Abeed Azad

🔻വളരെ ത്രില്ലിങ്ങ് ആയ ഇൻവെസ്റ്റിഗേഷനിലേക്ക് ഇന്ത്യൻ മിത്തോളജിയെ ഗംഭീരമായി ലയിപ്പിച്ചിരിക്കുകയാണ് അസുർ എന്ന സീരീസ്. സാധാരണ കണ്ടുവരുന്ന ബൈബിൾ കില്ലേഴ്‌സിനേക്കാൾ നമ്മുടെ ആസ്വാദനത്തെ മിത്തോളജി സ്വാധീനിക്കുന്നുണ്ട്. സംസ്കൃത വചനങ്ങളും അത് പേറുന്ന അർത്ഥതലങ്ങളുമൊക്കെ വ്യത്യസ്തമായ രീതിയിൽ ഉപയോഗിച്ചിടത്താണ് അസുർ ഇന്ത്യൻ സീരീസുകളിലെ തന്നെ നാഴികക്കല്ലായി മാറുന്നത്.

Year : 2020
Episode : 8
Run Time : 40-60 min

🔻തന്റെ ബേക്കറിയിൽ ജോലിയിൽ ഏർപ്പെട്ടിരുന്ന ഒരു സ്ത്രീ അതിക്രൂരമായി കൊല്ലപ്പെടുന്നിടത്താണ് കഥ തുടങ്ങുന്നത്. വികലമാക്കപ്പെട്ടു ആ മൃതദേഹം പോസ്റ്റ്മാർട്ടം ചെയ്ത DJ ആ Modus operandiയെ മറ്റ് രണ്ട് കൊലപാതകങ്ങളുമായി ചേർത്തുവെക്കുന്നു. അതൊരു തുടക്കം മാത്രമായിരുന്നു. പല ലൊക്കേഷനുകളിലായി, പല കോർഡിനേറ്റുകളിലായി നടക്കപെടുന്ന സീരിയൽ കില്ലിങ്ങുകളുടെ തുടക്കം.

ആ കൊലപാതകങ്ങളിൽ മറ്റൊരാളുടെ പങ്കാളിത്തം ശ്രദ്ധേയമായിരുന്നു. ഓരോ കൊലപാതകങ്ങൾ നടക്കുമ്പോഴും ആ കോർഡിനേറ്റുകൾ മുൻ CBI ഓഫീസറായിരുന്ന നിഖിലിന്റെ ഫോണിലേക്ക് മെസേജായി വന്നുകൊണ്ടിരുന്നു. തുടർന്ന് അന്വേഷണത്തിൽ അദ്ദേഹത്തിനും പങ്കാളിയാവേണ്ടി വരുന്നു. പിന്നീട് അത്യന്തം ഉദ്വേഗജനകമായ മുഹൂർത്തങ്ങളാണ് നമ്മെ കാത്തിരിക്കുന്നത്.

🔻ഇന്ത്യൻ സീരീസുകളിൽ ശ്രദ്ധേയമായിരുന്നു Sacred Gamesഉം Breatheഉം. രണ്ടും ഒരുപാട് പ്രേക്ഷകശ്രദ്ധയും പിടിച്ചുപറ്റി. അതിനോട് കിടപിടിക്കത്തക്ക നിലവാരമുള്ള ഗംഭീര ത്രില്ലറാണ് Asur. എന്നാൽ പ്രേക്ഷകരുടെ ശ്രദ്ധ വേഗമെത്തുന്ന പ്ലാറ്റ്ഫോമിൽ റിലീസ് ചെയ്യാനായില്ല എന്നതാണ് സീരീസിന് പിണഞ്ഞ അബദ്ധം. അതൊഴിച്ച് നിർത്തിയാൽ മികച്ച തിരക്കഥയും അതിനൊത്ത സംവിധായകമികവും ദർശിക്കാവുന്ന മികച്ച സൃഷ്ടി തന്നെയാണ് അസുർ. കഥയിലെന്ന പോലെ അവതരണത്തിലും പ്രത്യേകതകൾ ഏറെയാണ്. എല്ലാ എപ്പിസോഡുകളുടെയും ആദ്യ രംഗവും അവസാനരംഗവും കഥയുടെയും കഥാപാത്രങ്ങളുടെയും വളർച്ചക്ക് സഹായകമാവുന്നുണ്ട്. ഒപ്പം ക്ലിഫ്‌ഹാങ്ങറുകളുടെ നീണ്ട നിരയും കാണാം. അവയുടെയൊക്കെയും ആസ്വാദനം വർദ്ധിപ്പിക്കുന്ന തലത്തിലാണ് പശ്ചാത്തലസംഗീതവും ക്യാമറവർക്കുകളും മികവ് പുലർത്തുന്നത്.

🔻Barun Sobtiയെ പറ്റി പറയാതിരിക്കാൻ കഴിയില്ല. പല വൈകാരികതലങ്ങളിലൂടെ സഞ്ചരിക്കുന്ന നിഖിലിന്റെ കഥാപാത്രത്തെ അതിഗംഭീരമാക്കിയിട്ടുണ്ട് Barun. സീരീസിൽ ഇമോഷണലി ഏറ്റവും ഇഷ്ടം തോന്നിയ കഥാപാത്രവും നിഖിലിന്റേതാണ്. അർഷദ് വർസിയും തന്റെ കഥാപാത്രത്തെ ഭംഗിയാക്കിയിട്ടുണ്ട്. ഇരുവരും മത്സരിച്ചഭിനയിക്കുകയായിരുന്നു എന്ന് തന്നെ പറയാം.

🔻ＦＩＮＡＬ ＶＥＲＤＩＣＴ🔻

ഇതുവരെ കണ്ട പരിമിതമായ ഇന്ത്യൻ സീരീസുകളിൽ ഏറ്റവും പ്രിയപ്പെട്ടതായി മാറിക്കഴിഞ്ഞു അസുർ. കൂടുതൽ പറഞ്ഞ് ഫ്രെഷ്നെസ്സ് നഷ്ടപ്പെടുത്തുന്നില്ല. Must Watch label നൽകി ഈ കുറിപ്പ് അവസാനിപ്പിക്കുന്നതാവും ഉത്തമം.

ＡＢ ＲＡＴＥＳ ★★★★☆

സീരീസ് ടെലിഗ്രാം ചാനലിൽ ലഭ്യമാണ്. Abi Suggests

Year : 2019
Run Time : 2h 14min

🔻വരുണും ദീപ്തിയും ഏഴ് വർഷമായി കുട്ടികൾക്കായി ട്രൈ ചെയ്തുകൊണ്ടിരിക്കുകയാണ്. തങ്ങളുടെ കയ്യിലുള്ള ട്രൈ മുഴുവൻ സമർപ്പിച്ച ശേഷവും അത്ഭുതങ്ങളൊന്നും സംഭവിക്കാത്തത് കൊണ്ട് അടുത്ത സ്റ്റെപ്പായ IVFനെക്കുറിച്ച് അവർ ചിന്തിക്കുന്നു. അതിനായി ഡോക്ടർ ജോഷിയുടെ ലാബിൽ അവർ എത്തിച്ചേരുന്നു. സന്തോഷത്തിന്റെയും പ്രതീക്ഷയുടെയും ദിവസങ്ങൾ അവരുടെ ജീവിതത്തിലൂടെ കടന്ന് പോവുന്ന സമയത്താണ് ജോഷിയുടെ ഒരു കോൾ അവരെത്തേടി വന്നത്. വേഗം ലാബിലേക്ക് വരണം എന്നായിരുന്നു ആഞ്ജ. അതോടെ അവരുടെ പ്രതീക്ഷകൾ തകിടം മറിയുകയാണ്.

