Abeed Azad

🔻ആ ദിവസം ജസ്റ്റിന്റെ പെരുമാറ്റത്തിൽ വല്ലാത്ത മാറ്റങ്ങൾ തോന്നിയിരുന്നു റിയാനനിന്. പലപ്പോഴും ജസ്റ്റിനിൽ നിന്ന് ലഭിക്കാത്ത, താൻ പ്രതീക്ഷിക്കുന്ന സ്നേഹം അന്ന് അളവിൽ കൂടുതൽ അവൾ ആസ്വദിച്ചു. ഒരിക്കലും മറക്കാനാവാത്ത ഒരു ദിവസം ജസ്റ്റിൻ അവൾക്ക് സമ്മാനിച്ചു. എന്നാൽ പിറ്റേന്ന് കാര്യങ്ങൾ അതുപോലെയായിരുന്നില്ല. പാർട്ടിയിൽ കണ്ടുമുട്ടിയ അപരിചിതനായിരുന്നു റിയാനനിനെ സന്തോഷിപ്പിച്ചത്. ഇത് പല ആളുകളിലൂടെ തുടർന്നുകൊണ്ടേയിരുന്നു.

Year : 2018
Run Time : 1h 37min

🔻ഓരോ ദിവസവും ഓരോ ആളുകളുടെ ശരീരത്തിലാവും 'A' ഉണരുക. റിയാനനിന് സമീപപ്രദേശത്തുള്ള, സമപ്രായക്കാരായ ആളുകളാവും അവയൊക്കെയും. സ്വന്തമായി അസ്തിത്വമില്ലാത്ത, പലരിലൂടെ രൂപാന്തരം കൈക്കൊള്ളുന്ന വ്യക്തി. അങ്ങനെയൊരാളാണ് റിയാനിന്റെ ജീവിതത്തെ ഇപ്പോൾ പ്രകാശപൂരിതമാക്കുന്നത്. ഒരു റൊമാന്റിക്-ഫാന്റസി എന്ന് വിശേഷിപ്പിക്കാം  ചിത്രത്തെ.

🔻ഫാന്റസി ആണെങ്കിലും അവതരണത്തിൽ നല്ല മിതത്വം പാലിച്ചിട്ടുണ്ട് സംവിധായകൻ. കഥാപാത്രങ്ങളെ ഇമോഷണലി കണക്റ്റ് ചെയ്യുന്ന കാര്യത്തിലും അവർ തമ്മിലുള്ള അടുപ്പം സ്ഥാപിച്ചെടുക്കുന്നതിലും കയ്യടക്കം പ്രകടമാണ്. സംശയങ്ങൾ ഒരുപാട് മനസ്സിൽ ഉയരുമ്പോഴും അവരുടെ പ്രണയത്തിനിടയിൽ അവയൊന്നും വകവെച്ചില്ല എന്നതാണ് സത്യം. സുന്ദരമായി, ഒരൽപം റിയലിസ്റ്റിക്കായി അത് പറഞ്ഞുവെച്ചിട്ടുണ്ട്. യാതൊരു കോലാഹലങ്ങളും ഇല്ലാതെ ഏറെ ലളിതമായ അവതരണശൈലിയിൽ ഭദ്രമായി നിലകൊള്ളുന്നുണ്ട് ഈ ചിത്രം.

🔻Angourie Rice is a magnet. പുള്ളിക്കാരിയുടെ ചിരിയും കണ്ണുമൊക്കെ വശ്യത നിറഞ്ഞ ഒന്നാണ്. നമ്മെ വല്ലാതെ ആകർഷിക്കും പുള്ളിക്കാരിയുടെ മുഖം. സിനിമയുടെ ഏറ്റവും വലിയ പോസിറ്റീവ് തന്നെ ഈ ക്യാസ്റ്റിങ്ങ് ആണ്. ഒപ്പമുള്ളവർക്ക് സ്‌ക്രീൻ സ്‌പേസ് തീരെ കുറവായിരുന്നെങ്കിലും ഓർത്തിരിക്കുന്ന മുഖങ്ങളുണ്ട്. അവർ സമ്മാനിച്ച സുന്ദരമായ രംഗങ്ങളുണ്ട്. പശ്ചാത്തലസംഗീതം കഥയുടെ ഒഴുക്കിനോട് ഏറെ ചേർന്ന് നിൽക്കുന്നുണ്ട്.

🔻ＦＩＮＡＬ ＶＥＲＤＩＣＴ🔻

വലിയ പുതുമകൾ ഒന്നും അവകാശപ്പെടുന്നില്ല. എന്നാൽ ഈ സിനിമക്ക് അതിന്റെതായ മൊമന്റുകൾ ഉണ്ട്. ഒരു വശ്യതയുണ്ട്. ഒരു റൊമാന്റിക് മൂവി കാണുന്ന ലാഘവത്തോടെ മാത്രം സമീപിക്കുക. It satisfied me well...

ＡＢ ＲＡＴＥＳ ★★★☆☆

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻പലപ്പോഴായി കഥ മുന്നേറുമ്പോഴും റോയിയുടെ നില കൂടുതൽ ഗുരുതരമാവുകയായിരുന്നു. അതിനനുസരിച്ച് അദ്ദേഹം മരണത്തെ കാത്തുകിടക്കുന്ന വെറുമൊരു മനുഷ്യനായി മാത്രം മാറി. അദ്ദേഹത്തിന്റെ കഥകളിലും മരണത്തിന്റെ നിഴലുകൾ വീഴുവാൻ തുടങ്ങി. എന്നാൽ ഓരോ ദിവസം കഴിയുന്തോറും കൂടുതൽ ഊർജ്ജസ്വലയായി വന്ന അലെക്‌സാൻഡ്രയുടെ കാര്യം അങ്ങനെയായിരുന്നില്ല. വെറും അഞ്ച് വയസ്സുകാരിക്ക് താങ്ങാവുന്നതിനുമപ്പുറമായിരുന്നു റോയിയുടെ ആ സമയത്തെ മനോനില. അതിനനുസരിച്ച് അദ്ദേഹത്തിന്റെ ഭാവനാശക്തിയിലും ഇരുൾ വീഴാൻ തുടങ്ങിയിരുന്നു. ഫാന്റസിയും റിയാലിറ്റിയും തമ്മിൽ വേറിട്ടറിയാനുള്ള ശേഷി പോലും ഇരുവർക്കും നഷ്ടപ്പെട്ടിരുന്നു എന്നതാണ് സത്യം.

Year : 2006
Run Time : 1h 57min

🔻1920ൽ ഒരു ആശുപത്രിയിൽ വെച്ചാണ് റോയിയും അലെക്‌സാന്ദ്രയും കണ്ടുമുട്ടിയത്. ഒരു സ്റ്റണ്ട് മാസ്റ്ററായി ജോലി ചെയ്യവേ പരിക്ക് പറ്റി ആശുപത്രിയിലായതാണ് റോയ്. കൈക്കേറ്റ പരുക്കിലാണ് അലെക്‌സാന്ദ്ര ആശുപത്രിയിലേക്കെത്തിയത്. യാദൃശ്ചികമായാണ് ഇരുവരും കണ്ടുമുട്ടിയതെങ്കിലും പിന്നീട് റോയിയുടെ സ്ഥിരം സന്ദർശകയായി അലെക്‌സാന്ദ്ര.

ഇരുവരെയും തമ്മിൽ മാനസികമായി അടുപ്പിച്ചത് റോയിയുടെ കഥകളായിരുന്നു. ഒരു അഞ്ച് വയസ്സുകാരിക്ക് ആ കഥകൾ നെയ്ത് കൊടുക്കുന്ന കൗതുകങ്ങളായിരുന്നു. അലക്‌സാണ്ടറുടെ വീര പടയോട്ടങ്ങൾ ആ കഥകൾക്ക് തുടക്കം നൽകി. അതിൽ തൃപ്തി വരാതിരുന്നപ്പോൾ അഞ്ച് നായകന്മാരുള്ള ഒരു കഥയായി റോയിയുടെ അടുത്ത അമ്പ്. എന്നാൽ ആ കഥകൾക്കിടയിലൂടെ തകിടം മറിഞ്ഞത് ഇരുവരുടെയും ജീവിതങ്ങൾ കൂടിയാണ്.

