Abeed Azad

🔻ചില റിവ്യൂകൾ എഴുതുമ്പോൾ കഥയെ പറ്റിയോ ജേണറിനെ പറ്റിയോ എവിടെയും പ്രതിപാദിക്കാറില്ല. റിവ്യൂ വായിക്കുന്ന ചിലർ അതൊരു പോരായ്മയായി പറയുകയും ചെയ്യാറുണ്ട്. Believe Me അത്തരം സിനിമകളെ പറ്റി ഞാൻ കൂടുതൽ എഴുതിയാൽ കാണാത്തവരോട് ചെയ്യുന്ന ഏറ്റവും വലിയ അപരാധമാവും. അത്തരത്തിലൊരു സിനിമയാണ് Mathu Vadaralaയും.

Year : 2019
Run Time : 2h 10min

🔻ഭൂരിഭാഗം സിനിമകളും ഏതെങ്കിലുമൊരു ജേണറിൽ stick on ചെയ്ത് കാണികളെ കയ്യിലെടുക്കാറാണ് പതിവ്. അല്ലെങ്കിൽ അത്തരത്തിലുള്ള അവതരണമാണ് പല സിനിമകൾക്കും ഏറ്റവും അനുയോജ്യമായത്. എന്നാൽ ചില സിനിമകളിൽ മാത്രം പല ജേണറുകൾ ബ്ലെൻഡ് ചെയ്തുള്ള അവതരണം കാണാം. അതൊരു പരീക്ഷണമാണ്. ഭൂരിഭാഗം സന്ദർഭങ്ങളിലും അത് വിജയിക്കാതെ പോവാറുണ്ട്. വിരളമായ ചില അനുഭവങ്ങൾ മാത്രം ആസ്വാദകരെ തൃപ്തിപ്പെടുത്തി നിലയുറപ്പിക്കും. അതിൽ ഏറ്റവും ബുദ്ധിമുട്ടുള്ളത് ത്രില്ലറും കോമഡിയും തമ്മിൽ കൃത്യമായി ഇഴചേർന്ന് കൊണ്ടുപോവുന്നതാണെന്ന് തോന്നിയിട്ടുണ്ട്. ഇന്ത്യൻ സിനിമകളിൽ നന്നേ കുറവുള്ള ഒരു Genre Mix ആണത്. Agent Sai Srinivasa Athreya മാത്രമാണ് ഓർമ്മയിൽ നിലനിൽക്കുന്ന കോമിക് സസ്പെൻസ് ത്രില്ലർ. ഈ സിനിമ ഒരുപടി കൂടി മുന്നോട്ട് പോയിരിക്കുകയാണ്. കോമഡിയും ത്രില്ലറും ഒപ്പം ബ്ലാക്ക് ഹ്യൂമറും കൂടി ഗംഭീരമായി കൂട്ടിയിണക്കിയിരിക്കുകയാണ് Mathu Vadarala. സത്യത്തിൽ Andhadhunന് ശേഷം ആ വിഭാഗത്തിൽ പൂർണ്ണമായി വിജയിച്ച ചിത്രമെന്ന് വിശേഷിപ്പിക്കാം ഇതിനെ.

🔻കോമഡി ഡ്രാമയിൽ തുടങ്ങി പൊടുന്നനെ ത്രില്ലറിലേക്കും അതിലൂടെ ബ്ലാക്ക് ഹ്യൂമറിലേക്കും വീണ്ടും ത്രില്ലറിലേക്കും ഒരൊറ്റ ചാട്ടമാണ് കഥ. ഇതൊക്കെ എങ്ങനെ സാധിക്കുന്നെന്ന് അമ്പരന്നു പോയി എന്നതാണ് സത്യം. ഒരു പുതുമുഖ സംവിധായകൻ കൂടിയാണെന്നറിഞ്ഞപ്പോൾ അമ്പരപ്പ് ഇരട്ടിയായി. സത്യത്തിൽ ത്രില്ലർ ആഗ്രഹിക്കുന്നവർ വ്യത്യസ്തത നിറഞ്ഞ ചിത്രങ്ങൾ കാണാൻ ആഗ്രഹിക്കുന്നവർക്കും ഒരുപോലെ ആസ്വദിക്കാവുന്ന ചിത്രമാണ് mathu Vadarala.ഇന്ത്യൻ സിനിമകളിൽ തീർത്തും അപൂർവ്വമായ അനുഭവങ്ങളിൽ ഒന്ന്. ഒപ്പം പോപ്പ് കൾച്ചർ റഫറൻസുകളും. ഒന്നുകൂടി പറയുന്നു സിനിമയെ പറ്റി യാതൊന്നും അറിയാതെ തന്നെ കാണുക. കൂടുതൽ വലിച്ച് നീട്ടുന്നില്ല.

🔻ＦＩＮＡＬ ＶＥＲＤＩＣＴ🔻

Andhadhunന് ശേഷം ഇത്രയേറെ Genre Mixകൾ സമർത്ഥമായി ഉപയോഗിച്ച സിനിമ Mathu Vadaralaയാണെന്ന് നിസ്സംശയം പറയാം. ഒരിക്കൽ പോലും കാണികളുടെ ഊഹങ്ങൾ ശരിയാണെന്ന് തോന്നിപ്പിക്കാത്ത, ഒരു ഗംഭീര സംവിധായകനെയും തിരക്കഥാകൃത്തിനെയും അടയാളപ്പെടുത്തുന്ന സിനിമ. കണ്ടില്ലെങ്കിൽ ശരിക്കും നഷ്ടമാണെന്നേ പറയാനുള്ളൂ.

ＡＢ ＲＡＴＥＳ ★★★★☆

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻ആ കൊലപാതകത്തിന് സാക്ഷികളായി ആരും തന്നെ ഉണ്ടായിരുന്നില്ല. ആ മുറിയിലേക്ക് വന്നുപോയ ഒരാളുടെ മനസ്സിൽ നിമിഷങ്ങൾ കൊണ്ട് തെളിഞ്ഞ, താടി വെച്ച മനുഷ്യന്റെ രൂപം ആ അന്വേഷണത്തെ കൊണ്ടെത്തിച്ചത് മാസങ്ങൾക്ക് മുമ്പ് നടന്ന ഒരു ബാങ്ക് റോബറിയിലാണ്. ആ റോബറിയിൽ നാലംഗ സംഘത്തിന്റെ നേതാവായി പ്രവർത്തിച്ച വാങ്ങിന്റെ മുഖമായിരുന്നു അത്. അന്വേഷണത്തിൽ ടീമിലുണ്ടായിരുന്ന ലാറി അപ്പോഴാണ് ആ മുറിയിലുള്ള മറ്റൊരാളെ കൂടി ശ്രദ്ധിച്ചത്. സംസാരിക്കാൻ കഴിവുള്ള ഒരു തത്ത. ആ കൊലപാതകം കണ്ട ഒരേ ഒരാൾ..!!

Year : 2019
Run Time : 1h 44min

🔻തത്ത ഉരിയാടുന്നത് ആകെ രണ്ട് വാക്കുകളാണ്. Idiot, Genius. ഈ രണ്ട് വാക്കുകൾ കൊണ്ട് എങ്ങനെ കുറ്റവാളികളെ കണ്ടുപിടിക്കാമെന്നായി ലാറിയുടെ ചിന്ത. മറ്റുള്ളവരെല്ലാം തകൃതിയായി കേസന്വേഷിക്കുമ്പോൾ ലാറിയുടെ നീക്കം തത്തയെ കേന്ദ്രീകരിച്ചായി. ആരായിരിക്കും ശരി.? ആരായിരിക്കും ആദ്യം വാങ്ങിനെ കണ്ടെത്തുക.?  ഉത്തരങ്ങൾ അറിയാൻ മടിക്കാതെ സിനിമ കാണുക.

🔻പ്രേക്ഷകനെ കബളിപ്പിക്കുക എന്ന കർത്തവ്യം കൃത്യമായി നിറവേറ്റിയ ചിത്രമാണിത്. നമ്മുടെ ശ്രദ്ധ ഒന്നിൽ കേന്ദ്രീകരിക്കുകയും മറ്റൊരു വഴിയിലൂടെ കഥ നീങ്ങുകയും ചെയ്യുന്ന സാഹചര്യങ്ങൾ ഒന്നര മണിക്കൂറിൽ നമുക്ക് നേരിടാൻ സാധിക്കും. ഒടുവിൽ ട്വിസ്റ്റ് റിവീൽ ചെയ്യുമ്പോൾ അധികമാരും ചിന്തിച്ച് കാണാൻ സാധ്യതയില്ലാത്ത ഒരു പര്യവസാനത്തിലേക്ക് കൊണ്ടെത്തിക്കുന്നുണ്ട് സംവിധായകൻ. എന്നാൽ അത് ഏത് തരത്തിൽ പ്രേക്ഷകനെ സ്വാധീനിക്കുമെന്നത് രണ്ടാമത്തെ കാര്യം.

