Abeed Azad

Year : 2018
Run Time : 1h 54min

🔻പലപ്പോഴും അമ്പരപ്പിച്ചുകൊണ്ടിരിക്കുന്ന തമിഴ് ഇൻഡസ്ട്രിയിൽ പിറക്കുന്ന ചില കൊച്ചുചിത്രങ്ങളും ശ്രദ്ധ നേടാതെ പോവുന്നുണ്ട്. വലിയ താരമേന്മയോ പിന്നണിപ്രവർത്തകരോ അവകാശപ്പെടാനില്ലെങ്കിലും പുലർത്തുന്ന മികവ് നമ്മെ കണ്ടിരിക്കാൻ പ്രേരിപ്പിക്കും. അത്തരത്തിൽ ഒന്നാണ് 'രാജാ രങ്കുസ്കി'

🔻വെറുമൊരു പോലീസ് കോൺസ്റ്റബിൾ ആയ രാജ എന്ന യുവാവിന് രങ്കുസ്കി എന്ന യുവതിയോട് തോന്നുന്ന പ്രണയം. അത് അവളിലേക്ക് എത്തിക്കാനായി രാജ സ്വീകരിക്കുന്ന വഴി. മറ്റൊരു ഫോണിൽ നിന്ന് രങ്കുസ്കിയെ ഫോൺ ചെയ്യുന്നതിലൂടെ താനുമായുള്ള പ്രണയം സാക്ഷാത്കരിക്കുന്നു. എന്നാൽ അതെ സമയം മറ്റൊരു ഫോൺ നമ്പറിൽ നിന്ന് രങ്കുസ്കിക്ക് രാജയുടെ ശബ്ദത്തിൽ കോൾ വരുന്നു. തുടർന്ന് കഥയിൽ മിസ്റ്ററി ജനിക്കുന്നു.

🔻ഒരു ഗംഭീര ത്രില്ലർ എന്നൊന്നും അവകാശപ്പെടാനില്ല ചിത്രത്തിന്. എന്നാൽ കാണികളെ തൃപ്തിപ്പെടുത്തുന്ന വിധം കാര്യങ്ങൾ കൈകാര്യം ചെയ്യാനായിട്ടുണ്ട്. തുടക്കം അൽപ്പം അമേച്വറിഷ് പോലെ തോന്നിയെങ്കിലും കഥയിലേക്ക് കടക്കുമ്പോൾ ക്ലെച്ച് പിടിക്കുന്നുണ്ട് ചിത്രം. തുടർന്ന് പല ഘട്ടങ്ങളിലും നമ്മെ ആകാംഷയിലാഴ്ത്തുന്നുണ്ട്.

🔻ഇതിനിടയിൽ കൊണ്ടുവന്ന KK എന്ന കഥാപാത്രം അത്ര സുഖകരമായിരുന്നില്ല. ആ കഥാപാത്രത്തിന് നൽകിയ ബിൽഡപ്പ് ആ നടനിലൂടെ അത്ര ദർശിക്കാനായിട്ടില്ല. Killer Instinct പറയുന്ന സീനൊക്കെ അപാര കോമഡിയായിട്ടാണ് തോന്നിയത്. അതാണ് ഇടക്ക് കല്ലുകടിയായ ഐറ്റം. എങ്കിലും ബാക്കിയുള്ള ഭാഗങ്ങൾ ഭംഗിയായി കൈകാര്യം ചെയ്തിട്ടുണ്ട്. നമുക്ക് ഊഹിക്കാൻ സാധിക്കാത്ത വിധം ഒരുക്കിയ കഥയും സസ്പെൻസുമൊക്കെ നെഗട്ടീവുകളെ പിഴുതെറിയുന്നുണ്ട്.

🔻ＦＩＮＡＬ ＶＥＲＤＩＣＴ🔻

ചെറിയൊരു പ്രമേയത്തിൽ ആവശ്യത്തിന് ത്രില്ലും സസ്‌പെൻസും ട്വിസ്റ്റുമെല്ലാം കൊണ്ടുവന്നിടത്ത് ചിത്രം ത്രിപ്തി നൽകുന്ന അനുഭവമാകുന്നു. അനാവശ്യമായ രംഗങ്ങളോ ഗാനങ്ങളോ ചേർക്കാതെ കൃത്യമായി കഥപറഞ്ഞ് പോവുന്നിടത്തും രാജ രങ്കുസ്കി ആസ്വാദ്യകരമാവുന്നുണ്ട്. ചില നെഗട്ടീവുകൾ ഉണ്ടെങ്കിൽ കൂടി അവയൊക്കെ കണ്ടില്ലെന്ന് നടിച്ചാൽ നിരാശപ്പെടേണ്ടി വരില്ല

ＭＹ ＲＡＴＩＮＧ :: ★★★☆☆

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

Year : 2018
Run Time : 1h 54min

🔻പുതുമയുള്ള പ്രമേയത്തിൽ പൊതിഞ്ഞ കണ്ടുമടുത്ത കഥ. ഇങ്ങനെ വിശേഷിപ്പിക്കാം ദുൽഖറിന്റെ ആദ്യ ബോളിവുഡ് ചിത്രമായ കർവാനേ. കാരണം നമ്മൾ കഥയിലേക്ക് ചെല്ലുന്ന വഴി രസകരമാണ്. എന്നാൽ അതിനുശേഷം കാണുന്നതൊക്കെയും പല തവണ ദർശിച്ചിട്ടുള്ള കാര്യങ്ങളും.