🔻അക്ഷയ് കുമാറിന്റെയും കരീനയുടെയും കോമ്പിനേഷൻ സീനുകളിലെ വൺ ലൈനറുകളിൽ നിന്നായിരുന്നു ചിരിയുടെ തുടക്കം. ആ കൂട്ടത്തിലേക്ക് ദിൽജിത്തും കിയാറയും കൂടി ചേർന്നപ്പോൾ ഈയടുത്ത് കണ്ടതിൽ ഏറെ ചിരിപ്പിച്ച ബോളിവുഡ് മൂവിയായി Good Newwz. കഥയിൽ പുതുമകൾ യാതൊന്നും പ്രതീക്ഷിക്കാത്തത് കൊണ്ട് തന്നെ അതിൽ വന്ന കോമഡികൾ നന്നായി ആസ്വദിക്കാനായി. സിറ്റുവേഷൻ കോമഡികൾ ആവോളമുണ്ടായിരുന്നു പിടിച്ചിരുത്താൻ. ഒരു രംഗത്തിലെ വെറുപ്പിക്കൽ ഒഴികെ ബാക്കിയെല്ലാം നന്നെ ബോധിക്കുകയും ചെയ്തു.

🔻കഥയിൽ പുതുമയും മറ്റും പ്രതീക്ഷിക്കാതെ entertainment എന്ന ഘടകം മാത്രമാണ് തേടുന്നതെങ്കിൽ ഗുഡ് ന്യൂസ് നല്ലൊരു ചോയ്‌സ് തന്നെയാണ്. അവസാനരംഗങ്ങളിൽ അൽപ്പം മെലോഡ്രാമയുണ്ടെങ്കിൽ കൂടി അവയൊന്നും മടുപ്പിക്കാതെ കൈകാര്യം ചെയ്തിട്ടുണ്ട്. ടൈം പാസ്സ് ഫ്ലിക്ക് എന്ന ലേബൽ എന്തുകൊണ്ടും ചേരും ഈ ചിത്രത്തിന്.

ＡＢ ＲＡＴＥＳ ★★★☆☆

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

Year : 2019
Run Time : 2h 6min

🔻പതിവ് കാർത്തിക് ആര്യൻ സിനിമ പോലെ തന്നെ മറ്റൊരു ചിത്രം. പുതുമയില്ലാത്ത കഥയാണെങ്കിലും ആവശ്യത്തിന് കോമഡി നമ്പറുകൾ ഭംഗിയായി കോർത്തിണക്കിയ നല്ലൊരു എന്റർടൈനർ ആണ് Pati Patni Aur Woh. കാർത്തിക്കിന് പതിവ് മാനറിസവും നെടുനീളൻ ഡയലോഗുകളും കൊണ്ട് തകർക്കാൻ സ്‌പേസ് ഉള്ളപ്പോഴും ശ്രദ്ധ നേടുന്നത് അപർശക്തിയുടെ ഫഹീം റിസ്‌വി എന്ന കഥാപാത്രമാണ്. പുള്ളിയെ സ്‌ക്രീനിൽ കണ്ടാൽ ചിരി ഗ്യാരന്റി എന്ന കണക്കെയാണ് സിനിമയുടെ പോക്ക്. കൺഫ്യൂഷൻ കോമഡി നന്നായി ചിരിക്കാനുള്ള വക നൽകുന്നുണ്ട്.

🔻നായികമാരായ ഭൂമിയെയും അനന്യയെയും അപാര ക്യൂട്ടിനെസ്സോടെ സിനിമയിൽ കാണാം. ഇരുവരുടെയും റോളുകൾ ഒട്ടും വെല്ലുവിളി ഉയർത്തുന്നതല്ലെങ്കിലും സംഗതി കളറായി. ഭൂമിയുടെയും കാർത്തികിന്റെയും ഇന്ററാക്ഷൻ സീനുകൾ രസകരമായിട്ടുണ്ട്. ആ രംഗങ്ങളിലെ ഡയലോഗുകളും. ഒടുക്കം ഊഹിക്കാവുന്ന സിമ്പിളായ ഒരു ഉപസംഹാരത്തിൽ എത്തിച്ചേരുന്നതോടെ ചിത്രം അവസാനിക്കുന്നു.

🔻കാർത്തിക്ക് ആര്യന്റെ luka chuppiയോളം ഇഷ്ടപ്പെട്ടില്ലെങ്കിലും നിരാശ നൽകാത്ത ഒരു എന്റെർറ്റൈനെർ ആണ് ഈ ചിത്രം. കഥയൊന്നും വകവെക്കാതെ നേരമ്പോക്ക് മാത്രമാണ് ഉദ്ദേശമെങ്കിൽ കുറെ ചിരിക്കാൻ വക നൽകുന്ന തൃപ്തികരമായ ടൈംപാസ്സ് ഫ്ലിക്ക്.

ＡＢ ＲＡＴＥＳ ★★½

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻പോലീസിനെയും നിയമവ്യവസ്ഥയെയും വെല്ലുവിളിക്കുന്ന, വളരെ പൈശാചികവും  ഈഗോയിസ്റ്റിക്കുമായ mindset ഉള്ള ഒരു വില്ലനെ നേരിടേണ്ടി വരികയാണ് SP ശിവാനി റോയിക്ക്. പെൺകുട്ടികളെ തട്ടിക്കൊണ്ട് പോവുകയും ക്രൂരവും മൃഗീയവുമായ രീതിയിൽ കൊലപ്പെടുത്തുകയും ചെയ്യുന്ന സൈക്കോ. കുത്തനെ കൂടിക്കൊണ്ടിരിക്കുന്ന ക്രൈം റേറ്റിന് ആക്കം കൂട്ടാതിരിക്കാൻ ആ കൊലയാളിയെ കണ്ടെത്തുകയെന്നതാണ് ഒരേയൊരു പോംവഴി.

Year : 2019
Run Time : 1h 43min

🔻ഒരു സസ്പെൻസ് ത്രില്ലറല്ല മർദാനി 2. ആദ്യ രംഗം തന്നെ വില്ലനെ കാണിക്കുകയും തുടർന്ന് കേന്ദ്രകഥാപാത്രങ്ങൾ തമ്മിലുള്ള ക്യാറ്റ് & മൗസ് ഗെയിമുമാണ് നമുക്കായി കാത്തിരിക്കുന്നത്. അങ്ങനെയൊരു പ്ലോട്ടിൽ വരാവുന്ന ക്ലിഷേകൾ പലതും ലൈവായി നിലനിൽക്കുന്നതും അവതരണത്തിലെ old school ശൈലി ആസ്വാദനത്തെ ഒരൽപം പിന്നോട്ടടിക്കുന്നതും സിനിമയിൽ പോരായ്‌മ തന്നെയാണ്. എന്നാൽ വില്ലനായി വന്ന Vishal Jethwaയുടെ ഗംഭീര പ്രകടനം നമ്മെ വിസ്മയിപ്പിക്കും. ഒപ്പം ചിത്രം മുന്നോട്ട് വെക്കുന്ന ആശയങ്ങളും gender equality, സ്ത്രീസുരക്ഷ, ഇന്ത്യയിലെ ക്രൈം റേറ്റ് തുടങ്ങിയ വിഷയങ്ങളിൽ  സൊസൈറ്റിയുമായുള്ള കലഹങ്ങളും എല്ലാ കാലഘട്ടത്തിലും പ്രസക്തിയാർജിക്കുന്ന ഒന്നാണ്. പ്ലോട്ടിനോട് ചേർന്ന് നിൽക്കാത്ത ഒറ്റ രംഗം പോലും ഒന്നേ മുക്കാൽ മണിക്കൂർ മാത്രം ദൈർഖ്യമുള്ള ചിത്രത്തിൽ കാണിച്ച് തരാനാവില്ല. അത്ര crisp യും വെടിപ്പായും ത്രില്ലർ ഒരുക്കുന്നതിൽ സംവിധായകൻ വിജയിച്ചിട്ടുണ്ട്. ഒപ്പം റാണി മുഖർജിയും മികച്ച പ്രകടനം കാഴ്ചവെച്ചിട്ടുണ്ട്.

