Abeed Azad

🔻ഡാവിഞ്ചിയുടെ കടുത്ത ആരാധകനായിരുന്നു അദ്ദേഹം. മേക്കപ്പ് ആർട്ടിസ്റ്റായിരുന്ന അച്ഛനിൽ നിന്ന് കല സ്വായത്തമാക്കി തന്റേതായ പരീക്ഷണങ്ങളിൽ അദ്ദേഹം വ്യാപൃതനായിരുന്നു പലപ്പോഴും. സിനിമ ഇൻഡസ്ട്രിയിൽ ജോലി ചെയ്യാൻ താൽപര്യമായിരുന്നെങ്കിലും  തൊഴിലൊനോട് നീതി പുലർത്തുന്നതിനപ്പുറം ഒന്നിനും വില കൊടുത്തിരുന്നില്ല. അതുകൊണ്ട് തന്നെ തന്റെ കഴിവിൽ അഭിമാനവും അദ്ദേഹത്തിന് ഉണ്ടായിരുന്നു. ഇത്തരത്തിൽ ഒരാൾ നിയമ വ്യവസ്ഥയോട് ഭ്രാന്തമായ താൽപര്യമുള്ള ഒരു അഡ്വക്കേറ്റുമായി കണ്ടുമുട്ടിയാലോ.?

Year : 2019
Run Time : 1h 57min

🔻സിനിമയുടെ ഓപ്പണിങ്ങ് സീൻ മാത്രം മതി ബാക്കി കാണുവാനുള്ള താൽപര്യം ജനിപ്പിക്കാൻ. കേന്ദ്ര കഥാപാത്രത്തിൽ ഒരാളുടെ സ്വഭാവം തന്നെ ഗംഭീരമായി ആ രംഗം പോട്രേ ചെയ്യുന്നുണ്ട്. ആദ്യ 30 മിനിറ്റോളം കഥാപാത്രങ്ങളെ പരിചയപ്പെടുത്താനാണ് ഉപയോഗിക്കുന്നതെങ്കിലും അതിലിടക്ക് കൗതുകകരമായ വസ്തുതകൾ സമ്മാനിച്ച് കാണികളുടെ താൽപര്യം നഷ്ടപ്പെടാതെ നോക്കുന്നുണ്ട്. തുടർന്ന് കഥയിലേക്ക് കടക്കുമ്പോൾ ഒരു നിമിഷം പോലും അതിൽ നിന്ന് വഴുതിപ്പോവാതെ തീർത്തും കയ്യടക്കത്തോടെ അതിനെ പരിചരിച്ചിട്ടുമുണ്ട്. അത്തരത്തിൽ സംവിധായകന്റെ ക്രാഫ്റ്റ് പതിഞ്ഞ മികച്ച ത്രില്ലറാണ് വിഞ്ചി ഡാ.

🔻കഥയിലേക്ക് കൂടുതൽ കടക്കാത്തത് കാണുമ്പോഴുള്ള കൗതുകം നഷ്ടപ്പെടാതിരിക്കാനാണ്. കാരണം ഒരു ബ്രില്യന്റ് ത്രില്ലർ എന്ന് വിളിക്കത്തക്ക വിധം പെർഫെക്ഷൻ കഥയിലും അവതരണത്തിലും അനുഭവപ്പെടാൻ സാധിക്കും. അതുകൊണ്ട് തന്നെ മുൻ മാത്രകകൾ പരമാവധി ഒഴിവാക്കിയുള്ള ഒരു ത്രില്ലർ നമുക്ക് ആസ്വദിക്കാനും സാധിക്കും. ഒപ്പം പക്വതയാർന്ന ഡയലോഗുകൾ സിനിമയുടെ ഹൈലൈറ്റാണ്. നായകന്റെ നിസ്സഹായാവസ്ഥ അടയാളപ്പെടുത്തുന്ന ഒരു രംഗമുണ്ട്. ചുഴിയിലാഴ്ന്ന ഒരു മനസ്സിനെ ഇതിലും മികവുറ്റ രീതിയിൽ അടയാളപ്പെടുത്താൻ സാധിക്കുമോ എന്ന് തോന്നിപ്പോവും വിധം അപാരം.