🔻തീർത്ഥയാത്രയിൽ ആയിരുന്ന അച്ഛൻ വഴിക്ക് വെച്ച് മരണപ്പെട്ടതിനെത്തുടർന്ന് ആ ശരീരം ട്രാവൽ ഏജൻസി വഴി അവിനാഷിന്റെ പക്കലേക്ക് വരുന്നു. എന്നാൽ അപ്പോഴാണ് അച്ഛന്റെ ശരീരത്തിന് പകരം മറ്റൊരു സ്ത്രീയുടെ ശരീരമാണ് തന്റടുക്കൽ എത്തിയതെന്ന് അവി അറിയുന്നത്. കിട്ടിയ വിവരം വെച്ച് അച്ഛന്റെ ഡെഡ്ബോഡി കൊച്ചിയിലാണെന്ന വാർത്ത കേൾക്കുന്നു. തുടർന്ന് സുഹൃത്ത് ഷൗക്കത്തിനൊപ്പം കൊച്ചിയിലേക്ക് യാത്ര തിരിക്കുന്നു.

🔻അവി എന്ന ഉൾവലിഞ്ഞ നായകനിലൂടെയാണ് ചിത്രം തുടങ്ങുന്നത്. അൽപ്പം ഡീറ്റെയിൽഡ് ആയിത്തന്നെ അവിയെ പരിചയപ്പെടുത്തുന്നുണ്ട്. ശേഷം പ്രമേയത്തിലേക്ക് കടക്കുമ്പോൾ വളരെ രസകരമായി തോന്നുന്നുണ്ട് ഓരോ സംഭവങ്ങളും. ആദ്യ പകുതി അതെ രസത്തിൽ തന്നെ വേഗതയിൽ പോവുന്നുണ്ട്. ടാന്യ എന്ന കഥാപാത്രവും ആദ്യപകുതിയിൽ നല്ല എനർജി നൽകുന്നുണ്ട്. നല്ലൊരു രണ്ടാം പകുതിക്കുള്ള പ്രതീക്ഷയും നൽകുന്നുണ്ട്. എന്നാൽ ശേഷം കൈവിട്ടുപോവുകയായിരുന്നു.

🔻പിന്നീട് നമ്മൾ കാണുന്നത് പലവുരു കണ്ടുമടുത്ത കഥാപാത്രങ്ങളും കഥാസന്ദർഭങ്ങളുമാണ്. അവിടെ രസച്ചരട് നഷ്ടപ്പെടുന്നത് പിന്നീടൊരിക്കലും പഴയ രീതിയിലേക്ക് ഉയർത്തിക്കൊണ്ടുവരാനായിട്ടില്ല. ചില രംഗങ്ങളൊക്കെ എന്തിനെന്ന് പോലും അറിഞ്ഞൂടാ. ഷൗക്കത്ത് എന്ന കഥാപാത്രത്തിന്റെ ചില നർമ്മങ്ങൾ മാത്രമാണ് ആ സാഹചര്യങ്ങളിൽ ആശ്വാസം. ഒടുക്കം എപ്പോഴത്തെയും പോലെ തന്നെ ഉപസംഹരിച്ച് ആസ്വാദനം താഴേക്ക് പോവുന്നു.

🔻പ്രത്യേകിച്ച് എടുത്തുപറയത്തക്ക ഒന്നും പ്രത്യേകത സിനിമയിൽ കാണാനായിട്ടില്ല. അവിനാഷ് എന്ന കഥാപാത്രത്തെ ശരിക്ക് എക്സ്പ്ലോർ ചെയ്യുന്നുണ്ടെങ്കിലും അത് പിന്നീട് ക്ളീഷേ രീതിയിൽ തന്നെ ആക്കുന്നുണ്ട്. സ്പൂൺ ഫീഡിങ്ങ് അധികമായത് മൂലം പലപ്പോഴും വിരസത നൽകുന്നുണ്ട്. ആ കഥാപാത്രത്തെ ദുൽഖർ ഭംഗിയാക്കിയിട്ടുണ്ട്. മറ്റുള്ളവരെക്കാൾ സ്‌ക്രീൻ സ്‌പേസും ദുൽഖറിന് ലഭിച്ചിട്ടുണ്ട്. എങ്കിലും അത്ര മികച്ച ഒന്നായി തോന്നിയില്ല.

🔻ഇർഫാൻ ഖാനാണ് സിനിമയെ പിടിച്ചിരുത്തുന്ന ഘടകങ്ങളിലൊന്ന്. പലപ്പോഴും മടുപ്പുണ്ടാക്കുന്ന സന്ദർഭങ്ങളിൽ നർമ്മങ്ങളിലൂടെ രസം പകരുന്നുണ്ട് പുള്ളിക്കാരൻ. എന്നാൽ കഥാപാത്രപരമായി മേന്മ അവകാശപ്പെടാനില്ല. ടാന്യയെന്ന കഥാപാത്രം നന്നായിരുന്നു. അത് നല്ല രീതിയിൽ പെർഫോം ചെയ്തിട്ടുണ്ട്. എന്നാൽ ചില രംഗങ്ങൾ ആ കഥാപാത്രത്തിന് വേണ്ടിയിരുന്നില്ല എന്നുതോന്നി.

