Abeed Azad

🔻മലയാള സിനിമയിൽ ഇപ്പോളുള്ളതിൽ മിനിമം ഗ്യാരന്റി ഉറപ്പ് പറയാവുന്ന നടനായി മാറിക്കഴിഞ്ഞിരിക്കുന്നു ഫഹദ് ഫാസിൽ. തിരഞ്ഞെടുക്കുന്ന സിനിമകളിൽ ഒരു ജേണറിൽ തന്നെ സ്ഥിരമാക്കാതെ വൈവിധ്യങ്ങൾ ശീലിക്കാനും അദ്ദേഹം ശ്രദ്ധ ചെലുത്താറുണ്ട്. മുൻ ചിത്രങ്ങളിൽ നിന്ന് അത് വ്യക്തമാണ്.അതിൽ നിന്നെല്ലാം പാടെ വ്യത്യസ്തമായ കഥയും ജേണറും കൈകാര്യം ചെയ്യുന്ന ചിത്രവുമായാണ് അദ്ദേഹത്തിന്റെ ഈ വരവ്.

🔻കഥയിലേക്ക് കാര്യമായി കടക്കുന്നില്ല. പുറം ലോകവുമായി യാതൊരു ബന്ധവുമില്ലാത്ത മെന്റൽ അസൈലത്തിലേക്ക് ചെക്കിങ്ങിനും റിപ്പോർട്ട് കൊടുക്കുന്നതിനുമായി വന്ന ഡോക്ടറുടെയും അവിടുത്തെ രോഗികളുടെയും കഥയാണ് ചിത്രം മിസ്റ്ററിയിൽ പൊതിഞ്ഞ് പറയുന്നത്. മലയാളസിനിമ അധികം കണ്ട് ശീലിച്ചിട്ടില്ലാത്ത സൈക്കോളജിക്കൽ ത്രില്ലർ എന്ന ജേണറിൽ അതിരനെ ഉൾപ്പെടുത്താം. കാരണം അതിനോട് ചിത്രം നീതി പുലർത്തുന്നു എന്നത് തന്നെ.

🔻മികവ് പുലർത്തുന്ന ഫാക്റ്ററുകളുടെ സംയോജനവേദിയാണ് അതിരൻ. കഥാപാത്രങ്ങളുടെ എക്സ്പോസിഷൻ തന്നെ അതിന് പ്രഥമ ഉദാഹരണമായി എടുക്കാം. ഫഹദിന്റെ കഥാപാത്രം അവിടേക്ക് വന്ന് ചേരുന്നത് മുതലുള്ള സന്ദർഭങ്ങളിൽ തുടങ്ങുന്ന മിസ്റ്ററിയുടെ മറ ഒടുക്കം വരെ കാത്തുസൂക്ഷിക്കാൻ ചിത്രത്തിനായിട്ടുണ്ട്. സ്‌ക്രീനിൽ വരുന്ന പ്രധാന കഥാപാത്രങ്ങൾക്കെല്ലാം അവരുടേതായ വ്യക്തിത്വവും സ്വഭാവവും സമ്മാനിക്കുന്നതിൽ തിരക്കഥ വിജയിച്ചിട്ടുണ്ട്. ഈ കാര്യങ്ങളിൽ ഊന്നിയുള്ള അവതരണത്തെ ഒരു പിടിയും തരാതെ ഗംഭീരമായി അവതരിപ്പിക്കുന്നതിൽ നവാഗതനായ വിവേക് എന്ന സംവിധായകന് സാധിച്ചിട്ടുണ്ട്. ആദ്യ പകുതിയിൽ അത്രത്തോളം നിഗൂഢതകൾ ഒളിപ്പിച്ച് വെക്കുന്നുണ്ട് ചിത്രം. ഹുസ്സൈൻ എന്ന ചിത്രകാരന്റെ കഥാപാത്രത്തെ അതിനായി ഉപയോഗിച്ചിരിക്കുന്നത് സമർത്ഥമായാണ്. അത്തരത്തിൽ ആദ്യ പകുതിയിൽ ഒരുപാട് മികച്ച അനുഭവങ്ങൾ നൽകുന്നുണ്ട് ചിത്രം.

