Abeed Azad

🔻Story Line🔻

രണ്ടാം ലോക മഹായുദ്ധ സമയം..അല്ലെങ്കിൽ വേണ്ട..കഥ പറഞ്ഞ് രസം കളയുന്നില്ല..

Its The Curious Case Of കള്ളൻ പവിത്രൻ..!!

🔻Behind Screen🔻

ധനുഷിന്റെ ബാനറായ വണ്ടർബാർ ഫിലിംസ് മലയാളത്തിൽ നിർമ്മിക്കുന്ന ആദ്യ ചിത്രം.ഇതാണ് തരംഗത്തിന് ഏറ്റവും പ്രതീക്ഷ നൽകിയ ഘടകം.നവാഗതനായ ഡൊമിനിക് അരുൺ ആദ്യമായി തിരക്കഥയെഴുതി സംവിധാനം ചെയ്ത ചിത്രമാണ് തരംഗം.

ടൈറ്റിൽ കാർഡ് മുതൽ തന്നെ കൗതുകമുണ്ടാക്കുന്ന തരത്തിലാണ് സിനിമയുടെ തുടക്കം.ടൈറ്റിൽ എഴുതിക്കാണിക്കുന്നതിന് മുമ്പുള്ള സീൻ തന്നെ സിനിമയെപ്പറ്റിയും ജേണറിനെപ്പറ്റിയും ഒരു ഐഡിയ നൽകാൻ പോന്നതായിരുന്നു.അത് നന്നായി ആസ്വദിക്കുകയും ചെയ്തു.പിന്നീടങ്ങോട്ടും പ്രതീക്ഷ തീരെ തെറ്റിയില്ല.

ഓരോ കഥാപാത്രങ്ങളെപ്പറ്റിയും വ്യക്തമായ ഒരു ഐഡിയ സിനിമ കഴിയുമ്പോൾ പ്രേക്ഷകരിൽ ഉണ്ടാവും.അത്ര നല്ല രീതിയിൽ പല ഘട്ടങ്ങളിലൂടെ അവരുടെ സ്വഭാവം നമ്മെ കാട്ടിത്തരുന്നുണ്ട്.കഥയെപ്പറ്റി പറയാൻ കാര്യമായി ഒന്നും ഇല്ലെങ്കിലും  അവതരണത്തിന്റെ കാര്യം അങ്ങനല്ല.ഇതുവരെ കണ്ട് പരിചിതമല്ലാത്ത ഒരു ഫ്രഷ്നസ്സും വ്യത്യസ്തതയും പ്രേക്ഷകർക്ക് കാഴ്ച്ചവെക്കുന്നുണ്ട് ചിത്രം.

ഓരോ നിമിഷവും എന്ത് സംഭവിക്കും എന്ന് ആകാംശ തോന്നിപ്പിക്കും വിധം സിനിമ നമ്മെ കയ്യിലെടുക്കുന്നുണ്ട് കുറച്ച് മുന്നോട്ട് പോവുമ്പോൾ.എന്നാൽ എന്താണ് നടക്കാൻ പോവുന്നതെന്ന് ഒരു ക്ലൂവും തരുന്നുമില്ല.അത്തരത്തിൽ ഒരു പിടിയും തരാതെ പ്രതീക്ഷിക്കാത്ത സമയത്ത് ഓരോ വഴിത്തിരിവുകൾ സമ്മാനിച്ച് ആവേശം നിറച്ച്, സിറ്റുവേഷണൽ കോമഡികൾ കൊണ്ട് സമ്പന്നമായ രസകരമായ ആഖ്യാനമാണ് തരംഗത്തിന്റേത്.എന്നാൽ അവസാനം വരെ ലഭിച്ച സംതൃപ്തി ക്ലൈമാക്സിൽ പൂർണ്ണമായി ലഭിച്ചില്ല എന്നൊരു ചെറിയ നിരാശ മാത്രം ബാക്കിയുണ്ട്. 

എന്നിരുന്നാലും കണ്ടുപഴകിയ ആഖ്യാനശൈലികൾക്ക് അപവാദമാണ് ഡൊമിനിക്  അരുണിന്റെ തരംഗത്തിലേത്.അത് നല്ല രീതിയിൽ ആസ്വദിക്കുകയും ചെയ്തു.ഇത്തരത്തിൽ ഒരു പരീക്ഷണ ചിത്രം ചെയ്യാൻ കാണിച്ച ധൈര്യത്തിന് കയ്യടികൾ.!

🔻On Screen🔻

അടിപൊളി കാസ്റ്റിംഗ് ആണ് ചിത്രത്തിന്റേത്. ടൊവീനൊയും ബാലു വർഗീസും സൈജു കുറുപ്പും തുടങ്ങി ഒറ്റ സീനിൽ വന്നവർ വരെ മത്സരിച്ച് അഭിനയിച്ച് തകർത്തിട്ടുണ്ട്.

നേഹ അയ്യരും ശാന്തി ബാലചന്ദ്രനുമുൾപ്പെട്ട പെൺപടയും തങ്ങളുടെ റോളുകൾ ഗംഭീരമാക്കി.ദിലീഷ് പോത്തന്റെ റോൾ കിടിലൻ ഐറ്റം തന്നെ.

🔻Music & Technical Sides🔻

സന്ദർഭത്തോട് ചേർന്ന് നിൽക്കുന്ന പശ്ചാത്തലസംഗീതം ഒരുക്കുന്നതിൽ അശ്വിൻ രഞ്ചു വിജയിച്ചിട്ടുണ്ട്.വളരെ രസകരമായിരുന്നു അത്.ഒരു ഗാനം മാത്രമേ ചിത്രത്തിൽ ഉണ്ടായിരുന്നുള്ളൂ.

ദീപക്കിന്റെ ഛായാഗ്രഹണവും ശ്രീനാഥിന്റെ എഡിറ്റിംഗും സിനിമയുടെ മൂഡിനോട് ചേർന്ന രീതിയിൽ തന്നെ ഭംഗിയായി.