🔻ത്രില്ലർ പ്രേമികൾക്ക് തീർച്ചയായും ഒരു തവണ കാണാനുള്ള വക മർദാനി 2 ഒരുക്കിവെച്ചിട്ടുണ്ട്. പോരായ്മകൾ ഒരുപാടുണ്ടെങ്കിലും  ചിത്രം കൈകാര്യം ചെയ്യുന്ന വിഷയത്തിന്റെ തീവ്രത കൊണ്ട് അവയൊക്കെയും മറന്ന് കളയാൻ സാധിക്കും. ഫലമോ അത്യാവശ്യം ആസ്വദിച്ച് കാണാവുന്ന ഒരു ത്രില്ലറും.

ＡＢ ＲＡＴＥＳ ★★★½

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

Year : 2019
Run Time : 2h 13min

🔻വീണ്ടും ചിന്തിപ്പിക്കുന്ന ഒരു കഥയുമായാണ് ആയുഷ്മാൻറെ വരവ്. കരിയർ ഗ്രാഫ് മുകളിലേക്ക് മാത്രം ഉയർത്തുന്ന ഘട്ടത്തിൽ ക്വാളിറ്റിയുടെ കാര്യത്തിൽ Dream Girl അൽപ്പം പതർച്ച നൽകിയെങ്കിലും Balaയിലൂടെ വീണ്ടും ട്രാക്കിലാവാൻ ആയുഷ്മാന് സാധിച്ചിട്ടുണ്ട്. തന്റെ കഷണ്ടിത്തല ഒരു ബലഹീനതയായി കൊണ്ടുനടക്കുന്ന ബാലയെന്ന ചെറുപ്പക്കാരന്റെ കഥയാണ് ചിത്രം കൈകാര്യം ചെയ്യുന്നത്. ബാലയുടെ കഥ നമ്മെ ചിന്തിപ്പിക്കുകയും ഒരുപാട് ചിരിപ്പിക്കുകയും ചെയ്യുന്നിടത്താണ് പ്രേക്ഷകനെ കയ്യിലെടുക്കുന്നതിൽ ചിത്രം വിജയിക്കുന്നത്.

🔻ആയുഷ്മാൻ ഖുറാനെയും യാമി ഗൗതമും ഭൂമി പട്നേക്കറും ഒരുമിച്ച് തകർത്തഭിനയിച്ച ചിത്രമാണ് Bala. സൗരഭ് ശുക്ലയടക്കമുള്ള ബാക്കിയുള്ള അഭിനേതാക്കളും ഇവരോടൊപ്പം തന്നെ നില്കുനുണ്ട്. സർക്കാസ്റ്റിക്കായി അവതരിപ്പിച്ച് പ്രേക്ഷകരെ  entertain ചെയ്ത് മുന്നേറുമ്പോഴും സിനിമ മുന്നോട്ട് വെക്കുന്ന ആശയത്തിൽ നിന്ന് തെല്ലും വ്യതിചലിക്കുന്നില്ല. ഭൂമിയുടെ റോൾ അതിനായി നല്ല രീതിയിൽ ഉപയോഗിച്ചിട്ടുണ്ട്. പക്ഷെ കരി വാരി തേച്ചത് പോലെയുള്ള മേക്കപ്പ് തീർത്തും അലോസരപ്പെടുത്തുന്നതായിരുന്നു. സിനിമയിൽ തോന്നിയ ആകെയൊരു പോരായ്മയും അത് തന്നെ.

🔻എല്ലാവരിലും ഒരു പോസിറ്റീവ് ഫീൽ നൽകുവാനും കോൺഫിഡൻസ് ലെവൽ വർദ്ധിപ്പിക്കാനും ചിത്രത്തിനായിട്ടുണ്ട്. ആയുഷ്മാൻറെ ബോഡി ലാംഗ്വേജ് അടക്കം ചിരിയുടെ പൂരം തീർക്കുമ്പോ പ്രേക്ഷകനെന്ന നിലയിൽ എന്നെ ഒരൽപം ചിന്തിപ്പിക്കുവാനും സിനിമക്ക് സാധിച്ചിട്ടുണ്ടെങ്കിൽ ബാല ഒരു വിജയം തന്നെയാണ്. ധൈര്യമായി സമീപിക്കാവുന്ന ഒരു entertainer എന്ന നിലയിലും നല്ലൊരു ചിത്രമെന്ന നിലയിലും Bala is a good flick.

ＡＢ ＲＡＴＥＳ ★★★½

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻രാത്രിയുടെ ശാന്തതയിൽ ആ നഗരം മുഴുവൻ അൽഫാസിന്റെ സ്വരത്തിനായി ചെവികകോർക്കും. അവന്റെ ഓരോ വാക്കിലും സാന്ത്വനം കണ്ടെത്തും. നല്ല നാളെകൾക്കായുള്ള പരിശ്രമത്തിനായി ഊർജ്ജം കണ്ടെത്തും. കഷ്ടതകളിൽ പോലും ആ വാക്കുകൾ ആശ്വാസമാവും. ആ നഗരത്തിൽ ഒരുവളായി അർച്ചനയും ഉണ്ടായിരുന്നു. അൽഫാസിന്റെ വാക്കുകൾക്ക് എന്നുമൊരു കേൾവിക്കാരിയായി..

Year : 2018
Run Time : 1h 56 min

🔻പ്രത്യേകിച്ച് ഒരു ചട്ടക്കൂടിൽ പണിതെടുത്ത തിരക്കഥയല്ല ചിത്രത്തിന്റേത്. ഏറെ ലളിതമായി എന്നാൽ ഹൃദ്യമായി നമ്മോട് സംവദിക്കുന്ന സംഭാഷണശകലങ്ങളിൽ നിന്ന് രൂപപ്പെടുന്ന കഥാപാത്രങ്ങൾ, അവരുടെ സ്വഭാവസവിശേഷതകൾ, സ്വാഭാവികമായി ഉടലെടുക്കുന്ന ഭാവപരിസരങ്ങൾ തുടങ്ങി അതിഭാവുകത്വങ്ങളോ ഏച്ചുകെട്ടലുകളോ എങ്ങും പ്രതിഫലിക്കാതെയുള്ള കഥ. ഒരുപക്ഷെ രണ്ട് മനസ്സുകൾ താങ്ങും തണലുമായി രൂപാന്തരപ്പെടുന്നതിന് മനോഹരമായ ദൃശ്യഭാഷ്യയൊരുക്കിയ സംവിധായകന്റെ മിടുക്ക് തന്നെയാവാം സിനിമയെ ഇത്ര പ്രിയപ്പെട്ടതാക്കിയത്. അത്ര പക്വമായ ഭാഷയിലാണ് കഥാപാത്രനിർമ്മിതിയും അവർ തമ്മിലുള്ള ആത്മബന്ധവും വരച്ചുകാട്ടുന്നത്. ഓരോ സംഭാഷണങ്ങളിലും നമുക്ക് കഥാപാത്രത്തോട് വല്ലാത്തൊരു അടുപ്പം തോന്നുംവിധം ആത്മാർത്ഥത പ്രതിഫലിക്കും. സൂക്ഷ്മമായ തിരക്കഥാപാടവം നമുക്ക് അനുഭവിച്ചറിയാം ഓരോ രംഗങ്ങളിലും.