🔻ＦＩＮＡＬ ＶＥＲＤＩＣＴ🔻

വ്യത്യസ്തമായ പ്രമേയത്തിലൂടെ സ്ഥിരം കാഴ്ചകൾ സമ്മാനിക്കുന്ന ചിത്രം ശരാശരിയിൽ കവിഞ്ഞ ആസ്വാദനത്തിൽ കൂടുതൽ ഒന്നും നൽകുന്നില്ല. ചില രസകരമായ സന്ദർഭങ്ങൾ ഒഴിച്ചാൽ ഒരു തവണ കണ്ടുമറക്കാവുന്ന ഒന്ന് മാത്രമാവുന്നു ദുൽഖറിന്റെ അരങ്ങേറ്റ ചിത്രം.

ＭＹ ＲＡＴＩＮＧ :: ★★½

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

റൊമ്പ ദൂരം പോയിട്ടയാ റാം.?
ഉന്നെ എങ്കൈ വിട്ടയോ അങ്ക താന്‍ നിക്കറേന്‍ ജാനു…

ഇരുവരുടെയും പ്രണയത്തിന്റെയും നഷ്ടപ്പെടലുകളുടെയും ആഴവും പരപ്പും ഈ ചോദ്യത്തിലും ഉത്തരത്തിലും നിറഞ്ഞുനിൽക്കുന്നുണ്ട്. ഒരു രംഗത്തേക്ക് മാത്രമല്ല, അവരുടെ ജീവിതത്തെ മുഴുവൻ ഈ ഡയലോഗുകളിലൂടെ സന്നിവേശിപ്പിക്കുന്നടത്താണ് റാമും ജാനുവും നമ്മുടെ ഹൃദയത്തെ ഉലക്കുന്നത്. അത്രമേൽ ഹൃദ്യമാണ് അവരുടെ പ്രണയവും ജീവിതവും. ആ സമയത്ത് നമ്മുടെ നെഞ്ചിടിപ്പിലുണ്ടാവുന്ന മാറ്റം സാക്ഷി.

🔻സിനിമ ഉണ്ടായ കാലം മുതൽ സ്‌ക്രീനിൽ പതിഞ്ഞിട്ടുള്ള കഥയും പ്രമേയവും. ഒരു നൂൽപ്പാലത്തിലൂടെ നടന്നുപോവത്തക്ക ഭദ്രതയും സൂക്ഷ്മതയും തന്റെ ആദ്യചിത്രത്തിലൂടെ ഈ സിനിമക്ക് പകർന്നുകൊടുത്തിടത്താണ് പ്രേം കുമാർ എന്ന സംവിധായകനും അദ്ദേഹത്തിന്റെ ആദ്യ ചിത്രവും മനസ്സ് കവരുന്നത്.

🔻തന്റെ ഓർമ്മകളിൽ നിന്ന്, നഷ്ടസ്വപ്നങ്ങളിൽ നിന്ന് ഒളിച്ചോടാനുള്ള ഒരു വിനോദം മാത്രമാണ് റാമിന് ഫോട്ടോഗ്രാഫി. തന്റെ നാട്ടിൽ നിന്ന് തന്നെ എന്നെന്നേക്കുമായി മാറിനിൽക്കാനുള്ള ഒരു ഉപാധി. എന്നാൽ ഒരുവേളയിൽ തന്റെ നാട്ടിലേക്കും സ്‌കൂളിലേക്കും തിരിച്ചെത്തേണ്ടി വരുന്നിടത്ത് റാമിന്റെ മനസ്സിലെ ഓർമ്മകൾ കൂടുവിട്ട് പുറത്തേക്ക് വരുന്നു. ആകസ്മികമായി മാത്രം ഇത്തരം സംഭവങ്ങൾ കണ്ട് പരിചരിച്ച നമുക്ക് സ്വാഭാവികതയുടെ പുതിയൊരു വാതായനം തുറന്നിടുകയാണ് സംവിധായകൻ. തുടർന്ന് നൊസ്റ്റാള്ജിയയുടെ ചൂഷണവും.

🔻തന്റെ സ്‌കൂളിനകത്ത് പ്രദക്ഷിണം വെക്കുമ്പോൾ റാമിൽ കാണാനാവുക ആ പഴയ പതിനഞ്ചുകാരൻ രാമചന്ദ്രനെയാണ്. അത്ര സൂക്ഷ്‌മമായി അദ്ദേഹത്തിന്റെ സ്‌കൂൾ കാലഘട്ടത്തെ അടയാളപ്പെടുത്തുന്നുണ്ട് സംവിധായകൻ. തുടർന്നുള്ള രാമചന്ദ്രന്റെയും ജാനകിയുടെയും പ്രണയം മനസ്സിൽ മുറിവേൽപ്പിക്കുന്നതും അതുകൊണ്ടാണ്. ജാനുവിനെ ആദ്യമായി പരിചയപ്പെടുത്തുന്ന രംഗം വരെ സംവിധായകന്റെ മിടുക്കിന്റെ തെളിവാണ്. അതിനായി പ്രത്യേകമൊരു സീക്വൻസോ കഥയോ പറയുന്നില്ല. സ്വാഭാവികമായി ആ കഥയിലേക്ക് വന്നുചേരുകയാണ് ജാനു.

