Abeed Azad

ഞാൻ കാത്തിരിപ്പ് തുടങ്ങിയിട്ട് 10 വർഷം ആയിട്ടില്ല. എങ്കിലും അഞ്ച് വർഷത്തിന് മുകളിലായി. കാരണം മാർവൽ സിനിമകൾ കണ്ടുതുടങ്ങിയത് ആ സമയത്താണ്. ഈ സിനിമയെ പറ്റി അറിഞ്ഞപ്പോൾ തന്നെ ആദ്യദിനം കാണണം എന്ന് മനസ്സിൽ ഉറപ്പിച്ചിരുന്നു. എന്നാൽ ബുക്കിങ്ങ് തുടങ്ങിയ കാര്യം അറിയാൻ വൈകിയതിനാൽ ആദ്യദിനം ടിക്കറ്റ് കിട്ടിയില്ല. ആ സമയത്താണ് പാൻ സിനിമാസിൽ പെട്ടെന്നൊരു ഷോ ബുക്കിങ്ങ് തുടങ്ങിയത്. അത് കൊണ്ട് മാത്രം ടിക്കറ്റ് കിട്ടി. അങ്ങനെ പടംകാണാൻ തുടങ്ങി...


💢തോർ റഗ്നറോക്ക് എവിടെ തീർന്നോ അവിടെ നിന്നാണ് ഇൻഫിനിറ്റി തുടങ്ങുന്നത്. ലോകം മുഴുവൻ തന്റെ കാൽക്കീഴിലാക്കാൻ, ഓരോ മനുഷ്യജീവനും തന്റെ കൈവെള്ളയിലാക്കാൻ ആറ് ഇൻഫിനിറ്റി സ്റ്റോണുകളും തേടിയിറങ്ങുന്ന താനോസ്. ഭൂമിയിൽ നാശം വിതക്കുന്നതിന് മുമ്പ് താനോസിനെ തടയാനെത്തുന്ന അവഞ്ചേഴ്സ്. അവിടെ തുടങ്ങുന്നു നായകനും വില്ലനും തമ്മിലുള്ള പോരാട്ടം. അല്ല, ആശയങ്ങളാൽ നായകനും വില്ലനും ആയവരുടെ പോരാട്ടം.

💢ആദ്യം തന്നെ പറയട്ടെ. It Was An Epic Experience. എത്ര നാൾ കാത്തിരുന്നുവോ, എത്ര ഹൈപ്പ് ഉണ്ടായിരുന്നോ, എന്തൊക്കെ പ്രതീക്ഷകൾ ഉണ്ടായിരുന്നോ, അതിനോടെല്ലാം പൂർണ്ണമായും, അല്ലെങ്കിൽ അതുക്കും മേലെ നീതി പുലർത്തിയ ചിത്രം. ക്ലാസ്സിന് ക്ലാസ്സും മാസിന് മാസ്സും ഇമോഷണൽ സീക്വൻസുകളും ഒന്നൊന്നര ആക്ഷൻ രംഗങ്ങളും ഒരുകെട്ട് രോമാഞ്ചിഫിക്കേഷൻ സീനുകളും സംഗമിക്കുന്ന അപൂർവ്വ സിനിമകളിൽ ഒന്ന്.

💢ഒരു സൂപ്പർ ഹീറോ മൂവി എന്നതിലുപരി മറ്റെന്തൊക്കെയോ പകർന്നുതന്ന മികച്ച ചിത്രം. മാർവൽ സിനിമകളിൽ ഏറ്റവും മികച്ചതെന്ന് സംശയമില്ലാതെ പറയാൻ സാധിക്കും. കാരണം അതിന്റെ തിരക്കഥയും അവതരണവും തന്നെ. ഭൂരിഭാഗം കഥാപാത്രങ്ങളും ഒരേ സ്‌ക്രീനിൽ വരുന്നത് തന്നെ വെല്ലുവിളിയാണ് എന്ന കാര്യത്തിൽ സംശയമില്ല. എന്നാൽ ആ വെല്ലുവിളിയെ മറികടന്ന് അത് പ്രാവർത്തികമാക്കിയത്തിലാണ് സ്റ്റാൻ ലീയുടെയും റൂസോ ബ്രദേഴ്സിന്റെയും കരവിരുത് പ്രകടമാവുന്നത്. ചിലരുടെ റോളുകളിൽ ചെറിയ അളവിൽ ഏറ്റക്കുറച്ചിലുകൾ ഉണ്ടെന്നല്ലാതെ മറ്റൊരു കുഴപ്പവും അവരെ അണിനിരത്തിയതിൽ തോന്നിയില്ല. അപാര സ്‌ക്രീൻ പ്രെസൻസിൽ തിളങ്ങി നിൽക്കുകയായിരുന്നു ഭൂരിഭാഗവും. അത് കൃത്യമായി ബാലൻസ് ചെയ്തതിൽ കയ്യടി അർഹിക്കുന്നുണ്ട്.

💢ആദ്യമായാണ് ഹീറോകളെക്കാൾ കൂടുതൽ ഒരു വില്ലനായി കയ്യടിക്കുന്നത്. മാർവൽ സിനിമകളിൽ ശക്തനായ വില്ലനില്ല എന്ന അപവാദം തിരുത്തിക്കുറിച്ചുകൊണ്ടാണ് താനോസ് അണ്ണന്റെ വരവ്. ഇജ്ജാതി വില്ലൻ..!! ഹീറോസൊക്കെ വെറും ശിശുക്കളായ നിമിഷം. തിരമാല കണക്കെ എല്ലാവരെയും ഒരുപോലെ വിഴുങ്ങിയ അമാനുഷികൻ. ജോക്കറിന് ശേഷം ഏറ്റവും കൂടുതൽ ഇഷ്ടം പിടിച്ചുപറ്റിയ വില്ലനായി താനോസ്. അതോടൊപ്പം തന്നെ ഒരു ഘട്ടത്തിൽ കണ്ണ് നിറയ്ക്കുകയും ചെയ്തു. ആശയപരമായി പലപ്പോഴും താനോസിനോട് യോജിക്കേണ്ടി വരുന്നുണ്ട് ചില കാര്യങ്ങൾ ഓർക്കുമ്പോൾ. നന്മ തന്നെയാണ് താനോസിന്റെയും ലക്ഷ്യമെങ്കിലും അത് നടപ്പിലാക്കുന്ന രീതിയിലെ വിയോജിപ്പുകളാണ് അദ്ദേഹത്തെ വില്ലനാക്കുന്നത്.  താനോസിന്റെ കൂടെയുള്ള വില്ലന്മാരും കിടിലനായിരുന്നു. നായകന്മാരെ കവച്ചുവെക്കുന്ന പവറുകൾ കൊണ്ട് വിസ്മയിപ്പിച്ചു പലരും.

💢ഇനി അവഞ്ചേഴ്‌സിലേക്ക് വന്നാൽ കയ്യടികളും ആർപ്പുവിളികളും ഏറ്റവും കൂടുതൽ നേടിയത് തോർ ആണെന്ന് നിസ്സംശയം പറയാം. അജ്ജാതി സെക്കന്റ് ഇൻട്രോ ആയിരുന്നു പുള്ളിയുടേത്. തീയേറ്റർ അക്ഷരാർത്ഥത്തിൽ പൂരപ്പറമ്പായി. കൂടെ ക്യാപ്റ്റന്റെ ഇന്ട്രോയും കിടിലൻ ലുക്കും. എന്നാൽ അതിന് ശേഷം കാര്യമായി ഒന്നും ചെയ്യാനില്ലാത്തത് പോലെ തോന്നി. അതൊരിക്കലും ഒരു നെഗറ്റിവ് അല്ല. ഇതൊരു തുടക്കം മാത്രമാണ്. കയ്യടി നേടിയ സീനുകൾ ഒട്ടനവധി ഉണ്ടെങ്കിലും അവയേക്കാൾ ഓർമ്മയിൽ നിൽക്കുക ഇമോഷണൽ സീനുകളാണ്. കാരണം ഇത്തരമൊരു സിനിമയിൽ നിന്ന് തീരെ പ്രതീക്ഷിച്ചതല്ല അത്തരത്തിലെ ട്രീറ്റ്മെന്റുകൾ. എന്നാൽ അവ വന്നപ്പോൾ അതിഗംഭീരമായി സംയോജിപ്പിച്ചു എന്ന് പറയാതെ വയ്യ.