🔻കേന്ദ്രകഥാപാത്രങ്ങളുടെ ആത്മബന്ധത്തെ കേന്ദ്രീകരിച്ചാണ് സിനിമയുടെ കഥ വികസിക്കുന്നത്. അതിനായി പണിതിട്ടിരിക്കുന്നത് ഒരു പാരലൽ ട്രാക്കാണ്. അവിടെയാണ് റിയാലിറ്റിയും ഫാന്റസിയും തമ്മിൽ സംവിധായകൻ ബന്ധിപ്പിച്ചിരിക്കുന്നത്. അതിൽ കൃത്യമായ കയ്യടക്കം പാലിച്ചിട്ടുണ്ട് സംവിധായകൻ.അവതരണത്തിലെ ഭദ്രത അണുവിട തെറ്റിയാൽ പാളിപ്പോവുമായിരുന്ന പ്രമേയത്തെ അതിഗംഭീരമായി സ്‌ക്രീനിൽ പകർത്താൻ അദ്ദേഹത്തിനായിട്ടുണ്ട്. അവിടെയാണ് റോയിയും അലെക്‌സാന്ദ്രയും മനസ്സിൽ ഇടം നേടുന്നത്.

🔻റോയിയുടെ മനോരാജ്യത്ത് ഓരോ ഘട്ടത്തിലും മുളപൊട്ടുന്ന കഥയിലും ദൃഢമാവുന്നത് അലെക്‌സാന്ദ്രയുമായുള്ള മാനസിക അടുപ്പമാണ്. ഒരുപക്ഷെ പ്രതീക്ഷകളൊക്കെയും അസ്തമിച്ച അദ്ദേഹത്തിന്റെ ജീവിതത്തിൽ പ്രകാശത്തിന്റെ കണികകൾ പ്രതിഫലിക്കുന്ന ഒരേയൊരു മുഖം അവളുടേതാണെന്നൊരു തോന്നൽ മാത്രമാണ് അദ്ദേഹത്തിന് കരുത്ത്. അത് തന്നെയാണ് ഒടുക്കം അലെക്‌സാന്ദ്രക്ക് മുന്നിൽ പൊട്ടിക്കരയുവാൻ അദ്ദേഹത്തെ പ്രേരിപ്പിക്കുന്നതും. അലെക്‌സാന്ദ്രക്കാവട്ടെ ഒരച്ഛന്റെ സ്നേഹം ഇതുവരെ ലഭിച്ചിട്ടില്ല. അവിടെയാണ് റോയിയുടെ കരുതലും തുണയും അവൾക്ക് ആശ്വാസമേകുന്നത്. ആ കുഞ്ഞുപ്രായത്തിൽ ആശുപത്രിക്കിടക്കയിൽ സമയം ചിലവഴിക്കുമ്പോഴും അവൾക്കാശ്വാസം റോയിയുടെ കഥകളാണ്. അത്തരത്തിൽ ഇണപിരിയാത്ത ചേർന്ന് കിടക്കുകയാണ് ആ ജീവനുകൾ. അതിനെ ഇത്ര സുന്ദരമായി അവതരിപ്പിക്കാമോ എന്ന് അത്ഭുതം കൂറും വിധം കാഴ്ചവിരുന്ന് സമ്മാനിക്കുകയാണ് ചിത്രം.

🔻കേന്ദ്രകഥാപാത്രങ്ങളുടെ പ്രകടനത്തെ പറ്റി പറയാൻ വാക്കുകളില്ല. ആ കുഞ്ഞുമുഖം മനസ്സിൽ തറക്കാൻ അധികം സമയം വേണ്ടിവരില്ല. നിഷ്കളങ്കമായ ചിരിയും സംസാരവും സിനിമ കഴിഞ്ഞാലും കാതിൽ മുഴങ്ങാൽ ഒരു തവണ കേട്ടാൽ മതിയാവും. Lee Paceഉം തന്റെ വേഷം ഭംഗിയാക്കിയിട്ടുണ്ട്. സ്വപ്നതുല്യമായ ദൃശ്യങ്ങളുടെ കാണാക്കാഴ്ചകളാണ് സിനിമയിലുടനീളം കാണാനാവുക. ഒരു മായികലോകത്ത് എത്തിച്ചേർന്ന അനുഭൂതിയാണ് നമുക്ക് ലഭിക്കുക. കണ്ണഞ്ചിപ്പിക്കുന്ന ദൃശ്യമികവ് കണ്ടുതന്നെ അറിയുക. ഒപ്പം അമ്പരപ്പിക്കുന്ന ആർട്ട് വർക്കുകളും ലൊക്കേഷനും എല്ലാം കൊണ്ടും ഗംഭീരം.

🔻ＦＩＮＡＬ ＶＥＲＤＩＣＴ🔻

ഒരിക്കലും നഷ്ടപ്പെടുത്താൻ പാടില്ലാത്ത സിനിമ എന്നാണ് ഇതിനെ പറ്റി എനിക്ക് വിശേഷിപ്പിക്കാനുള്ളത്. മനസ്സിൽ നിന്ന് പെട്ടെന്ന് കുടിയിറക്കിവിടാൻ സാധിക്കാത്ത ഒരനുഭവമായി മാറി The Fall. ഫാന്റസിയും റിയാലിറ്റിയും ഒരുപോലെ മനസ്സിൽ തറച്ച, ഒരിക്കലും മറക്കാൻ സാധ്യതയില്ലാത്ത കഥാപാത്രങ്ങളെ സമ്മാനിച്ച, കണ്ണുകളെ ഈറനണിയിച്ച, കണ്മുന്നിൽ ദൃശ്യവിരുന്ന് തെളിയിച്ച ടെക്നിക്കൽ സൈഡുകൾ നിറഞ്ഞ ഗംഭീര സിനിമ.

ＡＢ ＲＡＴＥＳ ★★★★☆

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻പീറ്ററും കൂട്ടരും ഇപ്പോഴും Mcgregor മുത്തച്ഛന്റെ തോട്ടത്തിൽ നിന്ന് പഴങ്ങളും പച്ചക്കറികളും അടിച്ചുമാറ്റിത്തന്നെയാണ് വിശപ്പടക്കുന്നത്. അപ്പൂപ്പൻ എത്രയൊക്കെ തടയാൻ നോക്കിയാലും ആ കടമ്പകളൊക്കെയും കടന്ന് അവർ തോട്ടത്തിനുള്ളിൽ എത്തിയിരിക്കും. എന്നാൽ ഒരു ദിവസം അവരുടെ കണ്മുന്നിൽ വെച്ച് അപ്പൂപ്പൻ മരണപ്പെടുന്നു. അതോടെ തങ്ങൾ സ്വതന്ത്രരായെന്ന സന്തോഷത്തിൽ തോട്ടത്തിലും വീട്ടിലും തകർത്തടുക്കിയ പീറ്ററിനും കൂട്ടർക്കും നേരിടേണ്ടി വന്നത് പുതിയൊരു കുരിശാണ്.

Year : 2018
Run Time : 1h 35min

🔻പീറ്റർ റാബിറ്റ് 19s kidsന് നൽകുന്ന ഒരു നൊസ്റ്റാൾജിയയുണ്ട്. അത് പ്രതീക്ഷിച്ച് ആരും ഈ സിനിമയെ സമീപിക്കേണ്ട. വലിയ തോതിൽ നൊസ്റ്റാൾജിയ ഇതിൽ നിന്ന് ലഭിക്കുന്നില്ലെങ്കിലും എന്റർടെയ്ൻമെന്റ് എന്ന സംഗതി പീറ്റർ റാബിറ്റ് നൽകുന്ന വലിയൊരു വാഗ്ദാനമാണ്. തുടക്കം മുതൽ ഒടുക്കം വരെ ഒരുപാട് ചിരിക്കാനും ഉല്ലസിച്ച് കാണുവാനും പറ്റിയൊരു ചിത്രമാണ് പീറ്റർ റാബിറ്റ്. ഒരു നിമിഷം പോലും ബോറടിയില്ലെന്ന് മാത്രമല്ല പ്രതീക്ഷിച്ചതിനുമപ്പുറം മുന്നിട്ട് നിൽക്കുന്ന നല്ലൊരു ഫൺ റൈഡ് കൂടിയായി ചിത്രം. രസകരമായ ഡയലോഗുകളും കൗണ്ടറുകളും കഥാപാത്രങ്ങളുമൊക്കെയായി ഒന്നര മണിക്കൂർ സമയം പോവുന്നതറിയില്ല.

