Abeed Azad

🔻മാജിക്കും ലോജിക്കും പലപ്പോഴും കാന്തങ്ങളുടെ ഇരു വശങ്ങൾ പോലെയാണ്. അങ്ങ് ചേർന്ന് പോവുകയേ ഇല്ല. പല സിനിമകളിലും മാജിക്ക് സീനുകളുടെ മേക്കിങ്ങ് അമ്പരപ്പിച്ചിട്ടുണ്ടെങ്കിലും ഒരു പരിധി കവിഞ്ഞാൽ വിരസമായി മാറാനും സാധ്യതയുണ്ട്. ഈ സീരീസിൽ ഭൂരിഭാഗവും നമ്മെ തൃപ്തിപ്പെടുത്താനാവുമ്പോഴും ചില crucial രംഗങ്ങളുടെ അവതരണം അൽപ്പം sillyയായി തോന്നും. ഇത്തരത്തിലുള്ള രംഗങ്ങൾ ഒരൽപ്പം സഹിക്കാനായാൽ തൃപ്തികരമായ ഒരു സീരീസ് ആസ്വദിക്കാം.

Year : 2018
Episode : 13
Run Time : 40-45min

🔻ലോകപ്രശസ്തനായ മജീഷ്യൻ കാമറൂൺ ബ്ലാക്ക് തന്റെയൊരു മാജിക്ക് ഷോവിന് ശേഷം അപകടത്തിൽ പെടുകയും പോലീസ് പിടിയിലാവുകയും ചെയ്യുന്നിടത്താണ് കഥയുടെ തുടക്കം. അവിടെ തന്നെ ഒരു സത്യം വെളിപ്പെടുകയാണ്. തന്നെയാരോ മനഃപൂർവ്വം അപകടത്തിൽ കുടുക്കിയതാണെന്ന് ബോധ്യമാവുന്നതോടെ FBIയുമൊത്ത് തന്റെ Deception ടീമിന്റെ സഹായത്തോടെ സത്യം തെളിയിക്കാൻ ഇറങ്ങുന്നു. എന്നാൽ വഴിയിൽ പ്രതീക്ഷിക്കാത്ത വിധത്തിൽ അനേകം കേസുകൾ വന്ന് പെടുന്നു. തുടർന്ന് അവയൊക്കെയും തെളിയിക്കാൻ കാമറൂണും ടീമും ഇറങ്ങിപ്പുറപ്പെടുന്നു.

🔻ഏറെ താൽപര്യമുണർത്തുന്ന തുടക്കമായിരുന്നു സീരീസിന്റെത്. കാമറൂണിന്റെ സ്റ്റൈലിഷ് ഇൻട്രോയും തുടർന്നുള്ള മാജിക്ക് ഷോയുമൊക്കെ interesting ആയി അവതരിപ്പിച്ചിട്ടുണ്ട്. തുടർന്ന് കഥയിലേക്ക് നേരിട്ട് കടക്കുകയും ചെയ്യുമ്പോൾ അടുത്ത എപ്പിസോഡുകൾ കാണാനുള്ള ആഗ്രഹം നമ്മിൽ ഉടലെടുക്കും. എന്നാൽ ഓരോ എപ്പിസോഡിലും ഓരോ കേസുകൾ തെളിയിക്കുന്ന രീതിയിലുള്ള അവതരണം ഇടക്കെങ്കിലും ആസ്വാദനത്തെ പിന്നോട്ട് വലിക്കുന്നുണ്ട്. ഒരു സീരീസ് എന്ന നിലയിലുള്ള തുടർച്ച അത്തരം എപ്പിസോഡുകളിൽ നഷ്ടമാവുന്നുണ്ട്. രണ്ടോ മൂന്നോ ഫാക്റ്ററുകൾ മാത്രമാണ് ആ തുടർച്ച നിലനിർത്തുന്നത് എന്ന് തോന്നിപ്പോവും. ചില കേസുകൾ കഥയുമായി ഒരു ബന്ധവുമില്ലെങ്കിലും കണ്ടിരിക്കാം എന്ന് തോന്നും. അതിനിടയിലാണ് മാജിക്കിലെ അതിശയോക്തി പ്രകടമാവുന്നത്. 'Magic Is All About Deception' എന്നിടക്ക് പറയുന്നത് കാണികളെ കളിയാക്കാനാണോ എന്ന് തോന്നിയിരുന്നു. എങ്കിലും ആ ഫ്ലോവിൽ അതങ്ങ് ഗൗനിക്കാതെ വിടാം. ഒടുവിൽ നല്ലൊരു പ്ലോട്ട് മുന്നിലേക്കിട്ട് ആദ്യ സീസൺ അവസാനിക്കുമ്പോൾ അടുത്ത സീസൺ റിലീസ് ആവാനുള്ള കാത്തിരിപ്പിലാഴ്ത്തുന്നുണ്ട് സംവിധായകൻ.