🔻സ്‌കൂൾ രംഗങ്ങളിൽ നൊസ്റ്റാള്ജിയയുടെ കെട്ടുപൊട്ടിക്കുന്നത് ഭംഗിയായി കാണിക്കുന്നുണ്ട് ചിത്രം. ഭിത്തിയിൽ പറ്റിയിരിക്കുന്ന ചോക്ക് പൊടിയും പഠിച്ചിരുന്ന ക്ലാസും തല്ലിതേങ്ങയും ഗോവണിപ്പടികളുമൊക്കെ ഗൃഹാതുരത്വത്തിന്റെ മലമുകളിൽ കയറി കസേരയിടുകയാണ്. അതിനുശേഷം വാട്സാപ്പ് ഗ്രൂപ്പിലൂടെ തന്റെ ഓർമ്മകളെ പൂരിപ്പിക്കുകയാണ് റാം. തുടർന്ന് ജാനുവും. പതിവ് പ്രമേയത്തെ തന്റെ ആവിഷ്കാര തന്ത്രത്തിലൂടെ മികച്ച അനുഭൂതി സൃഷ്ടിക്കുന്നതിന്റെ മിടുക്ക് ഇവിടെയാണ് കാണാനാവുക.

🔻നമ്മിലൊരാൾ എന്ന രീതിയിലാണ് പഴയ സ്‌കൂൾ കാലഘട്ടത്തിലെ റാമിനെയും ജാനുവിനെയും കൂടെയുള്ളവരെയുമൊക്കെ പരിചയപ്പെടുത്തുക. റാമിന്റെ സംസാരവും ശബ്ദവും ചുരുക്കം ചില രംഗങ്ങളിൽ മാത്രമാണ് നമുക്ക് കേൾക്കാനാവുക. എന്നാൽ അവിടെ നരേഷൻ വരുന്നത് ആ 15കാരൻ റാമിന്റെ ശബ്ദത്തിലാണ്. അല്ലെങ്കിലും പതിനഞ്ചുകാരന്റെ മനസ്സ് പതിനഞ്ചുകാരനല്ലാതെ മറ്റാർക്കാണ് ഇത്ര ഭംഗിയായി വായിക്കാനാവുക. ആ കാലഘട്ടത്തിന്റെ ഏറ്റവും വലിയ പോസിറ്റിവുകളിലൊന്ന് ആ നറേഷനാണ്.

🔻മെലോഡ്രാമയിലേക്ക് കൂപ്പുകുത്താവുന്ന ചില രംഗങ്ങളെ തന്മയത്വത്തോടെ അവതരിപ്പിച്ചിരിക്കുന്നിടത്തും അവിടെ നിന്ന് ലഭിക്കേണ്ട അനുഭൂതി പൂർണ്ണമായും പ്രേക്ഷകനിലേക്ക് എത്തിക്കുന്നുണ്ട്. സ്‌കൂൾ ആയാലും കോളേജ് ആയാലും അങ്ങനെ തന്നെ. റാമിന്റെ മനസ്സ് പൂർണ്ണമായി പ്രേക്ഷകനിലേക്ക് തരാതെ അതിലല്പം പിന്നീടേക്ക് മാറ്റിവെക്കുന്നത് തെല്ലൊന്നുമല്ല നമ്മെ സ്പർശിക്കുന്നത്. ആ രംഗങ്ങളൊക്കെ സ്തംഭിച്ചിരുന്നുപോയി എന്നുവേണം പറയാൻ.

🔻സ്‌കൂളിൽ അവർ എവിടെ നിർത്തിയോ അതിന്റെ തുടർച്ചയാണ് മേല്പറഞ്ഞ സംഭാഷണം കാണിക്കുക. ആ പാലത്തിൽ അവർ നിർത്തിയിടത്ത് നിന്ന് തുടങ്ങുകയാണ് ഇരുവരും. മിനിമലിസത്തിന്റെ സുന്ദരകാഴ്ചകളോടൊപ്പം ഡയലോഗുകളും മനസ്സ് കവരുന്നു. ആ സന്ദർഭങ്ങളുടെ തീവ്രത തെല്ലും ചോരാതെ നമ്മിലേക്ക് പകരുന്നു.

🔻കഥാപാത്രരൂപീകരണത്തിന്റെ പൂർണ്ണത 96ൽ എന്നപോലെ 2018ലും നമുക്ക് അനുഭവിച്ചറിയാം. റാമിന്റെ കഥാപാത്രമാണെങ്കിൽ കൂടി ജാനു നെഞ്ചത്ത് കൈവെക്കുമ്പോഴടക്കമുള്ള രംഗങ്ങൾ, സംസാരിക്കാൻ കാട്ടുന്ന വിമുഖത, ജാനുവിനെ സ്പർശിക്കാതിരിക്കാനുള്ള സൂക്ഷ്മത, തുടങ്ങി അവരോടൊപ്പം നടക്കുന്ന കൂട്ടുകാരിൽ വരെ അതിന്റെ ഗുണം നീളുന്നു. ഫലമോ ഈയടുത്ത് കണ്ടിട്ടുള്ളതിൽ വെച്ച് ഏറ്റവും മികച്ച കഥാപാത്രനിർമ്മിതിയാവുന്നു 96ലേത്.