💢കോരിത്തരിപ്പുകളും ആർപ്പുവിളികളും തുടർന്നുകൊണ്ടേയിരുന്നപ്പോഴാണ് ട്രെയിലർ ഇറങ്ങിയപ്പോഴുള്ള ആ ചർച്ചക്ക് ഉത്തരം കിട്ടിയത്. ആരൊക്കെയാവും നമ്മെ വിട്ട് പിരിയുക. സത്യത്തിൽ അതിന് ഉത്തരം കിട്ടിയ സാഹചര്യത്തിൽ പിൻ ഡ്രോപ്പ് സൈലൻസ് ആയിരുന്നു തീയേറ്റർ മുഴുവൻ. ഞെട്ടിത്തരിച്ച് ഇരുന്നുപോയ നിമിഷങ്ങൾ. ഒരിക്കലും പ്രതീക്ഷിച്ചില്ല ഇങ്ങനെയൊരു അന്ത്യം. ചങ്ക് പറിയണ വേദന..എന്നാലും സ്റ്റാൻ ലീ ഇത് കുറച്ച് കടന്ന കൈ ആയിപ്പോയി..!!

💢സിനിമ തീർന്ന എന്റെ ക്രെഡിറ്റ്സും കഴിഞ്ഞ് ഏതാണ്ട് പത്ത് മിനിറ്റ് ആയതിന് ശേഷമാണ് പോസ്റ്റ് ക്രെഡിറ്റ് സീന്റെ വരവ്. എന്താണെന്നറിയില്ല വല്ലാതെ ഇഷ്ടപ്പെട്ടു ആ സീൻ. അവസാനത്തെ ആ പഞ്ചും എന്റിങ്ങും ഒരു പ്രതീക്ഷ നൽകി. അടുത്ത ഭാഗങ്ങൾക്കും സീക്വൻസിനുമായുള്ള കട്ടക്കാത്തിരിപ്പിന് അവിടെ തുടക്കം കുറിച്ചു.

💢മാർവൽ സിനിമകൾ ഇതുവരെ കാണാത്തവർക്കും ഏതാണ്ട് ഭൂരിഭാഗവും ഈ സിനിമ കണ്ടാലും മനസ്സിലാവുമെങ്കിലും ഞാൻ അത് പ്രോത്സാഹിപ്പിക്കില്ല. കാരണം കഥാപാത്രങ്ങളുമായി ഒരു ഇമോഷണൽ അറ്റാച്ച്മെന്റ് ഉണ്ടെങ്കിൽ മാത്രമാണ് ഇൻഫിനിറ്റി വാർ കൂടുതൽ ആസ്വാദ്യകരമാവുക. അങ്ങനെ മാത്രം കാണാൻ ശ്രമിക്കുന്നതാവും കൂടുതൽ നല്ലത്.

💢ആഗ്രഹിച്ച പല കഥാപാത്രങ്ങളും സ്‌ക്രീനിൽ വന്നില്ലെങ്കിലും അടുത്ത ഭാഗത്തിൽ എല്ലാവരെയും കാണാൻ സാധിക്കും എന്നൊരു വിശ്വാസം മനസ്സിലുണ്ട്. അത് അങ്ങനെ തന്നെയാവാണെ എന്നാണ് പ്രാർത്ഥനയും.

🔻ＦＩＮＡＬ ＶＥＲＤＩＣＴ🔻

സൂപ്പർ ഹീറോ മൂവികളിൽ നിന്ന് എന്ത് പ്രതീക്ഷിക്കുന്നുവോ അതിനും മുകളിൽ പല അനുഭവങ്ങൾ പ്രദാനം ചെയ്യുന്ന അതിഗംഭീരം സിനിമ. ആക്ഷൻ രംഗങ്ങളും നർമ്മങ്ങളും ഇമോഷണൽ സീക്വൻസുകളും രോമാഞ്ചം നൽകുന്ന ഒരുകെട്ട് സീനുകളുമൊക്കെയായി ഒരു ഫുൾ പാക്കേജ്. അകെമൊത്തത്തിൽ

Its worth the wait, its worth the hype, and its worth a watch..!!

എന്ന് ഇനിയും തീയേറ്ററിൽ തന്നെ പോയി കാണണം എന്ന കട്ട ആഗ്രഹത്തോടെ ഇറങ്ങിയ ഒരു മാർവൽ ഫാൻ. ഒരിക്കലും തീയേറ്ററിൽ നിന്ന് ഒഴിവാക്കാൻ പാടില്ലാത്ത വിസ്മയമാണ് ഈ യുദ്ധം. ആശയങ്ങളുടെയും ആദർശങ്ങളുടെയും യുദ്ധം എന്ന് പറയുന്നതാണ് എനിക്ക് കൂടുതൽ ഇഷ്ടം.

MY RATING :: ★★★★★

💢പൂർണ്ണ ഗർഭിണിയായ ഭാര്യയോടൊപ്പം ബെയ്‌റൂട്ട് നഗരത്തിലാണ് ടോണിയുടെ
താമസം. കലാപങ്ങൾക്കും യുദ്ധങ്ങൾക്കും ഒരു ശമനമായ സമയത്ത് ഒരു കാർ വർക്ക്ഷോപ്പ് നടത്തിവരികയാണ് ടോണി. അവിഡ് അടുത്ത് തന്നെ പുനർനിർമ്മാണ ജോലികൾ ഏറ്റെടുത്ത് നടത്തുന്ന കമ്പനിയിലെ ഫോർമാനായി ജോലി ചെയ്യുകയാണ് യാസിർ. ഫ്‌ളാറ്റിന് പുറത്തേക്ക് വെള്ളം ഒഴുകുന്ന പൈപ്പിന്റെ തെറ്റായ നിർമ്മാണം മൂലം ജനങ്ങൾക്ക് ബുദ്ധിമുട്ടുണ്ടാക്കുന്ന വിവരം ടോണിയെ ധരിപ്പിച്ച യാസിറിന് പ്രകോപനപരമായ രീതിയിലുള്ള പ്രതികരണമാണ് ലഭിച്ചത്. അത് തനിയെ നന്നാക്കാൻ ശ്രമിച്ച യാസിറിന് മുൻശുണ്ഠിക്കാരനായ ടോണിയിൽ നിന്ന് മോശം പ്രതികരണവും കേൾക്കാനിടയായി. ക്രമേണ അവർ തമ്മിലുള്ള വഴക്കിന്റെ തോത് വർധിക്കുന്നു. കയ്യാങ്കളിയിൽ വരെ എത്തിയ കലഹം പിന്നീട് അതിരുകൾ ഭേദിച്ച് മറ്റൊരു തലത്തിലേക്ക് ഉയരുന്നു.

💢ലോകത്ത് ഏറ്റവും സങ്കീർണ്ണമായ ഒന്നാണ് മനുഷ്യമനസ്സ്. ഒരാൾ എപ്പോൾ എവിടെ എന്ത് ചെയ്യുമെന്ന് പ്രവചിക്കാൻ ആ വ്യക്തിക്ക് പോലും സാധ്യമല്ല. പരിണിതഫലങ്ങൾ എന്താണെന്ന് പോലും ആലോചിച്ചെടുക്കാൻ കഴിയാത്തത്ര വേഗത്തിലായിരിക്കും അയാളുടെ പ്രവൃത്തി.