🔻നൊസ്റ്റാൾജിയ വേണ്ട എന്റർടെയ്ൻമെന്റ് മാത്രം മതി എന്ന മൈന്റ് സെറ്റ് ആണെങ്കിൽ ധൈര്യമായി കണ്ടോളൂ പീറ്റർ റാബിറ്റിന്റെ അഭ്യാസങ്ങൾ. കുട്ടികൾക്കും മുതിർന്നവർക്കും ഒരുപോലെ ആസ്വദിക്കാം എന്നതും ചിത്രം മുന്നോട്ട് വെക്കുന്ന സ്പെഷ്യലിറ്റിയാണ്.

ＡＢ ＲＡＴＥＳ ★★★☆☆

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻ഭൂമിയുടെ സ്പന്ദനം തന്നെ കൈപിടിയിലൊതുക്കിയ Yuan bead അതിന്റെ പരമാധികാരി രണ്ട് ഭാഗങ്ങളായി വിഭജിച്ച് അതിന് കാവൽക്കാരനെ നിശ്ചയിച്ചിരിക്കുകയാണ്. Spirit Bead & Demon Bead. ഇതാണ് ആ രണ്ട് ഭാഗങ്ങൾ. അതിൽ സ്പിരിറ്റ് ബീഡ് ഭൂമിയിൽ ഒരു മനുഷ്യനായി ജനനമെടുക്കുകയും മനുഷ്യരാശിയുടെ രക്ഷകനായി മാറുകയും ചെയ്യുമെന്നും അരുൾ ചെയ്തു. എന്നാൽ വഞ്ചനയുടെ ഫലനിമിത്തം ജനനമെടുത്തത് demon bead ആയിരുന്നു. Ne Zha എന്ന പേരിൽ ആ ബാലൻ വളർന്നു.

Year : 2019
Run Time : 1h 50min

🔻Ne Zhaയുടെ മാതാപിതാക്കൾ പ്രതീക്ഷിച്ചത് പോലെയായിരുന്നില്ല കാര്യങ്ങൾ. ഭരണാധികാരികൾ ആയിരുന്നെകിൽ പോലും Ne Zhaയുദ് ജനനദിവസം തന്നെ ജനങ്ങളിൽ നിന്ന് വലിയ വിമർശനം അവർക്ക് ഏറ്റുവാങ്ങേണ്ടി വന്നു. വളരെ അപകടകരമായ Demon Beadൽ നിന്ന് ജനിച്ചത് കൊണ്ട് തന്നെ Ne Zhaയുടെ സ്വഭാവവും കഴിവും അതിനെ ആശ്രയിച്ചിരുന്നു. അതായിരുന്നു ജനങ്ങൾക്ക് ആ കാലഘട്ടത്തിൽ നേരിടേണ്ടി വന്ന ഏറ്റവും വലിയ വെല്ലുവിളിയും. ഇതിനെ മറികടക്കാനുള്ള ശ്രമമായിരുന്നു പിന്നീട് മാതാപിതാക്കൾക്ക് മുന്നിലുണ്ടായിരുന്നത്.

🔻ആനിമേഷൻ സിനിമകൾ സിംഹഭാഗവും ഫെസ്റ്റിവ് മൂഡിൽ കാണാൻ വേണ്ടി മാത്രമാണ് മനസ്സ് പാകപ്പെട്ടിരിക്കുന്നത്. ഗൗരവകരമായ ചിന്തകളും അവതരണവുമുള്ള ചിത്രങ്ങൾ ചുരുക്കമാണ്. അത്തരം മൈൻഡ് സെറ്റിൽ തന്നെയാണ് Ne Zhaയും കാണാനിരുന്നത്. എന്നാൽ അക്ഷരാർത്ഥത്തിൽ ഞെട്ടിച്ചുകളഞ്ഞ, അതീവ ഗൗരവവും എന്നാൽ അല്പം രസകരവുമായ അനുഭവമായി മാറുകയായിരുന്നു ചിത്രം.

🔻പക്വത നിറഞ്ഞ അവതരണശൈലിയാണ് Ne Zhaയുടെ ഏറ്റവും വലിയ ഗുണം. ഒരു വശത്ത് കൈകാര്യം ചെയ്യുന്ന പ്രമേയത്തിന്റെ ഗൗരവം തെല്ലും തോരാതെ വളരെ ത്രസിപ്പിച്ച് നമ്മിലേക്ക് എത്തിക്കുമ്പോഴും പൊടുന്നനെ വിടരുന്ന ചില നർമ്മരംഗങ്ങളിൽ ചിരി മുളക്കുന്നുമുണ്ട്. അത് മറ്റ് രംഗങ്ങളുടെ ആസ്വാദനത്തെ ബാധിക്കുന്നില്ലെന്നതാണ് ഏറ്റവും അതിശയകരം. തകർപ്പൻ ആക്ഷൻരംഗങ്ങൾ വരിവരിയായി നിൽക്കുമ്പോഴും Ne Zha കുട്ടിത്തത്തെ അതിന്റെ മനോഹാരിത ചോരാതെ തന്നെ അവതരിപ്പിക്കുന്നുമുണ്ട്. അതിനായി ശക്തമായ ഒപ്പം രസകരമായ കഥാപാത്രങ്ങളും സന്ദർഭങ്ങളും സിനിമയിലുണ്ട്. അങ്ങേയറ്റം നിലവാരം പുലർത്തുന്ന അനിമേഷൻ വർക്കുകൾ മാസ്മരികമായ ഫാന്റസി സമ്മാനിക്കുന്നുണ്ട്. കഥാപാത്രങ്ങളെ ഇമോഷണലി നമ്മിലേക്ക് അടുപ്പിക്കുന്നതിലും ചിത്രം വിജയിച്ചിട്ടുണ്ട്.

🔻ＦＩＮＡＬ ＶＥＲＤＩＣＴ🔻

ഗൗരവകരമായ പ്രമേയം ഉൾകൊണ്ട, ടെക്നിക്കലി ഗംഭീര നിലവാരം പുലർത്തുന്ന, ത്രസിപ്പിക്കുന്ന ആക്ഷൻ രംഗങ്ങളാൽ സമ്പന്നമായ, പുഞ്ചിരി വിടർത്തുന്ന നർമ്മരംഗങ്ങൾ സമയോചിതമായി കോർത്തിണക്കിയ ഒരുഗ്രൻ ആനിമേഷൻ ചിത്രമാണ് Ne Zha. ഒട്ടും പ്രതീക്ഷിക്കാതെ പൂർണ്ണതൃപ്തി നൽകിയ ഹൃദ്യമായ ചിത്രം  കുട്ടികൾക്കും മുതിർന്നവർക്കും ഒരുപോലെ ആസ്വദിക്കാവുന്ന അങ്ങേയറ്റം മികവ് പുലർത്തുന്ന ഒന്നാണ്.

ＡＢ ＲＡＴＥＳ ★★★½

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻മെക്സിക്കോ എന്ന ചെറു രാജ്യം സമ്പദ്വ്യവസ്ഥയുടെ കാര്യത്തിൽ ഒരുപാട് മുന്നിൽ നിൽക്കുന്ന ഒന്നാണ്. മാത്രമല്ല വളർച്ചാനിരക്കിലും തങ്ങളുടേതായ സ്ഥാനം അവർ കണ്ടെത്തുന്നുണ്ട്. നോർത്ത് അമേരിക്കൻ ഭൂഖണ്ഡത്തിലെ അഭിവാജ്യ ഘടകങ്ങളിൽ ഒന്ന് തന്നെയാണ് ഈ രാജ്യം. എന്നാൽ ഇവയ്‌ക്കെല്ലാം ഭീഷണിയായി നിൽക്കുന്ന ഒന്നുണ്ട് ആ രാജ്യത്ത്. ലോകത്തെ ഏറ്റവും വലിയ Drug Cartelഉകളിൽ ഒന്നാണ് ഈ രാജ്യം. ഒപ്പം Organ Traffickingഉം.