🔻ഉൾവലിഞ്ഞ രാമചന്ദ്രനെ തന്റെ സംസാരത്തിലും ശ്വാസത്തിലും പേറുന്നുണ്ട് വിജയ് സേതുപതി. തന്റെ ഓരോ ശരീരഭാഷ്യത്തിലും ഒറ്റപ്പെടലും ഒളിച്ചോട്ടവുമൊക്കെ അദ്ദേഹത്തിൽ അടയാളപ്പെടുത്താനാവുന്നുണ്ട്. ജാനുവിനെ കണ്ടതുമുതല്കുള്ള രംഗങ്ങളിൽ തെല്ലൊന്നുമല്ല ആ പ്രതിഭ അത്ഭുതപ്പെടുത്തുന്നത്. തന്നിലൂടെ ആ പതിനഞ്ചുകാരൻ രാമചന്ദ്രനെ കൃത്യമായി സ്‌ക്രീനിലെത്തിക്കുകയാണ് അദ്ദേഹം. മറ്റൊരു നടനും ഇത്ര ഭംഗിയായി ഇതിന് സാധിക്കില്ലെന്ന് അടിവരയിടുന്നു മക്കൾ ശെൽവൻ. തനിക്കിഷ്ടമുള്ള പാട്ട് ജാനു പാടുമ്പോഴുള്ള രംഗത്തിലെ ഭാവഭദ്രത..!!

🔻തന്റെ മുൻ ചിത്രങ്ങളിലെ പ്രകടനങ്ങളുടെ നിഴൽ എങ്ങും സ്പർശിക്കാതെ ജാനുവിൽ തന്റേതായ കയ്യൊപ്പ് പതിപ്പിക്കുന്നുണ്ട് തൃഷ. അത്രമേൽ കയ്യടക്കത്തോടെ ആ കഥാപാത്രത്തിന്റെ വികാരങ്ങളെ ഭംഗിയാക്കുന്നുണ്ട് തൃഷ. ജാനു തന്റെ കരിയറിലെ മികച്ച കഥാപാത്രങ്ങളിൽ ഒന്ന് തന്നെയെന്ന കാര്യത്തിൽ തൃഷയ്ക്ക് അഭിമാനിക്കാം. തന്റെ പ്രണയം കുട്ടികൾക്ക് പറഞ്ഞുകൊടുക്കുന്ന രംഗമൊക്കെ അപാരമായിരുന്നു.

🔻റാമിന്റെയും ജാനുവിന്റെയും ചെറുപ്പം അവതരിപ്പിച്ച ഗൗരി കൃഷ്ണയും ആദിത്യ ഭാസ്കറും മനം കവരുന്നുണ്ട് വല്ലാതെ. ഗൗരിയുടെ ചിരിയും ഊർജ്ജവും തൃഷയുടെ ജാനകിക്കും നല്ല മൈലേജ് നൽകുന്നുണ്ട്. ഡയലോഗുകൾ പോലും അധികമില്ലാത്ത ആദിത്യ ഭാസ്കർ റാമിനെ ഭംഗിയാക്കുന്നുണ്ട്. ഇരുവരും സിനിമ കഴിയുമ്പോഴും മനസ്സിൽ തങ്ങിനിൽക്കും.

🔻96ന്റെ ശ്വാസവും താളവുമാണ് ഗോവിന്ദ് മേനോന്റെ സംഗീതവും ഗാനങ്ങളും. സിനിമ റിലീസ് ആവുന്നതിന് മുമ്പിറങ്ങിയ കാതലേ എന്ന ഗാനത്തിനേക്കാൾ കേൾവിക്ക് ഇമ്പമേകുന്ന ഗാനങ്ങൾ വേറെയുമുണ്ട്. വിജയ് സേതുപതി സ്‌കൂൾ സന്ദർശിക്കുമ്പോഴുള്ള, ജാനകിയുടെ കല്യാണസന്ദർഭത്തിന്റെ കാര്യം പറയുമ്പോഴുള്ള, ഹോട്ടലിന് പുറത്ത് നിന്ന് ഫോൺ ചെയ്യുമ്പോഴുള്ള പശ്ചാത്തലസംഗീതങ്ങളൊക്കെയും ഇപ്പോഴും കാതിലൂടെ ഒഴുകി നടപ്പുണ്ട്. ഓരോ സന്ദർഭങ്ങളുടെയും തീവ്രത തെല്ലും ചോരാതെ ഇത്രമേൽ ഹൃദ്യമാക്കുന്നതിന് സംഗീതം വഹിച്ച പങ്ക് ചെറുതല്ല. സിനിമയുടെ നട്ടെല്ല് തന്നെ സംഗീതമാണെന്ന് ഒരുതരത്തിൽ പറയാം. പല ഉപകാരണങ്ങളിലൂടെ ഓരോ രംഗങ്ങളും പൂർത്തീകരിക്കുന്നത് സംഗീതമാണ്.

