Abeed Azad

🔻'നിർഭയ'. ഈ പേരിനെ കുറിച്ച് ഒരാമുഖം വേണമെന്ന് തോന്നുന്നില്ല. 2012ൽ ഒരു  പെൺകുട്ടിയെ 6 പേർ ചേർന്ന് ബസ്സിൽ വെച്ച് ക്രൂരമായ റേപ്പ് ചെയ്ത സംഭവം വൻ വിവാദങ്ങൾക്ക് വഴിവെച്ചിരുന്നു. ഒടുക്കം പെൺകുട്ടി കൊല്ലപ്പെട്ടെങ്കിലും ഡൽഹി പോലീസിന്റെ സമയബന്ധിതമായി ഇടപെടൽ മൂലം പ്രതികളെ പിടികൂടാൻ സാധിച്ചു. ഈ സംഭവത്തിന്റെ ദൃശ്യാവിഷ്കാരമാണ് Netflix പുറത്തിറക്കിയ 7 എപ്പിസോഡുള്ള ഈ സീരീസ്.

Year : 2018
Episode : 7
Run Time : 40min - 1h

🔻നിർഭയ സംഭവത്തെ മുൻനിർത്തി പല പരിപാടികളും ഡോക്യൂമെന്ററികളുമെല്ലാം പുറത്തിറങ്ങിയിരുന്നുവെങ്കിലും അവയിൽ ഭൂരിഭാഗവും ഡൽഹി പോലീസിനെ പാടെ മാറ്റിനിർത്തിക്കൊണ്ടായിരുന്നു. ആദ്യമായി പോലീസ് POVയിൽ കഥ പറയുന്ന സീരീസാണ് Delhi Crime. ഒരുപാട് പോസിറ്റിവുകളും ഒരൽപം നെഗട്ടീവുകളും സീരീസിൽ ഉണ്ട്. എന്നാൽ കാഴ്ചയിൽ തൃപ്തി നൽകുന്നുമുണ്ട് Delhi Crime.

🔻സീരീസിലെ ഏറ്റവും ഇഷ്ടപ്പെട്ട കാര്യം റേപ്പ് എന്ന സംഗതി picturise ചെയ്യാതെ സിമ്പതി പിടിച്ചുപറ്റാൻ ശ്രമിക്കാതിരുന്നതാണ്. പലപ്പോഴും കണ്ടുവരുന്ന ഇത്തരം ചിത്രീകരണങ്ങൾ ഇവിടെയില്ലെന്നുള്ളത് ആശ്വാസമായിരുന്നു. എന്നാൽ അതിനപ്പുറം അസ്വസ്ഥത പകരുന്ന റേപ്പിന്റെ Verbal Statement മനസ്സിനെ വല്ലാതെ അലട്ടി. കുറ്റവാളികളികളോട് കടുത്ത ദേഷ്യം തോന്നും വിധം ഗംഭീരമായാണ് ആ രംഗങ്ങൾ potray ചെയ്തിരിക്കുന്നത്. ഒപ്പം Jai Singhന്റെ statementഉം അതിനൊത്ത് Creepy ഫീൽ നൽകുന്നുണ്ട്.

🔻പോലീസിന്റെ കഴിവിനെ ചോദ്യം ചെയ്യുമ്പോൾ ഫണ്ടിങ്ങിന്റെ കാര്യം പറയുന്ന രംഗങ്ങൾ നന്നായിരുന്നു. ഒരുപക്ഷെ ഇന്ത്യയിൽ പോലീസ് ഫോഴ്സ് നേരിടേണ്ടി വരുന്ന വലിയ പ്രശ്നങ്ങളിൽ ഒന്ന് തന്നെയാണ് അത്. ഒപ്പം റിയലിസ്റ്റികും ഡാർക്കുമായി പല സന്ദർഭങ്ങളും കടന്നുപോവുന്ന വിധം കുറ്റകൃത്യത്തിന്റെ ഗൗരവത്തെ എടുത്ത് കാട്ടുന്നുണ്ട്.

🔻കേന്ദ്രകഥാപാത്രമായ DCP Varthikaയുടെ ഒറ്റയാൾ പോരാട്ടമാവാതെ കൂടെയുള്ളവർക്കും കൃത്യമായ സ്‌പേസ് നൽകിയിട്ടുണ്ടെന്നത് പേസിങ്ങിനെ സഹായിക്കുന്നുണ്ട്. ഒരേസമയം പലയിടങ്ങളിൽ ഓപ്പറേഷൻ നടക്കുന്ന രംഗങ്ങൾ ത്രിൽ ഫാക്ടറിന് സഹായകമാവുന്നുണ്ട്. ഭൂപേന്ദ്ര സിങ്ങ് എന്ന പോലീസ് ഉദ്യോഗസ്ഥന്റെ കഥാപാത്രവും പ്രകടനവും പ്രശംസ അർഹിക്കുന്നുണ്ട്. ഒപ്പം protest അടക്കമുള്ള കാര്യങ്ങൾ കൈകാര്യം ചെയ്ത വിധം ഭംഗിയായി തന്നെ കാട്ടിയിട്ടുണ്ട്. പ്രേക്ഷകർക്ക് ദഹിക്കാവുന്നതിനപ്പുറം സിനിമാറ്റിക്ക് ആക്കിയില്ല കാര്യങ്ങൾ എന്നത് ആസ്വാദനത്തിന് ഗുണം ചെയ്യുന്നുണ്ട്. സീരീസ് മുന്നോട്ട് വെക്കുന്ന തീമിനോട് ഏറ്റവും യോജിച്ച ഛായാഗ്രഹണവും പശ്ചാത്തലസംഗീതവും കളർ ടോണും കൂടി ചേർന്നപ്പോൾ മികച്ച അനുഭവമായി മാറുന്നുണ്ട് പല രംഗങ്ങളും.

🔻പോലീസ് POVയിൽ കഥ പറയുന്നത് കൊണ്ട് തന്നെ അവരുടെ കഥാപാത്രങ്ങൾക്കാണ് കഥയിൽ കൂടുതൽ നരേഷൻ വന്നിരിക്കുന്നത്. Biased ആണെന്ന് തോന്നിക്കും വിധം ചിലയിടങ്ങളിൽ ചില സന്ദർഭങ്ങൾ ചേർക്കുമ്പോഴും കഥയുടെ ഒഴുക്കിൽ അധികം ശ്രദ്ധ പിടിക്കാതെ മുന്നോട്ട് പോവും. അത് തന്നെയാണ് സംവിധായകന്റെ മിടുക്ക്. പോലീസ് മേധാവി മുതൽ കോൺസ്റ്റബിൾ വരെയുള്ളവർക്ക് കൃത്യമായ വ്യക്തിത്വം നൽകുമ്പോഴും ചുറ്റുമുള്ളവർക്ക് ചെറിയ നെഗറ്റിവ് shade കൊടുത്തത് ബോധപൂർവ്വമുള്ള കൈകടത്തലായിപ്പോയി. ഡൽഹി പോലീസിനെ വെള്ളപൂശുന്ന തലത്തിലേക്ക് പലപ്പോഴും കാര്യങ്ങൾ നീങ്ങുന്നുണ്ട്. അതാണ് സീരീസിന്റെ നെഗറ്റിവ് ആയി തോന്നിയത്.

