏവരും കാഴ്ച വെച്ചിട്ടുണ്ട്.

🔻ＭＵＳＩＣ & ＴＥＣＨＮＩＣＡＬ ＳＩＤＥＳ🔻

Laketopന്റെ സൗന്ദര്യത്തേക്കാളേറെ അതിന്റെ ദുരൂഹവശങ്ങളാണ് സ്‌ക്രീനിൽ കാണാനാവുക. അത് തന്നെയാണ് കഥ ആവശ്യപ്പെടുന്നതും. പലപ്പോഴും ഇരുണ്ട വെളിച്ചത്തിൽ കഥ പറയുന്നത് സന്ദർഭങ്ങളുടെ ആക്കം കൂട്ടുന്നുണ്ട്. കൂടെ പശ്ചാത്തലസംഗീതത്തിന്റെ സന്ദർഭോചിതമായ ഉപയോഗവും.

🔻ＦＩＮＡＬ ＶＥＲＤＩＣＴ🔻

ഒരു ബ്രില്ലിയൻറ് സീരീസ് ആയാണ് Top Of The Lake തോന്നിയത്. ഏതൊരു സിനിമയും കാണുന്ന ലാഘവത്തോടെ തുടങ്ങി, പതിയെപ്പതിയെ മനസ്സിനെ വേട്ടയാടാൻ തുടങ്ങിയ ഒന്ന്. സമയവും എപ്പിസോഡും കുറച്ചായതിനാൽ തന്നെ മികച്ച അനുഭവം തന്നെ ഈ സ്ലോ പോയിസൺ സമ്മാനിക്കുമെന്ന കാര്യത്തിൽ സംശയമില്ല.

ＭＹ ＲＡＴＩＮＧ :: ★★★★☆

സൂപ്പർ ഹീറോ കുടുംബത്തിന്റെ കഥ ഇൻക്രെഡിബിൾസിൽ സംവിധായകൻ പറഞ്ഞപ്പോ വളറെയധികം ആസ്വദിച്ചിരുന്നു. പല തവണ റിപ്പീറ്റ് അടിച്ച് ആ സിനിമ കണ്ടിട്ടുമുണ്ട്. രണ്ടാം ഭാഗം അന്നൗൺസ് ചെയ്തപ്പോൾ തീയേറ്ററിൽ തന്നെ കാണുമെന്ന് ഉറപ്പിച്ചതുമാണ്. എന്നാൽ സ്വല്പം വൈകിയെന്ന് മാത്രം.


🔻ＳＴＯＲＹ ＬＩＮＥ🔻

സൂപ്പർ ഹീറോകൾ ഇല്ലീഗലായി തന്നെ ഇപ്പോഴും നിലനിൽക്കുന്നു. പല തവണ രക്ഷിക്കാൻ ശ്രമിക്കുമ്പോഴും പാളിച്ചകൾ മാത്രം കണ്ടെത്താൻ വെമ്പൽ കൊള്ളുകയാണ് ഗവണ്മെന്റ്. അതുകൊണ്ട് തന്നെ മറ്റാർക്കും അധികം പരിചിതമല്ലാത്ത ഒരിടത്തേക്ക് മാറി താമസിക്കേണ്ടി വന്നിരിക്കുകയാണ് ബോബിനും കുടുംബത്തിനും. എന്നാൽ എന്നെങ്കിലും ഇതിനൊരു ശമനം ലഭിക്കുമെന്ന പ്രതീക്ഷയും അവർക്കുണ്ട്.

ആ സമയത്താണ് ബോബിന്റെ മുന്നിലേക്ക് ഫ്രോസോൺ വിൻസ്റ്റണിനെ പരിചയപ്പെടുത്തുന്നത്. ഇല്ലീഗൽ എന്ന നിയമം മാറ്റി ലീഗൽ ആക്കാനുള്ള മാർഗങ്ങളും തന്ത്രങ്ങളും അവരുടെ പക്കലുണ്ട്. അവരുടെ പ്ലാനുകളിൽ ആകൃഷ്ടരായ ബോബും സംഘവും അതിനായി പുറപ്പെടുന്നു.

🔻ＢＥＨＩＮＤ ＳＣＲＥＥＮ🔻

ആദ്യ ഭാഗം സംവിധാനം ചെയ്ത Brad Bird തന്നെയാണ് രണ്ടാം ഭാഗത്തിനും കഥയൊരുക്കിയിരിക്കുന്നത്. സംവിധാനവും അദ്ദേഹം തന്നെ. ഇതിന് മുമ്പുള്ള അദ്ദേഹത്തിന്റെ പല ചിത്രങ്ങളും ഇഷ്ടപ്പെട്ടിരുന്നതിനാൽ പ്രതീക്ഷ ഉണ്ടായിരുന്നു അദ്ദേഹത്തിൽ. അത് തീരെ തെറ്റിയതുമില്ല.

ഇത്തവണ ബോബിനേക്കാൾ കൂടുതൽ സൂപ്പർ ഹീറോ എലമെൻറ്സ് ഹെലനാണ്. അത് കാണാനും നല്ല രസാരുന്നു. ബോബിന്റെ അച്ഛൻ വേഷം കണക്കില്ലാതെ നർമ്മം പകരുന്നുണ്ട്. കൂടെ മക്കളും. പ്രതേകിച്ച് ജാക്ക്-ജാക്ക്. ജാക്കിന്റെ സൂപ്പർ ഹീറോ പവറുകൾ അപാരമായിരുന്നു. അത് ആദ്യമായി കാണിക്കുന്ന സീനൊക്കെ നിർത്താതെ ചിരിയായിരുന്നു. അതോടൊപ്പം ആനിമേഷൻ വർക്കുകൾ കൊണ്ട് അമ്പരപ്പിക്കാനും അവർ മറന്നില്ല.

അധികം പ്രതീക്ഷിക്കാത്ത രീതിയിൽ മുന്നേറുന്ന കഥയും അതോടൊപ്പം ഒരുക്കിവെച്ച ചെറിയൊരു സസ്‌പെൻസും കൂടെ ക്ലൈമാക്സിലെ കിടിലൻ ആക്ഷൻ സീനുകളും കൂടിയാവുമ്പോൾ ആദ്യ ഭാഗത്തേക്കാൾ തൃപ്തി നൽകി രണ്ടാം ഭാഗം. ഒരുപക്ഷെ തീയേറ്ററിൽ കണ്ടതുകൊണ്ടാവാം അത്.

🔻ＦＩＮＡＬ ＶＥＲＤＩＣＴ🔻

വീണ്ടും പ്രേക്ഷകരെ വിസ്മയിപ്പിച്ചുകൊണ്ടുള്ള പിക്‌സാറിന്റെ ട്രീറ്റാണ് ഇൻക്രെഡിബിൾസ് 2. തീയേറ്ററിൽ തന്നെ ആസ്വദിക്കേണ്ട, കിടിലൻ അനുഭവമാകുന്ന മികച്ച ചിത്രം. ഒരുപാട് ചിരിക്കാനും അതോടൊപ്പം ആക്ഷൻ ആസ്വദിക്കാനും 3Dയിൽ തന്നെ കാണാൻ ശ്രമിക്കുക.

ＭＹ ＲＡＴＩＮＧ :: ★★★★☆

സാമൂഹ്യവ്യവസ്ഥിതികളാൽ ചുറ്റപ്പെട്ട, ഇന്ത്യ പോലൊരു രാജ്യത്ത് സ്വന്തം ഇഷ്ടത്തിനനുസരിച്ച് ജീവിക്കുക പ്രയാസകരമാവും. അതും ആ വ്യവസ്ഥിതിക്കുള്ളിൽ നിന്ന് ജീവിച്ച് ശീലിച്ച ഒരു സമൂഹത്തിന്റെ നടുവിൽ. പലർക്കും ആഗ്രഹങ്ങൾ ഒരുപാടുണ്ടെങ്കിലും അവയെല്ലാം മനസ്സിൽ ഒതുക്കി ജീവിക്കേണ്ടി വരുന്നു ഈ സമൂഹത്തിന് മുന്നിൽ.


💢സെറിബ്രൽ പാൾസി ബാധിച്ച ലൈല, ഡൽഹിയിലെ ഒരു കോളേജിൽ പാട്നമ്മ നടത്തുകയാണ്. പഠനത്തോടൊപ്പം എഴുത്തിലും സംഗീതത്തിലും പുള്ളിക്കാരിക്ക് കമ്പമുണ്ട്. രോഗം ഒരു തടസ്സമായി പലപ്പോഴും അവള്ഡ് ജീവിതത്തിൽ വരുന്നുണ്ടെങ്കിലും വ്യക്തമായ കാഴ്ചപ്പാടുകൾ ലൈല വെച്ചുപുലർത്തുന്നുണ്ട്.

വിവാഹജീവിതത്തെ പറ്റിയും ലൈംഗികതയെ പറ്റിയും മനസ്സിൽ പല സ്വപ്നങ്ങളും ഉണ്ടെങ്കിലും താൻ ആരാണെന്ന് അവൾക്ക് കൂടുതൽ എക്‌സ്‌പ്ലോർ ചെയ്യാനായത് ന്യൂയോർക്കിലെ ഒരു കോളേജിൽ അവൾക്ക് അഡ്മിഷൻ കിട്ടിയപ്പോഴാണ്. അവിടെ പലരുടെയും സഹവാസമാണ് അവളുടെ തിരിച്ചറിവുകൾക്ക് പാത്രമായത്.

💢ഒരുപക്ഷെ ഇന്ത്യൻ സമൂഹം സൃഷ്ടിച്ചെടുത്ത വ്യവസ്ഥിതികൾക്ക് നേരെ കൈചൂണ്ടുന്ന ചിത്രമെന്ന് വിശേഷിപ്പിക്കാം കൽക്കി നായികയായ ഈ ചിത്രത്തെ. താൻ ആരാണെന്ന യഥാർത്ഥ ചിത്രം അവളുടെ മനസ്സിൽ ഇന്ത്യയിൽ വസിച്ചപ്പോൾ തെളിഞ്ഞിരുന്നില്ല. എന്നാൽ എല്ലാ സ്വാതന്ത്ര്യവും തന്നിലേക്ക് വന്നുചേർന്നപ്പോൾ അവൾ തിരിച്ചറിഞ്ഞത് അവളെ തന്നെയാണ്. അതിന് കാരണമായവരും സ്വന്തം സത്വത്തെ തേടുകയായിരുന്നു.

💢കുടുംബബന്ധങ്ങൾക്ക് ഒരുപാട് പ്രാധാന്യം കൊടുത്തുകൊണ്ടാണ് കഥ പറഞ്ഞ് പോവുന്നത്. രേവതിയുടെ അമ്മ കഥാപാത്രവും ലൈലയും തമ്മിലുള്ള ബന്ധം തന്നെയാണ് അതിൽ ഏറ്റവും മനോഹരം. ആഴത്തിൽ മനസ്സിനെ സ്പർശിക്കുന്ന മാത്രബന്ധമാണ് അവരുടേത്. അത് പലപ്പോഴും സന്ദർഭങ്ങളുടെ ആക്കം കൂട്ടുന്നത്. കൂടെ കൽക്കിയുടെയും രേവതിയുടെയും മികച്ച പ്രകടനവും മുതൽക്കൂട്ടാണ്. അതോടൊപ്പം സയാനി ഗുപ്തയുടെയും ഹുസ്സൈൻ ദലാലിന്റെയും പ്രകടനങ്ങൾ മികച്ച് നിന്നു.

