Abeed Azad

🔻Story Line🔻

ചേരി നിവാസിയായ 'അറിവ്', തന്റെ കുടുംബത്തിനും കൂടെയുള്ളവർക്കും വേണ്ടി നല്ല കാര്യങ്ങൾ ചെയ്യണമെന്ന് അതിയായി ആഗ്രഹിക്കുന്ന ചെറുപ്പക്കാരനാണ്.അതിന്റെ ഭാഗമായി ചെറിനിവാസികൾക്ക് മാത്രമായി ഒരു റേഡിയോ സ്റ്റേഷൻ അദ്ദേഹം നടത്തുന്നുണ്ട്.എന്നാൽ കുടുംബത്തിന് വേണ്ടി അദ്ധ്വാനിച്ച് പൈസ കണ്ടെത്തുന്നതിനായി അദ്ദേഹം ഒരു MNCയിൽ ജോലിക്ക് കയറുന്നു.ഫുഡ് പ്രൊഡക്റ്റ്സ് ഉണ്ടാക്കുന്ന സാഫ്രോണ് എന്ന കമ്പനിയിൽ.

എന്നാൽ ദിവസങ്ങൾക്ക് ശേഷമാണ് പല ഞെട്ടിപ്പിക്കുന്ന വെളിപ്പെടുത്തലുകളും അദ്ദേഹം മനസ്സിലാക്കുന്നത്.കോർപറേറ്റുകളുടെ പല കളികളും കള്ളത്തരങ്ങളും പൊളിക്കുവാനുള്ള അദ്ദേഹത്തിന്റെ നീക്കങ്ങളാണ് തുടർന്ന് ചിത്രം ചർച്ച ചെയ്യുന്നത്.

🔻Behind Screen🔻

തിരക്കഥ കൊണ്ടും ആഖ്യാനം കൊണ്ടും കാണികളെ മുഴുവൻ അതിശയപ്പെടുത്തിയ ചിത്രമാണ് 'തനി ഒരുവൻ'.അതൊരുക്കിയ മോഹൻ രാജ തിരക്കഥയെഴുതി സംവിധാനം ചെയ്ത ചിത്രമാണ് വേലൈക്കാരൻ.ഫഹദ് ഫാസിൽ ആദ്യമായി തമിഴിൽ എത്തുന്നു എന്ന പ്രത്യേകതയും ചിത്രത്തിനുണ്ടായിരുന്നു.

വളരെ കാലികപ്രസക്തിയുള്ള ഒരു വിഷയമാണ് ചിത്രം കൈകാര്യം ചെയ്യുന്നത്.കൺസ്യുമർ പ്രൊഡക്റ്റുകളെ പറ്റിയുള്ള പല കള്ളികളും വെളിച്ചത്താക്കാൻ ശ്രമിക്കുകയാണ് സംവിധായകൻ ചിത്രത്തിലൂടെ.ഒരുപാട് ആശയങ്ങൾ സംവിധായകൻ കാണികൾക്ക് കൈമാറുന്നുണ്ട്.അവയെല്ലാം പരമാവധി കാണികളിലേക്ക് എത്തിക്കാനും ചിത്രത്തിനായിട്ടുണ്ട്.പലതും ഞെട്ടിക്കുന്ന വിവരങ്ങളാണെന്നത് ശ്രദ്ധയാർജിക്കേണ്ടതാണ്.

വെറുമൊരു സെയിൽസ് എക്സിക്യൂട്ടീവ് ആയി ജോലി ചെയ്യാൻ എത്തുന്ന അറിവിന് തന്റെ സാമാന്യബുദ്ധിക്ക് താങ്ങാവുന്നതിലും അപ്പുറമുള്ള കാര്യങ്ങളാണ് ഞൊടിയിടയിൽ മനസ്സിലാക്കേണ്ടി വരുന്നത്.വെറും ഡയലോഗുകൾ കൊണ്ട് അവ പ്രേക്ഷകർക്കും മനസ്സിലാക്കിത്തരുന്നു എന്നത് ശ്രദ്ധേയമാണ്."ഞാൻ കൂലി വാങ്ങി ആളെ കൊല്ലുന്നു, നീ ശമ്പളം വാങ്ങി ആളെ കൊല്ലുന്നു" തുടങ്ങിയ കുറിക്ക് കൊള്ളുന്ന ഡയലോഗുകൾ ഈ കാലഘട്ടത്തിൽ വളരെ പ്രസക്തമായി തോന്നി.ഇന്റർവെല്ലിന് ശേഷം തുടക്കത്തിലുള്ള പല സീനുകളും ഞെട്ടിപ്പിക്കുന്ന വിധം തന്നെ അവതരിപ്പിച്ചിട്ടുണ്ട്.എന്നാൽ ഇടക്കിടക്ക് ആ ഒഴുക്ക് നഷ്ടപ്പെടുന്നുമുണ്ട്.

നായകാനാണോ എങ്കിൽ ഒരു നായിക നിർബന്ധാ എന്നപോലെയാണ് മൃണാളിനി എന്ന കഥാപാത്രത്തിന്റെ വരവും പിന്നീടുള്ള രംഗങ്ങളും.കരിവേപ്പിലയുടെ വിലപോലുമില്ലാത്ത ഒരു റോൾ.കൂടെ രണ്ടാം പകുതിയിൽ കല്ലുകടിയാവാനായി ഒരു ലൗ സോങ്ങും ഇടക്കിടെ ഓരോ രംഗങ്ങങ്ങളും.സിനിമയുടെ പേസ് നഷ്ടപ്പെടുത്താൻ മാത്രമേ ഇത്തരം കഥാപാത്രങ്ങൾക്ക് കഴിയുന്നുള്ളൂ.

സംവിധായകന്റെ മുൻ ചിത്രം പോലെ ഒരു cat & mouse പ്ലേ അല്ല വേലൈക്കാരൻ.മുഴുനീള ത്രില്ലറുമല്ല.ആവശ്യത്തിന് ത്രില്ലും കാലിക പ്രസക്തിയും കൂട്ടിയിണക്കിയ കാഴ്ച്ചയാവുന്നു വേലൈക്കാരൻ.എന്നാൽ വെറും മാസ്സ്-മസാല ചേരുവകൾ കുത്തിനിറച്ച ഒന്നാവുന്നുമില്ല ചിത്രം.അത്തരത്തിൽ വേറിട്ട് നിൽക്കുന്നുണ്ട് വേലൈക്കാരൻ.വില്ലന്റെ ചില ഗംഭീര നീക്കങ്ങൾ നായകന്റേതിനേക്കാളും ത്രില്ലടിപ്പിക്കുന്നുണ്ട്.സിനിമ ഇറങ്ങിയപ്പോഴുണ്ടായിരുന്ന പ്രതീക്ഷ കണ്ടവർ പറഞ്ഞ് കുറപ്പിച്ചതിനാൽ സിനിമ മൊത്തത്തിൽ നന്നായി ഇഷ്ടപ്പെട്ടു.കൂടെ നല്ല രീതിയിൽ ചിത്രീകരിച്ച ക്ളൈമാക്സ് കൂടിയാവുമ്പോൾ ഈ വർഷത്തെ നല്ല തമിഴ് സിനിമകളുടെ കൂട്ടത്തിൽ പെടുത്താവുന്ന ഒന്നാവുന്നു വേലൈക്കാരൻ.

🔻On Screen🔻

ശിവകാർത്തികേയന്റെ നല്ല പ്രകടനത്തിന് സാക്ഷിയാവാൻ എന്തായാലും തീയേറ്ററിൽ സാധിച്ചു.സമീപകാലചിത്രങ്ങളിൽ നിന്ന് അദ്ദേഹം മെച്ചപ്പെട്ടിട്ടുണ്ട്.നയൻതാര ഒന്നും ചെയ്യാനില്ലാത്തതിനാൽ ആ റോൾ അളക്കുന്നില്ല.

ഫഹദിന്റെ അരങ്ങേറ്റചിത്രം അനായാസേന അദ്ദേഹം തകർത്തു.ചില രംഗങ്ങളിലെ ഡയലോഗ് ഡെലിവറിയും മാനറിസങ്ങളും നന്നേ ബോധിച്ചു.കൂടെയുള്ളവരും നല്ല പ്രകടനം തന്നെ കാഴ്ചവെച്ചു.

🔻Music & Technical Sides🔻

അനിരുദ്ധ് സംഗീതസംവിധായകന്റെ വേഷം ഭംഗിയാക്കി.ചില സമയങ്ങളിൽ BGM നല്ല രീതിയിൽ ത്രില്ലടിപ്പിക്കുന്നുണ്ട്.

ചിത്രത്തിന്റെ വിഷ്വൽസും നന്നായിരുന്നു.പല കളർ ടോണുകൾ ഉപയോഗിച്ചതും വേറിട്ട് നിൽക്കുന്ന ഒന്നായി.

🔻Final Verdict🔻

തന്റെ മുൻ ചിത്രം പോലെ മുഴുനീള ത്രില്ലർ അല്ല സംവിധായകൻ കരുതി വെച്ചിരിക്കുന്നത്.സാമൂഹികപ്രസക്തിയിൽ കയ്യടി വാങ്ങുന്ന ചിത്രമാണ് വേലൈക്കാരൻ.നല്ലൊരു കണ്സെപ്റ്റും അതിന്റെ നല്ല രീതിയിലുള്ള അവതരണവും ചിത്രത്തെ മികച്ച അനുഭവമാക്കി മാറ്റുന്നു.പ്രസക്തിയർഹിക്കുന്ന,ചിന്തിപ്പിക്കുന്ന പ്രമേയവും ആശയങ്ങളും കൈമാറുന്ന ചിത്രം കണ്ടിരിക്കേണ്ട ഒന്നെന്നാണ് അഭിപ്രായം.കാരണം നമ്മളും ഭൂരിഭാഗം ആൾക്കാരും 8 മണിക്കൂർ തൊഴിലാളികളും 16 മണിക്കൂർ കണ്സ്യൂമറും ആണല്ലോ.കയ്യടിച്ച് തീയേറ്ററിൽ നിന്നിറങ്ങിയ അപൂർവം ചില തമിഴ് സിനിമകളിൽ ഒന്നാവുന്നു വേലൈക്കാരൻ.