🔻മികച്ച പ്രകടനവുമായി ഷെഫാലിയ ഷാ സീരീസിന്റെ നട്ടെല്ലായി നിൽക്കുമ്പോൾ ഭൂപേന്ദ്ര സിങ്ങായി രാജേഷും ഇഷ്ടകഥാപാത്രമായി. നീതി സിംഗിന്റെ റോൾ crucial ആയ ഒന്നായപ്പോൾ ഏറ്റവും ഒടുവിലെ രംഗം ഗംഭീരമായി തോന്നി. ഇതിലും നല്ലൊരു പര്യവസാനം ഈ സീരീസിന് കിട്ടുമെന്ന് തോന്നുന്നില്ല. കൂടെയുള്ള ഓരോരുത്തരും തങ്ങളുടെ വേഷങ്ങൾ ഭംഗിയാക്കി. കുറ്റവാളികളായി അഭിനയിച്ചവരിൽ Jai Singh ഗംഭീരമായി.

🔻ＦＩＮＡＬ ＶＥＲＤＩＣＴ🔻

ചർച്ച ചെയ്യപ്പെടേണ്ട ഗൗരവകമായ ഒരു സംഭവമായത് കൊണ്ട് തന്നെ നല്ലൊരു ഔട്ട്പുട്ട് ആണ് Netflixൽ നിന്ന് ഇത്തവണ ലഭിച്ചിരിക്കുന്നത്. അൽപ്പം Biased ആയി പലപ്പോഴും തോന്നുമെങ്കിലും Disturbing ആയ രംഗങ്ങളും ഗംഭീര പെർഫോമൻസുകളും അവതരണവുമൊക്കെയായി നല്ലൊരു ആസ്വാദനം തന്നെ സമ്മാനിക്കും ഈ സീരീസ്.

ＡＢ ＲＡＴＥＳ ★★★½

🔻തന്റെ പ്രിയ കൂട്ടുകാരൻ അക്ബറിന് 18 വയസ്സ് തികയുന്നതിലുള്ള സന്തോഷമായിരുന്നു ആലക്ക്. അതുകൊണ്ട് തന്നെയാണ് അതൊരു ആഘോഷമാക്കാനും അവൻ തീരുമാനിച്ചതും. എന്നാൽ അതിന് മറ്റൊരു വശം കൂടിയുണ്ടായിരുന്നു.18 തികഞ്ഞപ്പോൾ അക്ബറിനെ അവിടെ കാത്തിരുന്നത് വധശിക്ഷയാണ്. 2 വർഷം മുമ്പ് താൻ സ്നേഹിച്ച പെണ്ണിനെ കൊലപ്പെടുത്തിയ കേസിൽ ലഭിച്ച വധശിക്ഷ.

Year : 2004
Run Time : 1h 41min

🔻അക്ബറിന്റെ വധശിക്ഷക്ക് ചുരുക്കം ചില ദിനങ്ങൾ മാത്രം അവശേഷിക്കുമ്പോഴാണ് ആല റീഹാബിറ്റേഷൻ സെന്ററിൽ നിന്ന് പുറത്തിറങ്ങിയത്. മരിച്ചുപോയ പെൺകുട്ടിയുടെ പിതാവിൽ നിന്ന് അക്ബറിനെ വെറുതെ വിടാനുള്ള സമ്മതം വാങ്ങുക എന്നതായിരുന്നു ആലക്കുള്ള ദൗത്യം. അതിനായി ആല തുനിഞ്ഞിറങ്ങി.

🔻സഹനത്തിന്റെയും ക്ഷമയുടെയും സന്ദേശം പകരുകയാണ് ഈ ചിത്രം. തന്റെ മകളെ കൊലപ്പെടുത്തിയവന് മാപ്പ് കൊടുക്കാൻ തയാറാകാത്ത പിതാവിനെയും തന്റെ ആത്മസുഹൃത്തിനെ കൊലക്കയറിൽ നിന്ന് രക്ഷിക്കാനായി പോരാടുന്ന ആലയുടെയും കഥയാണ് മനോഹരമായ ഈ നഗരം നമുക്ക് കാട്ടിത്തരുന്നത്.

🔻അസ്ഗർ ഫർഹാദിയുടെ കരവിരുതിൽ വിരിഞ്ഞ മറ്റൊരു അത്ഭുതമാണ് ഈ ചിത്രം. ചില വേളകളിൽ ഒരു ഇമോഷനിൽ നിന്ന് മറ്റൊന്നിലേക്ക് വ്യതിചലിക്കുന്നത് നമ്മൾ അറിയുക പോലുമില്ല. കഥാപാത്രങ്ങളുടെ മനസികസംഘർഷങ്ങളിലൂടെ തന്നെയാണ് കഥ സഞ്ചരിക്കുന്നത്. അത് നമ്മെ സ്പർശിക്കുകയും ചെയ്യും. പ്രണയം മുഖ്യഘടകമായി വന്നിടാം തൊട്ടുള്ള ഭാഗങ്ങൾ സുന്ദരമായ അനുഭവമായിരുന്നു.

🔻Taranehയുടെ നിഷ്കളങ്കമായ മുഖവും ചിരിയും ചിത്രത്തിൽ ഹൈലൈറ്റായി നിൽക്കുന്നുണ്ട്. ഒപ്പം Babakന്റെ ആലയും മികച്ചുനിന്നു. ഇരുവരും തമ്മിലുള്ള കോമ്പിനേഷൻ സീനുകൾ കാഴ്ചയിൽ നല്ലൊരു അനുഭവമായി. റഹ്മത്തിയെന്ന കഥാപാത്രം വൈകാരികമായ പല മുഹൂർത്തങ്ങളിലൂടെ കടന്നുപോവുന്ന ഒന്നായി മാറി.

🔻ＦＩＮＡＬ ＶＥＲＤＩＣＴ🔻

മികച്ച പ്രമേയവും അവതരണവും ഒത്തിണങ്ങിയപ്പോൾ ലഭിച്ചത് സുന്ദരമായ ഒരു ഇറാനിയൻ സിനിമയാണ്. ഫർഹാദിയോടുള്ള ഇഷ്ടം വീണ്ടു വീണ്ടും കൂടിക്കൊണ്ടിരിക്കുന്നു ഓരോ ചിത്രം കണ്ടുകഴിയുമ്പോഴും. കഥാപാത്രങ്ങളുടെ വൈകാരികത നമ്മെ അലട്ടും എന്നുറപ്പാണ്. അത് തന്നെയാണ് ചിത്രത്തിന്റെ ഭംഗിയും.

ＡＢ ＲＡＴＥＳ ★★★★☆



ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻'A Bitter End Is Much Better Than A Bitterness Without Ending'

രണ്ട് കഥാപാത്രങ്ങൾ ഒരുവേളയിൽ സംസാരിക്കുമ്പോൾ പറയുന്ന ഡയലോഗാണ്. എന്നാൽ ആ സിനിമയുടെ മുഴുവൻ ജീവനും ആ ഒരൊറ്റ ഡയലോഗിൽ ഉണ്ടെന്ന് മനസ്സിലായത് അവസാനമാണ്.

Year : 2009
Run Time : 1h 59min

🔻ഈ സിനിമക്ക് ഒരു basic plot പറയാൻ സാധിക്കുമെന്ന് തോന്നുന്നില്ല. കുടുംബസമേതം ഒരു യാത്ര പോവുകയും അതിനിടയിൽ ഉണ്ടാവുന്ന ചില സംഭവങ്ങളും എന്ന് വേണമെങ്കിൽ പറയാം. അങ്ങനെയൊരു കഥയില്ലായ്മയിൽ നിന്ന് മാനസികപിരിമുറുക്കം സൃഷ്ടിക്കുന്ന ഒരു വേളയിലേക്ക് ചിത്രം സഞ്ചരിക്കുന്നിടത്ത് മറക്കാൻ കഴിയാത്ത അനുഭവമായി മാറുന്നുണ്ട് എല്ലിയുടെ ജീവിതം.