🔻ＦＩＮＡＬ ＶＥＲＤＩＣＴ🔻

ദൃഢതയുള്ള ബന്ധങ്ങൾ കൊണ്ടും തിരിച്ചറിവുകൾ കൊണ്ടും നമ്മുടെ മനസ്സിനെ സ്പർശിക്കുന്ന ചിത്രം. പുഞ്ചിരി നൽകുന്ന ക്ലൈമാക്സ് ഒരു പോസിറ്റീവ് എനർജി കാണികൾക്ക് പകർന്ന് കൊടുക്കുമ്പോൾ സുന്ദരമായ അനുഭവമാകുന്നു ലൈലയുടെ ജീവിതം.

ＭＹ ＲＡＴＩＮＧ:: ★★★½

പെട്ടെന്നുണ്ടായ അശ്രദ്ധയിൽ നേരിടേണ്ട വന്ന ഒരു ആക്സിഡന്റ്. അവർക്ക് അത്രമാത്രമായിരുന്നു ആ രാത്രിയിലെ ഇൻസിഡന്റ്. എന്നാൽ ദിവസങ്ങൾ കഴിയുന്തോറും മറക്കാൻ ശ്രമിക്കുന്ന ആ ദിവസത്തിന്റെ ഓർമ്മകൾ അവരെ വിടാതെ വേട്ടയാടി.


💢ഫോട്ടോഗ്രാഫറായ നായകനും അദ്ധേഹത്തിന്റെ ഗേൾ ഫ്രണ്ടും ഒരു പാർട്ടി കഴിഞ്ഞ് പോവുന്ന വഴിയിലാണ് അത് സംഭവിച്ചത്. അൽപ്പം മദ്യപിച്ചിരുന്നതിനാൽ കാർ നിർത്തി ആക്സിഡന്റ് പറ്റിയ ആളെ കുറിച്ച് അന്വേഷിക്കാൻ അവർ മുതിർന്നില്ല. അവർ ആ രാത്രി മറക്കാൻ കഴിയുന്നത്ര ശ്രമിച്ചു. എന്നാൽ പിന്നീടുള്ള അവരുടെ ഓരോ ചലനങ്ങളിലും ദുരൂഹതയുടെ നിഴൽപ്പാടുകൾ ഏറ്റുകൊണ്ടേയിരുന്നു.

💢തായ് മൂവികൾ പലതും കണ്ടിട്ടുണെങ്കിലും അവയിൽ തൃപ്തി നൽകിയത് ചുരുക്കം ചിലത് മാത്രമാണ്. അതുകൊണ്ട് തന്നെ തീരെ പ്രതീക്ഷ ഇല്ലാതെയാണ് ഷട്ടറിനെ സമീപിച്ചതും. എന്നാൽ അതിൽ ലഭിച്ച തൃപ്തി പ്രതീക്ഷക്കും അപ്പുറമായിരുന്നു.

💢മിസ്റ്ററി-ഹൊറർ ലേബലിൽ റിലീസ് ആയ സിനിമ അധികം വൈകാതെ തന്നെ കഥയിലേക്ക് തെന്നിവീഴുന്ന ഒന്നാണ്. തുടക്കത്തിലൊക്കെ വെറും ഹൊറർ മാത്രമാണോ എന്ന് മനസ്സ് ചോദിച്ചെങ്കിലും പിന്നീടുള്ള ഓരോ പോയിന്റുകളും ദുരൂഹത നിറക്കുന്നതായിരുന്നു. എന്താണ് സംഭവിക്കുന്നതെന്ന് യാതൊരു പിടിയും തരാതെ മുന്നോട്ട് പോവുന്ന മികച്ച കഥയും അതിനെ വളരെ ഭംഗിയായി സ്‌ക്രീനിലെത്തിച്ച ആവിഷ്കാരമികവും തായ് സിനിമകളിലെ ഏറ്റവും മികച്ച അനുഭവമാണ് നൽകിയത്.

💢ഊഹിക്കാൻ കഴിയാതെ നീങ്ങുന്ന കഥയാണ് ചിത്രത്തിന്റെ നട്ടെല്ല്. അതോടൊപ്പം വളരെ ഭംഗിയായി, ആവശ്യത്തിന് മാത്രം ഉപയോഗിച്ചിരിക്കുന്ന ഹൊറർ എലമെന്റുകളും ചിത്രത്തെ പ്രേക്ഷകനിലേക്ക് കൂടുതൽ അടുപ്പിക്കുന്നു. ഓരോ ചുരുളുകൾ അഴിയുമ്പോഴും ഒരു ഞെട്ടൽ ഉണ്ടാക്കാൻ ചിത്രത്തിന് സാധിച്ചിട്ടുണ്ട്. ഏറ്റവും ഒടുവിലെ ക്ലൈമാക്സ് ട്വിസ്റ്റ് അതിഗംഭീരമായിരുന്നു. തീരെ പ്രതീക്ഷിക്കാതിരുന്ന ഒന്ന്.

🔻ＦＩＮＡＬ ＶＥＲＤＩＣＴ🔻

ഹൊറർ-മിസ്റ്ററി എന്ന ലേബലിനോട് പൂർണ്ണമായും നീതിപുലർത്തുന്ന, എല്ലാ അർത്ഥത്തിലും തൃപ്തി നൽകിയ ഗംഭീര ചിത്രം.കിടിലൻ ട്വിസ്റ്റുകളും ഏറ്റവും ഒടുവിൽ തകർപ്പൻ സസ്പെൻസുമൊക്കെയായി ത്രില്ലർ പ്രേമികൾക്ക് വിരുന്നൊരുക്കുന്നു ഷട്ടർ.

ＭＹ ＲＡＴＩＮＧ :: ★★★★☆

💢ഒരു കുറ്റകൃത്യവും പെർഫെക്റ്റ് എന്ന് വിളിക്കാനാവില്ല. ആരാലും ശ്രദ്ധിക്കപ്പെടാത്ത ചില തെളിവുകൾ അവശേഷിക്കപ്പെടും. അത് കണ്ടെത്തുമ്പോൾ പല കുരുക്കുകൾ കുറ്റവാളികൾക്ക് മേൽ മുറുകുകയും ചെയ്യും. പിന്നീടുള്ള അവരുടെ ചെയ്തികൾ പലപ്പോഴും മനസ്സിന്റെ നിയന്ത്രണത്തിനതീതമായിരിക്കും.

💢ഇൻഷുറൻസ് ഏജന്റായി ജോലി ചെയ്യുന്ന നെഫ് അതീവ ബുദ്ധിശാലിയും വാക്ചാതുര്യം കാത്തുസൂക്ഷിക്കുകയും ചെയ്യുന്ന ഒരുവനാണ്. ഈ ഗുണങ്ങൾ തന്നെയാണ് ഇൻഷുറൻസ് കമ്പനിയിലെ ഉയർന്ന ഏജന്റായി അദ്ദേഹത്തിന് ഉയരുവാൻ സാധിച്ചതും. തന്റെ കരിയറിന്റെ ഉയർച്ചക്ക് വേണ്ടി തന്നെയാണ് അദ്ദേഹം ടിച്ചേർസണെ കാണാൻ ചെന്നതും.

ടിച്ചേർസന്റെ വീട്ടിൽ എത്തിയ നെഫിനെ സ്വീകരിച്ചത് അദ്ദേഹത്തിന്റെ ഭാര്യയാണ്. ഒറ്റ നോട്ടത്തിൽ തന്നെ ഫില്ലീസ് അയാളുടെ മനം കവർന്നു. പിന്നീട് അവർ കൂടുതൽ അടുക്കാൻ ശ്രമിച്ചു. ആ അടുപ്പം അയാളെ വലിയൊരു കുറ്റകൃത്യത്തിലേക്കാണ് നയിച്ചത്.

💢1930ൽ തയ്യാറാക്കിയ തിരക്കഥ. പല മാറ്റങ്ങളോടെ 1944ലാണ് സിനിമയാക്കിയത്. ആദ്യം കഥയെഴുതിയ വ്യക്തിയല്ല സിനിമക്കായി തിരക്കഥ രചിച്ചത്. അദ്ദേഹത്തിന്റെ പ്രധാന പണി സന്ദർഭത്തിന് ചേർന്ന ഡയലോഗുകൾ എഴുതുക എന്നതായിരുന്നു. തിരക്കഥയോടൊപ്പം ഡയലോഗുകളും ഗംഭീരമായപ്പോൾ പിറന്നത് എക്കാലത്തെയും മികച്ച മാസ്റ്റർപീസുകളിലൊന്ന്.

💢സ്വാർഥതയുടെ ലോകത്താണ് നാമെല്ലാം ജീവിക്കുന്നത്. നമ്മുടെ സ്വാർത്ഥതാൽപര്യങ്ങൾക്കായി മറ്റൊരുവന്റെ ജീവൻ വിലക്ക് കൊണ്ടുക്കേണ്ടി വന്നാലും പലപ്പോഴും നമ്മൾ കാര്യമാക്കാറില്ല. എന്നാൽ കളി അറിയാവുന്നവർ കളിച്ചാൽ ഫലം അങ്ങനെയാവില്ല. അതാണ് ചിത്രത്തിന്റെ പ്രധാനവിഷയങ്ങളിൽ ഒന്ന്.

💢പ്രലോഭനങ്ങളിൽ വഴുതിവീഴുന്ന ഒരു സാധാരണമനുഷ്യനും പണത്തോടും ആഡംബരപൂർവ്വമായ ജീവിതത്തോട് ഭ്രമമുള്ള ഒരുവളും ചേർന്ന് നടത്തുന്ന ഒരു ഗൂഡാലോചന. എന്നാൽ ഒരു പെർഫെക്റ്റ് ക്രൈമിന് അരികിൽ നിൽക്കുമ്പോഴും വിലങ്ങ് തടിയാവുന്ന മറ്റ് ചില ഘടകങ്ങളുണ്ട്. അതിനെ വളരെ ത്രില്ലിങ്ങായും അതോടൊപ്പം പലരുടേയും മാനസിക സംഘർഷങ്ങളും കോർത്തിണക്കി അവതരിപ്പിച്ചിരിക്കുകയാണ് സിനിമയിൽ.

💢ഒരു ഫോൺ കോളിൽ തന്റെ ജീവിതത്തിൽ സംഭവിച്ച അരുതാത്ത കാര്യങ്ങളിലൊന്ന് പങ്കുവെക്കുന്ന നായകനിൽ നിന്നാണ് ചിത്രത്തിന്റെ തുടക്കം. ആ നറേഷൻ സ്റ്റൈലിൽ തന്നെ പ്രേക്ഷകരുടെ മനം കവരുന്നുണ്ട് സംവിധായകൻ. അതോടൊപ്പം മികച്ച പ്രകടനങ്ങളും അവതരണമികവും മുതൽക്കൂട്ടാവുമ്പോൾ ഒരു ഗംഭീര ചിത്രത്തിനാവും നാം സാക്ഷിയാവുക.

🔻ＦＩＮＡＬ ＶＥＲＤＩＣＴ🔻

സിനിമാ ചരിത്രത്തിലെ തന്നെ മാസ്റ്റർപീസുകളിൽ മികച്ചുനിൽക്കുന്ന ക്രൈം ത്രില്ലർ. കാലഘട്ടം ഒരുക്കിയിരുന്ന സകല ടെക്‌നോളജിയുടേയും പരമാവധി ഉപയോഗവും അതിന്റെ മേന്മയും കാണാൻ സാധിക്കുന്ന മികച്ച ചിത്രം. തീർച്ചയായും കണ്ടിരിക്കേണ്ട ഒന്ന്.