My Rating :: ★★★½

🔺ഷാജിയെട്ടാ ഇവരെയങ്ങ്

🔻അരുത് അബൂ അരുത്.നമുക്കിവരെ ചിരിപ്പിച്ച് കൊല്ലാം.

🔺എന്തിനാ മാത്താ നീയെപ്പോഴും ഭാവിയെ കുറിച്ച് വേവലാതിപ്പെടുന്നത്?

🔻എന്റെ പാസ്റ്റും പ്രസന്റും എല്ലാം നശിച്ചു.ഇനി എന്റെ മുന്നിൽ ഫ്യുച്ചർ മാത്രേ ഉള്ളൂ.

🔻Story Line🔻

മരണമില്ലാത്ത സമുറായ് ആണ് മാഞ്ചി.തന്റെ മാതാപിതാക്കളെ ഇല്ലായ്മ ചെയ്തവരോട് പ്രതികാരം ചെയ്യാനായാണ് റിൻ എന്ന പെണ്കുട്ടി മാഞ്ചിയുടെ അടുത്തേക്ക് വരുന്നത്.തുടർന്ന് ഇരുവരുടെയും ജീവിതത്തിൽ സംഭവിക്കുന്ന കാര്യങ്ങളാണ് ചിത്രം കൈകാര്യം ചെയ്യുന്നത്.

🔻Behind Screen🔻

Blade of the Immortal എന്ന ജാപ്പനീസ് manga സീരീസിനെ അടിസ്ഥാനമാക്കി Takashi Mike ഒരുക്കിയ ചിത്രമാണ് അതേ പേരിൽ 2017ൽ പുറത്തിറങ്ങിയത്.Tetsuya Oishi തിരക്കഥയൊരുക്കിയ ചിത്രം Cannes Film Festivalൽ ആണ് ആദ്യം സ്ക്രീൻ ചെയ്തത്.

തന്റെ ജീവിതത്തിലെ ഏറ്റവും വലിയ ദൗത്യവുമായി ജീവിക്കുകയായിരുന്നു മാഞ്ചി.എന്നാൽ നിരാശയെന്നോണം അതിൽ അയാൾക്ക് വിജയം കൈവരിക്കാൻ ആയില്ല.എന്നാൽ ഏവരും ആഗ്രഹിക്കുന്ന Immortality മാഞ്ചിക്ക് ലഭിക്കുന്നു.അങ്ങനെ ജീവിതം മുന്നോട്ട് പോവുന്നതിനിടയിലാണ് റിൻ എന്ന പെണ്കുട്ടി മാഞ്ചിയെ തേടി എത്തുന്നത്.

തന്റെ മാതാപിതാക്കളെ ഇല്ലാതാക്കി തന്റെ സന്തോഷപൂർണ്ണമായ ജീവിതം ഇല്ലാതാക്കിയവരോട് പ്രതികാരം ചെയ്യുക.അതാണ് റിന്നിന്റെ ലക്ഷ്യം.അതിന് മാഞ്ചിയുടെ സഹായം തേടിയാണ് റിന്നിന്റെ വരവ്.തുടർന്ന് കഥ വികസിക്കുന്നു.

ആരെയും ആകർഷിക്കുന്ന തുടക്കമാണ് സിനിമയുടേത്.ഇനി വരാൻ പോവുന്നത് മുഴുനീള ആക്ഷൻ രംഗങ്ങളാണെന്ന സൂചനയും അതിൽ നൽകുന്നുണ്ട്.സൂചന നൽകും പോലെ രണ്ടര മണിക്കൂറിൽ ആക്ഷൻ രംഗങ്ങളുടെ പെരുമഴ തീർക്കുകയാണ് ചിത്രം.എന്നാൽ പോരായ്മ നിഴലിക്കുന്നതും അവിടെ തന്നെയാണ്.

ഒരു ആക്ഷൻ ചിത്രത്തിന് യാതൊരു വിധത്തിലും യോജിക്കുന്നതല്ല പതിഞ്ഞ താളത്തിൽ പോവുന്ന രംഗങ്ങൾ.ഇവിടെ അടുത്തടുത്ത ആക്ഷൻ സീക്വൻസുകൾക്കിടെ നല്ല രീതിയിൽ ഇഴച്ചിൽ അനുഭവപ്പെടുന്നുണ്ട്.അതിൽ പിടിച്ച് നിർത്തുന്നത് മാഞ്ചി-റിൻ കോമ്പിനേഷൻ സീനുകളാണ്.

നായക കഥാപാത്രം അതീവ ശക്തനായ ഒരുവനല്ല.Immortal എന്നത് കൊണ്ട് മാത്രം ജീവിച്ചിരിക്കുന്നെന്നെ ഉള്ളൂ.വില്ലന്മാരുടെ വെട്ടുകൾ വാങ്ങിക്കൂട്ടുന്നതിൽ ഒരു പഞ്ഞവുമില്ല.അതും സിനിമയുടെ ഒരു +ve വശമാണ്.ശക്തമായ ഒരു വില്ലൻ സന്നാഹവും അദ്ധേഹത്തിന് എതിരായി ഉള്ളത് ആവേശം നൽകുന്ന ഘടകം ആവുന്നു.അവരുടെ നേതാവായി സ്റ്റൈലിഷ് വില്ലനും.

ആക്ഷൻ രംഗങ്ങളിൽ ഏറ്റവും ഇഷ്ടപ്പെട്ടത് മാഞ്ചിയും മാഖിയും തമ്മിലുള്ളതാണ്.അപാര ആക്ഷൻ സീക്വൻസ് തന്നെയായിരുന്നു.അത്.എന്നാൽ അവസാനം വില്ലന് അത്ര നേരം നൽകി വന്ന ഹൈപ്പിനോട് നീതി പുലർത്താനായില്ല എന്ന തോന്നൽ സമ്മാനിച്ച് ചിത്രം അവസാനിച്ചു.

ആക്ഷൻ പ്രേമികൾക്ക് തീർച്ചയായും ഇഷ്ടപ്പെടുന്ന ചിത്രമാണ് blade of the immortal

🔻On Screen🔻

മാഞ്ചിയായി Takura Kimuraയും റിൻ ആയി Hana Sugisakiയും സ്ക്രീനിൽ നിറഞ്ഞ് നിന്നു.ഇരുവരുടെയും കെമിസ്ട്രി നന്നായിരുന്നു.വില്ലൻ വേഷത്തിൽ Fukushiയും തിളങ്ങി.

🔻Music & Technical Sides🔻

പശ്ചാത്തലസംഗീതം വളരെ കുറച്ച് സ്ഥലങ്ങളിലെ ഉപയോഗിച്ചിട്ടുള്ളു.ഛായാഗ്രഹണവും ആക്ഷൻ കൊറിയോഗ്രാഫിയും ചിത്രത്തിന്റെ അഭിവാജ്യ ഘടങ്കങ്ങളാവുന്നു.

🔻Final Verdict🔻

ആക്ഷൻ സിനിമാപ്രേമികളെ ആകർഷിക്കാനുള്ള എല്ലാ വകയും ചിത്രം പ്രദാനം ചെയ്യുന്നുണ്ട്.കഥയെന്ന് ചൂണ്ടിക്കാണിക്കുവാൻ കാര്യമായി ഒന്നും ഇല്ലെങ്കിലും രണ്ടരമണിക്കൂർ വലിച്ച് നീട്ടിയത് ഇടക്കിടെ വിരസത നിറക്കുന്നുണ്ട്.എന്നിരുന്നാലും അവയെല്ലാം ഗൗനിക്കാതിരുന്നാൽ ശരാശരിക്ക് മുകളിലുള്ള ഒരു അനുഭവം ചിത്രം സമ്മാനിക്കും

My Rating :: ★★★☆☆

🔺ഇവിടെ ആദ്യം വന്നപ്പോ എനിക്ക് നിങ്ങളെ പേടിയായിരുന്നു.എന്നാൽ ഇപ്പോൾ നിറയെ ബഹുമാനവും.തീർത്തും ധൈര്യവതിയായ ഒരു വനിതയാണ് നിങ്ങൾ.

🔻നാം എല്ലാവരും അങ്ങനെയാണ്.നീയും അങ്ങനെയാണ് ഹലീമാ.ഭാവിയിലും അങ്ങനെയാവണം.

