ചുവപ്പിനോട് മനസ്സിൽ മതിപ്പും ബഹുമാനവുമുള്ള സമയത്താണ് ഞാൻ കോളേജിൽ പ്രവേശിക്കുന്നത്..എന്നാൽ ആദ്യ വർഷം തന്നെ അവർക്കെതിരായി ഇലക്ഷന് നിൽകേണ്ട ഒരു സാഹചര്യവും ഉണ്ടായി.. ആ സമയത്തുണ്ടായ സംഭവവികാസങ്ങളും മൂന്ന് വർഷത്തെ കോളേജ് ജീവിതവും എന്നിലെ പല തെറ്റിദ്ധാരണകളെയും മാറ്റിമറിക്കുന്നതായിരുന്നു..ഈ കാലഘട്ടത്തിൽ പല കുട്ടിസഖാക്കളും പാർട്ടിയിലേക്ക് വരുന്നത് അവരിലെ വിപ്ലവ ബോധം ഉണർന്നിട്ടല്ല..മറിച്ച് മറ്റുള്ളവരുടെ മുന്നിൽ ആളാവാനും ഷൈൻ ചെയ്യാനും ഗുണ്ടായിസം കാണിക്കാനുമൊക്കെ അവർക്ക് ധൈര്യം പകരുന്ന, അല്ലെങ്കിൽ ലൈസൻസ് കൊടുക്കുന്ന ഒരു നിറം മാത്രമാണ് അവർക്ക് ചുവപ്പ്.. മറ്റുചിലർക്കാകട്ടെ സ്ഥാനമാനങ്ങൾ എത്തിപ്പിടിക്കാനുള്ള ചവിട്ടുപടിയും..
ചെങ്കൊടിയേന്തിയ നായകന്മാർ ഒന്നിനുപിറകേ ഒന്നായി തീയേറ്ററുകളിലേക്ക് വന്നുകൊണ്ടിരിക്കുന്ന സ്ഥിതിവിശേഷമാണ് നാം കണ്ടുകൊണ്ടിരിക്കുന്നത്.. കഴിഞ്ഞ മാസം ' മെക്സികൻ അപാരത'യിലൂടെ ടൊവിനൊ ആയിരുന്നെങ്കിൽ ദാ ഇപ്പോൾ നിവിൻ പോളി തന്റെ 'സഖാവു'മായി എത്തിയിരിക്കുകയാണ്..

സഖാക്കന്മാരിലൂടെയാണ് ചിത്രത്തിന്റെ കഥ പറഞ്ഞ് പോവുന്നത്.. പോയകാലത്ത് പീരുമേടിലെ ഹൈറേഞ്ചിൽ തോട്ടം മേഖലയിൽ തൊഴിലാളികളെ ഒരുമിപ്പിച്ച് അവരുടെ അവകാശത്തിനായി പോരാടിയ സഖാവ് കൃഷ്ണൻ എന്ന കറതീർന്ന കമ്മ്യൂണിസ്റ്റും മേലനങ്ങാതെ പണിയെടുത്ത് രാഷ്ട്രീയത്തിൽ വലിയ സ്ഥാനമാനങ്ങൾ സ്വപ്നം കണ്ട് നടക്കുന്ന യുവരക്തമായ സഖാവ് കൃഷ്ണകുമാറുമാണ് ആ രണ്ട് പേർ.. ഒരു യഥാർഥ കമ്മ്യൂണിസ്റ്റ് എങ്ങനെയായിരിക്കണമെന്ന് കൃഷ്ണനിലൂടെ കൃഷ്ണകുമാറിനെ ബോധ്യപ്പെടുത്തുന്നതാന്ന് 'സഖാവി'ന്റെ പ്രമേയം..മരണത്തോട് മല്ലടിച്ച് ആശുപത്രിയിൽ കഴിയുന്ന കൃഷ്ണന് രക്തം ദാനം ചെയ്യാനുള്ള നിയോഗം ലദിക്കുന്ന കൃഷ്ണകുമാർ അദ്ധേഹത്തെ അടുത്തറിയുന്നതിലൂടെ ചിത്രം പുരോഗമിക്കുന്നു..
kpac എന്ന ചിത്രത്തിന് ശേഷം സിദ്ധാർഥ് ശിവയുടെ തിരക്കഥയിലും സംവിധാനത്തിലും പുറത്തിറങ്ങിയ ചിത്രമാണ് 'സഖാവ്'..സഖാവ് കൃഷ്ണന്റെ സുഹൃത്തിലൂടെയും മകളിലൂടെയും ഭാര്യയിലൂടെയുമാണ് കഥ പറഞ്ഞ് പോവുന്നത്.. ഹൈറേഞ്ചിൽ കമ്മ്യൂണിസം വളർത്തുവാനായി കൃഷ്ണൻ അവിടെ എത്തുന്നത് മുതലുള്ള സംഭവങ്ങൾ ഓരോരുത്തരിലൂടെ പറഞ്ഞ് പോവുന്നു.. കാതുകമുണർത്തുന്ന സാഹചര്യങ്ങളാണ് തുടക്കമെങ്കിലും പിന്നീട് അവ നാടകീയതയിലേക്ക് തെന്നി മാറുന്നു.. കൂടെ അതീവ നാടകീയത കലർന്ന സംഭാഷണങ്ങളും.. സഖാവ് സഖാവ് എന്ന തുരുതുരാ ഉള്ള പ്രയോഗങ്ങൾ പല സന്ദർഭങ്ങളിലും അലോസരപ്പെടുത്തി..
പുതുതലമുറക്ക് മാതൃകയാക്കാൻ തക്ക സംഭവങ്ങൾ കൃഷ്ണനിൽ ഉണ്ടായതായി തോന്നിയില്ല..കാരണം രണ്ടും രണ്ട് കാലഘട്ടങ്ങളാണ്..രണ്ട് പ്രവർത്തനമേഖലയാണ്.. പിന്നെ ആകെയുള്ളത് റഫറൻസ് പോലെ വരുന്ന മുഴുനീളൻ ഡയലോഗുകൾ മാത്രമാണ്.. ആദ്യം മുതലേ മന്ദതയിൽ സഞ്ചരിക്കുന്ന ചിത്രത്തിൽ പ്രേക്ഷകനെ പിടിച്ചിരുത്താനുള്ള എലമെന്റ്സ് തീരെ കുറവാണ്.. അല്ലെങ്കിൽ അവ വേണ്ട രീതിയിൽ സംവിധായകൻ ഉപയോഗപ്പെടുത്തിയിട്ടില്ല.. അതിനാൽ തന്നെ പല സന്ദർഭങ്ങളിലും വിരസത അനുഭവപ്പെടുന്നുണ്ട്..സമയദൈർഘ്യം നന്നേ കൂടുതലായതും ആസ്വാദനത്തിന് തിരിച്ചടിയാവുന്നുണ്ട്..


