Abeed Azad

🔻ചെറുപ്പത്തിൽ അവൾ കണ്ട ജീവിതങ്ങളാവാം അവളുടെ ഭാവി നിർണ്ണയിച്ചത്. 'A Girl Who Hurt Men Who Hurt Women'. ഇതായിരുന്നു ലിസ്ബെത്തിനുള്ള വിശേഷണം. ഒരു ഹാക്കർ കൂടിയായിരുന്ന ലിസ്ബെത്തിന് NSAയിലേക്ക് ഹാക്ക് ചെയ്യേണ്ട ജോലി എത്തുന്നതോട് കൂടി ജീവിതം പ്രതീക്ഷകൾക്ക് വിപരീതമായി സഞ്ചരിക്കുന്നു.

Year : 2018
Run Time : 1h 57min

🔻ഹാക്കിങ്ങും സ്പൈ ത്രില്ലറുകളുമൊന്നും നമുക്ക് പുതുമയുള്ള കാര്യമല്ല. ആദ്യമൊക്കെ പലതും ആകാംഷ ജനിപ്പിച്ചിരുന്നെങ്കിൽ പിന്നീട് അവതരണത്തിലുള്ള മികവിന് അനുസരിച്ചായി ആസ്വാദനം. അത്തരത്തിൽ നോക്കുമ്പോൾ ചുരുക്കം ചില രംഗങ്ങൾ അല്ലെങ്കിൽ ടെക്നിക്കുകൾ ഒഴിച്ചാൽ ഇതുവരെ കണ്ടുമടുത്ത ചട്ടക്കൂടിൽ തന്നെ പണിതെടുത്ത ഒരു ജീവിതമാണ് ലിസ്ബത്തിന്റേത്. കഥയുടെ പോക്കും ട്വിസ്റ്റും സസ്പെൻസുമൊക്കെ ഏറെക്കുറെ ഊഹിക്കാൻ സാധിക്കുന്നിടത്ത് മടുപ്പ് അനുഭവപ്പെടുത്തുന്നു ഈ ചിത്രം.

🔻കഥയിൽ ചില ഫാമിലി എലമെന്റുകൾ വരുമെന്ന് ആദ്യമേ പ്രതീക്ഷിച്ചിരുന്നു. അതുപോലെ തന്നെ സംഭവിക്കുമ്പോൾ യാതൊരു കൂസലും കാണുന്നവർക്ക് ഉണ്ടാവില്ല. ട്വിസ്റ്റിന്റെയും ഗതി അത് തന്നെ. ആകെ പോസിറ്റീവ് പറയാനായി തോന്നിയത് ചില രംഗങ്ങൾ മാത്രമാണ്. അതിൽ ക്ലൈമാക്സിൽ ഒരെണ്ണം നന്നായി തോന്നി. കൂടെ മികച്ച  ക്യാമറവർക്കും കാഴ്ച്ചക്ക് പിന്തുണ നൽകുന്നുണ്ട്. പശ്ചാത്തലസംഗീതം മോശമായില്ല.

🔻ＦＩＮＡＬ ＶＥＲＤＩＣＴ🔻

പുതുമയൊന്നും പ്രതീക്ഷിക്കാതെ വീണ്ടും ഹാക്കിങ്ങ് കാണണമെങ്കിൽ ചിത്രം കാണുക. ചിലപ്പോൾ ഇഷ്ടപ്പെട്ടേക്കാം. അവിടിവിടെയായി ചില ആക്ഷൻ രംഗങ്ങൾ ഉള്ളതുകൊണ്ട് ബോറടിയില്ല. ഒഴിവാക്കിയാലും യാതൊരു നഷ്ടവുമില്ല.

ＡＢ ＲＡＴＥＳ ★★☆☆☆

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻ഒരു പ്രിസൺ ഐലന്റിൽ തന്റെ പ്രതികാരം ചെയ്യാനാണ് അദ്ദേഹം എത്തിയത്. എന്നാൽ അതിനപ്പുറം മറ്റ് ചിലരെ സംരക്ഷിക്കുക എന്ന ജോലിയിലേക്ക് കൂടി അദ്ദേഹം മാറുന്നു. തുടർന്ന് ഒരു യുദ്ധക്കളത്തിന് നടുവിലെ പോരാളിയായി മാറുന്നു അദ്ദേഹം.

Year : 2018
Run Time : 1h 42min

🔻തുടക്കം മുതൽ ഒടുക്കം വരെ ഇടിയോടിടി. അതാണ് സിനിമ കരുതിവെച്ചിരിക്കുന്നത്. നായകനെ പരിചയപ്പെടുത്തുന്ന ആദ്യരംഗം മുതൽ സിനിമ അവസാനിക്കുന്നത് വരെ ചെറിയ ഇടവേളകളിൽ പൊരിഞ്ഞ ഇടിയാണ്. അതും നല്ല സ്റ്റൈലൻ ഐറ്റം. പക്ഷെ അത് മാത്രമേ സിനിമയിലുള്ളൂ എന്നതാണ് കഷ്ടം.

🔻റിവഞ്ച് എന്ന ത്രെഡിലാണ് മുന്നോട്ട് പോവുന്നതെങ്കിലും അതെന്തിന് എന്ന് നമ്മളോട് ഒരിക്കലും പറയുന്നില്ല. ഇടയ്ക്കിടെ മിന്നിമറഞ്ഞ് പോവുന്ന ചില ഫ്ലാഷ്ബാക്ക് സീനുകൾ കൊണ്ട് ആ കഥക്ക് ഒരു പൂർണ്ണതയും ലഭിക്കുന്നില്ല. മൊത്തത്തിൽ എന്തിനാണ് ഇത്രയൊക്കെ സംഭവിച്ചതെന്ന് ഓർത്ത് സിനിമ കഴിയുമ്പോൾ വായും തുറന്നിരിക്കും.

🔻ആക്ഷൻ സീനുകൾ ഗംഭീരമായി തന്നെ കൊറിയോഗ്രാഫി ചെയ്തിട്ടുണ്ട്. നായകൻറെ One Man Show ആണ് ഭൂരിഭാഗവും. രക്തച്ചൊരിച്ചിലുകൾക്ക് ഒരു കുറവുമില്ല. പക്ഷെ ഒരു കഥയില്ലാതെ മുന്നോട്ട് പോവുമ്പോൾ ആക്ഷൻ സീനുകളുടെ ആധിക്യം ഇടക്ക് വിരസത നൽകിയെന്ന് പറയാതെ വയ്യ. പ്രിസൺ ഐലന്റിനെ നല്ല രീതിയിൽ അവതരിപ്പിക്കാൻ സാധിച്ചിട്ടുണ്ട്.

🔻ＦＩＮＡＬ ＶＥＲＤＩＣＴ🔻

ആക്ഷൻ പ്രേമികൾക്ക് നല്ലൊരു വിരുന്ന് തന്നെയാവും ഈ ചിത്രം. പക്ഷെ അതിൽ കഥയൊരു തരിപോലും പ്രതീക്ഷിക്കരുത്. Back-To-Back ആക്ഷൻ. അത് മാത്രം. ആക്ഷൻ മാത്രമല്ല പ്രതീക്ഷിച്ചിരുന്നത് എന്നതുകൊണ്ട് മൊത്തത്തിൽ അൽപ്പം നിരാശ നൽകിയ അനുഭവമായിരുന്നു എനിക്ക് ഈ ചിത്രം

ＡＢ ＲＡＴＥＳ ★★☆☆☆

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

രാവിലെ ഏഴരക്കുള്ള ഫാൻസ്‌ ഷോവിന് തീയേറ്ററിനകത്തേക്ക് പ്രവേശിക്കാൻ നിക്കുമ്പോൾ നാലരക്കുള്ള ഷോ കഴിഞ്ഞ് ഇറങ്ങിയവരുടെ ദയനീയമായ മുഖഭാവങ്ങൾ കാണുവാനിടയായി. അപ്പോൾ തന്നെ പടത്തെ കുറിച്ച് ഏകദേശ ധാരണ കൈവന്നിരുന്നു. അതുകൊണ്ട് തന്നെ യാതൊരു പ്രതീക്ഷയും ഇല്ലാതെയാണ് കാണാൻ കയറിയത്.


🔻വാരണാസിയിൽ ഒടിയൻ മാണിക്യത്തെ പരിചയപ്പെടുത്തി അദ്ദേഹത്തിന്റെ ഭൂതകാലത്തേക്കാണ് ചിത്രം സഞ്ചരിക്കുന്നത്. തെക്കുറിശ്ശിയിലെ അദ്ദേഹത്തിന്റെ ജീവിതവും ഒടിവിദ്യയുമായി ചിത്രം മുന്നോട്ട് സഞ്ചരിക്കുമ്പോൾ അദ്ദേഹത്തിന്റെ മനസ്സിനും ജീവിതത്തിനും പോറലേൽപിച്ച ഒരുപിടി സംഭവങ്ങളും അവിടെയൊരുങ്ങുന്നു.

🔻ഒരു മാസ് എന്റെർറ്റൈനെർ എന്ന ലേബലിൽ തന്റെ പ്രോഡക്റ്റിനെ കച്ചവടം ചെയ്ത സംവിധായകൻ ശ്രീകുമാറിന് തന്നെയാണ് സിനിമ മോശമായതിലുള്ള മുഴുവൻ പഴിയും. സാക്ഷാൽ തള്ളന്താനം വരെ തോറ്റുപോവുന്ന അസാധ്യ തള്ളുകളും സിനിമയെ കുറിച്ചുള്ള പ്രസ്താവനകളും  ഏതൊരു പ്രേക്ഷകനിലും ചെറിയ പ്രതീക്ഷ നൽകുന്നവയാണ്. അവ തള്ളാണെന്ന ബോധ്യം ഉണ്ടെങ്കിൽ കൂടി. എന്നാൽ അദ്ദേഹത്തിന്റെ തന്റെ ഭാഷയിൽ പറഞ്ഞാൽ 'സീരിയലിന് നാടകത്തിലുണ്ടായ മകനാണ് ഒടിയൻ'.