🔻ഇടവേളക്ക് ശേഷം രണ്ടാം പകുതിയിലേക്ക് വരുമ്പോൾ കാര്യങ്ങൾ തെല്ലൊന്ന് മാറുന്നുണ്ട്. ഒരൽപം വിരസത തുടക്കത്തിൽ നൽകുന്നുണ്ട് കഥ. അതിന് ശേഷം വീണ്ടും ട്രാക്കിലാവുന്നതോടെ കാര്യങ്ങൾ വീണ്ടും പഴയപടി ആവുന്നുണ്ട്. ഒടുക്കം നല്ലൊരു ക്ലൈമാക്സ് കൂടിയാവുമ്പോൾ തൃപ്തി നൽകുന്നു അതിരൻ. നിരന്തരം സിനിമ കാണുന്നവർക്ക് ക്ലൈമാക്സ് ഊഹിക്കാനാവുമെങ്കിലും അതിന്റെ അവതരണമികവ് പ്രശംസിക്കാതെ വയ്യ. ഒരുതരത്തിൽ കയ്യടിച്ച് കാണാവുന്ന രംഗങ്ങളാൽ ക്ലൈമാക്സ് നിറയുന്നു.

🔻സായി പല്ലവിയുടെ നിത്യ എന്ന കഥാപാത്രത്തിന്റെ അവതരണം വളരെ മികച്ച് നിന്നു. സിനിമയുടെ ഏറ്റവും മികച്ച ഫാക്റ്ററുകളിൽ ഒന്നായി ആ കഥാപാത്രം. ഒപ്പം ഫഹദിന്റെ കഥാപാത്രവും അങ്ങനെ തന്നെ. അതുൽ കുൽക്കർണിയുടെ കഥാപാത്രം ചില സംഭാഷണങ്ങളിലൂടെയാണ് അസ്തിത്വം കൈവരിക്കുന്നത്. ചില ഹോളിവുഡ് സിനിമകളോട് തോന്നുന്ന ചായകാച്ചൽ കണ്ണടക്കാവുന്നതേ ഉള്ളൂ. ഒരു തരത്തിൽ ബുജി പട്ടം ചാർത്തപ്പെട്ടവർക്കും സാധാരണ പ്രേക്ഷകർക്കും ഒരേ തരത്തിൽ ഇഷ്ടപ്പെടുന്ന അവതരണമികവാണ് അതിരന്റെ ഏറ്റവും വലിയ പോസിറ്റിവ്. അതുകൊണ്ട് തന്നെ ബോക്സ് ഓഫീസിൽ ചിത്രം വിജയം അർഹിക്കുന്നുണ്ട്. പരീക്ഷണ സിനിമകൾ മലയാളികൾക്ക് ദഹിക്കില്ല എന്ന ചീത്തപ്പേര് മാറ്റാനും ഇനിയും ഇത്തരം ചിത്രങ്ങൾ സ്വീകാര്യമാവാനും അതിരൻ നല്ലൊരു തുടക്കം സമ്മാനിക്കും.

🔻ഫഹദിന്റെയും സായി പല്ലവിയുടെയും മെയ്‌വഴക്കം അപാരം തന്നെ. ആക്ഷൻ രംഗങ്ങളിൽ ഇരുവരുടെയും പാടവം നല്ല രീതിയിൽ തന്നെ ഉപയോഗിച്ചിട്ടുണ്ട് ചിത്രം. തങ്ങളുടെ കഥാപാത്രം ഇരുവരും ഭംഗിയാക്കിയപ്പോൾ അതുൽ കുൽക്കർണി തന്റെ റോൾ നന്നായി ചെയ്തു. ഇതിനോടൊപ്പം തന്നെ കഥാപാത്രങ്ങളായി നിന്നവയാണ് ഛായാഗ്രഹണവും പശ്ചാത്തല സംഗീതയും.