🔻കഥ അവസാനത്തിലേക്ക് അടുക്കുമ്പോൾ ചില മുഖ്യമായ സീനുകളിലെ അവതരണം കല്ലുകടിയായി തോന്നി. അത്ര നേരം നമ്മിൽ ജനിപ്പിച്ച ജിജ്ഞാസയെ പൂർണ്ണമായി തൃപ്തിപ്പെടുത്താൻ ആവാത്ത അവതരണം മൂലം ഇമ്പാക്റ്റ് കുറഞ്ഞ ഒന്നായി മാറുന്നുണ്ട് ചില രംഗങ്ങൾ. എഡിറ്റിംഗിലാണ് അത് എടുത്തറിയാൻ സാധിക്കുക. മറ്റെല്ലാ ഘടകങ്ങളും മികച്ച് നിൽക്കുമ്പോഴും ചില രംഗങ്ങളിലെ എഡിറ്റിങ്ങ് മാത്രം പോരായ്മയായി തോന്നും.

🔻ＦＩＮＡＬ ＶＥＲＤＩＣＴ🔻

ഗംഭീര ത്രില്ലർ ഒന്നുമല്ലെങ്കിലും ഒന്നര മണിക്കൂർ കൊണ്ട് നമ്മെ തൃപ്തിപ്പെടുത്താനാവുന്നതെല്ലാം ഈ ചിത്രത്തിലുണ്ട്. സിമ്പിളായി പറഞ്ഞവസാനിപ്പിക്കാമായിരുന്ന ത്രെഡിനെ അവതരണത്തിലെ കബളിപ്പിക്കലിലൂടെ താല്പര്യമുണർത്തുന്ന ഒന്നാക്കി മാറ്റുവാനും പൂർണമായി പിടിച്ചിരുത്താവാനും സംവിധായകനായിട്ടുണ്ട്. യാതൊരു പ്രതീക്ഷയുമില്ലാതെ സമീപിച്ചാൽ തീർച്ചയായും ഇഷ്ടപ്പെടും.

ＡＢ ＲＡＴＥＳ ★★★½

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻വോയ്‌സ് ഓവറുകൾ തുരുതുരാ വന്നിട്ടും ഒരു ഘട്ടത്തിൽ പോലും മടുപ്പ് തോന്നാത്ത ആദ്യ സീരീസാവും You. സംവിധായകൻ കഥയെ കൈകാര്യം ചെയ്യുന്ന രീതി തന്നെയാണ് അതിന് കാരണം. ഒരു പെൺകുട്ടിയോട് നിങ്ങൾക്ക് ഇഷ്ടം തോന്നിയാൽ അവൾക്ക് വേണ്ടി എന്തൊക്കെ ചെയ്യാനാവും.? ബുക്ക് സ്റ്റോറിൽ ജോലി ചെയ്യുന്ന 'ജോ'വിന് ബെക്കിനെ കണ്ട ആദ്യമാത്രയിൽ തന്നെയങ്ങ് ബോധിച്ചു. തുടർന്ന് വീണ്ടും കാണാനുള്ള ശ്രമങ്ങളായി അടുത്തത്. അതങ്ങനെ തുടർന്ന് കൊണ്ടേയിരുന്നു.

Seasons : 1 & 2
Episodes : 10 Each
Run Time : 41-50 min

🔻ജോവിന്റെ പ്രണയമാണ് you ഫോക്കസ് ചെയ്യുന്നത്. പ്രണയത്തിൽ അദ്ദേഹത്തിനുള്ള ആത്മാർത്ഥതയിലൂടെയാണ് you മുന്നേറുന്നത്. തന്റെ പ്രണയിനിയുടെ ഇഷ്ടം പിടിച്ചുപറ്റാനായി ഏതറ്റം വരെയും പോകുന്ന ജോ. അവളുടെ വിജയത്തിന് തടസ്സമാവുന്നതെന്തും പിഴുതുമാറ്റാൻ തയ്യാറായി നിൽക്കുന്ന ജോ. ഇതിൽപ്പരം എന്ത് വേണം ഒരു പെൺകുട്ടിക്ക്. എന്നാൽ ചില സാഹചര്യങ്ങളിൽ അദ്ദേഹത്തിന് വലിയ ഭീഷണികൾ നേരിടേണ്ടി വരുന്നു. അതോടെ പ്രണയത്തിന്റെ രൂപവും മാറുന്നു.

🔻റൊമാന്റിക്ക് ആയി തുടങ്ങുന്ന സീരീസാണ് you. പതിയെ കഥാപാത്രങ്ങളിലേക്ക് കടന്ന് അവർ തമ്മിലുള്ള ദൃഢമായ ബന്ധം establish ചെയ്തതിന് ശേഷം മാത്രമാണ് ബാക്കി മുന്നേറ്റങ്ങളൊക്കെയും. അവിടെയാണ് കഥ ചൂട് പിടിക്കുന്നത്. ആരും സഞ്ചരിച്ചിട്ടില്ലാത്ത വഴികളിലൂടെ ജോവിന് സഞ്ചരിക്കേണ്ടി വരുന്നതോട് കൂടി സീരീസ് കൂടുതൽ ത്രില്ലിങ്ങാവുന്നു. കാഴ്ചക്കാരും ഇമ വെട്ടാതെ നോക്കിയിരിക്കും.

🔻കഥാപാത്രങ്ങളെ പറ്റി എന്ത് പറഞ്ഞാലും രണ്ട് സീസണുകളുടെയും സ്പോയിലർ ആവുമെന്നതിനാൽ അതിലേക്ക് കടക്കാൻ മുതിരുന്നില്ല. എങ്കിലും അവയെ അവതരിപ്പിച്ചിരിക്കുന്ന രീതിയെ പ്രശംസിക്കാതെ വയ്യ. ചുരുക്കം ചിലരിൽ മാത്രം കഥയെ ഒതുക്കി മികച്ച രീതിയിൽ പ്ലോട്ട് ക്രിയേറ്റ് ചെയ്യാൻ സാധിച്ചിട്ടുണ്ട് അണിയറപ്രവർത്തകർക്ക്. അതുകൊണ്ട് തന്നെ എല്ലാവരെയും പറ്റി നല്ലൊരു ഐഡിയ മനസ്സിൽ സൃഷ്ടിച്ചെടുക്കാൻ സാധിച്ചിട്ടുണ്ട്. ആസ്വാദനത്തിന് അത് ഗുണം ചെയ്തിട്ടുമുണ്ട്. പ്രതീക്ഷിക്കാതെ വന്ന ട്വിസ്റ്റുകൾ ചില ഭാഗങ്ങളുടെ മെല്ലെപ്പോക്കിനെ തുണച്ചിട്ടുണ്ട്.

🔻ഗംഭീര പ്രകടനം കൊണ്ട് സ്‌ക്രീൻ സ്‌പേസ് അപഹരിക്കുന്നത് Penn Badgley തന്നെയാണ്. പകരം വെക്കാനില്ലെന്ന് തോന്നിപ്പോവും വിധം മികച്ചത്. ഒപ്പം ബെക്കയും ചിരിയിലൂടെ മനം കവരുന്നുണ്ട്. സൗണ്ട്ട്രാക്കുകൾ മനോഹരമായിരുന്നു. നല്ല വിഷ്വലുകളും. എങ്കിലും ചിലയിടങ്ങളിൽ പ്രൊഡക്ഷൻ ക്വാളിറ്റി ഒരൽപം കൂടി ആവാമെന്ന് തോന്നി.

🔻ＦＩＮＡＬ ＶＥＲＤＩＣＴ🔻

സ്നേഹത്തിന്റെ നിറകുടമാണ് ജോ. ലോകത്തെ സകല കാമുകന്മാർക്കും ഭർത്താക്കന്മാർക്കും മാത്രകാപുരുഷോത്തമനാണ് ജോ. Be Like Joe.