🔻പണ്ടുമുതലേ കണ്ടുമടുത്ത പ്രമേയം. അതിൽ ഒടിയൻ എന്ന കോൺസെപ്റ് അവിടിവിടെയായി പ്ലേസ് ചെയ്തു എന്നതൊഴിച്ചാൽ യാതൊരു പുതുമയും സിനിമയിലില്ല. പാളിപ്പോയ നോൺ ലീനിയർ നറേഷൻ ആദ്യപകുതിയിൽ ഒരു പരിധി വരെ മോശമല്ലാത്ത പോവുന്നുണ്ടെങ്കിലും രണ്ടാം പകുതിയിൽ മുഴുവൻ കൈവിട്ട് പോവുന്നുണ്ട്. അതോടൊപ്പം മുഴുവനായി ഊഹിക്കാവുന്ന കഥയായതുകൊണ്ട് കൂടി യാതൊരു താല്പര്യവും ജനിപ്പിക്കുന്നില്ല. പലപ്പോഴും പ്രേക്ഷകർ Be Like 'ഒരു ഫോർവേഡ് ബട്ടൺ കൂടി വെക്കാവോ' എന്ന അവസ്ഥയിലാവുന്നുണ്ട്. മെലോഡ്രാമ കണക്കെ നീണ്ടുനീണ്ടു പോവുന്ന കഥാസാരം വലിയുന്നത് കണ്ട് റബ്ബർ ബാന്റിന് പോലും നാണം തോന്നും. അതാണ് സ്ഥിതി..!

🔻ഒടിവിദ്യയെ പറ്റി സംവിധായകനും തിരക്കഥാകൃത്തിനും വല്യ പിടിയില്ല എന്ന് തോന്നിപ്പോവും പലപ്പോഴും. അവയൊക്കെ അവതരിപ്പിച്ചിരിക്കുന്ന രംഗങ്ങളിൽ യാതൊരു ജിജ്ഞാസയും തോന്നിക്കുന്നില്ല. ഏതൊരു രംഗവും പോവുന്നത് പോലെ തന്നെ നിർവ്വികാരമായി കടന്നുപോവുന്ന ഒന്നായി ആ രംഗങ്ങളും മാറുന്നുണ്ട്. കഥയുടെ ചില ഭാഗങ്ങളിലെ അവതരണമൊഴിച്ചാൽ പലപ്പോഴും വിരസതയിലേക്ക് കൂപ്പുകുത്തുന്നുണ്ട് ഒടിയന്റെ കഥ.

🔻മാണിക്യന് ഒത്തൊരു വില്ലനെ സിനിമയിലെവിടെയും കാണാൻ സാധിക്കില്ല. വാക്കുകൾ കൊണ്ട് കുത്തിത്തിരിപ്പ് ഉണ്ടാക്കുന്ന പ്രകാശ് രാജിന്റെ കഥാപാത്രം പലപ്പോഴും ദുർബ്ബലനായി ഫീൽ ചെയ്യുന്നുണ്ട്. ചുരുക്കം ചില കഥാപാത്രങ്ങളൊഴിച്ച് മറ്റാരും നമ്മുടെ ശ്രദ്ധയിൽ പോലും പെടുന്നില്ല. അത്ര ബലഹീനമായ തിരക്കഥ ആസ്വാദനത്തിന് വല്ലാതെ തടയിടുന്നുണ്ട്. കൂടെ കേരള രാജമൗലി, സോറി ശ്രീ പുഷ്‌കുമാരമേനോന്റെ നാടകനിലവാരത്തിലുള്ള മേക്കിങ്ങും.

🔻ക്ലൈമാക്സിൻന് തൊട്ടുമുമ്പ് വരെ എങ്ങനെയെങ്കിലും പിടിച്ചുനിന്നെങ്കിലും ക്ലൈമാക്സ് ആയപ്പോൾ സകല കണ്ട്രോളും പോയി. കുറെ തീയും പുകയും മാത്രം കണ്ടു സ്‌ക്രീനിൽ. എന്താണ് നടക്കുന്നതെന്ന് നേരെചൊവ്വേ കാണാൻ പോലും സാധിക്കാത്ത വിധം മോശമായ സംഘട്ടനം ഒരു വൻ ദുരന്തമായിരുന്നു എന്ന് പറയാതെ വയ്യ. അതോടെ ചത്ത വീട്ടിൽ മരിച്ചവർ ഇരിക്കുന്ന അവസ്ഥയായി തീയേറ്ററിൽ.

🔻മോഹൻലാലിന് വെല്ലുവിളി ഉയർത്തുന്ന യാതൊന്നും സിനിമയിൽ ചെയ്യാനില്ല. അതിപ്പോ ആക്ഷൻ രംഗങ്ങളിൽ ആണെങ്കിൽ പോലും പുലിമുരുകനോളം എഫേർട്ട് പോലും ഇതിനായി എടുക്കേണ്ടി വന്നിട്ടുണ്ടാവില്ല. ആദ്യ ആക്ഷൻ രംഗം നന്നായി ഇഷ്ടപ്പെട്ടു. ലാലേട്ടന്റെ എനർജി ഫീൽ ചെയ്തത് അവിടെ മാത്രമാണ്. കൂടെ ഉറങ്ങിക്കിടന്ന കാണികളെ ഉണർത്തിയ ഏക സീനും അത് മാത്രമാണ്. സിനിമയിൽ ആരെങ്കിലും മെച്ചപ്പെട്ട പ്രകടനം കാഴ്ച്ചവേച്ചോ എന്ന് ചോദിച്ചാൽ മഞ്ജുവാര്യർ എന്നാവും ഉത്തരം. തിരിച്ചുവരവിൽ പലപ്പോഴും പാളിപ്പോയ അഭിനയം ഇവിടെ നന്നായി ചെയ്തിട്ടുണ്ട്. പ്രകാശ് രാജ് അഭിനയം നന്നാക്കിയപ്പോഴും ഡബ്ബിങ്ങിൽ പാളി. നരേനും കൈലാഷും സിദ്ധീഖുമൊക്കെ അവരുടെ വേഷങ്ങൾ ഭംഗിയായി കൈകാര്യം ചെയ്തു.

🔻ഒടിയന്റെ പോസിറ്റീവുകളിൽ ഒന്നാണ് ഛായാഗ്രഹണം. രാത്രിയെ നന്നായി പകർത്തിയിരിക്കുന്നത് പലയിടങ്ങളിലും കാണാം. പശ്ചാത്തലസംഗീതം നന്നായെങ്കിലും ആവശ്യമില്ലാത്ത ചിലയിടങ്ങളിൽ കർണ്ണകഢോരമായ ശബ്ദത്തിൽ അലോസരപ്പെടുത്തിയിട്ടുണ്ട്. രണ്ടാം പകുതിയിൽ സീനുകൾ അടുക്കിയിരിക്കുന്നത് കണ്ടപ്പോൾ ഓർമ്മ വന്നത് ഹിറ്റ്ലറിൽ ജഗദീഷ് പ്രതിമ അടുക്കി വെക്കുന്ന രംഗമാണ്. അതാണ് എഡിറ്റിങ്ങിന്റെ അവസ്ഥ. കൂടെ misplacingന്റെ അങ്ങേയറ്റമായ്‌ 'കൊണ്ടോരാം' ഗാനവും ബോംബ് കഥയിലെ വിജയരാഘവന്റെ ടോണിൽ പറഞ്ഞാൽ 'നല്ല ഫ്രഷ് ആയ കോരിയോഗ്രാഫി' കൂടി ആയപ്പോൾ ശുഭം.

🔻ＦＩＮＡＬ ＶＥＲＤＩＣＴ🔻

കാണികളെ കഴുതകളാക്കുന്ന ഒടിവിദ്യ സ്വായത്തമാക്കിയ ശ്രീകുമാരമേനോൻ തന്റെ സിനിമയിലൂടെ നിരാശ മാത്രം നൽകിയപ്പോൾ 'പരസ്യകല' തന്നെയാണ് തനിക്ക് പറ്റിയ ഇടമെന്ന് അദ്ദേഹം തെളിയിച്ചു. എങ്കിലും മാസ്സ് ഡയലോഗ് പറഞ്ഞ് ക്ഷീണിച്ച നായകന് നായികയെ കൊണ്ട് കഞ്ഞി ഓഫർ ചെയ്യിച്ച സംവിധായകന്റെ മനുഷ്യത്വം നമ്മളാരും കാണാതെ പോവരുത്.

ＡＢ ＲＡＴＥＳ ★★☆☆☆

Year : 2010
Run Time : 2h 1min

🔻30 ചോദ്യങ്ങൾ അടങ്ങിയ ഒരു ക്വിസ് പ്രോഗ്രാം. 29 ചോദ്യങ്ങൾക്ക് ഉത്തരം നൽകി അവസാന റൗണ്ടിലെത്തിയ ആരും ഇതുവരെ ജയിച്ച ചരിത്രമില്ല. അതുകൊണ്ട് തന്നെ താണ്ടാൻ സാധിക്കാത്ത കടമ്പയായി ആ പരിപാടി തുടങ്ങിയ അന്നുമുതൽ മുപ്പതാമത്തെ ചോദ്യം നിലനിൽക്കുന്നു. എന്നാൽ ആ ചോദ്യം നേരത്തെ അറിഞ്ഞാലോ.?

🔻ഹൈവേയിൽ നടന്ന ഒരു ആക്സിഡന്റിലാണ് ആ കൂട്ടരെല്ലാം പോലീസ് സ്റ്റേഷനിൽ എത്തുന്നത്. എന്നാൽ ഒരിക്കലും പ്രതീക്ഷിക്കാത്ത ഒരു കാര്യം അവിടെ അരങ്ങേറുന്നു. തുടർന്ന് അവരെല്ലാം ഒരേ ലക്ഷ്യത്തോടെ ഇറങ്ങിപ്പുറപ്പെടുന്നു. Money Money Money...!!