🔻Story Line🔻

മിടുക്കനും സാഹസികനുമായ പത്രപവർത്തകനാണ് വാങ്.ഒരു വാർത്ത കിട്ടാൻ എന്ത് റിസ്ക്കും എടുക്കാൻ തയാറുള്ള ഒരുവൻ.ഒരിക്കൽ ഒരു വാർത്ത എസ്ക്ലൂസിവ് ആയി ഒപ്പിച്ചതിന് ശേഷം മടങ്ങുന്നതിന് ശേഷം അദ്ദേഹത്തിന്റെ കാർ ഒരപടകടത്തിൽ പെടുന്നു.ആ സെക്കന്റ്-ഹാന്റ് കാർ വർക്ക്ഷോപ്പിൽ എത്തിച്ചപ്പോഴാണ് ഒരു സത്യം അവൻ മനസ്സിലാക്കിയത്.അതിൽ ഉപയോഗിച്ചിരിക്കുന്ന പല ഭാഗങ്ങളും ആ കാറിന്റേതല്ല.മറിച്ച് അവന്റെ ജീവിതത്തിൽ മറക്കാൻ സാധിക്കാത്ത, 9 വർഷം മുമ്പ് നടന്ന ഒരു സംഭവവവുമായി ബന്ധപ്പെട്ട ഒന്നിന്റേതാണെന്ന്.തുടർന്ന് അതിന്റെ ചുരുളഴിക്കാൻ അവൻ ഇറങ്ങിപ്പുറപ്പെടുന്നു.

🔻Behind Screen🔻

Cheng Wein-Hao തിരക്കഥയെഴുതി സംവിധാനം ചെയ്ത ചിത്രമാണ് Who Killed Cock Robin.ചിത്രത്തിന്റെ പേരിൽ തന്നെ പ്രസിദ്ധിയാർജിച്ച ഒരു നാടോടി പാട്ടുണ്ട്.Cock Robin എന്ന പക്ഷിയുടെ മരണവും അതിനെ ആര് കൊന്നു എന്നതും തുടർ സംഭവങ്ങളും കോർത്തിണക്കിയ ഒരു പാട്ട്.മരണം എന്ന ഒറ്റ ആശയത്തിൽ നിന്നുകൊണ്ടാണ് ആ പാട്ട് മുഴുവൻ യാത്ര ചെയ്യുന്നത്.അതേ മാതൃക തന്നെയാണ് സിനിമയും പിന്തുടരുന്നത്.

കൗതുകം ഉണർത്തുന്ന കഥാന്തരീക്ഷമാണ് ചിത്രത്തിന്റേത്.മെല്ലെയുള്ള തുടക്കമാണെങ്കിലും മുന്നോട്ട് ചെല്ലുന്തോറും മുറുകുന്ന പ്ലോട്ടാണ് കാണികളെ പിടിച്ചിരുത്തുന്ന വസ്തു.ലളിതമെന്ന് നമുക്ക് തോന്നുമെങ്കിലും അവയെയെല്ലാം പാടെ മറിച്ചുകൊണ്ടുള്ള പല കാര്യങ്ങളും വരിവരിയായി അവതരിച്ചുകൊണ്ടിരിക്കും.

മുഴുവൻ നേരവും ഒരേ വേഗതയിലല്ല ചിത്രം സഞ്ചരിക്കുന്നത്.ആദ്യമൊക്കെ പതിഞ്ഞതാളമാണെങ്കിലും ഓരോ കഥാപാത്രമോ, അല്ലെങ്കിൽ വഴിത്തിരിവുകളോ അവതരിക്കുന്തോറും ഗിയർ ഇട്ട് വേഗത കൂടും.അതിനൊത്ത ആവിഷ്കാരം കൂടിയാവുമ്പോൾ മികച്ച രീതിയിൽ വാർത്തെടുത്ത ഒന്നായി മാറുന്നു ചിത്രം.പണ്ട് നടന്ന സംഭവത്തെ സത്യയും മിഥ്യയും മാറി മാറി കാണിച്ച് കൺഫ്യൂഷൻ ജനിപ്പിക്കാനുള്ള നീക്കങ്ങളൊക്കെ പലപ്പോഴും വളരെ മികച്ച രീതിയിൽ ഗുണം ചെയ്തിട്ടുണ്ട്.

ഒരു നായകനോ നായികയോ, അല്ലെങ്കിൽ പ്രതിനായകനോ എന്ന് ഒരുവനെ ചൂണ്ടിക്കാണിക്കുക സാധ്യമല്ല ചിത്രത്തിൽ.പ്രധാന കഥാപാത്രങ്ങളുടെ എല്ലാം രണ്ട് മുഖങ്ങൾ ചിത്രത്തിൽ വ്യക്തമായി ദർശിക്കാം.അതും കഥാപാത്രനിർമ്മിയതിയുടെ  മികവ് തന്നെയാണ്.കഥയിലെ ഒരു പ്ലസ് പോയിന്റും അത് തന്നെ.ഒടുവിൽ നടന്നതെന്തെന്ന് നമ്മെ കാണിക്കുന്ന രംഗത്തെ ഒരു കഥയുമായി കോർത്തിണക്കിയ വിധവും വളരെ നന്നായിരുന്നു.

നല്ലൊരു പ്ലോട്ടിന് മികച്ച തിരക്കഥ ഒരുക്കിയും അതിനേക്കാൾ മികച്ച ആവിഷ്കാരം രചിച്ചും പ്രേക്ഷകരെ ആദ്യാവസാനം പിടിച്ചിരുത്തുന്ന ത്രില്ലർ ആക്കി മാറ്റിയതിന്റെ ഫുൾ ക്രെഡിറ്റും സംവിധായകന് അവകാശപ്പെട്ടതാണ്.ഈ വർഷം ഇറങ്ങിയതിൽ തൃപ്തി നൽകിയ ചിത്രങ്ങളിൽ Cock Robinനും ഉൾപ്പെടുന്നു.

🔻On Screen🔻

സ്ക്രീനിലെത്തിയ എല്ലാവരും തന്നെ തങ്ങളുടെ കഥാപാത്രങ്ങളോട് നീതി പുലർത്തി.എല്ലാവരും മികച്ച പ്രകടനം തന്നെ കാഴ്ചവെച്ചു.വാങ്ങിന്റെ പ്രകടനം തന്നെയാണ് കൂടുതലും കാണാൻ സാധിക്കുക.

🔻Music & Technical Sides🔻

ത്രില്ലടിപ്പിക്കുന്നതിൽ ഒഴിവാക്കാനാവാത്ത പിന്തുണ നൽകിയവയാണ് ചിത്രത്തിന്റെ പശ്ചാത്തലസംഗീതവും ഛായാഗ്രഹണവും എഡിറ്റിങ്ങും.ചടുല വേഗതയിൽ സഞ്ചരിക്കുമ്പോഴുള്ള പശ്ചാത്തസംഗീതമൊക്കെ ഗംഭീരമാണ്.കൂടാതെ പലയിടങ്ങളിലും റിയലിസ്റ്റിക്ക് ഫീൽ തരാനായുള്ള Handheld ക്യാമറകളുടെ ഉപയോഗവും ബുദ്ധിപൂർവമുള്ള നീക്കമാണ്.കൂടാതെ അവസാന ഭാഗത്തടക്കമുള്ള എഡിറ്റിങ്ങും വളരെ മികച്ച് നിന്നു.

🔻Final Verdict🔻

ചിത്രത്തിന്റെ പേരിലുള്ള നഴ്സറി ഗാനത്തിന്റെ അതേ ശൈലി പിൻപറ്റിയുള്ള തിരക്കഥാരചനയും അതിനും ഒരുപടി മുകളിൽ നിൽക്കുന്ന ആവിഷ്കാരവും ടെക്നിക്കൽ സൈഡുകളുടെ സമർഥമായ ഉപയോഗവും ആദ്യാവസാനം ത്രില്ലടിപ്പിക്കുന്ന ഒരു വ്യത്യസ്ത അനുഭവം സമ്മാനിക്കുന്നു.ഒടുവിൽ സത്യങ്ങൾ ഓരോന്നായി മറനീക്കി കാണിക്കുമ്പോൾ ഞെട്ടിപ്പിക്കുന്ന പല ദൃശ്യങ്ങൾക്കും നാം സാക്ഷിയാവുന്നു.യാതൊരു തരത്തിലും നിരാശ സമ്മാനിക്കാത്ത ഒരു ചിത്രം ആവുന്നു Cock Robin

My Rating :: ★★★½

🔺താൻ ചെറുപ്പത്തിൽ ക്രിക്കറ്റ് കളിച്ചിട്ടുണ്ടോ?

🔻ഉണ്ട്

🔺ബൗളർ ആയിരുന്നോ അതോ ബാറ്റ്സ്മാൻ ആയിരുന്നോ?

🔻അമ്പയർ

If Cats Disappeared From The world, how would have the world changed..?

If I Disappeared From The world, who will be their crying for me.?

🔻Story Line🔻

ജീവിതത്തിന്റെ സിംഹഭാഗവും സന്തോഷത്തോടെ ജീവിച്ച് വാർധക്യത്തിലേക്ക് കടന്ന കിമ്മിന് അപ്രതീക്ഷിതമായാണ് ആ ഫോൺകോൾ എത്തിയത്.താൻ ചെറുപ്പത്തിൽ താമസിച്ചിരുന്ന വീടും സ്ഥലവും വങ്ങാനായി താല്പര്യം പ്രകടിപ്പിച്ച് ഒരാൾ എത്തിയിരിക്കുന്നു.എന്നാൽ കിമ്മിനെ അതിശയിപ്പിച്ചത് മറ്റൊരു കാര്യമായിരുന്നു.തുടർന്ന് കിമ്മിന്റെ പഴയ ഓർമകളിലേക്ക് ഒരു യാത്രയാണ്.

🔻Behind Screen🔻

ഫാന്റം ഡിറ്റക്ടീവിന്റെ സംവിധായകനായ Sung-Hee Jo കഥയെഴുതി സംവിധാനം ചെയ്ത ചിത്രമാണ് A Werewolf Boy.ഒരു ഫാന്റസി-റൊമാന്റിക്ക് സിനിമയാണ് അദ്ദേഹം മുന്നോട്ട് വെക്കുന്നത്.