🔻Jack Cutmore-Scottന്റെ വളരെ സ്റ്റൈലിഷായ പ്രകടനം മാജിക്ക് ഉൾപ്പെടുന്ന രംഗങ്ങളെ മികവുറ്റതാക്കുന്നുണ്ട്. സീരീസിലെ ചില ഡയലോഗുകളും ഹൈലൈറ്റാണ്. Jackന്റെ ഡയലോഗ് ഡെലിവറിയും നന്നേ രസിപ്പിക്കുന്നുണ്ട്. കൂടെ അഭിനയിച്ചവരും തങ്ങളുടെ റോളുകൾ ഭംഗിയാക്കിയിട്ടുണ്ട്. മികച്ചുനിൽകുന്ന ഛായാഗ്രഹണവും മാജിക്ക് നമ്പറുകളും പശ്ചാത്തലസംഗീതവും സീരീസിന്റെ പേസിങ്ങിന് സഹായകമാവുന്നുണ്ട്.

🔻ＦＩＮＡＬ ＶＥＲＤＩＣＴ🔻

ലോജിക്ക് ഇല്ലായ്മയും ലൂപ്പ് ഹോളുകളും ചില രംഗങ്ങളിൽ കാണാനാവുമെങ്കിലും അവയൊക്കെ ഗൗനിക്കാതെയിരുന്നാൽ നല്ലൊരു അനുഭവം തന്നെയാവും Deception സമ്മാനിക്കുക. കാഴ്ച തുടങ്ങിയാൽ തുടർന്ന് കാണാനുള്ള ജിജ്ഞാസ ഓരോ എപ്പിസോഡും ജനിപ്പിക്കുന്നുണ്ട്. പോരായ്മകൾ ഉണ്ടെങ്കിൽ കൂടി നിരാശ നൽകില്ല ഈ സീരീസ്. നല്ലൊരു ending കൂടി അവസാന എപ്പിസോഡിൽ സമ്മാനിക്കുമ്പോൾ അടുത്ത സീസണിനായുള്ള കാത്തിരിപ്പ് തുടങ്ങും എന്ന് തീർച്ച.

ＡＢ ＲＡＴＥＳ ★★★☆☆

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻ഒരു സോമ്പി മൂവി എങ്ങനെയാവും എന്നൊരു കൺസെപ്റ്റ് നമ്മുടെ മനസ്സിൽ ഉണ്ടാവും. അതിൽ പ്രതീക്ഷിക്കുക ഹൊറർ-സ്ലാഷർ ടൈപ്പ് തന്നെയാവും. എന്നാൽ അതിൽ കോമഡി കൂടി ഉൾപ്പെടുത്തുക എന്നത് ശ്രമകരമായ കാര്യമാണ്. Shaun Of The Dead അടക്കമുള്ള ചിത്രങ്ങൾ ആ കാര്യത്തിൽ വിജയിച്ചതാണ്. ഈ ചിത്രവും സോമ്പി-കോമഡി കൺസെപ്റ്റിൽ ഒരുങ്ങിയ ഒന്നാണ്. ആ കാര്യത്തിൽ ചിത്രം വിജയിച്ചിട്ടുമുണ്ട്.