🔻രണ്ട് തവണ ഓസ്കാറിന് അർഹനായ അസ്ഗർ ഫർഹാദി സംവിധാനം ചെയ്ത ചിത്രമാണ് About Elly. കഥാപാത്രങ്ങളുടെ മാനസികസംഘർഷങ്ങളും വൈകാരികതലങ്ങളും പ്രേക്ഷകരിലേക്ക് അതിന്റെ പൂർണ്ണതയിൽ എത്തിക്കാൻ അദ്ധേഹത്തിനുള്ള കഴിവ് അപാരമാണ്. Sperationലും Salesmanലുമൊക്കെ അത് ഏറെ അസ്വസ്ഥത പകർന്നതുമാണ്. ഇവിടെയും കാഴ്ചയിൽ നമ്മെ സംശയത്തിന്റെയും ആകാംഷയുടെയും ചുഴിയിലാഴ്ത്തുന്നതും അത്തരത്തിലുള്ള കഥാപാത്രവികസനവും അവതരണവുമാണ്.

🔻സഫീദ എന്ന കഥാപാത്രത്തിലേക്ക് മാത്രം കണ്ണോടിച്ചാൽ മതി എത്രത്തോളം പിരിമുറുക്കം കഥാപാത്രങ്ങളിൽ ഉണ്ടെന്ന കാര്യം മനസിലാക്കാൻ. തനിക്ക് ചുറ്റുമുള്ളവരുടെയെല്ലാം സമ്മർദ്ദം താങ്ങാനാവാതെ വരുമ്പോൾ ഉള്ളിലെ സങ്കടക്കടലത്രയും പുറന്തള്ളുന്നുണ്ട് സഫീദ. ഒരുപക്ഷെ ആ നടിയുടെ ജീവിതത്തിൽ ലഭിച്ച ഏറ്റവും വെല്ലുവിളി നിറഞ്ഞതും ഒപ്പം വ്യക്തിത്വം ഉള്ളതുമായ കഥാപാത്രമാവും സഫീദ. ഒപ്പം എല്ലിയിലെ ദുരൂഹതകളുടെ പുകമറ മാറിവരുന്ന ഓരോ രംഗവും അതിസൂക്ഷ്മമായി കൈകാര്യം ചെയ്തിട്ടുള്ളതാണ്.

🔻പൂർണ്ണമായും റിയലിസ്റ്റിക് അവതരണം, അല്ലെങ്കിൽ നമ്മളിൽ ഒരാൾക്കു സംഭവിക്കുന്നു എന്ന തോന്നൽ ഉണ്ടാക്കിയിടത്ത് അസ്ഗർ ഫർഹാദിയെന്ന പ്രഗത്ഭൻറെ കയ്യൊപ്പ് പ്രകടമാണ്. അത് തന്നെയാണ് കഥയും കഥാപാത്രങ്ങളും നമ്മെ ഇത്രയേറെ വേട്ടയാടുന്നതും. ഒപ്പം പശ്ചാത്തലത്തിൽ കടൽ ഇരമ്പുന്ന ശബ്ദം പലപ്പോഴും വന്നുപോവുന്നുണ്ട്.പല വേളകളിലും ഒരു ഭയം സൃഷ്ടിക്കാൻ ഉപകരിച്ചിട്ടുണ്ട് ആ ശബ്ദങ്ങൾ.

🔻ＦＩＮＡＬ ＶＥＲＤＩＣＴ🔻

തീർത്തും അയഞ്ഞ ഒരു പ്രമേയത്തെ വരിഞ്ഞുമുറുക്കുന്ന ഒരു പര്യവസാനത്തിലേക്ക് എങ്ങനെ കൊണ്ടുപോവാം എന്നതിന് ഉത്തമ ഉദാഹരണമാണ് ഈ ചിത്രം. ഏറ്റവും ഇഷ്ടം തോന്നിയിട്ടുള്ള ഇൻഡസ്ട്രിയായ ഇറാനിയൻ സിനിമകളോടുള്ള പ്രണയം പതിന്മടങ്ങ് വർധിപ്പിക്കുന്നു About Elly. ഒരു മാസ്റ്റർപീസ് എന്ന് തന്നെ വിശേഷിപ്പിക്കാം ഈ ചിത്രത്തെ. തീർച്ചയായും കണ്ടിരിക്കേണ്ട ഒന്ന് തന്നെ എന്ന് അടിവരയിട്ട് പറയുന്നു.

ＭＹ ＲＡＴＩＮＧ :: ★★★★½

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻ഈ സിനിമയിൽ ഇഷ്ടപ്പെട്ട കാര്യങ്ങളുടെ ലിസ്റ്റ് എടുത്താൽ ഒരുപാട് എഴുതാൻ കാണും. ഓരോ കഥാപാത്രങ്ങളുടെയും അഭിനയം മുതൽ ടെക്‌നികൾ സൈഡുകൾ പുലർത്തുന്ന നിലവാരം വരെ അതിൽ ഉൾപ്പെടും. ഒരുതരത്തിൽ 'മോഹിപ്പിക്കുന്ന സിനിമ' എന്ന പ്രയോഗം യോജിക്കുന്ന മറ്റൊരു ചിത്രം. അതാണ് Heidi.

Year : 2015
Run Time : 1h 51min

🔻അവളുടെ ആഗമനം ആൽപ്സിന്റെ താഴ്വരകൾക്ക് പുതിയൊരു ഉണർവ്വ് സമ്മാനിച്ചിരുന്നു. മുമ്പുള്ളതിനേക്കാൾ വശ്യത ആ മലയോരങ്ങളിൽ കാണപ്പെട്ടു. ഒപ്പം അവിടെ താമസിക്കുന്നവരിലും പ്രസരിപ്പ് ദർശിക്കാനാവുമായിരുന്നു. നന്മയുടെ പുതു കണികകൾ പലരിലും മുളപൊട്ടി. മാറ്റത്തിന്റെ മാലാഖയായിട്ടായിരുന്നു ഹെയ്ദി അവിടെ എത്തിയത്. തനിക്ക് ചുറ്റുമുള്ളവരിൽ സന്തോഷത്തിന്റെയും നന്മയുടെയും ദൂത് കൈമാറാൻ വന്ന മാലാഖ. ആ മാറ്റങ്ങൾ തുടങ്ങിയതാവട്ടെ തന്റെ മുത്തച്ഛനിൽ നിന്നും.

🔻നിഷ്കളങ്കത നിറഞ്ഞ ചിരിയുടെയും കുസൃതിയുടെയും പര്യായമായിരുന്നു ഹെയ്ദി. അത് മറ്റുള്ളവരിലേക്കും പകർന്ന് നൽകാനായിടത്തായിരുന്നു അവൾ ജീവിതത്തിൽ വിജയിച്ചത്. ഏവരും ഒരുപോലെ ക്രൂരനെന്ന് വിശേഷിപ്പിച്ച മുത്തച്ഛനിലും ഒപ്പം ഫ്രാങ്ക്ഫർട്ടിലെ കൊട്ടാരത്തിൽ താമസിച്ചിരുന്ന ആ കുട്ടിയിലും ഒരുപോലെ മാറ്റങ്ങൾ കാണാനായെങ്കിൽ ഹെയ്ദിയുടെ സ്വാധീനം അവിടെ നമുക്ക് മനസ്സിലാക്കാം. ഒരുപക്ഷെ നമ്മുടെ ജീവിതത്തിൽ അനുഭവിച്ചറിഞ്ഞിട്ടുള്ള ചിലരുടെ പ്രതിരൂപമാവാം അവൾ.