🔻ഇളയരാജയുടെയും ജാനകിയുടേയുമൊക്കെ പാട്ടുകൾ ചില സന്ദർഭങ്ങളിൽ നൽകുന്ന എനർജി ചില്ലറയല്ല. നല്ല മൊമന്റം കീപ്പ് ചെയ്യാനായിട്ടുണ്ട് അവിടങ്ങളിൽ. ഇരുകാലഘട്ടങ്ങൾ വളരെ ഭംഗിയായി പകർത്തിയിട്ടുണ്ട് ഷണ്മുഖ സുന്ദരത്തിന്റെ ക്യാമറ. അതോടൊപ്പം ആർട്ട് ഡയറക്ഷൻ വിശ്വസനീയമാം വിധം മനോഹരമാക്കിയിട്ടുണ്ട് ചിത്രത്തിലുടനീളം.

🔻ＦＩＮＡＬ ＶＥＲＤＩＣＴ🔻

ജാനു സ്‌കൂൾ കാലഘട്ടത്തിൽ റാമിന്റെ നെഞ്ചിൽ കൈവെക്കുമ്പോൾ മിടിപ്പ് കൂടുന്നത് കണ്ടപ്പോൾ ചിരിയാണ് വന്നതെങ്കിൽ വർഷങ്ങൾക്ക് ശേഷം കാണുമ്പോൾ തന്റെ നഷ്ടസ്വപ്നങ്ങളും ഓർമ്മകളും നിസ്സഹായതയുമൊക്കെയാണ് അനുഭവപ്പെട്ടത്. അത് തന്നെയാണ് ആ സംവിധായകന്റെ മിടുക്കും. അതുകൊണ്ട് തന്നെ തമിഴ് സിനിമയുടെ ഉയർച്ചയുടെ പാതയിൽ മുതൽക്കൂട്ടാവുന്ന ഒന്നായി മാറുന്നു 96 കലാഘട്ടത്തിലെ ഈ പ്രണയവും.

പ്രണയത്തിന്റെ ഹൃദ്യതയും സംഗീതത്തിന്റെ വശ്യതയും നൊസ്റ്റാള്ജിയയുടെ കുത്തൊഴുക്കും കൂടിച്ചേർന്ന അപൂർവ്വമായ ഒരനുഭവം. ഒരു സിനിമയെന്നതിനപ്പുറം അനുഭവിച്ചറിയേണ്ട ഒരു ജീവിതമാണ് 96.

ＭＹ ＲＡＴＩＮＧ::★★★★½

Year : 2018
Run Time : 1h 52min

🔻ഒരു ആന്റിഹീറോ കഥാപാത്രത്തിനായി ഒരു മുഴുനീള ചിത്രം ഒരുക്കുന്നു എന്ന് കേട്ടപ്പോൾ തന്നെ പ്രതീക്ഷയായിരുന്നു. കൂടെ ടോം ഹാർഡിയാണ് നായകനെന്നറിഞ്ഞപ്പോൾ പ്രതീക്ഷകൾ കൂടി. എന്നാൽ പ്രിവ്യൂവിന് ശേഷമുള്ള നെഗറ്റിവ് റിവ്യൂകൾ അറിഞ്ഞപ്പോൾ പ്രതീക്ഷകൾ അമ്പാടെ കാറ്റ് പോയ ബലൂൺ പോലെ എങ്ങോട്ടോ പോയി. ഫലമോ കാഴ്ചയിൽ തൃപ്തിയും.

🔻വെനം ഇൻട്രോ സീൻ വരെ അൽപ്പം പതുക്കെയാണ് ചിത്രം നീങ്ങുന്നത്. ടോം ഹാർഡിയുടെ ചില വൺ ലൈനറുകളാണ് അതുവരെ ആശ്വാസം. അതോടൊപ്പം റിസ് അഹമ്മദിന്റെ ഡ്രേക്ക് എന്ന കഥാപാത്രത്തിന്റെ സിമ്പിൾ വില്ലനിസവും ചിലയിടങ്ങളിൽ കാണാനാവും. എന്നാൽ വെനം വന്നതിന് ശേഷം സമയം പോവുന്നതറിയില്ല. കിടിലൻ സ്പീഡിലാണ് സിനിമ പോവുന്നത്. മടുപ്പ് ലവലേശം തോന്നാതെ ആസ്വദിക്കാനുള്ള പലതും ചിത്രം നൽകുന്നുണ്ട്. കൂടെ ടോമിന്റെ അടിപൊളി പെർഫോമൻസും.

🔻കട്ട വില്ലനിസം കാണിക്കുന്ന വെനത്തെ ഒരു ഹീറോയാക്കി പ്രതിഷ്ഠിക്കാൻ ശ്രമിച്ചിടത്താണ് സംവിധായകന് അടിപതറിയത്. ഒരാവശ്യവുമില്ലാതെ ദുർബ്ബലനായ് ഒരു വില്ലനെ എന്തിനോവേണ്ടി കൊണ്ടുവന്നത് പോലെ. ക്ലൈമാക്സ് വരെ വില്ലൻ എന്നൊരു കോൺസെപ്റ് പോലും നമ്മുടെ മനസിലേക്ക് വരുന്നില്ല എന്നുള്ളതാണ് സത്യം. അത്ര ഊള വില്ലനാണ് ഇവിടെ വെനത്തിനെതിരെ. അതാണ് സിനിമയുടെ ഏറ്റവും മോശം ഘടകം.