Year : 2019
Run Time : 1h 52min

🔻ഇത്തവണ നമ്മുടെ സോമ്പികൾ മനുഷ്യമാംസത്തെയല്ല ക്യാബേജിനെയാണ് പ്രണയിക്കുന്നത്. അതാണ് ഹൈലൈറ്റ്. അവിടെ തുടങ്ങുന്ന നർമ്മമുഹൂർത്തങ്ങൾ അങ്ങ് ക്ലൈമാക്സ് വരെ നീളുന്നു എന്നതാണ് ചിത്രത്തിന്റെ പ്രത്യേകത. ഒപ്പം ആവശ്യത്തിന് മാത്രം വയലൻസ് ഉപയോഗിച്ചതും ആസ്വാദനത്തിന് ഗുണം ചെയ്തിട്ടുണ്ട്.

🔻കുറെ രംഗങ്ങൾ ഹൈലൈറ്റ് ചെയ്ത് പറയണമെന്നുണ്ട്. പക്ഷെ കാണുമ്പോഴുള്ള രസം നഷ്ടപ്പെടുമെന്നതിനാൽ അവ പറയുന്നില്ല. ഒരു കുടുംബത്തെ ഫോക്കസ് ചെയ്ത് തുടങ്ങുന്ന കഥയിൽ അവരുടെ ബന്ധങ്ങൾ ഭംഗിയായി വരച്ചിടുന്നുണ്ട്.അച്ഛൻ ഉൾപ്പടെ ആ ഫ്രയിമിലേക്ക് വരുന്ന രീതി വളരെ രസകരമാണ്. തുടർന്ന് ഒരു സോമ്പിയെ കിട്ടുന്നതും അതിനെ അവർ എങ്ങനെ ഉപയോഗിക്കുന്നു എന്നതുമൊക്കെയായി ഫൺ റൈഡ് തന്നെയാണ് സിനിമയിലുടനീളം. ഒട്ടും മടുപ്പില്ലാതെ കണ്ടിരിക്കാൻ സാധിക്കും.

🔻ＦＩＮＡＬ ＶＥＲＤＩＣＴ🔻

കോമഡിക്ക് പ്രാധാന്യം നൽകി ഒരുക്കിയ തിരക്കഥയാണെങ്കിൽ കൂടി സ്ലാഷർ ജേണറിനോടും നീതി പുലർത്താൻ ചിത്രത്തിന് സാധിച്ചിട്ടുണ്ട്. കുറെ ചിരിക്കാനും ഇത്തിരി വയലൻസ് ആസ്വദിക്കാനുമായി തീർച്ചയായും കാണാവുന്ന ചിത്രം തന്നെയാണിത്.

ＡＢ ＲＡＴＥＳ ★★★☆☆

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻ഈ ലോകത്ത് സൂപ്പർ പവറുള്ളവർ ഒരുപാടുണ്ട്. അതിൽ താനുദ്ദേശിക്കുന്ന കാര്യത്തിനായി കഴിവുള്ളവരെ തിരഞ്ഞെടുക്കുക. ഒറ്റ രാത്രി കൊണ്ട് ആ കാര്യം നേടിയെടുക്കുക. ഇല്ലെങ്കിൽ നഷ്ടപ്പെടുക തന്റെ ജീവൻ തന്നെയാണ്. കസീനോയിൽ മറ്റൊരുവന്റെ കരവിരുത് കാരണം തനിക്കുണ്ടായ വമ്പൻ നഷ്ടം നികത്താൻ മൈക്കിളിന് അത് മാത്രമേ വഴിയുണ്ടായിരുന്നുള്ളൂ.

Year : 2018
Run Time : 1h 41min

🔻സിനിമയുടെ ടെക്നിക്കൽ സൈഡിനെ കുറിച്ച് തന്നെ ആദ്യം പറയട്ടെ. അതിഗംഭീരമാണ് ഛായാഗ്രഹണവും വിഷ്വൽ എഫക്ട്സും. കണ്ണഞ്ചിപ്പിക്കുന്ന എന്ന് നിസ്സംശയം വിശേഷിപ്പിക്കാവുന്ന കാഴ്ചാവിരുന്ന്. സിനിമയെ മുഴുവൻ സമയവും താങ്ങിനിർത്തുന്നത് ഈ ഘടകമാണെന്നതാണ് സത്യം. ഒപ്പം ചടുലതയേറിയ എഡിറ്റിംഗും.