💢ലെബനനിലെ നാൽപ്പത് ശതമാനത്തോളം വരുന്ന ക്രിസ്ത്യൻ സമുദായക്കാരിൽ ഒരുവനാണ് ടോണിയും. യാസിറാവട്ടെ പലസ്തീനിൽ നിന്ന് കുടിയേറി പാർത്ത് ജനസംഖ്യയുടെ പത്ത് ശമാനത്തോളം വരുന്നവരിൽ ഒരുവനും. ആ ചെറിയ കലഹം അവരിൽ ഉണർത്തിയത് അത്രനാൾ മനസ്സിൽ ഉറങ്ങിയിരുന്ന സ്പർദ്ധയായിരുന്നു. തങ്ങളുടെ രാജ്യത്ത് നടന്ന കലാപങ്ങളിൽ അവിടുത്തെ ജനങ്ങളുടെ മനസ്സിലും പകയുടെ, പ്രതികാരത്തിന്റെ പുക നീറുന്നുണ്ടായിരുന്നു. എത്ര കെട്ടടങ്ങിയെന്ന് പറഞ്ഞാലും തികട്ടി വരുന്ന ആ ചിന്തകളും ഓർമ്മകളും പലപ്പോഴും അവരിൽ വിധ്വെഷം നിറച്ചു. അതിന്റെ അനന്തരഫലങ്ങൾ അവരുടെ നിയന്ത്രണത്തിനുമപ്പുറം കലാശിച്ചു.

💢ഒരു തീന്മേശയിലിരുന്ന് പറഞ്ഞ് പരിഹരിക്കാമായിരുന്ന ആ പ്രശ്നം പിന്നീട് കോടതിമുറികളിലേക്കും അവിടുന്ന് തെരുവുകളിലേക്കും പടരാൻ സമയമധികം വേണ്ടിയിരുന്നില്ല. യുദ്ധത്തിന് ശമനമായെങ്കിലും ജനമനസ്സുകളിൽ പക കെട്ടടങ്ങിയിരുന്നില്ല. യുദ്ധത്തിൽ അവരനുഭവിച്ച ദുഃഖങ്ങളും ദുരിതങ്ങളും അവരെ നിരന്തരം വേട്ടയാടിക്കൊണ്ടിരുന്നു. അതുകൊണ്ടാണ് രണ്ട് വ്യക്തികൾ തമ്മിലുണ്ടായ കലഹം കാട്ടുതീ കണക്കെ രാജ്യം മുഴുവൻ പടർന്നത്. ഒരു ജനതയെ തന്നെ അവ ബാധിച്ചത്.

💢ഒരുപക്ഷെ ലോകത്തുടനീളം പ്രസക്തിയുള്ള പ്രമേയത്തിന്റെ അതിഗംഭീരമായ ആവിഷ്കാരമാണ് ചിത്രം. മാനുഷികവികാരങ്ങളുടെ ചാഞ്ചാട്ടങ്ങളും ദുർവാശികളുമൊക്കെ അങ്ങേയറ്റം ഗാംഭീര്യത്തോടെ തന്നെ അവതരിപ്പിച്ചിട്ടുണ്ട് സംവിധായകൻ. പതിയെ തുടങ്ങി കത്തിക്കയറുന്ന സിനിമ പിന്നീട് സഞ്ചരിക്കുന്നത് മറ്റൊരു തലത്തിലാണ്. രണ്ട് മനസ്സുകളിൽ നിന്ന് തുടങ്ങി അത് പകരുന്നത് രണ്ട് ജനതകളിലേക്കാണ്. അതൊക്കെ വളരെ മികവുറ്റ രീതിയിൽ തയ്യാറാക്കിയിട്ടുണ്ട്.കോർട്ട് റൂമുകളിലുള്ള നിലപാടുകളുടെ ചർച്ചകൾ വളരെ മിതത്വത്തോടെ കൈകാര്യം ചെയ്തിട്ടുണ്ട്. ഒരു നിമിഷം പോലും ശ്രദ്ധ മറ്റൊന്നിലേക്ക് പോവാതെ പിടിച്ചിരുത്തുന്ന അനുഭവം പ്രധാനം ചെയ്യുന്നു ഈ ഇൻസൾട്ട്.

💢താരങ്ങളുടെ ഗംഭീര പ്രകടനം മറ്റൊരു പ്രധാന ഘടകമാണ്. തങ്ങളുടെ വേഷങ്ങളിൽ ജീവിക്കുകയായിരുന്നു മുൻനിര കഥാപാത്രങ്ങൾ. പ്രശംസകൾ അർഹിക്കുന്നത് തന്നെ അവർ. കൂടെ മികവുറ്റ ഛായാഗ്രഹണവും എടുത്ത് പറയേണ്ടത് തന്നെ.

സാർവ്വലൗകികമായി ചർച്ച ചെയ്യപ്പെടേണ്ട അതീവ പ്രാധാന്യമുള്ള പ്രമേയത്തിന്റെ അതിഗംഭീരം ആവിഷ്കാരമാണ് ഈ ചിത്രം. അവാർഡ് നിശകളിലും ഫിലിം ഫെസ്റ്റുകളിലും നിറഞ്ഞാടിയ ചിത്രം കണ്ടിരിക്കേണ്ട ചിത്രങ്ങളുടെ കൂട്ടത്തിൽ പെടുത്തേണ്ടതാണ്. മാനസികപിരിമുറുക്കത്തോടെയല്ലാതെ കണ്ടുതീർക്കാൻ സാധിക്കില്ല ഈ ചിത്രം.

MY RATING :: ★★★★½

"ഫോണുകളാൽ തകർക്കപ്പെടുന്ന ബന്ധങ്ങളും വിശ്വാസങ്ങളും"


💢ഏഴ് സുഹൃത്തുക്കൾ അന്ന് അത്താഴത്തിനായി കൂടുകയാണ്. പണ്ട് മുതലേ പരസ്പരം അറിയാമായിരുന്ന അവർ വീണ്ടും കൂടുമ്പോൾ വിരസമായ ഒരു രാത്രിയാവാൻ ആരും ആഗ്രഹിച്ചിരുന്നില്ല. അതുകൊണ്ട് തന്നെ വ്യത്യസ്തമായ എന്തെങ്കിലും പദ്ധതികൾ കൂടി ആസൂത്രണം ചെയ്യണമെന്ന ആഗ്രഹവും പലർക്കും ഉണ്ടായിരുന്നു. ഒടുവിൽ അവർ ഒരു തീരുമാനത്തിലെത്തി.

എല്ലാവരും അവരുടെ ഫോണുകൾ തീന്മേശയിൽ വെക്കുക. അതിനുശേഷം വരുന്ന കോളുകളും മെസേജുകളും കേൾക്കുക ഫോണിന്റെ ഉടമസ്ഥൻ മാത്രമായിരിക്കില്ല. അവർ ഏഴ് പേർക്കും അത് സ്വന്തമാണ്. വ്യവസ്ഥിതികളും നിയമങ്ങളും മുന്നോട്ട് നിരത്തി കളി ആരംഭിക്കുന്നു. എന്നാൽ ആ കളി അവർക്ക് തിരിച്ചടിയാവാൻ അധികം സമയം വേണ്ടിവന്നില്ല.

💢ഒരുപക്ഷെ ഇന്ന് ജീവിതത്തിൽ നിന്ന് ഒഴിച്ചുകൂടാൻ പറ്റാത്ത അഭിവാജ്യ ഘടകമായി മാറിയിരിക്കുകയാണ് മൊബൈൽ ഫോണും ഇന്റർനെറ്റും. വായുവും വെള്ളവും ഭക്ഷണവും പോലെ തന്നെ ഒന്ന്. പല ഗുണങ്ങളും വിളമ്പാൻ സാധിക്കുമെങ്കിലും അതിനേക്കാൾ കൂടുതൽ ദോഷങ്ങളും അവ മൂലം സംഭവിക്കുന്നുണ്ട് എന്നത് മറ്റൊരു വശം. ശാരീരികമായും മാനസികമായും പല ദോഷങ്ങളും ജീവിതത്തിൽ സംഭവിക്കുന്നുണ്ട്. എന്നാൽ തിരിച്ചറിയുന്നില്ല, അല്ലെങ്കിൽ വകവെക്കുന്നില്ല എന്ന് മാത്രം.