🔻ഒരു കിടിലൻ തീം തന്നെയാണ് ഈ സിനിമയുടേത്. ത്രില്ലിനും ട്വിസ്റ്റിനും സസ്പെൻസിനുമൊക്കെ ഒരുപാട് സാധ്യതകൾ ഉള്ള പ്രമേയം. എന്നാൽ അവയൊക്കെയും മറന്ന് ഈ സിനിമയെ വെറും കോമഡിയിൽ മാത്രം എന്തിന്  പൊതിഞ്ഞെടുത്തതെന്ന് ഉത്തരം കിട്ടാത്ത ചോദ്യമായി നിലനിൽക്കുന്നു.

🔻കഥാപാത്രങ്ങളുടെയൊക്കെയും പ്രാഥമിക ആവശ്യം പണമാണെന്ന് സംഭാഷണങ്ങളിലൂടെ പറഞ്ഞ രീതിയൊക്കെ നന്നായിരുന്നു. അതോടൊപ്പം പോലീസ് സ്റ്റേഷൻ രംഗങ്ങളിലെ നർമ്മങ്ങളും. എന്നാൽ അതിന്റെ ഹാങ്ങോവർ സിനിമയിലുടനീളം കൊണ്ട് നടന്നത് വളരെ മോശം അറ്റംപ്റ്റ് തന്നെയെന്ന് പറയാതെ വയ്യ. ക്വിസ് നടക്കുന്ന രംഗങ്ങളിൽ പോലും അനാവശ്യമായി കോമഡി നിറച്ചത് തെല്ലൊന്നുമല്ല ആ രംഗങ്ങളുടെ ആവേശം കെടുത്തുന്നത്. ഒടുവിൽ ചെറിയൊരു ട്വിസ്റ്റ് കൂടി കൊടുത്തത് അത്ര നേരം ഉണ്ടായ മടുപ്പിൽ നിന്ന് ലേശം കരകയറ്റുന്നുണ്ട് എന്ന് മാത്രം.

🔻ＦＩＮＡＬ ＶＥＲＤＩＣＴ🔻

Bad Genius ലെവലിൽ പോകാമായിരുന്ന ഒരു തീമിനെ വെറും കോമഡി പീസാക്കി മാറ്റിയത് എങ്ങനെയെന്ന് എത്ര ആലോചിച്ചിട്ട് പിടികിട്ടുന്നില്ല. ചുരുളഴിയാത്ത രഹസ്യമായി അതിപ്പോഴും അവശേഷിക്കുന്നു.

ＭＹ ＲＡＴＩＮＧ :: ★★☆☆☆

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

Year : 2018
Run Time : 1h 45min

🔻പട്ടിണിയുടെ പരാധീനതയിൽ മുഴുകിയ കുടുംബം. അന്നന്നുള്ള അന്നങ്ങൾ കണ്ടെത്താൻ വരെ പൊറുതിമുട്ടുന്നവർ. മൂന്ന് അംഗങ്ങളാണ് ആ കുടുംബത്തിൽ. സ്നേഹം മാത്രം ഉള്ളിലുള്ള ഗൗരമ്മയും കള്ള് കുടിക്കാൻ മാത്രം തന്റെ പൈസ ചെലവഴിക്കുന്ന മുത്തണ്ണയും അവരുടെ മകളും. ദേഷ്യക്കാരിയായ, ധൈര്യവതിയായ മല്ലികയും.

അവിടേക്കാണ് ഒരു രാത്രിയിൽ തന്റെ തല ചായ്ക്കാൻ അൽപ്പം സ്ഥലം നൽകാൻ അപേക്ഷിച്ച് ഒരു സഞ്ചാരിയെത്തുന്നത്. മനസ്സില്ലാമനസ്സോടെ സമ്മതിച്ചെങ്കിലും അയാൾ അവരുടെ, ആ രാത്രിയുടെ തന്നെ ഗതി മാറ്റുന്നു.

🔻വളരെ നല്ല ക്രിട്ടിക്സ് അഭിപ്രായങ്ങൾ കേട്ടാണ് സിനിമ കാണാനൊരുങ്ങിയത്. എന്നാൽ ഫലമോ സീരിയൽ നിലവാരം മാത്രം പുലർത്തുന്ന ഒരു ചിത്രവും. കന്നഡ ഇൻഡസ്ട്രി പൊതുവെ സാങ്കേതികപരമായി പിന്നോക്കം നിൽക്കുന്നതാണെന്ന് തോന്നിയിട്ടുണ്ട്. രംഗിതരംഗ അതിനൊരുദാഹരണമാണ്. എന്നാൽ ഇത്ര ദാരിദ്ര്യം പുലർത്തുന്ന സിനിമ ഇതാദ്യമായാണ് കാണുന്നത്.

🔻കഥയിൽ പുലർത്തുന്ന നിലവാരം ഒരുതരി പോലും അവതരണത്തിൽ പുലർത്താത്തതാണ് ഈ സിനിമയുടെ ഏറ്റവും വലിയ പോരായ്മ. കഥയും കാര്യമായി പുതുമ ഒന്നും പറയാനില്ലെങ്കിൽ കൂടി അവതരണത്തിൽ അത് മെച്ചപ്പെടുത്താമായിരുന്നു. അത്തരത്തിൽ ഒരു അന്തരീക്ഷം സൃഷ്ടിച്ചെടുക്കാനുള്ള എല്ലാ സ്കോപ്പുകളും കഥക്കുണ്ടായിട്ടും അതൊന്നും ഉപയോഗിക്കാൻ സാധിച്ചിട്ടില്ല. അതുകൊണ്ട് തന്നെ അവസാനത്തെ ട്വിസ്റ്റ് മാത്രമാണ് അൽപ്പമെങ്കിലും തൃപ്തി നൽകിയത്.

🔻പശ്ചാത്തലസംഗീതവും ക്യാമറവർക്കുകളും ഒന്നും പറയാതിരിക്കുന്നതാണ് നല്ലത്. സീരിയല്ലെന്ന് പൂർണ്ണമായി അടിവരയിടുന്ന ഘടകങ്ങൾ മാത്രമായി അവ. ചില സ്ഥലങ്ങളിൽ അൽപ്പം നിലവാരം പുലർത്തുന്നുണ്ടെങ്കിലും ക്ഷണനേരത്തിനുള്ളിൽ അത് കൈവിടുന്നുണ്ട്. പ്രകടനപരമായി തൃപ്തികരമായിരുന്നു ഏവരും. പ്രത്യേകിച്ച് മല്ലികയുടെ വേഷം ചെയ്ത കുട്ടി.

🔻ＦＩＮＡＬ ＶＥＲＤＩＣＴ🔻

ഒരു സീരിയൽ നിലവാരം മാത്രം പുലർത്തുന്ന ചിത്രം കാണാൻ ആഗ്രഹിക്കുന്നവർ അവസാനത്തെ വഴിത്തിരിവിന് വേണ്ടി മാത്രം കൈവെക്കുക. നല്ലൊരു സിനിമ പ്രതീക്ഷിച്ചാൽ നിരാശയവും ഫലം.

ＭＹ ＲＡＴＩＮＧ :: ★★☆☆☆

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

Year : 2018
Run Time : 1h 37min 

🔻ഹോട്ടൽ ട്രാൻസിൽവേനിയ കണ്ടിട്ടുള്ളവർക്ക് മനസ്സിലാവും അതിലെ ഓരോ കഥാപാത്രങ്ങളും എത്ര രസകരമാണെന്നും ഇത്രയേറെ നർമ്മങ്ങൾക്ക് അവർ ഉപകരിക്കുമെന്നും. അതുകൊണ്ട് തന്നെ രണ്ട് ഭാഗങ്ങൾക്ക് ശേഷം മൂന്നാമതൊന്ന് വന്നപ്പോൾ പ്രതീക്ഷകൾ ഉണ്ടാവുക സ്വാഭാവികം. എന്നാൽ പ്രേക്ഷകർക്ക് ലഭിച്ചതോ ആ ഫ്രാഞ്ചൈസിയിൽ ഏറ്റവും ദുർബ്ബലമായ സിനിമയും.

🔻ഡ്രാക്കുളക്കും വേണ്ടേ അൽപ്പം വിശ്രമം. തന്റെ കൊട്ടാരത്തിലെ പണികളിൽ മാത്രം മുഴുകിയിരുന്ന ഡ്രാക്കുളക്ക് മകൾ മേവിസാണ് ഒരു വെക്കേഷൻ സജസ്റ്റ് ചെയ്യുന്നത്. അതിനായി മേവിസ് ഒരുക്കിയതാവട്ടെ കപ്പലിൽ ഒരു ട്രിപ്പും. അതും മുഴുവൻ മോൺസ്റ്റർ കുടുംബവും അടങ്ങിയത്. എന്നാൽ ആ ട്രിപ്പ് സന്തോഷം പകരുന്ന ഒന്ന് മാത്രമാവുമോ..?

🔻ക്ളീഷേ കഥയും അതിന്റെ ശരാശരി അവതരണവും മാത്രമാണ് ഇത്തവണ ട്രാന്സിൽവേനിയയിൽ ഉള്ളത്. അതും എന്ത് സംഭവിക്കുമെന്ന് നമ്മൾ നേരത്തെ ഊഹിക്കും. യാതൊരു തരത്തിലും ആകാംഷ നൽകുന്നില്ല ആ കഥ. എന്നാൽ പേരിന് കുറച്ച് കോമഡിയെങ്കിലും ചേർത്തൂടെ. അതിനും ദാരിദ്ര്യം മാത്രമാണ് ഫലം. അതുകൊണ്ട് തന്നെ അൽപ്പം മടുപ്പുളവാക്കുന്ന അനുഭവം മാത്രമാവുന്നു ഡ്രാക്കുളയും കൂട്ടരും സമ്മാനിച്ചത്.

🔻ഇടക്ക് ചില കഥാപാത്രങ്ങളിൽ വരുന്ന മാനറിസങ്ങൾ നന്നായി യൂട്ടിലൈസ് ചെയ്തിട്ടുണ്ട്. പ്രത്യേകിച്ച് ഡ്രാക്കുളയുടെ 'Gangnam Style' ഡാൻസ്. അങ്ങനെയുള്ള ചില സന്ദർഭങ്ങളിൽ ഉയരുന്ന ചിരി മാത്രമാണ് പോസിറ്റീവ് ആയി എടുത്ത് പറയാൻ സാധിക്കുക.