ＭＹ ＲＡＴＩＮＧ::★★★★½

കണ്ടുമടുത്ത പ്രണയകഥകൾ വീണ്ടുമാവർത്തിക്കുന്നിടത്ത് തന്റേതായ സ്ഥാനം കണ്ടെത്തുകയാണ് ഷൂജിത്ത് സർക്കാരിന്റെ ഒക്ടോബർ. പറഞ്ഞറിയിക്കാൻ പറ്റാത്ത വിധം മനസ്സിനെ ഉലക്കുന്ന സുന്ദരമായ ചിത്രം.

🔻ＳＴＯＲＹ ＬＩＮＥ🔻

ഒരു ഫൈവ് സ്റ്റാർ ഹോട്ടലിൽ മാനേജ്‌മന്റ് ട്രെയിനി ആയി ജോലി ചെയ്യുകയാണ് പൊതുവെ അലസനായ ഡാൻ. അവന്റെ ജൂനിയറാണ് ഷിയൂലി. എന്നാൽ മറ്റുള്ളവരുമായി അധികം ചങ്ങാത്തം പുലർത്താത്ത ഡാനിന് ഉൾവലിഞ്ഞ സ്വഭാവമാണ്. അതുകൊണ്ട് തന്നെ ഷിയൂലി ഉൾപ്പടെ ഭൂരിഭാഗം ആളുകളുമായി ഡാൻ സംസാരിച്ചിരുന്നില്ല. മാത്രമല്ല തൻ ചെയ്യുന്ന ജോലിയിൽ മനം മടുത്ത് ജീവിക്കുകയാണ് അവൻ.

ആയിടക്കാണ് ഷിയൂലിക്ക് ഒരു അപകടം പറ്റുന്നത്. വൈകിയാണ് ഡാൻ അതറിയുന്നതെങ്കിലും അവൻ അതത്ര കാര്യമാക്കിയില്ല, മറ്റൊരു വാർത്ത കൂടി കേൾക്കുന്നത് വരെ. അപകടത്തിന് തൊട്ടുമുമ്പ് അവൾ അവസാനമായി ചോദിച്ചത് ഡാനിനെയാണ്. ആർക്കും അതൊരു വലിയ കാര്യമല്ലെങ്കിൽ കൂടി ഡാനിന് അതങ്ങനെ അല്ലായിരുന്നു. ആ വാർത്ത അവന്റെ ജീവിതം തന്നെ മാറ്റിമറിച്ചു.

🔻ＢＥＨＩＮＤ ＳＣＲＥＥＮ🔻

ജൂഹി ചതുര്വേദിയുടെ തിരക്കഥയും ഷൂജിത്ത് സർക്കാരിന്റെ ആവിഷ്കാരപാടവവും മികച്ച ചിത്രമാണ് നമുക്ക് സമ്മാനിച്ചത്. ആ സമയത്ത് എന്ത് വികാരമാണ് അവനിൽ ഉള്ളതെന്ന് ഒരു സമയത്തും പിടിതരാതെയാണ് കഥയുടെ പോക്ക്. അത് തന്നെയാണ് ചിത്രത്തിന്റെ ഭംഗിയും. പ്രേമമെന്നോ സൗഹൃദമെന്നോ വിശേഷിപ്പിക്കാവുന്ന, അല്ലെങ്കിൽ നിർവചനങ്ങൾക്ക് അതീതമായ എന്തോ ഒന്ന് എന്ന് പറയുന്നതാവും നല്ലത്. അതുപോലെ തന്നെയാണ് ഹോസ്പിറ്റലിലെ സ്ഥിരം സന്ദർശകനായി ഡാനിന് ഷിയൂലിയുടെ അമ്മയോടും അവിടെ നഴ്സിനോടുമൊക്കെ തോന്നുന്നതും. പല പല വികാരങ്ങൾ ഒരേസമയം അവനിലൂടെ കടന്നുപോവുന്നുണ്ട്. ഒരുതരത്തിൽ അവന്റെ ജീവിതം അർത്ഥവത്താക്കിയതും സുഗന്ധപൂരിതമാക്കിയതും ഷിയൂലിയാണ്.

ഒക്ടോബറിൽ മാത്രം പൂക്കുന്ന പവിഴമല്ലി. അതാണ് ഷിയൂലി എന്ന വാക്കിന്റെ അർഥം. അവൾക്ക് ഏറ്റവും പ്രിയപ്പെട്ട പൂക്കളും അത് തന്നെ. മരത്തിലായിരിക്കുമ്പോഴും അടർന്ന് വീഴുമ്പോഴും മറ്റുള്ളവർക്ക് സുഗന്ധം പരത്തുന്ന ഷിയൂലിപ്പൂക്കൾ. ആ പൂക്കളെ പോലെ തന്നെയാണ് ഡാനിന്റെ ജീവിതത്തിൽ ഷിയൂലിയും. ആ പൂക്കൾ പോലും പല രംഗങ്ങളിലും സംവദിക്കുന്നുണ്ട്. പല രംഗങ്ങളും മനോഹരമാക്കുന്നുണ്ട്.

🔻ＯＮ ＳＣＲＥＥＮ🔻

വരുൺ ധവാനിലെ മികച്ച നടനെ കാണാം ഡാൻ എന്ന കഥാപാത്രത്തിലൂടെ. എത്ര സ്വാഭാവികമായാണ് ആ കഥാപാത്രത്തെ അഭിനയിച്ച് ഫലിപ്പിച്ചതെന്ന് കണ്ടറിയേണ്ടത് തന്നെ. അധികം ഒന്നും ചെയ്യാനില്ലെങ്കിലും ബനിത സന്ധു ഷിയൂലിയുടെ വേഷം മനോഹരമാക്കി. ആ കണ്ണുകൾ തന്നെയായിരുന്നു പ്രധാന ആകർഷണം. അതോടൊപ്പം തന്നെ ചിത്രത്തിലുള്ള ഓരോ അഭിനേതാക്കളെയും അഭിനന്ദിച്ചേ മതിയാവൂ.

🔻ＭＵＳＩＣ & ＴＥＣＨＮＩＣＡＬ ＳＩＤＥＳ🔻

ഡൽഹിയെ അതിമനോഹരമായി ക്യാമറയിൽ പകർത്തിയിട്ടുണ്ട് ചിത്രത്തിൽ. ഓരോ കാലാവസ്ഥാവ്യതിയാനങ്ങൾ തന്നെ അതിന് ഏറ്റവും വലിയ ഉദാഹരണം. കൂടെ ലളിതമായ, ആവശ്യമുള്ളിടത്ത് മാത്രം ഇഴചേർന്ന് വരുന്ന പശ്ചാത്തലസംഗീതവും സുന്ദരമാണ്.


പതിവ് പ്രണയകഥകളിൽ നിന്ന് വേറിട്ട് നിൽക്കുന്ന, സ്വാഭാവികത നിറഞ്ഞ, സുന്ദരമായ ചിത്രം. നമ്മിൽ ഒരു പുഞ്ചിരി വിടർത്തുവാനും ഒരു ചെറിയ നൊമ്പരം സമ്മാനിക്കുവാനും ചിത്രത്തിന് കഴിയും. ഷിയൂലിപ്പൂക്കൾ നമ്മിലും ഗന്ധം നിറയ്ക്കും. മനസ്സ് സുഗന്ധപൂരിതമാവും. ലളിതം സുന്ദരം ഈ ഒക്ടോബർ..

ＭＹ ＲＡＴＩＮＧ :: ★★★★☆

വൻ പരീക്ഷണചിത്രങ്ങൾ പലപ്പോഴായി പിറന്നു വീഴാറുള്ള ഒരു ഇൻഡസ്ട്രിയാണ് തമിഴ് ഫിലിം ഇൻഡസ്ട്രി. ശങ്കറിനെപോലെയുള്ള സംവിധായകർ സൃഷ്ടിക്കുന്ന പല ചിത്രങ്ങളും നമുക്ക് കാഴ്ചാവിരുന്ന് ആവാറുണ്ട്. അതുപോലെ തന്നെ വമ്പൻ ബഡ്ജറ്റിൽ ഒരുങ്ങിയ പരീക്ഷണചിത്രമാണ് 'ടിക് ടിക് ടിക്'. ഇതുവരെ ആരും കൈവെക്കാത്ത സ്‌പേസിലേക്ക് താണ്ടുകയാണ് സംവിധായകൻ ഈ ചിത്രത്തിലൂടെ. ഇന്ത്യൻ സിനിമയുടെ അടിത്തറവെച്ച് നോക്കുകയാണെങ്കിൽ ഇതൊരു വലിയ കുതിച്ചുചാട്ടം തന്നെയാണ്. ഇരുകയ്യും നീട്ടി സ്വീകരിക്കേണ്ട മികവുറ്റ പരീക്ഷണം.


🔻ＳＴＯＲＹ ＬＩＮＥ🔻

തമിഴ്‌നാടടക്കം പല സംസ്ഥാനങ്ങളെ ഒന്നടങ്കം വിഴുങ്ങാൻ കെൽപുള്ള ഒരു ഭീമൻ ഉൽക്ക ഭൂമിയോട് അടുത്ത് കൊണ്ടിരിക്കുന്നു. ഒരു ചെറിയ സാമ്പിൾ ഭൂമിയിൽ പതിച്ചപ്പോൾ തന്നെ ഭവിഷ്യത്തുകൾ വിചാരിച്ചതിലും അപ്പുറമായിരുന്നു. അതിന് പുറകെയാണ് ആദ്യ ഉൽക്കയുടെ പതിന്മടങ്ങ് വലിപ്പവും വേഗതയുമുള്ള ഒന്ന് വീണ്ടും ഭൂമിയെ ലക്‌ഷ്യം വെച്ച് വരുന്നു. അത് തകർക്കാതെ വേറെ മാർഗമില്ല. എന്നാൽ തകർക്കാനുള്ള വിദ്യ കൈവശം ഇല്ലതാനും. അത് കൈക്കലാക്കാൻ ഒരു എസ്കേപ്പ് ആർട്ടിസ്റ്റിന്റെ കഴിവ് ഇന്ത്യൻ ഡിഫൻസിന് ആവശ്യമായി വരുന്നു. അതിൽ പ്രഗത്ഭനായ ഒരുവനെ കണ്ടെത്താനുള്ള ശ്രമമാണ് പിന്നീട്.

🔻ＢＥＨＩＮＤ ＳＣＲＥＥＮ🔻

മിരുതൻ സൗത്തിന്ത്യയിലെ ആദ്യത്തെ സോമ്പി മൂവി ആയിരുന്നു. അതിന്റെ സംവിധായകൻ ശക്തി സുന്ദർ രാജ് വീണ്ടുമൊരു പരീക്ഷണവുമായി മുന്നോട്ട് വന്നിരിക്കുകയാണ്. വമ്പൻ മുതൽമുടക്കിൽ ഒരു സ്‌പേസ് മൂവി. ഇന്ത്യൻ സിനിമയിലെ തന്നെ ആദ്യ സ്‌പേസ് ചിത്രമെന്ന നിലയിൽ കയ്യടി അർഹിക്കുന്ന പരീക്ഷണം തന്നെയാണ് അദ്ദേഹത്തിന്റേത്. ചില പോരായ്മകൾ ഉണ്ടെങ്കിൽ പോലും.

നായകൻ ഒരു മജീഷ്യനാണ്. അതുകൊണ്ട് തന്നെ മാജിക്ക് ഉപയോഗപ്പെടുത്താനുള്ള അനന്തസാധ്യതകൾ സംവിധായകന് മുന്നിൽ തുറന്നുകിടക്കുകയാണ്. അത് പ്രേക്ഷകർക്ക് വിശ്വസനീയമായി അവതരിപ്പിക്കുന്നതിലാണ് വിജയം കണ്ടെത്തേണ്ടത്. അത്തരത്തിൽ പലയിടത്തും ലോജിക്ക് നഷ്ടപ്പെടുന്നുണ്ടെങ്കിലും അത് പലപ്പോഴും കുറവായി തോന്നില്ല. പിന്നെ മജീഷ്യൻ ആയതുകൊണ്ട് എന്തും ആവാമല്ലോ. അത് വിശ്വസനീയമാം വിധം അവതരിപ്പിച്ചതിൽ സംവിധായകന്റെ മിടുക്ക് കാണാം.