🔻ഗീതാഞ്ജലി താപ്പ എന്ന നടിയുടെ ചിത്രം ആദ്യമായാണ് കാണുന്നത്. സ്‌ക്രീൻ നിറഞ്ഞുനിൽക്കുന്ന മിന്നുന്ന പ്രകടനം കൊണ്ട് മനസ്സ് കീഴടക്കി ആ സുന്ദരി. എന്തൊരു ഭംഗിയാണ് ഓരോ ഭാവങ്ങൾക്കും. ഓരോ ചിരിയും വല്ലാത്ത പ്രസരിപ്പ് സമ്മാനിക്കുന്നുണ്ട്. ഒപ്പം സെയിൻ ഖാനെയും ഈ അവസരത്തിൽ ഓർക്കുന്നു. ചില ചലനങ്ങൾ പോലും അദ്ദേഹത്തിന്റെ കഥാപാത്രത്തെ വെളിവാക്കുന്നുണ്ട്. തന്റെ ഭൂതകാലത്തെ പരാമർശിക്കുന്ന രംഗങ്ങളിലെ പ്രകടനം ഗംഭീരം. ഒരു തെന്നൽ പോലെ തഴുകിത്തലോടുന്ന പശ്ചാത്തലസംഗീതവും കണ്ണിന് കുളിർമയേകുന്ന കാഴ്ച്ചകളും സിനിമയെ കൂടുതൽ മനോഹരമാക്കുന്നു.

🔻ＦＩＮＡＬ ＶＥＲＤＩＣＴ🔻

ജീവിതത്തിൽ ഒരൽപം ബുദ്ധിമുട്ട് അനുഭവിച്ച ഘട്ടത്തിലാണ് ഈ ചിത്രം കാണാനിടയായത്. കണ്ട് കഴിഞ്ഞപ്പോൾ എന്തെന്നില്ലാത്ത ആശ്വാസം എനിക്കനുഭവപ്പെട്ടിരുന്നു. വ്യക്തിപരമായി അത്തരമൊരു അനുഭവമാണ് അൽഫാസും അർച്ചനയും സമ്മാനിച്ചത്. സ്വയം വിലയിരുത്തുക.

ＡＢ ＲＡＴＥＳ ★★★½

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻ഈയൊരു കാലഘട്ടത്തിൽ സ്വന്തം മക്കളുടെ ഭാവിയെക്കാളേറെ സമൂഹത്തിൽ ഡിഗ്നിറ്റി കാത്തുസൂക്ഷിക്കാനായി വമ്പൻ സ്‌കൂളുകളും ഇൻസ്റ്റിട്യൂഷനുകളും തേടിപ്പോവുന്ന മാതാപിതാക്കളെയാണ് ഏറെയും കാണാൻ സാധിക്കുക. അനുഭവത്തിന്റെ വെളിച്ചത്തിൽ തന്നെ പറയാൻ ഏറെ ഉദാഹരണങ്ങൾ ഉണ്ട്. സർക്കാർ സ്‌കൂളുകൾ മികച്ച നിലവാരവും പദ്ധതികളും വിദ്യാർത്ഥികൾക്കായി ഒരുക്കിവെക്കുമ്പോഴും അവയൊക്കെയും തഴഞ്ഞ് CBSE, ICSE സ്‌കൂളുകൾ തേടിപ്പോവുന്ന ഒരുപാട് കുടുംബങ്ങളെ അറിയാം. അതൊക്കെയും തെറ്റാണെന്നല്ല, പക്ഷെ അതൊരു ഷോ-ഓഫ് എന്ന നിലയിലേക്ക് പലപ്പോഴും ഉയരുന്നത് കണ്ടിട്ടുണ്ട്. അവർക്കുള്ള കിടിലൻ മറുപടിയാണ് ഹിന്ദി മീഡിയം.

Year : 2017
Run Time : 2h 12min

🔻മേൽപറഞ്ഞത് പോലെയൊരു ദമ്പതികളാണ് Mr & Mrs Batra. തന്റെ മകൾക്കായി മുന്തിയ ഇനം സ്‌കൂൾ തന്നെ തെരഞ്ഞെടുത്തു. എന്നാൽ അവിടെ അഡ്മിഷൻ കിട്ടുകയെന്നത് അത്ര എളുപ്പമുള്ള കാര്യമല്ല. കടമ്പകൾ ഏറെയുണ്ട് കടക്കാൻ. അതിനായി എന്തും ചെയ്യാൻ ഇവർക്കൊട്ട് മടിയില്ല താനും. മകളുടെ ഭാവിയും അവരുടെ ഡിഗ്നിറ്റിയും കുടിയിരിക്കുന്നത് അതിലാണല്ലോ. തുടർന്നുള്ള രസകരമായ സംഭവങ്ങളാണ് നമുക്ക് കാണാനാവുക.

🔻തുടക്കം മുതൽ ഒടുക്കം വരെ മുഴുനീള കോമഡി ചിത്രമാണ് ഹിന്ദി മീഡിയം. എന്നാൽ അതിലൂടെ സംവിധായകൻ പറയാൻ ഉദ്ദേശിച്ച കാര്യങ്ങളൊക്കെ പറഞ്ഞിട്ടുണ്ട് താനും. ഒരുനിമിഷം പോലും നമുക്ക് ബോറടിക്ക് വക നൽകുന്നില്ല. പകരം എപ്പോൾ വേണമെങ്കിലും പൊട്ടിച്ചിരിപ്പിക്കുന്ന നർമ്മരംഗങ്ങൾക്കായി കരുതിയിരിക്കുകയും ചെയ്യാം. നല്ല മെസേജുകളും ചിത്രം കൈമാറുന്നുണ്ട്. ഒടുവിൽ നല്ലൊരു ക്ലൈമാക്സ് കൂടിയാവുമ്പോൾ തന്റെ കർത്തവ്യം പൂർണ്ണതയിൽ എത്തിക്കുന്നുണ്ട് സംവിധായകൻ.

🔻കോമഡി അനായാസമായി കൈകാര്യം ചെയ്യുന്ന നടനാണ് ഇർഫാൻ ഖാനെന്ന് പ്രത്യേകം പറയേണ്ടതില്ലല്ലോ. എന്നാൽ ഇവിടെ അദ്ദേഹത്തെയും കടത്തിവെട്ടിയിരിക്കുന്നത് Mrs Batraയായി അഭിനയിച്ച Saba Qamarന്റെ പ്രകടനമാണ്. കിടിലൻ പ്രകടനം എന്നെ പറയാനുള്ളൂ. അത്ര ഗംഭീരമായിരുന്നു ആ കഥാപാത്രം. ഒപ്പം ഇർഫാൻ ഖാൻ കൂടി ചേരുമ്പോൾ ചിരിയുടെ പെരുന്നാൾ തന്നെയാണ് കാത്തിരിക്കുന്നത്. അവസാന ഭാഗങ്ങളിലെ ഇർഫാന്റെ പ്രകടനം ഏറെ ഇഷ്ടപ്പെട്ടു.