🔻ＦＩＮＡＬ ＶＥＲＤＩＣＴ🔻

സിനിമ കഴിഞ്ഞപ്പോൾ ഡ്രാക്കുളാക്കും കൂട്ടർക്കും നല്ലൊരു കഥയൊരുക്കാൻ അണിയറക്കാർ ഒരു വെക്കേഷൻ എടുക്കണമെന്ന് ആഗ്രഹിച്ചുപോയി.

ＭＹ ＲＡＴＩＮＧ :: ★★☆☆☆

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

Year : 2018
Episode : 12

🔻ഓരോ സീസൺ കഴിയുമ്പോഴും ടോക്യോ ഗൗളിന്റെ ഗ്രാഫ് മൂക്കുകുത്തി താഴോട്ട് പോവുകയാണ്. മികച്ച പ്രമേയത്തോടെയും അവതരണത്തോടെയും തുടങ്ങിയെങ്കിലും അത് തുടരാനാവാത്തതിന്റെ ഉദാഹരണങ്ങളാണ് പിന്നീടങ്ങോട്ട് വന്ന രണ്ട് സീസണും.

🔻CCGയുടെ 'Antikeu'ലെ റൈഡ് കഴിഞ്ഞിട്ട് ഏതാണ്ട് രണ്ട് വർഷം പിന്നിടുന്നു. ഗൗളുകളുടെ ശല്യം കുറഞ്ഞെങ്കിലും പ്രതീക്ഷിക്കാത്ത വിധത്തിൽ പലയിടങ്ങളിലും അവയുടെ പ്രാതിനിധ്യം കാണാൻ സാധിക്കുന്നുണ്ട്. അതിനെതിരെയുള്ള തയ്യാറെടുപ്പെന്നോണമാണ് പുതിയൊരു ടീം കൂടി CCG രൂപപ്പെടുത്തിയത്. 'Quinx Squad'. അതാണ് അവരുടെ പേര്. മനുഷ്യരിൽ തന്നെ ഗൗളുകളുടെ കഴിവുള്ള ഒരുപറ്റം ആളുകൾ. അവരുടെ നേതാവായി Haise Sasakiയും.

തന്റെ ഭൂതകാലത്തെക്കുറിച്ച് അവന് യാതൊന്നും ഓർമ്മയില്ല. ചില ദുഃസ്വപ്നങ്ങൾ അവനെ പിന്തുടരുന്നുണ്ടെങ്കിലും അവൻ അതിനെപ്പറ്റി വേവലാതിപ്പെടാറില്ല. എന്നാൽ ഓരോ എൻകൗണ്ടറുകൾ കഴിയുന്തോറും അവൻ അവനെത്തന്നെ കണ്ടെത്താൻ തുടങ്ങി.

🔻നല്ലൊരു തീം തന്നെയാണ് ഈ സീസണിലേത്. ഒരുപാട് ആലോചനകൾക്കും ബാക്ക്സ്റ്റോറികൾക്കും സ്കോപ്പുള്ള മികച്ച ത്രെഡ്. എന്നാൽ അതിനെ ഒന്നുമല്ലാതാക്കി കളഞ്ഞിടത്ത് പൂർണ്ണമായി നശിക്കുന്നു ഗൗളിന്റെ ആസ്വാദനം. വെറും ആക്ഷൻ രംഗങ്ങൾ ആസ്വദിക്കാനെന്നവണ്ണം ലാഘവത്തോടെ സമീപിക്കാവുന്ന ഒന്നായി മാത്രം മാറുന്നു ഈ സീസൺ.

🔻കേന്ദ്രകഥാപാത്രത്തേക്കാൾ എല്ലാ അർത്ഥത്തിലും സ്‌കോർ ചെയ്യുന്നത് കൂടെയുള്ളവരാണ്. ആക്ഷനായാലും കുറച്ച് മാത്രം നീളമുള്ള ബാക്ക്സ്റ്റോറികളിലായാലും ഹൈസെ നിരാശയാണ് നൽകിയത്. ഒരു കഥാപാത്രങ്ങളോടെ ഇമോഷണൽ അറ്റാച്മെന്റ് തോന്നുകയേ ഇല്ല പ്രേക്ഷകർക്ക്. പഴയ കഥാപാത്രങ്ങളെ ഒരു സീനിൽ മാത്രം ഒതുക്കി സംവിധായകൻ മാതൃകയായി (പുച്ഛം).

🔻ആദ്യ ഭാഗത്തിലെ രോമാഞ്ചിഫിക്കേഷൻ ക്ലൈമാക്സ് സീൻ പോലെ ഒരെണ്ണം ഇതിലും ട്രൈ ചെയ്യുന്നുണ്ടെങ്കിലും നനഞ്ഞ പടക്കം മാത്രമായി ആ രംഗം. ബാക്കിയൊരു ഭാഗത്തും മികവ് പുലർത്തുന്നുമില്ല ബിജിഎം. ആക്ഷൻ രംഗങ്ങൾ കൊള്ളാം. അത് മാത്രമാണ് സീരീസിന്റെ പോസിറ്റിവ്.

🔻ＦＩＮＡＬ ＶＥＲＤＩＣＴ🔻

ആദ്യ രണ്ട് ഭാഗങ്ങളേക്കാൾ നിരാശ നൽകിയ മൂന്നാം സീസണാണ് ഗൗളിന്റേത്. യാതൊരു തരത്തിലും പ്രേക്ഷകനെ പിടിച്ചിരുത്താൻ ശ്രമിക്കാത്ത, വിരസത നൽകുന്ന അനുഭവം. അടുത്ത ഭാഗമെങ്കിലും നല്ല രീതിയിൽ ഒരുക്കുമെന്ന പ്രതീക്ഷയോടെ ഒരു ഗൗൾ സ്‌നേഹി.

ＭＹ ＲＡＴＩＮＧ :: ★★☆☆☆

ചിത്രം ടെലിഗ്രാം ചാനലിൽ ലഭ്യമാണ് Abi Suggests

ഒരുപക്ഷെ കൊറിയൻ സിനിമയിലേക്ക് ഈയടുത്ത് കാലെടുത്ത് വെച്ചവർ ഭൂരിഭാഗവും ആദ്യം കണ്ട ചിത്രം Train To Busan ആയിരിക്കും. ഞാനും അതെ. ആ ചിത്രത്തിന്റെ സംവിധായകൻ 2018ൽ ഒരുക്കിയ ചിത്രമാണ് Psychokinesis.


💢ഒരു സുപ്രഭാതത്തിൽ ജോഗിങ്ങിന് പോയി തിരിച്ചുവരുന്ന വഴി കുറച്ച് വെള്ളം കുടിച്ച സിയോക്കിന് സൂപ്പർ പവർ ലഭിക്കുന്നു. അതെ സമയം തന്നെ അത്ര ചേർച്ചയിലല്ലാത്ത തന്റെ മകൾക്കും കൂട്ടർക്കും ഒരു ദുരിതം നേരിടേണ്ടി വരുന്നു. സ്വാഭാവികമായും തന്നാൽ കഴിയുന്ന രീതിയിൽ അവളെ സഹായിക്കാൻ ഏതച്ഛനും ശ്രമിക്കും.

💢സംവിധായകന്റെ പേര് കണ്ടപ്പോൾ വലിയ പ്രതീക്ഷകൾ ആയിരുന്നു. എന്നാൽ സിനിമ തുടങ്ങി കുറച്ചായപ്പോൾ തന്നെ പ്രതീക്ഷകൾ എട്ടായി മടക്കി മാറ്റിവെച്ചു. തുടക്കം മുതൽ ഒടുക്കം വരെ ഊഹിക്കാവുന്ന കഥ. പേരിന് കുറച്ച് കോമഡിയെന്ന വണ്ണം ഒന്നോ രണ്ടോ ചേർത്തിട്ടുണ്ട്. പിന്നെ കുറെ ഗ്രാഫിക്സിന്റെ കളിയും. അതിനെ പറ്റി പറയാതിരിക്കുന്നതാണ് ഭേദം.

💢ഇത്ര മോശം ഗ്രാഫിക്സ് വർക്കുകൾ ഒരു കൊറിയൻ സിനിമയിലും ഇതുവരെ കണ്ടിട്ടില്ല. നിലവാരമുണ്ടായിരുന്ന പല രംഗങ്ങളിലും ഗ്രാഫിക്സിന്റെ അതിപ്രസരം അതിനെ നിലവാരത്തകർച്ചയിലേക്ക് നയിക്കുന്ന കാഴ്ച്ച നിസ്സഹായനായി കണ്ടുനിൽക്കേണ്ടി വന്നു. അമാനുഷികതക്കൊക്കെ ഒരു പരിധി ഇല്ലെടെയ്. എന്നാലും ഈ പവറൊക്കെ എവിടുന്ന് വന്നോ ആവോ.

💢കഥ ഇനിയെങ്ങോട്ടാണ് പോവുന്നത്. എന്തായിരിക്കും അന്ത്യം. ഇങ്ങനെ ആകാംശയിൽ നിർത്തേണ്ട കാര്യങ്ങളൊക്കെ അണുവിട തെറ്റാതെ ഊഹിക്കാൻ കഴിയുമെന്നതാണ് ഏറ്റവും രസം. അങ്ങ് കൊറിയയിലും ക്ളീഷേക്ക് ഒരു പഞ്ഞവും ഇല്ലെന്ന് ഇത് കണ്ടപ്പോഴാണ് ബോധ്യമായത്.