🔻റീഥ്വിക്ക് ചക്രബർത്തിയുടെ ഗംഭീര പ്രകടനം വേറൊരു തലത്തിലേക്ക് ആ കഥാപാത്രത്തെ ഉയർത്തുന്നുണ്ട്. ഓരോ ചിരിയിലും തന്നിലെ ഭ്രാന്ത് പ്രകടമാക്കുന്നുണ്ട് അദ്ദേഹം. രുദ്രനിലിന്റെ മികച്ച പ്രകടനം ഇരുവരും തമ്മിലുള്ള കോമ്പിനേഷൻ സീനുകൾ ആകാംശയിലാഴ്ത്തുന്നുണ്ട്. ചില രംഗങ്ങളിൽ രുദ്രനിൽ കയ്യടിക്കാൻ തോന്നും വിധം കഥാപാത്രമായി മാറുന്നുണ്ട്. നായികയുടെ പ്രകടനവും നന്നായിരുന്നു. പശ്ചാത്തലസംഗീതം ത്രില്ലർ മൂഡിന് തിരികൊളുത്തുമ്പോൾ ഡാർക്ക് മൂഡിൽ ഒരുക്കിയ രംഗങ്ങൾക്ക് ക്യാമറ വർക്കുകൾ മിഴിവേകുന്നുണ്ട്.

🔻ＦＩＮＡＬ ＶＥＲＤＩＣＴ🔻

അധികം കണ്ട് ശീലിച്ചിട്ടില്ലാത്ത കഥയെ ഗംഭീരമായ അവതരണത്താൽ മികച്ച ത്രില്ലറാക്കി മാറ്റുകയാണ് സംവിധായകൻ. തിരക്കഥയും അഭിനേതാക്കളുടെ പ്രകടനങ്ങളും സംഭാഷണങ്ങളും സിനിമയുടെ നട്ടെല്ലാവുമ്പോൾ ഒരിക്കലും നിരാശ സമ്മാനിക്കാത്ത, തൃപ്തി മാത്രം സമ്മാനിക്കുന്ന നല്ലൊരു സിനിമക്ക് സാക്ഷിയാവാം.

ＡＢ ＲＡＴＥＳ ★★★★☆

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

💢കൊൽക്കത്തയിലെ കൊലപാതകങ്ങളുടെ എണ്ണം ക്രമാതീതമായി വർദ്ധിച്ചുവരികയാണ്. അവയിൽ ഭൂരിഭാഗവും തെളിയിക്കപ്പെടുന്നുണ്ടെങ്കിലും ഒരു തുമ്പും കിട്ടാത്ത മറ്റൊരു വിഭാഗം കൂടിയുണ്ട്. അർധരാത്രി മാത്രം നടക്കുന്ന ചില കൊലപാതകങ്ങൾ. അവയ്ക്ക് ഇതുവരെ ഒരു തെളിവുകളും ലഭിച്ചിട്ടില്ല. കൊലപാതകരീതികൾ തമ്മിൽ ഒരു സാമ്യവും ഇല്ല. പക്ഷെ അതൊരു സീരിയൽ കില്ലിങ്ങ് ആണ്. ആ മൃതദേഹങ്ങളുടെ അടുത്ത് നിന്ന് ലഭിച്ച കവിതകുറിപ്പുകൾ സാക്ഷ്യം വെക്കുന്നത് ഒരു സീരിയൽ കില്ലിങിലേക്കാണ്.

അന്വേഷണങ്ങളിൽ മിടുക്കനായ അഭിജിത്ത് ഇത്തവണ അൽപ്പം കുഴങ്ങി നിൽക്കുകയാണ്. കേസന്വേഷണം തുടങ്ങിയിട്ട് മാസങ്ങളായെങ്കിലും ഇതുവരെ ഒരു നിഗമനത്തിൽ എത്താൻ ആയിട്ടില്ല. അതിനനുസരിച്ച് കൊലപാതകങ്ങളുടെ എണ്ണം ക്രമാതീതമായി കൂടിക്കൊണ്ടേയിരിക്കുന്നു. ഇതിൽ ആശങ്കയിലായി മേലുദ്യോഗസ്ഥൻ മറ്റൊരാളെ കൂടി അഭിജീത്തിന്റെ പിന്തുണക്കായി നിയോഗിക്കാൻ ആലോചന നടത്തുന്നു. വർഷങ്ങളിലായി സസ്പെൻഷനിലായ പ്രബീറിനെ കേസന്വേഷണത്തിനായി യൂണിഫോം ധരിപ്പിക്കുന്നു. എന്നാൽ അതൊരു നല്ല നീക്കമായിരുന്നു..?

💢ഈ സിനിമയുടെ തുടക്കം നല്ലൊരു പ്രതീക്ഷ നൽകുന്നതായിരുന്നു. ടൈറ്റിൽ എഴുതിക്കാണിക്കുന്ന രംഗങ്ങളൊക്കെയും ഒരു ത്രില്ലറിലേക്ക് നയിക്കുന്നതാവുമെന്ന  വ്യക്തമായ സൂചനയാണ് നൽകിയത്. അതുപോലെ തന്നെയായിരുന്നു തുടക്കത്തിന് ശേഷം മുന്നോട്ടുള്ള പോക്കും. എന്നാൽ പൂർണ്ണമായും ത്രില്ലറല്ല, മറിച്ച് വ്യക്തികളുടെ ജീവിതത്തിലേക്കും കഥ കടക്കുന്നുണ്ട്. ഒരുതരത്തിൽ അത് കഥയുടെ പോസിറ്റിവ് എലമെന്റ് തന്നെയാണ്. പക്ഷെ അതിന്റെ ആധിക്യം പലപ്പോഴും ത്രില്ലറെന്ന ഫീൽ നഷ്ടപ്പെടുത്തുന്നുണ്ട്.