ＡＢ ＲＡＴＥＳ ★★★½

സീരീസ് ടെലിഗ്രാം ചാനലിൽ ലഭ്യമാണ്. Abi Suggests

🔻ജയിലിലെ മുഴുവൻ തടവുകാരെയും മറ്റൊരു ഷെൽറ്ററിലേക്ക് കൊണ്ടുപോകാനുള്ള തിരക്കിലായിരുന്നു മേജർ ജാഹിദ്. ആ നേരത്ത് തന്നെയാണ് തനിക്ക് പ്രമോഷൻ ലഭിക്കുന്നുവെന്ന വാർത്തയും സുപ്പീരിയർ അദ്ദേഹത്തിന് എത്തിച്ചുകൊടുക്കുന്നുണ്ട്. അത്രയും നാളത്തെ തന്റെ സേവനത്തിനുള്ള അംഗീകാരമായി പ്രമോഷനെ ജാഹിദ് കണക്കാക്കുമ്പോഴാണ് അപ്രതീക്ഷിതമായ ഒരു സംഭവം ജയിലിൽ അരങ്ങേറിയത്. തടവുകാരിൽ ഒരാളെ കാണ്മാനില്ല. തന്റെ ഡ്യൂട്ടിയിൽ യാതൊരു വിട്ടുവീഴ്ചയും ചെയ്തിട്ടില്ലാത്ത ജാഹിദ് തടവുകാരനെ തേടിയിറങ്ങുന്നു.

Year : 2019
Run Time : 1h 40min

🔻IFFKയിലൂടെയാണ് ഈ സിനിമയെ പറ്റി കേൾക്കാനിടയായത്. ആ സമയത്ത് കാണാൻ സാധിച്ചില്ലെങ്കിലും പിന്നീട് പ്രിന്റ് ലഭ്യമാണെന്ന് അറിഞ്ഞപ്പോൾ സന്തോഷമായി. കാണാൻ തുടങ്ങുന്നത് വരെ ചിത്രത്തെ പറ്റി യാതൊരു ഐഡിയയും ഇല്ലായിരുന്നു. എന്നാൽ ഇത്ര ഗംഭീര അനുഭവമാണല്ലോ തീയേറ്ററിൽ മിസ്സായത് എന്നൊരു വിഷമം ബാക്കിയായിരുന്നു കാഴ്ച അവസാനിക്കുമ്പോൾ.

🔻തനിക്ക് സുപരിചിതമായ ജയിലറകൾ തനിക്കെതിരെ പോരാടുന്ന പ്രതീതിയായിരുന്നു ജാഹിദിന് ആ തടവുകാരൻ കാണാതായപ്പോൾ ഉണ്ടായത്. ആയിരം കുറ്റവാളികൾ രക്ഷപ്പെട്ടാലും ഒരു നിരപരാധി പോലും ശിക്ഷിക്കപ്പെടരുത് എന്ന Moto അല്ല ജാഹിദിന് ഉള്ളത്. സ്വന്തത്തെ അത്രമേൽ സ്നേഹിക്കുന്ന ഒരുവന്റെ പ്രതീതിയാണ് അദ്ദേഹം. അതുകൊണ്ട് തന്നെ തടവുകാരനെ എത്രയും വേഗം പിടിക്കുക എന്നൊരു ലക്‌ഷ്യം മാത്രമേ അദ്ദേഹത്തിനുള്ളൂ. എന്ത് വില കൊടുത്തും തന്റെ പ്രമോഷൻ കൈവിട്ട് കളയാതിരിക്കുക. സ്വാർത്ഥതയുടെ പര്യായമായ ഒരുവനെ നമുക്കവിടെ കാണാൻ സാധിക്കും.

🔻മുഴുവൻ നേരവും കാണികളെ പിടിച്ചിരുത്തും വിധം ത്രില്ലിങ്ങായും ഒപ്പം തീർത്തും വിശ്വസനീയമായും കഥയെ അണിയിച്ചൊരുക്കുന്നതിൽ സംവിധായകൻ പൂർണ്ണമായി വിജയിച്ചിട്ടുണ്ട്. ഒറ്റ ലൊക്കേഷനിൽ മാത്രം കേന്ദ്രീകരിച്ചുള്ള കഥ പറച്ചിൽ പൂർണ്ണമായി നമ്മുടെ ആസ്വാദനത്തെ സ്വാധീനിക്കുന്നുണ്ട്. കഥാപാത്രങ്ങളിലേക്ക് ശ്രദ്ധ ചെലുത്തുന്ന ഓരോ രംഗങ്ങളും അവരുടെ സ്വഭാവസവിശേഷതകൾ എടുത്ത് പറയുന്നുണ്ട്. സെമി-റിയലിസ്റ്റിക്ക് രീതിയിലുള്ള ആഖ്യാനം ഇൻഡസ്ട്രിയുടെ തന്നെ ഭാഷയോട് ചേർന്ന് നിൽക്കുന്നതാണ്. ഒപ്പം ഗംഭീര പ്രകടനങ്ങളുടെ അടയാളപ്പെടുത്തൽ കൂടിയാവുന്നുണ്ട് ചിത്രം.

🔻ＦＩＮＡＬ ＶＥＲＤＩＣＴ🔻

പ്രേക്ഷകനെന്ന നിലയിൽ ഏറ്റവും ഇഷ്ടം തോന്നിയിട്ടുള്ള ഇൻഡസ്ട്രിയിൽ നിന്ന് മറ്റൊരു വസന്തം കൂടി പെയ്തിറക്കുകയാണ് The Warden. സത്യത്തെ തേടിയുള്ള അന്വേഷണത്തിൽ പല സ്വഭാവസവിശേഷതകളുള്ള വ്യക്തികൾ കൂടി കടന്നുവരുന്നതിലൂടെ ഏറെ താല്പര്യം ജനിപ്പിക്കുന്ന ഒന്നായി മാറുന്നുണ്ട് ഈ പ്ലോട്ട്. തീർച്ചയായും കണ്ടിരിക്കേണ്ട സിനിമകളുടെ കൂട്ടത്തിൽ ഒന്നായി മാറുന്നു ഈ ചിത്രവും.

ＡＢ ＲＡＴＥＳ ★★★★☆

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻രാത്രിയുടെ ശാന്തതയിൽ ആ നഗരം മുഴുവൻ അൽഫാസിന്റെ സ്വരത്തിനായി ചെവികകോർക്കും. അവന്റെ ഓരോ വാക്കിലും സാന്ത്വനം കണ്ടെത്തും. നല്ല നാളെകൾക്കായുള്ള പരിശ്രമത്തിനായി ഊർജ്ജം കണ്ടെത്തും. കഷ്ടതകളിൽ പോലും ആ വാക്കുകൾ ആശ്വാസമാവും. ആ നഗരത്തിൽ ഒരുവളായി അർച്ചനയും ഉണ്ടായിരുന്നു. അൽഫാസിന്റെ വാക്കുകൾക്ക് എന്നുമൊരു കേൾവിക്കാരിയായി..

Year : 2018
Run Time : 1h 56 min

🔻പ്രത്യേകിച്ച് ഒരു ചട്ടക്കൂടിൽ പണിതെടുത്ത തിരക്കഥയല്ല ചിത്രത്തിന്റേത്. ഏറെ ലളിതമായി എന്നാൽ ഹൃദ്യമായി നമ്മോട് സംവദിക്കുന്ന സംഭാഷണശകലങ്ങളിൽ നിന്ന് രൂപപ്പെടുന്ന കഥാപാത്രങ്ങൾ, അവരുടെ സ്വഭാവസവിശേഷതകൾ, സ്വാഭാവികമായി ഉടലെടുക്കുന്ന ഭാവപരിസരങ്ങൾ തുടങ്ങി അതിഭാവുകത്വങ്ങളോ ഏച്ചുകെട്ടലുകളോ എങ്ങും പ്രതിഫലിക്കാതെയുള്ള കഥ. ഒരുപക്ഷെ രണ്ട് മനസ്സുകൾ താങ്ങും തണലുമായി രൂപാന്തരപ്പെടുന്നതിന് മനോഹരമായ ദൃശ്യഭാഷ്യയൊരുക്കിയ സംവിധായകന്റെ മിടുക്ക് തന്നെയാവാം സിനിമയെ ഇത്ര പ്രിയപ്പെട്ടതാക്കിയത്. അത്ര പക്വമായ ഭാഷയിലാണ് കഥാപാത്രനിർമ്മിതിയും അവർ തമ്മിലുള്ള ആത്മബന്ധവും വരച്ചുകാട്ടുന്നത്. ഓരോ സംഭാഷണങ്ങളിലും നമുക്ക് കഥാപാത്രത്തോട് വല്ലാത്തൊരു അടുപ്പം തോന്നുംവിധം ആത്മാർത്ഥത പ്രതിഫലിക്കും. സൂക്ഷ്മമായ തിരക്കഥാപാടവം നമുക്ക് അനുഭവിച്ചറിയാം ഓരോ രംഗങ്ങളിലും.