🔻Final Verdict🔻

കഥയിലല്ല കഥപറച്ചിലിലെ പുതുമയാണ് തരംഗം പ്രദാനം ചെയ്യുന്നത്.ജേണർ ഏതാണെന്ന് ഒരു ഐഡിയ ആദ്യമേ മനസ്സിലാക്കിയാൽ പിന്നീടങ്ങോട്ട് അതീവ രസകരമാവും എന്ന കാര്യത്തിൽ സംശയമില്ല.ഈ തരംഗം ഇന്നൊരു തരംഗമായാൽ മാറ്റത്തിന്റെ പുതിയൊരു പാത വെട്ടിയിടാനും നവതരംഗം ആഞ്ഞടിക്കാനുമുള്ള പ്രചോദനം ആവുമെന്ന കാര്യത്തിൽ യാതൊരു സംശയവുമില്ല.അത് അങ്ങനെതന്നെയാവട്ടെ എന്ന് ആത്മാർഥമായി പ്രാർഥിക്കുന്നു.

My Rating :: ★★★½

🔺പ്രതി ഞാനാവണമെന്ന് ഒരു തീരുമാനം ഉള്ളത് പോലെ

🔻തെളിവുകൾ തീരുമാനിക്കും പ്രതി ആരാവണമെന്ന്

🔻Story Line🔻

നാല് വർഷം മുൻപ് മരണപ്പെട്ടതാണ് സുജാതയുടെ ഭർത്താവ്.അന്നുമുതൽ സുജാതക്ക് മകൾ ആതിര മാത്രമാണ് കൂട്ട്.വീട്ടുജോലിയെടുത്തും ചെറിയ ജോലികൾ ചെയ്തും കുടുംബം നോക്കിയിരുന്ന സുജാതക്ക് ഒറ്റ സ്വപ്നമേ ഉണ്ടായിരുന്നുള്ളൂ.തന്റെ മകളുടെ ഭാവി.

മകളും തന്നെപ്പോലെ ഒരു വേലക്കാരി ആവരുതെന്ന് സുജാത അതിയായി ആഗ്രഹിച്ചു.എപ്പോഴും അതിനെപ്പറ്റിയായിരുന്നു സുജാതയുടെ വേവലാതി.എന്നാൽ മകൾ പഠനത്തിൽ ശരാശരി നിലവാരം മാത്രമാണ് പുലർത്തുന്നതെന്നറിഞ്ഞ സുജാത അത് തരണം ചെയ്യാൻ എന്ത് ചെയ്യുന്നു എന്നാണ് സിനിമ കൈകാര്യം ചെയ്യുന്നത്.

🔻Behind Screen🔻

സിനിമയുടെ ടൈറ്റിലിൽ നിതീഷ് തിവാരിയുടെ കഥ എന്നാണ് കാണിക്കുന്നത്.അദ്ദേഹത്തിന്റെ കഥയിൽ 2016ൽ ബോളിവുഡിൽ റിലീസ് ആയ ചിത്രമാണ് "Nil Battey Sannata".പിന്നീട് അത് 'അമ്മ കണക്ക്' എന്ന പേരിൽ തമിഴിലേക്ക് റീമേക്ക് ചെയ്തു.അതിന്റെ മലയാളം പതിപ്പാണ് "ഉദാഹരണം സുജാത".

ഒരു ചേരിനിവാസിയായ സുജാത ദിവസേന വീട്ടുവേലകളും മറ്റു ചെറുജോലികളും ചെയ്താണ് വീട്ടുചിലവുകൾ നടത്തിയിരുന്നത്.ആകെ കൂട്ടിനുണ്ടായിരുന്ന മകളെ ജീവനുതുല്യം സ്നേഹിച്ചിരുന്ന സുജാതക്ക് മകൾ തന്നെപോലെ ഒരു വേലക്കാരി ആവരുതെന്ന അതിയായ ആഗ്രഹം ഉണ്ടായിരുന്നു.അതിനുള്ള ഒരേയൊരു പോംവഴി വിദ്യാഭാസമാണെന്ന ഉത്തമബോധ്യവും സുജാതയിൽ ഉണ്ട്.അതിനായി മകൾക്ക് ആവുന്നത്ര വിദ്യാഭ്യാസം നൽകാനുള്ള ശ്രമത്തിലാണ് സുജാത.എന്നാൽ മകൾ സുജാതയുടെ ആഗ്രഹങ്ങൾക്ക് പലപ്പോഴും എതിരാണ് നിൽക്കുന്നത്.ഇത് സുജാതയുടെ സ്വപ്നങ്ങ്ൾക്ക് ഒരു വിലങ്ങുതടി ആവുന്നു.