🔻ＦＩＮＡＬ ＶＥＲＤＩＣＴ🔻

പ്രേക്ഷകനെ അത്യന്തം രസിപ്പിക്കുകയും ചിന്തിപ്പിക്കുകയും ചെയ്യുന്ന ചിത്രമാണ് ഹിന്ദി മീഡിയം. ഒരിക്കൽ പോലും ആസ്വാദനം താഴേക്ക് പോവുന്നില്ല എന്ന് മാത്രമല്ല ഓരോ രംഗങ്ങൾ കഴിയുന്തോറും കാര്യങ്ങൾ കൂടുതൽ രസകരമാവുന്നുമുണ്ട്. അത്തരത്തിൽ മുഴുനീള കോമഡി ചിത്രമാണ് നമ്മെ കാത്തിരിക്കുന്നത്. കണ്ടിട്ടില്ലാത്തവർ തീർച്ചയായും കാണേണ്ട ഒന്ന് തന്നെ.

ＡＢ ＲＡＴＥＳ ★★★½

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻അന്ന് രാത്രി ആ വീട്ടിൽ വമ്പൻ ആഘോഷങ്ങൾ അരങ്ങേറുകയായിരുന്നു. താനും ഭാര്യയും 3 കുട്ടികളുമടങ്ങിയ Barot Family എന്തെന്നില്ലാത്ത സന്തോഷത്തിലും. എന്നാൽ ആ സന്തോഷം മുഴുവൻ തകർക്കാൻ അവർക്കായി കാത്തിരുന്നത് ഒരു തിരോധാനമാണ്. ആ കുടുംബത്തിലെ ഏറ്റവും പ്രിയപ്പെട്ട ഒരാളുടെ തിരോധാനം.

Year : 2019
Run Time : 1h 29min

🔻സിനിമ കണ്ട് കഴിഞ്ഞപ്പോൾ തോന്നിയ കാര്യം എന്തെന്നാൽ കുറച്ചുകൂടി വലിയ ക്യാൻവാസിൽ ഒരുങ്ങേണ്ടിയിരുന്ന ചിത്രമാണ് ഇതെന്നാണ്. മികച്ച് നിൽക്കുന്ന ഒരുപാട് ഫാക്ടറുകൾ സിനിമയിലുടനീളം ഉണ്ടെങ്കിലും ചില പ്രധാന സന്ദർഭങ്ങളിൽ അതിന്റെ തീവ്രത കുറഞ്ഞതായി തോന്നി. സിനിമയിലെ മുഖ്യ വഴിത്തിരിവുകളിൽ ഒന്നിന്റെ അവതരണം തന്നെ അപ്രകാരമാണ് തോന്നിയത്. അത്തരത്തിൽ ചില പോരായ്മകൾ തോന്നിയെങ്കിൽ കൂടി തീർത്തും അപരിചിതമായ, അധികം കണ്ട് ശീലിച്ചിട്ടിലാത്ത, ഡിസ്റ്റർബിങ്ങ് ആയ ഒരനുഭവമാണ് ഈ കുടുംബം സമ്മാനിച്ചത്.

🔻സിനിമയിലെ സൈക്കളോജിക്കൽ എലമെന്റുകൾ അവതരിപ്പിച്ച വിധത്തിലുള്ള പക്വതയാണ് ഏറ്റവും ആകർഷണീയമായി തോന്നിയത്. ഒരു പരിധി കവിഞ്ഞ് അതിഭാവുകത്വം അവിടങ്ങളിൽ കാണാൻ സാധിക്കില്ല.ക്യാരക്ടർ ഡെവലെപ്മെന്റിൽ ഇത്തരം രംഗങ്ങൾ ഭംഗിയായി ഉപയോഗിച്ചിട്ടുണ്ട്. സിനിമ മുന്നിലേക്കിടുന്ന ചോദ്യങ്ങൾക്ക് നാം ഉത്തരം കണ്ടെത്താൻ ശ്രമിക്കുമ്പോൾ നന്നായി കുഴപ്പിക്കുന്നുണ്ട് ഓരോ കഥാപാത്രങ്ങളും. ഒരു നിഗമനത്തിൽ എത്തിച്ചേരാൻ നമ്മെ അനുവദിക്കില്ല. പിന്നീട് ട്വിസ്റ്റ് റിവീൽ ചെയ്തതിന് ശേഷമുള്ള ഭാഗങ്ങളും അങ്ങനെ തന്നെ. ഇനിയെന്താവും എന്ന് നമുക്ക് ഊഹിക്കാൻ സാധിക്കാത്ത വിധം ഭംഗിയായി ആ സന്ദർഭങ്ങൾ കൊണ്ടുപോയിട്ടുണ്ട്. ഒടുവിൽ അവസാനിപ്പിച്ച വിധവും നമ്മെ വല്ലാതെ അലട്ടും. അതൊക്കെയും കണ്ടറിയേണ്ടത് തന്നെ.

🔻കൊച്ച് പയ്യന്റെ ഗംഭീര പ്രകടനം തന്നെയാണ് ചിത്രത്തിന്റെ ഹൈലൈറ്റ്. കൂടുതൽ അതിനെ പറ്റി പറയുന്നില്ല. അനുഭവിച്ചറിയുക ആ കഥാപാത്രം. സ്‌ക്രീനിൽ വന്നുപോയ ഓരോ കഥാപാത്രങ്ങൾക്കും വ്യക്തമായ ക്യാരക്ടർ സ്കെച്ച് നൽകിയിട്ടുണ്ട് സംവിധായകൻ. അതുകൊണ്ട് തന്നെ പ്ലോട്ട് ടൈറ്റ് ആവാൻ ഓരോ കഥാപാത്രങ്ങളും സഹായിച്ചിട്ടുണ്ട്. പെർഫെക്ട് എന്ന് തോന്നിയ ഛായാഗ്രഹണവും പശ്ചാത്തലസംഗീതവും പല സന്ദർഭങ്ങളും മറ്റൊരു തലത്തിലേക്ക് എലവേറ്റ് ചെയ്യുന്നുണ്ട്. ടെക്നിക്കൽ സൈഡുകൾ വളരെയേറെ മികവ് പുലർത്തുന്നുണ്ട്.

🔻ＦＩＮＡＬ ＶＥＲＤＩＣＴ🔻

ഒരു സിനിമ വെബ് റിലീസ് ആവുമ്പോഴുള്ള ബഡ്ജറ്റിന്റെ ചില ഏറ്റക്കുറച്ചിലുകൾ ചില രംഗങ്ങളിൽ അനുഭവപ്പെട്ടതൊഴിച്ചാൽ വളരെ ഇഷ്ടപ്പെട്ട, ഏറെ ആസ്വദിച്ച ഒരു ചിത്രമായി 'Barot House'. കൈകാര്യം ചെയ്യുന്ന വിഷയത്തിന്റെയും അത് അവതരിപ്പിച്ച രീതിയിലെയുമുള്ള പുതുമകൾ മികച്ച അനുഭവം തന്നെ സമ്മാനിക്കുന്നുണ്ട്. ഡാർക്ക് മൂഡിലുള്ള, അൽപ്പം ഡിസ്റ്റർബിങ്ങ് ആയ ചിത്രം നിരാശ നല്കില്ലെന്നുറപ്പ്.