🔻ഗീതാഞ്ജലി താപ്പ എന്ന നടിയുടെ ചിത്രം ആദ്യമായാണ് കാണുന്നത്. സ്‌ക്രീൻ നിറഞ്ഞുനിൽക്കുന്ന മിന്നുന്ന പ്രകടനം കൊണ്ട് മനസ്സ് കീഴടക്കി ആ സുന്ദരി. എന്തൊരു ഭംഗിയാണ് ഓരോ ഭാവങ്ങൾക്കും. ഓരോ ചിരിയും വല്ലാത്ത പ്രസരിപ്പ് സമ്മാനിക്കുന്നുണ്ട്. ഒപ്പം സെയിൻ ഖാനെയും ഈ അവസരത്തിൽ ഓർക്കുന്നു. ചില ചലനങ്ങൾ പോലും അദ്ദേഹത്തിന്റെ കഥാപാത്രത്തെ വെളിവാക്കുന്നുണ്ട്. തന്റെ ഭൂതകാലത്തെ പരാമർശിക്കുന്ന രംഗങ്ങളിലെ പ്രകടനം ഗംഭീരം. ഒരു തെന്നൽ പോലെ തഴുകിത്തലോടുന്ന പശ്ചാത്തലസംഗീതവും കണ്ണിന് കുളിർമയേകുന്ന കാഴ്ച്ചകളും സിനിമയെ കൂടുതൽ മനോഹരമാക്കുന്നു.

🔻ＦＩＮＡＬ ＶＥＲＤＩＣＴ🔻

ജീവിതത്തിൽ ഒരൽപം ബുദ്ധിമുട്ട് അനുഭവിച്ച ഘട്ടത്തിലാണ് ഈ ചിത്രം കാണാനിടയായത്. കണ്ട് കഴിഞ്ഞപ്പോൾ എന്തെന്നില്ലാത്ത ആശ്വാസം എനിക്കനുഭവപ്പെട്ടിരുന്നു. വ്യക്തിപരമായി അത്തരമൊരു അനുഭവമാണ് അൽഫാസും അർച്ചനയും സമ്മാനിച്ചത്. സ്വയം വിലയിരുത്തുക.

ＡＢ ＲＡＴＥＳ ★★★½

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻ജീവിതത്തിലെ കയ്പ്പേറിയ അനുഭവങ്ങൾ അരങ്ങേറിയില്ലായിരുന്നെങ്കിൽ, അല്ലെങ്കിൽ അവയൊക്കെ എന്നെന്നേക്കുമായി മനസ്സിൽ നിന്ന് മായ്ച്ച് സന്തോഷങ്ങളെ വേട്ടയാടുന്ന പ്രതിഭാസത്തിന് ഒരവസാനം കൊണ്ടുവരാൻ സാധിച്ചെങ്കിൽ എന്ന് ആരാണ് ആഗ്രഹിക്കാത്തത്.? പ്രസിദ്ധ എഴുത്തുകാരൻ Jiang തന്റെ ഓർമ്മകളെ എന്നെന്നേക്കുമായി ഇല്ലാതാക്കാനുള്ള തീരുമാനങ്ങൾ കൈക്കൊണ്ടിരിക്കുകയാണ്. ഭാര്യയുമായുള്ള അസ്വാരസ്യങ്ങളും നിരന്തരമായ വഴക്കുകൾക്കും അറുതിയിടുക എന്ന തീരുമാനത്തിന് അദ്ദേഹത്തിന്റെ ജീവിതത്തിൽ ഏറെ പ്രാധാന്യമുണ്ട്. ആ ഓർമ്മകളെ കൊല ചെയ്യാനായി ഒരു ഓപ്പറേഷന് അദ്ദേഹം വിധേയമാകുന്നു. എന്നാൽ ശേഷം അദ്ദേഹത്തെ വേട്ടയാടിയത് തൻ ഇതുവരെ അനുഭവിച്ചിട്ടില്ലാത്ത, തന്റെ  തരത്തിലും ബന്ധമില്ലാത്ത ചില ദുസ്സഹമായ സ്വപ്നങ്ങളാണ്.

Year : 2017
Run Time : 1h 59min

🔻കഥയുടെ ബാക്കി ഭാഗത്തെ പറ്റി പരാമർശിക്കുന്നില്ല. അത് തീർച്ചയായും ആസ്വാദനത്തെ ബാധിക്കും.എങ്കിലും ഒരു അവലോകനമെന്ന നിലയിൽ ചില കാര്യങ്ങൾ എടുത്തുപറയാതെ വയ്യ. ഒരു ഫാന്റസി കൺസെപ്റ്റ് സിനിമയാക്കുമ്പോൾ കാണികളെ ആകാംഷയിലാഴ്ത്താൻ എന്തൊക്കെ ഘടകങ്ങൾ വേണോ അതൊക്കെയും ഇവിടെ ഫലപ്രദമായി ഉപയോഗിച്ചിരിക്കുന്നത് കാണാം. തുടക്കത്തിലേ കൺഫ്യൂഷനിസത്തിലൂന്നിയ കഥ പറച്ചിൽ പോലെ തന്നെ നാം പ്രതീക്ഷിച്ചിടത്ത് നിന്നും അപ്രതീക്ഷിതമായ കാര്യങ്ങൾ പിറന്നുവീഴുന്ന കാഴ്ചകൾ പോലും ത്രില്ലർ എന്ന നിലയിൽ ഏറെ ഗുണം ചെയ്തിട്ടുണ്ട്.

🔻ആഖ്യാനശൈലിയിൽ ഏറെക്കുറെ ഈ മാതൃക പിൻപറ്റുന്ന മറ്റൊരു ചിത്രം കണ്ടിട്ടുള്ളത് കൊണ്ട് തന്നെ ഒടുവിൽ എന്തായിത്തീരും എന്നൊരു ഐഡിയ മനസ്സിൽ രൂപപ്പെട്ടിരുന്നു. എന്നാൽ തീർത്തും അപ്രതീക്ഷിതമായ ഒരു എലമെന്റ് നമ്മിലേക്ക് ഇട്ട് തന്ന് കാഴ്ചപ്പാടിനെ തന്നെ മാറ്റിമറിക്കാൻ സംവിധായകനായിട്ടുണ്ട്. എന്നാൽ അതിന് അധികം ആയുസ്സുണ്ടായില്ല എന്നത് മാത്രമാണ് പോരായ്മയായി തോന്നിയത്. പ്രതീക്ഷിച്ച രീതിയിൽ തന്നെ ചിത്രത്തിന് തിരശീല വീണു. എങ്കിലും ആകെത്തുകയിൽ ക്ലൈമാക്സ് അടക്കം തൃപ്തികരമായിരുന്നു. കുറച്ച് സംശയങ്ങൾ ബാക്കി നിർത്തി എന്നതും കൂട്ടിച്ചേർക്കുന്നു. മികച്ച പ്രകടനങ്ങളും നിലവാരം പുലർത്തുന്ന ടെക്നിക്കൽ വശങ്ങളും പ്രേക്ഷകരെ പിടിച്ചിരുത്താൻ ഉതകുന്നത് തന്നെ

🔻ＦＩＮＡＬ ＶＥＲＤＩＣＴ🔻

തന്റെ ജീവിതത്തിൽ അത്രയേറെ ഭാരമായി കണ്ടിരുന്ന എന്ത് ഓർമ്മകളാണ് Jiangന് ഉണ്ടായിരുന്നത്.? ഓർമ്മകളെ ഇല്ലായ്മ ചെയ്തശേഷം അദ്ദേഹത്തിന്റെ ജീവിതത്തിന് എന്താണ് സംഭവിച്ചത്.? ഉത്തരങ്ങൾക്ക് സാക്ഷിയാകാൻ ധൈര്യമായി സിനിമയെ സമീപിച്ചോളൂ. അണ്ടർറേറ്റഡ് എന്ന് തോന്നിയ മറ്റൊരു ചൈനീസ് ത്രില്ലർ കൂടി ആസ്വദിക്കാം..

ＡＢ ＲＡＴＥＳ ★★★½

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

മുൻ വർഷങ്ങളുമായി താരതമ്യം ചെയ്യുമ്പോൾ എന്നെ തൃപ്തിപ്പെടുത്തി മലയാളസിനിമയുടെ എണ്ണം കുറവാണെന്ന് പറയേണ്ടി വരും. പ്രതീക്ഷ വെച്ച് പുലർത്തിയ പേരുകൾ പോലും നിരാശയുടെ പടുകുഴിയിലേക്ക് തള്ളിവിടുന്ന അനുഭവങ്ങൾ സമ്മാനിച്ചതാണ് ഏറ്റവും വിഷമകരം. മുൻ വർഷങ്ങളിൽ Top 10 എന്ന പട്ടിക പൂർത്തിയാക്കാൻ തക്ക നല്ല അനുഭവങ്ങൾ ഉണ്ടായപ്പോൾ ഈ വർഷം അതുപോലും തികക്കാനായില്ല എന്നതാണ് വസ്തുത. എങ്കിലും തൃപ്തിപ്പെടുത്തി ചിത്രങ്ങൾ താഴെ കൊടുക്കുന്നു.