അനുരാഗകരിക്കിൻവെള്ളത്തിന് ശേഷം നവീൻ ഭാസ്കർ തിരക്കഥ രചിച്ച ചിത്രം കൂടിയാണ് സുജാത.സഹായിയായി മാർട്ടിൻ പ്രക്കാട്ടും ഉണ്ട്.ചിത്രത്തിന്റെ കഥ ഏതാണ്ട് ഊഹിക്കാവുന്നതാണെങ്കിലും പ്രേക്ഷകനുമായി റിലേറ്റ് ചെയ്യാൻ സാധിക്കുന്ന ഒരുപാട് മുഹൂർത്തങ്ങൾ ഉണ്ടെന്നതാണ് ചിത്രത്തിന് ജീവൻ നൽകുന്നത്.ഒരു അമ്മയുടെയും മകളുടെയും ബന്ധം മനോഹരമായി ആവിഷ്കരിച്ചിട്ടുണ്ട് ചിത്രത്തിൽ.കൂടെ രണ്ട് തലമുറകളുടെ സ്വപ്നങ്ങൾ തമ്മിലുള്ള തമ്മിലുള്ള അന്തരവും.സ്വന്തം വീട്ടിലെ കാര്യം തന്നെ ആലോചിച്ചാൽ മതി നമുക്ക് കാര്യം മനസ്സിലാവാൻ.നമ്മുടെ മാതാപിതാക്കളുടെ ഏറ്റവും വലിയ സ്വപ്നമെന്നത് നമ്മുടെ വിജയമാണ്.അവർ ചെറുപ്പത്തിൽ അനുഭവിച്ച ദുരിതങ്ങളും കഷ്ടപ്പാടുകളും നമുക്ക് ഉണ്ടാവരുതെന്ന ഇച്ഛയാണ് അവരെ ജീവിക്കാൻ പ്രേരിപ്പിക്കുന്ന ഘടകം.അതാണ് ഇന്നത്തെ സമൂഹം മറന്നുപോവുന്നതും.അത് ഏറ്റവും ഭംഗിയായ രീതിയിൽ തന്നെ കാണിച്ച് തന്നിരിക്കുകയാണ് സംവിധായകനും കൂട്ടരും.ആദ്യ ചിത്രത്തിനായി ഇത്തരത്തിൽ ഒരു പ്രമേയം തെരഞ്ഞെടുത്തതിന് അഭിനന്ദനങ്ങൾ.

കണ്ണ് നനയിക്കുകയും ചിന്തിപ്പിക്കുകയും ചെയ്യുന്ന മുഹൂർത്തങ്ങളാലും ഡയലോഗുകളാലും സമ്പന്നമാണ് ചിത്രം.കോച്ചിങ് സെന്ററിൽ സുജാത ചോദിക്കുന്ന ചോദ്യം എന്റേതുൽപ്പടെ പല വീടുകളിലും ചോദിച്ച് കേട്ടിട്ടുള്ള ഒന്നാണ്.അങ്ങനെ പല മികച്ച സന്ദർഭങ്ങളും കോർത്തിണക്കിയിട്ടുണ്ട്.ഇടക്കിടെ നുറുങ്ങ് നർമങ്ങളും നല്ല രംഗങ്ങളും സമ്മാനിച്ച് മുന്നോട്ട് പോവുന്ന ചിത്രം ഒരു വേളയിൽ ക്ലീഷേയിലേക്ക് നിലംപതിക്കുമെന്ന തോന്നൽ ഉണ്ടാക്കിയെങ്കിലും അവിടെ നിന്നും ഉയിർത്തെഴുന്നേറ്റ് നല്ലൊരു എന്റിംഗും നൽകി പ്രേക്ഷകരുടെ മനസ്സ് നിറക്കുന്നു.

സ്വപ്നം കാണാൻ മറക്കുന്ന തലമുറയെ സ്വപ്നം കണ്ട് മുന്നേറുവാൻ പ്രേരിപ്പിക്കുകയാണ് ചിത്രം.വെറും ഫീൽ ഗുഡ് എന്ന പേരിൽ ഒതുങ്ങാതെ, സാരോപദേശങ്ങളിൽ മുങ്ങിപ്പോവാതെ, മേന്മയോടെ മെനഞ്ഞെടുത്ത ഒരു ചിത്രമാണ് 'ഉദാഹരണം സുജാത'.

🔻On Screen🔻

തിരിച്ചുവരവിൽ മഞ്ചു വാര്യർ ചെയ്ത ഏറ്റവും മികച്ച വേഷമാണ് സുജാതയുടേത്.ഇതിനു മുമ്പുള്ള വേഷങ്ങളിലെല്ലാം പലപ്പോഴും നാടകീയത പ്രകടമായിരുന്നപ്പോൾ ഇതിൽ സുജാതയായി ജീവിക്കുകയായിരുന്നു മഞ്ചു.ഗംഭീര പ്രകടനം.ഇമോഷണൽ സീക്വൻസുകളിലും മറ്റുമുള്ള പ്രകടനങ്ങൾ എടുത്തുപറയേണ്ടതാണ്.സംസാരശൈലിയും വോയിസ് മോഡുലേഷനുമൊക്കെ മഞ്ചുവിലെ മികച്ച അഭിനേത്രിയെ കാട്ടിത്തരുന്നു.

മകളായി അഭിനയിച്ച അനശ്വരയുടെ പ്രകടനവും നന്നായിരുന്നു.മഞ്ചുവുമായുള്ള കോമ്പിനേഷൻ സീനുകളും കാണാൻ മനോഹരമായിരുന്നു.നെടുമുടി വേണുവിന്റെ റോൾ സാരോപദേശത്തിന്റേതാവുമെന്ന് വിചാരിച്ചെങ്കിലും പൂർണ്ണമായി അങ്ങനെ ആകാതിരുന്നത് നന്നായി.ജോജോയും തന്റെ വേഷത്തിലൂടെ ചിരി പടർത്തി.കൂടെ സ്കൂളിലെ മറ്റു കുട്ടികളും.

🔻Music & Technical Sides🔻

ഗോപി സുന്ദറിന്റെ ഈയടുത്തിറങ്ങിയതിൽ ഏറ്റവും മികച്ച വർക്കുകളിൽ ഒന്നാണ് സുജാതയിലേത്.സന്ദർഭങ്ങളിലെ വൈകാരികത പ്രേക്ഷകരിലേക്ക് എത്തിക്കാൻ പശ്ചാത്തലസംഗീതം വഹിച്ച പങ്ക് ചെറുതല്ല.പാട്ടുകൾ സന്ദർഭോചിതമായി കഥ പറയാൻ ഉപയോഗിച്ച ശൈലി നന്നേ ബോധിച്ചു.ഗാനങ്ങളും നന്നായിരുന്നു.

മധു നീലകണ്ടന്റെ ക്യാമറയും മഹേഷ് നാരായണന്റെ എഡിറ്റിംഗും ചിത്രത്തിന്റെ മൂഡിനോട് യോജിച്ച വിധത്തിലായിരുന്നു.