ＡＢ ＲＡＴＥＳ ★★★½

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻ജോലി പോലും ഇല്ലാതെ കഷ്ടപ്പെടുന്ന സമയത്ത് ഫിജിയിലേക്ക് ഒരു ഫ്രീ ഹോളിഡേ ട്രിപ്പ് ഫ്രീയായി അടിച്ച വിവാനും സിയയും അതങ്ങ് തകർക്കാൻ തന്നെ തീരുമാനിച്ചു. മാത്രമല്ല തങ്ങളുടെ വെഡിങ്ങ് ആനിവേഴ്‌സറിയും അവിടെ തന്നെ ആഘോഷിക്കുകയും ചെയ്യാം. അങ്ങനെ ആ സുദിനത്തിൽ അവർക്കൊരു ഫ്രീ ഇൻവിറ്റേഷൻ കിട്ടി. അവിടെയെത്തിയ അവരെ കാത്തിരുന്നത് ഒരു വമ്പൻ ഓഫറായിരുന്നു. 21 കോടി രൂപ. അതിന് അവർക്ക് കടക്കേണ്ട കടമ്പ 8 ചോദ്യങ്ങളും അത്ര തന്നെ ടാസ്ക്കുകളും മാത്രം. And There Begins The Live Game Show 'Table No. 21"

Year : 2013
Run Time : 1h 48min

🔻ഇതേ പേരിലുള്ള ഒരു നോവലിന്റെ അഡാപ്റ്റേഷനാണ് ഈ ചിത്രം. ഒരു റൊമാന്റിക് മൂഡിൽ തുടങ്ങിയ ചിത്രം ചെന്നെത്തിയത് ഒരു സൈക്കോളജിക്കൽ ത്രില്ലറിലേക്കാണ്. നല്ല രീതിയിൽ ക്രിസ്പ് ആയ അവതരണം സിനിമയുടെ പ്ലോട്ടിനെ ടൈറ്റ് ആക്കിയിട്ടുണ്ട്. അതുകൊണ്ട് തന്നെ ഒരു ഫാസ്റ്റ് പേസ്ഡ് ത്രില്ലർ നമുക്ക് ആസ്വദിക്കാം. ഒപ്പം പറയാൻ ശ്രമിച്ച മെസേജുംഅഭിനന്ദനാർഹം തന്നെ. അത് പറഞ്ഞ വിധവും നന്നായി.

🔻തുടക്കം വിവാനെയും സിയയെയും കേന്ദ്രീകരിച്ച ചുരുക്കം ചില രംഗങ്ങൾ ഉണ്ട്. അത് മടുപ്പൊന്നും ഉണ്ടാക്കുന്നില്ലെങ്കിലും ത്രില്ലർ കാണാൻ നിൽക്കുമ്പോൾ ഇതെന്തിന് എന്ന് തോന്നിയിരുന്നു. എന്നാൽ അവയിൽ പല കാര്യങ്ങളും പലയിടത്തായി ഭംഗിയായി ഉപയോഗിച്ചിരിക്കുന്നത് കാണാം. അത്തരത്തിലുള്ള ക്യാരക്ടർ ഡെവലപ്മെന്റ് തിരക്കഥയുടെ ഘടനയ്ക്ക് ഗുണം ചെയ്തിട്ടുണ്ട്. ഒപ്പം രാജീവിന്റെ ഗംഭീര പ്രകടനവും ആ കഥാപാത്രത്തിന്റെ പൂർണ്ണതക്ക് വളരെ ഗുണം ചെയ്തിട്ടുണ്ട്. ചില പോരായ്മകളും ലൂപ്പ് ഹോളുകളും ഇടക്ക് തോന്നിയെങ്കിൽ കൂടി അവയൊന്നും കാഴ്ചക്ക് തടസം ആവുന്നതേ ഇല്ല.

🔻മികവ് പുലർത്തുന്ന ടെക്നിക്കൽ സൈഡും ത്രില്ലിങ് ആയ BGMഉം ചില രംഗങ്ങളിലെ കളർ ടോണും എല്ലാം ചിത്രത്തിന് മിഴിവേകുന്നുണ്ട്. വിഷ്വലി ക്വാളിറ്റി ഉറപ്പ് നൽകുന്ന അവതരണവുമാണ് സിനിമയിലുടനീളം. ചുരുക്കം ചില കഥാപാത്രങ്ങൾ മാത്രമേ ചിത്രത്തിൽ ഉള്ളൂ എങ്കിൽ കൂടി പരേഷ് റാവൽ ഉൾപ്പടെയുള്ള കാസ്റ്റിംഗും നന്നായി തന്നെ തോന്നി.

🔻ＦＩＮＡＬ ＶＥＲＤＩＣＴ🔻

നല്ലൊരു തീമും അതിന്റെ വ്യത്യസ്തമാർന്ന മേക്കിങ്ങും കൊണ്ട് വേറിട്ട അനുഭവമാകുന്നുണ്ട് Table No 21. ഒരു വമ്പൻ സിനിമ പ്രതീക്ഷിക്കാതെ ഈ ചിത്രത്തെ സമീപിച്ചാൽ ഉറപ്പായും നല്ലൊരു ആസ്വാദനം തന്നെ ലഭിച്ചേക്കും. പറയുന്ന കാര്യത്തിന്റെ ഗൗരവം കൊണ്ടും കഥയിലുടനീളം പുലർത്തുന്ന ത്രില്ലർ സ്വഭാവം കൊണ്ടും തൃപ്തി നൽകുന്നുണ്ട് ചിത്രം.

ＡＢ ＲＡＴＥＳ ★★★☆☆

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻കാർത്തിക്ക് ആര്യൻ ചിത്രങ്ങളിൽ കോമഡി ഗ്യാരന്റി ആണ്. അതുകൊണ്ട് തന്നെ എന്റർടൈൻമെന്റിനായും നേരം പോക്കിനായും ധൈര്യമായി കാണാവുന്ന ചിത്രങ്ങളാണ് പുള്ളിയുടേത്. ലുക്കാ ചുപ്പിയും ആ മെന്റാലിറ്റിയിൽ ആണ് കാണാനിരുന്നത്. ഫലമോ കാർത്തിക്കിന്റെ ഇതുവരെ കണ്ടതിൽ ഏറ്റവും ഇഷ്ടപ്പെട്ട ചിത്രമായി.

Year : 2019
Run Time : 2h 6min

🔻ഊഹിക്കാവുന്ന കഥയും കഥാഗതിയുമാണ് ചിത്രത്തിന്റേത്.  പ്രത്യേകിച്ച് ലോജിക്കും ഇല്ല. എന്നാൽ അതിനെ തീരെ മടുപ്പിക്കാതെ നന്നായി നർമ്മത്തിൽ ചാലിച്ച് ഒരൽപം സർക്കാസം കൂടി ചേർത്ത് വെടിപ്പായി അവതരിപ്പിച്ചിരിക്കുന്നിടത്ത് കാഴ്ചയിലുടനീളം രസകരമായ അനുഭവമാകുന്നുണ്ട് ചിത്രം. Culture Protection Partyലൂടെ ആർഷഭാരത സംസ്കാരത്തെയും Live-In റിലേഷനുകളെയും കാണിച്ച വിധമൊക്കെ വളരെ രസകരം. അവയെ അവതരിപ്പിച്ച രീതികളിലും ഒരൽപം ക്രിയേറ്റിവിറ്റി കാണാൻ സാധിക്കും. അത്തരത്തിൽ പ്രേക്ഷകരെ രസിപ്പിക്കുക എന്ന കർത്തവ്യം ഭംഗിയായി നിറവേറ്റുന്നുണ്ട് ലുക്കാ ചുപ്പി.

🔻ചില കഥാപാത്രങ്ങളെ കോമഡിക്ക് വേണ്ടി സൃഷ്ടിച്ചു എന്ന തോന്നൽ ഉണ്ടാക്കാതെ അവരെ കഥയിലുടനീളം ഉപയോഗിക്കഗ്‌സിഗ് പോരുന്നുണ്ട് സംവിധായകൻ. അതുകൊണ്ട് തന്നെ ഒരു കഥാപാത്രം പോലും അനാവശ്യമായി തോന്നില്ല. ഒരു സീനും വേണ്ടായിരുന്നു എന്ന വിചാരവും വരില്ല. വേഗത്തിൽ പോവുന്ന കഥയായത് കൊണ്ട് തന്നെ ബോറടിയും ഇല്ല. കൂടെ താളത്തിന് നല്ല പാട്ടുകളും ഉണ്ട്. ചിലതൊക്കെ എവിടെയോ കേട്ട് മറന്ന ഫീൽ ഉണ്ടാവുമെങ്കിൽ പോലും.