1. കുമ്പളങ്ങി നൈറ്റ്സ്


കുമ്പളങ്ങിയോളം ഹൃദയം കവർന്ന മറ്റൊരു ചിത്രം ഈ വർഷം ഉണ്ടായിട്ടില്ല എന്നാണ് എന്റെ അഭിപ്രായം. നാല് സഹോദരന്മാരുടെ ജീവിതം ശ്യാം പുഷ്ക്കരൻ രചിക്കുകയും മധു നാരായണൻ അഭ്രപാളികളിൽ പകർത്തുകയും ചെയ്തപ്പോൾ പകരം വെക്കാനാവാത്ത അനുഭവം സമ്മാനിച്ച് കുമ്പളങ്ങിയിലെ മായാരാത്രികൾ. Male Chauvinism ഇത്ര കൃത്യമായും രസകരമായും അവതരിപ്പിച്ച ചിത്രം വേറെയുണ്ടാവില്ല. ഷമ്മിയെന്ന കഥാപാത്രത്തിന്റെ പോട്രെയൽ ഫഹദിലൂടെ പൂർണ്ണത കൈവരിച്ചപ്പോൾ സൗബിനും ഷെയ്നും സമാനതകളില്ലാത്ത പ്രകടനങ്ങളിലൂടെ മനസ്സ് കവർന്നു. ഈ വര്ഷം എന്നെ ഏറ്റവും തൃപ്തിപ്പെടുത്തിയ ചിത്രമായി മാറി കുമ്പളങ്ങി നൈറ്റ്സ്. രണ്ട് തവണ തീയേറ്ററിലും വിരലിലെണ്ണാവുന്നതിലും അധികം തവണ മറ്റ് വഴികളിലൂടെയും എന്നിലെ കാഴ്ചക്കാരനെ കുമ്പളങ്ങിയിൽ എത്തിക്കാനും ചിത്രത്തിനായി.

 കൂടുതൽ വായനക്ക് Click Here

2. മൂത്തോൻ


മറക്കാനാവാത്ത, എന്നാൽ ഒരിക്കൽ കൂടി കാണാൻ മനസ്സ് അനുവദിക്കാത്ത അനുഭവമാണ് മൂത്തോൻ സമ്മാനിച്ചത്. പ്രതിഭാശാലികളായ ഒരു കൂട്ടം ആളുകളുടെ കരവിരുത് അടയാളപ്പെടുത്തുന്ന ചിത്രമാണ് മൂത്തോൻ. സംവിധായിക ഗീതു മോഹൻദാസിൽ തുടങ്ങി നായകവേഷം കൈകാര്യം ചെയ്ത നിവിൻ പോളിയടക്കം ആ ലിസ്റ്റിൽ പെടും. മലയാളസിനിമ മുന്നോട്ട് വെക്കാൻ മടിക്കുന്ന, അല്ലെങ്കിൽ കാണികൾ ജാള്യതയോടെ നോക്കിക്കാണുന്ന പ്രമേയത്തെ ദൃശ്യഭാഷ്യത്തിലെ മികവ് കൊണ്ട് ഗംഭീര അനുഭവമാക്കുന്നുണ്ട് സംവിധായിക. രണ്ട് തരത്തിലുള്ള കഥാപാത്രങ്ങളായി നിവിൻ പോളിയെന്ന നടന്റെ ക്യാലിബർ സിനിമയിൽ കാണാനായപ്പോൾ അത്ഭുതപ്പെടുത്തും വിധമാണ് ആ കഥാപാത്രത്തെ ഉൾക്കൊള്ളാനായത്. റോഷൻ മാത്യുവിന്റെ പ്രകടനവും എടുത്ത് പറയേണ്ടത് തന്നെ. കണ്ട് കഴിഞ്ഞപ്പോൾ മനസ്സിനെ പൂർണ്ണമായി ഉലച്ച ചിത്രങ്ങളിൽ ഒന്നായി മൂത്തോൻ.

3. ഇഷ്‌ക്


ഈ വർഷം തീയേറ്ററിൽ കാണാൻ സാധിക്കാഞ്ഞതിൽ അതീവദുഃഖം തോന്നിയ സിനിമയാണ് ഇഷ്‌ക്. സിനിമ മുന്നോട്ട് വെക്കുന്ന പൊളിറ്റിക്സിലായാലും അതിന്റെ അവതരണത്തിലായാലും എന്നെ എന്തെന്നില്ലാതെ തൃപ്തിപ്പെടുത്താൻ ചിത്രത്തിനായി. തീരെ പ്രതീക്ഷിക്കാത്ത രീതിയിലുള്ള പെൺപൊളിറ്റിക്സിന്റെ അവതരണം അക്ഷരാർത്ഥത്തിൽ കയ്യടിക്കാൻ പ്രേരിപ്പിക്കുന്നതായിരുന്നു. വ്യകതമായ കഥാപാത്രനിർമ്മിതിയിലൂടെ കേന്ദ്രകഥാപാത്രങ്ങളെ നമ്മിലേക്ക് എത്തിക്കുകയും തുടർന്ന് മനസികപിരിമുറുക്കം തോന്നിക്കും വിധം സന്ദർഭങ്ങളിലൂടെ നയിക്കുകയും ചെയ്തപ്പോൾ ഒരു ത്രില്ലർ കാണുന്ന അതേ അനുഭൂതിയിലായിരുന്നു ഞാൻ. ഭൂരിഭാഗം കാണികളെയും തൃപ്തിപ്പെടുത്താൻ നോക്കാതെ വ്യക്തമായ പൊളിറ്റിക്കൽ അപ്രോച്ചിലൂടെ തൻ ഉദ്ദേശിച്ച കാര്യം സമൂഹത്തിലേക്കെത്തിച്ച സംവിധായകന് കയ്യടികൾ.

4. തമാശ


റീമേക്ക് എന്നതിന്റെ നിർവചനം പൊളിച്ചെഴുതുകയായിരുന്നു എന്നെ സംബന്ധിച്ച് തമാശ. പ്രമേയത്തിലെ വ്യത്യസ്തത കൊണ്ട് എന്നിലെ ഇഷ്ടം സമ്പാദിച്ച സിനിമയാണ് Ondu Motteya Kathe. അതിനെ പൂർണ്ണമായി മലയാളത്തിലേക്ക് എടുക്കാതെ തന്റെ വ്യക്തമായ കയ്യൊപ്പ് പതിപ്പിക്കുന്നുണ്ട് സംവിധായകൻ തമാശയിലൂടെ. ഗൗരവകരമായ പ്രമേയത്തെ തെല്ലും ഓവറാക്കാതെ ലാളിത്യത്തോടെയും സരസമായും അവതരിപ്പിക്കുന്നതിൽ അഷ്‌റഫ് ഹംസ എന്ന സംവിധായകൻ വിജയിച്ചു. മനസ്സിന് നനുത്ത സുഖവും പൂർണ്ണ തൃപ്തിയും സമ്മാനിക്കാൻ തമാശക്കായപ്പോൾ പ്രകടനങ്ങളിലൂടെ വിനയ് ഫോർട്ടും ചിന്നുവും പകരംവെക്കാനില്ലാത്ത അഭിനേതാക്കളായി. കാണികളെ ചിന്തിപ്പിക്കാനും ചിരിപ്പിക്കാനും വക നൽകുന്ന സിനിമകളുടെ ലിസ്റ്റിൽ തമാശയും ഇടംപിടിച്ചു.