💢സ്ലോ പേസ്ഡ് ത്രില്ലറുകൾ നല്ല രീതിയിൽ ആസ്വദിക്കുന്ന വ്യക്തിയെന്ന നിലയിൽ കഥ പറയുന്ന രീതി ആദ്യമൊരു പ്രശ്നമായി തോന്നിയതേ ഇല്ല. എന്നാൽ ത്രില്ലടിച്ച് വരുന്ന മൊമന്റുകളിൽ കൃത്യമായി അനാവശ്യമായ സീനുകളും രണ്ട് പാട്ടുകളും കുത്തിക്കയറ്റിയത് ആസ്വാദനത്തെ തന്നെ സാരമായി ബാധിച്ചു. സിനിമയിൽ തോന്നിയ ഏക നെഗട്ടീവും ആ സീനുകളും പാട്ടുകളുമാണ്. അവയ്ക്ക് ശേഷം വീണ്ടും പേസ് വീണ്ടെടുത്ത് ട്രാക്കിലാവുന്നുണ്ട് ചിത്രം.

💢കേസന്വേഷണം നടക്കുന്ന വഴികളും അത് ചെന്നെത്തുന്ന അവസാനവുമൊക്കെ തൃപ്തി നൽകുന്നതാണ്. അത് കഴിഞ്ഞുള്ള സീനുകൾ ഗംഭീരമായിരുന്നു. സിനിമയിലെ ഏറ്റവും ബെസ്റ്റ് സീൻ അത് തന്നെ. അതുവരെ കണ്ട മികവായിരുന്നില്ല ഒടുവിൽ കാണാനായത്. എന്തായാലും ഇടക്കിടെ നൽകിയ വിരസത ആ ഒറ്റ സീനിൽ മറികടക്കാനായി ചിത്രത്തിന്.

💢മുൻനിരയിൽ നിന്ന രണ്ട താരങ്ങളുടെയും പ്രകടനം തൃപ്തികരമായിരുന്നു. കൂടെ കവിയുടെയും. അതോടൊപ്പം രാത്രികാല ദൃശ്യങ്ങൾ നല്ല രീതിയിൽ പകർത്താനായിട്ടുണ്ട്. അവസാനഭാഗങ്ങളിലെ ബിജിഎം നന്നായിട്ടുണ്ട്.

🔻ＦＩＮＡＬ ＶＥＲＤＩＣＴ🔻

എഡ്ജ് ഓഫ് സീറ്റ് ത്രില്ലർ എന്ന് പറയാനാകില്ലെങ്കിലും നല്ലൊരു ത്രില്ലർ എന്ന് അവകാശപ്പെടാൻ സാധിക്കുന്ന ചിത്രമാണ് സംവിധായകൻ ഒരുക്കിയിരിക്കുന്നത്. കേസന്വേഷണത്തിലുപരി രണ്ട് അന്വേഷണ ഉദ്യോഗസ്ഥരുടെ ജീവിതത്തിലേക്കുള്ള എത്തിനോട്ടം കൂടിയാവുമ്പോൾ തൃപ്തി നൽകുന്ന ചിത്രം ബംഗാളിൽ നിന്ന് ലഭിക്കുന്നു.

ＭＹ ＲＡＴＩＮＧ:: ★★★½

💢ആകെയുള്ള ഡയലോഗുകൾ കൂട്ടിയാൽ ഒന്നോ രണ്ടോ മിനിറ്റ് മാത്രമാവും ദൈർഖ്യം. എന്നാൽ അവ ഡയലോഗുകളും അല്ല. ചില മുദ്രാവാക്യങ്ങൾ മാത്രമാണ്. ആ കാലഘട്ടത്തിൽ കൽക്കത്തയിൽ എല്ലാവരെയും അലട്ടിയിരുന്ന പ്രധാന പ്രശ്നമായ തൊഴിലില്ലായ്മക്കെതിരെ ചിലർ ഉയർത്തുന്ന മുദ്രാവാക്യങ്ങൾ.