💢ചെറുപ്പം മുതൽ തന്നെ പരസ്പരം അറിയാവുന്നവർ ആയിട്ട് കൂടി അവർ തമ്മിലുള്ള അകലവും രഹസ്യങ്ങളും ഈ ഫോണിനുള്ളിലാണ്. ഒരുപക്ഷെ വലുതായിരുന്നു അവരുടെ ലോകവും മനസ്സും ഇടുങ്ങിയതാക്കാൻ ഫോണുകൾ പ്രധാന പങ്ക് വഹിച്ചിരുന്നു. ആ ഒരു കളിയിലൂടെ പുറത്ത് വന്നത് അവർ പോലും പ്രതീക്ഷിക്കാത്ത പല രഹസ്യങ്ങളും ഞെട്ടിപ്പിക്കുന്ന വിവരങ്ങളുമാണ്. ഒരുപക്ഷെ അത്രനാളെത്തെ അവരുടെ സൗഹൃദവും മനസ്സിന്റെ ഒരുമയും പൊടുന്നനെ നിഷ്പ്രഭമാക്കിയ വിവരങ്ങൾ.

💢വളരെ സരസമായി തുടങ്ങുന്ന ചിത്രം ഏതാണ്ട് ഭൂരിഭാഗവും അങ്ങനെ തന്നെ പോവാനാണ് ശ്രമിച്ചിട്ടുള്ളത്. ആകാംഷ നിലനിർത്തുന്ന ഭാഗങ്ങൾ വരുമ്പോഴും ചിലയിടങ്ങളിൽ അങ്ങനെയാവുന്നുണ്ട് ചിത്രം. അതൊരിക്കലും ഒരു കുറവല്ല. ഒരുപക്ഷെ കാണികളുടെ ജീവിതവുമായി പലപ്പോഴും റിലേറ്റ് ചെയ്യാവുന്ന, അല്ലെങ്കിൽ ഭാവിയിൽ റിലേറ്റ് ചെയ്യപ്പെട്ടേക്കാവുന്ന സന്ദർഭങ്ങളും ഉണ്ട്. അത് തന്നെയാണ് ഏറ്റവും മികച്ച് നിൽക്കുന്ന ഘടകവും. ഒരു നിമിഷം പോലും വിരസത നൽകാത്ത നല്ലൊരു അനുഭവം സമ്മാനിക്കുന്നു ചിത്രം.

🔻ＦＩＮＡＬ ＶＥＲＤＩＣＴ🔻

കേൾക്കുമ്പോൾ തന്നെ കൗതുകം തോന്നുന്ന പ്ലോട്ടും അതിന്റെ മികവുറ്റ ആവിഷ്‌കാരവും. ഉറ്റ സുഹൃത്തുക്കൾ എന്ന് വിശ്വസിച്ചിരുന്നവർ പോലും തീർത്തും അപരിചിതരായി മാറുന്ന കാലമാണ് ഈ യുഗം. അത് വളരെ ഗംഭീരമായി അവതരിപ്പിച്ചിരിക്കുന്നു സംവിധായകൻ. തീർച്ചയായും കണ്ടിരിക്കാവുന്ന ഒന്നായി മാറുന്നു ഈ കളിയും.

MY RATING :: ★★★½

"അന്തരീക്ഷത്തിൽ തന്നെ ദുരൂഹത നിറക്കുന്ന ത്രില്ലർ"


💢രണ്ട് പെൺകുട്ടികളുടെ തിരോധാനം. അതായിരുന്നു അവരെ ആ നാട്ടിലേക്ക് വരാൻ പ്രേരിപ്പിച്ചത്. വിപരീതസ്വാഭാവമുള്ള ഡിറ്റക്റ്റീവുകളായ ജുവാനും പെഡ്രോയും ആ കേസന്വേഷണം ഏറ്റെടുത്ത് വരുമ്പോൾ മുമ്പിലുള്ളവരെയെല്ലാം സംശയത്തിന്റെ നിഴലിൽ നിർത്തേണ്ട അവസ്ഥയായിരുന്നു. കാരണം ആ നാട്ടിൽ ദുരൂഹതകൾ ഏറെയാണ്.

സാങ്കേതികവിദ്യകൾ പേരിന് പോലും കണ്ടെത്താത്ത കാലത്ത് കേസന്വേഷണം തീർത്തും ദുർഘടം പിടിച്ച ജോലിയായിരുന്നു.എങ്കിലും മുന്നിട്ടിറങ്ങിയ അവർക്ക് പിന്നീട് കാണേണ്ടി വന്നത് ഞെട്ടിക്കുന്ന സംഭവങ്ങളും വിവരങ്ങളുമാണ്.

💢തുടക്കം മുതൽ തന്നെ ഡാർക്ക് മൂഡ് സൃഷ്ടിച്ചാണ് ചിത്രം മുന്നേറുന്നത്. പതിഞ്ഞ താളമാണെങ്കിലും പ്രേക്ഷകനെ പിടിച്ചിരുത്തുന്ന നിഗൂഡതയുണ്ട് കഥാസന്ദർഭങ്ങളിൽ. ഉള്ളിൽ ഒരുതരം ഭയം ഉണർത്തി കഥ പറഞ്ഞുപോവുന്ന രീതി. അത് തന്നെയാണ് ചിത്രത്തിന്റെ ഏറ്റവും മികച്ച ഘടകവും.

💢കഥാപാത്രങ്ങളിൽ സൃഷ്ടിക്കുന്ന ഒരുതരം മറയുണ്ട്. അവസാനം വരെ ദുരൂഹത നിറക്കുന്നുണ്ട് അവ. ഓരോ സന്ദർഭങ്ങൾ കഴിയുന്തോറും മനസ്സിൽ സംശയങ്ങളും കൂടിക്കൂടി വന്നേക്കും.അത്ര ലയിപ്പിച്ച് ഇരുത്തുന്നുണ്ട് ചിത്രം. കൂടെ 1980കളുടെ മികച്ച പുനരാവിഷ്കാരവും കൂടിയാവുമ്പോൾ എല്ലാ അർത്ഥത്തിലും ഇഷ്ടം പിടിച്ചുപറ്റുന്ന ത്രില്ലറാവുന്നു മാർഷ്‌ലാൻറ്.

🔻ＦＩＮＡＬ ＶＥＲＤＩＣＴ🔻

ത്രില്ലർ പ്രേമികൾക്ക് ഒരു വിരുന്ന് തന്നെയാണ് ഈ ചിത്രം. സസ്‌പെൻസും ദുരൂഹതയും കഥാപാത്രങ്ങളുടെ വിവരണവുമൊക്കെ ഗംഭീരമെന്നേ പറയാനുള്ളൂ. തീർച്ചയായും കണ്ടിരിക്കേണ്ട ചിത്രങ്ങളുടെ കൂട്ടത്തിൽ ഈ സിനിമയും സ്ഥാനം പിടിക്കുന്നു. സ്ലോ പോയിസൺ എന്നൊക്കെ തെറ്റാതെ വിളിക്കാൻ പറ്റിയ വിസ്മയിപ്പിക്കുന്ന ചിത്രം

MY RATING :: ★★★★☆

💢P.T Barnum. Barnum  & Bailey Circus തുടങ്ങിവെച്ച അമേരിക്കയിലെ ഷോമാൻ. പല കുറവുകളുടെയും പേരിൽ സമൂഹത്തിൽ പാർശ്വവത്കരിക്കപ്പെട്ടവരെ സ്വരൂപിച്ച് അവരുടെ കഴിവുകളെ മനസ്സിലാക്കി സ്റ്റേജിൽ അണിനിരത്തിയ വ്യക്തി. അദ്ദേഹത്തിന്റെ ജീവിതകഥയാണ് "The Greatest Showman"

💢11 ഗാനങ്ങൾ അടങ്ങിയിരിക്കുന്ന ചിത്രം ഒരു മ്യൂസിക്കൽ ഡ്രാമയായിട്ടാണ് ഒരുക്കിയിരിക്കുന്നത്. അദ്ദേഹത്തിന്റെ ചെറുപ്പകാലം മുതൽ കഥ പറഞ്ഞുവരുന്നു ചിത്രം പലയിടങ്ങളിലും ഊഹിക്കാമെങ്കിലും ഒരു നിമിഷം പോലും കണ്ണെടുക്കാൻ സാധിക്കാത്തവണ്ണം ഗംഭീരമായി ആവിഷ്കരിച്ചിരിക്കുകയാണ് തന്റെ ആദ്യ ചിത്രത്തിൽ സംവിധായകൻ. തന്റെ സ്വപ്നസാക്ഷാത്കാരത്തിനായി ബർണം എടുക്കേണ്ടി വരുന്ന പ്രയത്നങ്ങളും പിന്തുണയുമായി നിൽക്കുന്ന കുടുംബവുമൊക്കെ ചിത്രത്തിലെ കാഴ്ചകളാവുന്നു.