🔻എന്നാൽ ഈ മികവിനോളം പോന്ന കഥയായിരുന്നില്ല ചിത്രത്തിന്റേത്. മികച്ച രീതിയിൽ തുടങ്ങുകയും പിന്നീട് ശരാശരിയിൽ ഒതുങ്ങുകയും ചെയ്യുന്നുണ്ട് തിരക്കഥ. ഇത് പലപ്പോഴും നമുള്ള ഫീൽ ചെയ്യുകയും ചെയ്യും. എങ്കിലും വിഷ്വലി പുലർത്തുന്ന മികവ് കൊണ്ട് ഒരു പരിധി വരെ മടുപ്പില്ലാതാക്കാൻ സാധിച്ചിട്ടുണ്ട്. BGM വർക്കുകളും ശരാശരി നിലവാരമേ പുലർത്തുന്നുള്ളൂ.

🔻നായകൻറെ സ്റ്റൈലൻ പ്രകടനം ഹൈലൈറ്റ് ആണ്. ബാക്കിയുള്ളവരും മോശമാക്കിയില്ല. Antonio Banderas ചെറിയൊരു വേഷത്തിൽ വരുന്നുണ്ട്. ഒരുപക്ഷെ ചിത്രത്തിനൊരു രണ്ടാം ഭാഗം ഉണ്ടായാൽ മുഴുനീള റോളിൽ പുള്ളിയെ കാണാനാവും.

🔻ＦＩＮＡＬ ＶＥＲＤＩＣＴ🔻

കഥയെപറ്റി കൂടുതൽ വാചാലരാവാതിരുന്നാൽ ദൃശ്യമികവ് പുലർത്തുന്ന ഒരു ഫാന്റസി ചിത്രം ആസ്വദിക്കാം. നേരം പോക്കിനായി മാത്രം ചിത്രത്തെ സമീപിക്കുക. പ്രതീക്ഷകളൊന്നുമില്ലാതെ കാണാനിരുന്നാൽ നമ്മെ തൃപ്തിപ്പെടുത്താതിരിക്കാൻ വഴിയില്ല.

ＡＢ ＲＡＴＥＳ ★★½

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻ജീവിതത്തിൽ ഉയർച്ചയിലെത്താൻ മറ്റെല്ലാ വിനോദങ്ങളും മാറ്റിവെച്ച് പഠനത്തിൽ തന്നെ ഏർപ്പെടണം എന്നുണ്ടോ.? അങ്ങനെയായിരുന്നു ആ ദിവസം വരെ മോളിയും ആമിയും കരുതിയിരുന്നത്. എന്നാൽ ആ തെറ്റിദ്ധാരണ മാറിക്കിട്ടാൻ കൂടെയുള്ളവരോട് അഡ്മിഷൻ കിട്ടിയ കോളേജുകളെ പറ്റി തിരക്കേണ്ടി വന്നു അവർക്ക്. ഇത്ര പഠിച്ച് മാർക്ക് വാങ്ങിയ തങ്ങൾക്കും ഒരുപോലെ ജീവിതം ആഘോഷിച്ച് നടന്നവർക്കും അഡ്മിഷൻ കിട്ടിയിരിക്കുന്നത് ഒരേ കോളേജിൽ. അവിടെയാണ് അവർക്ക് സ്വബോധം നേരെവീണത്. ജീവിതം ആഘോഷിക്കേണ്ട സമയം കൂടി അവർക്ക് നഷ്ടമായിരിക്കുന്നു.

Year : 2019
Run Time : 1h 42min

🔻നാളെ തങ്ങളുടെ Graduation Day ആണ്. ഇനിയൊരു രാത്രി മാത്രമാണ് അവർക്ക് മുന്നിലുള്ളത്. അവിടെയെങ്കിലും അവർ അർമാദിക്കാൻ ശ്രമിച്ചില്ലെങ്കിൽ പിന്നെ അങ്ങനെയൊന്ന് ജീവിതത്തിൽ ഉണ്ടാവില്ല. രണ്ടും കൽപിച്ച് അവരൊരു പാർട്ടിക്ക് ഇറങ്ങിപ്പുറപ്പെടുന്നു. പിന്നെ നടന്നത് കണ്ടറിയുക.