🔻കാർത്തിക്ക് ആര്യന്റെ ഏറ്റവും നല്ല പ്രകടനമായി തോന്നി ചിത്രത്തിലേത്. കൃതിയുമായുള്ള കെമിസ്ട്രികണ്ടിരിക്കാൻ വളരെ എനർജെറ്റിക്ക് ആയി തോന്നും. അതുകൊണ്ട് കാണുന്നവർ ഇപ്പോഴും ആക്റ്റീവ് ആയിരിക്കും. പങ്കജ് ത്രിപാഠിയുടെ റോൾ കിടിലൻ ഐറ്റം തന്നെയായിരുന്നു. പുള്ളി ചിരിപ്പിച്ചതിന് കയ്യും കണക്കുമില്ല. ഒപ്പം കൊച്ച് പയ്യൻ വരെ ഇടക്ക് സ്‌കോർ ചെയ്ത് പോവുന്നുണ്ട്.

🔻ＦＩＮＡＬ ＶＥＲＤＩＣＴ🔻

എന്റർടൈൻമെന്റ് മാത്രമാണ് ലക്ഷ്യമെങ്കിൽ നല്ലൊരു ചോയ്‌സാണ് ലുക്കാ ചുപ്പി. രണ്ട് മണിക്കൂർ സമയം പോവുന്നത് പോലുമറിയാതെ രസിച്ച് കണ്ടിരിക്കാൻ സാധിക്കുന്ന ഐറ്റം. ആവശ്യത്തിന് കോമഡി നമ്പറുകളും നല്ല പാട്ടുകളും രസികൻ കഥാപാത്രങ്ങളുമൊക്കെയായി നല്ലൊരു ടൈം പാസ് ഫ്ലിക്ക്.

ＡＢ ＲＡＴＥＳ ★★★☆☆

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻'നിർഭയ'. ഈ പേരിനെ കുറിച്ച് ഒരാമുഖം വേണമെന്ന് തോന്നുന്നില്ല. 2012ൽ ഒരു  പെൺകുട്ടിയെ 6 പേർ ചേർന്ന് ബസ്സിൽ വെച്ച് ക്രൂരമായ റേപ്പ് ചെയ്ത സംഭവം വൻ വിവാദങ്ങൾക്ക് വഴിവെച്ചിരുന്നു. ഒടുക്കം പെൺകുട്ടി കൊല്ലപ്പെട്ടെങ്കിലും ഡൽഹി പോലീസിന്റെ സമയബന്ധിതമായി ഇടപെടൽ മൂലം പ്രതികളെ പിടികൂടാൻ സാധിച്ചു. ഈ സംഭവത്തിന്റെ ദൃശ്യാവിഷ്കാരമാണ് Netflix പുറത്തിറക്കിയ 7 എപ്പിസോഡുള്ള ഈ സീരീസ്.

Year : 2018
Episode : 7
Run Time : 40min - 1h

🔻നിർഭയ സംഭവത്തെ മുൻനിർത്തി പല പരിപാടികളും ഡോക്യൂമെന്ററികളുമെല്ലാം പുറത്തിറങ്ങിയിരുന്നുവെങ്കിലും അവയിൽ ഭൂരിഭാഗവും ഡൽഹി പോലീസിനെ പാടെ മാറ്റിനിർത്തിക്കൊണ്ടായിരുന്നു. ആദ്യമായി പോലീസ് POVയിൽ കഥ പറയുന്ന സീരീസാണ് Delhi Crime. ഒരുപാട് പോസിറ്റിവുകളും ഒരൽപം നെഗട്ടീവുകളും സീരീസിൽ ഉണ്ട്. എന്നാൽ കാഴ്ചയിൽ തൃപ്തി നൽകുന്നുമുണ്ട് Delhi Crime.

🔻സീരീസിലെ ഏറ്റവും ഇഷ്ടപ്പെട്ട കാര്യം റേപ്പ് എന്ന സംഗതി picturise ചെയ്യാതെ സിമ്പതി പിടിച്ചുപറ്റാൻ ശ്രമിക്കാതിരുന്നതാണ്. പലപ്പോഴും കണ്ടുവരുന്ന ഇത്തരം ചിത്രീകരണങ്ങൾ ഇവിടെയില്ലെന്നുള്ളത് ആശ്വാസമായിരുന്നു. എന്നാൽ അതിനപ്പുറം അസ്വസ്ഥത പകരുന്ന റേപ്പിന്റെ Verbal Statement മനസ്സിനെ വല്ലാതെ അലട്ടി. കുറ്റവാളികളികളോട് കടുത്ത ദേഷ്യം തോന്നും വിധം ഗംഭീരമായാണ് ആ രംഗങ്ങൾ potray ചെയ്തിരിക്കുന്നത്. ഒപ്പം Jai Singhന്റെ statementഉം അതിനൊത്ത് Creepy ഫീൽ നൽകുന്നുണ്ട്.

🔻പോലീസിന്റെ കഴിവിനെ ചോദ്യം ചെയ്യുമ്പോൾ ഫണ്ടിങ്ങിന്റെ കാര്യം പറയുന്ന രംഗങ്ങൾ നന്നായിരുന്നു. ഒരുപക്ഷെ ഇന്ത്യയിൽ പോലീസ് ഫോഴ്സ് നേരിടേണ്ടി വരുന്ന വലിയ പ്രശ്നങ്ങളിൽ ഒന്ന് തന്നെയാണ് അത്. ഒപ്പം റിയലിസ്റ്റികും ഡാർക്കുമായി പല സന്ദർഭങ്ങളും കടന്നുപോവുന്ന വിധം കുറ്റകൃത്യത്തിന്റെ ഗൗരവത്തെ എടുത്ത് കാട്ടുന്നുണ്ട്.

🔻കേന്ദ്രകഥാപാത്രമായ DCP Varthikaയുടെ ഒറ്റയാൾ പോരാട്ടമാവാതെ കൂടെയുള്ളവർക്കും കൃത്യമായ സ്‌പേസ് നൽകിയിട്ടുണ്ടെന്നത് പേസിങ്ങിനെ സഹായിക്കുന്നുണ്ട്. ഒരേസമയം പലയിടങ്ങളിൽ ഓപ്പറേഷൻ നടക്കുന്ന രംഗങ്ങൾ ത്രിൽ ഫാക്ടറിന് സഹായകമാവുന്നുണ്ട്. ഭൂപേന്ദ്ര സിങ്ങ് എന്ന പോലീസ് ഉദ്യോഗസ്ഥന്റെ കഥാപാത്രവും പ്രകടനവും പ്രശംസ അർഹിക്കുന്നുണ്ട്. ഒപ്പം protest അടക്കമുള്ള കാര്യങ്ങൾ കൈകാര്യം ചെയ്ത വിധം ഭംഗിയായി തന്നെ കാട്ടിയിട്ടുണ്ട്. പ്രേക്ഷകർക്ക് ദഹിക്കാവുന്നതിനപ്പുറം സിനിമാറ്റിക്ക് ആക്കിയില്ല കാര്യങ്ങൾ എന്നത് ആസ്വാദനത്തിന് ഗുണം ചെയ്യുന്നുണ്ട്. സീരീസ് മുന്നോട്ട് വെക്കുന്ന തീമിനോട് ഏറ്റവും യോജിച്ച ഛായാഗ്രഹണവും പശ്ചാത്തലസംഗീതവും കളർ ടോണും കൂടി ചേർന്നപ്പോൾ മികച്ച അനുഭവമായി മാറുന്നുണ്ട് പല രംഗങ്ങളും.