🔻അനുവിന്റെ ക്യാമറ വർക്കുകൾ കൊതിപ്പിക്കും വിധമാണ്. മിസ്റ്ററിയെ അതിന്റെ മൂർദ്ധാവിൽ എത്തിക്കുന്ന ഷോട്ടുകളും അതിനൊപ്പമുള്ള ലൈറ്റിങ്ങുകളും. ജിബ്രാന്റെ ഗംഭീര ബിജിഎം വർക്കുകൾ അവതരണത്തിന് ഒത്ത പിന്തുണ നൽകുമ്പോൾ അയൂബ് ഖാന്റെ എഡിറ്റിങ്ങ് ശരിക്കും മോഹിപ്പിച്ചു. അത്തരത്തിൽ ടെക്നിക്കൽ വശങ്ങളുടെ കൂടെ മികവാണ് അതിരന്റെ കാഴ്കച്ചകളിൽ താൽപര്യം ജനിപ്പിക്കുന്നത്.

🔻ＦＩＮＡＬ ＶＥＲＤＩＣＴ🔻

ഒരുപക്ഷെ മലയാളസിനിമക്കും പ്രേക്ഷകർക്കും വൈവിധ്യമാർന്ന ആസ്വാദനതലം സൃഷ്ടിച്ചെടുക്കാനുള്ള തുടക്കം സമ്മാനിക്കുകയാവും അതിരന്റെ നിയോഗം. എല്ലാ തരം പ്രേക്ഷകരെയും ഒരുപോലെ തൃപ്തിപ്പെടുത്താനുള്ള അവതരണശൈലി സംവിധായകൻ സ്വായത്തമാക്കുമ്പോൾ കയ്യടിച്ച് തീയേറ്റർ വിടാനുള്ള അനുഭൂതി സമ്മാനിക്കുന്നു ചിത്രം.

ＡＢ ＲＡＴＥＳ ★★★½

🔻ഭർത്താവിന്റെ തൊഴിലിനെ പറ്റി കൂടുതൽ അറിയുക. അതിനനുസരിച്ച് തന്റെ ജീവിതശൈലിയെ അദ്ദേഹത്തിന്റേത് പോലെ ക്രമപ്പെടുത്തുക. ഹാർവാർഡ് ലോ സ്‌കൂളിൽ ചേരുമ്പോൾ അത്ര മാത്രമായിരുന്നു റൂത്തിന്റെ മനസ്സിൽ. എന്നാൽ ഭാവിയിൽ തൻ അമേരിക്കയുടെ തന്നെ ചരിത്രത്തിലെ വിപ്ലവകാരികളിൽ ഒന്നായി മാറുമെന്ന് അവൾ അറിഞ്ഞിരുന്നില്ല.

Year : 2018
Run Time : 2h

🔻തന്റെ ജീവിത സാഹചര്യങ്ങൾ തന്നെയായിരുന്നു റൂത്തിന്റെ കരിയർ മറ്റൊരു ദിശയിലേക്ക് വഴിതിരിച്ച് വിട്ടത്. പുരുഷന്മാർക്ക് മാത്രം പഠിക്കാൻ അവകാശമുണ്ടായിരുന്ന ഹാർവാർഡ് സ്‌കൂളിൽ സ്ത്രീകളോടുള്ള വിവേചനത്തിൽ നിന്നായിരുന്നു അതിന്റെ പ്രാഥമിക ഘട്ടം തുടങ്ങിയത്. പിന്നീട് തനിക്ക് ചുറ്റുമുള്ള ഓരോ കാര്യങ്ങളിലും സ്ത്രീ-പുരുഷ വിവേചനവും ഒപ്പം റേസിസവും കണ്ടുമടുത്തപ്പോൾ റൂത്ത് മനസ്സിൽ ഒരു കാര്യം ഉറപ്പിച്ചു. എന്നെങ്കിലുമൊരിക്കൽ ഇതിനൊരു മാറ്റം കൊണ്ടുവരാനായി താൻ പ്രവർത്തിക്കുമെന്ന്..!!