🔻To All The Boys I've Loved Before, Eighth Grade, Love Simon, Midnight Sun തുടങ്ങി നന്നായി ആസ്വദിച്ച ഒരുപിടി coming of age കാറ്റഗറിയിലുള്ള സിനിമകൾ കഴിഞ്ഞ വർഷങ്ങളിലായി ഹോളിവുഡിൽ ഇറങ്ങിയിരുന്നു. ഈ വർഷം ഇതുവരെയൊന്നും കാണാനായില്ല എന്ന വിഷമം ഉള്ളിലിരിക്കുമ്പോഴാണ് Booksmart റിലീസ് ആയത്. ഒന്നും പ്രതീക്ഷിക്കാതെ കണ്ടുതുടങ്ങിയതാണ്. ലഭിച്ചതോ ഒരു കിടിലൻ സിനിമയും. ഒരുപക്ഷെ മറ്റുള്ളവയെക്കാൾ ആസ്വദിക്കാൻ സാധിച്ച ഒന്ന്.

🔻കേന്ദ്രകഥാപാത്രങ്ങളുടെ അവതരണം തന്നെയാണ് സിനിമയുടെ ഹൈലൈറ്റ്. നല്ല സുഹൃത്തുക്കൾ. മറ്റുള്ളവരുടേതിൽ നിന്ന് മാറി അവരുടേതായ ലോകത്ത് ജീവിതം ആസ്വദിക്കുന്നവർ. എല്ലാ കാര്യങ്ങൾക്കും അവർ തന്നെ നിശ്ചയിച്ച പരിധിക്കുള്ളിൽ ജീവിക്കുന്നവർ. അങ്ങനെയുള്ള രണ്ട് പേർ Break Some Rules എന്ന ചിന്തയുമായി ഇറങ്ങിപ്പുറപ്പെടുന്നത് തന്നെയാണ് ഏറ്റവും രസകരം. അതിന്റെ ഏറ്റവും മികച്ച അവതരണമാണ് Booksmartൽ നമുക്ക് കാണാനാവുക. ഒപ്പം ഡയലോഗുകളിലെ കോമിക് നമ്പറുകൾ ക്ഷണനേരം കൊണ്ട് ചിരി ഉണർത്തുന്നുണ്ട്.

🔻ഒരു ടീനേജ് കാലഘട്ടത്തിലൂടെ സഞ്ചരിക്കുമ്പോൾ ഉണ്ടാവുന്ന ആശയക്കുഴപ്പങ്ങളും ബുദ്ധിമുട്ടുകളും പല കഥാപാത്രങ്ങളിലൂടെ പറഞ്ഞ് പോവുകയാണ് സംവിധായക. ഫോക്കസ് ആമിയിലും മോളിയിലും ആണെങ്കിൽ കൂടി ബാക്കിയുള്ളവർക്കും കൃത്യമായ സ്‌പേസ് നൽകുന്നുണ്ട്. റയാനും നിക്കും ജെറാഡുമൊക്കെ പല വിധത്തിൽ നമ്മുടെ മനസ്സിൽ സ്ഥാനം കണ്ടെത്തുന്നുണ്ട്. അത്തരത്തിൽ കഥാപാത്രങ്ങളെ എങ്ങനെ കൈകാര്യം ചെയ്യണമെന്ന കൃത്യമായ കണക്കുകൂട്ടൽ കഥയിൽ കാണാൻ സാധിക്കും.

🔻Beanie Feldsteinന്റെ ഗംഭീര പ്രകടനം സിനിമയുടെ ഭൂരിഭാഗം സമയവും ഉണർവ്വേകുന്നുണ്ട്. വളരെ എനർജെറ്റിക്ക് ആണ് മോളിയെന്ന കഥാപാത്രം. അൽപ്പം ഉൾവലിഞ്ഞ, മോളിയോട് മാത്രം സൗഹൃദം പങ്കിടുന്ന ആമിയായി Kaitlyn Dever മികച്ച പ്രകടനം കാഴ്ച്ച വെക്കുന്നുണ്ട്. ഇവരുടെ കാസ്റ്റിങ്ങ് അപാരമെന്നേ പറയാനുള്ളൂ. ഇരുവരും തമ്മിലുള്ള കെമിസ്ട്രിയും രസകരമാണ്.