🔻ＦＩＮＡＬ ＶＥＲＤＩＣＴ🔻

ഒരു പുതുമയും നൽകാത്ത, ക്ളീഷേകൾക്ക് ഒരു പഞ്ഞവുമില്ലാത്ത, എന്തിനോ വേണ്ടി തിളച്ച സാമ്പാർ. ഒരുതരത്തിൽ കൊറിയൻ സിനിമയിലെ ഏറ്റവും മോശം അനുഭവങ്ങളിൽ ഒന്നായിരുന്നു എന്നാണ് വ്യക്തിപരമായ അഭിപ്രായം. താല്പര്യമുള്ളവർക്ക് വേണമെങ്കിൽ കൈവെച്ച് നോക്കാം. ശരാശരിയോ അതിൽ താഴെയോ തൃപ്തി ലഭിച്ചേക്കും

MY RATING :: ★★☆☆☆

"നാട്ടിൽ ആദ്യമായി വന്ന ടി.വി ആയിരുന്നു അത്‌..ടി. വി ട്യൂൺ ചെയ്യാൻ പോയപ്പോഴാണ് ഞാൻ ആദ്യമായി അവളെ കാണുന്നത്..പിന്നീട് ടി.വിയോടൊപ്പം ഞാൻ അവളെയും ട്യൂൺ ചെയ്യാൻ തുടങ്ങി"
🔻Story Line🔻
കോഴിക്കോട്ടെ ഒരു ഗ്രാമം..വിനോദത്തിനായി അവർക്ക്‌ ആകെ ഉണ്ടായിരുന്നത് പഞ്ചായത്ത് പ്രസിഡന്റായ ഹാജിയാരുടെ വീട്ടിലെ റേഡിയോ ആയിരുന്നു..രാത്രി കാലങ്ങളിൽ ജാതി-മത-പാർട്ടി ഭേദമന്യേ നാട്ടുകാർ ഭൂരിഭാഗവും റേഡിയോയിൽ നാടകം കേൾക്കാനായി ഹാജിയാരുടെ വീട്ടിൽ ഒത്തുകൂടി..
ആയിടക്കാണ് ഹാജിയാർക്ക് ഒരു വലിയ പെട്ടി പാഴ്സലായി വരുന്നത്..പെട്ടി തുറന്ന് കാണാനുള്ള ആകാംക്ഷയും എന്നാൽ പെട്ടി തുറക്കാനുള്ള ഭയവും ഒരുപോലെ വേട്ടയാടിയിരുന്ന നിമിഷം..എല്ലാ ധൈര്യവും സംഭരിച്ച് അവർ പെട്ടി തുറന്നു..ആ ഗ്രാമത്തിൽ ആദ്യമായി എത്തുന്ന ആ സാധനം..ഒരു ടി.വി..നല്ല ബ്ലാക്ക്‌ ആന്റ് വൈറ്റ് ടി.വി..
അവിടെ ടി.വി ഓപ്പറേറ്റ് ചെയ്യാൻ ആകെ അറിയാവുന്നത് പോളിടെക്‌നിക് പഠിച്ച ബഷീറിനായിരുന്നു..അങ്ങനെ അവനും നാട്ടുകാരുടെ സ്റ്റാറായി..എന്നാൽ അവന്റെ കണ്ണ് മുഴുവൻ സുഹ്രയിലായിരുന്നു.. അങ്ങനെ ടി.വി സ്ക്രീനിന് പുറകിൽ അവരുടെ പ്രേമവും പൂത്തുലഞ്ഞു..
തുടർന്ന് ടി.വി മൂലം ആ നാട്ടിൽ ഉണ്ടാവുന്ന പൊല്ലാപ്പുകളാണ് രസകരമായി ചിത്രത്തിൽ പറയാൻ ശ്രമിക്കുന്നത്‌..
🔻Behind Screen🔻
യുവസംവിധായകനായ അനീഷ് അൻവറാണ് ചിത്രം സംവിധാനം ചെയ്തിരിക്കുന്നത്..സക്കറിയയുടെ ഗർഭിണികൾ, കുമ്പസാരം എന്നീ രണ്ട് ചിത്രങ്ങൾ കൊണ്ട് തന്റെ ക്രാഫ്റ്റ് തെളിയിച്ച സംവിധായകനാണ് അദ്ദേഹം..എന്നാൽ ഇത്തവണ അദ്ദേഹത്തിന് പിഴച്ചു എന്ന് തന്നെ പറയേണ്ടി വരും..
പറഞ്ഞുവരുമ്പോൾ വളരെ രസകരമായ പ്ലോട്ടാണ് ചിത്രത്തിന്റേത്..എന്നാൽ ഷിനോദ്, ഷംസീർ, ബിബിൻ എന്നീ മൂവർ സംഘം ഒരുക്കിയ തിരക്കഥക്ക്‌ ആ പ്ലോട്ടിനെ വേണ്ടവിധം ഉപയോഗപ്പെടുത്താൻ സാധിച്ചിട്ടില്ല..ഒരു നർമരംഗത്ത് പറയുന്ന ഒരു ഡയലോഗുണ്ട്‌."പഴയ ഒരു നമ്പറിട്ടു നോക്കിയതാ"..സത്യത്തിൽ ചിത്രത്തിലെ കോമഡികളെല്ലാം അങ്ങനെ തന്നെ..എവിടെയൊക്കെയോ കേട്ടു പഴകിയ,ഒരു തരത്തിലും രസമുളവാക്കാത്തവ..വളരെ നീണ്ട താരനിരയും കഥാസന്ദർഭങ്ങളും ഉണ്ടായിട്ടും അവയെ വേണ്ടവിധത്തിൽ വിനിയോഗിക്കാൻ തിരക്കഥാകൃത്തുക്കൾക് കഴിഞ്ഞിട്ടില്ല..
ഇനി റൊമാൻസിന്റെ കാര്യം എടുക്കുകയാണെങ്കിൽ കണ്ടു മടുത്ത പ്രണയം തന്നെയാണ് ബഷീറിന്റെയും സുഹ്റയുടേതും..ഒരു പുതുമയും കഥയിൽ കൊണ്ടുവരാൻ അവർക്കായിട്ടില്ല.. ആയതിനാൽ തന്നെ പ്രേക്ഷകരിൽ യാതൊരു ഇമ്പാക്റ്റും അവർ ഉണ്ടാക്കുന്നില്ല..എന്നാൽ മറ്റൊരു പ്രണയം ഇതിലും നല്ല ഫീൽ പ്രേക്ഷകർക്ക്‌ സമ്മാനിക്കുന്നെന്ന കാര്യവും ശ്രദ്ധേയമാണ്..അതും വെറുമൊരു പാട്ടുകൊണ്ട്..അത്തരത്തിൽ നോക്കുമ്പോൾ ഉഴപ്പി എഴുതിയ തിരക്കഥയാണ് ചിത്രത്തിന് അടിയായിരിക്കുന്നത്..ഒട്ടും പുതുമ തോന്നിക്കുന്നില്ല തിരക്കഥയിൽ..
🔻On Screen🔻
ഫർഹാൻ ഫാസിലാണ് ബഷീർ എന്ന കേന്ദ്രകഥാപാത്രത്തെ സ്ക്രീനിലെത്തിച്ചത്..ഇത്തവണ മുഖത്ത്‌ ചിരി വാറിവിതറിയാണ് അദ്ദേഹം മുന്നിൽ തെളിഞ്ഞത്..കഥാപാത്രത്തിന് തന്റേതായ ഐഡന്റിറ്റി കൊടുക്കുവാനുള്ള ശ്രമം അദ്ദേഹത്തിന്റെ ഭാഗത്ത് നിന്ന് ഉണ്ടായിട്ടുണ്ടെങ്കിലും അത് പൂർണമായി ഫലം കണ്ടില്ല..എങ്കിലും കൊള്ളാം..മെച്ചപ്പെടാനുണ്ട് ഇനിയും ഏറെ..
സന അൽത്താഫിന്റെ സുഹ്റയുടെ വേഷം 1980കളിലെ ലുക്കിൽ തൃപ്തി നൽകിയിരുന്നു..എന്നാൽ അഭിനയം ശരാശരിയിൽ ഒതുങ്ങി..ഡയലോഗ് ഡെലിവറിയിൽ ഇനിയും കുറെ മുന്നോട്ട് പോവാനുണ്ട്..
മണികണ്ഠന്റെ വേഷമാണ് സത്യത്തിൽ തൃപ്തി നൽകിയ ഒന്ന്..തന്റെ വേഷം അദ്ദേഹം ഭംഗിയാക്കി..താൻ ഒരു മികച്ച നടനാണെന്ന് അദ്ദേഹം ഒന്നുകൂടി തെളിയിച്ചു..മനസ്സിൽ തങ്ങുന്ന ഒരു വേഷം ചിത്രത്തിൽ ഉണ്ടെങ്കിൽ അത് അദ്ദേഹത്തിന്റേത് മാത്രമാണ്..
ഷീലയുടെ ഉമ്മുമ്മ വേഷം മനസ്സിനക്കരെയിലെ കൊച്ചുത്രേസ്യയെ ഓർമിപ്പിച്ചെങ്കിലും നന്നായിരുന്നു..ജോയ് മാത്യു, ഹരീഷ് പെരുമണ്ണ,നോബി,സുനിൽ സുഗധ, രഞ്ജിനി ജോസ്, ശ്രീജിത്ത്‌രവി തുടങ്ങി വൻ താരനിര തന്നെ ചിത്രത്തിലുണ്ട്..എന്നാൽ അവരെയൊന്നും വേണ്ടാവിധത്തിൽ പ്രയോജനപ്പെടുത്തിയിട്ടില്ല..
🔻Music & Technical Sides🔻
എടുത്ത് പറയേണ്ടത് ആർട്ട് ഡയറക്ഷനും ഛായാഗ്രഹണവും സംഗീതവും ആണ്..പ്രശംസ അർഹിക്കുന്നുണ്ട് ഈ വിഭാഗങ്ങൾ..ചിത്രത്തെ താങ്ങിനിർത്തുന്നത് ഇവ മൂന്നുമാണെന്ന് വേണമെങ്കിൽ പറയാം..1980കളിലെ ഫീൽ ചിത്രത്തിൽ നൽകാൻ ഏതാണ്ട് സാധിച്ചിട്ടുണ്ട്..സഞ്ജയ് ഹാരിസ് എന്ന ഛായാഗ്രാഹകന്റെ കന്നിസംരംഭമാണ് ചിത്രം..നല്ല രീതിയിൽ തന്നെ തന്റെ ജോലി അദ്ദേഹം കൈകാര്യം ചെയ്തു..ഗാനരംഗങ്ങളൊക്കെ മനോഹരമായിരുന്നു..കൂടെ അതിന്റെ കളറിംഗും..വിഷ്ണു മോഹന്റെ പശ്ചാത്തലസംഗീതവും പാട്ടുകളും നന്നായിരുന്നു..സന്ദർഭോചിതവും കേൾക്കാൻ ഇമ്പമുള്ളതുമായിരുന്നു പാട്ടുകൾ..
🔻Final Verdict🔻
രസകരവും വ്യത്യസ്തവുമായ ഒരു പ്രമേയത്തെ തിരക്കഥയുടെ പഴമകൊണ്ട് മൂടിക്കളഞ്ഞതാണ് ചിത്രത്തിന്റെ ഏറ്റവും വലിയ പോരായ്മ..വലിയ താരനിര തന്നെ ഉണ്ടായിട്ടും തീരെ പ്രയോജനപ്പെടുത്താതെ പോയതും കഥാസന്ദർഭങ്ങളിൽ സിറ്റുവേഷണൽ കോമഡികൾ ചേർക്കാതെ പോയതും ആസ്വാദനത്തിന് തിരിച്ചടി ആയിട്ടുണ്ട്..ആഖ്യാനത്തിലെ പുതുമ അവശ്യമായിരുന്ന കഥയെ അലസതയോടെ സമീപിച്ചതാണ് സംവിധായകന് പറ്റിയ അമളി..അങ്ങനെ ആകെമൊത്തത്തിൽ വ്യത്യസ്തത പ്രതീക്ഷിച്ചു പോയ എനിക്ക് ചിത്രം സമ്മാനിച്ചത് നിരാശ മാത്രം..
My Rating :: ★★☆☆☆