💢ഒന്നര മണിക്കൂർ സംഭാഷണങ്ങൾ തീരെയില്ലാത്ത ഒരു സിനിമ കാണുകയെന്നത്‌ ശ്രമകരമായ കാര്യം തന്നെയാണ്. വിരസത മാത്രം തോന്നുന്ന ഒരു കാഴ്ചാനുഭവമാവും അത്തരത്തിലൊരു ചിത്രം. എന്നാൽ രണ്ട് മിനിറ്റ് പോലും സംഭാഷണങ്ങൾ തികച്ചില്ലാത്ത ഈ ചിത്രം നമ്മെ പിടിച്ചിരുത്തുന്നുണ്ടെങ്കിൽ അതിന്റെ പരിചരണഭംഗി ഒന്നുകൊണ്ട് മാത്രമാണ്. അതും ഇത്ര രൂക്ഷമായ ഒരു വിഷയത്തെ പ്രതിപാദിക്കുക കൂടി ചെയ്യുന്ന ഒരു ചിത്രം.

💢ശക്തമായ ഡയലോഗുകളും അതിനനുസരിച്ച് ഗവണ്മെന്റിന്റെയും കോർപ്പറേറ്റുകളുടെയും ശ്രദ്ധ പിടിച്ചുപറ്റുന്ന തരത്തിൽ തീവ്രമായ ആവിഷ്കാരവും ആവശ്യപ്പെടുന്ന ഒരു പ്രമേയത്തെ ഇത്ര ലളിതമായി, ശക്തമായി കൈകാര്യം ചെയ്യാൻ പറ്റുമോ എന്ന് തോന്നിപ്പോയി ഈ ചിത്രം കണ്ടുകഴിഞ്ഞപ്പോൾ. അത്ര ഭംഗിയായിരുന്നു ഈ സിനിമക്ക്. ആ രണ്ട് ജീവിതങ്ങൾക്ക്.ഒരേയൊരു ദിവസം മാത്രം സ്‌ക്രീനിൽ കാണിക്കുമ്പോൾ റിയലിസ്റ്റിക്ക് എന്ന വാക്കിനെ അർത്ഥവത്താകുന്ന ഒരു സൃഷ്ടിയായി മാറുന്നു Labour Of Love.

💢രണ്ട് മനുഷ്യരുടെ ഒരു ദിവസത്തെ ജീവിതം മാത്രമാണ് സംവിധായകൻ ഒപ്പിയെടുത്തിരിക്കുന്നത്. ഒരാൾ വീട്ടിലാണെങ്കിൽ മറ്റൊരാൾ ഓഫീസിലാണ്. അവിടെ അവരുടെ ദൈനംദിന ജീവിതത്തിനൊപ്പം ക്യാമറയും സഞ്ചരിക്കുന്നു. വളരെ മൈന്യുട്ട് ആയിട്ടുള്ള കാര്യങ്ങളും ശബ്ദങ്ങളും വ്യക്തമാണ് കാഴ്ച്ചയിലുടനീളം. ചില രംഗങ്ങളുടെ ദൈർഖ്യക്കൂടുതൽ ഒഴിച്ചാൽ കണ്ണെടുക്കാൻ തോന്നാത്തവിധം സുന്ദരമായ കാഴ്ചയാവുന്നുണ്ട് അവ.

💢ഇതിന്റെയൊക്കെ അവസാനം ഇരുവരും ഒരുമിച്ചുള്ള കുറച്ച് രംഗങ്ങളുണ്ട്. പറഞ്ഞറിയിക്കാൻ പറ്റാത്തത്ര ഉയരത്തിലായിരുന്നു ആ രംഗങ്ങൾ നൽകിയ ആസ്വാദനവും അനുഭൂതിയും. അവയുടെ ആവിഷ്കാരമികവ് അപാരം തന്നെയാണ്. ഈയടുത്ത് ഇത്ര മനോഹരവും ഹൃദയസ്പർശിയുമായ രംഗങ്ങൾ കണ്ടിട്ടില്ലെന്നുറപ്പ്. ഇപ്പോഴും മനസ്സിൽ നിന്ന് മായുന്നില്ല അവ. അവാർഡ് നിശകളിൽ തിളങ്ങിയ ചിത്രം അതിരുകളില്ലാത്ത ആസ്വാദനഭംഗി പ്രദാനം ചെയ്യും.


🔻ＦＩＮＡＬ ＶＥＲＤＩＣＴ🔻

"Action Speaks Louder Than Words" എന്ന വാക്യത്തെ അന്വർത്ഥമാക്കുന്ന അനുഭവമായിരുന്നു ഈ ചിത്രം സമ്മാനിച്ചത്. അതീവഗൗരവകരമായ പ്രമേയത്തെ ഇത്ര ലളിതമായും അവതരിപ്പിക്കാമെന്ന ബോധ്യപ്പെടുത്തൽ കൂടിയാണ് ചിത്രം . അപൂർവ്വങ്ങളിൽ അപൂർവ്വമായി മാത്രം കിട്ടുന്ന വ്യത്യസ്തമാർന്ന ആസ്വാദനം നഷ്ടപ്പെടുത്താതിരിക്കുക.

ＭＹ ＲＡＴＩＮＧ :: ★★★★☆