🔻അടിപൊളി സൗണ്ട്ട്രാക്കുകളാൽ സമ്പന്നമാണ് ചിത്രം. ഒരുപോലെ കേൾക്കാൻ ഇമ്പമുള്ളതും എനർജി ലെവൽ High ആക്കുന്ന തരത്തിലുമുള്ള പാട്ടുകൾ സിനിമയിലുണ്ട്. ഒപ്പം കിടിലൻ പശ്ചാത്തലസംഗീതവും. കൂട്ടിന് മനോഹരമായ രംഗങ്ങളും. ചില സീനുകളിലെ കളറിങ്ങ് വേറിട്ട് നിൽക്കുന്നുണ്ട്.

🔻ＦＩＮＡＬ ＶＥＲＤＩＣＴ🔻

Repeat Watchന് നമ്മെ പ്രേരിപ്പിക്കുന്ന ഒരു കിടിലൻ Coming Of Age മൂവിയാണ് Booksmart. രസകരമായ കഥാപാത്രങ്ങളും ചിരി പകരുന്ന നർമ്മമുഹൂർത്തങ്ങളും ഇഷ്ടം തോന്നുന്ന സൗണ്ട്ട്രാക്കുകളും +ve മൂഡിൽ സഞ്ചരിക്കുന്ന കഥയുമെല്ലാമായി ഒരുപാട് ആസ്വദിച്ച് കണ്ട ചിത്രം. ഈ കാറ്റഗറി ഇഷ്ടപ്പെടുന്നവർ ഒരിക്കലും നഷ്ടപ്പെടുത്താൻ പാടില്ലാത്ത ഒരനുഭവമാണ് Booksmart.

ＡＢ ＲＡＴＥＳ ★★★★☆

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻കഥാപാത്രങ്ങൾ എത്രയേറെ ശക്തമാവുന്നോ അത്രയേറെ ഒരു ത്രില്ലർ നമുക്ക് ആസ്വാദനം നൽകും. ശക്തം എന്നത് ഇമോഷണലി കൂടി ആവാം. ഒരുപക്ഷെ ത്രില്ലർ എന്നതിനേക്കാളേറെ ഇമോഷണൽ ഡ്രാമ എന്ന നിലയിൽ പല ചിത്രങ്ങളും നമുക്ക് ആസ്വദിക്കാൻ സാധിക്കും. അത്തരത്തിൽ ഒന്നാണ് ഈ ചിത്രം. Suspect X എന്ന ക്ലാസിക്ക് ജാപ്പനീസ് ത്രില്ലറിന്റെ Sequel എന്ന് നമുക്ക് പറയാൻ സാധിക്കും ഈ ചിത്രത്തെ.

Year : 2013
Run Time : 2h 9min

🔻സിനിമയെ പറ്റി എത്രത്തോളം കുറച്ചറിയുന്നുവോ അത്രത്തോളം നല്ലതാണ് ആസ്വാദനത്തിന്. എങ്കിലും ഒരു സൂചന നൽകാം. ഫിസിസിസ്റ്റായ Manabu ഒരു ഗവേഷണത്തിന്റെ ആവശ്യത്തിനായി Hariguaraയിലെത്തുകയും അവിടെ അദ്ദേഹം താമസിച്ചിരുന്ന മോട്ടലിൽ ഒരു കൊലപാതകം അരങ്ങേറുകയും ചെയ്യുന്നു. തുടർന്ന് അതിന്റെ ചുരുളഴിക്കാനുള്ള അദ്ദേഹത്തിന്റെ ശ്രമമാണ് ചിത്രം കൈകാര്യം ചെയ്യുന്നത്.