5. ഉണ്ട


ശക്തമായ രാഷ്ട്രീയം വെച്ചുപുലർത്തി കാണികളുമായി സംവദിക്കുന്ന സിനിമയെന്ന രീതിയിൽ ഈ കാലഘട്ടത്തിൽ ഏറെ പ്രസക്തമാണ് ഉണ്ടയെന്ന ചിത്രം. ഭരണഗൂഢവുമായി കലഹിക്കുന്നവരെ മാവോയിസ്റ്റുകളായും കലാപകാരികളായും ചാപ്പ കുത്തുന്ന രാജ്യത്ത് ഇത്തരമൊരു പ്രമേയം മുന്നോട്ട് വെക്കാൻ കാണിച്ച ധൈര്യം അഭിനന്ദിക്കാതെ വയ്യ. രാജ്യത്തിന്റെ അടിസ്ഥാനമൂല്യങ്ങൾ സംരക്ഷിക്കാനായി ജനാധിപത്യവിശ്വാസികൾ ഒന്നടങ്കം മുന്നോട്ട് വരുന്ന ഈ സാഹചര്യത്തിൽ ഈ ചിത്രം എത്രമാത്രം പ്രസക്തമാണെന്ന് പറഞ്ഞ് തരേണ്ട ആവശ്യം ഉണ്ടെന്ന് തോന്നുന്നില്ല. റിയലിസ്റ്റിക്കായ അവതരണത്തിലൂടെ കുറെ പച്ചയായ ജീവിതങ്ങളെ കാട്ടിത്തരാൻ ചിത്രത്തിനായി. മമ്മൂട്ടിയെന്ന നടന്റെ മികച്ച പ്രകടനത്തിന് സാക്ഷിയാവാനും ചിത്രം സഹായിച്ചു.

6. ജല്ലിക്കെട്ട്


ജല്ലിക്കെട്ട് സമ്മാനിച്ച തീയേറ്റർ അനുഭവം മുൻമാതൃകകൾ ഇല്ലാത്തതായിരുന്നു. ഇനി അങ്ങനെയൊന്ന് ഉണ്ടാവുമോ എന്നും അറിയില്ല. 'No Plans To Change, No Plans To Impress' എന്ന തന്റെ വാക്കുകളെ മുറുക്കിപ്പിടിക്കുന്ന സംവിധായകൻ ലിജോ ജോസ് എന്ന് ഓരോ ചിത്രം കഴിയുമ്പോഴും അദ്ദേഹം തെളിയിച്ചുകൊണ്ടിരിക്കുകയാണ്. സ്ക്രിപ്റ്റ് വർക്കുകളിലെ കൺവെൻഷണൽ രീതികളെ കാറ്റിൽ പറത്തി സംവിധായകൻ എന്ന രീതിയിൽ ലിജോ ജോസ് സർവ്വാധിപത്യം സ്ഥാപിക്കുന്ന കാഴ്ചയായിരുന്നു ജല്ലിക്കെട്ടിൽ കാണാതായത്. സിവിലൈസ്ഡ് എന്ന് നാം വീമ്പ് പറയുമ്പോഴും ആദിമ മനുഷ്യനിൽ നിന്ന് തെല്ലും വ്യതിചലിച്ചിട്ടില്ല എന്ന് സംവിധായകൻ സ്ഥാപിക്കുമ്പോൾ അഭിനേതാക്കളുടെ പ്രകടനങ്ങളിൽ ഒഴികെ മറ്റെല്ലാ അർത്ഥത്തിലും പൂർണ്ണമായി തൃപ്തിപ്പെടുത്താൻ ചിത്രത്തിനായി.

7. കെട്ട്യോളാണ് എന്റെ മാലാഖ.


ഏതൊരാളും തുറന്ന് പറയാൻ മടിക്കുന്ന ഗൗരവകരമായ പ്രമേയത്തെ കുടുംബപ്രേക്ഷകർക്ക് ഒന്നടങ്കം ആസ്വദിക്കാൻ സാധിക്കും വിധം ഭംഗിയായ അവതരണത്തിലൂടെ പൂർണ്ണമായി തൃപ്തിപ്പെടുത്തിയ ചിത്രമാണ് കെട്ട്യോളാണ് എന്റെ മാലാഖ. ഒരു വ്യക്തിയുടെ, സമൂഹത്തിന്റെ വളർച്ചയിൽ 'Sex Education'ന് എത്രത്തോളം പങ്കുണ്ട് എന്ന് വ്യക്തമായി കാട്ടിത്തരുന്നുണ്ട് ചിത്രം. ഇങ്ങനെയും ഈ വിഷയത്തെ അവതരിപ്പിക്കാമോ എന്ന് അത്ഭുതം കൂറും വിധം എന്നിലെ ആസ്വാദകനെ അതിശയിപ്പിച്ചു ചിത്രം. സാന്ദർഭിക നർമ്മങ്ങളാലും സരസമായ സംഭാഷണങ്ങളാലും നമുക്ക് ചുറ്റുമുള്ളവരെന്ന് തോന്നിക്കുന്ന കഥാപാത്രങ്ങളാലും മനം കവരാൻ ചിത്രത്തിനായി. ആസിഫലി എന്ന നടന്റ വളർച്ചയിൽ വലിയൊരു പങ്ക് സ്ലീവാച്ചൻ എന്ന കഥാപാത്രത്തിനുണ്ട്. അത്ര ഭാവഭദ്രമായിരുന്നു ആ കഥാപാത്രം.

8. തണ്ണീർമത്തൻ ദിനങ്ങൾ.


ഈ വർഷത്തെ സർപ്രൈസ് ഹിറ്റ്. ഗോദക്ക് ശേഷം ഏറ്റവും ചിരിച്ചുല്ലസിച്ച് കണ്ട സിനിമയാണ് തണ്ണീർമത്തൻ ദിനങ്ങൾ. ഈ വർഷം ഏറ്റവും കൂടുതൽ തവണ തീയേറ്ററിൽ കണ്ട ചിത്രം. ഓരോ രംഗങ്ങളിലും നൊസ്റ്റാൾജിയ സമ്മാനിച്ച, തുടക്കം മുതൽ ഒടുക്കം വരെ ഫ്രഷ്‌നെസ്സ് നിറഞ്ഞ് നിൽക്കുന്ന, ഓരോ ഡയലോഗിലും ഹ്യൂമർ ഉൾകൊള്ളുന്ന മികച്ച ചിത്രം. ലളിതമായ കഥയെ ഏത് പ്രായക്കാർക്കും ഒരുപോലെ ആസ്വദിക്കാനാകും വിധം മനോഹരമായി അവതരിപ്പിച്ചിടത്ത് തന്റേതായ സ്ഥാനം കണ്ടെത്തുന്നുണ്ട് ചിത്രം. കിടിലൻ പ്രകടനങ്ങളുമായി നിറഞ്ഞ് നിൽക്കുന്ന കഥാപാത്രങ്ങളും ഇമ്പമുള്ള ഗാനങ്ങളും മനോഹരമായ ഫ്രെയിമുകളുമൊക്കെയായി മനസ്സിന് സന്തോഷം മാത്രം സമ്മാനിക്കുന്ന ചിത്രം. ഇനിയും പ്രതീക്ഷ വെക്കാവുന്ന തിരക്കഥാകൃത്തുക്കളെയും സംവിധായകനെയും ചിത്രം സമ്മാനിച്ചു.

ഇവ കൂടാതെ മലയാളത്തിന്റെ coming of age സിനിമയായി കൂട്ടാവുന്ന 'ജൂൺ', സൈക്കോളജിക്കൽ ത്രില്ലറായി ടെക്നിക്കലി നല്ലൊരു തീയേറ്റർ അനുഭവമായ 'അതിരൻ', ശരാശരിയിൽ ഒതുങ്ങിയ തിരക്കഥയെ സംവിധാനമികവ് കൊണ്ട് അടയാളപ്പെടുത്തിയ 'ഉയരെ', പ്രതീക്ഷക്ക് വിപരീതമായി ഹൃദ്യമായ അനുഭവം സമ്മാനിച്ച 'ലൂക്ക', സുരാജിന്റെയും രജിഷയുടെയും മികച്ച പ്രകടനങ്ങൾ കൊണ്ട് സമ്പന്നമായ സ്പോർട്ട്സ് മൂവി 'ഫൈനൽസ്', സരസമായ അവതരണം കൊണ്ടും ഹാസ്യരംഗങ്ങൾ കൊണ്ടും ചിരി സമ്മാനിച്ച 'ജനമൈത്രി', ഫീൽ ഗുഡ് ജേണറിൽ സന്തോഷിപ്പിച്ച 'മനോഹരം', സുരാജിന്റെ അതിഗംഭീര പ്രകടനം കൊണ്ടും കൈകാര്യം ചെയ്ത പ്രമേയം കൊണ്ടും ശ്രദ്ധ നേടിയ 'ആൻഡ്രോയ്ഡ് കുഞ്ഞപ്പൻ Version 5.25', സർവ്വൈവൽ ജേണറിൽ തൃപ്തി നൽകിയ 'ഹെലൻ', ടോക്സിക്ക് റിലേഷൻഷിപ്പുകളെ പറ്റി ശക്തമായ ഭാഷയിൽ സംസാരിച്ച 'Stand Up', എന്നീ ചിത്രങ്ങളും മികച്ച അനുഭവങ്ങൾ തന്നെയായിരുന്നു. ഫെസ്റ്റീവ് സീസണിൽ 'ഡ്രൈവിങ്ങ് ലൈസൻസ്‌' തൃപ്തിപ്പെടുത്തിയപ്പോൾ ;പ്രതി പൂവൻകോഴി' ശരാശരിക്ക് മുകളിലുള്ള അനുഭവം മാത്രമായി ഒതുങ്ങി. '9' മികച്ചൊരു experimental സിനിമയായി തീയേറ്റർ അനുഭവം കൊണ്ട് ഞെട്ടിച്ചു. ഒരുപാട് പ്രതീക്ഷയോടെ കാണാനിരുന്ന 'വൈറസ്' ശരാശരിക്ക് മുകളിൽ നിൽക്കുന്ന അനുഭവം മാത്രമായി.