ആദ്യപകുതി മികച്ച രീതിയിലാണ് മുന്നോട്ട് പോയത്. ആവശ്യമുള്ള സീനുകളും സന്ദർഭങ്ങളും മാത്രം കാണിച്ചുകൊണ്ട്, യാതൊരു സമയവും നഷ്ടപ്പെടുത്താതെ ചടുലതയോടെയാണ് നീങ്ങുന്നത്. ഓരോ കഥാപാത്രങ്ങളെയും ആവശ്യമാം വിധം പരിചയപ്പെടുത്തുന്നുമുണ്ട്. അതിന്റെ ഗുണം രണ്ടാം പകുതിയിൽ കാണാൻ ചിലയിടങ്ങളിൽ സാധിക്കും. രണ്ട് പാട്ടുകൾ ഉണ്ടെങ്കിലും അവ അനാവശ്യമായി തോന്നിയില്ല. അതോടൊപ്പം ദുരൂഹത നിറക്കുന്ന ചില പോയിന്റുകളും സമ്മാനിക്കുന്നുണ്ട്. കൂടെ ഗംഭീര ദൃശ്യവിരുന്നും.

രണ്ടാം പകുതിയിൽ പലപ്പോഴും ലോജിക്ക് പ്രശ്നമാണ്. അവരുടെ ധൗത്യം ഇത്ര നിസാരമായിരുന്നോ എന്ന് തോന്നിക്കും വിധമായിരുന്നു പ്ലാനിംഗ്. എന്നിരുന്നാലും നായകൻറെ അമാനുഷികതയും കഴിവും ഉപയോഗപ്പെടുത്താൻ പരമാവധി ശ്രമിച്ചിട്ടുണ്ട്. ചിലത് അവിശ്വസനീയമായി തോന്നിയപ്പോൾ മറ്റ് പലതും തൃപ്തി നൽകി. ഒടുവിൽ പ്രതീക്ഷിച്ച ക്ലൈമാക്സും നല്ലൊരു ടെയിൽ എന്റും നൽകി ചിത്രം അവസാനിച്ചു.

പോരായ്മകളും ലൂപ്‌ഹോളുകളും ഒട്ടനവധി കാണാൻ സാധിക്കും ഈ ചിത്രത്തിൽ. എന്നാൽ നമ്മുടെ രാജ്യത്തിന്റെ തന്നെ ആദ്യ ശ്രമമെന്നുള്ള രീതിയിൽ കുറച്ചൊക്കെ കണ്ണടച്ചാൽ മികച്ച അനുഭവം തന്നെയാവും ഈ ചിത്രം. കൂടുതൽ പരീക്ഷണങ്ങൾക്ക് അത് വഴി പാവുകയും ചെയ്യും. തീയേറ്ററിൽ തന്നെ ആസ്വദിക്കേണ്ട ദൃശ്യവിരുന്നാണ് സംവിധായകൻ ഒരുക്കിയിരുന്നത്. അത് തീയേറ്ററിൽ തന്നെ ആസ്വദിക്കുക.

ജയം രവി തനിക്ക് കിട്ടിയ റോൾ ഭംഗിയായി ചെയ്തിട്ടുണ്ട്. അതുപോലെത്ത തന്നെ ബാക്കിയുള്ള അഭിനേതാക്കളും. കുറഞ്ഞ കഥാപാത്രങ്ങൾ മാത്രേ ഉള്ളൂ എങ്കിലും അവർക്കൊക്കെ പ്രാധാന്യം നൽകിയാണ് കഥ രചിച്ചിരിക്കുന്നത്.

🔻ＭＵＳＩＣ & ＴＥＣＨＮＩＣＡＬ ＳＩＤＥＳ🔻

ചിത്രത്തിന്റെ ടെക്നിക്കൽ സൈഡിനാണ് സർവ്വ അഭിനന്ദനങ്ങളും. പശ്ചാത്തലസംഗീതം മുതൽ CGI വർക്ക് വരെ ഗംഭീരമെന്നേ പറയാനുള്ളൂ. ഗ്രാഫിക്സ് സീനുകൾ പരമാവധി പെർഫെക്ഷനിൽ തന്നെ ഒരുക്കാൻ ശ്രമിച്ചിട്ടുണ്ട്. ഇത്ര മികവുറ്റ ഗ്രാഫിക്സ് വർക്കുകൾ മറ്റൊരു ഇന്ത്യൻ സിനിമയിലും ആസ്വദിച്ചിട്ടില്ല. പശ്ചാത്തലസംഗീതം പല സന്ദർഭങ്ങളുടെയും നട്ടെല്ലാണ്. ടൈറ്റിൽ കാർഡ് മുതൽ ഒടുക്കം വരെ അഭിവാജ്യ ഘടകമായി അത് നിലകൊള്ളുന്നുണ്ട്. കൂടെ മികവുറ്റ ഛായാഗ്രഹണവും.

ഇൻഡസ്ട്രിയിൽ ആദ്യ സ്‌പേസ് ചിത്രമെന്ന നിലയിൽ കയ്യടിച്ച് പ്രോത്സാഹിപ്പിക്കേണ്ട അനുഭവം തന്നെയാണ് ടിക് ടിക് ടിക്. ദൃശ്യഭംഗിയാലും ടെക്നിക്കൽ സൈഡുകളുടെ മികവാലും മികച്ച തീയേറ്റർ എക്സ്പീരിയൻസ് തന്നെയാവും ഈ ചിത്രം. പോരായ്മകൾ നിഴലിക്കുമ്പോഴും അതിനനുസരിച്ച് പല കാര്യങ്ങളിലും തിളങ്ങി നിൽക്കുവാനും ചിത്രത്തിനായിട്ടുണ്ട്. തീയേറ്ററിൽ തന്നെ ആസ്വദിക്കുക ഈ പരീക്ഷണം.

ＭＹ ＲＡＴＩＮＧ :: ★★★½

ഏഞ്ചൽസ് എന്ന മലയാളചിത്രം പുതുമയുള്ള ആഖ്യാനം കൊണ്ട് എന്നെ തൃപ്തിപ്പെടുത്തി ഒന്നാണ്. അതൊരു കൊറിയൻ സിനിമയിൽ നിന്ന് പ്രചോദനം ഉള്കൊണ്ടതാണെന്ന് വൈകിയാണ് അറിഞ്ഞത്. പിന്നീട് ആ ചിത്രം കാനായി തിടുക്കം. ഏഞ്ചൽസ് കണ്ടതുകൊണ്ട് ആസ്വാദനം കുറയുമോ എന്ന പേടി ഉണ്ടായിരുന്നു. എന്നാൽ ലഭിച്ചത് പ്രതീക്ഷിച്ചതിലുമപ്പുറം സംതൃപ്തിയാണ്.


💢Statute Of Limitationsന് ശേഷവും തെളിയിക്കപ്പെടാത്ത കേസുകൾ തള്ളിക്കളയാറാണ് പതിവ്. പ്ര കേസ് തെളിയിക്കാനുള്ള കാലാവധിയാണ് Statute Of Limitations. 10 സ്ത്രീകളെ പലയിടങ്ങളിലായി കൊല ചെയ്യപ്പെട്ട നിലയിൽ കണ്ടെത്തുകയാണ്. അതായിരുന്നു ചോയിക്ക് അന്വേഷിക്കാൻ ലഭിച്ച കേസ്. കൊല നടക്കുന്നത് നാല് വർഷത്തെ കാലയളവിലും. ആ കേസ് തുടക്കം മുതൽക്കേ ചോയി ആണ് അന്വേഷിച്ചിരുന്നത്. എന്നാൽ കൊലയാളിയെ കണ്ടെത്താൻ സമയപരിധി കഴിഞ്ഞിട്ടും അദ്ദേഹത്തിനായില്ല.

എന്നാൽ Statute Of Limitations കഴിഞ്ഞയുടൻ ഒരു ബുക്ക് പ്രസിദ്ധീകരിക്കപ്പെടുന്നു. ആ 10 കൊലകളും താനാണ് ചെയ്തതെന്ന് വാദിച്ചുകൊണ്ട് അതിന്റെ രചയിതാവ് താൻ എങ്ങനെയാണ് കൊല ചെയ്തതെന്നുൾപ്പടെ അതിൽ പ്രസ്താവിച്ചിട്ടുണ്ട്. എന്നാൽ ചോയിക്ക് മാത്രമല്ല, മറ്റ് പലർക്കും അതൊരു അവസരമായിരുന്നു.

💢ഒരു ഗംഭീര ത്രില്ലറാണ് നമുക്ക് മുന്നിൽ ഒരുക്കിയിരുന്നത് എന്ന സൂചന തന്നുകൊണ്ട് തന്നെയാണ് ചിത്രത്തിന്റെ തുടക്കം. നായകനും വില്ലനും തമ്മിലുള്ള ചേസിങ്ങ് സീൻ ആണ് ആദ്യ രംഗം. അവിടെ തുടങ്ങുന്നു നമ്മെ പിടിച്ചിരുത്തുന്ന സിനിമയുടെ അവതരണം. പതിവ് ത്രില്ലറുകളിൽ നിന്ന് തീർത്തും വ്യത്യസ്തമായ കഥയും അവതരണവുമാണ് ചിത്രത്തിന്റെ പ്രത്യേകത.

💢തീരെ പ്രതീക്ഷിക്കാത്ത ചില ട്വിസ്റ്റുകളാൽ ഞെട്ടിക്കുന്നുണ്ട് സംവിധായകൻ. അതിന്റെ അവതരണം മികവ് പുലർത്തുന്നുമുണ്ട്. ഒപ്പം ഗംഭീരമായി ആവിഷ്കരിച്ചിട്ടുള്ള രണ്ട് കിടിലൻ ചേസിങ്ങ് സീനുകൾ ശരിക്കും ആവേശം കൊള്ളിക്കുന്നുണ്ട്. ഏറ്റവും ഒടുവിൽ വില്ലന്റെ കിടിലൻ പ്രകടനവും. കൂടെ ത്രസിപ്പിക്കുന്ന പശ്ചാത്തലസംഗീതവും അവതരണത്തിന് പിന്തുണ നൽകുന്ന ഛായാഗ്രഹണവും ഇഷ്ടം പിടിച്ചുപറ്റുന്നു.

💢ഒരേയൊരു പോരായ്മ തോന്നിയത് എന്തെന്നാൽ ആ കൊലപാതകങ്ങളുടെ മോട്ടീവ് എവിടെയും പറയുന്നതായി ശ്രദ്ധയിൽ പെട്ടില്ല. അഥവാ ഉണ്ടെങ്കിൽ തന്നെ അതത്ര ഗൗരവകരമായ ഒന്നായി സംവദിക്കുന്നില്ല. എന്നാൽ കണ്ടിരിക്കുന്ന സമയത്ത് അതൊരു പോരായ്മയായി തോന്നുകയുമില്ല എന്നത് വേറെ കാര്യം.

🔻ＦＩＮＡＬ ＶＥＲＤＩＣＴ🔻

എല്ലാം കൊണ്ടും മികവ് പുലർത്തുന്ന ഒരു തകർപ്പൻ ത്രില്ലർ. മലയാളം റീമേക്ക് കണ്ടിട്ടുണെങ്കിൽ കൂടെ അതുക്കും മേലെ ത്രില്ലും തൃപ്തിയും നൽകുന്ന ഗംഭീരചിത്രം. മലയാളം കണ്ടിട്ടില്ലാത്തവർക്ക് ലോട്ടറിയാണ്. തീർച്ചയായും ഇഷ്ടപ്പെടും എന്നുറപ്പ്.