🔻Final Verdict🔻

യുവതലമുറക്ക് മികച്ചൊരു സന്ദേശം പകരാൻ ശ്രമിക്കുന്ന ചിത്രം.അതിൽ മികച്ച വിജയം കണ്ടിട്ടുമുണ്ട്.മാതാപിതാക്കളും മക്കളും ഒരുമിച്ച് തീയേറ്ററിൽ കാണുക ചിത്രം.കണ്ടുകഴിയുമ്പോൾ മനസ്സിൽ എന്തെങ്കിലുമൊരു മാറ്റം ഉണ്ടാവും എന്നുറപ്പ്.കാരണം ഈ ചിത്രം നമ്മുടെ കണ്ണും മനസ്സും ഒരുപോലെ നിറക്കും.നിറകണ്ണുകളോടെയല്ലാതെ എനിക്ക് ഈ ചിത്രം കണ്ടിറങ്ങാൻ സാധിച്ചില്ല.ഈ വർഷത്തെ ഇഷ്ടചിത്രങ്ങളിൽ സുജാതയും സ്ഥാനം നേടി.

My Rating :: ★★★★☆

🔻Story Line🔻

ഇന്റലിജൻസ് ബ്യുറോയിലെ ഫോൺ ടാപ്പിങ്ങ് ഡിപ്പാർട്ട്മെന്റിൽ വർക്ക് ചെയ്യുകയാണ് ശിവ.ഒരു ക്രൈം നടക്കുന്നതിന് മുന്നേ അത് തടഞ്ഞ് ക്രൈം റേറ്റ് പരമാവധി കുറക്കുയാണ് ശിവയുടെ ലക്ഷ്യം.സ്വന്തമായി ഓരോ സോഫ്റ്റ്വയറും പുള്ളിക്കാരൻ ഡെവലപ്പ് ചെയ്തിട്ടുണ്ട്.

അങ്ങനെ ജോലിയിൽ ആത്മസംതൃപ്തി നേടി മുന്നോട്ട് പോവുമ്പോഴാണ് അവിചാരിതമായി ഒരു കോൾ അദ്ദേഹത്തിന്റെ ശ്രദ്ധയിൽ പെടുന്നത്.അതിനെ തുടർന്ന് ഉണ്ടാവുന്ന സംഭവങ്ങളും  അന്വേഷണങ്ങളുമാണ് തുടർന്നുള്ള ചിത്രത്തിന്റെ പോക്കിൽ കൈകാര്യം ചെയ്യുന്നത്.

🔻Behind Screen🔻

തമിഴ് സിനിമാ സ്നേഹികൾക്ക് ഒരുപിടി നല്ല ചിത്രങ്ങൾ സമ്മാനിച്ച സംവിധായകനാണ് A.R. മുരുഗദോസ്.അദ്ദേഹത്തിന്റെ ഏറ്റവും പുതിയ ചിത്രമാണ് സ്പൈഡർ.മഹേഷ് ബാബുവുമായി ആദ്യമായി കൈകോർത്ത ചിത്രമെന്ന പ്രത്യേകതയും സ്പൈഡറിനുണ്ട്.മുരുഗദോസ് തന്നെയാണ് ചിത്രത്തിന്റെ തിരക്കഥയും ഒരുക്കിയിരിക്കുന്നത്.

ടെക്നോളജിക്ക് പ്രാധാന്യം നൽകിയുള്ള ടീസറും ട്രെയിലറും ആരാധകരിൽ ആവോളം പ്രതീക്ഷ നിറക്കുന്നതായിരുന്നു.എല്ലാ കാര്യത്തിലും അഗ്രകണ്യനായ ശിവ സമൂഹത്തിൽ കുറ്റകൃത്യങ്ങൾ കുറക്കണമെന്ന ആഗ്രഹവുമായി നടക്കുന്ന നായകനാണ്.അതുകൊണ്ട് തന്നെയാണ് ഉയർന്ന ജോലികൾ പലതും ഉപേക്ഷിച്ച് ഫോൺ ടാപ്പിങ്ങ് ജോലി തെരഞ്ഞെടുത്തത്.അതുവഴി കുറ്റകൃത്യങ്ങൾ നടക്കുന്നതിന് മുന്നേ പ്രതിരോധിക്കുകയാണ് പുള്ളിയുടെ ലക്ഷ്യം.

എന്നാൽ  ഇടക്ക് അദ്ദേഹത്തിന്റെ ശ്രദ്ധയിൽ പെടുന്ന ഒരു ഫോൺ കോളും തുടർന്നുണ്ടാവുന്ന സംഭവങ്ങളും അദ്ദേഹത്തിന്റെ സ്വപ്നങ്ങൾക്ക് വിലങ്ങ് തടിയാവുന്നു.തുടർന്ന് വില്ലനുമായുള്ള ക്യാറ്റ് ആൻഡ് മൗസ് പ്ലെ ആണ് സിനിമ.

പതിഞ്ഞ രീതിയിൽ നായകന്റെ പ്രണയവും ജോലിയുമൊക്കെ പരിചയപ്പെടുത്തിയാണ് ചിത്രം തുടങ്ങുന്നത്.എന്നാൽ കുറച്ച് മുന്നോട്ട് പോവുമ്പോൾ വില്ലന്റെ എൻട്രിയോടെ കഥ ചൂട് പിടിക്കുന്നു.അതിനിടയിലും നായകന്റെ അനാവശ്യ പ്രണയം ആസ്വാദനം കെടുത്തുന്നുണ്ട്.കൂടെ ആവശ്യമില്ലാത്ത ഗാനങ്ങളും.ആദ്യ പകുതിയിൽ വില്ലന് കൊടുത്തിരിക്കുന്ന ബിൾഡ്-അപ്പ് അപാരമാണ്.ഇന്റർവെൽ പഞ്ചും കൂടി ആയപ്പോൾ ആദ്യ പകുതി നല്ല രീതിയിൽ ആസ്വധിക്കാനായി.എന്നാൽ രണ്ടാം പകുതിയിലേക്ക് വന്നപ്പോൾ കഥ വിഭിന്നമായിരുന്നു.