Year : 2017
Run Time : 1h 23min

🔻നാം സ്ഥിരം വായിക്കുന്ന ഫെയറി ടെയ്‌ലുകളിൽ എന്തെല്ലാം കാര്യങ്ങളാണ് തുടർച്ചയായി വരാറുള്ളത്. രാജകുമാരൻ. രാജകുമാരി,അവരുടെ പരിവാരങ്ങൾ, ദുർമന്ത്രവാദികൾ, കടുവകൾ, ചെന്നായകൾ അങ്ങനെ നീണ്ടുപോകും സംഗതികൾ. ഇവയ്‌ക്കെല്ലാം പുറമെ മാറ്റിനിർത്താൻ സാധിക്കാത്ത ഒരു കാര്യം കൂടിയുണ്ട്. മൂന്ന് വരങ്ങൾ. ഇതേ കുറിച്ച് സംസാരിക്കുന്ന വിദ്യാർത്ഥികളുടെ കാതുകളിലാണ് വെടിശബ്ദം മുഴങ്ങുന്നത്. തുടർന്ന് ജീവൻ രക്ഷിക്കാനുള്ള പരക്കം പാച്ചിലിലാണ് ഓരോരുത്തരും.

അങ്ങനെയൊരു സന്ദർഭത്തിലാണ് എസ്‌ട്രെല്ല ഷൈനിനെയും സംഘത്തെയും കണ്ടുമുട്ടുന്നത്. നഷ്ടങ്ങളുടെ കണക്കുപുസ്തകങ്ങൾ മാത്രം കയ്യിലൊതുക്കാൻ വിധിക്കപ്പെട്ട ചില ബാല്യങ്ങൾ. മാതാപിതാക്കളുടെ സ്നേഹവും വാത്സല്യവും കരുതലും അറിഞ്ഞ് ജീവിക്കേണ്ട പ്രായത്തിൽ കയറിക്കിടക്കാൻ ഒരു മേൽക്കൂര പോലും ഇല്ലാത്ത കുരുന്നുകൾ. അവർക്കിടയിലേക്ക് എസ്‌ട്രെല്ല കൂടി വരുമ്പോൾ അവളൊരു ദൗത്യത്തിന്റെ കൂടി ഭാഗമാവുകയായിരുന്നു. അവർക്ക് ചുറ്റും അനേകം വെല്ലുവിളികളും.

🔻കേവലമൊരു സിനിമ എന്നതിലുപരി വ്യക്തമായ രാഷ്ട്രീയത്തിന്റെ വക്താവ് കൂടിയാണ് Tigers Are Not Afraid. സിനിമയുടെ കേന്ദ്രകഥാപാത്രങ്ങളായ ബാല്യങ്ങളിലൂടെ തുറന്ന് കാട്ടുന്നത് രാജ്യത്തിന്റെ തന്നെ സാമൂഹികവ്യവസ്ഥിതിയെയാണ്. Sicario എന്ന ചിത്രത്തിൽ കണ്ട Drug Cartelsനെ അതിന്റെ തീവ്രതയോടെ ദർശിക്കാനാവും ഈ ചിത്രത്തിൽ. ഒരു സുപ്രഭാതത്തിൽ തനിക്ക് ചുറ്റുമുള്ളവരൊക്കെ കാണാതാവുകയെന്ന ദുസ്വപ്നവും പേറി ജീവിക്കുന്ന ജനങ്ങളുടെ നേർക്കാഴ്ച്ചയാണ് ഓരോ കഥാപാത്രങ്ങളും. സംസാരശേഷി ഉണ്ടായിരുന്ന Morro എന്തോ കണ്ട് ഭയന്ന് സംസാരശേഷി നഷ്ടപ്പെട്ടതാണെന്ന സ്റ്റേറ്റ്മെന്റിൽ തന്നെയുണ്ട് സാധാരണജനങ്ങളുടെ ദുസ്സഹമായ ജീവിതത്തിന്റെ അടയാളപ്പെടുത്തലുകൾ. ഇത്തരത്തിൽ അനവധി ജീവനുകളുടെ ബാക്കിപത്രമാണ് ഈ ചിത്രം.

🔻സിനിമയെന്ന രീതിയിൽ അതിന്റെതായ മികവ് പുലർത്തുന്നുണ്ട് ഈ ചിത്രം. സാധാരണ ഗതിയിലുള്ള അവതരണത്തിൽ ഭംഗിയായി ഫാന്റസി-ഹൊറർ എലമെന്റുകൾ കൂട്ടിച്ചേർത്തിരിക്കുന്നത് കാണാം. സിനിമയെന്ന നിലയിലുള്ള അനുഭവത്തിന് അത് മാറ്റേകുന്നുണ്ട്. ഭൂരിഭാഗവും റിയലിസ്റ്റിക് രീതി അവലംബിക്കുന്ന അവതരണം ആസ്വാദനത്തിന് ഗുണം ചെയ്യുന്നുണ്ട്. ആ കുട്ടികളുടെ ഗംഭീര പ്രകടനം പറയാതിരിക്കാൻ പറ്റില്ല. എന്തൊരു റിയാലിറ്റിയാണ് അവർ പകർന്ന് നൽകുന്നത്. ഒപ്പം രാത്രിയുടെ ഭീകരത പകർത്തിയെടുക്കുന്ന ഛായാഗ്രഹണമികവും പശ്ചാത്തലസംഗീതവും അഭിനന്ദനാർഹം തന്നെ.

🔻ＦＩＮＡＬ ＶＥＲＤＩＣＴ🔻

Drug Mafiaയുടെയും Organ Traffickingന്റെയും ഇരയായി കഴിഞ്ഞ പത്ത് വർഷങ്ങൾക്കിടെ കൊല്ലപ്പെട്ട ലക്ഷക്കണക്കിന് ജനങ്ങളുടെയും കാണാനില്ല എന്ന് മാത്രം അറിവുള്ള അറുപതിനായിരത്തോളം ജീവനുകളുടെയും ഓർമപ്പെടുത്തലാണ് ഈ ചിത്രം. മെക്സിക്കോ എന്ന രാജ്യത്തിൻറെ ക്രൈം റേറ്റ് ഏറ്റവും കൂടുതൽ കുടിയിരിക്കുന്നത് ഈ രണ്ട് സംഗതികളിലാണ്. അവിടുത്തെ ബാല്യങ്ങളെ എങ്ങനെയാണ് ഇതൊക്കെ ബാധിക്കുന്നത്.? ഒരിക്കലും നഷ്ടപ്പെടുത്തരുത് ഈ ചിത്രം. കേവലം ഒന്നര മണിക്കൂറിൽ ഒരുപാട് ജീവിതങ്ങൾ നമ്മെ കാത്തിരിക്കുന്നുണ്ട്.

ＡＢ ＲＡＴＥＳ ★★★★☆

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻ഈ ലോകത്ത് സൂപ്പർ പവറുള്ളവർ ഒരുപാടുണ്ട്. അതിൽ താനുദ്ദേശിക്കുന്ന കാര്യത്തിനായി കഴിവുള്ളവരെ തിരഞ്ഞെടുക്കുക. ഒറ്റ രാത്രി കൊണ്ട് ആ കാര്യം നേടിയെടുക്കുക. ഇല്ലെങ്കിൽ നഷ്ടപ്പെടുക തന്റെ ജീവൻ തന്നെയാണ്. കസീനോയിൽ മറ്റൊരുവന്റെ കരവിരുത് കാരണം തനിക്കുണ്ടായ വമ്പൻ നഷ്ടം നികത്താൻ മൈക്കിളിന് അത് മാത്രമേ വഴിയുണ്ടായിരുന്നുള്ളൂ.

Year : 2018
Run Time : 1h 41min

🔻സിനിമയുടെ ടെക്നിക്കൽ സൈഡിനെ കുറിച്ച് തന്നെ ആദ്യം പറയട്ടെ. അതിഗംഭീരമാണ് ഛായാഗ്രഹണവും വിഷ്വൽ എഫക്ട്സും. കണ്ണഞ്ചിപ്പിക്കുന്ന എന്ന് നിസ്സംശയം വിശേഷിപ്പിക്കാവുന്ന കാഴ്ചാവിരുന്ന്. സിനിമയെ മുഴുവൻ സമയവും താങ്ങിനിർത്തുന്നത് ഈ ഘടകമാണെന്നതാണ് സത്യം. ഒപ്പം ചടുലതയേറിയ എഡിറ്റിംഗും.