ＭＹ ＲＡＴＩＮＧ :: ★★★★☆

💢ഫാമിലി അഫയർ കേസുകൾ അന്വേഷിക്കുന്നതിൽ അതീവ തൽപരനാണ് പ്രൈവറ്റ് ഡിറ്റക്ട്ടീവായി ജോലി ചെയ്യുന്ന Seon Woo. പല കേസുകളും വളരെ വിദഗ്ധമായി അന്വേഷിച്ച് കുടുംബം പിരിച്ച് സുഖിക്കുന്ന സിയോണിന്റെ മുമ്പിൽ അതീവ സുന്ദരിയായ ഒരുവൾ ഒരു കേസുമായി എത്തുന്നത്. തന്റെ ഭർത്താവിന്റെ രഹസ്യകാമുകിയെ കണ്ടെത്തി കൊടുക്കണം. അതായിരുന്നു അവളുടെ ആവശ്യം.

പതിവ് കേസുകൾ പോലെ തന്നെ സിയോൺ ഇതും സ്വീകരിച്ചു. അങ്ങനെ അയാളെ ഫോളോ ചെയ്തുകൊണ്ടിരിക്കുമ്പോഴാണ് അവന് സത്യം മനസ്സിലാവുന്നത്. അവളുടെ ഭർത്താവ് മരിച്ചിരിക്കുന്നു. സാഹചര്യത്തെളിവുകൾ വിരൽ ചൂണ്ടുക സിയോണിലേക്കും. ഇനി അയാൾക്ക് രക്ഷപ്പെടാൻ ഒരു മാർഗമേ ഉള്ളൂ. കൊലയാളിയെ കണ്ടെത്തുക. അതോടൊപ്പം മറ്റൊരു കേസ് കൂടി സിയോണിന്റെ തലയിലാവുന്നു. തുടർന്ന് അന്വേഷണം രണ്ട് ഘട്ടങ്ങളിലായി പുരോഗമിക്കുന്നു.

💢അധികം പറഞ്ഞുകേട്ടിട്ടില്ലാത്ത, റേറ്റിങ്ങ് അധികം എവിടെയും കടന്നിട്ടുമില്ലാത്ത ചിത്രമാണ് The Scent. പക്ഷെ കഥയുടെ ത്രെഡ് രസകരമായി തോന്നിയതുകൊണ്ട് കാണാമെന്ന് വിചാരിച്ച് തുടങ്ങിയതാണ്. പക്ഷെ ഒരു ത്രില്ലറെന്ന നിലയിൽ ചിത്രം തൃപ്തി നൽകി.

💢അൽപ്പം രസിപ്പിച്ചുകൊണ്ട് ചില നർമ്മങ്ങളുമൊക്കെയായി തുടങ്ങുന്ന ചിത്രം കുറച്ച് മുന്നോട്ട് പോയതിന് ശേഷം പൂർണ്ണമായും ത്രില്ലർ ജേണറിലേക്ക് കടക്കുകയാണ്. അതൊക്കെ വളരെ ഇന്ററസ്റ്റിംഗ് ആയി ചിത്രീകരിച്ചിട്ടുമുണ്ട്. കേസ് അന്വേഷിക്കുന്ന രീതികളും ഓരോ നിഗമനങ്ങളിൽ എത്തിച്ചേരുന്ന വഴികളുമൊക്കെ വിശ്വസനീയമായി തന്നെ ഒരുക്കിയിട്ടുണ്ട്. ഇടക്കിടക്ക് ഓരോ ട്വിസ്റ്റുകൾ നൽകി പ്രേക്ഷകരെ ആകാംശയിലാഴ്ത്താനും സാധിച്ചിട്ടുണ്ട്. ചില അഡൾട്ട് സീനുകളുണ്ട്. അതുകൊണ്ട് കാണുമ്പോൾ പ്രൈവസി കാത്തുസൂക്ഷിക്കുക.

🔻ＦＩＮＡＬ ＶＥＲＤＩＣＴ🔻

ആകെ മൊത്തത്തിൽ ഒരു കൊച്ച് ചിത്രമെന്ന നിലയിൽ കഥയും അന്വേഷണവഴികളും ട്വിസ്റ്റുകളുമൊക്കെ എന്നിലെ പ്രേക്ഷകനെ തൃപ്തിപ്പെടുത്താൻ പോന്നതായിരുന്നു. യാതൊരു പ്രതീക്ഷയുമില്ലാതെ സംതൃപ്തി നൽകിയ മറ്റൊരു  ത്രില്ലർ കൂടി ആസ്വദിക്കാനായി.

ＭＹ ＲＡＴＩＮＧ :: ★★★☆☆

ഒരാൾ മരണപ്പെടുമ്പോൾ അയാളിൽ നിന്ന് 21 ഗ്രാം ഭാരം കുറയുന്നുണ്ട്. എന്നാൽ അതെന്താണ് കാരണമെന്ന് ഇതുവരെ കണ്ടെത്താനായിട്ടില്ല. ആത്മാവ് നഷ്ടപ്പെടുന്നതാണ് കാരണമെന്നൊക്കെ അവകാശപ്പെടുന്നുണ്ടെങ്കിലും അതിനൊരു തെളിവ് കൊണ്ടുവരാൻ സാധിച്ചിട്ടില്ല. ഇന്നും അത് ദുരൂഹമായി നിലകൊള്ളുന്നു.


💢മരിച്ചവരുടെ മൃതദേഹങ്ങളിൽ ആർട്ടിഫിഷ്യലായി ജീവൻ കൊടുക്കുക. അവരെ തങ്ങളുടെ വരുതിയിലാക്കി പല കാര്യങ്ങൾക്കായി ഉപയോഗിക്കുക. പത്തൊമ്പതാം നൂറ്റാണ്ടിൽ പലയിടങ്ങളിലായി കൊണ്ടുവന്ന പുതിയ പ്രതിഭാസമായിരുന്നു അത്. യുദ്ധങ്ങൾക്കും മറ്റ് ജോലി ആവശ്യങ്ങൾക്കും വ്യാപകമായി അവയെ ഉപയോഗിച്ചിരുന്നു. അതുകൊണ്ട് തന്നെ മനുഷ്യരുടെ എന്നതിന്റെ തോതിൽ കാര്യമായി കുറവുണ്ടായില്ല. എന്നാൽ അവയുടെ ദേഹത്ത് നിർജീവമായി ജീവിക്കുന്ന ആത്മാക്കളായിരുന്നു എന്നതാണ് പ്രധാന പോരായ്മ. ഇതിലേക്ക് യഥാർത്ഥത്തിൽ ഒരാത്മാവിനെ ഉൾപ്പെടുത്തിയാൽ മരിച്ചവരെ പുനരുജ്ജീവിപ്പിക്കാൻ സാധിക്കുമോ എന്ന ചിന്തയിലായി പലരും.

ലോകത്ത് ഒരാൾക്ക് മാത്രം അങ്ങനെ ആത്മാവിനെ മൃതദേഹത്തിലേക്ക് ആവാഹിക്കാൻ സാധിച്ചിട്ടുണ്ട് എന്ന് പറയപ്പെടുന്നു. വിക്ടർ ഫ്രാങ്കൻസ്റ്റെയ്ൻ. എന്നാൽ അതിന്റെ തെളിവുകളൊന്നും പ്രത്യക്ഷത്തിൽ കണ്ടെത്താനുമായിട്ടില്ല. പല രാജ്യങ്ങളും അതിനായുള്ള ശ്രമം നടത്തുന്നുണ്ട്. അതിനായി ബ്രിട്ടീഷുകാർ ആശ്രയിച്ചത് ഡോക്ടർ വാട്സണെയായിരുന്നു. വിക്ടറിന്റെ ഡോക്യൂമെന്റസ് തേടി വാട്സന്റെ നേതൃത്വത്തിൽ ബ്രിട്ടീഷ് സേനയും തിരച്ചിൽ തുടങ്ങുന്നു..

💢വളരെ മികച്ച പ്രമേയങ്ങൾ തെരഞ്ഞെടുത്തുകൊണ്ട് ചിത്രങ്ങൾ നിർമ്മിക്കാൻ ജാപ്പനീസ് ഫിലിം ഇൻഡസ്ട്രിക്ക് ഒരു പ്രത്യേക കഴിവാണ്. അത് തന്നെയാണ് ഈ ചിത്രത്തിന്റെയും പ്രത്യേകത. അങ്ങേയറ്റം പുതുമയുള്ള കഥയും അതിനൊത്ത സന്ദർഭങ്ങളും ഒരുക്കി മികവുറ്റ ഒരു കാഴ്ചാനുഭവമാണ് ഈ ചിത്രം സമ്മാനിക്കുക. അതോടൊപ്പം ചിന്തിക്കാനും പല കാര്യങ്ങളും കോറിയിടുന്നുണ്ട്.

💢ഇൻഫിനിറ്റി വാറിൽ താനോസിന്റെ ലക്‌ഷ്യം ലോകത്ത് സമാധാനം കൊണ്ടുവരിക എന്നതായിരുന്നു. ഇതിലും പലരിലും ആ ലക്ഷ്യം ഉയരുന്നുണ്ട്. അതിനായി അവർ കണ്ടെത്തുന്ന മാർഗ്ഗം ഭീകരമാണ്. ചിന്തിക്കേണ്ട വസ്തുത തന്നെയാണ് അത്. കൂടുത്താൽ പറഞ്ഞാൽ പുതുമ നഷ്ടപ്പെടുമെന്നതിനാൽ അതിലേക്ക് കടക്കുന്നില്ല. അതോടൊപ്പം ശരീരത്തിലെ 21 ഗ്രാം തൂക്കത്തെ പറ്റി ഒരു ധാരണ സ്വയം സൃഷ്ടിക്കുന്നുമുണ്ട് സംവിധായകൻ. ഒരുവന്റെ ആത്മാവിന്റെ ചിന്തകളുടെയും ചെയ്തികളുടെയും ആകെത്തുകയാണ് ആ 21 ഗ്രാം എന്ന് ചിത്രം പറഞ്ഞുവെക്കുന്നു.

💢കണ്ണഞ്ചിപ്പിക്കുന്ന ആനിമേഷൻ വർക്കുകളാണ് അണിയറപ്രവർത്തകർ ഒരുക്കിവെച്ചിരിക്കുന്നത്. ഗംഭീരം എന്ന് മാത്രമേ വിശേഷിപ്പിക്കാനാവൂ. അത് പോലെ തന്നെയാണ് പശ്ചാത്തലസംഗീതവും. കൂടെ എന്റ്റ് ക്രെഡിറ്റ്സിൽ ഒരു സുന്ദരമായ ഗാനം കൂടിയുണ്ട്.

💢ചിത്രത്തിലെ പല കഥാപാത്രങ്ങളും നമുക്ക് കേട്ട് പരിചയമുള്ളവരാണ്. തോമസ് ആൽവാ എഡിസൺ മുതൽ ലിറ്ററേച്ചർ കാരക്റ്ററായ വിക്ടർ വരെ ചിത്രത്തിൽ പലപ്പോഴായി പരാമർശിക്കപ്പെടുകയോ വന്നുപോവുകയോ ചെയ്യുന്നുണ്ട്. അതോടൊപ്പം മറ്റുചില അപ്പിയറൻസുകൾ കൂടിയുണ്ട്.