🔻ജീവിതത്തിൽ സന്തോഷം അനുഭവിച്ചറിയേണ്ടത് പ്രകൃതിയിൽ നിന്നാണെന്ന വലിയൊരു സന്ദേശം ചിത്രം കൈമാറുന്നുണ്ട്. ഭൗതിക ജീവിതത്തിൽ സമ്പന്നതയെ തേടി പോകുന്നവർ മറക്കുന്ന വലിയൊരു സത്യമാണത്. എന്ത് മനോഹരമായാണ് അത് കാട്ടിത്തരുന്നതെന്ന് കണ്ടറിയണം. പ്രകൃതി പോലും ഒരു കഥാപാത്രമെന്ന നിലയിൽ നിലകൊള്ളുന്നതും അസ്തിത്വം കൈവരിക്കുന്നതും അവതരണത്തിന്റെ സൗന്ദര്യം കാണിച്ച് തരുന്നു.

🔻ഒരു ചിരിയിൽ സന്തോഷം പ്രസരിപ്പിക്കാൻ എല്ലാവർക്കും സാധിക്കണമെന്നില്ല. എന്നാൽ Anuk Steffen എന്ന കൊച്ച് സുന്ദരി അത്ഭുതപ്പെടുത്തി. എപ്പോഴൊക്കെ ക്യാമറക്ക് മുന്നിൽ വരുന്നോ അപ്പോഴൊക്കെ ഒരു പുഞ്ചിരി പകരും ആ കുട്ടി. അത്ര നിഷ്കളങ്കത പ്രകടമാണ് ഹെയ്‌ദിയിൽ. സിനിമയുടെ ഏറ്റവും വലിയ ആസ്വാദനരഹസ്യം ആ കാസ്റ്റിങ്ങ് തന്നെയാണ്. ഒപ്പം ക്ലാരയായി ഇസബെല്ലും പക്വതയാർന്ന പ്രകടനം കാഴ്ചവെച്ചു.

🔻ആൽപ്സിന്റെ പർവ്വതനിരകളുടെ വശ്യസൗന്ദര്യം ഗംഭീരമാം വിധം ഒപ്പിയെടുത്തിട്ടുണ്ട് ചിത്രത്തിൽ. സിനിമയോട് അത് വളരെയേറെ അടുത്ത് നിൽക്കുന്നുമുണ്ട്. ഒപ്പം പശ്ചാത്തലസംഗീതത്തിന്റെ മാധുര്യം രുചിച്ചറിയാൻ പലപ്പോഴും സാധിക്കുന്നുണ്ട്.

🔻ＦＩＮＡＬ ＶＥＲＤＩＣＴ🔻

നന്മയുടെ അംശങ്ങൾ മാത്രം നിറഞ്ഞുനിൽക്കുന്ന അതിമനോഹരമായ സിനിമയാണ് Heidi. 'മോഹിപ്പിക്കുന്ന സിനിമ' എന്ന വിശേഷണം എല്ലാ അർത്ഥത്തിലും യോജിച്ച് നിൽക്കുന്ന ചിത്രം തീർച്ചയായും കാണേണ്ട ഒന്ന് തന്നെയാണ്. ഒരുപക്ഷെ നമ്മളിലും ഒരു മാറ്റം കൊണ്ടുവരാൻ ഹെയ്ദിക്ക് കഴിഞ്ഞേക്കും.

ＡＢ ＲＡＴＥＳ ★★★★☆

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻തന്റെ അമ്മയുടെ കൈ പിടിച്ചാണ് അഗസ്റ്റോ ആദ്യമായി ആ സ്റ്റേജിലേക്ക് കയറുന്നത്. കാണികൾക്ക് മുന്നിൽ അമ്മയോടൊപ്പം നിൽക്കുമ്പോൾ അവന് ലഭിച്ച കയ്യടികൾ ലോകം കീഴടക്കിയ ഒരുവനുണ്ടാവുന്ന അത്ഭുതവും സന്തോഷവുമാണ് നൽകിയത്. സ്റ്റേജ് ഡിസൈൻ ചെയ്യാൻ ഉപയോഗിച്ച ലൈറ്റുകളുടെ വെളിച്ചത്തിൽ ആ മുഖത്തെ അർമാദം പൂർണ്ണമായി വെളിവായിരുന്നു. അന്നവൻ ഉറപ്പിച്ചു താനുമൊരു അഭിനേതാവാകുമെന്ന്.

Year : 2017
Run Time : 1h 53min

🔻ആഗ്രഹിച്ച തുടക്കമായിരുന്നില്ല അഗസ്റ്റോവിന് ലഭിച്ചത്. സോഫ്റ്റ്-പോൺ മൂവികളിൽ നായകനായി അഭിനയിക്കേണ്ടി വന്നെങ്കിലും ഭാവിയിൽ ഇതിനൊരു മാറ്റമുണ്ടാകുമെന്ന് അടിയുറച്ച് വിശ്വസിച്ചു അദ്ദേഹം. അതിനായി പരിശ്രമിച്ചു. ആയിടക്കാണ് അമേരിക്കയിൽ trendsetter ആയിരുന്ന Bingo ഷോയിൽ ക്ലൗൺ ആയി അഭിനയിക്കാൻ അവസരം കിട്ടിയത്. തുടർന്ന് അദ്ദേഹത്തിന്റെ ജീവിതത്തിലെ വലിയൊരു വഴിത്തിരിവ് തന്നെയായി അത്.

🔻തന്റെ ഒറ്റ കഴിവ് കൊണ്ടാണ് അഗസ്റ്റോ 'ക്ലൗൺ' എന്ന കഥാപാത്രത്തെ ജനകീയമാക്കിയത്. സ്ക്രിപ്റ്റിൽ ഉള്ളതിനപ്പുറം കോമഡി നമ്പറുകളും നർമ്മം പകരുന്ന ശരീരഭാഷ്യവും തന്റേതായ രീതിയിൽ ആ കഥാപാത്രത്തിന് പകരാൻ അദ്ദേഹത്തിന് സാധിച്ചു. പ്രതീക്ഷക്കുമപ്പുറം ഷോ ഹിറ്റായി. ഒപ്പം കഥാപാത്രവും. എന്നാൽ കഥാപാത്രത്തെ ഗംഭീരമാക്കിയ അഭിനേതാവോ.?

🔻തുടക്കത്തിൽ ആ കഥാപാത്രത്തിന്റെ സ്വീകാര്യത അദ്ദേഹത്തെ വളരെയേറെ സന്തോഷവാനാക്കി. എന്നാൽ ഒരു പരിധി കഴിഞ്ഞപ്പോൾ പല കാര്യങ്ങളും അദ്ദേഹത്തെ വേട്ടയാടാൻ തുടങ്ങി. തന്റെ മകൻ, അമ്മ തുടങ്ങി പിന്തുണയുമായി നിന്ന പലരും ആദ്യം മനസ്സിലാക്കിയ കാര്യം അഗസ്റ്റോവിന് ബോധ്യപ്പെടാൻ അൽപ്പം വൈകി. കഥാപാത്രത്തെ മാത്രമാണ് പ്രേക്ഷകന് കാണുന്നതെന്ന സത്യം.