🔻എന്നാൽ ഈ മികവിനോളം പോന്ന കഥയായിരുന്നില്ല ചിത്രത്തിന്റേത്. മികച്ച രീതിയിൽ തുടങ്ങുകയും പിന്നീട് ശരാശരിയിൽ ഒതുങ്ങുകയും ചെയ്യുന്നുണ്ട് തിരക്കഥ. ഇത് പലപ്പോഴും നമുള്ള ഫീൽ ചെയ്യുകയും ചെയ്യും. എങ്കിലും വിഷ്വലി പുലർത്തുന്ന മികവ് കൊണ്ട് ഒരു പരിധി വരെ മടുപ്പില്ലാതാക്കാൻ സാധിച്ചിട്ടുണ്ട്. BGM വർക്കുകളും ശരാശരി നിലവാരമേ പുലർത്തുന്നുള്ളൂ.

🔻നായകൻറെ സ്റ്റൈലൻ പ്രകടനം ഹൈലൈറ്റ് ആണ്. ബാക്കിയുള്ളവരും മോശമാക്കിയില്ല. Antonio Banderas ചെറിയൊരു വേഷത്തിൽ വരുന്നുണ്ട്. ഒരുപക്ഷെ ചിത്രത്തിനൊരു രണ്ടാം ഭാഗം ഉണ്ടായാൽ മുഴുനീള റോളിൽ പുള്ളിയെ കാണാനാവും.

🔻ＦＩＮＡＬ ＶＥＲＤＩＣＴ🔻

കഥയെപറ്റി കൂടുതൽ വാചാലരാവാതിരുന്നാൽ ദൃശ്യമികവ് പുലർത്തുന്ന ഒരു ഫാന്റസി ചിത്രം ആസ്വദിക്കാം. നേരം പോക്കിനായി മാത്രം ചിത്രത്തെ സമീപിക്കുക. പ്രതീക്ഷകളൊന്നുമില്ലാതെ കാണാനിരുന്നാൽ നമ്മെ തൃപ്തിപ്പെടുത്താതിരിക്കാൻ വഴിയില്ല.

ＡＢ ＲＡＴＥＳ ★★½

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻മോർച്ചറിയിലാണ് മിൻ ഉറക്കം എഴുന്നേൽക്കുന്നത്. തന്നെ ജീവനോടെ കണ്ടയുടനെ നഴ്‌സുമാർ ബോധരഹിതരായി വീഴുന്ന കാഴ്ചയായിരുന്നു മിൻ ആദ്യമായി കണ്ടത്. താൻ ആരാണെന്നോ താനെങ്ങനെ ഇവിടെയെത്തിയെന്നോ അറിയാതെ ആകെ കുഴഞ്ഞുമറിഞ്ഞ അവസ്ഥയായിരുന്നു ആ സമയം മിൻ അഭിമുഖീകരിച്ചത്. എന്നാൽ എന്താണ് സത്യമെന്ന് മനസ്സിലാക്കാൻ മറ്റ് ചിലരുടെ ഇടപെടലുകൾ വേണ്ടി വന്നു. അവർ സ്വയം 'ഗാർഡിയൻസ്' എന്ന് വിശേഷിപ്പിച്ചു. അവർ മിന്നിന് ഒരു countdown time നൽകി. 100 ദിവസം. അതെന്തിനായിരുന്നു എന്നത് സിനിമ കണ്ടറിയുക. (നല്ലൊരു ത്രിൽ ഫാക്ടർ അതിൽ കുടിയിരിപ്പുണ്ട്.)

Year : 2019
Run Time : 2h 12min

🔻തായ് സിനിമകളോട് അത്ര അടുപ്പം തോന്നിയിട്ടില്ലെന്ന് പല എഴുത്തുകളിലും പ്രതിപാദിച്ചിട്ടുള്ളതാണ്. എന്നാൽ വിരളമായ ചില അനുഭവങ്ങൾ അതിനെ ശരി വെക്കാതെ പോവും. അത്തരത്തിൽ ഒന്നാണ് ഈ ചിത്രം. ഏറെ പ്രിയപ്പെട്ട ഹൊറർ മൂവിയായ ഷട്ടറിന്റെ സംവിധായകന്റെ ചിത്രം എന്നത് തന്നെയാണ് കാണാൻ തോന്നിയ ആദ്യ ഫാക്ടർ. പോസ്റ്ററുകൾ ഒരുക്കിയ വിധവും ശ്രദ്ധ പിടിച്ചുപറ്റി.

🔻ആദ്യ 20 മിനിറ്റ് കൊണ്ട് വമ്പൻ ഫാന്റസി ലോകം തന്നെ തീർക്കുന്നുണ്ട് സംവിധായകൻ. ആ സമയത്തുള്ള CGI വർക്കുകൾ അപാരം തന്നെ. അൽപ്പം കൺഫ്യൂഷൻ സമ്മാനിക്കുന്ന തുടക്കം ആസ്വാദനത്തിന് നല്ല ആകാംഷ ജനിപ്പിക്കുന്നുണ്ട്. മുഴുനീള ഫാന്റസി ആവുമെന്ന് പ്രതീക്ഷിച്ചിടത്ത് പല ജേണറുകളുടെ ബ്ലെന്റ് ആൺ സംവിധായകൻ ഒരുക്കിവെച്ചത്. എന്നാൽ ചില ഏറ്റക്കുറച്ചിലുകൾ അതൃപ്തി നൽകിയെന്ന് പറയാതെ വയ്യ. അത്തരത്തിൽ ഒന്നാണ് ചിത്രത്തിൽ റൊമാൻസ് കൈകാര്യം ചെയ്ത വിധം.

🔻ഫാന്റസിയിലൂന്നിയ തുടക്കമായിട്ട് കൂടി ഒരു സമയം കഴിയുമ്പോൾ അത് പാടെ ഉപേക്ഷിച്ച രീതിയിലാവുന്നുണ്ട് അവതരണം. സ്‌കൂൾ കാലഘട്ടത്തിലെത്തുമ്പോൾ റൊമാൻസിലേക്ക് മാത്രമായി ചിത്രം ഒതുങ്ങുന്നുമുണ്ട്. അവിടെ ഒരൽപം മടുപ്പ് അനുഭവപ്പെട്ടതൊഴിച്ചാൽ പിന്നീടങ്ങോട്ട് ജിജ്ഞാസ പകരുന്ന ഒരുപാട് എലമെന്റുകളാൽ സമൃദ്ധമാണ് ചിത്രം. കഥാപാത്രങ്ങളുടെ വേരുറപ്പ് കഥക്ക് തീർത്തും ഗുണം ചെയ്യുന്നുണ്ട്. ഉപകഥകൾ പോലെ പല കഥകൾ കൂടിച്ചേരുമ്പോഴാണ് പല ചോദ്യങ്ങൾക്കും ഉത്തരം ലഭിക്കുക. ശക്തമായ ക്യാരക്ടറൈസേഷൻ ഓരോ കഥാപാത്രങ്ങൾക്കും സംവിധായകൻ നൽകിയിട്ടുണ്ട്. കുടുംബവുമായി ബന്ധപ്പെട്ട കഥ തന്നെ അതിനുദാഹരണം.

🔻CGI കൊണ്ട് വിസമയം തീർക്കുന്ന രംഗങ്ങൾ ഉണ്ട് ചിത്രത്തിൽ. ഫാന്റസി എലെമെന്റുകൾ കൊണ്ട് എത്രത്തോളം താല്പര്യം ജനിപ്പിക്കാമോ അത്രത്തോളം നമ്മെ വശ്യമാക്കുന്നുണ്ട് ആ രംഗങ്ങൾ. ഒപ്പം ഗംഭീര പശ്ചാത്തലസംഗീതവും കണ്ണഞ്ചിപ്പിക്കുന്ന ഫ്രയിമുകളും നമ്മെ കൂടുതൽ അടുപ്പിക്കുന്നു.