"ജീവിതത്തിൽ ഒരിക്കലും മറക്കാത്ത,എല്ലാ സുഖങ്ങളും രുചിച്ചുകൊണ്ടുള്ള കുറച്ച് ദിനങ്ങൾ സമ്മാനിക്കുക..അത്ര മാത്രമായിരുന്നു എന്റെ ആഗ്രഹം..എന്നാൽ ഇതിപ്പോൾ ഞങ്ങൾ ചെന്ന് പെട്ടിരിക്കുന്നത് വല്ലാത്തൊരു ഊരാക്കുടുക്കിലാണ്''



തോട്ടത്തിൽ തറവാടിലെ മൂന്ന് സന്തതികളും കൂട്ടുകാരനും ചേർന്ന് നടന്നുന്ന ഒരു ട്രിപ്പ്..ടോണിയുടെ കല്യാണത്തിന് മുമ്പുള്ള ദിനങ്ങൾ പിള്ളേർക്ക് പരമാവധി ആഘോഷിച്ച് മറക്കാൻ കഴിയാത്ത ദിനങ്ങൾ സമ്മാനിക്കുകയാണ് കൂട്ടത്തിൽ മൂത്തവൻ റോയിയുടെ ലക്ഷ്യം..അങ്ങനെ ധ്യാനകേന്ദ്രത്തിൽ നിന്ന് പുറത്താക്കപ്പെട്ട അവർ ജീപ്പുമെടുത്ത് ഇറങ്ങുന്നു..അവരുടേതായ ലോകത്തേക്ക്..
അങ്ങനെ വെള്ളമടിച്ചും പെണ്ണ്പിടിച്ചും നടന്നിരുന്ന സമയത്താണ് റീത്തയും പ്രയാഗയും അവരുടെ ജീവിതത്തിലേക്ക് യാദൃശ്ചികമായി കടന്നുവരുന്നത്..തുടർന്ന് അവരുടെ ജീവിതത്തിൽ സംഭവിക്കുന്നത് ഒട്ടും പ്രതീക്ഷിക്കാത്ത സംഭവങ്ങളാണ്.. അവരുടെ ജീവിതം തന്നെ മാറ്റിമറിക്കാൻ കെൽപുള്ള സംഭവവികാസങ്ങൾ..
അടുപുലിയാട്ടത്തിന് ശേഷം കണ്ണൻ താമരക്കുളം സംവിധാനം ചെയ്ത ചിത്രമാണ് അച്ചായൻസ്..ചിത്രത്തിന്റെ തിരക്കഥ ഒരുക്കിയിരിക്കുന്നത് സേതുവും..മല്ലുസിംഗിനും കസിൻസിനും ശേഷം സ്വതന്ത്ര തിരക്കഥാകൃത്തായി സേതു രചിച്ച തിരക്കഥ..ചിത്രത്തിന്റെ പ്രധാന പോരായ്മ തിരക്കഥയും സംവിധാനവുമാണ്..തരക്കേടില്ലാത്ത ഒരു ത്രെഡ് ആയിരുന്നിട്ടും ആവശ്യമില്ലാത്ത സീനുകളും കോമഡികളും കുത്തിനിറച്ച് വികലമാക്കിയിരിക്കുന്നു ചിത്രം..സേതുവിന് 'നാലി'നോട് വല്ലാത്ത ഇഷ്ടമാണെന്ന് തോന്നുന്നു..മല്ലുസിംഗിലും കസിൻസിലും ഉള്ളത് പോലെ ഇതിലും പ്രമുഖ കഥാപാത്രങ്ങൾ 4 പേരുണ്ട്..പ്രേക്ഷകനെ ആകെ പിടിച്ചിരുത്തുന്ന ഘടകം ബോറടിപ്പിക്കുന്നില്ല എന്നതാണ്..
സംവിധാനം പോലെ തന്നെ ടെക്നിക്കൽ സൈഡും പരമബോറാണ്..ഗോപിസുന്ദറിന്റെ പശ്ചാത്തല സംഗീതം പലയിടങ്ങളിലും അരോചകമായി തോന്നി.. പ്രത്യേകിച്ച് പ്രകാശ് രാജിന്റേത്..തുടരെത്തുടരെയിട്ട് നല്ലോണം വെറുപ്പിച്ചു..ആദ്യ പകുതിയിൽ നാലോളം പാട്ടുകളിട്ട് സമയം കൂട്ടി രതീഷ് വേഗ മാതൃകയായി..അതും നല്ല അറുബോറൻ പാട്ടുകൾ..പ്രതീപ് നായരുടെ ഛായാഗ്രഹണവും രജ്ഞിത്തിന്റെ എഡിറ്റിംഗ് കൂടി ആയപ്പോൾ വധം പൂർണ്ണം..
ജയറാം,ഉണ്ണി മുകുന്ദൻ,സഞ്ജു,ആദിൽ എന്നിവരാണ് കേന്ദ്ര കഥാപാത്രങ്ങളെ അവതരിപ്പിച്ചത്..ശിവദ,അമല പോൾ,അനു സിത്താര എന്നിവരാണ് നായികാ കഥാപാത്രങ്ങളായത്..ചിലരുടേതൊഴിച്ചു നിർത്തിയാൽ ബാക്കി എല്ലാവരും ശരാശരി പ്രകടനം..ആദ്യ പകുതി അവസാനിക്കുമ്പോൾ പ്രകാശ് രാജും കൂടെ ചേരുന്നു..പുള്ളിയും ശരാശരിയിൽ ഒതുങ്ങി.അമല ലുക്കിൽ ശരിക്ക് വെറുപ്പിച്ചു..
ആദ്യ പകുതി കോമഡിയെന്ന പേരിൽ എന്തൊക്കെയോ കാട്ടിക്കൂട്ടി മുന്നോട്ട് പോകുന്ന ചിത്രം ഇടവേളയാകുമ്പോൾ ശ്രേണി മാറി ത്രില്ലർ ആവുമെന്ന സൂചന തരുന്നു..തുടർന്ന് അടുക്കും ചിട്ടയുമില്ലാത്ത വിധം ഒരുക്കിയ ത്രില്ലർ അത്ര സംതൃപ്തി തരുന്നുമില്ല..ക്ലീഷേകളാലും സമൃദ്ധമാണ് ചിത്രം..ആകെത്തുകയിൽ സമയവും കാശുമുണ്ടെങ്കിൽ ഒരു തവണ കണ്ട് മറക്കാവുന്ന ചിത്രമായി ഒതുങ്ങുന്നു അച്ചായൻസ്
കണ്ണൻ ചേട്ടാ നിങ്ങൾ കുറച്ചു കാലം കൂടി അസിസ്റ്റന്റ് ആയി പണി പഠിക്കാൻ പറ്റുവോ..ഇല്ലേ...ഇല്ലാല്ലേ..
My Rating :: ★★☆☆☆

''ഇനി വെറും 14 ദിവസം മാത്രം..ലക്ഷ്യസ്ഥാനം അമേരിക്ക..നേർവഴിക്ക് നോക്കിയാൽ അവിടെ എത്തിച്ചേരുക അസാധ്യം തന്നെ..എന്നാൽ ആ ദിവസത്തിന് മുമ്പ് എനിക്ക് അവിടെ എത്തിയേ തീരൂ..എന്റെ പ്രണയസാക്ഷാത്കാരത്തിനായി''