🔻ＦＩＮＡＬ ＶＥＲＤＩＣＴ🔻

പതിവ് പോലെ ജാപ്പനീസ് സിനിമകളിൽ മറ്റൊരു ഗംഭീര അനുഭവം കൂടിയായി ഈ ചിത്രം. പ്രമേയത്തിൽ പുലർത്തുന്ന പുതുമയും അതുപോലെ തന്നെ ദൃശ്യവിരുന്നും പിടിച്ചിരുത്തുന്ന ഒരു ചിത്രത്തിന് വഴിവെച്ചു. തീർച്ചയായും പുതുമയുള്ള ഒരനുഭവമാവും ഈ ചിത്രം.

ＭＹ ＲＡＴＩＮＧ :: ★★★★☆

തീരെ പ്രതീക്ഷിക്കാതെ വരുന്ന കൊച്ച് ചിത്രങ്ങൾ തൃപ്തി തരുന്ന കാഴ്ച്ചയാണ് കഴിഞ്ഞ കുറച്ച് നാളുകളായി മലയാള സിനിമയിൽ കണ്ടുവരുന്നത്. അതിന്റെ ഏറ്റവും അവസാനത്തെ ഉദാഹരണമായിരുന്നു സുഡാനി ഫ്രം നൈജീരിയ. ആ ലിസ്റ്റിലേക്ക് ഒരു ചിത്രം കൂടി ഇടം പിടിക്കുകയാണ്. കുട്ടൻ പിള്ളയുടെ ശിവരാത്രി.


🔻ＳＴＯＲＹ ＬＩＮＥ🔻

കോൺസ്റ്റബിൾ കുട്ടൻപിള്ളക്ക് പ്രത്യേകതകൾ ഒരുപാടാണ്. വെടിക്കെട്ടും പ്രേതങ്ങളും സ്ഥിരം പേടിപ്പെടുത്തുന്ന കുട്ടൻ പിള്ളക്ക് സ്വന്തം മരുമകനെ വരെ പേടിയാണ്. എന്നാൽ അവരെക്കാളൊക്കെ കുട്ടൻ പിള്ള ഇഷ്ടപ്പെടുന്നത് തന്റെ പറമ്പിലെ പ്ലാവിനെയാണ്. വർഷങ്ങളായി സ്വന്തം മക്കളെപ്പോലെ, അല്ലെങ്കിൽ മക്കളെക്കാൾ കുട്ടൻപിള്ള നോക്കുന്നത് ആ പ്ലാവിനെയാണ്. ആ കുട്ടൻപിള്ളയുടെ കഥയാണ് ഒരു ശിവരാത്രിയുടെ വെളിച്ചത്തിൽ പറയുന്നത്.

🔻ＢＥＨＩＮＤ ＳＣＲＥＥＮ🔻

തന്റെ ആദ്യ ചിത്രമായ ഏഞ്ചൽസിലൂടെ തന്നെ എന്നെ തൃപ്തിപ്പെടുത്തി സംവിധായകനാണ് ജീൻ മാർക്കോസ്. കൊറിയൻ സിനിമയുടെ റീമേക്ക് ആണെങ്കിലും തെറ്റില്ലാത്ത രീതിയിൽ അത് കൈകാര്യം ചെയ്തിട്ടുണ്ട്. മാത്രമല്ല അതൊരു പുതിയ അനുഭവം കൂടിയായിരുന്നു. തന്റെ രണ്ടാം വരവിൽ തനിനാടൻ പ്രമേയമാണ് സംവിധായകൻ തെരഞ്ഞെടുത്തത്. അത് വളരെ ഭംഗിയായി, വൃത്തിയായി കൈകാര്യം ചെയ്തിട്ടുമുണ്ട്.

പ്ലാവിനെ പ്രേമിക്കുന്ന, എപ്പോഴും ഗൗരവം മുഖത്ത് ചാലിച്ച കുട്ടൻപിള്ളയും ശകുന്തളയുമൊക്കെ പ്രേക്ഷകർക്ക് മുന്നിൽ എത്തുമ്പോൾ തന്നെ ചുണ്ടിൽ ചിരി നിറയും. അത്തരത്തിലാണ് കഥ പറഞ്ഞ് പോവുന്നത്. ശിവരാത്രി ദിവസം കുട്ടൻപിള്ളയുടെ വീട്ടിൽ കൂടാനെത്തുന്ന കുടുംബക്കാരെ പരിചയപ്പെടുത്താനാണ് ആദ്യപകുതി. രണ്ട് മണിക്കൂർ മാത്രം ദൈർഖ്യമുള്ള സിനിമയിൽ ആദ്യ പകുതി അവരെ പരിചയപ്പെടുത്തി മുന്നേറുമ്പോൾ ചിരിക്കാൻ വകകൾ ഒരുപാടാണ്. അവയെല്ലാം പൊട്ടിച്ചിരിപ്പിക്കുന്നവയാണെന്നതാണ് വാസ്തവം. പലപ്പോഴും ചിരിയടക്കാൻ കഴിഞ്ഞില്ല. എന്നാൽ പിന്നീടുള്ള പകുതി തീർത്തും വിഭിന്നമാണ്.

തീരെ പ്രതീക്ഷിക്കാത്ത, ഒരുതരം ഫാന്റസി മൂഡിലാണ് ഇടക്കിടക്ക് കഥ വരുന്നത്. അതിനൊപ്പം നുറുങ്ങ് നർമ്മങ്ങളുമുണ്ട്. കൂടെ ഒരു മഹാദുരന്തത്തിന്റെ ഓർമ്മപ്പെടുത്തലും. ഒരുതരത്തിൽ ദുരൂഹത നിറക്കുന്ന, ഒരുതരം ഡാർക്ക് മൂഡ് അന്തരീക്ഷത്തിൽ നിറയുന്ന തരത്തിലുള്ള ആവിഷ്കാരം. നമ്മളിൽ ഉയരുന്ന ചോദ്യങ്ങൾക്കുള്ള ഉത്തരം ഏറ്റവും അവസാനം ലഭിക്കുന്നു. ഒരുതരം ഞെട്ടൽ ഉണ്ടാക്കുന്ന സംഭവമായിരുന്നു അത്. കാലിക പ്രസക്തിയുള്ള ഒരു വിഷയം കൂടി കൂട്ടിച്ചേർത്തിട്ടുണ്ട് സംവിധായകൻ.

തീരെ പ്രതീക്ഷിക്കാത്ത നല്ലൊരു അനുഭവമാണ് കുട്ടൻപിള്ളയും കുടുംബവും സമ്മാനിച്ചത്. VFX ആണോ എന്നറിയില്ല, എന്നാൽ ആ രംഗങ്ങൾ മികച്ച തീയേറ്റർ അനുഭവമായിരുന്നു. ഇത്ര പെർഫെക്റ്റ് ആയി ഈയടുത്ത് ഒരു സിനിമയിലും അത്തരം ഉപയോഗങ്ങൾ കണ്ടിട്ടില്ല. ആകെമൊത്തത്തിൽ വളരെയധികം കഥാപാത്രങ്ങളെ നിരത്തി, ഓരോരുത്തർക്കും അവരുടേതായ ഐഡന്റിറ്റിയും സമ്മാനിച്ച് രസകരമാക്കിയ ശിവരാത്രിയായിരുന്നു കുട്ടൻപിള്ളയുടേത്.

🔻ＯＮ ＳＣＲＥＥＮ🔻

ദേശീയ അവാർഡ് ജേതാവ് സുരാജ് വെഞ്ഞാറമൂടിന്റെ മറ്റൊരു മികച്ച കഥാപാത്രം തന്നെ കുട്ടൻപിള്ള. കെട്ടിലും മട്ടിലും ഗൗരവക്കാരനായ കുട്ടൻപിള്ളയെ ഗംഭീരമാക്കി സുരാജ്. കൂടെ പേരറിയാത്ത, സ്‌ക്രീനിൽ ഇതുവരെ കണ്ടുപരിചയം പോലുമില്ലാത്ത ഒരുപറ്റം ആളുകൾ ഉൾപ്പടെ എല്ലാ താരങ്ങളും മികച്ച പ്രകടനം തന്നെ കാഴ്ചവെച്ചു.


സയനോരയുടെ സംഗീതസംവിധായക ആയുള്ള അരങ്ങേറ്റം കുട്ടൻപിള്ളയിലൂടെ കയ്യടി വാങ്ങി. തുടക്കത്തിലേ പാട്ട് മുതൽ ഓരോ രംഗവും കടന്നുവരുന്ന പശ്ചാത്തലസംഗീതം വരെ വളരെ മികവ് പുലർത്തി. കൂടെ ഛായാഗ്രഹണവും വളരെ ഭംഗിയുള്ളതായിരുന്നു.
വ്യത്യസ്തമായ ഒരു ആസ്വാദനം. അതാണ് കുട്ടൻപിള്ളയും കുടുംബവും സമ്മാനിച്ചത്. വളരെയധികം ചിരിക്കാനും ഇടക്കിടക്ക് ചിന്തിക്കാനും പ്രേരിപ്പിക്കുന്ന ഒരു കൊച്ച് സിനിമ. വെറുതെയിരിക്കുന്ന സമയത്ത് നല്ല പഴുത്ത ചക്കച്ചുള കിട്ടിയാൽ എങ്ങനെയുണ്ടാവും. നല്ല രുചിയല്ലേ. 😉😉

ഈ വർഷത്തെ ഇഷ്ടചിത്രങ്ങളുടെ ലിസ്റ്റിൽ കുട്ടൻപിള്ളയും കുടുംബവും സീറ്റുറപ്പിച്ചു.

💢നമുക്കെല്ലാവർക്കും പലപ്പോഴും ഒരു രഹസ്യം ജീവിതത്തിലുടനീളം കൂട്ടായുണ്ടാവും. മറ്റുള്ളവരോട് പറയാൻ ഭയപ്പെടുത്തന്നതോ, പറഞ്ഞുകഴിഞ്ഞാൽ അവർക്ക് നമ്മളോടുള്ള കാഴ്ചപ്പാടുകൾക്ക് വ്യത്യാസം വരുമെന്നതോ പോലെയുള്ള ചിന്തകൾ മനസ്സിനെ എപ്പോഴും വേട്ടയാടിക്കൊണ്ടിരിക്കും അത്തരം സന്ദർഭങ്ങളിൽ. സൈമണിന്റെ കാര്യവും അങ്ങനെ തന്നെയായിരുന്നു.

💢സുന്ദരമായൊരു കുടുംബവും അടുത്തറിയുന്ന മൂന്ന് കൂട്ടുകാരും അടങ്ങിയതാണ് സൈമണിന്റെ ലോകം. കൂടെ കോളേജിലെ ക്ലാസുകളും സുഹൃത്തുക്കളുമൊക്കെയായി ഇപ്പോഴും അവൻ സന്തോഷവാനാണ്. എന്നാൽ മനസ്സിൽ മറ്റാരോടും പങ്കുവെക്കാത്ത ഒരു വലിയ ഭാരം അവനിൽ ഉണ്ടായിരുന്നു. താനൊരു ഗേ ആണെന്ന വിവരം.

💢താനൊരു സ്വവർഗാനുരാഗിയാണെന്ന് സമൂഹത്തോട് ഉറക്കെ വിളിച്ച് പറയണമെന്നുണ്ട് സൈമണിന്. എന്നാൽ അതിന്റെ ഭവിഷ്യത്തുകളെക്കുറിച്ച് ഓർക്കുമ്പോൾ അവന് ഭയമാണ്. താൻ സ്നേഹിക്കുന്ന, തന്നെ സ്നേഹിക്കുന്ന കുടുംബവും ഏറ്റവും അടുത്ത സുഹൃത്തുക്കളുമൊക്കെ ഏത് വിധം തന്നെ നോക്കിക്കാണുമെന്ന ചോദ്യമാണ് അവനെ അലട്ടുക. കാരണം ഇന്നേവരെയും സ്വവർഗാനുരാഗികളെ സമൂഹത്തിൽ ഒരുവനെപ്പോലെ കാണാൻ അവർ തലയാട്ടിയിട്ടില്ല എന്നത് തന്നെ.