🔻ＦＩＮＡＬ ＶＥＲＤＩＣＴ🔻

ഫാന്റസിയിൽ തുടങ്ങി പല സബ്ജേണറുകളിലൂടെ സഞ്ചരിക്കുന്ന ചിത്രം മികച്ച ഒരനുഭവം തന്നെയായിരുന്നു. ശക്തമായ കഥാപാത്രങ്ങളും അതിനൊത്ത അവതരണവും നല്ലൊരു ക്ലൈമാക്സും കൂടിയാവുമ്പോൾ Homestay നിരാശ നൽകില്ല. വേറിട്ട അനുഭവം നമുക്കായി കരുതിവെച്ചിരിക്കുന്നു ഈ ചിത്രം.

ＡＢ ＲＡＴＥＳ ★★★½

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻പരീക്ഷണചിത്രങ്ങൾ ഒരുക്കുന്നതിൽ കൊറിയൻ ഇൻഡസ്ടറിയുടെ പാടവം ഒന്ന് വേറെ തന്നെയാണ്. ചില സമയങ്ങളിൽ ഹോളിവുഡ് സിനിമകളേക്കാൾ പ്രിയം തോന്നും കൊറിയൻ സിനിമകളോട്. ഫാന്റസി എന്ന ലേബലിൽനോട് പൂർണ്ണമായും നീതി പുലർത്തുന്ന ഒരുപാട് ചിത്രങ്ങൾ അവിടെ പിറവിയെടുത്തിട്ടുണ്ട്. ആ ലിസ്റ്റിലേക്ക് കൂട്ടിച്ചേർക്കാവുന്ന ചിത്രമാണ് Hansel & Gretel.

Year : 2007
Run Time : 1h 57min

🔻വളരെ പ്രസിദ്ധമായ ജർമ്മൻ നാടോടിക്കഥയാണ് Hansel & Gretel. അതിലേക്ക് കടക്കുന്നില്ല. അത് പറഞ്ഞാൽ സിനിമയുടെ പ്രധാന തീം വെളിപ്പെടുമെന്നത് കൊണ്ട് അത് മറക്കാം. ആ നാടോടിക്കഥയെ അനുസ്മരിപ്പിക്കും വിധമാണ് ചിത്രം ഒരുക്കിയിരിക്കുന്നത്. മലയിടുക്കുകളിലൂടെ കാർ ഓടിച്ച് പോയിരുന്ന Eun-Soo പെട്ടെന്നുള്ള അശ്രദ്ധ മൂലം കാർ നിയന്ത്രണം നഷ്ടപ്പെട്ട് കൊക്കയിലേക്ക് വീഴുന്നിടത്താണ് ചിത്രം തുടങ്ങുന്നത്. ബോധരഹിതനായി eun-soo കുറെ സമയം ചിലവഴിച്ചു. ബോധം വന്നപ്പോൾ അദ്ദേഹത്തിന് മുന്നിൽ പ്രത്യക്ഷപ്പെട്ടത് ഒരു പെൺകുട്ടിയാണ്. അവളെ അദ്ദേഹത്തെ നയിച്ചത് കാടിന് നടുവിലുള്ള ഒരു വീട്ടിലേക്കും.

🔻സിനിമയിൽ ഏറ്റവും ആകർഷിച്ചത് അവതരണത്തിലെ മിതത്വമാണ്. ഫാന്റസി കണ്ടന്റിന് ഒരുപാട് സ്കോപ്പുള്ള കഥയായിട്ട് കൂടി അതിൽ മാത്രം ഒതുങ്ങാതെ ഗൗരവകരമായ വിഷയം കൈകാര്യം ചെയ്യുന്നതിനും പ്രാധാന്യം കൊടുത്തിട്ടുണ്ട് സംവിധായകൻ. അൽപ്പം പതിഞ്ഞ തലത്തിൽ തുടങ്ങുന്നുവെങ്കിലും ആകാംശ നിലനിർത്തുന്നതിൽ സംവിധായകൻ വിജയിച്ചിട്ടുണ്ട്. അളവിൽ കവിഞ്ഞ ഫാന്റസി ഒഴിവാക്കി കഥാപാത്രങ്ങൾക്കും അർഹമായ പ്രാധാന്യം കൊടുത്തിടത്ത് നല്ലൊരു അനുഭവമാകുന്നുണ്ട് ചിത്രം.

🔻നമ്മൾ ഊഹിക്കുന്ന ചില സന്ദർഭങ്ങളിലൂടെയാണ് ചിത്രം ആദ്യമൊക്കെ മുന്നേറുന്നത്. എന്നാൽ പാതി അടുക്കുമ്പോഴേക്കും യാതൊരു തരത്തിലും പിടിതരാത്ത വഴിയിലേക്ക് നീങ്ങുന്നു ചിത്രത്തിന്റെ സഞ്ചാരം. അതിൽ ഗൗരവകരമായ പ്രമേയം ഉൾപ്പെടുത്തിയിരിക്കുന്ന വിധം ഗംഭീരം. അവയുടെ അവതരണവും ഒരൽപം ഭയപ്പെടുത്തുന്നതും ത്രില്ലടിപ്പിക്കുന്നതും തന്നെ. അത്തരത്തിൽ എല്ലാം കൊണ്ടും നാമൊരു വിരുന്ന് തന്നെയാവുന്നുണ്ട് ചിത്രം. ചടുലത നിറഞ്ഞ അവതരണവും അതിനൊത്ത് പിടിക്കുന്ന പശ്ചാത്തലസംഗീതവും പെർഫെക്ഷൻ വിളിച്ചോതുന്ന VFX വർക്കുകളും ചിത്രത്തിന്റെ ആസ്വാദനത്തിന് കൂട്ടാകുന്നു.

🔻ＦＩＮＡＬ ＶＥＲＤＩＣＴ🔻

ഫാന്റസി എന്ന ലേബലിൽ ആണെങ്കിലും അതിൽ പൊതിഞ്ഞ് പ്രാധാന്യം അർഹിക്കുന്ന പ്രമേയം അവതരിപ്പിച്ചിടത്താണ് ചിത്രം വേറിട്ട് നിൽക്കുന്നത്. സർവ്വമേഖലകളിലും പുലർത്തുന്ന മികവ് ചിത്രത്തിൽ പ്രതിഫലിക്കുമ്പോൾ ഏവർക്കും ഒരുപോലെ ഇഷ്ടപ്പെടുന്ന ചിത്രമായിത്തീരുന്നു ഈ കുട്ടികളുടെ കഥയും.

ＡＢ ＲＡＴＥＳ ★★★½

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻'Ironman Sucks'..! Lego മൂവിയെ പറ്റി ഓർക്കുമ്പോൾ ആദ്യം മനസ്സിൽ വരുന്ന ഡയലോഗ് ഇതാണ്. നമ്മുടെ സൂപ്പർ ഹീറോസിനെ ഇത്ര കോമഡി പീസുകളായി കണ്ടത് ഈ സിനിമയിലാണ്. ഇനി കുറച്ചുകൂടിയ കടുപ്പത്തിൽ കോമഡി ആക്കിയാലോ. Legoയുടെ രണ്ടാം ഭാഗത്തിൽ അതിനും സാക്ഷിയാവാം.

Year : 2019
Run Time : 1h 47min

🔻സമാധാനത്തിന്റെ അഞ്ച് വർഷങ്ങൾ. സന്തോഷം കളിയാടിയിരുന്ന നഗരത്തിലേക്ക് പുതിയൊരു ശത്രു വരികയാണ്. 'Duplo'. ആ നഗരം തന്നെ ഞൊടിയിടയിൽ നശിപ്പിക്കാൻ ശേഷിയുള്ള, ദുഷ്ടശക്തികൾ. പിന്നീട് അവരിൽ നിന്ന് രക്ഷ നേടാനുള്ള പരാക്രമമായി എല്ലാവരും.