മലയാളികൾക്ക് എപ്പോഴും പുതുഅനുഭവങ്ങൾ സമ്മാനിച്ചിട്ടുള്ള സംവിധായകനാണ് അമൽ നീരദ്..എപ്പോൾ കണ്ടാലും ഫ്രഷ്നസ് തരുന്ന ഒരു പിടി ചിത്രങ്ങൾ സമ്മാനിച്ച വ്യക്തി..എല്ലാ സിനിമയിലും തന്നിലെ സംവിധായകന്റെ കയ്യൊപ്പ് പതിപ്പിച്ച ക്രാഫ്റ്റ്മാൻ..സ്റ്റൈലിഷ് ചിത്രങ്ങളുടെ രാജകുമാരന്മാരിൽ ഒരാൾ..'കുള്ളന്റെ ഭാര്യ എന്ന ഹ്രസ്വചിത്രത്തിന് ശേഷം ഒരു മുഴുനീള ചിത്രവുമായി വന്നിരിക്കുകയാണ് അമൽ നീരദ്..അതും മലയാളത്തിലെ ഏറ്റവും സ്റ്റൈലിഷ് യുവതാരമായ ദുൽഖറിനൊപ്പം..പ്രതീക്ഷക്ക് വക നൽകാൻ ഇതിൽപരം എന്ത് വേണം..
ചുവപ്പിനെ കൂട്ടുപിടിച്ച് ഈ വർഷം ഇറങ്ങുന്ന മൂന്നാമത്തെ ചിത്രം.. അതായിരുന്നു ചിത്രത്തിന്റെ ടീസർ കണ്ടപ്പോൾ തോന്നിയത്..എന്നാൽ ഒരു ലവ് സ്റ്റോറി കൂടിയായിരിക്കും ചിത്രം എന്ന് പോസ്റ്ററുകളിൽ നിന്ന് വ്യക്തമായിരുന്നു..അങ്ങനെ കാറൽ മാർക്സിന്റെ 199ആം ജന്മദിനത്തിൽ ചിത്രം തീയേറ്ററുകളിലെത്തി..
കമ്മ്യൂണിസം നേഞ്ചോട് ചേർത്ത് പിടിച്ച് ജീവിക്കുന്ന സഖാവാണ് അജി മാത്യു..കോൺഗ്രസ് കുടുംബത്തിലാണ് ജനിച്ചതെങ്കിലും സാഹചര്യം അവനിൽ കമ്മ്യൂണിസത്തോടുള്ള പ്രിയം വർദ്ധിപ്പിച്ചു..അങ്ങനെ ആദർശധീരനായ ഒരു കമ്മ്യൂണിസ്റ്റായി അജി വളർന്നു..
കോളേജിൽ അവനൊരു പ്രണയമുണ്ടായിരുന്നു..സാറ..അതായിരുന്നു അവളുടെ പേര്..അമേരിക്കയിൽ ജനിച്ച് വളർന്ന ഇന്ത്യൻ പെൺകുട്ടി..ഒരു പ്രത്യേക സാഹചര്യത്തിൽ അവന് അമേരിക്കയിലേക്ക് ഒരു യാത്ര പുറപ്പെടേണ്ടി വരുന്നു..തന്റെ പ്രണയിനിക്ക് വേണ്ടിയുള്ള ഒരു സാഹസം നിറഞ്ഞ യാത്ര..ഇതാണ് ചിത്രത്തിന്റെ സാരാംശം..
യഥാർഥ സംഭവങ്ങളെ അടിസ്ഥാനപ്പെടുത്തി അമൽ നീരദ് സംവിധാനം ചെയ്ത ചിത്രമാണ് CIA..ചിത്രത്തിന്റെ തിരക്കഥ ഒരുക്കിയിരിക്കുന്നത് ഷിബിൻ ഫ്രാൻസിസ് ആണ്..തന്റെ മുൻ ചിത്രങ്ങളിൽ നിന്ന് വ്യത്യസ്തമായ ഒരു പരിചരണമാണ് സംവിധായകൻ ചിത്രത്തിന് നൽകിയിട്ടുള്ളത്..എന്നാൽ കഥാപരമായ ദൗർബല്യം ചിത്രത്തിൽ പല സന്ദർഭങ്ങളിലും പ്രകടമാണ്..
ദുൽഖറിന്റെ കിടിലൻ ഇൻട്രോയും പശ്ചാത്തലഗാനവും ശരിക്കും കോരിത്തരിപ്പിച്ചത് തന്നെ..ആദ്യ പകുതി നായകന്റെ കുടുംബവും രാഷ്ട്രീയവും ക്യാമ്പസും എല്ലാം പറഞ്ഞാണ് മുന്നോട്ട് പോവുന്നത്..വളരെ രസകരമായി തന്നെയാണ് ഇടവേള വരെ ചിത്രം മുന്നോട്ട് പോയത്..എടുത്ത് പറയത്തക്ക പല നല്ല രംഗങ്ങളും അടങ്ങിയതായിരുന്നു ആദ്യ പകുതി..അതിൽ ഏറ്റവും രസകരം തന്റെ മാതൃകാ പുരുഷൻമാരായ സ്റ്റാലിൻ, ലെനിൻ, മാർക്സ്, ചെഗുവേര എന്നിവരുമായി അജി സംസാരിക്കുന്ന രംഗമായിരുന്നു..ചിത്രത്തിലെ വളരെ മികച്ച രംഗങ്ങളിൽ ഒന്നായി തോന്നി അത്..ദുൽഖർ-സൗബിൻ-ദിലീഷ് പോത്തൻ കോമ്പിനേഷൻ ഉയർത്തിവിട്ട കോമഡികളും ചിരിക്ക് വക നൽകിയിരുന്നു..വികാരഭരിതമായ ദുൽഖറിന്റെ ഒരു രംഗവും മികച്ചതായിരുന്നു..ആകെ കല്ലുകടിയായി തോന്നിയത് ഒറ്റ നോട്ടത്തിൽ നായകന്റെയും നായികയുടെയും ഹൃദയത്തിൽ പ്രേമം മുളപൊട്ടിയ രംഗമായിരുന്നു..ഒരു തരത്തിലും അതിന്റെ തീവൃത സിനിമയിൽ കാണിക്കുവാൻ ശ്രമിച്ചിട്ടില്ല..ഒരു ഗാനത്തിലൂടെ വെറുതെ പറഞ്ഞ് പോവുന്നതല്ലാതെ മറ്റൊരു നല്ല രംഗവും അതെപറ്റി ഉണ്ടായിരുന്നില്ല..
രണ്ടാം പകുതി ഒരു അഡ്വഞ്ചർ മോഡിലാണ് മുന്നോട്ട് പോവുന്നത്..തുടർന്ന് ചിത്രത്തിന്റെ വേഗതയും ഊർന്ന് പോയി..പല ഘട്ടങ്ങളിലും അനാവശ്യമെന്ന് തോന്നിപ്പിച്ച രംഗങ്ങൾ ഉണ്ടായിരുന്നു തുടക്കത്തിൽ..ചിത്രത്തിനു അവസാനവും അങ്ങനെ തന്നെ.. അവസാന മാസ്സ് രംഗം അധികപ്പറ്റായി തോന്നി..അല്ലെങ്കിൽ ഫാൻസുകാർക്ക് വേണ്ടി മാത്രം പടച്ച ഒന്ന്..അതിന് മുമ്പ് നിർത്തിയിരുന്നെങ്കിൽ നന്നായേനേ എന്ന് തോന്നി..അങ്ങനെ മൊത്തത്തിൽ തൃപ്തി തരാത്ത രണ്ടാം പകുതി ആയിരുന്നു ചിത്രത്തിന്റേത്..
ഇഷ്ടപ്പെട്ട മറ്റൊരു കാര്യം എന്തെന്നാൽ നായകന്റെ കമ്മ്യൂണിസ്റ്റ് ആശയങ്ങൾ വിവരിക്കുവാൻ കൃത്രിമമായി ഏച്ചുകെട്ടിയ രംഗങ്ങൾ ഒന്നും തന്നെ ചിത്രത്തിലില്ലായിരുന്നു എന്നതാണ്.. പല ഡയലോഗുകളിലും അദ്ധേഹത്തിന്റെ ആദർശം വ്യക്തമായിരുന്നു..ഇപ്പോഴത്തെ പല സംഭവങ്ങളെയും വിമർശിക്കുവാനും ചിത്രം ശ്രമിച്ചിട്ടുണ്ട്..

ദുൽഖർ അജി മാത്യുവായി ശരിക്കും തകർത്തു..അപാര സ്ക്രീൻ പ്രസൻസും ഡയലോഗ് ഡലിവറിയും..ഇമോഷണൽ രംഗങ്ങളും കയ്യടക്കത്തോടെ അദ്ധേഹം അവതരിപ്പിച്ചു..കയ്യടി വാരിക്കൂട്ടിയ രംഗങ്ങൾ ഒരുപാടുണ്ടായിരന്നു ചിത്രത്തിൽ..മറ്റൊരു കിടിലൻ പെർഫോമൻസ് സിദ്ധീഖിന്റേതായിരുന്നു..കയ്യടി വാങ്ങിയ ഗംഭീര പ്രകടനം..ദുൽഖർ-സിദ്ധീഖ് കോഡിനേഷൻ സീനുകൾ കലക്കി..നായികമാരായ കാർത്തിക, ചാന്ദ്നി എന്നിവർക്ക് കാര്യമായി ഒന്നും ചെയ്യാനുണ്ടായിരുന്നില്ല..
ചിത്രത്തിന്റെ ഛായാഗ്രഹണം നിർവ്വഹിച്ചിരിക്കുന്നത് രണദിവെയാണ്..ഒരു വിഷ്വൽ ട്രീറ്റ് തന്നെയായിരുന്നു ചിത്രം..പല കിടിലൻ ഫ്രയിമുകളും കണ്ണിന് കുളിർമയേകുന്നവയായിരുന്നു..ഗോപി സുന്ദറിന്റെ പശ്ചാത്തല സംഗീതം അതിഗംഭീരം..'കണ്ണിൽ കണ്ണിൽ' എന്ന ഗാനം ന്നന്നായിരുന്നു..എന്നാൽ 'വാനം തിളതിളക്കണ്' എന്നത് സന്ദർഭവുമായി കേൾക്കാൻ രസകരമായിരുന്നില്ല..ഇൻട്രോ സമയത്തുള്ള ഗാനം ആവേശകരമായിരുന്നു..