വില്ലന്റെ ബിൾഡ്-അപ്പിന് നീതി ലഭിക്കാത്ത അവതരണം ആയി തോന്നി രണ്ടാം പകുതിയിൽ.റെസ്ക്യൂ മിഷനിൽ ടെക്ക്നോളജിയുടെ ഉപയോഗവും അതിന്റെ നടത്തിപ്പും തീരെ തൃപ്തി തരാത്ത വിധത്തിലായിരുന്നു.പിന്നെ VFX വർക്കുകൾ പലപ്പോഴും ശരാശരിയിലും താഴെ മാത്രം നിലവാരം പുലർത്തി.ക്ലൈമാക്സ് ഊഹിച്ച രീതിയിൽ തന്നെ ആയതിനാൽ പുതുമയൊന്നും തോന്നിയില്ല.അങ്ങനെ ആകെ മൊത്തത്തിൽ കൈവിട്ടുപോയ രണ്ടാം പകുതി ആയിരുന്നു ചിത്രത്തിന്റേത്.

നല്ല രീതിയിൽ ആസ്വധിക്കാൻ സാധിക്കുന്ന ആദ്യപകുതിയും ഊഹിക്കാവുന്ന കഥാഗതിയുള്ള രണ്ടാംപകുതിയും അനാവശ്യ പ്രണയവും പാട്ടുകളും സീനുകളും എല്ലാം ഉൾകൊണ്ട, മുരുഗദോസിന്റെ സമീപ കാല ചിത്രങ്ങളിൽ തട്ട് താഴെ നിൽക്കുന്ന ചിത്രമാവുന്നു സ്പൈഡർ.

🔻On Screen🔻

മഹേഷ് ബാബു ലുക്കിൽ മികച്ച് നിന്നപ്പോൾ അഭിനയം പതിവ് പോലെ തന്നെ.യാതൊരു ഭാവമാറ്റങ്ങളും ഇല്ലാതെയുള്ള മുഖം ദർശിക്കാം സദാസമയവും.S.J സൂര്യയുടെ കിടിലൻ വില്ലൻ വേഷമാണ് ചിത്രത്തിന്റെ ഹൈലൈറ്റ്.അപാര സ്ക്രീൻ പ്രസൻസ് തന്നെയാണ് സൂര്യയുടേത്.എന്നാൽ അവസാനം വില്ലനെ ഒന്നുമല്ലാതാക്കി കാണിച്ചതിൽ വിഷമം തോന്നി.

നായിക എന്നൊരു ആവശ്യമേ ചിത്രത്തിനുണ്ടായിരുന്നില്ല.എങ്കിലും പേരിനൊരു നായികയായി രാകുൽ പ്രീത് സിങ്ങ് എന്തിനോ വന്ന് പോയി.ജയപ്രകാശ് അച്ഛൻ വേഷവും ചെയ്തു.

🔻Music & Technical Sides🔻

എന്തിനോ വേണ്ടി തിളക്കുന്ന പാട്ടുകളാണ് ചിത്രത്തിൽ ഉള്ളത്.ഒരുതരത്തിലും ആസ്വാദനം പകരാത്തതും ആവശ്യമില്ലാത്തതുമായവ.ഹാരിസ് ജയരാജിന്റെ പശ്ചാത്തലസംഗീതം ശരാശരിയിൽ മാത്രം ഒതുങ്ങി.

സന്തോഷ് ശിവന്റെ ക്യാമറയും പുതുകാഴ്ചകൾ ഒന്നും സമ്മാനിച്ചില്ല.പീറ്റർ ഹെയ്നിന്റെ ഫൈറ്റ് സീക്വനസുകളും യാതൊരു പുതുമയും പകർന്നില്ല.മോശം VFXഉം സിനിമയെ പുറകോട്ട് വലിക്കുന്നുണ്ട്.

🔻Final Verdict🔻

മുരുഗദോസിന്റെ കയ്യൊപ്പ് പതിയാത്ത സമീപകാല ചിത്രമാണ് സ്പൈഡർ.നല്ലൊരു പ്ലോട്ടും വില്ലനും ടീമും ഉണ്ടായിട്ടും എല്ലാം വേണ്ടവിധം ഉപയോഗിക്കാത്തത്തിന്റെ പോരായ്മകൾ സിനിമയിലുടനീളം പ്രകടമാവുന്നുണ്ട്.യാതൊരു പ്രതീക്ഷയും ഇല്ലാതെ പോയാൽ ശരാശരി സംതൃപ്തിയോടെ മടങ്ങാം.

My Rating :: ★★½

🔻Story Line🔻

മട്ടാഞ്ചേരിയിലെ രണ്ട് കുട്ടികളിലൂടെയാണ് കഥ വികസിക്കുന്നത്.ആ വർഷത്തെ പ്രാവ് പറത്തൽ ടൂർണമെന്റിനുള്ള തയ്യാറെടുപ്പിൽ നിന്ന് തുടങ്ങി അവർക്ക് ചുറ്റുമുള്ളവരിലേക്കും കഥ ചെന്നെത്തുന്നു.അവിടുത്തെ സാധാരണക്കാരിലൂടെയും കുടുംബത്തിലൂടെയും യാത്ര കൊണ്ടുപോവുന്നു.കുറച്ച് പേരുടെ സ്വപ്നങ്ങളിലേക്കും.