ഒരു വ്യക്തിയെ മരണം വരെ വേട്ടയാടുന്നത് അയാളുടെ ഓർമകളാണ്.എത്ര തന്നെ മറക്കാൻ ശ്രമിച്ചാലും മനസ്സിന്റെ ഏതെങ്കിലുമൊരു തട്ടിൽ അവ എന്നും മായാതെ അവശേഷിക്കും.നാല്പത്തി ഏഴ് വർഷങ്ങൾക്ക് ശേഷം കിമ്മിന്റെ ജീവിതത്തിലും സംഭവിച്ചത് അത് തന്നെയാണ്.

തന്റെ ചെറുപ്പത്തിൽ പുതിയ വീട്ടിലേക്ക് താമസം മാറാൻ അവർക്ക് ഒരു കാരണമേ ഉണ്ടായിരുന്നുള്ളൂ.കിമ്മിന്റെ ആസ്ത്മയുടെ മൂർച്ഛിച്ച അവസ്ഥ.എന്നാൽ ആ കുടുംബത്തിന്റെ ജീവിതം തന്നെ മാറ്റിമറിക്കുന്ന ഒരു അതിഥി അവരെ കാത്തിരിപ്പുണ്ടായിരുന്നു ആ വീട്ടിൽ.വീടിനോട് ചേർന്ന ഷെഡിൽ ചെറിയ അനക്കം കേട്ട് അകത്തേക്ക് കയറിയ അവരെ കാത്തിരുന്നത് ഒരു വിചിത്രമായ കഥാപാത്രമായിരുന്നു.

പ്രത്യക്ഷത്തിൽ മനുഷ്യന്റെ രൂപമാണ് അവന്.എന്നാൽ  സ്വഭാവരീതികൾ വളരെ വിചിത്രവും.ആദ്യമൊക്കെ ഒരു അവഗണന കിമ്മിനുൽപ്പടെ തോന്നിയെങ്കിലും ഓരോ നിമിഷം കഴിയും തോറും അവർ തമ്മിലുള്ള അകലം ഗണ്യമായി കുറയുകയായിരുന്നു.പിന്നീട് അവർ എപ്പോഴും ഒരുമിച്ചാവാൻ ശ്രമിച്ചു.അവരുടെ വിധത്തിൽ ആശയങ്ങൾ കൈമാറി.മനുഷ്യരെ പോലെ ആവാൻ അവനെ പടിപ്പിക്കാൻ ശ്രമിച്ചു.അങ്ങനെ അത് അവളിൽ ഒരു സ്നേഹമായി മാറി.

ചിത്രം മുന്നോട്ട് പോവുന്തോറും മേലോഡ്രാമയാണെന്ന് തോന്നിപ്പിക്കുമെങ്കിലും അത് തന്നെയാണ് സിനിമയുടെ സൗന്ദര്യവും.വളരെ മനോഹാരമായിട്ടാണ് അവർ തമ്മിലുള്ള ബന്ധവും മാനസികമായ അടുപ്പവും പല ഘട്ടങ്ങളിലും കാണിച്ചിരിക്കുന്നത്.വളരെ പതിഞ്ഞ താളത്തിൽ മുന്നോട്ട് പോയി മനസ്സിൽ ഒരു പ്രത്യേകതരം അനുഭൂതി നിറക്കുന്ന ഒരു അവതരണമാണ് സംവിധായകൻ അവലംബിച്ചിരിക്കുന്നത്.പ്രണയത്തിന്റെ സൗന്ദര്യം അത്രകണ്ട് വർണിച്ചിട്ടുണ്ട് ആ രംഗങ്ങളിലൂടെ.

പ്രണയം മാത്രമല്ല, ഭാവിയിൽ ഉണ്ടായേക്കാവുന്ന ഒരു വൻ വിപത്തിനേയും അർഹിക്കുന്ന പ്രാധാന്യത്തോടെ തന്നെ സംവിധായകൻ എടുത്തുകാട്ടുന്നുണ്ട്.അത് എത്രത്തോളം ഭീകരമാണെന്ന് ചിത്രം കണ്ടുകഴിയുമ്പോൾ നമുക്ക് മനസ്സിലാവും.ആകെ മൊത്തത്തിൽ മെലോഡ്രാമ രൂപേ ണ മനോഹരമായ ഒരു പ്രണയകഥ സമ്മാനിച്ചിരിക്കുന്നു Sung-Hee.അതിമനോഹരമായ ക്ളൈമാക് കൂടിയാവുമ്പോൾ സുന്ദരമായ സിനിമ അനുഭവമാകുന്നു Werewolf Boy.

🔻On Screen🔻

അടുത്തകാലത്തൊന്നും മറക്കാത്ത രണ്ട് മുഖങ്ങളായി മാറി Bo-Yeong Park,Joong-Ki Sung എന്നിവരുടേത്.തന്റെ മുഖത്തെ നിഷ്കളങ്കതയും മനോഹാരിതയും കൊണ്ട് മനസ്സ് കീഴടക്കും Park.ഒരു ഡയലോഗ് പോലും പറയാതെ Joongഉം അരങ്ങ് വാണപ്പോൾ രണ്ട് പേരും തമ്മിലുള്ള കെമിസ്ട്രി ചിത്രത്തിന് ജീവൻ നൽകുന്ന ഘടകമായി.സിനിമ അവസാനിക്കുമ്പോഴും അവർ മാത്രമായിരിക്കും മനസ്സ് മുഴുവൻ.

🔻Music & Technical Sides🔻

കണ്ണുകൾക്ക് കുളിരേകുന്ന വിഷ്വൽസും ലളിതവും എന്നാൽ സുന്ദരവുമായ പശ്ചാത്തലസംഗീതവും സന്ദർഭങ്ങൾക്ക് തീവ്രത നൽകുന്ന ഒന്നായി.കേൾക്കാൻ ഇമ്പമുള്ള ഒരു ഗാനവും ഉണ്ട് കൂടെ.

🔻Final Verdict🔻

കൊറിയൻ സിനിമയുടെ Twilight എന്ന് പലരും വിശേഷിപ്പിച്ച് കണ്ടിട്ടുള്ള ചിത്രമാണ് ഇത്.എന്നാൽ അതിനോട് തോന്നിയിട്ടില്ലാത്ത ഒരു അടുപ്പം ഈ ചിത്രത്തോട് തോന്നുന്നുണ്ടെങ്കിൽ അത് സിനിമ കാഴ്ചവെക്കുന്ന മികവിന്റെ മിടുക്കാണ്.ലളിതവും എന്നാൽ തീവ്രതയേറിയതുമായ ഒരു പ്രണയകഥ നമ്മുടെ മുന്നിലേക്ക് അവതരിപ്പിക്കുകയാണ് സംവിധായകൻ.മനസ്സിൽ തട്ടുന്ന രംഗങ്ങളും കഥയും സിനിമ പ്രദാനം ചെയ്യുന്നുണ്ട്.റൊമാന്റിക്ക് സിനിമകളുടെ ശ്രേണിയിൽ ഞാൻ ഈ ചിത്രത്തിനും മുൻപന്തിയിലുള്ള ഒരു സ്ഥാനം കൊടുക്കും. 

My Rating :: ★★★★☆

''അന്യദേശത്തോ അന്യജാതിയിലോ ഉള്ള ആരെയെങ്കിലും ഇവിടുള്ളവർ കല്യാണം കഴിച്ചാൽ ഈ നാടിന്റെ സമാധാനം നഷ്ടപ്പെടും.കാളിയമ്മന്റെ ശാപം ഈ നാടിനെ വേട്ടയാടും.ഈ നാട് മുടിയും''


🔻Story Line🔻
ഒരു ഷാപ്പിൽ കള്ളെടുത്ത് കൊടുപ്പുകാരനായി ജോലി ചെയ്യുകയാണ് നൂഹ്കണ്ണ്.അവന്റെ ജീവിതത്തിലേക്ക് ഒരു പ്രത്യേക സാഹചര്യത്തിൽ ചെല്ലപ്പൻ എന്ന വ്യക്തി കടന്നുവരുന്നതോടെ അവന്റെ ജീവിതത്തിൽ പല മാറ്റങ്ങളും ഉണ്ടാകുന്നു.അതോടെ കഥ വികസിക്കുന്നു.

🔻Behind Screen🔻
മലയാളികൾക്ക് മറക്കാനാവാത്ത ഒരുപിടി കഥയും കഥാപാത്രങ്ങളും സമ്മാനിച്ച സംവിധായകനാണ് പത്മരാജൻ.മലയാള സിനിമ ഉള്ളിടത്തോളം കാലം ഒരു പാഠപുസ്തതകമായി നിലനിൽക്കും അദ്ധേഹത്തിന്റെ അനശ്വരമായ സൃഷ്ടികൾ.അദ്ധേഹത്തിന്റെ തൂലികയിൽ നിന്ന് പിറന്ന 'റാണിമാരുടെ കുടുംബം' എന്ന ചെറുകഥയെ ആസ്പദമാക്കി തയ്യാറാക്കിയ ചിത്രമാണ് കാറ്റ്.