തെരി, കത്തി തുടങ്ങിയ ചിത്രങ്ങൾക്ക് ക്യാമറ ചലിപ്പിച്ച ജോര്‍ജ്ജ് വില്യംസ് ആണ് ചിത്രത്തിന്റെ ഛായാഗ്രഹണം നിർവ്വഹിച്ചിരിക്കുന്നത്.. പീരുമേട് കാലഘട്ടം ചിത്രീകരിച്ചതിൽ ചില നല്ല ഫ്രെയിമുകൾ ഒഴിച്ചാൽ ബാക്കിയെല്ലാം ശരാശരിയിൽ ഒതുങ്ങുന്നു.. ബോറടിപ്പിക്കാനുള്ള ഒരു കാരണവും അത് തന്നെ..ഇപ്പോഴും ഹിറ്റ് ചാർട്ടിലുള്ള അങ്കമാലി ഡയറീസിന്റെ സംഗീതം നിർവ്വഹിച്ച പ്രശാന്ത് പിള്ളയാണ് സഖാവിനും സംഗീതം ഒരുക്കിയിരിക്കുന്നത്.. ടൈറ്റിൽ സോങ്ങ് ഒഴിച്ചാൽ മറ്റൊരു ഗാനവും ഇഷ്ടപ്പെട്ടില്ല..പശ്ചാത്തല സംഗീതം ചില സ്ഥലങ്ങളിൽ മികച്ച് നിന്നപ്പോൾ ബാക്കിയുള്ളിടത്ത് ശരാശരി മാത്രം..


വാൽകഷ്ണം :: കഴിഞ്ഞ കുറച്ച് കാലത്ത് സ്ക്രീനിലെത്തിയ സഖാക്കന്മാരിൽ എനിക്ക് സ്നേഹവും ബഹുമാനവും തോന്നിയത് റെഡ് വൈനിൽ ഫഹദ് ഫാസിൽ ഭംഗിയാക്കിയ 'സഖാവ് അനൂപി'നോടാണ്..അക്ഷരം തെറ്റാതെ സഖാവ് എന്ന് വിളിക്കാൻ തോന്നിയ വ്യക്തിത്വം..ഈ കാലത്തെ കുട്ടിസഖാക്കന്മാർ മാത്രകയാക്കണമെന്ന് എനിക്ക് തോന്നിയത് സഖാവ് അനൂപിനെയാണ്..
അഭിപ്രായം വ്യക്തിപരം.. തീയേറ്ററിൽ കണ്ട് വിലയിരുത്തുക..
My Rating:: ★★½