🔻Behind Screen🔻

പറവ.കാത്തിരിക്കാൻ കാരണങ്ങൾ ഏറെയായിരുന്നു ഈ ചിത്രം.സൗബിൻ സാഹിർ ആദ്യമായി സംവിധാനം ചെയ്യുന്ന ചിത്രം.തൊട്ടതെല്ലാം പൊന്നാക്കി മാത്രം ശീലമുള്ള അൻവർ റഷീദ് നിർമിക്കുന്നു എന്ന പ്രത്യേകത മറ്റെന്തിനേക്കാളും പ്രതീക്ഷ നൽകുന്നതായിരുന്നു.കൂടെ ദുൽഖർ സൽമാന്റെ കാമിയോ അപ്പിയറൻസും.അങ്ങനെ പ്രതീക്ഷ നൽകുന്ന ഘടകങ്ങൾ അനവധി ആയിരുന്നു.അവയെല്ലാം ചിത്രം കാത്തോ എന്ന് ഇനി പരിശോധിക്കാം.

സൗബിന്റെ കഥക്ക് സൗബിനും മുനീറും ചേർന്നാണ് തിരക്കഥയും സംഭാഷണവും ഒരുക്കിയിരിക്കുന്നത്.കൗതുകം ഉണർത്തുന്ന കഥാ അന്തരീക്ഷമാണ് ചിത്രത്തിന്റേത്.അതിന്റെതായ രീതിയിൽ കൗതുകം ഉണത്തുന്നുമുണ്ട് തുടക്കത്തിൽ.എന്നാൽ കൂടുതൽ ദൂരം ചെല്ലുന്തോറും കഥ പ്രവചിക്കാവുന്ന തരത്തിലേക്ക് രൂപാന്തരപ്പെടുന്നു.കഥ പറച്ചിലിലും ചെറിയ ഇഴച്ചിൽ അനുഭവപ്പെടുന്നു.കാണികളെ പൂർണമായും ലയിച്ചിരുത്തുന്നതിൽ വിജയിച്ചിട്ടില്ല എന്ന് പറയേണ്ടി വരും.

സ്വാഭാവിക നർമത്തിന്റെ അകമ്പടിയോടെ സാഹചര്യങ്ങൾ പരമാവധി രസകരമാക്കാൻ ശ്രമിച്ചിട്ടുണ്ട് തിരക്കഥാക്രിത്തുക്കൾ.അത് ഭൂരിഭാഗവും വിജയം കണ്ടിട്ടുമുണ്ട്.നാടകീയത തെല്ലും അനുഭവപെടുന്നില്ല എന്നത് ഒരു പ്ലസ് പോയിന്റായി തോന്നി.അങ്ങനെ മേന്മകൾ അവകാശപ്പെടാൻ ഏറെയുണ്ട് ചിത്രത്തിൽ.

സംവിധായകൻ എന്ന നിലയിൽ സൗബിൻ തന്റെ റോൾ ഭംഗിയാക്കിയിട്ടുണ്ട്.എന്നാൽ തിരക്കഥയിൽ കുറച്ചുകൂടി പുതുമ കൊണ്ടുവരാമായിരുന്നു.പല ഘട്ടങ്ങളിലും ഊഹിക്കാവുന്ന കഥ ആസ്വാദനത്തിന് തിരിച്ചടി ആവുന്നുണ്ട്.കൂടെ കാണികളിൽ പ്രതീക്ഷ ഉണ്ടായിരുന്നതും ഒരുതരത്തിൽ തിരിച്ചടി ആയിട്ടുണ്ട്.അങ്ങനെ ആകെത്തുകയിൽ ശരാശരിക്ക് മുകളിൽ ആസ്വാധനം പ്രദാനം ചെയ്ത ചിത്രമാവുന്നു പറവ.

🔻On Screen🔻

സ്ക്രീനിൽ നിറഞ്ഞ് നിന്നത് പ്രധാന കഥാപാത്രങ്ങളെ അവതരിപ്പിച്ച കുട്ടികളാണ്.മനസ്സ് കീഴടക്കുന്ന പ്രകടനം.പല രംഗങ്ങളിലും തകർത്ത് അഭിനയിച്ചു.ഷൈൻ നിഗം താനൊരു ഭാവി വാഗ്ദാനമാണെന്ന് ഒരിക്കൽ കൂടി തെളിയിച്ചു.ലുക്കിലും പ്രകടനത്തിലും വ്യത്യസ്തത കൊണ്ട് അമ്പരപ്പിച്ചു ഷൈൻ.ദുൽഖർ സൽമാൻ തന്റെ വേഷം ഭംഗിയാക്കി.കുറച്ച് നേരമേ ഉള്ളെങ്കിലും കയ്യടി വാങ്ങിക്കൂട്ടി.

സൗബിൻ,ശ്രീനാഥ് ഭാസി,സിദ്ദിഖ്,ഹരിശ്രീ അശോകൻ തുടങ്ങി വമ്പൻ താരനിര തന്നെയുണ്ട് ചിത്രത്തിൽ.ശ്യാം പുഷ്കറിന്റെ ഭാര്യയുടെ ടീച്ചർ വേഷവും മനോഹരമായിരുന്നു.എല്ലാവരുടെയും നല്ല പ്രകടനത്തിനും സാക്ഷിയായി.

🔻Music & Technical Sides🔻

റെക്സ് വിജയന്റെ പാട്ടുകളേക്കാൾ ഏറെ മനോഹരം പശ്ചാത്തലസംഗീതമാണ്.സന്ദർഭത്തോട് ചേർന്ന് നിൽക്കുന്ന സംഗീതം.ടൈറ്റിൽ സോങ് വളരെ രസകരമാണ്. പിന്നീട് വന്ന പാട്ടുകളും കൊള്ളാം.

ലിറ്റിൽ സ്വായമ്പ് ഒരുക്കിയ ദ്രിശ്യവിരുന്ന് കാണേണ്ടത് തന്നെയാണ്.മനോഹരമായ ഫ്രയിമുകളും ഷോട്ടുകളും കണ്ണിന് കുളിർമ നൽകുന്നത് തന്നെ.വ്യത്യസ്തമായ കോസ്റ്റ്യുമും ആകർഷിക്കുന്ന ഘടകം തന്നെയാണ്.