💢La La Landന് വേണ്ടി ഗാനങ്ങൾ ഒരുക്കിയ, ഓസ്‌ക്കാർ ജേതാക്കളായ Benj Pasek, Justin Paul എന്നിവർ ചേർന്നൊരുക്കിയ ഗാനങ്ങളുടെ മികവ് പറഞ്ഞറിയിക്കാൻ പറ്റാത്തത്ര ഉയരത്തിലാണ്. അതിനോടൊപ്പം കൊറിയോഗ്രഫിയിലെ വശ്യത കൂടിയാവുമ്പോൾ ഗംഭീരമായ അനുഭവമാകുന്നു ചിത്രം. കൂടെ മികച്ച പ്രകടനങ്ങളും പിന്തുണ നൽകുന്നു. വിഷ്വലുകൾ പുലർത്തുന്ന മികവ് സ്‌ക്രീനിൽ നിന്ന് കണ്ണെടുക്കാൻ തോന്നാത്ത വിധം പിടിച്ചിരുത്തുന്നുണ്ട്.

🔻ＦＩＮＡＬ ＶＥＲＤＩＣＴ🔻

പുതുഅനുഭവം ആയേക്കാവുന്ന സുന്ദരമായ ചിത്രം. കണ്ണിനും കാതിനും ഒരുപോലെ കുളിരേകുന്ന ഗാനങ്ങളും അതിനൊപ്പം നിൽക്കുന്ന വിഷ്വലുകളും ചിത്രത്തിന്റെ മാറ്റ് കൂട്ടുന്നു. ഒരിക്കലും മതിവരാത്ത ഗംഭീരമായ അനുഭൂതി സമ്മാനിക്കുന്നു ബർണമും കൂട്ടരും. ഒന്നിൽ കൂടുതൽ തവണ നമ്മെ കാഴ്ചക്കാരാക്കാൻ കെല്പുണ്ട് ഈ ചിത്രത്തിന്

MY RATING :: ★★★★☆

💢പോലീസിനാൽ വേട്ടയാടപ്പെടുകയാണ് ആഞ്ചലോ. താൻ പല കാര്യങ്ങളും രഹസ്യമായി സൂക്ഷിച്ചിരുന്ന വെച്ചിരുന്ന വാലറ്റിനെ തിരയുകയാണ് അവർ. എന്നാൽ തന്നെ പിന്തുടരുന്നവരിൽ  നിന്ന് രക്ഷപ്പെടാനുള്ള പരക്കം പാച്ചിലിനിടയിൽ ആഞ്ചലോക്ക് ആ വാലറ്റ് നഷ്ടപ്പെടുന്നു. അത് എത്തിച്ചേരുന്നതാവട്ടെ ചേരിയിൽ താമസിക്കുന്ന 14 വയസ്സുകാരൻ റാഫേലിന്റെ കയ്യിലും.

അതെന്താണെന്ന് അറിയാനുള്ള ത്വര റാഫേലിൽ അത് കിട്ടിയപ്പോൾ മുതൽ ഉടലെടുക്കുന്നു. അതിനായി രണ്ട് സുഹൃത്തുക്കളും അവനൊപ്പം ചേരുന്നു. എന്നാൽ ആ അന്വേഷണം അവരെ എവിടെക്കൊണ്ടാണ് എത്തിച്ചത്.? ആ വാലറ്റിലെ രഹസ്യങ്ങൾ എന്തൊക്കെയാണ്.? കഥ പുരോഗമിക്കുന്നു.

💢സ്ലംഡോഗ് മില്ലിയണറിന്റെ  ബ്രസീലിയൻ പതിപ്പ്. ഒരുതരത്തിൽ അതാണ് ഈ ചിത്രം. ചേരിയിൽ നിന്ന് കഥ പുരോഗമിച്ച് പല കാര്യങ്ങളിലേക്കും വെളിച്ചം വീശുന്നുണ്ട് ചിത്രം. അധികാരികളുടെ ദുർനടപ്പും നിയമപാലകരുടെ കൊള്ളരുതായ്മയുമൊക്കെ പ്രതിപാദ്യവിഷയമാവുന്നു. അതോടൊപ്പം തന്നെ നല്ലൊരു ത്രില്ലർ കൂടിയാണ് ഒരുക്കിവെച്ചിരിക്കുന്നത്.

💢Rooney Mara ഒരു പ്രധാന വേഷം ചിത്രത്തിൽ കൈകാര്യം ചെയ്തിട്ടുണ്ട്. അതോടൊപ്പം കുട്ടികളായി അഭിനയിച്ചവരുടെ മികച്ച പ്രകടനവും ഹൈലൈറ്റാണ്. കൂടെ ചേരിദൃശ്യങ്ങളും വിശ്വസനീയമാംവിധം മികച്ച് നിൽക്കുന്നുണ്ട്. ഒരു ത്രില്ലറിന് വേണ്ടി എല്ലാ പിന്തുണകളും പശ്ചാത്തലസംഗീതത്തിലും ക്യാമറയിലും കാണാൻ സാധിക്കും.

സിനിമയുടെ അതെ പേരിലുള്ള നോവലിന്റെ മികച്ച ആവിഷ്കാരമാണ് ചിത്രം. അവാർഡ് നിശകളിലും ഫിലിം ഫെസ്റ്റുകളിലും പ്രകീർത്തിക്കപെട്ട ചിത്രം നല്ലൊരു ത്രില്ലർ അനുഭവം തന്നെ പ്രധാനം ചെയ്യുന്നു.

MY RATING :: ★★★½

"പണമില്ലാത്തവൻ പിണമാകുന്ന സമൂഹത്തിൽ സ്വപ്നസാക്ഷാത്കാരത്തിന്  പണത്തിനായി നെട്ടോട്ടം ഓടുന്നവർ"

"ഇറാനിയൻ സിനിമകൾ സ്ഥിരം പിന്തുടർന്നിരുന്ന ചട്ടക്കൂടിന് പുറത്ത് വരാൻ ശ്രമിച്ചപ്പോൾ "


🔻ＳＴＯＲＹ ＬＩＮＥ🔻

സമ്പന്നകുടുംബത്തിലെ അംഗമായ അതാഫെയും അവളുടെ ഏറ്റവും അടുത്ത സുഹൃത്ത് ഷിറീനിന്റെയും സ്വപ്‌നങ്ങൾ വളരെ വലുതാണ്. അവർ തമ്മിൽ വല്ലാത്ത ഒരിഷ്ടമുണ്ട്. രണ്ട് പേരുടെ ഇഷ്ടങ്ങളും അനിഷ്ടങ്ങളും ഒന്ന് തന്നെയാവുമ്പോൾ ഉടലെടുക്കുന്ന ഒന്ന്. ഇറാനിയൻ നിയമത്തിന്റെ പരിമിതികൾക്കുള്ളിലുള്ള ജീവിതത്തിൽ നിന്ന് പുറത്തുകടക്കാൻ വെമ്പൽ കൊള്ളുന്ന മനസ്സാണ് അവരുടേത്. അവരുടെ കഥയാണ് Circumstance.