🔻ഒരു മുഴുനീള കോമഡി ചിത്രം തന്നെയാണ് ലെഗോ രണ്ടാം ഭാഗം നമുക്കായി ഒരുക്കിയിരിക്കുന്നത്. ഒരുപാട് ചിരിക്കാനുള്ള രംഗങ്ങളുണ്ട്. Mad Max മോഡലിലുള്ള രംഗങ്ങൾ അതിൽ ഹൈലൈറ്റാണ്. ഇത്തവണ ബാറ്റ്മാനെ അലക്കി അഴയിൽ തൂക്കി എന്ന് വേണമെങ്കിൽ പറയാം. അത്രക്ക് ട്രോളുന്നുണ്ട് പുള്ളിയെ. ആ സീനുകളൊക്കെ അന്യായ ഐറ്റം തന്നെയായിരുന്നു. കൂടെ കിടിലൻ പാട്ടുകളും ഉണ്ട്. 'Everything Is Awesome' എന്ന പാട്ട് മനോഹരമായിരുന്നു. എന്നാൽ ഇതിനൊക്കെ പുറമെ നല്ലൊരു Concept കൂടി കഥയിൽ കൈകാര്യം ചെയ്യുന്നിടത്ത് ആസ്വാദനം വേറൊരു തലത്തിൽ എത്തുന്നു. വിഷ്വലി ഗംഭീരമാണ് ചിത്രം. എല്ലാ ലെഗോ മൂവിയിലെയും പോലെ തന്നെ കണ്ണഞ്ചിപ്പിക്കുന്നുണ്ട് എല്ലാ രംഗങ്ങളും.കൂടെ കിടിലൻ കഥാപാത്രങ്ങളും കൊറിയോഗ്രഫിയും പശ്ചാത്തലസംഗീതവും കാണികൾക്ക് വിരുന്നൊരുക്കുന്നുണ്ട്. ഒപ്പം സസ്‌പെൻസും ട്വിസ്റ്റും എല്ലാം തന്നെ തൃപ്തിപ്പെടുത്തുന്നുമുണ്ട്.

🔻ＦＩＮＡＬ ＶＥＲＤＩＣＴ🔻

ലെഗോ ഫാൻസിനെയും ആനിമേഷൻ പ്രേമികളെയും പൂർണ്ണമായി തൃപ്തിപ്പെടാൻ ശേഷിയുള്ള ചിത്രവുമായാണ് ഇത്തവണ ലെഗോയുടെ വരവ്. ഒരുപാട് ചിരിക്കാനും ഒരിത്തിരി കാര്യമായി ചിന്തിക്കാനും മനോഹരമായ വിഷ്വൽസ് ആസ്വദിക്കാനും വക ഒരുക്കുന്നുണ്ട് ചിത്രം. ധൈര്യമായി സമീപിക്കാം ഈ ചിത്രത്തെ. Batman Rocks..!!😛😛

ＡＢ ＲＡＴＥＳ ★★★½

🔻ജീവിതത്തിൽ ഏതെങ്കിലുമൊരു പോയിന്റിൽ എന്ത് ചെയ്യണമെന്നറിയാതെ നിന്നുപോയാൽ പലരോടും അഭിപ്രായം ആരായാറുണ്ട്. പലരും ഒരേതരത്തിലുള്ള ഉപദേശങ്ങൾ നൽകുമ്പോൾ മടുക്കുമെങ്കിലും ചിലർ മാത്രം അതിൽ നിന്ന് വേറിട്ട് നിൽക്കും. ജീവിതത്തെ ഒരു ചലഞ്ചായി എടുക്കാനും മുന്നോട്ട് പോവാനുള്ള ഊർജ്ജം നൽകുവാനും ആ വാക്കുകൾക്ക് കഴിയും. അത്തരത്തിൽ ഒരു നാടിന്റെ മുഴുവൻ ഉപദേശകനായിരുന്നു നാമിയ സ്റ്റോറിലെ ആ മുത്തച്ഛൻ.

Year : 2017
Run Time : 2h 9min

🔻ആ രാത്രി ആ മൂന്ന് പേർ എവിടെയെങ്കിലും ഒളിക്കാനുള്ള വ്യഗ്രതയിലാരുന്നു. അവർ വന്ന് പെട്ടത് നാമിയ ജനറൽ സ്റ്റോറിലും. പണ്ടെപ്പോഴോ പൂട്ടിയതാണ് ആ കട. അവിടെ അവർ സുരക്ഷിതരാവുമെന്ന് കരുതി കയറിയതാണ്. എന്നാൽ അവരെ അവിടെ കാത്തിരുന്നത് ഞെട്ടിക്കുന്ന പല കാര്യങ്ങളാണ്. അത് തുങ്ങിയതാവട്ടെ ഒരു കത്തിന്റെ രൂപത്തിലും.

🔻ചെറിയ തോതിൽ ഒരു ടൈം ട്രാവൽ കോൺസെപ്റ് ആണ് ചിത്രം കരുതി വെച്ചിരിക്കുന്നത്. ബേസിക്ക് പ്ലോട്ട് ടൈം ട്രാവൽ ആണെങ്കിലും സിനിമ കൂടുതൽ കൈകാര്യം ചെയ്യുന്നത് പല ജീവനുകളാണ്. ഫാന്റസി എന്ന ഘടകം ഒരു സൈഡിലേക്ക് മാറി നിന്നുകൊണ്ട് മനോഹരമായ പല കാര്യങ്ങൾ നമ്മെ കാട്ടിത്തരികയാണ് സംവിധായകൻ. അതിൽ ഒരുപാട് സന്തോഷം നൽകുന്ന നിമിഷങ്ങളുണ്ട്. ചെറിയ തോതിൽ മനസ്സ് വേദനിപ്പിച്ച രംഗങ്ങളുണ്ട്.

🔻ആരുടെയെങ്കിലുമൊക്കെ ജീവിതത്തിൽ ഒരു വഴികാട്ടിയാവാൻ നമുക്ക് സാധിക്കുന്നതിനെപ്പറ്റി ചിന്തിച്ച് നോക്കിയിയിട്ടുണ്ടോ. പലർക്കും അവരുടെ ഭാവിയിലേക്കുള്ള വെളിച്ചമാവുകയും അവരുടെ സന്തോഷത്തിന് നമ്മളും ഒരു കാരണമാവുകയാണെന്നറിയുമ്പോഴുള്ള ആത്മനിർവൃതി പറഞ്ഞറിയിക്കാൻ പറ്റുന്നതിനും അപ്പുറമാവും. ലളിതമായി പറഞ്ഞാൽ ഇതാണ് സിനിമയുടെ ഉള്ളടക്കം. അതിനെ ഭംഗിയായി അവതരിപ്പിച്ചിരിക്കുന്നിടത്ത് നല്ലൊരു അനുഭൂതി പകരുന്നുണ്ട് ചിത്രം.

🔻അൽപ്പം പതിഞ്ഞ താളമാണ് സിനിമയുടേതെങ്കിലും അതുമായി ഇഴുകിച്ചേർന്നാൽ ആസ്വാദനം വലിയ തോതിലാവും.കഥാപാത്രങ്ങളെ കണക്റ്റ് ചെയ്ത വിധം ഏറെ ലളിതവും ഒപ്പം മനോഹരവും. കൂടെ ദൃശ്യചാരുതയാർന്ന വിഷ്വൽസും ലാളിത്യം നിറഞ്ഞ പശ്ചാത്തലസംഗീതവും കൂടിയാവുമ്പോൾ സന്തോഷം നൽകുന്നു ഈ ചിത്രം.

🔻ＦＩＮＡＬ ＶＥＲＤＩＣＴ🔻

നല്ലൊരു സന്ദേശം കാണികൾക്ക് നൽകുന്ന സുന്ദരമായ ചിത്രം. ഫാന്റസിയെന്ന ലേബലിൽ കഥ തുടങ്ങുമ്പോഴും മാനുഷികമായ കാര്യങ്ങൾക്കാണ് ചിത്രം മുൻകൈ കൊടുക്കുന്നതെന്ന് കാണാം. നിരാശ നൽകാത്ത ഒരനുഭവമാകുമെന്ന് പ്രതീക്ഷിക്കുന്നു.