🔻Final Verdict🔻

ഒരു ഡ്രീം കോമ്പോ തന്നെയായിരുന്നു സൗബിൻ-അൻവർ റഷീദ്-ദുൽഖർ സൽമാൻ എന്നിവർ ഒരുമിച്ചപ്പോൾ പ്രേക്ഷകനിൽ ഉണ്ടായത്.എന്നാൽ ആ പ്രതീക്ഷ പൂർണതയിൽ എത്തിക്കുവോളം ത്രിപ്തി നൽകാൻ ചിത്രത്തിനായില്ല.എങ്കിലും സംവിധായകന്റെ ആദ്യ ചിത്രമെന്ന നിലയിൽ പറവ നിലവാരം പുലർത്തുന്നുണ്ട്.അമിതപ്രതീക്ഷ ഇല്ലാതെ സമീപിച്ചാൽ ചിത്രം ത്രിപ്തി നൽകിയേക്കും.

My Rating :: ★★★☆☆

🔻Story Line🔻

എപ്പോഴും ബുദ്ധിയെ ഉണർത്തുന്ന കേസുകൾ കൈകാര്യം ചെയ്യാനാണ് ഡിറ്റക്ട്ടീവ് കനിയന് താല്പര്യം.കുറെയധികം കേസുകൾ തന്നെ തേടിയെത്തുന്നുണ്ടെങ്കിലും തന്റെ അസാമാന്യ ബുദ്ധിപാടവം കൈമുതലായുള്ള കനിയന് തൃപ്തി നൽകുന്നവ ആയിരുന്നില്ല അവയൊന്നും.

അങ്ങനെ കേസ് കിട്ടാതെ ഭ്രാന്ത് പിടിച്ചിരിക്കുന്ന അവസരത്തിലാണ് ഒരു കൊച്ചു കുട്ടി കനിയനെ ഒരു കേസിന്റെ ആവശ്യത്തിനായി സമീപിക്കുന്നത്.തന്റെ പട്ടിക്കുട്ടിയുടെ മരണവുമായി ബന്ധപ്പെട്ട് ആ കുട്ടിക്ക് തോന്നിയ ചില സംശയങ്ങൾ കനിയനുമായി പങ്കുവെക്കവേ ചില കൗതുകങ്ങൾ കനിയന്റെ മനസ്സിൽ ഉണ്ടാവുന്നു.അവയും അവയെ ചുറ്റിപ്പറ്റിയ കേസന്വേഷണവുമാണ് തുടർന്ന് ചിത്രത്തിൽ പറയുന്നത്.

🔻Behind Screen🔻

വ്യത്യസ്തങ്ങളായ പ്രമേയങ്ങളും ആഖ്യാനവും കൊണ്ട് പ്രേക്ഷകരുടെ മനസ്സ് കീഴടക്കിയ സംവിധായകരുടെ പട്ടികയെടുത്താൽ മുൻപന്തിയിൽ കാണുന്ന ഒരു പേരാണ് 'മിഷ്കിൻ'.പിശാസിന് ശേഷം മിഷ്കിൻ തിരക്കഥയെഴുതി സംവിധാനം ചെയ്ത ചിത്രമാണ് തുപ്പരിവാലൻ.

ഡിറ്റക്ട്ടീവ് കഥാപാത്രങ്ങളെയും കഥകളെയും ഇഷ്ടപ്പെടുന്നവർക്ക് ഒഴിവാക്കാനാവാത്ത ഒരു കഥാപാത്രമുണ്ട്.മരണത്തിൽ നിന്ന് പോലും ഉയിർത്തെഴുന്നേറ്റ ഷെർലക്ക് ഹോംസ്.മരണമില്ലാത്ത ഷെർലോക്കിനെ അനുസ്മരിച്ചാണ് ചിത്രം തുടങ്ങുന്നത്.ചിത്രത്തിലെ നായകനായ കനിയും ഷെർലോക്കിനെ പോലെ ഒരുവനാണ്.

ബുദ്ധിയെ പരമാവധി ഉദ്ധരിപ്പിക്കുന്ന കേസുകൾ ആണ് കനിക്ക് താല്പര്യം.ഷെർലോക്കിന് വാട്സണെ പോലെ കനിയുടെ സന്തതസഹചാരിയായി കൂട്ടുകാരൻ മനോഹറും ഉണ്ട്.തന്റെ താൽപര്യത്തിനൊത്ത കേസുകൾ കിട്ടാത്ത വിഷമത്തിൽ ഇരിക്കവേയാണ് ഒരു സ്കൂൾ വിദ്യാർത്ഥി തന്റെ പട്ടിയുടെ മരണം അന്വേഷിക്കണം എന്ന ആവശ്യവുമായി കനിയുടെ അടുത്ത് എത്തുന്നത്.ആളുകളെ കാണുന്ന മാത്രയിൽ അവരുടെ സ്വഭാവവും വ്യക്തിത്വവും പരമാവധി ഊഹിക്കുന്ന കനിയന് കേസിൽ എന്തോ ഒരു താൽപര്യം ഉടലെടുക്കുന്നു.തുടർന്നുള്ള കേസന്വേഷണവും അതിനോടാനുബന്ധിച്ച് എത്തിചേരുന്ന മറ്റ് ദുരൂഹതകളുമാണ് മിഷ്കിൻ ഇത്തവണ തയ്യാറാക്കിയിരിക്കുന്നത്.

ഒരുതരത്തിൽ ഷെർലോക്ക് ഹോംസിനെ തമിഴിലേക്ക് പറിച്ച് നട്ടിരിക്കുകയാണ് എന്ന് വേണമെങ്കിൽ പറയാം.കനിയന്റെ കഥാപാത്രവും ജീവിതസാഹചര്യവും സ്വഭാവവുമൊക്കെ അങ്ങനെ തന്നെയാണ്.അപ്പോഴുണ്ടാവുന്ന വെല്ലുവിളി ആ കഥാപാത്രത്തോട് പരമാവധി നീതി പുലർത്തുന്ന ഒരു കഥ മെനഞ്ഞെടുക്കുന്നതാണ്.ഒരു ഗംഭീര കഥയും അതിനുതകുന്ന മേക്കിങ്ങും ചിത്രത്തിൽ കാണാൻ സാധിക്കും.