🔻അവസാനത്തേക്ക് വരാൻ നേരം പലയിടത്തും തുടർച്ച നഷ്ടപ്പെടുന്നുണ്ട്. പെട്ടെന്നുണ്ടായ വെനത്തിന്റെ മനംമാറ്റമൊക്കെ കാണുമ്പോൾ വായും തുറന്നിരിക്കാനേ തോന്നൂ. എങ്കിലും വെനം-ടോം കോമ്പിനേഷൻ സീനുകൾ ഒരു പരിധി വരെ അതിനെ കവച്ചുവെക്കുന്നുണ്ട്. ഫൈറ്റ് സീനുകളൊക്കെ അടിപൊളിയായിരുന്നു. തീയേറ്ററിൽ തന്നെ ആസ്വദിക്കേണ്ടതാണ് അവ.

🔻പോസ്റ്റ് ക്രെഡിറ്റ് സീൻ ആദ്യത്തേത് നല്ലൊരു ഹൈപ്പ് കൊണ്ടുവന്നപ്പോൾ രണ്ടാമത്തേത് കാണാൻ പോലും നിന്നില്ല. നല്ല പ്രിന്റ് ഇറങ്ങുമ്പോൾ മാത്രം കണ്ടാൽ മതിയാവും എന്ന അഭിപ്രായം ഞാനും ചെവികൊണ്ടു.

🔻ＦＩＮＡＬ ＶＥＲＤＩＣＴ🔻

നെഗറ്റിവ് റിവ്യൂകൾ കേട്ട് ഒരു പ്രതീക്ഷയുമില്ലാതെ കാണാൻ പോയ എന്നെ തൃപ്തിപ്പെടുത്തിയ ചിത്രം തന്നെയാണ് Venom. പ്രതീക്ഷകളൊന്നും ഇല്ലാതെ സമീപിച്ചാൽ പൈസ നഷ്ടമാവില്ല.

ＭＹ ＲＡＴＩＮＧ :: ★★★☆☆

Year : 2010
Run Time : 2h 1min

🔻30 ചോദ്യങ്ങൾ അടങ്ങിയ ഒരു ക്വിസ് പ്രോഗ്രാം. 29 ചോദ്യങ്ങൾക്ക് ഉത്തരം നൽകി അവസാന റൗണ്ടിലെത്തിയ ആരും ഇതുവരെ ജയിച്ച ചരിത്രമില്ല. അതുകൊണ്ട് തന്നെ താണ്ടാൻ സാധിക്കാത്ത കടമ്പയായി ആ പരിപാടി തുടങ്ങിയ അന്നുമുതൽ മുപ്പതാമത്തെ ചോദ്യം നിലനിൽക്കുന്നു. എന്നാൽ ആ ചോദ്യം നേരത്തെ അറിഞ്ഞാലോ.?

🔻ഹൈവേയിൽ നടന്ന ഒരു ആക്സിഡന്റിലാണ് ആ കൂട്ടരെല്ലാം പോലീസ് സ്റ്റേഷനിൽ എത്തുന്നത്. എന്നാൽ ഒരിക്കലും പ്രതീക്ഷിക്കാത്ത ഒരു കാര്യം അവിടെ അരങ്ങേറുന്നു. തുടർന്ന് അവരെല്ലാം ഒരേ ലക്ഷ്യത്തോടെ ഇറങ്ങിപ്പുറപ്പെടുന്നു. Money Money Money...!!

🔻ഒരു കിടിലൻ തീം തന്നെയാണ് ഈ സിനിമയുടേത്. ത്രില്ലിനും ട്വിസ്റ്റിനും സസ്പെൻസിനുമൊക്കെ ഒരുപാട് സാധ്യതകൾ ഉള്ള പ്രമേയം. എന്നാൽ അവയൊക്കെയും മറന്ന് ഈ സിനിമയെ വെറും കോമഡിയിൽ മാത്രം എന്തിന്  പൊതിഞ്ഞെടുത്തതെന്ന് ഉത്തരം കിട്ടാത്ത ചോദ്യമായി നിലനിൽക്കുന്നു.

🔻കഥാപാത്രങ്ങളുടെയൊക്കെയും പ്രാഥമിക ആവശ്യം പണമാണെന്ന് സംഭാഷണങ്ങളിലൂടെ പറഞ്ഞ രീതിയൊക്കെ നന്നായിരുന്നു. അതോടൊപ്പം പോലീസ് സ്റ്റേഷൻ രംഗങ്ങളിലെ നർമ്മങ്ങളും. എന്നാൽ അതിന്റെ ഹാങ്ങോവർ സിനിമയിലുടനീളം കൊണ്ട് നടന്നത് വളരെ മോശം അറ്റംപ്റ്റ് തന്നെയെന്ന് പറയാതെ വയ്യ. ക്വിസ് നടക്കുന്ന രംഗങ്ങളിൽ പോലും അനാവശ്യമായി കോമഡി നിറച്ചത് തെല്ലൊന്നുമല്ല ആ രംഗങ്ങളുടെ ആവേശം കെടുത്തുന്നത്. ഒടുവിൽ ചെറിയൊരു ട്വിസ്റ്റ് കൂടി കൊടുത്തത് അത്ര നേരം ഉണ്ടായ മടുപ്പിൽ നിന്ന് ലേശം കരകയറ്റുന്നുണ്ട് എന്ന് മാത്രം.