പ്രതീക്ഷകളോടെ ഫാൻസ്‌ ഷോ ടിക്കറ്റിന് തന്നെ കയറിയ 'ലൂസിഫർ' ശരാശരിയിൽ ഒതുങ്ങിയതും ശങ്കർ രാമകൃഷ്ണൻ എന്ന പേരിലുള്ള വിശ്വാസം തന്നെ ഇല്ലാതാക്കിയ 'പതിനെട്ടാം പടി'യും ഈ വർഷത്തെ തീരാദുഃഖങ്ങളായി. .Mr & Mrs. Rowdy'. 'അമ്പിളി', 'അർജന്റീന ഫാൻസ്‌ കാട്ടൂർക്കടവ്', 'And The Oscar Goes To', 'Underworld' തുടങ്ങി നിരാശ മാത്രം സമ്മാനിച്ച ചിത്രങ്ങളുടെ ലിസ്റ്റ് നീണ്ട് പോവുന്നു.

ഇത്തവണ ഏറ്റവും വിസ്മയിപ്പിച്ച ഇൻഡസ്ട്രി തെലുഗ് ആണ്. 'Awe', 'മനു', 'Agent Sai Srinivasa Atreya', 'Brochevarevarura', 'Gang Leader', 'Evaru', തുടങ്ങി ഒന്നിനൊന്ന് വ്യത്യസ്തമായ സിനിമകളാണ് തെലുഗ് ഇൻഡസ്ട്രി സമ്മാനിച്ചത്. ഒരുപക്ഷെ പല മലയാളം സിനിമകളേക്കാളും ആസ്വാദനം ഇവ സമ്മാനിച്ചിരുന്നു എന്നതാണ് സത്യം. ബോളിവുഡിൽ 'Article 15' ഈ വർഷത്തെ ഇഷ്ടചിത്രമായപ്പോൾ Gully Boy, Luka Chuppi, Badla, Hamid, Mard Ko Dard Nahi Hota, Notebook, Chhicchore, Section 375, The Sky Is Pink എന്നീ സിനിമകളും ഏറെ തൃപ്തിപ്പെടുത്തി. തമിഴിൽ 'പേരൻപ്' ഈ വർഷത്തെ തന്നെ ഹൃദയഭേദകമായ അനുഭവമായപ്പോൾ ത്രില്ലറെന്ന നിലയിൽ 'തടം' ത്രപ്തിപ്പെടുത്തി. Once In A Lifetime എന്ന വിശേഷണം എല്ലാം കൊണ്ടും അർഹിച്ച അനുഭവമാണ് 'സൂപ്പർ ഡീലക്സ്' സമ്മാനിച്ചത്. Game Over, House Owner, അസുരൻ, ജീവി, കൈദി എന്നിങ്ങനെ നീളും ഈ ലിസ്റ്റും.

ഈ വർഷം പ്രകടനം കൊണ്ട് അമ്പരപ്പിച്ച നടൻ സുരാജ് തന്നെയാണ്. വികൃതിയും ആൻഡ്രോയ്ഡ് കുഞ്ഞപ്പനും ഫൈനൽസുമൊക്കെ സിനിമകളുടെ പൂർണ്ണതയിൽ  നടനെ എത്രത്തോളം ആശ്രയിച്ചിട്ടുണ്ടെന്ന് കണ്ടറിയാൻ സാധിക്കും. സത്യത്തിൽ അസൂയാവഹം തന്നെയാണ് സുരാജിലെ നടന്റെ വളർച്ച. മറ്റാർക്കും സാധിക്കില്ല എന്ന്  തോന്നും വിധം ആ കഥാപാത്രങ്ങളെ Perfect ആക്കുന്നുണ്ട് അദ്ദേഹം. ആൻഡ്രോയ്ഡ് കുഞ്ഞപ്പനിലെ ശരീരഭാഷ്യമൊക്കെ അക്ഷരാർത്ഥത്തിൽ ഞെട്ടിച്ചുകളഞ്ഞു. ഒരുപാട് അംഗീകാരങ്ങൾ തേടിയെത്താൻ പ്രാപ്തിയുള്ള പ്രകടനത്തിന് മുന്നിൽ ആരും കണ്ണടക്കാതിരിക്കട്ടെ എന്ന് മാത്രമാണ് പ്രാർത്ഥന. നായികമാരിൽ റജിഷ തന്നെയാണ് സ്‌കോർ ചെയ്തിട്ടുള്ളത്. ജൂൺ, ഫൈനൽസ്, stand up എന്നീ ചിത്രങ്ങളിൽ തന്റെ കഥാപാത്രത്തെ മികച്ച രീതിയിൽ അവതരിപ്പിച്ചിട്ടുണ്ട് റജിഷ. മിനിമം ഗ്യാരന്റി നടന്മാരിലേത് പോലെ നടിമാരിലും പ്രതീക്ഷിക്കാവുന്ന ഒരു ബ്രാന്റ് ആയി മാറിയിട്ടുണ്ട് റജിഷ.

കുമ്പളങ്ങിയിലെ സജിയെ ഈ നിമിഷം സ്മരിക്കാതെ വഴിയില്ല. 'സൗബിൻ' എന്ന നടനിൽ എത്രത്തോളം ആ കഥാപാത്രം ഭദ്രമാണെന്ന് പല രംഗങ്ങളിലൂടെ പ്രകടമാണ്. ഇഷ്ഖിൽ 'ഷൈൻ ടോം ചാക്കോ'യുടെ പ്രകടനം ഗംഭീരം തന്നെ. ഉയരെയിൽ 'പാർവതി', പ്രതി പൂവൻകോഴിയിൽ 'മഞ്ജു വാര്യർ', വാരിക്കുഴിയിലെ കൊലപാതകത്തിൽ 'അമിത് ചാലക്കൽ',  അതിരനിൽ 'സായ് പല്ലവി', ഉയരെ, കക്ഷി അമ്മിണിപ്പിള്ള, എന്നീ ചിത്രങ്ങളിൽ 'ആസിഫലി', ഓസ്കാറിൽ ;ടോവീനോ', ഹെലനിൽ 'അന്ന ബെൻ', എന്നിവരും മികച്ച പ്രകടനം കൊണ്ട് ശ്രദ്ധ നേടി.

നവാഗത സംവിധായകരാണ് ഈ വർഷം തൃപ്തിപ്പെടുത്തിയത് എന്നത് ശ്രദ്ധേയമാണ്. കുമ്പളങ്ങിയിലൂടെ 'മധു സി. നാരായണൻ', ഇഷ്ഖിൽ 'അനുരാജ് മനോഹർ', കെട്ട്യോളാണ് എന്റെ മാലാഖയിൽ 'നിസാം ബഷീർ', ഉയരെയിൽ 'മനു അശോകൻ;, തണ്ണീർമത്തനിൽ 'ഗിരീഷ്', അതിരനിലൂടെ 'വിവേക്', തമാശയുടെ 'അഷ്‌റഫ് ഹംസ', ഫൈനൽസിലൂടെ 'അരുൺ', ഹെലനിലൂടെ കഴിവ് തെളിയിച്ച 'മാത്തുക്കുട്ടി', ആൻഡ്രോയ്ഡ് കുഞ്ഞപ്പന്റെ സംവിധായകൻ 'രതീഷ്' എന്നിവർ ഒരുപാട് പ്രതീക്ഷകൾ ബാക്കിവെക്കുന്നുണ്ട്. നാളെയുടെ മലയാളസിനിമ ഇവരുടെ കയ്യിൽ ഭദ്രമാണെന്ന് വിളിച്ചോതുന്നു ഓരോ പ്രതിഭകളും. അടുത്ത വർഷം വരാനിരിക്കുന്ന ഒരുപാട് പ്രതീക്ഷകളുള്ള പ്രോജക്ടുകൾ ഉണ്ട്. അവ കൂടാതെ പുതിയ പ്രമേയങ്ങളും അനുഭവങ്ങളും അനുഭൂതികളും കാണികൾക്ക് നൽകാൻ മലയാള സിനിമക്ക് സാധിക്കട്ടെ എന്നാശംസിക്കുന്നു.