ഇസ്‌ലാമിക ഭരണകൂടം അനുവദിച്ചിട്ടില്ലാത്ത ബന്ധം വെച്ചുപുലർത്താൻ താൽപര്യപ്പെടുന്ന ഇരുവരുടെയും ആഗ്രഹം എന്തിനും സ്വാതന്ത്ര്യമുള്ള ദുബായിയിലേക്ക് പറക്കാനാണ്. ആയിടെ അതാഫെയുടെ സഹോദരൻ, തന്റെ ലഹരി ഉപയോഗത്തിൽ നിന്ന് പൂർണ്ണ മോചനം നേടി കുടുംബത്തിലേക്ക് തിരിച്ചുവരുന്നു. എന്നാൽ ജീവിതങ്ങൾ പലപ്പോഴും തലകീഴായി മറിയുക അപ്രതീക്ഷിതമായിട്ടായിരുക്കും. അത് തന്നെ അവിടെയും സംഭവിച്ചു.

🔻ＢＥＨＩＮＤ ＳＣＲＥＥＮ🔻

Maryam Keshavarz - അഥവാ ചിത്രത്തിന്റെ സംവിധായിക ജനിച്ചുവളർന്നത് അമേരിക്കയിലാണ്. അതുകൊണ്ട് തന്നെ അവിടുത്തെ സ്വാതന്ത്ര്യവും സംസ്കാരവും നല്ല രീതിയിൽ സ്വാധീനിച്ചിട്ടുണ്ടെന്ന് വ്യക്തം. അങ്ങനെയൊരാൾ കുറച്ച് ദിവസം ഇറാനിൽ ചിലവഴിച്ചാൽ എന്താവും തോന്നുക. കിളിയെ കൂട്ടിലടച്ചത് പോലെ തോന്നിയേക്കാം. അത് തന്നെയാണ് ഈ ചിത്രം മനസ്സിൽ തെളിയാൻ കാരണമായതും. എന്നാൽ ആ ഉദ്യമം വിജയിക്കണമെങ്കിൽ പാലിക്കേണ്ട മിനിമം ചില ഉപാധികൾ ഉണ്ടാവില്ലേ. സാമാന്യബുദ്ധിയിൽ ചിന്തിച്ചാൽ മനസ്സിലാക്കാവുന്ന ചിലത്.

ഇറാനിയൻ സിനിമകളിൽ ഭൂരിഭാഗവും പ്രാദേശികമായ പ്രമേയങ്ങൾ കൈകാര്യം ചെയ്യുന്നവയാണ് കണ്ടിട്ടുള്ളവർക്ക് ബോധ്യമുള്ളതാണ്. അവ പൊതുവെ കൈകാര്യം ചെയ്യപ്പെട്ടുവരുന്ന ചട്ടക്കൂടുകളുണ്ട്. ആ ചട്ടക്കൂടിൽ പറയുന്ന കാര്യങ്ങൾ സുരക്ഷിതമാണെന്ന് മാത്രമല്ല, അതിന് കാണികളുമായി സംവദിക്കാനുള്ള ഇടവും ലഭിക്കുന്നുണ്ട്. എന്നാൽ ഈ ചിത്രത്തിന് നഷ്ടപ്പെട്ടതും ആ സംവാദനശേഷിയാണ്.

സ്വവർഗാനുരാഗികളും അതോടൊപ്പം പാട്ടിനെയും സ്വാതന്ത്ര്യത്തെയും ഇഷ്ടപ്പെടുന്ന രണ്ട് പെൺകുട്ടികളാണ് അതേഫായും ഷിറീനും.അവരെ കേന്ദ്രീകരിച്ചാണ് കഥ മുന്നോട്ട് പോവുന്നത്. എന്നാൽ പറയുന്ന കാര്യത്തിൽ സംവിധായികയുടെ അമേരിക്കൻ സംസ്കാരത്തിന്റെ കടന്നുകയറ്റമാണ് കാണാൻ സാധിക്കുക. അത് അവതരണത്തിൽ പാലിക്കേണ്ട മിതത്വത്തെ പാടെ അപഹരിക്കുന്നുമുണ്ട്. സ്വാതന്ത്ര്യം സൂചിപ്പിക്കാനായി പാർട്ടി നൈറ്റുകളും ലൈംഗികതയും ലഹരിയുമൊക്കെ കടന്നുവരുന്ന കാഴ്ചകൾ തീരെ വിശ്വാസയോഗ്യമല്ലാതാക്കി മാറ്റുന്നുണ്ട് സന്ദർഭങ്ങളെ. അവയുടെ അതിപ്രസരം ചിത്രത്തിലുടനീളം കാണാൻ സാധിക്കും.

യാഥാസ്ഥികകുടുംബത്തിൽ ജനിച്ച അതേഫായും സഹോദരനും സാഹചര്യങ്ങളാൽ സ്വഭാവവ്യതിയാനത്തിന് വിധേയമായവരാണ്. ലഹരിക്ക് അടിമയായിരുന്ന മെഹ്‌റാൻ അതിനെ തരണം ചെയ്ത ശേഷം എത്തുന്ന വേഷം ശ്രദ്ധേയമാണ്. എക്സ്ട്രീമിസ്റ് എന്ന് വിളിക്കാവുന്ന സ്വഭാവതലത്തിലേക്ക് രൂപാന്തരപ്പെട്ട് മെഹ്‌റാൻ ചെയ്യുന്ന പ്രവർത്തികൾക്കുള്ള പ്രത്യേക ഉദ്ദേശ്യമോ ന്യായീകരണമോ ചിത്രത്തിന് നല്കാനാവുന്നില്ല. പലയിടങ്ങളിലും ശൂന്യത അനുഭവിക്കുന്ന കഥാപാത്രമാണ് മെഹ്റാന്റേത്.

ചില ഡയലോഗുകൾ വിരൽചൂണ്ടുന്ന സമകാലീന കാര്യങ്ങളുണ്ട് ചിത്രത്തിൽ. അവ നല്ല രീതിയിൽ ചേർത്തുപറയുമ്പോഴും അടിസ്ഥാനപ്രമേയത്തിലെ അവതരണപ്പിഴവുകളും സിനിമാറ്റിക്ക് എലമെൻറ്സിന്റെ കൂട്ടിച്ചേർക്കലുകളും കാർന്നെടുത്തത് സിനിമയുടെ മൂല്യത്തെ തന്നെയാണ്. ഇതിലും നല്ല രീതിയിൽ, വളരെ സുന്ദരമായി, ഇതിലും ദുർഘടമായ സാഹചര്യങ്ങളിൽ ഇതേ പ്രമേയം അവതരിപ്പിച്ചിട്ടുള്ള ചിത്രങ്ങളുണ്ട്. സമൂഹത്തിൽ സ്ത്രീകൾക്ക് നൽകേണ്ട സ്വാതന്ത്ര്യവും ബഹുമാനവും മികച്ച ശൈലിയിൽ പറഞ്ഞിട്ടുള്ള "വാജ്ദ" പോലെയുള്ള ചിത്രങ്ങൾ തന്നെ അതിന് ഉദാഹരണം. ഇത്ര ബുദ്ധിമുട്ടി ചിത്രീകരിച്ച്, സംവദിക്കാൻ ആഗ്രഹിച്ച കാര്യം പൂർണ്ണമായും നിറവേറ്റാൻ കഴിയാതെ പോയത് ഖേദകരമായ കാഴ്ച തന്നെയാണ്.

ചിത്രീകരണസമയം തൊട്ട് തന്നെ വൻ വിവാദമായിരുന്നു ചിത്രം. ഇറാനിൽ ചിത്രീകരണം നടത്താൻ സാധിക്കാഞ്ഞതിനാൽ ലെബനനിലാണ് സിനിമ പൂർത്തിയാക്കിയത്‌. റിലീസിന് ശേഷം സിനിമക്കും അതുപോലെ സംവിധായികക്കും ഇറാനിൽ പ്രവേശനം നിരോധിച്ചതും ശ്രദ്ധേയമായിരുന്നു.