🔻ഒരു ഗംഭീര അനുഭവമാണ് ഈ ചിത്രം സമ്മാനിച്ചത്. നർമ്മരംഗങ്ങളിലൂടെ വളരെയേറെ രസിപ്പിച്ചാണ് ചിത്രം മുന്നേറിയതെങ്കിലും പിന്നീട് മറ്റൊരു തലത്തിലായി യാത്ര. അഗസ്റ്റോ എന്ന കഥാപാത്രത്തെ പൂർണ്ണമായി പരിചയപ്പെടുത്താൻ സംവിധായകനായി. ഒപ്പം Brichtaയുടെ പകർന്നാട്ടവും. പല വൈകാരിക രംഗങ്ങളും അതിമനോഹരമായിരുന്നു. ഒപ്പം വളരെ ലളിതവും. കൃത്രിമത്വം തോന്നാത്ത വിധം അവ അവതരിപ്പിച്ചതിന് ആസ്വാദനം സിനിമ കണ്ടുകഴിയുമ്പോൾ നമുക്ക് മനസ്സിലാവും.

🔻മികച്ച ക്യാമറ വർക്കുകൾ, പശ്ചാത്തലസംഗീതം, പഴയ കാലഘട്ടത്തെ വിശ്വസനീയമാം വിധം അവതരിപ്പിക്കുന്നതിൽ നിർണ്ണായക പങ്ക് വഹിച്ച ആർട്ട് ഡയറക്ഷൻ തുടങ്ങി സർവ്വ മേഖകളകളിലും ആധിപത്യം പുലർത്തുന്നുണ്ട് ചിത്രം. ഒടുവിലേക്ക് വരുമ്പോൾ ഓരോ രംഗങ്ങളും മനസ്സിനെ വല്ലാതെ ആകർഷിക്കുന്നതിൽ ഈ ഘടകങ്ങൾ വഹിച്ച പങ്ക് വളരെ വലുതാണ്.

🔻ＦＩＮＡＬ ＶＥＲＤＩＣＴ🔻

വാഴ്ത്തപ്പെടാതെ പോവുന്ന ചില പ്രതിഭകളുണ്ട് ഈ ലോകത്ത്. ബഹുമതി അർഹിച്ചിട്ടും ലഭിക്കാതെ പോവുന്നവർ. അഗസ്റ്റോയും അത്തരത്തിൽ ഒരുവനാണ്. കണ്ട് തന്നെ അറിയുക ആ ജീവിതം.

ＡＢ ＲＡＴＥＳ ★★★★☆

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻ജീവിതത്തിൽ ഏതെങ്കിലുമൊരു പോയിന്റിൽ എന്ത് ചെയ്യണമെന്നറിയാതെ നിന്നുപോയാൽ പലരോടും അഭിപ്രായം ആരായാറുണ്ട്. പലരും ഒരേതരത്തിലുള്ള ഉപദേശങ്ങൾ നൽകുമ്പോൾ മടുക്കുമെങ്കിലും ചിലർ മാത്രം അതിൽ നിന്ന് വേറിട്ട് നിൽക്കും. ജീവിതത്തെ ഒരു ചലഞ്ചായി എടുക്കാനും മുന്നോട്ട് പോവാനുള്ള ഊർജ്ജം നൽകുവാനും ആ വാക്കുകൾക്ക് കഴിയും. അത്തരത്തിൽ ഒരു നാടിന്റെ മുഴുവൻ ഉപദേശകനായിരുന്നു നാമിയ സ്റ്റോറിലെ ആ മുത്തച്ഛൻ.

Year : 2017
Run Time : 2h 9min

🔻ആ രാത്രി ആ മൂന്ന് പേർ എവിടെയെങ്കിലും ഒളിക്കാനുള്ള വ്യഗ്രതയിലാരുന്നു. അവർ വന്ന് പെട്ടത് നാമിയ ജനറൽ സ്റ്റോറിലും. പണ്ടെപ്പോഴോ പൂട്ടിയതാണ് ആ കട. അവിടെ അവർ സുരക്ഷിതരാവുമെന്ന് കരുതി കയറിയതാണ്. എന്നാൽ അവരെ അവിടെ കാത്തിരുന്നത് ഞെട്ടിക്കുന്ന പല കാര്യങ്ങളാണ്. അത് തുങ്ങിയതാവട്ടെ ഒരു കത്തിന്റെ രൂപത്തിലും.

🔻ചെറിയ തോതിൽ ഒരു ടൈം ട്രാവൽ കോൺസെപ്റ് ആണ് ചിത്രം കരുതി വെച്ചിരിക്കുന്നത്. ബേസിക്ക് പ്ലോട്ട് ടൈം ട്രാവൽ ആണെങ്കിലും സിനിമ കൂടുതൽ കൈകാര്യം ചെയ്യുന്നത് പല ജീവനുകളാണ്. ഫാന്റസി എന്ന ഘടകം ഒരു സൈഡിലേക്ക് മാറി നിന്നുകൊണ്ട് മനോഹരമായ പല കാര്യങ്ങൾ നമ്മെ കാട്ടിത്തരികയാണ് സംവിധായകൻ. അതിൽ ഒരുപാട് സന്തോഷം നൽകുന്ന നിമിഷങ്ങളുണ്ട്. ചെറിയ തോതിൽ മനസ്സ് വേദനിപ്പിച്ച രംഗങ്ങളുണ്ട്.

🔻ആരുടെയെങ്കിലുമൊക്കെ ജീവിതത്തിൽ ഒരു വഴികാട്ടിയാവാൻ നമുക്ക് സാധിക്കുന്നതിനെപ്പറ്റി ചിന്തിച്ച് നോക്കിയിയിട്ടുണ്ടോ. പലർക്കും അവരുടെ ഭാവിയിലേക്കുള്ള വെളിച്ചമാവുകയും അവരുടെ സന്തോഷത്തിന് നമ്മളും ഒരു കാരണമാവുകയാണെന്നറിയുമ്പോഴുള്ള ആത്മനിർവൃതി പറഞ്ഞറിയിക്കാൻ പറ്റുന്നതിനും അപ്പുറമാവും. ലളിതമായി പറഞ്ഞാൽ ഇതാണ് സിനിമയുടെ ഉള്ളടക്കം. അതിനെ ഭംഗിയായി അവതരിപ്പിച്ചിരിക്കുന്നിടത്ത് നല്ലൊരു അനുഭൂതി പകരുന്നുണ്ട് ചിത്രം.

🔻അൽപ്പം പതിഞ്ഞ താളമാണ് സിനിമയുടേതെങ്കിലും അതുമായി ഇഴുകിച്ചേർന്നാൽ ആസ്വാദനം വലിയ തോതിലാവും.കഥാപാത്രങ്ങളെ കണക്റ്റ് ചെയ്ത വിധം ഏറെ ലളിതവും ഒപ്പം മനോഹരവും. കൂടെ ദൃശ്യചാരുതയാർന്ന വിഷ്വൽസും ലാളിത്യം നിറഞ്ഞ പശ്ചാത്തലസംഗീതവും കൂടിയാവുമ്പോൾ സന്തോഷം നൽകുന്നു ഈ ചിത്രം.