ആകെ മൊത്തത്തിൽ ചിത്രത്തിന്റെ ടെക്നിക്കൽ സൈഡും അഭിനേതാക്കളും തൃപ്തി നൽകി.. എന്നാൽ തിരക്കഥ, രണ്ടാം പകുതിയിൽ കൈവിട്ട് പോവുന്നത് പോലെയാണ് തോന്നിയത്..ദുർബലമായ കഥ ശരിക്കും ആസ്വാദനത്തിന് തിരിച്ചടിയായി..രണ്ടാം പകുതിയിൽ ശരിക്കും ഇഴച്ചിൽ അനുഭവപ്പെട്ടു..ആയതിനാൽ തന്നെ എന്നിലെ പ്രേക്ഷകന് ശരാശരിയിൽ താഴെ മാത്രം സംതൃപ്തിയാണ് ചിത്രം നൽകിയത്.. എന്നിരുന്നാലും അമിത പ്രതീക്ഷകൾ ഇല്ലാതെ സമീപിച്ചാൽ ചിത്രം സംതൃപ്തി നൽകിയേക്കും..
അഭിപ്രായം വ്യക്തിപരം.. തിയേറ്ററിൽ കണ്ട് വിലയിരുത്തുക
My Rating :: ★★☆☆☆

'ഞാൻ ബൈജു..ഒരു സർക്കാറുദ്യോഗസ്ഥനാണ്..അതിലുപരി 36 വർഷമായി കുമ്പളം ബ്രദേഴ്സിന്റെ രക്ഷാധികാരി കൂടിയാണ്'



മലയാളികൾക്ക് ഒരിക്കലും മറക്കാൻ പറ്റാത്ത തിരക്കഥാകൃത്താണ് രജ്ഞൻ പ്രമോദ്..ഇപ്പോഴും കാണികൾ പുതുമയോടെ സമീപിക്കുന്ന സിനിമകളായ മീശമാധവൻ, മനസ്സിനക്കരെ, അച്ചുവിന്റെ അമ്മ തുടങ്ങിയ ചിത്രങ്ങൾക്കായി തൂലിക ചലിപ്പിച്ച വ്യക്തി..എന്നാൽ കഥയെഴുതി സംവിധാനം ചെയ്ത രണ്ട് ചിത്രങ്ങൾ പ്രേക്ഷകർ തിരസ്കരിച്ചപ്പോൾ 'എന്നും എപ്പോഴും' എന്ന ചിത്രത്തിലൂടെ വീണ്ടും തിരക്കഥാകൃത്തിന്റെ കുപ്പായം അണിഞ്ഞു അദ്ധേഹം..ദാ ഇപ്പോൾ വീണ്ടും സംവിധായകന്റെയും..
ഓർമ വെച്ച കാലം മുതലേ കുമ്പളത്തെ പറമ്പിൽ ക്രിക്കറ്റ് കളിച്ച് വളർന്നവരാണ് ബൈജുവും കൂട്ടരും..എന്നാൽ 36 വർഷങ്ങൾക്കിപ്പുറം അവരിൽ അവശേഷിക്കുന്നത് ബൈജു മാത്രമാണ്.. ബാക്കിയൊക്കെയും അവരുടെ ജീവിതമാർഗം തേടി പല സ്ഥലങ്ങളിലാണ്..സർക്കാർ ജോലിക്കാരനായി സേവനം അനുഷ്ഠിക്കുന്ന ബൈജുവിന് ഈ പ്രായത്തിലും ഒഴിച്ചുകൂടാനാവാത്ത ഒന്നാണ് ക്രിക്കറ്റ് കളി..കൂടെ കളിക്കുന്നവരാവട്ടെ എല്ലാം യുവരക്തവും..
പുതുതലമുറക്ക് കൂടി കായികത്തിലുള്ള ഇഷ്ടം പ്രകടമാക്കും വിധം ഇപ്പോഴും പല തരം കളികളിലൂടെയും പല പ്രായക്കാരിലൂടെയും എപ്പോഴും തിരക്കിലാണ് ആ പറമ്പ്..കൂടെ അവരുടെയൊക്കെ രക്ഷാധികാരിയായി ബൈജുവും ഉണ്ട്..ബൈജുവിന്റെ ജീവിതത്തിലൂടെയാണ് ചിത്രം മുന്നോട്ട് പോവുന്നത്..
രജ്ഞൻ പ്രമോദിന്റെ മൂന്നാമത് സംവിധാന സംരംഭമാണ് 'രക്ഷാധികാരി ബൈജു'..ചിത്രത്തിന്റെ തിരക്കഥ ഒരുക്കിയിരിക്കുന്നതും അദ്ധേഹം തന്നെ..ഒരു പ്രത്യേക തീമോ ത്രെഡോ ഇല്ലാതെ ബൈജുവിന്റെ ജീവിതത്തിലെ പല സംഭവങ്ങളിലൂടെയും അദ്ധേഹത്തിന്റെ കൂട്ടാളികളിലൂടെയുമാണ് ചിത്രം നമ്മെ നയിക്കുന്നത്..പ്രത്യേകിച്ച് പുതുമ ഒന്നും തന്നെ തോന്നിയില്ല ചിത്രത്തിൽ..ഒരു ഫീൽ ഗുഡ് മൂവി എന്ന നിലയിലും എന്നിലെ പ്രേക്ഷകനെ ചിത്രം നിരാശപ്പെടുത്തി..സമയദൈർഘ്യവും അനാവശ്യമായി പല സീനുകളും തിരുകിക്കേറ്റിയതും ആസ്വാദനത്തിന് കനത്ത പ്രഹരമായി..
ബൈജുവിന്റെ കഥാപാത്രത്തെ അവതരിപ്പിച്ചത് കുടുംബപ്രേക്ഷകർക്ക് സ്വീകാര്യനായ ബിജു മേനോനാണ്..വലിയ വെല്ലുവിളി ഉയർത്തുന്ന കഥാപാത്രം ആയിരുന്നില്ല അദ്ധേഹത്തിന് ബൈജു.. ആയതിനാൽ തന്നെ തന്റെ കഥാപാത്രം അദ്ധേഹം മനോഹരമാക്കി..അദ്ധേഹത്തിന്റെ ഭാര്യയായി അഭിനയിച്ച ഹന്ന റെജി നല്ല പ്രകടനമായിരുന്നു..ഒരു കുടുംബിനിയായി മികച്ച റോൾ.. അച്ഛനായി വിജയരാഘവനും അഭിനയിച്ചു..ദീപക്കിന് കുറച്ച് നാളുകൾക്ക് ശേഷം ഒരു മുഴുനീള കഥാപാത്രം ലഭിക്കുന്നത് ഇതിലൂടെയാവും..അലൻസിയർ, അജു വർഗീസ്, ഹരീഷ് കണാരൻ, ജനാർദരൻ തുടങ്ങിയവർ മറ്റു കഥാപാത്രങ്ങളെ അവതരിപ്പിച്ചു..
ചിത്രത്തിന്റെ ഛായാഗ്രഹണം നിർവ്വഹിച്ചിരിക്കുന്നത് പ്രശാന്ത് രവീന്ദ്രൻ ആണ്..തന്റെ ജോലിയോട് അദ്ധേഹം നീതി പുലർത്തി..സംഗീതം നിർവ്വഹിച്ചിരിക്കുന്നത് ബിജിബാൽ ആണ്..ഗാനങ്ങളെല്ലാം ശരാശരിയിൽ ഒതുങ്ങിയപ്പോൾ പശ്ചാത്തല സംഗീതം നന്നായിരുന്നു.. എഡിറ്റിംഗ് സാംജിത്തും നിർവ്വഹിച്ചു..
പ്രേക്ഷകരിൽ ഒരു നൊസ്റ്റാൾജിക് ഫീൽ ഉണ്ടാക്കാൻ പല സന്ദർഭങ്ങളിലും ചിത്രത്തിനായിട്ടുണ്ട്..എന്നാൽ അതിന്റെ തുടർച്ച അനാവശ്യ രംഗങ്ങൾ ഉൾപ്പെടുത്തി ഇല്ലാതാക്കി എന്ന് പറയേണ്ടി വരും..കോമഡിക്ക് മാത്രമായി തന്നെ ചില രംഗങ്ങൾ തിരുകിക്കയറ്റിയിട്ടുണ്ട്..എന്നാൽ അവയൊന്നും പൂർണ്ണമായി വിജയിച്ചിട്ടുമില്ല.. എഡിറ്റിംഗ് കുറച്ച് കൂട്ടിയിരുന്നേൽ ആസ്വാദനം മെച്ചപ്പെട്ടേനേ..
ചിത്രം അവസാനിക്കുന്നത് ഒരു മെസേജോ അല്ലെങ്കിൽ ഒരു നിവേദനമോ സമർപ്പിച്ചു കൊണ്ടാണ്..വികസനത്തുടർച്ചയായി ഫ്ലാറ്റുകളും മറ്റു സമുച്ചയങ്ങളും കെട്ടിപ്പൊക്കുകയും റോഡുകൾക്ക് വീതി കൂട്ടുവാനായും മറ്റും ഒഴിഞ്ഞ പറമ്പുകൾ കയ്യേറുകയും ചെയ്യുമ്പോൾ ഈ തലമുറക്കും വരും തലമുറക്കും കൂട്ടംകൂടി ഇരിക്കാനും കളിക്കാനും കൂടി കുറച്ച് സ്ഥലം ഒഴിച്ചിട്ടേക്കണമെന്ന കുറിപ്പോടെയാണ് ചിത്രം അവസാനിക്കുന്നത്..ഈ ഒരു സന്ദേശം കൈമാറാനായിരുന്നെങ്കിൽ ഇത്ര വലിച്ച് നീട്ടാതെ ഒരു ഷോർട്ട് ഫിലിമായോ ഡോക്യുമെന്ററിയായോ കാണിക്കാവുന്നതേ ഉള്ളായിരുന്നു എന്ന് തോന്നി..
ചിലയിടങ്ങളിൽ ക്ലീഷേ രംഗങ്ങളും ഉൾപ്പെടുത്തിയിട്ടുള്ള ചിത്രം ശരിക്കും ഇഴച്ചിൽ അനുഭവിപ്പിച്ചു..കോമഡിയൊക്കെ ഇടക്കിടക്ക് വരുന്നുണ്ടെങ്കിലും വളരെ കുറച്ച് മാത്രമേ ആസ്വാദനത്തിന് വഴിവെച്ചുള്ളൂ.. ബാക്കിയൊക്കെ വിഫലമായ ശ്രമങ്ങളും സമയം കൂട്ടി രസംകൊല്ലിയായ രംഗങ്ങളുമായി മാത്രമേ ഫീൽ ചെയ്തുള്ളൂ..മൊത്തത്തിൽ ചിത്രം എനിക്ക് നൽകിയത് ശരാശരിയിൽ താഴെ സംതൃപ്തി മാത്രം..
My Rating :: ★★☆☆☆