🔻സിനിമയുടെ ഏറ്റവും മികച്ച ഘടകം കഥാപാത്രനിർമ്മിതിയാണ്. സ്‌ക്രീനിൽ വരുന്നവർക്കെല്ലാം വ്യക്തമായ ക്യാരക്ടർ സ്കെച്ച് നൽകിയിട്ടുണ്ട് എന്ന് പറയാം. അവിടെയാണ് സിനിമയുടെ കഥ വികസിക്കുന്നതും വഴിത്തിരിവുകളും സസ്പെൻസുകളും അരങ്ങേറുന്നതും. ഓരോ ചെറിയ സൂചനകൾ ഇടവേളകളിൽ നൽകി നമ്മെകൊണ്ട് ചിന്തിപ്പിക്കുകയും എന്നാൽ അതിനെ കവച്ചുവെക്കുന്ന മറ്റൊരു കഥ വീണ്ടും ഉടലെടുക്കുകയും ചെയ്യുന്നുണ്ട്. അത്തരത്തിൽ കാഴ്ചക്കാരെ വെറുതെയിരുത്താതെ അവരെയും സിനിമയുടെ ഭാഗമാക്കി കൊണ്ടുപോവാൻ കഥക്ക് സാധിച്ചിട്ടുണ്ട്. സിനിമ ആവശ്യപ്പെടുന്ന വേഗതയിൽ മാത്രമാണ് സഞ്ചാരമെങ്കിലും വിരസത നമുക്ക് തോന്നുകയേ ഇല്ല.

🔻കഥാപാത്രങ്ങളുടെ വൈകാരികത ഗംഭീരമായി അവതരിപ്പിച്ചിട്ടുണ്ട് സംവിധായകൻ. ഒരു കൊച്ചുകുട്ടിക്ക് പോലും ഇമോഷണൽ ബാക്ക്ഡ്രോപ്പ് നൽകി കഥ അവസാനിക്കുമ്പോൾ രഹസ്യങ്ങളുടെ കൂമ്പാരമാണ് നമ്മെ കാത്തിരിക്കുന്നത്. ബ്രില്യന്റ് എന്ന് തോന്നും വിധമുള്ള ക്യാരക്ടർ ഡെവലപ്മെന്റ് തന്നെയാണ് അതിന് കാരണം. ഒപ്പം മികച്ച പ്രകടനങ്ങളും ഓരോരുത്തരും കാഴ്ചവെച്ചിട്ടുണ്ട്. ഇമോഷണലി എല്ലാ കഥാപാത്രങ്ങളെയും നമുക്ക് കണക്റ്റ് ചെയ്യാൻ സാധിക്കുന്നിടത്ത് ചിത്രം വിജയിക്കുന്നു.

🔻പശ്ചാത്തലസംഗീതം മാത്രമാണ് ആകെയൊരു പോരായ്മയായി തോന്നിയത്. ചില രംഗങ്ങളിൽ ത്രില്ലർ പരിവേഷം സ്വീകരിക്കുമ്പോഴും വളരെ ഫ്‌ളാറ്റായ സംഗീതമാണ് അവിടെയും ഉപയോഗിച്ചിരിക്കുന്നത്. ആ രംഗങ്ങളെ എലവേറ്റ് ചെയ്യാൻ സംഗീതത്തിന് സാധിച്ചിട്ടില്ല. എങ്കിലും അഭിനേതാക്കളുടെ പ്രകടനം ആ രംഗങ്ങളെയും പിടിച്ച് നിർത്തുന്നുണ്ട്. മനോഹരമായ ഛായാഗ്രഹണവും എടുത്ത് പറയേണ്ടതാണ്.

🔻ＦＩＮＡＬ ＶＥＲＤＩＣＴ🔻

Suspect Xന്റെ രചയിതാവിൽ നിന്ന് ആറാമത്തെ സംരംഭം സിനിമയായപ്പോൾ വളരെ മികച്ച ഇമോഷണൽ-മിസ്റ്ററി-ഡ്രാമയാണ് നമുക്ക് ലഭിച്ചിരിക്കുന്നത്. കഥാപാത്രങ്ങളുടെ ഇമോഷൻസിന് വളരെയേറെ പ്രാധാന്യം നൽകുന്ന, ഊഹിക്കാവുന്നതിനുമപ്പുറം വഴിത്തിരിവുകൾ നിറഞ്ഞ നല്ലൊരു അനുഭവം. തീർച്ചയായും നഷ്ടബോധം ഉണ്ടാവാത്ത ഒന്നാവും ഈ ചിത്രം.