🔻ഒരു ബയോഗ്രഫി ആയതുകൊണ്ട് തന്നെ കഥാപാത്രത്തെ പരിചയപ്പെടുത്തുന്നതിനാണ് ഏറ്റവും കൂടുതൽ സമയം ഉപയോഗിച്ചിരിക്കുന്നത്. റൂത്തിന്റെ മനം മാറ്റത്തിനുണ്ടായ കാരണങ്ങൾ വ്യക്തമായി തന്നെ പരാമർശിക്കുമ്പോൾ ആ പ്രതിഭാശാലിയുടെ വളർച്ചയെ, അല്ലെങ്കിൽ ജീവിതത്തിലുണ്ടായ വഴിത്തിരിവുകളെ അടയാളപ്പെടുത്തുകയാണ് ചിത്രം. അതുകൊണ്ട് തന്നെ ഒരു മാറ്റം ആ കഥാപാത്രം എത്രമാത്രം ആഗ്രഹിക്കുന്നുവെന്ന് നമുക്ക് മനസ്സിലാക്കാം. തുടർന്ന് പ്രധാന കഥയിലേക്ക് കടക്കുമ്പോൾ അതിന്റെ ഇന്റെൻസിറ്റി നമുക്ക് അനുഭവിച്ചറിയാൻ സാധിക്കും.

🔻ഒരു ത്രില്ലർ അല്ലെങ്കിൽ കോർട്ട് റൂം ഡ്രാമ എന്നതിനേക്കാളേറെ അമേരിക്കയുടെ സാമൂഹിക സാഹചര്യങ്ങളെ പരമാവധി പരിചയപ്പെടുത്തിയാണ് കഥ മുന്നോട്ട് പോവുന്നത്. പക്ഷെ അതിലും കഥ ആവശ്യപ്പെടുന്നതനുസരിച്ചുള്ള ഒരു ത്രിൽ ഫാക്ടർ കാണാനാവും. Sex Discriminationന്റെ ഓരോ നിയമങ്ങളും അരിച്ചുപെറുക്കി സിനിമയിൽ അവതരിപ്പിക്കുമ്പോൾ ഒരു സ്ത്രീയായി പിറന്നതിൽ ലോ സ്‌കൂളിൽ നിയമത്തിന്റെ ആദ്യപാഠങ്ങൾ പറഞ്ഞ് തന്നവർക്ക് പോലും എത്രത്തോളം വിവേചനം ഉണ്ടെന്ന് കാട്ടിത്തരുന്നുണ്ട് ചിത്രം. Male Dominationന്റെ പരമോദാഹരണങ്ങളായി കാണിക്കുന്ന രംഗങ്ങളൊക്കെയും വളരെ മികച്ച് നിന്നു. ഒപ്പം വെറുമൊരു ലോ സ്റ്റുഡന്റിൽ നിന്ന് ഒരുഭിഭാഷകയിലേക്കും തുടർന്ന് സുപ്രീം കോടതി ജഡ്ജിയിലേക്കുമുള്ള വളർച്ച അത്ഭുതാവഹം തന്നെ.

🔻Felicity Jonesന്റെ Frustration റൂത്ത് എന്ന കഥാപാത്രത്തിനായി ഉപയോഗിച്ചിരിക്കുന്നത് ഗംഭീരമായാണ്. ഒടുവിലെ കോർട്ട് റൂം രംഗമായാൽ തന്നെ ആ സ്വഭാവം കയ്യടി വാങ്ങിക്കൂട്ടുന്നതിനോടൊപ്പം ഏതൊരാളിലും ആവേശം നിറക്കാൻ പോന്നതാണ്. Armie Hammerന്റെ മികച്ച വേഷവും ചിത്രത്തിൽ കാണാം. Thurgood Marshall റെഫറൻസുകൾ വരുമ്പോൾ സാഹചര്യങ്ങൾക്കനുസരിച്ച് ഭംഗിയായി കോർത്തിണക്കിയിട്ടുണ്ട്.