🔻ＦＩＮＡＬ ＶＥＲＤＩＣＴ🔻

നല്ലൊരു സന്ദേശം കാണികൾക്ക് നൽകുന്ന സുന്ദരമായ ചിത്രം. ഫാന്റസിയെന്ന ലേബലിൽ കഥ തുടങ്ങുമ്പോഴും മാനുഷികമായ കാര്യങ്ങൾക്കാണ് ചിത്രം മുൻകൈ കൊടുക്കുന്നതെന്ന് കാണാം. നിരാശ നൽകാത്ത ഒരനുഭവമാകുമെന്ന് പ്രതീക്ഷിക്കുന്നു.

ＡＢ ＲＡＴＥＳ ★★★½

🔻നവോത്ഥാന നായകന്മാരെ പറ്റി സിനിമ ചെയ്ത് വരുമ്പോൾ എല്ലാവരും ഉപയോഗിക്കുന്ന ചില പ്രത്യേക ഫോർമുലകൾ ഉണ്ട്. കാണികളെ ഒന്നടങ്കം ആവേശത്തിലാഴ്ത്തുകയും രോമാഞ്ചം കൊള്ളിക്കുകയും ചെയ്യുകയാണ് ഭൂരിഭാഗവും ചെയ്യുക. എന്നാൽ ഇതിൽ നിന്നെല്ലാം വ്യത്യസ്തമായി ഈ കാര്യത്തിൽ ഒരു കോമിക്ക് അപ്രോച്ച് ആയാൽ എങ്ങനെയുണ്ടാവും സംഗതി?

Year : 2019
Run Time : 1h

🔻വീട്ടുജോലി ചെയ്യുന്നതിനിടക്കാണ് കെവിൻ ആ കരച്ചിൽ കേട്ടത്. '12 Years A Slave' കണ്ടുകൊണ്ടിരിക്കവേ തന്റെ മകൾ കൂട്ടുകാരനെ ഉപദ്രവിച്ചിരിക്കുന്നു. വെളുത്തവർ കറുത്തവരെ ഉപദ്രവിക്കുന്നത് അവൾക്ക് കണ്ടിരിക്കാൻ പറ്റിയില്ലത്രേ. തുടർന്ന് തന്റെ വെളുത്ത കൂട്ടുകാരനെ നല്ലൊരു നുള്ള് കൊടുത്ത് ദേഷ്യം ശമിപ്പിക്കാൻ ശ്രമിച്ചു. എന്നാൽ കെവിൻ സ്വീകരിച്ചത് വേറൊരു മാർഗ്ഗമാണ്.

🔻കുട്ടികളെയും കുടുംബത്തെയും ലക്ഷ്യം വെച്ച് netflix ഒരുക്കിയ ചിത്രമാണിത്. അവരെ വേഗം കയ്യിലെടുക്കാൻ സാധിക്കുക ആഖ്യാനത്തിൽ കൊണ്ടുവരുന്ന നർമ്മങ്ങളിലൂടെയാണ്. അത് തന്നെയാണ് കെവിൻ ഇവിടെ പയറ്റിയിരിക്കുന്നത്. കറുത്തവരെക്കുറിച്ച് തന്റെ മകൾക്ക് ക്ലാസ് എടുക്കുകയാണ് കെവിൻ. അവർ കീഴടക്കിയ പടവുകളും താണ്ടിയ ദൂരങ്ങളും വളരെ രസകരമായി എന്നാൽ ഒട്ടും ഓവറാക്കാതെ തന്നെ അവതരിപ്പിച്ചിട്ടുണ്ട്.

🔻ചില സമയങ്ങളിൽ വൺ ലൈനറുകളാണ് ചിരിപ്പിക്കുന്നതെങ്കിൽ ചില പാഠങ്ങളിൽ ഓരോ സംഭവങ്ങളും രസം പകരുന്നുണ്ട്. ഡോക്ടറുടെ സീനുകളും ഹിമാലയത്തിലെ രംഗങ്ങളുമൊക്കെ അപാരം തന്നെ. അത്തരത്തിൽ ക്രിയേറ്റിവ് ആയ പല രംഗങ്ങളും വീക്ഷിക്കാം. ഇതിന്റെയെല്ലാം പരിണിതഫലമെന്നോണം പലരും മറക്കാതെ നമ്മുടെ മനസ്സിൽ കാണും .അതാണ് ചിത്രത്തിന്റെയും ഗുണം.

🔻ＦＩＮＡＬ ＶＥＲＤＩＣＴ🔻

പതിവ് ശൈലികളിൽ നിന്ന് വേറിട്ട ഒരു ട്രീറ്റ്‌മെന്റ് കൊണ്ട് നല്ലൊരു അനുഭവമാകുന്നുണ്ട് ഈ ചിത്രം. കേവലം ഒരു മണിക്കൂർ കൊണ്ട് ചിരിപ്പിക്കുകയും അതോടൊപ്പം ചിന്തിപ്പിക്കുകയും ചെയ്യാൻ ഈ കൊച്ച് ചിത്രത്തിനായിട്ടുണ്ട്. വ്യത്യസ്തത ആഗ്രഹിക്കുന്നവർക്ക് ഒന്ന് പരീക്ഷിച്ച് നോക്കാവുന്നതാണ്. കണ്ടുതീരുമ്പോൾ ഒരാളെങ്കിലും നമ്മുടെ മനസ്സിൽ അവശേഷിച്ചാൽ അത് സിനിമയുടെ വിജയമാണ്.

ＡＢ ＲＡＴＥＳ ★★★☆☆

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻ഈയടുത്ത് ത്രില്ലറുകൾ ഏറ്റവും കൂടുതൽ ആസ്വദിച്ചിട്ടുള്ളത് തമിഴ് ഇൻഡസ്ട്രിയിൽ നിന്നാണ്. രാക്ഷസൻ, ഇരവുക്ക് ആയിരം കൺകൾ തുടങ്ങി ഒരുപാട് നല്ല ത്രില്ലറുകൾ ആസ്വദിക്കാൻ കഴിഞ്ഞിരുന്നു. കുട്രം 23 എന്ന ചിത്രം നല്ലൊരു തീയേറ്റർ അനുഭവം നൽകിയിരുന്നു. അരുൺ വിജയ് നായകനായ തടം അന്നൗൻസ് ചെയ്തപ്പോഴും പ്രതീക്ഷകൾ ഉണ്ടായിരുന്നു. ആ പ്രതീക്ഷകളെ തൃപ്തിപ്പെടുത്താൻ ചിത്രത്തിനായി.

Year : 2019
Run Time : 2h 18min

🔻ഒരു കൊലപാതകം. എന്നാൽ പോലീസുകാർക്ക് മുന്നിൽ പ്രതിയെന്ന് സംശയിക്കുന്ന രണ്ട് പേർ. അതിൽ ആരാണ് യഥാർത്ഥ കുറ്റവാളി എന്ന് കണ്ടുപിടിക്കാനുള്ള ശ്രമങ്ങളാണ് ചിത്രത്തിന്റെ കഥ.

🔻ഇതുവരെ കണ്ട് പരിചരിച്ചിട്ടില്ലാത്ത ഒരു ചെറിയ പ്രമേയം. കൊലപാതകിയെ കണ്ടെത്തുന്നതിനാണ് ചിത്രം പ്രാധാന്യം നൽകിയിരിക്കുന്നത്. അതുകൊണ്ട് തന്നെ Whodunnit എന്ന ചോദ്യത്തിലേക്കാണ് നമ്മുടെ ഫോക്കസ് പോവുക. അത് വളരെ മികച്ച രീതിയിൽ സ്‌ക്രീനിൽ അവതരിപ്പിച്ചിട്ടുണ്ട് സംവിധായകൻ. അതാണ് സിനിമയിലെ പുതുമയും. എന്നാൽ അതിനനുസരിച്ച് ചില പോരായ്മകളും തോന്നുന്നുണ്ട് ചില സന്ദർഭങ്ങളിൽ.