ＡＢ ＲＡＴＥＳ ★★★½

🔻സ്ഥിരം ഒരേ റൂട്ടിൽ റേസിങ്ങ് നടത്തിയാൽ ആർക്കാണ് മടുക്കാത്തത്.? ആരാണ് ഒരു പുതുമ ആഗ്രഹിക്കാത്തത്.? ഇത് തന്നെയേ വനലോപ്പിയുടെയും മനസ്സിൽ ഉണ്ടായിരുന്നുള്ളൂ. എന്നാൽ അത് ചെന്ന് അവസാനിച്ചതോ Gameboxന്റെ സ്റ്റീയറിങ് നശിപ്പിക്കലിലും.ഇനിയൊരെണ്ണം പുതിയത് വാങ്ങിയാലല്ലാതെ വനലോപ്പിക്കും കൂട്ടർക്കും നിലനിൽപ്പില്ല. അതിന് പറ്റിയ സ്ഥലമോ ഇന്റർനെറ്റും.

Year : 2018
Run Time : 1h 51min

🔻ആദ്യ ഭാഗമിറങ്ങി 6 വർഷത്തെ ഇടവേളക്ക് ശേഷമാണ് വീണ്ടും റാൽഫും കൂട്ടരും തിരിച്ചെത്തുന്നത്. തീയേറ്ററിൽ കാണണമെന്ന് അതിയായി ആഗ്രഹിച്ചെങ്കിലും റിലീസ് ഇല്ലാത്തതിനാൽ അത് മിസ്സായി. എന്നാൽ ഇന്ന് കണ്ടുകഴിഞ്ഞപ്പോഴാണ് മിസ്സായതിന്റെ വില ശരിക്കും മനസ്സിലാക്കിയത്.

🔻ആദ്യം തന്നെ ആ ക്രിയേറ്റിവിറ്റിക്കിരിക്കട്ടെ ഒരു കുതിരപ്പവൻ. ഇന്റർനെറ്റ് എന്ന ലോകത്തെ ഇതിലും ഗംഭീരമായി കാണിക്കാൻ സാധിക്കുമോ എന്നത് ചോദ്യചിഹ്നമാണ്. ഹ്യൂമർ പരമാവധി ഉൾക്കൊള്ളിച്ച്  കണ്ണഞ്ചിപ്പിക്കുന്ന കാഴ്ചകളാണ് നമുക്കായി കരുതി വെച്ചിരിക്കുന്നത്. കൂടെ ഒരുപാട് പ്രിയ കഥാപാത്രങ്ങളും ഒരു കിടുക്കാച്ചി ഗസ്റ്റ് റോളും മനസ്സിന് സന്തോഷം നൽകി. നല്ല മൊമന്റുകളാൽ സമ്പന്നമായ സിനിമ സിമ്പിളായ ഒരു സന്ദേശവും സമ്മാനിക്കുന്നുണ്ട്. ക്ലൈമാക്സ് അടുക്കുമ്പോഴുള്ള ചില രംഗങ്ങൾ ഒഴിച്ചാൽ പൂർണമായി ആസ്വദിച്ച് തന്നെ കാണാൻ സാധിച്ചു ഈ ചിത്രം.

🔻ＦＩＮＡＬ ＶＥＲＤＩＣＴ🔻

ഇന്റർനെറ്റിന്റെ മായാലോകത്തെ കണ്ണഞ്ചിപ്പിക്കുന്ന കാഴ്ച്ചകളിൽ മികച്ച ദൃശ്യാനുഭവം സമ്മാനിക്കുന്ന ചിത്രം ഒരിക്കലും നിരാശ നൽകില്ല. രാൾഫും വനലോപ്പിയും വീണ്ടും തൃപ്തികരമായ ഒരനുഭവം കരുതിവെച്ചിരിക്കുന്നു തങ്ങളുടെ രണ്ടാം വരവിൽ. തീർച്ചയായും ആനിമേഷൻ പ്രേമികളുടെ പ്രതീക്ഷകൾ കാക്കാൻ ഡിസ്‌നിക്കായിട്ടുണ്ട്.

ＡＢ ＲＡＴＥＳ ★★★½

🔻അടി-ഇടി-വെടി പടങ്ങൾ കൂടുതലായി ഇറങ്ങുന്നതുകൊണ്ട് തെലുഗ് ഇൻഡസ്ട്രിയോട് അത്ര താല്പര്യം തോന്നിയിട്ടില്ല. വല്ലപ്പോഴും ലഭിക്കുന്ന ചില നല്ല സിനിമകൾ ഒഴിച്ചാൽ ഭൂരിഭാഗവും നിരാശ തന്നെയാണ് നൽകിയിട്ടുള്ളത്. എന്നാൽ അതൊക്കെയും മാറ്റിമറിക്കുന്ന, അത്ഭുതപ്പെടുത്തിയ സിനിമയാണ് Awe.

Year : 2018
Run Time : 1h 50min

🔻കഥയെ പറ്റി ഒന്നും പരാമർശിക്കുന്നില്ല. അത് കാണികളോട് ചെയ്യുന്ന അനീതിയായിപ്പോവും. ഒരു ആന്തോളജിയോ അല്ലെങ്കിൽ പാരലൽ നറേഷനോ എന്നൊക്കെ വിളിക്കാൻ തോന്നുംവിധമാണ് സിനിമയിൽ കഥ പറഞ്ഞിരിക്കുന്നത്. ആ കഥകൾ തമ്മിൽ പരസ്പരം ഒരു ബന്ധവും തോന്നിക്കില്ല. ഒരു കഥ നടക്കുമ്പോൾ മറ്റൊന്നിനെ കുറിച്ച് നമ്മൾ വാചാലരാവുകയുമില്ല. എന്നാൽ ഇതെല്ലാം ലിങ്ക് ചെയ്യുന്നിടത്ത് തീരെ പ്രതീക്ഷിക്കാത്ത ഒരു സസ്പെൻസ് ആണ് കരുതി വെച്ചിരുന്നത്.

🔻ഹൈപ്പർ ലിങ്കിങ്ങ് പല തവണ കണ്ടതാണെങ്കിൽ പോലും ഇത്തരത്തിൽ ഒന്ന് അനുഭവിക്കുക വിരളമായിരിക്കും.കാരണം ഒന്നിനെ മറ്റൊന്നിനോദ് ബന്ധിപ്പിക്കാൻ യാതൊരു ഫാക്ടറും ഇല്ലെന്നത് തന്നെ. അത്തരത്തിൽ സമർത്ഥമായി ഒരുക്കിയ തിരക്കഥയും അതിനെ സ്‌ക്രീനിൽ എത്തിച്ച വിധവും അഭിനന്ദനം അർഹിക്കുന്നുണ്ട്. പരീക്ഷണ ചിത്രമെന്ന നിലയിൽ ഒരുപാട് മുന്നോട്ട് പോയിട്ടുണ്ട് Awe.

🔻കാജൾ, നിത്യ മേനോൻ, റെജീന, പ്രിയദർശി തുടങ്ങി ഒട്ടനേകം പേരുടെ കിടിലൻ പ്രകടനങ്ങൾ കൂടി അടയാളപ്പെടുത്തുന്നുണ്ട് ചിത്രം. എല്ലാവരും തകർത്തു എന്നെ പറയാനുള്ളൂ. അനാവശ്യ രംഗങ്ങൾ ഒന്നും ഇല്ലാതെ, പാട്ട് പോലും ഇല്ലാതെ കഥയിൽ മാത്രം കേന്ദ്രീകരിച്ച് കഥ പറഞ്ഞ രീതിക്ക് ഇവരുടെ പ്രകടനങ്ങളും പിന്തുണക്കുന്നുണ്ട്. കൂടെ നല്ല ബിജിഎം കൂടിയാവുമ്പോൾ ത്രിൽ എലമെന്റുകൾ വരുന്ന സ്ഥലങ്ങളും ആവേശം കൊള്ളിക്കുന്നു.

🔻ＦＩＮＡＬ ＶＥＲＤＩＣＴ🔻

പരീക്ഷണചിത്രങ്ങളിൽ ആകൃഷ്ടരാകുന്നവർ ആണോ.? എങ്കിൽ ധൈര്യമായി സമീപിക്കാം ഈ ചിത്രത്തെ. തെലുഗിൽ നിന്നും ഇനിയും ഇതുപോലുള്ള നല്ല  സിനിമകൾ പ്രതീക്ഷിക്കുന്നു. ഇതൊരു തുടക്കം മാത്രമാവട്ടെ.

ＡＢ ＲＡＴＥＳ ★★★★☆