🔻ＦＩＮＡＬ ＶＥＲＤＩＣＴ🔻

ഒരു ബയോഗ്രഫി എന്ന രീതിയിൽ ചിത്രത്തെ സമീപിച്ചാൽ മികച്ച ഒരനുഭവം തന്നെയാവും ചിത്രം സമ്മാനിക്കുക. ഈ ലോകത്ത് ഒരു രാത്രി കൊണ്ട് നടത്തിയ പരിവർത്തനമല്ലല്ലോ നമ്മുടെ മുന്നിലുള്ളതും നമുക്ക് ആസ്വദിക്കാൻ സാധിക്കുന്നതുമായ സ്വാതന്ത്ര്യം. ഒരുപാട് പേരുടെ ജീവനിലും പരിശ്രമത്തിലും പടുത്തുയർത്തിയതാണ് നാം ഇപ്പോ ആസ്വദിക്കുന്നതെന്തും. തങ്കലിപികൾ കൊണ്ട് എഴുതിച്ചേർക്കപ്പെടേണ്ട ഒരു വിപ്ലവകാരിയുടെ ജീവിതം കാണാം, ഇനിയും ഒരു മാറ്റത്തിന് വേണ്ടി ആഗ്രഹിക്കാം..!!

ＡＢ ＲＡＴＥＳ ★★★½

🔻'Ironman Sucks'..! Lego മൂവിയെ പറ്റി ഓർക്കുമ്പോൾ ആദ്യം മനസ്സിൽ വരുന്ന ഡയലോഗ് ഇതാണ്. നമ്മുടെ സൂപ്പർ ഹീറോസിനെ ഇത്ര കോമഡി പീസുകളായി കണ്ടത് ഈ സിനിമയിലാണ്. ഇനി കുറച്ചുകൂടിയ കടുപ്പത്തിൽ കോമഡി ആക്കിയാലോ. Legoയുടെ രണ്ടാം ഭാഗത്തിൽ അതിനും സാക്ഷിയാവാം.

Year : 2019
Run Time : 1h 47min

🔻സമാധാനത്തിന്റെ അഞ്ച് വർഷങ്ങൾ. സന്തോഷം കളിയാടിയിരുന്ന നഗരത്തിലേക്ക് പുതിയൊരു ശത്രു വരികയാണ്. 'Duplo'. ആ നഗരം തന്നെ ഞൊടിയിടയിൽ നശിപ്പിക്കാൻ ശേഷിയുള്ള, ദുഷ്ടശക്തികൾ. പിന്നീട് അവരിൽ നിന്ന് രക്ഷ നേടാനുള്ള പരാക്രമമായി എല്ലാവരും.

🔻ഒരു മുഴുനീള കോമഡി ചിത്രം തന്നെയാണ് ലെഗോ രണ്ടാം ഭാഗം നമുക്കായി ഒരുക്കിയിരിക്കുന്നത്. ഒരുപാട് ചിരിക്കാനുള്ള രംഗങ്ങളുണ്ട്. Mad Max മോഡലിലുള്ള രംഗങ്ങൾ അതിൽ ഹൈലൈറ്റാണ്. ഇത്തവണ ബാറ്റ്മാനെ അലക്കി അഴയിൽ തൂക്കി എന്ന് വേണമെങ്കിൽ പറയാം. അത്രക്ക് ട്രോളുന്നുണ്ട് പുള്ളിയെ. ആ സീനുകളൊക്കെ അന്യായ ഐറ്റം തന്നെയായിരുന്നു. കൂടെ കിടിലൻ പാട്ടുകളും ഉണ്ട്. 'Everything Is Awesome' എന്ന പാട്ട് മനോഹരമായിരുന്നു. എന്നാൽ ഇതിനൊക്കെ പുറമെ നല്ലൊരു Concept കൂടി കഥയിൽ കൈകാര്യം ചെയ്യുന്നിടത്ത് ആസ്വാദനം വേറൊരു തലത്തിൽ എത്തുന്നു. വിഷ്വലി ഗംഭീരമാണ് ചിത്രം. എല്ലാ ലെഗോ മൂവിയിലെയും പോലെ തന്നെ കണ്ണഞ്ചിപ്പിക്കുന്നുണ്ട് എല്ലാ രംഗങ്ങളും.കൂടെ കിടിലൻ കഥാപാത്രങ്ങളും കൊറിയോഗ്രഫിയും പശ്ചാത്തലസംഗീതവും കാണികൾക്ക് വിരുന്നൊരുക്കുന്നുണ്ട്. ഒപ്പം സസ്‌പെൻസും ട്വിസ്റ്റും എല്ലാം തന്നെ തൃപ്തിപ്പെടുത്തുന്നുമുണ്ട്.