🔻സംവിധായകന്റെ ബുദ്ധിപരമായ ആഖ്യാനമാണ് ചിത്രത്തിന് മുതൽക്കൂട്ട്. നായകനെ പരിചയപ്പെടുത്തി, അവരുടെ ജീവിതസാഹചര്യങ്ങളെപ്പറ്റി നല്ല ഐഡിയ ഉണ്ടാക്കിയ ശേഷമാണ് പ്രധാന ഭാഗത്തേക്ക് കടക്കുന്നത്.അതിനൽപ്പം സമയമെടുത്തെങ്കിലും പ്രധാന കഥയിലേക്ക് കടന്നശേഷം പിന്നീട് ട്രാക്കിലാവുന്നുണ്ട് ചിത്രം. പിന്നീട് നല്ലൊരു ത്രില്ലർ തന്നെ സമ്മാനിക്കുന്നുണ്ട് സംവിധായകൻ. കഥയെ പറ്റി കൂടുതൽ പറയുന്നില്ല.

🔻ചിത്രത്തിലെ ഫ്ലാഷ്ബാക്ക് രംഗങ്ങൾ, അതോടൊപ്പം whydunnit എന്ന ചോദ്യത്തിനുത്തരം എന്നിവ പോരായ്മയായി തോന്നി കാഴ്ച്ചയിൽ. why എന്നത് ഊഹിച്ചിരുന്നു എങ്കിലും അത്ര convincing ആയില്ല. പക്ഷെ അതിലേക്ക് അധികം ശ്രദ്ധ ചെലുത്താതെ who എന്ന ചോദ്യത്തിലേക്ക് മാത്രം കോൺസെൻട്രേറ്റ് ചെയ്തതുകൊണ്ട് പോരായ്മ അധികം മനസ്സിൽ നിൽക്കില്ല. ഒഴുക്കിനൊപ്പം നമ്മളും നീന്തിപ്പോവും. ഒടുക്കം തൃപ്തി തന്നെയാവും ഫലം.

🔻അരുൺ വിജയ്യുടെ കിടിലൻ പ്രകടനം തന്നെയാണ് ഹൈലൈറ്റ്. ആക്ഷൻ സീനിലുൾപ്പടെ സ്‌ക്രീൻ പ്രസൻസ് അപാരമായിരുന്നു. അതിനോളം പ്രാധാന്യമുള്ള റോളുകൾ വരുന്നില്ല മറ്റാർക്കും. പോലീസുകാരിയായി വന്ന നടിയുടെ പ്രകടനവും നന്നായിരുന്നു. ഇടക്ക് കാണാൻ നയൻസിന്റെ ഒരു ലുക്കും പലയിടത്തും തോന്നി. കൂടെ മികച്ച ഛായാഗ്രഹണവും ത്രിൽ മൂഡിനോട് ചേർന്ന് നിൽക്കുന്ന പശ്ചാത്തലസംഗീതവും പലപ്പോഴും സന്ദർഭങ്ങൾക്ക് മിഴിവേകുന്നു. ക്ലൈമാക്സിലെ ഗാനം മനോഹരം.

🔻ＦＩＮＡＬ ＶＥＲＤＩＣＴ🔻

ഗംഭീരമെന്ന അഭിപ്രായം ഇല്ലെങ്കിലും കാണികളെ ത്രസിപ്പിച്ച് ഇരുത്തുവാൻ കെൽപ്പുള്ള ചിത്രമാണ് തടം. നല്ല കഥയും അവതരണവും പ്രകടനവും രണ്ടര മണിക്കൂർ നമ്മെ പിടിച്ചിരുത്തും എന്ന് തീർച്ച. പോരായ്മകൾ ഉണ്ടെങ്കിൽ കൂടി അതിലേക്ക് അധികം ശ്രദ്ധ പോവാതെയുള്ള ആഖ്യാനം അഭിനന്ദനം അർഹിക്കുന്നു.

ＡＢ ＲＡＴＥＳ ★★★½

🔻ആദ്യമായിട്ടാണ് ഒരു സീരീസ് എപ്പിസോഡ് റിലീസ് അനുസരിച്ച് കാണുന്നത്. അങ്ങനെയൊരു ആഗ്രഹം മനസ്സിൽ ഉണ്ടായിരുന്നത് കൊണ്ട് എപ്പോഴോ ടെലെഗ്രാമിൽ ഒരു എപ്പിസോഡ് കണ്ടപ്പോൾ ഡൗൺലോഡ് ചെയ്ത് കാണാൻ തുടങ്ങിയതാണ്. പിന്നീട് ഓരോ ആഴ്ചയും അടുത്ത എപ്പിസോഡ് റിലീസിനുള്ള കാത്തിരിപ്പായി. കാത്തിരിപ്പിന്റെ സുഖം അവിടെ നന്നായി അറിഞ്ഞു.

Year : 2018-19
Season : 1
Episode : 16
Run TIme : 40-50min

🔻വർഷം 2013. ഫാമിലി ടൂറിന് ശേഷം തങ്ങളുടെ റിട്ടേൺ ഫ്ലൈറ്റ് കാത്തിരുന്നപ്പോഴാണ് അവർ ആ അന്നൗൺസ്‌മെന്റ് കേട്ടത്. അവർ ടിക്കറ്റ് ബുക്ക് ചെയ്തിരുന്ന ഫ്‌ളൈറ്റിന് ശേഷമുള്ളതിന് പോവുകയാണെങ്കിൽ കുറച്ച് പൈസ റീഫണ്ട് ഉണ്ട്. പിന്നെ മക്കെലയും ബെന്നും കൂടെ മകൻ ക്യാലും അതിന് വരാനായി തയ്യാറെടുത്തു.

യാത്രക്കിടയിൽ പെട്ടെന്ന് ആകാശത്ത് വെച്ച് ഒരു ചുഴിയിൽ അവർ അകപ്പെട്ടു. കുറച്ച് നേരം ചില ബുദ്ധിമുട്ടുകൾ അവർക്കുണ്ടായെങ്കിലും വൈകാതെ തന്നെ എല്ലാം പഴയ അവസ്ഥയിലായി. പിന്നീട് ഫ്ലൈറ്റും ലാന്റ് ചെയ്തു. എന്നാൽ അപ്പോൾ കാര്യങ്ങൾ പഴയത് പോലെയായിരുന്നില്ല. It Was 2018. തങ്ങൾ അവിടുന്ന് പുറപ്പെട്ടിട്ട് 5 വർഷങ്ങൾ പിന്നിട്ടിരുന്നു.

🔻ആദ്യ എപ്പിസോഡിന്റെ ഗംഭീര അവതരണം ബാക്കിയുള്ളതും കാണാൻ പ്രേരിപ്പിക്കും എന്ന് തീർച്ച. മേൽ പറഞ്ഞ സ്റ്റോറി ലൈൻ 15 മിനിറ്റിൽ തന്നെ പറയുന്നുണെങ്കിലും ബാക്കിയുള്ള ചില മെയിൻ കണ്ടന്റുകൾ ആ എപ്പിസോഡിൽ കാണിക്കുന്നുണ്ട്. പിന്നീട് കഥയെ മുന്നോട്ട് നയിക്കുന്നത് ആ മിസ്റ്ററിയാണ്.