പത്മരാജന്റെ മകനും തിരക്കഥാകൃത്തുമായ അനന്തപത്മനാഭൻ തിരക്കഥയൊരുക്കിയ ചിത്രമാണ് കാറ്റ്.പ്രമേയത്തിലുള്ള വ്യത്യസ്തതകൾ കൊണ്ട് തന്റെ ഓരോ ചിത്രത്തിലൂടെയും പ്രേക്ഷകശ്രദ്ധ പിടിച്ചുപറ്റിയ അരുൺ കുമാർ അരവിന്ദാണ് ചിത്രം സംവിധാനം ചെയ്തിരിക്കുന്നത്.മുൻ ചിത്രങ്ങളിൽ നിന്ന് വ്യത്യസ്തമായി കഥ പറയുന്ന കാലഘട്ടത്തിൽ പിന്നിലേക്ക് സഞ്ചരിക്കുകയാണ് സംവിധായകൻ.1970കളിലാണ് കഥ നടക്കുന്നത്.അതും പൂർണ്ണമായും ഗ്രാമാന്തരീക്ഷത്തിൽ.

ഒരു മദ്യശാലയിൽ ജോലി ചെയ്യുകയാണ് നൂഹ്കണ്ണ്.പ്രായത്തിന്റേതായ ബുദ്ധി വികാസമില്ലാത്ത, പ്രതികരണ ശേഷി പൊതാവായ പ്രകൃതക്കാരൻ.ഷാപ്പുടമയിൽ നിന്ന് നിരന്തരം ഉപദ്രവമേൽക്കുന്ന നൂഹിന്റെ ജീവിതത്തിലേക്ക് ചെല്ലപ്പൻ കടന്നുവരുന്നത് അവിചാരിതമായാണ്.അവരുടെ ബന്ധത്തിൽ നിന്നാണ് കഥ വികസിക്കുന്നത്.

തമിഴ്നാടിനോട് ചേർന്ന് കിടക്കുന്ന സേത്തുകാല എന്ന ഗ്രാമത്തിൽ നിന്നുമാണ് ചിത്രത്തിന്റെ തുടക്കം.അവിടുത്തെ അന്തേവാസികളെല്ലാം കാളിയമ്മയുടെ കടുത്ത ആരാധകരാണ്.അവരുടെ വിശ്വാസങ്ങളും ആചാരങ്ങളുമൊക്കെയായി തുടങ്ങുന്ന ആഖ്യാനം പ്രേക്ഷകരെ പിടിച്ചിരുത്തുന്നുണ്ട്.പിന്നീടാണ് കഥ കേരളത്തിലേക്ക് പറിച്ച് നടുന്നത്.

തന്റെ എല്ലാ സിനിമകളിലെയും പോലെ കഥാപാത്രങ്ങളുടെ സ്വഭാവം വളരെ വ്യക്തമായി മനസ്സിലാക്കി തരുന്നുണ്ട് സംവിധായകൻ.ആദ്യ പകുതിയുടെ സിംഹഭാഗവും അതിനായി തന്നെയാണ് ഉപയോഗിച്ചിരിക്കുന്നത്.ഓരോ കഥാപാത്രങ്ങളിലും അന്തർലീനമായിരിക്കുന്ന സ്വഭാവസവിശേഷതകളും അവരുടെ ജീവിത പശ്ചാത്തലവുമൊക്കെ സമയമെടുത്ത് തന്നെ വരച്ച് കാട്ടുന്നുണ്ട് ചിത്രത്തിൽ.പ്രണയത്തിനും പ്രതികാരത്തിനും തുല്യപ്രാധാന്യം നൽകിയിരിക്കുന്ന ചിത്രത്തിൽ സാഹചര്യങ്ങൾക്കനുസരിച്ച് മനുഷ്യമനസ്സിൽ ഉടലെടുക്കുന്ന ചിന്തകൾ പലവുരു കാണാൻ സാധിക്കും.അവയുടെ വന്യതയും വശ്യതയും വളരെ റിയലിസ്റ്റിക്കായി ചിത്രീകരിക്കുവാനുള്ള ശ്രമം സിനിമയിലുടനീളം കാണാൻ സാധിക്കും.

റിയലിസ്റ്റിക്ക് എന്ന തലത്തിൽ പൂർണ്ണമായും നിലയുറപ്പിക്കാതെ കൊമേഴ്ഷ്യൽ ചേരുവകളും ചിത്രത്തിൽ സമന്വയിപ്പിച്ചിട്ടുണ്ട്.രണ്ടേമുക്കാൽ മണിക്കൂർ ദൈർഖ്യമുണ്ടെങ്കിലും വലിയതോതിൽ ബോറടിപ്പിക്കുന്നില്ല ചിത്രം.എന്നാലുംകഥാപാത്ര വികസനത്തിനായി ഇത്രയും സമയം വേണമായിരുന്നെന്ന് തോന്നിയില്ല.മാത്രമല്ല ചെല്ലപ്പന്റെ സ്വഭാവം കാട്ടുന്നതിന് മാത്രം സൃഷ്ടിക്കപ്പെട്ട കഥാപാത്രങ്ങളും സന്ദർഭങ്ങളും ചിത്രത്തിലുണ്ട്.ലൈംഗികചുവയുള്ള സീനുകളുടെ അളവ് കഥപറച്ചിലിനെ സംബന്ധിച്ചിടത്തോളം കൂടുതൽ തന്നെയാണ്.ഇങ്ങനെയുള്ള ചില പോരായ്മകൾ ഉണ്ടെങ്കിലും ആ കാലഘട്ടത്തെ മുൻനിർത്തി ഇത്തരത്തിലൊരു കഥയൊരുക്കിയതിൽ തിരക്കഥാകൃത്തും സംവിധായകനും ഏറെക്കുറെ വിജയിച്ചിട്ടുണ്ട്.

പലപ്പോഴും പ്രേക്ഷകരെ ആകാംശയിൽ നിർത്തുന്ന കഥാസന്ദർഭങ്ങളും കാറ്റിൽ ഉണ്ട്.കഥാപാത്രങ്ങളുടെ സഞ്ചാരങ്ങൾ ആശയക്കുഴപ്പം സൃഷ്ടിച്ച് ചിന്തിപ്പിക്കുന്നുമുണ്ട്.മനസ്സിൽ തങ്ങി നിൽക്കുന്ന കഥാപാത്രങ്ങളാണ് കാറ്റിലേത്.തീയേറ്റർ വിട്ട് ഇറങ്ങുമ്പോഴും മനസ്സിൽ അവശേഷിക്കുന്നുണ്ട് പല കഥാപാത്രങ്ങളും.ഊഹിച്ചെടുക്കാവുന്ന കുറച്ച് രംഗങ്ങൾ ഉണ്ടെങ്കിലും ക്ലൈമാക്സ് നന്നേ ബോധിച്ചു.ഒരു നീറ്റൽ മനസ്സിൽ അവശേഷിപ്പിച്ചുകൊണ്ട് ചിത്രം നിർത്തുമ്പോഴും ഒരു സംതൃപ്തി നമ്മിൽ തരുന്നുണ്ട് ഈ 'കാറ്റ്'.ശക്തമായ തിരക്കഥയും സംവിധായകന്റെ കയ്യൊപ്പ് പതിഞ്ഞ ആവിഷ്കാരവും കാറ്റിനെ മികച്ച ചിത്രമാക്കി മാറ്റുന്നു.

🔻On Screen🔻
ആസിഫലിയുടെ കരിയർ ബെസ്റ്റ് എന്ന് തന്നെ വിശേഷിപ്പിക്കാവുന്ന കഥാപാത്രമാണ് നൂഹ്കണ്ണ്.വളരെ മികച്ച രീതിയിൽ ആ കഥാപാത്രത്തെ ഗംഭീരമാക്കി തന്നിലെ നടന്റെ ഗ്രാഫ് ഉയർത്തിയിട്ടുണ്ട് ഈ യുവതാരം.ചെല്ലപ്പൻ മുരളിഗോപിയുടെ കയ്യിൽ ഭദ്രമായിരുന്നു.വളരെ മികച്ച പ്രകടനം.

ഉണ്ണി പി ദേവിന്റെ പോളി എന്ന കഥാപാത്രവും ചിത്രത്തിൽ അത്യാവശ്യം പ്രാധാന്യമുള്ള ഒന്നാണ്. വരലക്ഷ്മിയും മാനസയും ചെറിയ റോളുകളിൽ സ്ക്രീനിലെത്തി.

🔻Music & Technical Sides🔻
എടുത്ത് പറഞ്ഞ് അഭിനന്ദിക്കേണ്ട ഒരു ഘടകമാണ് ചിത്രത്തിന്റെ സംഗീതം.ഗംഭീരം എന്ന് തന്നെ പറയേണ്ടി വരും ചിത്രത്തിന്റെ പശ്ചാത്തലസംഗീതം.പ്രത്യേകിച്ച് ഫ്ലാഷ്ബാക്ക് രംഗങ്ങളിലേത്.മനോഹരമായ രണ്ട് പാട്ടുകളും ഒരുക്കി ദീപക് ദേവ് തന്റെ മികവ് വീണ്ടും തെളിയിച്ചു.

പ്രശാന്ത് രവീന്ദ്രന്റെ ക്യാമറക്കണ്ണുകളും സംവിധായകന്റെ തന്നെ എഡിറ്റിംഗും ചിത്രത്തിന്റെ  വർദ്ധിപ്പിച്ചിട്ടുണ്ട്.പഴമയിലേക്ക് കൂട്ടിക്കൊണ്ടുപോവാൻ പശ്ചാത്തലസംഗീതവും ഛായാഗ്രഹണവും കളർഗ്രേഡിങ്ങുമെല്ലാം പിന്തുണ നൽകുന്നുണ്ട്.