🔻ＦＩＮＡＬ ＶＥＲＤＩＣＴ🔻

ലെഗോ ഫാൻസിനെയും ആനിമേഷൻ പ്രേമികളെയും പൂർണ്ണമായി തൃപ്തിപ്പെടാൻ ശേഷിയുള്ള ചിത്രവുമായാണ് ഇത്തവണ ലെഗോയുടെ വരവ്. ഒരുപാട് ചിരിക്കാനും ഒരിത്തിരി കാര്യമായി ചിന്തിക്കാനും മനോഹരമായ വിഷ്വൽസ് ആസ്വദിക്കാനും വക ഒരുക്കുന്നുണ്ട് ചിത്രം. ധൈര്യമായി സമീപിക്കാം ഈ ചിത്രത്തെ. Batman Rocks..!!😛😛

ＡＢ ＲＡＴＥＳ ★★★½

🔻ആ യാത്രയിൽ അവർ എന്തൊക്കെ ചർച്ച ചെയ്തിട്ടുണ്ടെന്ന് അവർക്ക് പോലും ഓർമ്മ കാണില്ല. ഓരോ കാര്യത്തിലും തങ്ങളുടെ അഭിപ്രായങ്ങൾ വൈരുദ്ധ്യങ്ങളാൽ സമ്പന്നമാണെങ്കിലും അതവർക്കിടയിൽ വ്യക്തിപരമായ പ്രശ്നങ്ങളൊന്നും സൃഷ്ടിച്ചില്ല. ഒരുപക്ഷെ ആ വൈരുദ്ധ്യങ്ങളാവാം അവർക്കിടയിൽ പ്രണയം പൂവിടീച്ചത്.

Year : 2018
Run Time : 2h 25min

🔻ജൂളിന്റെയും ഹാനിന്റേയും യൂറോപ്യൻ യാത്രക്ക് വ്യക്തമായ കാരണങ്ങൾ ഉണ്ടായിരുന്നു. തന്റെ മെഴ്‌സിഡസ് 303ൽ യാത്ര തുടങ്ങുന്ന ജൂൾ അവിചാരിതമായാണ് ഹാനെ കണ്ടുമുട്ടുന്നത്. ആദ്യം പല ബുദ്ധിമുട്ടുകൾ ഇരുവരും സഹിച്ചെങ്കിലും ആ ക്യാമ്പെർ വാൻ അവർക്കായി തണൽ വിരിക്കുകയായിരുന്നു. വെറുമൊരു യൂറോപ്യൻ യാത്ര മാത്രമായിരുന്നില്ല അത്. പുതിയൊരു ആത്മബന്ധത്തിലേക്കുള്ള ഉള്ളഴിഞ്ഞ യാത്ര കൂടിയായിരുന്നു.

🔻ഒരു ഷെല്ലിനകത്ത് സ്വയം ഒളിച്ചിരിക്കുന്ന രണ്ട് ന്യൂക്ലിയസുകൾ പോലെയായിരുന്നു ഇരുവരും. തങ്ങളിലേക്ക് മാത്രം ഒതുങ്ങി ജീവിക്കാൻ ആഗ്രഹിക്കുന്ന രണ്ടുപേർ. എന്നാൽ ഒരു പോയിന്റിൽ ഇരുവരും തണലേകുമെന്ന് അവർ ചിന്തിച്ചുപോലുമുണ്ടാവില്ല. തങ്ങളുടെ വായിൽ വരുന്ന പോയിന്റുകളെല്ലാം കണക്റ്റ് ചെയ്ത് ചെയ്ത് ഒടുവിൽ സെക്സിലേക്കും പ്രണയത്തിലേക്കും അവരുടെ ചർച്ച എത്തി നിൽക്കുമ്പോൾ ഇരുവരുടെയും മനസ്സിൽ താനേ പ്രണയം പൂവിട്ടിരുന്നു. അത്ര ശക്തമായിരുന്നു അവരുടെ Bonding.