🔻Machela, Ben, Cal എന്നിവരെ കേന്ദ്രീകരിച്ചാണ് കഥ ഭൂരിഭാഗവും മുന്നോട്ട് പോവുന്നത്. 5 വർഷം പിന്നിട്ട ഭൂമിയിലേക്ക് ഇവർ മൂന്നുപേരും എത്തുമ്പോൾ ഇവർക്കും അതുപോലെ ചുറ്റുമുള്ളവർക്കും സംഭവിച്ച മാറ്റങ്ങൾ മികച്ച രീതിയിൽ കാണിച്ചിട്ടുണ്ട്. കൂടെയുണ്ടാവുമെന്ന് പ്രതീക്ഷിച്ച പലരെയും ഒരു ഫ്‌ളൈറ്റ് യാത്രയിൽ നഷ്ടപ്പെടുക, താങ്ങും തണലുമായി നിന്ന പലരും മരണത്തിന് കീഴടങ്ങുക, ചുറ്റുമുള്ളവർക്ക് മുന്നിൽ തങ്ങൾ സംശയത്തിന്റെ നിഴലിലാണെന്ന തോന്നൽ ഉണ്ടാവുക തുടങ്ങിയ നിമിഷങ്ങളിലെ കോൺഫ്ലിക്റ്റുകൾ തുടക്കം മുതൽ ഒടുക്കം വരെ കൈകാര്യം ചെയ്യുന്നുണ്ട്. എന്നാൽ ചില ഘട്ടങ്ങളിൽ കാഴ്ചക്കാരുടെ മൂഡിനോട് ചേരാതെ പോവുന്നുണ്ട് ഇത്തരത്തിലുള്ള സന്ദർഭങ്ങൾ. കഥാപാത്രങ്ങൾക്ക് അവ ആവശ്യമാണെങ്കിലും misplace ആയതുപോലെയൊരു തോന്നൽ. അതൊഴിച്ചാൽ കേന്ദ്രകഥാപാത്രങ്ങളുടെ ഇമോഷൻസ് ഭംഗിയായി അവതരിപ്പിച്ചിട്ടുണ്ട് സംവിധായകൻ.

🔻ത്രിൽ എലമെൻറ്സും ട്വിസ്റ്റുകളും സസ്പെൻസുകളും ആവോളമുണ്ട് 16 എപ്പിസോഡുകളിൽ. മാത്രമല്ല ചില കഥാപാത്രങ്ങളുടെ എൻട്രി അവസാന നിമിഷത്തേക്ക് വരുമ്പോൾ പ്ലോട്ട് ടൈറ്റാക്കുന്നുമുണ്ട്. അതിനനുസരിച്ച് ആസ്വാദനത്തിനും ഗുണം ചെയ്യുന്നുണ്ട്. കഥാപാത്രങ്ങളുടെ കോൺഫ്ലിക്റ്റുകളും ത്രിൽ എലമെൻറ്സും സമന്വയിപ്പിച്ച വിധം ഭൂരിഭാഗവും അഭിനന്ദനം അർഹിക്കുന്നുണ്ട്. ചിലയിടങ്ങളിൽ ചില സംഭവങ്ങൾ സിമ്പിളായി കാണിച്ച് തീർത്തത് അത്ര സുഖം നൽകിയില്ല എന്ന് കൂടി ചേർക്കുന്നു.

🔻സീസൺ 1 പൂർണ്ണമല്ല. അടുത്ത സീസണിലേക്കായി ഒരു ഇടിവെട്ട് ട്വിസ്റ്റും തലയിൽ വലിച്ച് കയറ്റിയിട്ടാണ് 16ആം എപ്പിസോഡ് നിന്നത്. ഒപ്പം എൻഡിങ്ങ് സീനും ഗംഭീരം. സ്വാഭാവികമായും ഒരു രണ്ടാം ഭാഗം സീരീസിന് ഉണ്ടാവും. കണ്ടുകഴിയുമ്പോൾ എത്രയും വേഗം അത് എത്തണമെന്ന ആഗ്രഹവും സീരീസ് ബാക്കിവെക്കും. നമ്മുടെ മനസ്സിനെ അലട്ടുന്ന പ്രധാന ചോദ്യമായി 'What happened' എന്നതിന് ഉത്തരം ഇതുവരെ നൽകാനായിട്ടില്ല. അതും അടുത്ത സീസണിൽ പ്രതീക്ഷിക്കുന്നു.

🔻Ben Stone ആയി Josh Dallasന്റെ പ്രകടനം തന്നെയാണ് ഏറ്റവും ഇഷ്ടപ്പെട്ടത്. സത്യത്തിൽ ആ ഫ്‌ളൈറ്റിൽ ഉണ്ടായിരുന്നതിൽ ഏറ്റവും ഇഷ്ടം തോന്നുക ബെന്നിനോടും ക്യാലിനോടുമാണ്. Jack Messina എന്ന കൊച്ച് പയ്യന്റെ പ്രകടനം ഗംഭീരം. ഒപ്പം മക്കെലയായി Melissaയും നല്ല പ്രകടനം തന്നെ കാഴ്ചവെച്ചു.

🔻സീരീസിലെ ഏറ്റവും സങ്കീർണ്ണമായ കഥാപാത്രം ഗ്രേസിന്റേതായിരുന്നു. ഒരമ്മയായും ഭാര്യയായും ആ കഥാപാത്രത്തെ നന്നായി അവതരിപ്പിച്ചിട്ടുണ്ട് സംവിധായകൻ. ഒപ്പം Athenaയുടെ നല്ല പ്രകടനം കൂടിയാവുമ്പോൾ അവരുടെ മാനസികാവസ്ഥ നല്ല രീതിയിൽ കാണികളെ അഫക്റ്റ് ചെയ്യും.

🔻ടെക്നിക്കൽ വശങ്ങൾ നന്നായിരുന്നു. എങ്കിലും ഒരൽപം കൂടി ശ്രദ്ധിച്ചിരുന്നെങ്കിൽ സീരീസ് ഒന്നുകൂടി interesting ആയേനെ എന്ന് തോന്നി. മക്കെലയും സീക്കും ഒരുമിച്ചുള്ള രംഗങ്ങളിലെ VFX വർക്ക് മോശമായി തന്നെ തോന്നി. അത് മാത്രമാണ് VFXൽ തോന്നിയ അപാകത. ത്രില്ലിലേക്ക് വഴിവെക്കുന്ന രംഗങ്ങളിലെ എഡിറ്റിങ്ങ് ഭൂരിഭാഗവും നന്നായിരുന്നു.

🔻ＦＩＮＡＬ ＶＥＲＤＩＣＴ🔻

വ്യത്യസ്തമാർന്ന പ്രമേയവും അതിനനുസരിച്ച് പുതുമയുള്ള കഥയും അവതരണവും സ്വായത്തമാക്കിയ നല്ലൊരു സീരീസ്. ആദ്യ എപ്പിസോഡ് കാണുമ്പോൾ തന്നെ സീരീസിനോട് താൽപര്യം തോന്നുമെന്ന് തീർച്ച. ഇമോഷണൽ അറ്റാച്മെന്റിനും മിസ്റ്ററി നിറഞ്ഞ കഥക്കും ഒരുപോലെ പ്രാധാന്യം നൽകുന്ന സീരീസ് മികച്ച അനുഭവം തന്നെയാകുമെന്ന് തീർച്ച. രണ്ടാം സീസണിനായുള്ള കാത്തിരിപ്പ് ഇനിയും ബാക്കി.

ＡＢ ＲＡＴＥＳ ★★★½