🔻ＦＩＮＡＬ ＶＥＲＤＩＣＴ🔻

നല്ലൊരു പ്രമേയത്തെ മോശം അനുഭവമാക്കി മാറ്റാൻ കഴിഞ്ഞു എന്നതിലാണ് ചിത്രം മുന്നിട്ട് നിൽക്കുന്നത്. റിയലിസ്റ്റിക്കായി അവതരിപ്പിച്ചിരുന്നെങ്കിൽ ശ്രദ്ധ നേടുമായിരുന്ന ചിത്രത്തെ അനാവശ്യവിവാദങ്ങളിലേക്കും ശ്രദ്ധ ആകർഷിക്കുന്നതിലേക്കും വേണ്ടി മാത്രം ഒരുക്കിയത് പോലെ തോന്നി പല വശങ്ങളും നോക്കുമ്പോൾ. ശരാശരി നിലവാരം മാത്രമുള്ള "അന്താരാഷ്‌ട്ര" ചിത്രം മാത്രമാവുന്നു circumstance. ചട്ടക്കൂട് പൊളിക്കലിന്റെ വിഫലമായ ശ്രമം. അല്ലാതെന്ത് പറയാൻ.

MY RATING :: ★★½

"ഓസ്കാർ ഉൾപ്പടെ നിരവധി അവാർഡുകൾ വാരിക്കൂട്ടിയ ആനിമേഷൻ ചിത്രം."


💢മരുഭൂമിയിൽ അബദ്ധവശാൽ പെട്ടുപോവുന്ന ഒരു ഓന്ത്. അവിടെ വെച്ച് ഒരു കഴുകന്റെ ആക്രമണത്തിൽ പെട്ട് ദിശയറിയാതെ നട്ടംതിരിഞ്ഞ ഓന്ത് അവസാനം എത്തിപ്പെട്ടത് ഡേർട്ടിൽ. പുരാതനമായ ഒരു നഗരത്തിൽ.

മറ്റൊരു ഗത്യന്തരവുമില്ലാതെ അവിടെ പിടിച്ച് നിൽക്കാൻ നോക്കിയപ്പോ അതാ ആ ചോദ്യങ്ങൾ. നീയാരാണ് നിനക്കെന്തര് വേണം. ഉടനെ തന്നെ അവനൊരു പേരിട്ടു. "Rango". തള്ളിൽ അപാരതല്പരനായ കക്ഷി തന്റെ കലാപരിപാടി തുടങ്ങി. തള്ളിത്തള്ളി അപാരഫോമിലെത്തി നിൽക്കുന്നവൻ മറ്റുള്ളവർക്ക് നായകനായി. കൂടെ ചക്ക വീണ് മുയൽ ചത്ത ഒരു സംഭവവും. അപ്പൊ തന്നെ pwd ശെയ് മേയർ വിളിച്ച് അവാർഡും കൊടുത്തു. നഗരത്തിലെ പുതിയ സമാധാനപാലകൻ. പിന്നീട് rangoയുടെ രസകരമായ യാത്ര തുടങ്ങുകയാണ്.

💢Pirates Of The Caribbean ഒരുക്കിയ Gore Verbinski സംവിധാനം ചെയ്ത ആനിമേഷൻ ചിത്രം. വളരെ രസകരമായ ഒരു കഥാപാത്രത്തെയും അതിലും രസകരമായ ഒരു കഥയെയുമാണ് ഒരുക്കിവെച്ചിരിക്കുന്നത്. ജലക്ഷാമം അനുഭവിക്കുന്ന നാട്ടിൽ അതിനായി പോരാടേണ്ടി വരുന്ന സന്ദർഭങ്ങളുമൊക്കെ കുറെയേറെ രസകരവും അതിലേറെ ചിന്തിപ്പിക്കുന്നവയുമാണ്. രസിപ്പിച്ച് മുന്നേറുന്ന സിനിമ ഇടക്കിടക്ക് ട്രാക്ക് മാറി ഗൗരവകരമായ കാര്യങ്ങളിലേക്കും കാഴ്ച്ചകൾ കൊണ്ടുപോവുന്നുണ്ട്.

💢Johnny Depp നൽകിയ ശബ്ദമാണ് rangoയുടെ വലിയൊരു പ്ലസ് പോയിന്റ്. വോയിസ് മോഡുലേഷനൊക്കെ അപാരമായിരുന്നു. ആ ശബ്ദം തന്നെ ഒരുപാട് നർമ്മങ്ങൾക്ക് വഴിവെച്ചിട്ടുണ്ട്. സാധാരണ ആനിമേഷൻ ചിത്രങ്ങൾ പോലെ വർണ്ണാഭമായ ഒരു ചിത്രമല്ല. എങ്കിലും കണ്ണിന് കുളിരേകുന്ന പല കാഴ്ചകളാലും തൃപ്തി നൽകുന്ന ചിത്രമാണ്.

💢വെസ്റ്റേൺ സ്റ്റൈൽ ചേർത്തൊരുക്കിയ കഥാപാത്രങ്ങളുടെ ഡ്രസിങും സംസാരവുമൊക്കെ ആനിമേഷനിൽ ഇതുവരെ കണ്ടിട്ടില്ലാത്ത ഒന്നായി തോന്നി. അതും മറ്റുള്ളവയിൽ നിന്ന് വ്യത്യസ്തമാക്കുന്ന ഘടകമാവുന്നു. പങ്കെടുത്ത ഭൂരിഭാഗം ഫെസ്റ്റിവലുകളിലും അവാര്ഡിന്റെ തിളക്കത്തോടെ മടങ്ങിയ ചിത്രമെന്ന രീതിയിലും അഭിനന്ദനം അർഹിക്കുന്നുണ്ട് Rango.

പതിവ് ആനിമേഷൻ ചിത്രങ്ങൾ പോലെ ഒരുപാട് ചിരിപ്പിക്കുകയും കൂടെ ചിന്തിപ്പിക്കുന്ന ആശയങ്ങൾ കൂടി കടത്തിവിടും ചെയ്യുന്ന രസകരമായ ചിത്രം. ബോക്സ് ഓഫിസിലും ക്രിട്ടിക് റെസ്‌പോൺസിലും ഒരുപോലെ ഉയർന്ന ചിത്രം നല്ലൊരു കുട്ടികൾക്കൊപ്പം മുതിർന്നവർക്കും നല്ലൊരു അനുഭവമാകുന്നു.

MY RATING :: ★★★½

ഒരുപക്ഷെ കൊറിയൻ സിനിമയിലേക്ക് ഈയടുത്ത് കാലെടുത്ത് വെച്ചവർ ഭൂരിഭാഗവും ആദ്യം കണ്ട ചിത്രം Train To Busan ആയിരിക്കും. ഞാനും അതെ. ആ ചിത്രത്തിന്റെ സംവിധായകൻ 2018ൽ ഒരുക്കിയ ചിത്രമാണ് Psychokinesis.


💢ഒരു സുപ്രഭാതത്തിൽ ജോഗിങ്ങിന് പോയി തിരിച്ചുവരുന്ന വഴി കുറച്ച് വെള്ളം കുടിച്ച സിയോക്കിന് സൂപ്പർ പവർ ലഭിക്കുന്നു. അതെ സമയം തന്നെ അത്ര ചേർച്ചയിലല്ലാത്ത തന്റെ മകൾക്കും കൂട്ടർക്കും ഒരു ദുരിതം നേരിടേണ്ടി വരുന്നു. സ്വാഭാവികമായും തന്നാൽ കഴിയുന്ന രീതിയിൽ അവളെ സഹായിക്കാൻ ഏതച്ഛനും ശ്രമിക്കും.

💢സംവിധായകന്റെ പേര് കണ്ടപ്പോൾ വലിയ പ്രതീക്ഷകൾ ആയിരുന്നു. എന്നാൽ സിനിമ തുടങ്ങി കുറച്ചായപ്പോൾ തന്നെ പ്രതീക്ഷകൾ എട്ടായി മടക്കി മാറ്റിവെച്ചു. തുടക്കം മുതൽ ഒടുക്കം വരെ ഊഹിക്കാവുന്ന കഥ. പേരിന് കുറച്ച് കോമഡിയെന്ന വണ്ണം ഒന്നോ രണ്ടോ ചേർത്തിട്ടുണ്ട്. പിന്നെ കുറെ ഗ്രാഫിക്സിന്റെ കളിയും. അതിനെ പറ്റി പറയാതിരിക്കുന്നതാണ് ഭേദം.