🔻Final Verdict🔻
പ്രേക്ഷകന് വേറിട്ട ഒരു ആസ്വാദനം പ്രദാനം ചെയ്യുന്ന സിനിമയാണ് കാറ്റ്.മികച്ച തിരക്കഥയും മികവുറ്റ ആവിഷ്കാരവും സ്ക്രീനിൽ എത്തിയവരുടെ ഗംഭീര പ്രകടനവും സാങ്കേതിക വശങ്ങളുടെ പൂർണ്ണ പിന്തുണയും കാറ്റിനെ മേന്മയുള്ള ഒരു സൃഷ്ടിയാക്കുന്നു.പോരായ്മമകൾ തോന്നുന്നുെണ്ടെങ്കിലും അവയൊക്കെയും അവഗണിച്ച് കളയാവുന്ന, ഈ വർഷത്തെ നല്ല ചിത്രങ്ങളിൽ ഇടം പിടിക്കുന്ന സൃഷ്ടിയാണ് കാറ്റ്.

My Rating :: ★★★½

🔻Story Line🔻

രണ്ടാം ലോക മഹായുദ്ധ സമയം..അല്ലെങ്കിൽ വേണ്ട..കഥ പറഞ്ഞ് രസം കളയുന്നില്ല..

Its The Curious Case Of കള്ളൻ പവിത്രൻ..!!

🔻Behind Screen🔻

ധനുഷിന്റെ ബാനറായ വണ്ടർബാർ ഫിലിംസ് മലയാളത്തിൽ നിർമ്മിക്കുന്ന ആദ്യ ചിത്രം.ഇതാണ് തരംഗത്തിന് ഏറ്റവും പ്രതീക്ഷ നൽകിയ ഘടകം.നവാഗതനായ ഡൊമിനിക് അരുൺ ആദ്യമായി തിരക്കഥയെഴുതി സംവിധാനം ചെയ്ത ചിത്രമാണ് തരംഗം.

ടൈറ്റിൽ കാർഡ് മുതൽ തന്നെ കൗതുകമുണ്ടാക്കുന്ന തരത്തിലാണ് സിനിമയുടെ തുടക്കം.ടൈറ്റിൽ എഴുതിക്കാണിക്കുന്നതിന് മുമ്പുള്ള സീൻ തന്നെ സിനിമയെപ്പറ്റിയും ജേണറിനെപ്പറ്റിയും ഒരു ഐഡിയ നൽകാൻ പോന്നതായിരുന്നു.അത് നന്നായി ആസ്വദിക്കുകയും ചെയ്തു.പിന്നീടങ്ങോട്ടും പ്രതീക്ഷ തീരെ തെറ്റിയില്ല.

ഓരോ കഥാപാത്രങ്ങളെപ്പറ്റിയും വ്യക്തമായ ഒരു ഐഡിയ സിനിമ കഴിയുമ്പോൾ പ്രേക്ഷകരിൽ ഉണ്ടാവും.അത്ര നല്ല രീതിയിൽ പല ഘട്ടങ്ങളിലൂടെ അവരുടെ സ്വഭാവം നമ്മെ കാട്ടിത്തരുന്നുണ്ട്.കഥയെപ്പറ്റി പറയാൻ കാര്യമായി ഒന്നും ഇല്ലെങ്കിലും  അവതരണത്തിന്റെ കാര്യം അങ്ങനല്ല.ഇതുവരെ കണ്ട് പരിചിതമല്ലാത്ത ഒരു ഫ്രഷ്നസ്സും വ്യത്യസ്തതയും പ്രേക്ഷകർക്ക് കാഴ്ച്ചവെക്കുന്നുണ്ട് ചിത്രം.

ഓരോ നിമിഷവും എന്ത് സംഭവിക്കും എന്ന് ആകാംശ തോന്നിപ്പിക്കും വിധം സിനിമ നമ്മെ കയ്യിലെടുക്കുന്നുണ്ട് കുറച്ച് മുന്നോട്ട് പോവുമ്പോൾ.എന്നാൽ എന്താണ് നടക്കാൻ പോവുന്നതെന്ന് ഒരു ക്ലൂവും തരുന്നുമില്ല.അത്തരത്തിൽ ഒരു പിടിയും തരാതെ പ്രതീക്ഷിക്കാത്ത സമയത്ത് ഓരോ വഴിത്തിരിവുകൾ സമ്മാനിച്ച് ആവേശം നിറച്ച്, സിറ്റുവേഷണൽ കോമഡികൾ കൊണ്ട് സമ്പന്നമായ രസകരമായ ആഖ്യാനമാണ് തരംഗത്തിന്റേത്.എന്നാൽ അവസാനം വരെ ലഭിച്ച സംതൃപ്തി ക്ലൈമാക്സിൽ പൂർണ്ണമായി ലഭിച്ചില്ല എന്നൊരു ചെറിയ നിരാശ മാത്രം ബാക്കിയുണ്ട്. 

എന്നിരുന്നാലും കണ്ടുപഴകിയ ആഖ്യാനശൈലികൾക്ക് അപവാദമാണ് ഡൊമിനിക്  അരുണിന്റെ തരംഗത്തിലേത്.അത് നല്ല രീതിയിൽ ആസ്വദിക്കുകയും ചെയ്തു.ഇത്തരത്തിൽ ഒരു പരീക്ഷണ ചിത്രം ചെയ്യാൻ കാണിച്ച ധൈര്യത്തിന് കയ്യടികൾ.!

🔻On Screen🔻

അടിപൊളി കാസ്റ്റിംഗ് ആണ് ചിത്രത്തിന്റേത്. ടൊവീനൊയും ബാലു വർഗീസും സൈജു കുറുപ്പും തുടങ്ങി ഒറ്റ സീനിൽ വന്നവർ വരെ മത്സരിച്ച് അഭിനയിച്ച് തകർത്തിട്ടുണ്ട്.

നേഹ അയ്യരും ശാന്തി ബാലചന്ദ്രനുമുൾപ്പെട്ട പെൺപടയും തങ്ങളുടെ റോളുകൾ ഗംഭീരമാക്കി.ദിലീഷ് പോത്തന്റെ റോൾ കിടിലൻ ഐറ്റം തന്നെ.

🔻Music & Technical Sides🔻

സന്ദർഭത്തോട് ചേർന്ന് നിൽക്കുന്ന പശ്ചാത്തലസംഗീതം ഒരുക്കുന്നതിൽ അശ്വിൻ രഞ്ചു വിജയിച്ചിട്ടുണ്ട്.വളരെ രസകരമായിരുന്നു അത്.ഒരു ഗാനം മാത്രമേ ചിത്രത്തിൽ ഉണ്ടായിരുന്നുള്ളൂ.

ദീപക്കിന്റെ ഛായാഗ്രഹണവും ശ്രീനാഥിന്റെ എഡിറ്റിംഗും സിനിമയുടെ മൂഡിനോട് ചേർന്ന രീതിയിൽ തന്നെ ഭംഗിയായി.

🔻Final Verdict🔻

കഥയിലല്ല കഥപറച്ചിലിലെ പുതുമയാണ് തരംഗം പ്രദാനം ചെയ്യുന്നത്.ജേണർ ഏതാണെന്ന് ഒരു ഐഡിയ ആദ്യമേ മനസ്സിലാക്കിയാൽ പിന്നീടങ്ങോട്ട് അതീവ രസകരമാവും എന്ന കാര്യത്തിൽ സംശയമില്ല.ഈ തരംഗം ഇന്നൊരു തരംഗമായാൽ മാറ്റത്തിന്റെ പുതിയൊരു പാത വെട്ടിയിടാനും നവതരംഗം ആഞ്ഞടിക്കാനുമുള്ള പ്രചോദനം ആവുമെന്ന കാര്യത്തിൽ യാതൊരു സംശയവുമില്ല.അത് അങ്ങനെതന്നെയാവട്ടെ എന്ന് ആത്മാർഥമായി പ്രാർഥിക്കുന്നു.

My Rating :: ★★★½

🔺പ്രതി ഞാനാവണമെന്ന് ഒരു തീരുമാനം ഉള്ളത് പോലെ

🔻തെളിവുകൾ തീരുമാനിക്കും പ്രതി ആരാവണമെന്ന്

🔻Story Line🔻

നാല് വർഷം മുൻപ് മരണപ്പെട്ടതാണ് സുജാതയുടെ ഭർത്താവ്.അന്നുമുതൽ സുജാതക്ക് മകൾ ആതിര മാത്രമാണ് കൂട്ട്.വീട്ടുജോലിയെടുത്തും ചെറിയ ജോലികൾ ചെയ്തും കുടുംബം നോക്കിയിരുന്ന സുജാതക്ക് ഒറ്റ സ്വപ്നമേ ഉണ്ടായിരുന്നുള്ളൂ.തന്റെ മകളുടെ ഭാവി.

മകളും തന്നെപ്പോലെ ഒരു വേലക്കാരി ആവരുതെന്ന് സുജാത അതിയായി ആഗ്രഹിച്ചു.എപ്പോഴും അതിനെപ്പറ്റിയായിരുന്നു സുജാതയുടെ വേവലാതി.എന്നാൽ മകൾ പഠനത്തിൽ ശരാശരി നിലവാരം മാത്രമാണ് പുലർത്തുന്നതെന്നറിഞ്ഞ സുജാത അത് തരണം ചെയ്യാൻ എന്ത് ചെയ്യുന്നു എന്നാണ് സിനിമ കൈകാര്യം ചെയ്യുന്നത്.

🔻Behind Screen🔻

സിനിമയുടെ ടൈറ്റിലിൽ നിതീഷ് തിവാരിയുടെ കഥ എന്നാണ് കാണിക്കുന്നത്.അദ്ദേഹത്തിന്റെ കഥയിൽ 2016ൽ ബോളിവുഡിൽ റിലീസ് ആയ ചിത്രമാണ് "Nil Battey Sannata".പിന്നീട് അത് 'അമ്മ കണക്ക്' എന്ന പേരിൽ തമിഴിലേക്ക് റീമേക്ക് ചെയ്തു.അതിന്റെ മലയാളം പതിപ്പാണ് "ഉദാഹരണം സുജാത".