രണ്ടരമണിക്കൂറിലധികം ദൈർഖ്യമുള്ള ചിത്രമാണെങ്കിലും ഒരു നിമിഷം പോലും കഥയുടെ ഒഴുക്കിൽ നിന്ന് മാറി സഞ്ചരിക്കുന്നില്ല എന്നത് ശ്രദ്ധേയമായ കാര്യമാണ്.മിഷ്കിൻ താൻ ചെയ്യുന്ന ജോലിയോട് നൂറുശതമാനം നീതി പുലർത്തിയിട്ടുണ്ടെന്ന് കണ്ടമാത്രയിൽ ബോധ്യമാവും.ഒരു സെക്കന്റ് പോലും ബോറടിപ്പിക്കാതെ അനാവശ്യ രംഗങ്ങളോ ഗാനങ്ങളോ ഒന്നുംതന്നെ ഇല്ലാതെ ഓരോ നിമിഷവും ത്രിലടിപ്പിച്ച് കൊണ്ടുപോവുന്നുണ്ട് സംവിധായകൻ.തുടക്കം മുതൽ ഒടുക്കം വരെ ഒരേ വേഗതയെന്നതിനാൽ ദൈർഘ്യം ഒരു പ്രശ്നമായി തോന്നിയതെ ഇല്ല.

നായകൻ അതിസമർത്ഥനാണെങ്കിൽ അതുക്കും ഒരുപടി മുന്നിലാണ് വില്ലന്മാർ.നായകനും വില്ലനും തമ്മിലുള്ള 'ക്യാറ്റ് ആൻഡ് മൗസ്' പ്ലെ മിഷ്കിൻ സ്റ്റൈലിൽ കിടിലൻ ആയി ചിത്രീകരിച്ചിരിച്ചിരിക്കുന്നു.ഓരോ നിമിഷവും പ്രേക്ഷകരിൽ ആവേശം കൊള്ളിക്കുന്ന കഥാസന്ദർഭങ്ങൾ ശരിക്കും ത്രില്ലടിപ്പിക്കുന്നവയാണ്.മിഷ്കിന്റെ ചില പ്രത്യേക ട്രീറ്റ്മെന്റുകൾ പല സീനുകളെയും പ്രത്യേക ഭംഗിയുള്ളതാക്കുന്നു.സ്ഥിരം ഫൈറ്റ് സീനുകളിൽ നിന്ന് മാറി ത്രസിപ്പിക്കുന്ന സംഘട്ടന രംഗങ്ങൾ കാണാൻ അതീവരസകരമാണ്.അങ്ങനെ ആകെ മൊത്തത്തിൽ മിഷ്കിൻ സ്റ്റൈലിൽ പിറന്ന നല്ല കിടിലൻ ത്രില്ലറാണ് തുപ്പരിവാലൻ.മിഷ്കിന്റെ സിനിമാജീവിതത്തിൽ മറ്റൊരു പൊൻതൂവലാണ് ചിത്രം.

🔻On Screen🔻

വിശാൽ എന്ന നടനിലെ ക്യാലിബർ പരമാവധി കനിയൻ എന്ന കഥാപാത്രത്തിനായി സംവിധായകൻ ഉപയോഗിച്ചിട്ടുണ്ട്.ഒരു സുപ്രധാന സീനിൽ ഒഴികെ ബാക്കിയെല്ലാ സീനുകളിലും ഗംഭീര പ്രകടനം കാഴ്ച്ച വെച്ചു വിശാൽ.ഫൈറ്റ് സീക്വനസുകളിലെ മെയ്വഴക്കവും ബോഡി ലാൻഗ്വേജുമൊക്കെ കിടിലൻ തന്നെ.മനോഹർ എന്ന കഥാപാത്രത്തെ പ്രസന്നയും മനോരമാക്കി.വില്ലൻ വേഷങ്ങളിൽ ഭാഗ്യരാജും വിനയ്യും ആൻഡ്രിയയുമൊക്കെ കിടിലൻ പ്രകടനങ്ങൾ.നായകനോട് ഒപ്പത്തിനൊപ്പം നിൽക്കുന്ന വില്ലന്മാർ.

🔻Music & Technical Sides🔻

ഒറ്റ ഗാനം പോലും ചിത്രത്തിലില്ല.കഥയുടെ വേഗത്തിന് ആക്കം കൂട്ടുന്ന പശ്ചാത്തലസംഗീതം മികച്ചുനിൽക്കുന്നു.കാർത്തിക്കിന്റെ ഛായാഗ്രഹണവും ചിത്രത്തിനെ വിഷ്വലി റിച്ച് ആക്കുന്നു.

🔻Final Verdict🔻

ഒരു നിമിഷം പോലും ബോറടിപ്പിക്കാതെ അനാവശ്യമായ ഒരു സീനോ ഗാനമോ ഇല്ലാതെ മുഴുവൻ നേരവും ത്രില്ലടിച്ചിരുന്ന് കണ്ട ചിത്രം.മിഷ്കിന്റെ കയ്യൊപ്പ് ചിത്രത്തിൽ പ്രകടമാവുമ്പോൾ കാണികൾക്ക് പൂർണ തൃപ്തി നൽകുന്നു തുപ്പരിവാലൻ.പ്രതീക്ഷകൾക്ക് അപ്പുറം തൃപ്തി നൽകുന്ന ചിത്രം തീയേറ്ററിൽ തന്നെ ആസ്വധിക്കുക.

My Rating :: ★★★★☆