💢ആയിടക്കാണ് കോളേജിലെ സ്വകാര്യ വെബ്‌സൈറ്റിൽ ഒരു പോസ്റ്റ് വരുന്നത്. അനോണിമസ് ആയ ഇമെയിൽ ഐഡിയിൽ നിന്ന് വന്ന പോസ്റ്റിനോട് അവന് ആകർഷണം തോന്നുന്നു. കാരണം താനിപ്പോൾ അനുഭവിക്കുന്ന അതെ മനോനിലയിലൂടെ കടന്നുപോവുന്ന ആൾ തന്നെയാണ് പോസ്റ്റിന്റെ ഉടമയെന്ന് ആ വാക്കുകളിൽ നിന്ന് വ്യക്തം. തുടർന്നുള്ള സൈമണിന്റെ ജീവിതമാണ് ചിത്രം കൈകാര്യം ചെയ്യുന്നത്.

💢"ഗേ" എന്ന കോൺസെപ്റ്റിൽ പല സിനിമകളും കണ്ടിട്ടുണ്ട്. അവ പലതും ഇഷ്ടപ്പെട്ടിട്ടുമുണ്ട്. പക്ഷെ ഇത്രയേറെ ലളിതവും മനസ്സിനെ സ്പർശിക്കുന്നതുമായ ഒരെണ്ണം കണ്ടിട്ടില്ല എന്ന് പറയാം. അത്ര സുന്ദരമായ അനുഭവമായിരുന്നു സൈമണിന്റെ ജീവിതം. പലർക്കും ജീവിക്കാൻ ഊർജ്ജം നൽകിയേക്കാവുന്ന, പലതും തുറന്ന് പറയാനുള്ള ധൈര്യം പകർന്നേക്കാവുന്ന മികച്ച ചിത്രം. അതോടൊപ്പം തന്നെ സമൂഹത്തിനും ഇതൊരു കണ്ണാടിയാണ്. ഏത് തരം ആൾക്കാരും സമൂഹത്തിന്റെ ഭാഗമാണ്. അവരെ സ്വീകരിക്കേണ്ടത് അവരുടെ കടമയാണ്. അല്ലാതെ പുറന്തള്ളപ്പെടേണ്ടവരല്ല അത്തരക്കാർ.

🔻ＦＩＮＡＬ ＶＥＲＤＩＣＴ🔻

വെറുമൊരു ഫീൽ ഗുഡ് മൂവി എന്ന ലേബലിൽ ഒതുങ്ങാതെ പ്രേക്ഷകരെ ചിന്തിപ്പിക്കുകയും അതുപോലെ സുന്ദരമായ അനുഭൂതി മനസ്സിൽ സൃഷ്ടിക്കുകയും ചെയ്യുന്ന മികച്ച ചിത്രം. ഓരോ രംഗങ്ങളും നമ്മെ ആകർഷിക്കുമ്പോൾ ക്ലൈമാക്സ് വളരെയധികം സന്തോഷം നൽകുന്ന ഒന്നായി. ഏവർക്കും ഒരുപോലെ ആസ്വദിക്കാവുന്ന സിമ്പിളായ ചിത്രം. സ്നേഹത്തോടെ, സൈമൺ..

ＭＹ ＲＡＴＩＮＧ :: ★★★★☆

2014ലാണ് റാണി മുഖർജിയുടെ സിനിമ അവസാനമായി ഇറങ്ങിയത്. ഇതാ നാല് വർഷങ്ങൾക്ക് ശേഷം വീണ്ടും ഒന്നുകൂടി. ഇതിനുമുമ്പൊക്കെ പലപ്പോഴും നിരാശയായിരുന്നു മുഖർജി സിനിമകൾ നൽകിയിരുന്നത്. അതുകൊണ്ട് ഈ സിനിമ കാണുംമ്പോഴും അധികം പ്രതീക്ഷയൊന്നും ഉണ്ടായിരുന്നില്ല.


💢Tourette Syndrome എന്ന അപൂർവ്വ രോഗം ബാധിച്ചിരിക്കുകയാണ് നൈനക്ക്. സംസാരത്തിനെയാണ് ആ രോഗം ബാധിക്കുക. പലപ്പോഴും സംസാരശൈലി തങ്ങളുടെ നിയന്ത്രണത്തിനപ്പുറം ആയിരിക്കും. എന്നാൽ അതൊന്നും കൂസാതെ ഒരു അധ്യാപികയാവണമെന്ന ആഗ്രഹവുമായി നടക്കുകയാണ് നൈന. പക്ഷെ രോഗബാധിതയായത് മൂലം ഒരു സ്‌കൂളിലും നൈനക്ക് ജോലി കിട്ടുന്നുമില്ല.

💢ആയിടക്കാണ് പെട്ടെന്നൊരു ദിവസം അവളെ പ്രസിദ്ധമായ St. Nokers സ്‌കൂളിലേക്ക് അധ്യാപികയായി വിളിക്കുന്നത്. അപ്രതീക്ഷിതമായി കിട്ടിയ ജോലിയാണെങ്കിലും നൈനയെ അവിടെ കാത്തിരുന്നത് വലിയ പരീക്ഷണങ്ങളായിരുന്നു. തുടർന്നുള്ള നൈനയുടെ ജോലിയും ജീവിതവുമാണ് ചിത്രം കൈകാര്യം ചെയ്യുന്നത്.

💢ഒറ്റവാക്കിൽ പറഞ്ഞാൽ സുന്ദരമായ സിനിമ. അതാണ് ഹിച്കി. തുടക്കം മുതൽ ഒടുക്കം വരെ ഓരോ സന്ദർഭങ്ങൾ വരുമ്പോഴും അടുത്തതെന്തെന്ന് നമുക്ക് ഊഹിക്കാവുന്നതേയുള്ളൂ. എന്നാൽ അതിലും വിരസത നൽകാതെ മനോഹരമായി ഇമോഷണൽ രംഗങ്ങൾ കൂടി കോർത്തെടുക്കുന്നതിലാണ് ചിത്രം വിജയിച്ചിട്ടുള്ളത്. അതുകൊണ്ട് തന്നെ മനസ്സിന് സന്തോഷം നൽകുന്ന, ഒരു പോസിറ്റിവ് എനർജി ഫീൽ ചെയ്യിക്കുന്ന ചിത്രങ്ങളുടെ കൂട്ടത്തിൽ ഹിച്ക്കിയും പെട്ടേക്കാം.

💢റാണി മുഖർജിയുടെ എനർജെറ്റിക്ക് പ്രകടനമാണ് ചിത്രത്തിന്റെ ഹൈലൈറ്റ്. ഇപ്പോഴും പുഞ്ചിരി പ്രസരിക്കുന്ന ആ മുഖം പലപ്പോഴും നമ്മിലും പുഞ്ചിരി സമ്മാനിക്കുന്നുണ്ട്. കൂടെയുള്ള കഥാപാത്രങ്ങളും മത്സരിച്ചഭിനയിച്ചപ്പോൾ ഓരോ രംഗങ്ങളും മികച്ചതായി മാറുന്നുണ്ട്. അതിൽ എടുത്ത് പറയേണ്ടത് പ്രഫസർ വാഡിയ ആയി അഭിനയിച്ച നീരജ് കാബിയുടെ പ്രകടനമാണ്. വളരെ മികച്ച പ്രകടനവും കഴിവ് പുറത്തെടുക്കാൻ പറ്റിയ വേഷവും. കൂടെ ക്ലൈമാക്സിലെ ചെറിയ വഴിത്തിരിവുകൾ കൂടിയാവുമ്പോൾ മനസ്സ് നിറക്കുന്ന ചിത്രമായി മാറുന്നുണ്ട് ഹിച്ച്കി.

🔻ＦＩＮＡＬ ＶＥＲＤＩＣＴ🔻

എല്ലാ അധ്യാപകരും വിദ്യാർത്ഥികളും ഒരു തവണ ഈ സിനിമ കാണണമെന്നാണ് എന്റെ അഭിപ്രായം. കാരണം അവർക്കും ഇതിൽ നിന്ന് പഠിക്കാൻ പലതുമുണ്ട്. ഒരു അധ്യാപക-വിദ്യാർത്ഥി ബന്ധം ഉടലെടുക്കുന്ന പല സാഹചര്യങ്ങൾ ചിത്രത്തിൽ വീക്ഷിക്കാൻ സാധിക്കും. അതോടൊപ്പം മനസ്സിന് നല്ലൊരു അനുഭൂതി നൽകുന്ന ചിത്രം കൂടി കണ്ട സന്തോഷവും നമ്മിലുണ്ടാവും.
ＭＹ ＲＡＴＩＮＧ :: ★★★½

കഥയിലുള്ള സാമ്യം കണ്ടപ്പോഴും അത് തോന്നിയില്ല. തുടക്കമൊക്കെയും അത് അവതരണത്തിൽ പ്രതിഫലിച്ചില്ല. എന്നാൽ ഒരു രംഗം എത്തിയപ്പോൾ മനസ്സിനെ ആ ചോദ്യം അലട്ടിക്കൊണ്ടിരുന്നു.  ഇത് ആ ചിത്രത്തിന്റെ റീമേക്ക് അല്ലെ.? ഒടുവിൽ ക്ലൈമാക്സിനോട് അടുത്തപ്പോൾ സംഭവം സത്യമായി. ഇത് റീമേക്ക് തന്നെ.


💢ആദ്യമായാണ് ഒരു കൊറിയൻ സിനിമയിൽ റീമേക്ക് കാണാനായത്. അതും ഭൂരിഭാഗം പേരും കണ്ടിട്ടുണ്ടാവാൻ സാധ്യതയുള്ള വിദേശസിനിമ. അതേതാണെന്ന് പറഞ്ഞാൽ ആസ്വാദനം പോവുമെന്നതിനാൽ പറയുന്നില്ല. എങ്കിലും പലപ്പോഴും അവ തമ്മിലുള്ള സാമ്യം പ്രകടമാവുന്നില്ല എന്നതാണ് സിനിമയുടെ ഹൈലൈറ്റ്. മാത്രമല്ല അതിനേക്കാൾ ഇന്റൻസായി പലപ്പോഴും സംവദിക്കുന്നുണ്ട് ചിത്രം.

💢വെറും ഈച്ചക്കോപ്പി അല്ല ഈ ചിത്രം. അതിനേക്കാൾ മികച്ചുനിൽക്കുന്നുണ്ടെന്ന തോന്നൽ പലപ്പോഴും ഉണ്ടാക്കുന്നുണ്ട്. അതുകൊണ്ട് തന്നെ നല്ലൊരു അനുഭവം തന്നെയാവുന്നുണ്ട് ഈ ചിത്രവും. ഒറിജിനൽ പതിപ്പ് കണ്ടിട്ടില്ലാത്തവർക്ക് ഇരട്ടി മധുരമാണ്. അതാണ് പോയിന്റ്.

💢ഒരു പുതുമുഖ സംവിധായകനെന്ന് തോന്നിക്കാത്ത വിധമാണ് ചിത്രം ഒരുക്കിവെച്ചിരിക്കുന്നത്. കൂടെ അന്തരീക്ഷത്തിലെ ഭീകരതയും നല്ലവണ്ണം അവതരണത്തെ പിന്തുണച്ചിട്ടുണ്ട്. അതോടൊപ്പം ഛായാഗ്രഹണമികവും പ്രകടനങ്ങളും മികച്ച് നിക്കുന്നു.