ＡＢ ＲＡＴＥＳ ★★★½

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻സെലിബ്രിറ്റികളെ തന്റെ ഷോയിലേക്ക് ഗസ്റ്റുകളായി വിളിക്കുക. എന്നിട്ട് അടപടലം ട്രോളുക. ഇതാണ് Between Two Ferns എന്ന പരിപാടിയുടെ ലക്ഷ്യം. അതിന്റെ അവതാരകനായ Zack Galifianakis അത് ഭംഗിയായി നിറവേറ്റുന്നുമുണ്ട്. ആ Talk Showയെ ചുറ്റിപ്പറ്റിയുള്ള സിനിമയാണ് Netflix പുറത്തിറക്കിയ ഈ ചിത്രം.

Year : 2019
Run Time : 1h 22min

🔻ഈ ടോക്ക് ഷോയുടെ പൊതുസ്വഭാവം പുലർത്തിക്കൊണ്ട് തന്നെ ചെറിയ രീതിയിലുള്ള ഒരു കഥ ഒരുക്കിയിരിക്കുകയാണ് ചിത്രം. രണ്ട് ആഴ്ച കൊണ്ട് 10 സെലിബ്രിറ്റികളുമായി ടോക്ക് ഷോ നടത്തുക എന്നൊരു വെല്ലുവിളി നായകന് മുന്നിൽ വരുന്നു. അതിനായി നടത്തുന്ന യാത്രയും അതിലൂടെ സംഭവിക്കുന്ന കാര്യങ്ങളും ടോക്കുകളും രസകരമായി ഒരുക്കിയിരിക്കുകയാണ് ഈ ചിത്രത്തിലൂടെ. ഒരു മുഴുനീള കോമഡി കണ്ടന്റ് നിറഞ്ഞ് നിൽക്കുന്ന ചിത്രമെന്ന നിലയിൽ മടുപ്പില്ലാത്ത ഒന്നര മണിക്കൂർ സമ്മാനിക്കുന്നു ഈ ചിത്രം.

🔻Mathew MacConaughey, Brie Larson, Keanu Reeves, Paul Rudd തുടങ്ങി സെലിബ്രിറ്റികളുടെ നീണ്ട നിര തന്നെയുണ്ട് ചിത്രത്തിൽ. അവരെയൊക്കെ കളിയാക്കുന്നതും ട്രോളുന്നതും ഏറെ ചിരിപ്പിക്കുന്നുണ്ട്. ശരിക്കും Abuse പോലെ തന്നെയാണ് പല ഡയലോഗുകളും. പക്ഷെ പരിപാടി തന്നെ അങ്ങനെയായത് കൊണ്ട് ആ മൈന്റ് സെറ്റിൽ അത് ചിരി ഉണർത്തും. ഒടുവിൽ പടം കഴിഞ്ഞ് ക്രെഡിറ്റ് സീനിൽ ഉൾപ്പടെ പൊട്ടിച്ചിരിപ്പിക്കുന്ന ഒരുപിടി ഡയലോഗുകൾ ഉണ്ട്. തുടക്കം മുതൽ ഒടുക്കം വരെ ഒരു ചെറിയ സ്റ്റോറി ലൈനിൽ ഒരുപാട് ചിരിച്ച് കണ്ടുതീർക്കാം ചിത്രം.

🔻ＦＩＮＡＬ ＶＥＲＤＩＣＴ🔻

ഒരു Sit-Com എന്ന പോലെ സ്വഭാവം പുലർത്തുന്ന ടോക്ക് ഷോ സിനിമയാവുമ്പോൾ എത്രത്തോളം പ്രേക്ഷകരെ രസിപ്പിക്കാമോ അത്രത്തോളം ചിരി ഉണർത്തുന്നുണ്ട് ചിത്രം. പ്രത്യേകിച്ച് ലോജിക്കോ കഥയോ നോക്കാതെ ചിരി മാത്രം പ്രതീക്ഷിച്ച് കാണാനിരുന്നാൽ ഒരു നിരാശയും നൽകില്ല എന്നുറപ്പ്. മാത്രമല്ല ഷോ കാണാൻ ചെറിയൊരു ആഗ്രഹവും നമുക്ക് തോന്നും.

ＡＢ ＲＡＴＥＳ ★★★☆☆

ചിത്രം ടെലിഗ്രാം ചാനലിൽ ലഭ്യമാണ്. Abi Suggests