ഒരു ചേരിനിവാസിയായ സുജാത ദിവസേന വീട്ടുവേലകളും മറ്റു ചെറുജോലികളും ചെയ്താണ് വീട്ടുചിലവുകൾ നടത്തിയിരുന്നത്.ആകെ കൂട്ടിനുണ്ടായിരുന്ന മകളെ ജീവനുതുല്യം സ്നേഹിച്ചിരുന്ന സുജാതക്ക് മകൾ തന്നെപോലെ ഒരു വേലക്കാരി ആവരുതെന്ന അതിയായ ആഗ്രഹം ഉണ്ടായിരുന്നു.അതിനുള്ള ഒരേയൊരു പോംവഴി വിദ്യാഭാസമാണെന്ന ഉത്തമബോധ്യവും സുജാതയിൽ ഉണ്ട്.അതിനായി മകൾക്ക് ആവുന്നത്ര വിദ്യാഭ്യാസം നൽകാനുള്ള ശ്രമത്തിലാണ് സുജാത.എന്നാൽ മകൾ സുജാതയുടെ ആഗ്രഹങ്ങൾക്ക് പലപ്പോഴും എതിരാണ് നിൽക്കുന്നത്.ഇത് സുജാതയുടെ സ്വപ്നങ്ങ്ൾക്ക് ഒരു വിലങ്ങുതടി ആവുന്നു.

അനുരാഗകരിക്കിൻവെള്ളത്തിന് ശേഷം നവീൻ ഭാസ്കർ തിരക്കഥ രചിച്ച ചിത്രം കൂടിയാണ് സുജാത.സഹായിയായി മാർട്ടിൻ പ്രക്കാട്ടും ഉണ്ട്.ചിത്രത്തിന്റെ കഥ ഏതാണ്ട് ഊഹിക്കാവുന്നതാണെങ്കിലും പ്രേക്ഷകനുമായി റിലേറ്റ് ചെയ്യാൻ സാധിക്കുന്ന ഒരുപാട് മുഹൂർത്തങ്ങൾ ഉണ്ടെന്നതാണ് ചിത്രത്തിന് ജീവൻ നൽകുന്നത്.ഒരു അമ്മയുടെയും മകളുടെയും ബന്ധം മനോഹരമായി ആവിഷ്കരിച്ചിട്ടുണ്ട് ചിത്രത്തിൽ.കൂടെ രണ്ട് തലമുറകളുടെ സ്വപ്നങ്ങൾ തമ്മിലുള്ള തമ്മിലുള്ള അന്തരവും.സ്വന്തം വീട്ടിലെ കാര്യം തന്നെ ആലോചിച്ചാൽ മതി നമുക്ക് കാര്യം മനസ്സിലാവാൻ.നമ്മുടെ മാതാപിതാക്കളുടെ ഏറ്റവും വലിയ സ്വപ്നമെന്നത് നമ്മുടെ വിജയമാണ്.അവർ ചെറുപ്പത്തിൽ അനുഭവിച്ച ദുരിതങ്ങളും കഷ്ടപ്പാടുകളും നമുക്ക് ഉണ്ടാവരുതെന്ന ഇച്ഛയാണ് അവരെ ജീവിക്കാൻ പ്രേരിപ്പിക്കുന്ന ഘടകം.അതാണ് ഇന്നത്തെ സമൂഹം മറന്നുപോവുന്നതും.അത് ഏറ്റവും ഭംഗിയായ രീതിയിൽ തന്നെ കാണിച്ച് തന്നിരിക്കുകയാണ് സംവിധായകനും കൂട്ടരും.ആദ്യ ചിത്രത്തിനായി ഇത്തരത്തിൽ ഒരു പ്രമേയം തെരഞ്ഞെടുത്തതിന് അഭിനന്ദനങ്ങൾ.

കണ്ണ് നനയിക്കുകയും ചിന്തിപ്പിക്കുകയും ചെയ്യുന്ന മുഹൂർത്തങ്ങളാലും ഡയലോഗുകളാലും സമ്പന്നമാണ് ചിത്രം.കോച്ചിങ് സെന്ററിൽ സുജാത ചോദിക്കുന്ന ചോദ്യം എന്റേതുൽപ്പടെ പല വീടുകളിലും ചോദിച്ച് കേട്ടിട്ടുള്ള ഒന്നാണ്.അങ്ങനെ പല മികച്ച സന്ദർഭങ്ങളും കോർത്തിണക്കിയിട്ടുണ്ട്.ഇടക്കിടെ നുറുങ്ങ് നർമങ്ങളും നല്ല രംഗങ്ങളും സമ്മാനിച്ച് മുന്നോട്ട് പോവുന്ന ചിത്രം ഒരു വേളയിൽ ക്ലീഷേയിലേക്ക് നിലംപതിക്കുമെന്ന തോന്നൽ ഉണ്ടാക്കിയെങ്കിലും അവിടെ നിന്നും ഉയിർത്തെഴുന്നേറ്റ് നല്ലൊരു എന്റിംഗും നൽകി പ്രേക്ഷകരുടെ മനസ്സ് നിറക്കുന്നു.

സ്വപ്നം കാണാൻ മറക്കുന്ന തലമുറയെ സ്വപ്നം കണ്ട് മുന്നേറുവാൻ പ്രേരിപ്പിക്കുകയാണ് ചിത്രം.വെറും ഫീൽ ഗുഡ് എന്ന പേരിൽ ഒതുങ്ങാതെ, സാരോപദേശങ്ങളിൽ മുങ്ങിപ്പോവാതെ, മേന്മയോടെ മെനഞ്ഞെടുത്ത ഒരു ചിത്രമാണ് 'ഉദാഹരണം സുജാത'.

🔻On Screen🔻

തിരിച്ചുവരവിൽ മഞ്ചു വാര്യർ ചെയ്ത ഏറ്റവും മികച്ച വേഷമാണ് സുജാതയുടേത്.ഇതിനു മുമ്പുള്ള വേഷങ്ങളിലെല്ലാം പലപ്പോഴും നാടകീയത പ്രകടമായിരുന്നപ്പോൾ ഇതിൽ സുജാതയായി ജീവിക്കുകയായിരുന്നു മഞ്ചു.ഗംഭീര പ്രകടനം.ഇമോഷണൽ സീക്വൻസുകളിലും മറ്റുമുള്ള പ്രകടനങ്ങൾ എടുത്തുപറയേണ്ടതാണ്.സംസാരശൈലിയും വോയിസ് മോഡുലേഷനുമൊക്കെ മഞ്ചുവിലെ മികച്ച അഭിനേത്രിയെ കാട്ടിത്തരുന്നു.

മകളായി അഭിനയിച്ച അനശ്വരയുടെ പ്രകടനവും നന്നായിരുന്നു.മഞ്ചുവുമായുള്ള കോമ്പിനേഷൻ സീനുകളും കാണാൻ മനോഹരമായിരുന്നു.നെടുമുടി വേണുവിന്റെ റോൾ സാരോപദേശത്തിന്റേതാവുമെന്ന് വിചാരിച്ചെങ്കിലും പൂർണ്ണമായി അങ്ങനെ ആകാതിരുന്നത് നന്നായി.ജോജോയും തന്റെ വേഷത്തിലൂടെ ചിരി പടർത്തി.കൂടെ സ്കൂളിലെ മറ്റു കുട്ടികളും.

🔻Music & Technical Sides🔻

ഗോപി സുന്ദറിന്റെ ഈയടുത്തിറങ്ങിയതിൽ ഏറ്റവും മികച്ച വർക്കുകളിൽ ഒന്നാണ് സുജാതയിലേത്.സന്ദർഭങ്ങളിലെ വൈകാരികത പ്രേക്ഷകരിലേക്ക് എത്തിക്കാൻ പശ്ചാത്തലസംഗീതം വഹിച്ച പങ്ക് ചെറുതല്ല.പാട്ടുകൾ സന്ദർഭോചിതമായി കഥ പറയാൻ ഉപയോഗിച്ച ശൈലി നന്നേ ബോധിച്ചു.ഗാനങ്ങളും നന്നായിരുന്നു.

മധു നീലകണ്ടന്റെ ക്യാമറയും മഹേഷ് നാരായണന്റെ എഡിറ്റിംഗും ചിത്രത്തിന്റെ മൂഡിനോട് യോജിച്ച വിധത്തിലായിരുന്നു.

🔻Final Verdict🔻

യുവതലമുറക്ക് മികച്ചൊരു സന്ദേശം പകരാൻ ശ്രമിക്കുന്ന ചിത്രം.അതിൽ മികച്ച വിജയം കണ്ടിട്ടുമുണ്ട്.മാതാപിതാക്കളും മക്കളും ഒരുമിച്ച് തീയേറ്ററിൽ കാണുക ചിത്രം.കണ്ടുകഴിയുമ്പോൾ മനസ്സിൽ എന്തെങ്കിലുമൊരു മാറ്റം ഉണ്ടാവും എന്നുറപ്പ്.കാരണം ഈ ചിത്രം നമ്മുടെ കണ്ണും മനസ്സും ഒരുപോലെ നിറക്കും.നിറകണ്ണുകളോടെയല്ലാതെ എനിക്ക് ഈ ചിത്രം കണ്ടിറങ്ങാൻ സാധിച്ചില്ല.ഈ വർഷത്തെ ഇഷ്ടചിത്രങ്ങളിൽ സുജാതയും സ്ഥാനം നേടി.