💢ഇത്ര മോശം ഗ്രാഫിക്സ് വർക്കുകൾ ഒരു കൊറിയൻ സിനിമയിലും ഇതുവരെ കണ്ടിട്ടില്ല. നിലവാരമുണ്ടായിരുന്ന പല രംഗങ്ങളിലും ഗ്രാഫിക്സിന്റെ അതിപ്രസരം അതിനെ നിലവാരത്തകർച്ചയിലേക്ക് നയിക്കുന്ന കാഴ്ച്ച നിസ്സഹായനായി കണ്ടുനിൽക്കേണ്ടി വന്നു. അമാനുഷികതക്കൊക്കെ ഒരു പരിധി ഇല്ലെടെയ്. എന്നാലും ഈ പവറൊക്കെ എവിടുന്ന് വന്നോ ആവോ.

💢കഥ ഇനിയെങ്ങോട്ടാണ് പോവുന്നത്. എന്തായിരിക്കും അന്ത്യം. ഇങ്ങനെ ആകാംശയിൽ നിർത്തേണ്ട കാര്യങ്ങളൊക്കെ അണുവിട തെറ്റാതെ ഊഹിക്കാൻ കഴിയുമെന്നതാണ് ഏറ്റവും രസം. അങ്ങ് കൊറിയയിലും ക്ളീഷേക്ക് ഒരു പഞ്ഞവും ഇല്ലെന്ന് ഇത് കണ്ടപ്പോഴാണ് ബോധ്യമായത്.

🔻ＦＩＮＡＬ ＶＥＲＤＩＣＴ🔻

ഒരു പുതുമയും നൽകാത്ത, ക്ളീഷേകൾക്ക് ഒരു പഞ്ഞവുമില്ലാത്ത, എന്തിനോ വേണ്ടി തിളച്ച സാമ്പാർ. ഒരുതരത്തിൽ കൊറിയൻ സിനിമയിലെ ഏറ്റവും മോശം അനുഭവങ്ങളിൽ ഒന്നായിരുന്നു എന്നാണ് വ്യക്തിപരമായ അഭിപ്രായം. താല്പര്യമുള്ളവർക്ക് വേണമെങ്കിൽ കൈവെച്ച് നോക്കാം. ശരാശരിയോ അതിൽ താഴെയോ തൃപ്തി ലഭിച്ചേക്കും

MY RATING :: ★★☆☆☆

"അതിരുകളില്ലാത്ത സ്നേഹത്തിന്റെ മറ്റൊരു ഭാഷ്യം"


💢ആൽപ്സ് പർവ്വതനിരകളിലാണ് ആ പക്ഷിക്കൂട് നിർമ്മിച്ചിരിക്കുന്നത്. രണ്ട് പരുന്തുകൾ തങ്ങളുടെ മുട്ട വിരിയുന്നതും കാത്തിരിപ്പാണ്. അങ്ങനെയൊരു ദിവസം ആ മുട്ട വിരിയുന്നു. അതോടൊപ്പം തന്നെ ഒരു മത്സരബുദ്ധി കൂടി അവിടെ ഉണരുകയാണ്.

അതെ സമയം തന്നെ താഴ്വാരത്ത് താമസിക്കുന്ന ലൂക്കാസ് ഏകാന്തനാണ്. തന്റെ അമ്മയുടെ മരണത്തിന് ശേഷം അച്ഛനോട് പോലും ഒരു വാക്ക് അവൻ മിണ്ടിയിട്ടില്ല. അമ്മയുടെ ഓർമ്മകൾ തങ്ങുന്ന ആ വീട്ടിൽ ഒറ്റക്ക് വസിക്കാൻ ഇഷ്ടപ്പെടുന്ന ലൂക്കാസിന്റെ അടുക്കലേക്ക് ഒരു ദിവസം ആ പരുന്തിൻ കുഞ്ഞ് എത്തിപ്പെടുന്നു. തുടർന്ന് ഇരുവരും തമ്മിലുള്ള സമ്പർക്കമാണ് ചിത്രം കൈകാര്യം ചെയ്യുന്നത്.

💢മനുഷ്യനും മൃഗങ്ങളും തമ്മിലുള്ള സ്നേഹസഹവാസത്തിന്റെ കഥകൾ പല സിനിമകളിലും നാം കണ്ടിട്ടുണ്ട്. ഹാച്ചിയും How To Train Your Dragonഉമൊക്കെ ഇഷ്ടചിത്രങ്ങളായതും പ്രമേയത്തിലെ വ്യത്യസ്തതയും ലാളിത്യവും കൊണ്ടാണ്. അത്തരത്തിൽ അതെ പ്രമേയത്തിൽ ഓസ്ട്രിയയിൽ നിന്ന് പിറവിയെടുത്ത ചിത്രമാണ് Brothers Of The Wind.

"To learn takes courage. And to teach, patience of a mother."

💢സുന്ദരമായ വരികളാണ് മേൽ പറഞ്ഞിരിക്കുന്നത്. ഒരുപക്ഷെ സിനിമയുടെ പല സന്ദർഭങ്ങളെയും ഈ വാക്കുകളുമായി കോർത്തിണക്കാൻ സാധിക്കും. ഒരു മനുഷ്യനും പരുന്തും തമ്മിലുള്ള സഹവാസം വിചാരിക്കുന്നത് പോലെ അത്ര എളുപ്പമുള്ള കാര്യമല്ല. ഒരു വർഗ്ഗം തങ്ങളുടെ വളർച്ചക്കനുസരിച്ച് സ്വഭാവവ്യതിയാനങ്ങൾക്ക് വിധേയമായിക്കൊണ്ടിരിക്കും. അവിടെ ഈ ചിത്രത്തിന്റെ പ്രസക്തിയും ഉയരുന്നു.

💢മനോഹരമായ ഒരു ആത്മബന്ധമാണ് ചിത്രത്തിന്റെ പ്രതിപാദ്യവിഷയം. കണ്ട് പരിചിതമായതാണെങ്കിൽ കൂടി സംവിധായകന്റെ കയ്യടക്കത്തോടുകൂടിയ അവതരണം പല സന്ദർഭങ്ങൾക്കും മാറ്റേകുന്നുണ്ട്. അതിനൊപ്പം തന്നെ എക്കോളജിയിലൂടെയും അതിലെ പല കാഴ്ചകളിലൂടെ, പല സ്വഭാവങ്ങളിലൂടെ നമ്മെ കൊണ്ടുപോവുന്നുണ്ട്. അത് ചിത്രത്തെ മറ്റുള്ളവയിൽ നിന്ന് വ്യത്യസ്തമാക്കുന്ന ഒന്നാണ്.

💢സ്‌ക്രീനിൽ പതിയുന്ന കാഴ്ചകളുടെ മനോഹാരിത കണ്ടറിയേണ്ടത് തന്നെയാണ്. കണ്ണഞ്ചിപ്പിക്കുന്ന പല കാഴ്ചകളും സന്ദർഭങ്ങളോട് ഇഴുകിച്ചേരുന്ന പശ്ചാത്തലസംഗീതവും ചിത്രത്തിന്റെ മാറ്റ് കൂട്ടുന്നുണ്ട്.

🔻ＦＩＮＡＬ ＶＥＲＤＩＣＴ🔻

ഒരു സെമി ഡോക്യൂമെന്ററി എന്ന് വേണമെങ്കിൽ ചിത്രത്തെ വിശേഷിപ്പിക്കാം. മനസ്സിൽ പതിക്കുന്ന ആത്മബന്ധത്തിന്റെ കഥയാണ് ചിത്രം കൈകാര്യം ചെയ്യുന്നത്. പതിവ് രീതികളിൽ നിന്ന് മാറി human-animal relation എന്നതിനപ്പുറം പല മനോഹരമായ കാഴ്ചകളും അറിവുകളും സമ്മാനിക്കുന്നുമുണ്ട് ഈ സുന്ദരസഹവാസം. തീർച്ചയായും ഇഷ്ടപ്പെടുമെന്ന് ഉറപ്പ്.

MY RATING :: ★★★★☆