#AB

🔻ആ രാത്രി അവർ ആഘോഷത്തിമിർപ്പിലായിരുന്നു. സ്‌കൂൾ കാലഘട്ടം കഴിഞ്ഞ് കോളേജുകളിലേക്ക് ചേക്കേറുന്നതിലുള്ള സന്തോഷവും ആവേശവും അവരിൽ പ്രകടമാണ്. ഒരു ദ്വീപിൽ ഒറ്റപ്പെട്ട് കിടക്കുന്ന സ്‌കൂളിൽ എന്തെന്നിലാതെ ഉല്ലസിക്കുകയാണ് അവർ. എന്നാൽ അതെല്ലാം തകർക്കാൻ അപ്രതീക്ഷിതമായി ആ സുനാമിത്തിരമാലകൾ അവരെത്തേടിയെത്തി. പിന്നീട് അവിടെ ബാക്കിയായത് 36 കുട്ടികളാണ്. എങ്ങനെ രക്ഷപ്പെടുമെന്ന് പോലുമറിയാതെ കുഴങ്ങി നിൽക്കുന്ന 36 പേർ.

Year : 2019
Episode : 7
Run Time : 45-50 min

🔻സൂക്ഷ്മതയോടെ കൈകാര്യം ചെയ്യേണ്ട ജേണറാണ് സർവൈവൽ ത്രില്ലർ എന്നത്. ഒരിടത്ത് പോലും വിരസമാവാതെ വിശ്വസനീയമായി ഓരോ നിമിഷവും മുന്നേറാൻ ചിത്രത്തിന് സാധിക്കണം. ഇല്ലെങ്കിൽ കാണികളിൽ യാതൊരു ഇമ്പാക്റ്റും ഉണ്ടാക്കാൻ ചിത്രത്തിനാവില്ല. ഇതൊരു സീരീസാവുമ്പോൾ അതിനേക്കാളേറെ സൂക്ഷ്മത ഉണ്ടാവണം. പ്രത്യേകിച്ച് സർവൈവൽ എന്നതിലുപരി മറ്റ് പല ജേണറുകളുടെയും ബ്ലെന്റ് ആവുമ്പോൾ. ഈ സീരീസും അങ്ങനെയൊന്നാണ്.

🔻ആ ദ്വീപിൽ സർവൈവ് ചെയ്യേണ്ടുന്നതിനാവശ്യമായ ഘടകങ്ങളും സ്വഭാവങ്ങളും ഉൾക്കൊള്ളിച്ച കഥാപാത്രങ്ങളെ തന്നെ കേന്ദ്രീകൃതമാക്കി കഥ പറഞ്ഞിരിക്കുകയാണ് സംവിധായകൻ. അവരിലാണ് സീരീസ് കൂടുതൽ ഫോക്കസ് ചെയ്യുന്നത്. കൃത്യമായ ഐഡന്റിറ്റി പലർക്കും ബാക്ക്സ്റ്റോറികളിലൂടെ നൽകാനായിട്ടുണ്ട്. എന്തിനേറെ ആ ദിവസങ്ങളിൽ നടക്കുന്ന സംഭവങ്ങളിലൂടെ തന്നെ പലരുടെയും സ്വഭാവങ്ങൾ മനസ്സിലാക്കാൻ സാധിക്കുന്നുണ്ട്. 'ക്രാം' എന്ന കഥാപാത്രം നായകതുല്യനാണെങ്കിൽ പോലും antagonist എന്ന നിലയിൽ പരിചയപ്പെടുത്തുന്ന കഥാപാത്രങ്ങൾ ആരുമില്ല. ചില സന്ദർഭങ്ങളിൽ അത്തരത്തിലുള്ളവർ ഉടലെടുക്കുന്നു എന്ന് മാത്രം. ഭൂരിഭാഗം കഥാപാത്രങ്ങൾക്കും അവരുടേതായ existence നൽകാനും സംവിധായകനായിട്ടുണ്ട്. ഇതെല്ലാം കണക്റ്റ് ചെയ്യുന്ന വിധമാണ് ഏറെ ഹൈലൈറ്റ് ചെയ്യപ്പെടേണ്ടത്. 'Super Natural' elements ഭംഗിയായി കോർത്തിണക്കുകയാണ് ഈ കഥാപാത്രങ്ങളിലൂടെ.

🔻കഥാപാത്രങ്ങൾ തമ്മിലുള്ള ആത്മബന്ധങ്ങളും അവരുടെ ആത്മസംഘർഷങ്ങളും നന്നായി അവതരിപ്പിക്കാൻ സാധിച്ചിട്ടുണ്ട് സംവിധായകന്. Homosexual ആയ കഥാപാത്രങ്ങളിൽ അത് എടുത്തറിയാൻ സാധിക്കും. ഒരുപക്ഷെ ഏറ്റവും ആഘാതമുണ്ടാക്കുന്ന മൊമന്റുകൾ സമ്മാനിക്കുക അവരാവും. Kraam, May എന്നിവർ തമ്മിലുള്ള റിലേഷനും മനോഹരമാണ്. ഇതൊക്കെയും ചെന്നവസാനിക്കുക സർവൈവൽ എന്ന അവരുടെ ലക്ഷ്യത്തിലേക്കാണ്. അതുകൊണ്ട് തന്നെ ഒരാൾ പോലും അനാവശ്യമായി തോന്നില്ല.

🔻തീരെ പ്രതീക്ഷിക്കാതെ വന്ന മിസ്റ്ററി എലമെന്റുകൾ ഒരു തരത്തിൽ സർപ്രൈസ് ആയിരുന്നു. കാടുകളിലെ അന്തരീക്ഷം തന്നെ ഭീതി നിരക്കുന്നതാണ്. ഒപ്പം ദുരൂഹമായ ചില കഥാപാത്രങ്ങൾ കൂടിയാവുമ്പോൾ പ്രതീക്ഷിക്കാത്ത വിധത്തിൽ കഥയെ വഴിതിരിച്ച് വിടുന്നുണ്ട്. പലപ്പോഴായി തോന്നിയ പോരായ്മകൾക്കിടയിലും engaging factor ആയി ഇതൊക്കെയും നിലകൊണ്ടു. VFX quality കുറയുമ്പോഴും വിഷ്വലുകൾ കൊണ്ടും പശ്ചാത്തലസംഗീതം കൊണ്ടും തുടർന്ന് കാണാനുള്ള ആഗ്രഹവും സമ്മാനിക്കുന്നു ഈ സീരീസ്. ഒടുവിൽ ഞെട്ടിച്ചുകളഞ്ഞ tail end കൂടിയായപ്പോൾ ഒന്നാം സീസണെക്കാൾ മികച്ച അനുഭവം രണ്ടാം സീസണ് നൽകാൻ സാധിക്കും എന്നൊരു വിശ്വാസം കൂടി മനസ്സിൽ ഉടലെടുത്തു.

🔻ＦＩＮＡＬ ＶＥＲＤＩＣＴ🔻

തായ് സിനിമകളിൽ കാണുന്ന മടുപ്പൻ എലമെന്റുകൾ ആദ്യ തായ് സീരീസിൽ പരമാവധി ഒഴിവായിക്കിട്ടിയതിനാൽ മോശമല്ലാത്ത ഒരുഅനുഭവം തന്നെയായിരുന്നു The Stranded സമ്മാനിച്ചത്. സർവൈവലും സൂപ്പർ നാച്യുറലും നന്നായി ഇടകലർത്താൻ സാധിച്ചതിനാൽ ഒരൽപം പുതുമയുള്ള ആസ്വാദനം തന്നെയായി ഈ സീരീസ്. ഒരു വമ്പൻ Producation Qualityയൊന്നും സീരീസ് ഓഫർ ചെയ്യാത്തതിനാൽ പ്രതീക്ഷകളൊന്നുമില്ലാതെ സമീപിക്കുക. രണ്ടാം സീസണിനായി കാത്തിരിക്കുക.

ＡＢ ＲＡＴＥＳ ★★★☆☆

സീരീസ് ടെലിഗ്രാം ചാനലിൽ ലഭ്യമാണ്. Abi Suggests