🔻പോലീസ് POVയിൽ കഥ പറയുന്നത് കൊണ്ട് തന്നെ അവരുടെ കഥാപാത്രങ്ങൾക്കാണ് കഥയിൽ കൂടുതൽ നരേഷൻ വന്നിരിക്കുന്നത്. Biased ആണെന്ന് തോന്നിക്കും വിധം ചിലയിടങ്ങളിൽ ചില സന്ദർഭങ്ങൾ ചേർക്കുമ്പോഴും കഥയുടെ ഒഴുക്കിൽ അധികം ശ്രദ്ധ പിടിക്കാതെ മുന്നോട്ട് പോവും. അത് തന്നെയാണ് സംവിധായകന്റെ മിടുക്ക്. പോലീസ് മേധാവി മുതൽ കോൺസ്റ്റബിൾ വരെയുള്ളവർക്ക് കൃത്യമായ വ്യക്തിത്വം നൽകുമ്പോഴും ചുറ്റുമുള്ളവർക്ക് ചെറിയ നെഗറ്റിവ് shade കൊടുത്തത് ബോധപൂർവ്വമുള്ള കൈകടത്തലായിപ്പോയി. ഡൽഹി പോലീസിനെ വെള്ളപൂശുന്ന തലത്തിലേക്ക് പലപ്പോഴും കാര്യങ്ങൾ നീങ്ങുന്നുണ്ട്. അതാണ് സീരീസിന്റെ നെഗറ്റിവ് ആയി തോന്നിയത്.

🔻മികച്ച പ്രകടനവുമായി ഷെഫാലിയ ഷാ സീരീസിന്റെ നട്ടെല്ലായി നിൽക്കുമ്പോൾ ഭൂപേന്ദ്ര സിങ്ങായി രാജേഷും ഇഷ്ടകഥാപാത്രമായി. നീതി സിംഗിന്റെ റോൾ crucial ആയ ഒന്നായപ്പോൾ ഏറ്റവും ഒടുവിലെ രംഗം ഗംഭീരമായി തോന്നി. ഇതിലും നല്ലൊരു പര്യവസാനം ഈ സീരീസിന് കിട്ടുമെന്ന് തോന്നുന്നില്ല. കൂടെയുള്ള ഓരോരുത്തരും തങ്ങളുടെ വേഷങ്ങൾ ഭംഗിയാക്കി. കുറ്റവാളികളായി അഭിനയിച്ചവരിൽ Jai Singh ഗംഭീരമായി.

🔻ＦＩＮＡＬ ＶＥＲＤＩＣＴ🔻

ചർച്ച ചെയ്യപ്പെടേണ്ട ഗൗരവകമായ ഒരു സംഭവമായത് കൊണ്ട് തന്നെ നല്ലൊരു ഔട്ട്പുട്ട് ആണ് Netflixൽ നിന്ന് ഇത്തവണ ലഭിച്ചിരിക്കുന്നത്. അൽപ്പം Biased ആയി പലപ്പോഴും തോന്നുമെങ്കിലും Disturbing ആയ രംഗങ്ങളും ഗംഭീര പെർഫോമൻസുകളും അവതരണവുമൊക്കെയായി നല്ലൊരു ആസ്വാദനം തന്നെ സമ്മാനിക്കും ഈ സീരീസ്.

ＡＢ ＲＡＴＥＳ ★★★½

🔻ഹാപ്പിയുടെ പാകിസ്താനിലേക്കുള്ള ഓട്ടം ആദ്യ ചിത്രത്തിൽ നന്നായി ആസ്വദിച്ചിരുന്നു. അതിൽ ജിമ്മി ഷർഖിൽ - പീയൂഷ് മിശ്ര കൂട്ടുകെട്ടിന്റെ കിടിലൻ കോമഡികളും ഒരുപാട് ചിരിപ്പിച്ചിരുന്നു. സത്യത്തിൽ രണ്ടാം ഭാഗം ഇറങ്ങിയപ്പോ ഏറ്റവും കൂടുതൽ കാണാൻ ആഗ്രഹിച്ചതും ഇവരുടെ കോമ്പിനേഷൻ സീനുകളാണ്.

Year : 2018
Run Time : 2h 16min

🔻ഇത്തവണ പാകിസ്ഥാൻ മാറി ചൈനയായി കഥ നടക്കുന്ന സ്ഥലം. രണ്ട് ഹാപ്പികൾ തമ്മിൽ ആള് മാറി പോവുന്നിടത്താണ് പ്രശ്നങ്ങളുടെ തുടക്കം. അവിടുന്ന് ബഗ്ഗയും അഫ്രീദിയുമൊക്കെ വരുന്നതോടെ കാര്യങ്ങൾ കൂടുതൽ രസകരമാവുന്നു.

🔻ആദ്യഭാഗവുമായി താരതമ്യം ചെയ്യുമ്പോൾ കോമഡിയുടെ അളവ് നന്നേ കുറഞ്ഞതായി തോന്നി. അവിടെയാണ് സിനിമയുടെ ആസ്വാദനം തെല്ലൊന്ന് കുറയുന്നത്. രസകരമായ തുടക്കമൊക്കെയാണെങ്കിലും ഇടവേള കഴിയുമ്പോഴേക്കും അൽപ്പം ഡൗൺ ആവുന്നുണ്ട് ഇടക്ക്. എങ്കിലും അതിനെ താങ്ങിനിർത്തുന്നത് ജിമ്മി-പീയൂഷ് കോമ്പിനേഷൻ രംഗങ്ങളാണ്.

🔻പുതുമയും ലോജിക്കും ഒന്നുമില്ലെങ്കിലും തുടക്കം മുതൽ ഒടുക്കം വരെ മടുപ്പിക്കാതെ കൊണ്ടുപോവുന്നുണ്ട് ചിത്രം. നല്ല രീതിയിൽ ചിരിപ്പിക്കുന്ന കോമഡി രംഗങ്ങൾ ആദ്യ പകുതിയിൽ ഉണ്ട്. അതിന്റെ അളവ് രണ്ടാം പകുതി എത്തുമ്പോൾ കുറയുന്നുണ്ട്. സൊനാക്ഷിയുടെയും ഡയാനയുടെയും പ്രകടനങ്ങൾ നല്ല എനർജി നൽകുന്നുണ്ട് ചിത്രത്തിന്. ജിമ്മിയും പീയൂഷ് മിശ്രയും ഒരുപാട് സ്‌കോർ ചെയ്യുന്നുമുണ്ട്.

🔻ＦＩＮＡＬ ＶＥＲＤＩＣＴ🔻

ആദ്യ ഭാഗവുമായി താരതമ്യം ചെയ്യുമ്പോൾ അൽപ്പം താഴ്ന്ന് നിൽക്കുമെങ്കിലും ബോറടിയില്ലാതെ കണ്ടിരിക്കാൻ സാധിക്കുന്ന ചിത്രം തന്നെയാണ് ഹാപ്പിയുടെ രണ്ടാം ഓട്ടത്തിലും സംവിധായകൻ ഒരുക്കിയിരിക്കുന്നത്. ബഗ്ഗ-അഫ്രീദി കൂട്ടുകെട്ട് തന്നെയാണ് ഇത്തവണയും ചിത്രത്തിന്റെ നെടുന്തൂൺ.

ＡＢ ＲＡＴＥＳ ★★½

ചിത്രം ടെലിഗ്രാം ചാനലിൽ ലഭ്യമാണ്. Abi Suggests