🔻രണ്ടര മണിക്കൂർ മനോഹരമായ ഭൂപ്രദേശങ്ങളിലൂടെയും ശക്തമായ സംഭാഷണങ്ങളിലൂടെയുമുള്ള യാത്രയാണ് 303. ഓരോ നിമിഷം കഴിയുന്തോറും പ്രണയത്തിന്റെ അളവ് ക്രമാതീതമായി വർധിച്ചു വരുമ്പോൾ ഒരു പുഞ്ചിരി നമ്മിലും വിടരും. ഇരുവരും മറ്റൊരാളുടെ ശ്രദ്ധയിൽ പെടാതെയുള്ള നോട്ടങ്ങളിലൂടെ സന്തോഷം കൈവരിക്കുമ്പോൾ കണ്ടിരിക്കുന്നവർക്ക് ഒരിക്കലും നിർവ്വികാരമായി നിലകൊള്ളാനാവില്ല. നമുക്കും ഒരു ഇണ വേണമെന്ന തോന്നൽ താനേ സൃഷ്ടിക്കപ്പെടും.

🔻Emde, Anton എന്നിവരുടെ പ്രകടനങ്ങൾ ഗംഭീരമായിരുന്നു. ഇരുവരുടെയും ബോഡി ലാങ്ക്വേജിലും സംസാരശൈലിയിലും സ്വാഭാവികത നിറഞ്ഞ് നിൽക്കുന്നുണ്ട്. അച്ഛനെ കണ്ട് മടങ്ങുമ്പോഴുള്ള ഹാൻറെ കണ്ണുകൾ, ബീച്ചിൽ വെച്ചുള്ള ജൂളിന്റെ നോട്ടം തുടങ്ങി ഒട്ടനവധി രംഗങ്ങൾ ഇരുവരും മനോഹരമാക്കിയിട്ടുണ്ട്.

🔻Sex, Love എന്നീ വിഷയങ്ങൾ കൈകാര്യം ചെയ്യുമ്പോൾ ചില ഡയലോഗുകളുണ്ട്. ഒരുപക്ഷെ അവരുടെ റിലേഷന്റെ തന്നെ ശ്വാസവും താളവുമാകുന്നുണ്ട് ആ രംഗങ്ങൾ. സംഭാഷണകേന്ദ്രീകൃതമായ സിനിമകൾ കൂടുതലും കൈകാര്യം ചെയ്യുന്നത് സംവിധായകന്റെ വ്യൂപോയിന്റുകളാണ്. ഇവിടെയും ക്യാപിറ്റലിസം, കമ്മ്യൂണിസം, ഡാർവിന്റെ എവല്യൂഷൻ തിയറി തുടങ്ങി ഒട്ടനവധി വിഷയങ്ങൾ കൈകാര്യം ചെയ്യുന്നുണ്ട്. ഇടയ്ക്കിടെ വരുന്ന ഗാനങ്ങൾ രംഗങ്ങളുടെ വൈകാരികതലം ഉയർത്തുമ്പോൾ ചുരുക്കം ചില സന്ദർഭങ്ങൾ ക്ലിഷേ ആയി തോന്നുന്നുണ്ട്.

🔻ＦＩＮＡＬ ＶＥＲＤＩＣＴ🔻

ഒരു സ്ലോ പോയിസൺ എന്ന് വിശേഷിപ്പിക്കാവുന്ന അതിമനോഹരമായ ഒരു യാത്രയാണ് 303. യൂറോപ്പിന്റെ പച്ചപ്പും മാനുഷിക വികാരങ്ങളും ഒരുപോലെ കൈകാര്യം ചെയ്യുന്ന, പ്രണയം നിറഞ്ഞുനിൽക്കുന്ന ചിത്രം. പതിഞ്ഞ താളത്തിലാണ് ചിത്രത്തിന്റെ സഞ്ചാരം. അതുകൊണ്ട് തന്നെ അത്തരം സിനിമകൾ ഇഷ്ടപ്പെടുന്നവർക്ക് മനസ്സ് നിറക്കുന്ന അനുഭൂതി സമ്മാനിക്കും പ്രണയാതുരമായ ഈ യാത്ര.

ＡＢ ＲＡＴＥＳ ★★★½