അച്ചടി റീമേക്ക് എന്ന് പറയിപ്പിക്കാത്ത വിധം ഐഡൻറിറ്റി കരസ്ഥമാക്കുന്ന ചിത്രമാണ് വാനിഷ്ഡ്. നേരത്തെ പറഞ്ഞത് പോലെ ഒറിജിനൽ കണ്ടിട്ടുള്ളവർക്ക് നല്ലൊരു അനുഭവവും കണ്ടിട്ടില്ലാത്തവർക്ക് ഇരട്ടി മധുരവും.

ＭＹ ＲＡＴＩＮＧ :: ★★★½

നമ്മുടെയെല്ലാം ജീവിതത്തിൽ പല വഴിത്തിരിവുകളും സമ്മാനിച്ച ചില പ്രത്യേക നിമിഷങ്ങളോ തീയതികളോ കാണും. ജന്മദിനം ഓർത്തുവെക്കുന്നത് പോലെ ആ ദിവസങ്ങളും നമ്മുടെ മനസ്സിൽ കോറിയിടും. അത്ര പ്രാധാന്യമുള്ളതായിരിക്കും അവ. എന്റെ ജീവിതത്തിലും ചില തീയതികൾ ഉണ്ട് അങ്ങനെ. അതിൽ ഏറ്റവും പ്രധാനം എന്റെ ജന്മദിനം തന്നെ. ജൂലൈ 15. ഈ സിനിമയിലേക്ക് എന്നെ ആകർഷിച്ച ഘടകവും ആ ഡേറ്റ് തന്നെ.



💢അവർ ആദ്യമായി കണ്ട ദിനം 1988 ജൂലൈ 15 ആയിരുന്നു. അന്ന് രാത്രി ഒരുമിച്ച് തങ്ങിയപ്പോൾ തന്നെ അവർക്കിടയിലുള്ള ആത്മബന്ധം ആഴത്തിൽ ഉറച്ചിരുന്നു. പിന്നീടവർ നല്ല കൂട്ടുകാരായി മുന്നോട്ട് പോയി. എന്നാൽ ഒരുമിച്ചാണെങ്കിലും അല്ലെങ്കിലും എല്ലാ വർഷവും ജൂലൈ 15ന് അവരുടെ ജീവിതത്തിൽ പല വഴിത്തിരിവുകളും സംഭവിച്ചുകൊണ്ടിരുന്നു. വർഷത്തിലെ ആ ഒരു ദിവസത്തിന്റെ കഥയാണ് "One Day".

💢ഈ ചിത്രത്തിന്റെ പ്രത്യേകതയാണ് ഒറ്റ ഡേറ്റിൽ തന്നെ കേന്ദ്രീകരിച്ചുള്ള കഥ പറച്ചിൽ. അവതരണത്തിലെ പക്വത കൊണ്ട് മറ്റുള്ള ദിനങ്ങളിൽ എന്ത് സംഭവിച്ചു എന്നതിനെക്കുറിച്ച് വേവലാതിപെടേണ്ട ആവശ്യം വരുന്നേ ഇല്ല. അത്ര ലളിതമായാണ് കഥയുടെ പോക്ക്. ഒരു ബെസ്റ്റ് സെല്ലറിന്റെ ദൃശ്യാവിഷ്‌കാരം ആണെങ്കിൽ കൂടി അത് നല്ല രീതിയിൽ സ്‌ക്രീനിലെത്തിക്കാൻ പിന്നണിയിൽ പ്രവർത്തിച്ചവർക്ക് സാധിച്ചിട്ടുണ്ട്.

💢പോരായ്മയായി തോന്നിയത് എന്തെന്നാൽ സന്തോഷമോ വിഷമമോ എന്ത് തന്നെയായിക്കോട്ടെ, അത് പ്രേക്ഷകരെ ആഴത്തിൽ സ്പർശിക്കുന്നെ ഇല്ല. എല്ലാ നിമിഷങ്ങളും കടന്ന് പോവുന്ന ലാഘവത്തോടെ അവയും കടന്നുപോവുന്നതായി  തോന്നും. ഒരുപക്ഷെ അവതരണത്തിലെ ഫ്രെഷ്നെസ്സിന് വേണ്ടി അങ്ങനെയൊരു നീക്കം കൈക്കൊണ്ടത്താണോ എന്നും സംശയം ഇല്ലാതില്ല.

💢അന്നാ ഹതാവെയുടെയും ജിം സ്റ്റർഗെസിന്റേയും മികച്ച പ്രകടനങ്ങൾ ചിത്രത്തിന്റെ നെടുന്തൂണാണ്. വളരെ മിതത്വത്തോടെ തങ്ങളുടെ കഥാപാത്രങ്ങളെ കൈകാര്യം ചെയ്തിട്ടുണ്ട്. ജിമ്മിന്റെ കഥാപാത്രം ആവശ്യപ്പെടുന്ന ശരീരഭാഷ്യം അദ്ദേഹത്തിൽ പ്രകടമായിരുന്നു. അഭിനന്ദനം അർഹിക്കുന്നുണ്ട് അദ്ദേഹം.

🔻ＦＩＮＡＬ ＶＥＲＤＩＣＴ🔻

പ്രതീക്ഷയില്ലാതെ സമീപിച്ചാൽ നല്ലൊരു സിനിമയായി അനുഭവപ്പെടാം one day. ഒരു ഫീൽ ഗുഡ് മൂവി കാണുന്ന ലാഘവത്തോടെ സമീപിക്കാവുന്ന ഒന്നെന്ന രീതിയിൽ നല്ലൊരു അനുഭവമാകുന്നു ഈ ചിത്രം.

ＭＹ ＲＡＴＩＮＧ :: ★★★☆☆

💢കല്യാണം കഴിഞ്ഞാലും മറ്റ് സുഖങ്ങളിൽ വ്യാപൃതരാവാൻ ആഗ്രഹിക്കുന്നവരാണ് പലരും. അതിനായി സ്വന്തമായി ഒരു ഫ്‌ളാറ്റ്‌ തന്നെ ഉണ്ടെങ്കിലോ. ഒരു ഫ്‌ളാറ്റ്‌. അതും അഞ്ച് പേർക്ക് മാത്രം അറിയാവുന്ന, അവരുടെ കയ്യിൽ മാത്രം താക്കോലുകൾ ഉള്ള, അവരുടെ അനുമതിയോടെ മാത്രം മറ്റുള്ളവർക്ക് പ്രവേശിക്കാവുന്ന ഒന്ന്. വിവാഹജീവിതം സെലിബ്രേറ്റ് ചെയ്യാൻ അവർക്കുണ്ടായിരുന്ന വഴി അതായിരുന്നു.

💢എന്നാൽ ഒരു ദിവസം പുലർച്ചെ അഞ്ച് പേരിൽ ഒരുവൻ അവിടെ എത്തിയപ്പോൾ കണ്ട കാഴ്ച അവരുടെ ജീവിതത്തിന്റെ തന്നെ വഴിത്തിരിവായി. റൂമിലെ ബെഡിൽ ഒരു സ്ത്രീ ചങ്ങലകളാൽ ബന്ധപ്പെട്ട് ക്രൂരമായി കൊല്ലപ്പെട്ട നിലയിൽ കിടക്കുന്നു. പൊടുന്നനെ അദ്ദേഹം മറ്റുള്ളവരെയും വിളിച്ച് വരുത്തുന്നു. സംശയത്തിന്റെ കൈകൾ വിരൽ ചൂണ്ടുന്നത് അവരിൽ ഓരോരുത്തരിലുമെക്കാൻ. കാരണം അവർക്ക് മാത്രമേ അവിടേക്ക് പ്രവേശനമുള്ളൂ.

💢പിന്നീട് അവിടെ നടക്കുന്നത് ചൂടേറിയ ചർച്ചകളാണ്. ഓരോരുത്തരെയും മറ്റുള്ളവർ ചോദ്യശരങ്ങൾ എയ്ത് പൂട്ടുന്നു. മറ്റാരെങ്കിലും അവർക്കായി ഒരുക്കിയ കെണിയാണോ എന്ന സംശയവും പല സാഹചര്യങ്ങളിലും ഉദിക്കുന്നുണ്ട്. കാരണം റൂമിലെ ചില വ്യത്യാസങ്ങൾ അവയെ സൂചിപ്പിക്കുന്നുണ്ട്. തുടർന്നുള്ള ത്രസിപ്പിക്കുന്ന നിമിഷങ്ങൾ ഒരു വമ്പൻ ത്രില്ലറിന് വഴിയൊരുക്കുന്നു.

💢ഓരോ സീനിലും കൊലപാതകിയെ ഊഹിക്കുകയും എന്നാൽ അതല്ല സംഭവിച്ചത് എന്ന പെട്ടെന്നുള്ള വഴിത്തിരിവ് കൊണ്ട് ഞെട്ടിച്ചുകൊണ്ടേയിരിക്കുന്ന ചിത്രം. രണ്ട് മണിക്കൂർ നേരം തീരുന്ന വഴി അറിയില്ല. അത്ര എൻഗേജ്ഡ് ആയി പിടിച്ചിരുത്തി നമ്മളെക്കൊണ്ടും ഒരുപാട് ചിന്തിക്കാൻ പ്രേരിപ്പിക്കുന്ന ഗംഭീര അവതരണവും അതിനൊത്ത ഡാർക്ക് മൂഡ് ക്രീയേറ്റ് ചെയ്യാൻ എല്ലാ അർത്ഥത്തിലും വിജയിച്ച ക്യാമറ വർക്കുകളും ബാക്ക്ഗ്രൗണ്ട് സ്കോറും. അങ്ങനെ ഓരോ ഘടകവും എടുത്ത് പറയേണ്ട മികവ് കാഴ്ചവെക്കുന്ന മികച്ച ത്രില്ലർ തന്നെയാണ് ലോഫ്ട്.

💢ചോദ്യോത്തരം എന്നതിൽ തുടങ്ങി പിന്നീട് പല സബ് പ്ലോട്ടുകളായി വിഘടിച്ച് പോവുന്നുണ്ട് കഥയുടെ ശൈലി. അവരിൽ അഞ്ച് പേരുടെയും ജീവിതം ഫ്‌ളാറ്റുമായും അവർക്ക് അറിയാവുന്ന ഓരോരുത്തരുമാണ് ബന്ധപ്പെട്ട് കിടക്കുന്ന വഴിയിലേക്ക് കൂടി നയിക്കുമ്പോൾ സംശയത്തിന്റെ ആധിക്യം കൂടുന്നു. എന്നാൽ ഇതൊക്കെ മറികടന്ന് ഒരു കിടിലൻ ട്വിസ്റ്റ് കരുതിവെച്ചിരിക്കുന്നതാണ് ഹൈലൈറ്റ്. ഒരിക്കലും പ്രതീക്ഷിച്ചില്ല അത്തരത്തിൽ ഒന്ന്.

🔻ＦＩＮＡＬ ＶＥＲＤＩＣＴ🔻

സീറ്റ് എഡ്ജ് ത്രില്ലർ എന്നൊക്കെ വിശേഷിപ്പിക്കാവുന്ന, ആകാംഷയുടെ മുൾമുനയിൽ നിർത്തുന്ന, തകർപ്പൻ ത്രില്ലർ. ത്രില്ലർ പ്രേമികൾക്ക് ഒരു വിരുന്ന് തന്നെയാണെന്നതിൽ യാതൊരു സംശയവുമില്ല. ധൈര്യസമേതം സമീപിക്കാം ലോഫ്റ്റിനെ.

ＭＹ ＲＡＴＩＮＧ :: ★★★★☆