My Rating :: ★★★★☆

🔻Story Line🔻

ഇന്റലിജൻസ് ബ്യുറോയിലെ ഫോൺ ടാപ്പിങ്ങ് ഡിപ്പാർട്ട്മെന്റിൽ വർക്ക് ചെയ്യുകയാണ് ശിവ.ഒരു ക്രൈം നടക്കുന്നതിന് മുന്നേ അത് തടഞ്ഞ് ക്രൈം റേറ്റ് പരമാവധി കുറക്കുയാണ് ശിവയുടെ ലക്ഷ്യം.സ്വന്തമായി ഓരോ സോഫ്റ്റ്വയറും പുള്ളിക്കാരൻ ഡെവലപ്പ് ചെയ്തിട്ടുണ്ട്.

അങ്ങനെ ജോലിയിൽ ആത്മസംതൃപ്തി നേടി മുന്നോട്ട് പോവുമ്പോഴാണ് അവിചാരിതമായി ഒരു കോൾ അദ്ദേഹത്തിന്റെ ശ്രദ്ധയിൽ പെടുന്നത്.അതിനെ തുടർന്ന് ഉണ്ടാവുന്ന സംഭവങ്ങളും  അന്വേഷണങ്ങളുമാണ് തുടർന്നുള്ള ചിത്രത്തിന്റെ പോക്കിൽ കൈകാര്യം ചെയ്യുന്നത്.

🔻Behind Screen🔻

തമിഴ് സിനിമാ സ്നേഹികൾക്ക് ഒരുപിടി നല്ല ചിത്രങ്ങൾ സമ്മാനിച്ച സംവിധായകനാണ് A.R. മുരുഗദോസ്.അദ്ദേഹത്തിന്റെ ഏറ്റവും പുതിയ ചിത്രമാണ് സ്പൈഡർ.മഹേഷ് ബാബുവുമായി ആദ്യമായി കൈകോർത്ത ചിത്രമെന്ന പ്രത്യേകതയും സ്പൈഡറിനുണ്ട്.മുരുഗദോസ് തന്നെയാണ് ചിത്രത്തിന്റെ തിരക്കഥയും ഒരുക്കിയിരിക്കുന്നത്.

ടെക്നോളജിക്ക് പ്രാധാന്യം നൽകിയുള്ള ടീസറും ട്രെയിലറും ആരാധകരിൽ ആവോളം പ്രതീക്ഷ നിറക്കുന്നതായിരുന്നു.എല്ലാ കാര്യത്തിലും അഗ്രകണ്യനായ ശിവ സമൂഹത്തിൽ കുറ്റകൃത്യങ്ങൾ കുറക്കണമെന്ന ആഗ്രഹവുമായി നടക്കുന്ന നായകനാണ്.അതുകൊണ്ട് തന്നെയാണ് ഉയർന്ന ജോലികൾ പലതും ഉപേക്ഷിച്ച് ഫോൺ ടാപ്പിങ്ങ് ജോലി തെരഞ്ഞെടുത്തത്.അതുവഴി കുറ്റകൃത്യങ്ങൾ നടക്കുന്നതിന് മുന്നേ പ്രതിരോധിക്കുകയാണ് പുള്ളിയുടെ ലക്ഷ്യം.

എന്നാൽ  ഇടക്ക് അദ്ദേഹത്തിന്റെ ശ്രദ്ധയിൽ പെടുന്ന ഒരു ഫോൺ കോളും തുടർന്നുണ്ടാവുന്ന സംഭവങ്ങളും അദ്ദേഹത്തിന്റെ സ്വപ്നങ്ങൾക്ക് വിലങ്ങ് തടിയാവുന്നു.തുടർന്ന് വില്ലനുമായുള്ള ക്യാറ്റ് ആൻഡ് മൗസ് പ്ലെ ആണ് സിനിമ.

പതിഞ്ഞ രീതിയിൽ നായകന്റെ പ്രണയവും ജോലിയുമൊക്കെ പരിചയപ്പെടുത്തിയാണ് ചിത്രം തുടങ്ങുന്നത്.എന്നാൽ കുറച്ച് മുന്നോട്ട് പോവുമ്പോൾ വില്ലന്റെ എൻട്രിയോടെ കഥ ചൂട് പിടിക്കുന്നു.അതിനിടയിലും നായകന്റെ അനാവശ്യ പ്രണയം ആസ്വാദനം കെടുത്തുന്നുണ്ട്.കൂടെ ആവശ്യമില്ലാത്ത ഗാനങ്ങളും.ആദ്യ പകുതിയിൽ വില്ലന് കൊടുത്തിരിക്കുന്ന ബിൾഡ്-അപ്പ് അപാരമാണ്.ഇന്റർവെൽ പഞ്ചും കൂടി ആയപ്പോൾ ആദ്യ പകുതി നല്ല രീതിയിൽ ആസ്വധിക്കാനായി.എന്നാൽ രണ്ടാം പകുതിയിലേക്ക് വന്നപ്പോൾ കഥ വിഭിന്നമായിരുന്നു.

വില്ലന്റെ ബിൾഡ്-അപ്പിന് നീതി ലഭിക്കാത്ത അവതരണം ആയി തോന്നി രണ്ടാം പകുതിയിൽ.റെസ്ക്യൂ മിഷനിൽ ടെക്ക്നോളജിയുടെ ഉപയോഗവും അതിന്റെ നടത്തിപ്പും തീരെ തൃപ്തി തരാത്ത വിധത്തിലായിരുന്നു.പിന്നെ VFX വർക്കുകൾ പലപ്പോഴും ശരാശരിയിലും താഴെ മാത്രം നിലവാരം പുലർത്തി.ക്ലൈമാക്സ് ഊഹിച്ച രീതിയിൽ തന്നെ ആയതിനാൽ പുതുമയൊന്നും തോന്നിയില്ല.അങ്ങനെ ആകെ മൊത്തത്തിൽ കൈവിട്ടുപോയ രണ്ടാം പകുതി ആയിരുന്നു ചിത്രത്തിന്റേത്.

നല്ല രീതിയിൽ ആസ്വധിക്കാൻ സാധിക്കുന്ന ആദ്യപകുതിയും ഊഹിക്കാവുന്ന കഥാഗതിയുള്ള രണ്ടാംപകുതിയും അനാവശ്യ പ്രണയവും പാട്ടുകളും സീനുകളും എല്ലാം ഉൾകൊണ്ട, മുരുഗദോസിന്റെ സമീപ കാല ചിത്രങ്ങളിൽ തട്ട് താഴെ നിൽക്കുന്ന ചിത്രമാവുന്നു സ്പൈഡർ.

🔻On Screen🔻

മഹേഷ് ബാബു ലുക്കിൽ മികച്ച് നിന്നപ്പോൾ അഭിനയം പതിവ് പോലെ തന്നെ.യാതൊരു ഭാവമാറ്റങ്ങളും ഇല്ലാതെയുള്ള മുഖം ദർശിക്കാം സദാസമയവും.S.J സൂര്യയുടെ കിടിലൻ വില്ലൻ വേഷമാണ് ചിത്രത്തിന്റെ ഹൈലൈറ്റ്.അപാര സ്ക്രീൻ പ്രസൻസ് തന്നെയാണ് സൂര്യയുടേത്.എന്നാൽ അവസാനം വില്ലനെ ഒന്നുമല്ലാതാക്കി കാണിച്ചതിൽ വിഷമം തോന്നി.

നായിക എന്നൊരു ആവശ്യമേ ചിത്രത്തിനുണ്ടായിരുന്നില്ല.എങ്കിലും പേരിനൊരു നായികയായി രാകുൽ പ്രീത് സിങ്ങ് എന്തിനോ വന്ന് പോയി.ജയപ്രകാശ് അച്ഛൻ വേഷവും ചെയ്തു.

🔻Music & Technical Sides🔻

എന്തിനോ വേണ്ടി തിളക്കുന്ന പാട്ടുകളാണ് ചിത്രത്തിൽ ഉള്ളത്.ഒരുതരത്തിലും ആസ്വാദനം പകരാത്തതും ആവശ്യമില്ലാത്തതുമായവ.ഹാരിസ് ജയരാജിന്റെ പശ്ചാത്തലസംഗീതം ശരാശരിയിൽ മാത്രം ഒതുങ്ങി.

സന്തോഷ് ശിവന്റെ ക്യാമറയും പുതുകാഴ്ചകൾ ഒന്നും സമ്മാനിച്ചില്ല.പീറ്റർ ഹെയ്നിന്റെ ഫൈറ്റ് സീക്വനസുകളും യാതൊരു പുതുമയും പകർന്നില്ല.മോശം VFXഉം സിനിമയെ പുറകോട്ട് വലിക്കുന്നുണ്ട്.

🔻Final Verdict🔻

മുരുഗദോസിന്റെ കയ്യൊപ്പ് പതിയാത്ത സമീപകാല ചിത്രമാണ് സ്പൈഡർ.നല്ലൊരു പ്ലോട്ടും വില്ലനും ടീമും ഉണ്ടായിട്ടും എല്ലാം വേണ്ടവിധം ഉപയോഗിക്കാത്തത്തിന്റെ പോരായ്മകൾ സിനിമയിലുടനീളം പ്രകടമാവുന്നുണ്ട്.യാതൊരു പ്രതീക്ഷയും ഇല്ലാതെ പോയാൽ ശരാശരി സംതൃപ്തിയോടെ മടങ്ങാം.

My Rating :: ★★½