🔻ＦＩＮＡＬ ＶＥＲＤＩＣＴ🔻

Bad Genius ലെവലിൽ പോകാമായിരുന്ന ഒരു തീമിനെ വെറും കോമഡി പീസാക്കി മാറ്റിയത് എങ്ങനെയെന്ന് എത്ര ആലോചിച്ചിട്ട് പിടികിട്ടുന്നില്ല. ചുരുളഴിയാത്ത രഹസ്യമായി അതിപ്പോഴും അവശേഷിക്കുന്നു.

ＭＹ ＲＡＴＩＮＧ :: ★★☆☆☆

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

Year : 2018
Run Time : 1h 32min

🔻യാത്രകൾക്കൊരു പ്രത്യേകതയുണ്ട്. അവ അവസാനിച്ച ശേഷം പല ഓർമ്മകളും നമ്മുടെ മനസ്സിൽ നിക്ഷേപിക്കും. ജീവിതകാലം മുഴുവൻ അവ നമ്മിൽ തങ്ങിനിൽക്കും. എന്നാൽ യാത്ര ചെയ്ത വ്യക്തിക്ക് മാത്രമാണോ അങ്ങനെയാവേണ്ടത്.? കണ്ടിരിക്കുന്നവർക്കും അങ്ങനെയൊരു അനുഭവം പ്രദാനം ചെയ്യാൻ കഴിഞ്ഞില്ലെങ്കിൽ ആ കാഴ്ച നിരാശാജനകമാണ്. അത് തന്നെയാണ് ഈ ഫക്കീറിന്റെ യാത്രയിലും സംഭവിച്ചത്.

🔻തന്റെ അച്ഛനെ തേടിയാണ് അജതശത്രു ആ യാത്രക്ക് മുതിർന്നത്. വളരെ സന്തോഷവും അതോടൊപ്പം പ്രതീക്ഷയുമായിരുന്നു അവനിൽ. എന്നാൽ ഒരു രാത്രി കഴിച്ചുകൂട്ടാൻ അവൻ ഉപയോഗിച്ച കുബുദ്ധി കൊണ്ടെത്തിച്ചതോ ഒരിക്കലും തീരാത്ത ഊരാക്കുരുക്കിലും. അവിടെ തുടങ്ങുന്ന അവന്റെ യാത്ര.

🔻സിനിമയുടെ പ്രമേയം മാത്രമായി പറയുമ്പോൾ വളരെ രസകരമായ ഒരു അഡ്വെഞ്ചർ ആവും നമ്മൾ പ്രതീക്ഷിക്കുക. എന്നാൽ അത് സ്‌ക്രീനിൽ എത്തിക്കാനാവാതെ പോയിടത്താണ് ചിത്രം ആസ്വാദനം നൽകാതെ പോവുന്നത്. തുടക്കമൊക്കെ രസകരമെങ്കിലും ആ മൊമന്റം തുടർന്നങ്ങോട്ട് നിലനിർത്താനായിട്ടില്ല. അതുകൊണ്ട് തന്നെ കാഴ്ചയിൽ ഒരു പ്രത്യേകത ഫീൽ ചെയ്യാനാവാതെ മങ്ങിപ്പോവുന്നുണ്ട് ചിത്രം.

🔻നർമ്മം കണ്ടെത്താനാവാത്തിടത്ത് മറ്റ് ചില കാര്യങ്ങൾ തൊട്ടുതലോടി പോവുന്നുണ്ട് ചിത്രം. അതിൽ ഏറ്റവും മികച്ച് നിന്നത് അഭയാർഥികളുടെ കഥ പറഞ്ഞ ഇടമാണ്. അത് സമയമെടുത്ത് തന്നെ കൈകാര്യം ചെയ്തിട്ടുണ്ട്. എങ്കിലും വിഷയത്തിന്റെ ഇന്റൻസിറ്റി നഷ്ടപ്പെടുന്നുണ്ട് ആ രംഗങ്ങളിൽ. സ്‌ക്രീനിൽ വന്ന സകല കഥാപാത്രങ്ങളും ഇംഗ്ലീഷ് സംസാരിച്ചത് അൽപ്പം ബോറായി തോന്നിയെന്ന് പറയാതെ വയ്യ. അവിടെയാണ് ലയൺ അടക്കമുള്ള ചിത്രങ്ങൾ തലയുയർത്തി നിൽക്കുന്നത്.

🔻അജതശത്രുവിനെ മാത്രം കേന്ദ്രീകരിച്ച് കഥ പറഞ്ഞ രീതി കൊള്ളാമായിരുന്നു. എങ്കിലും മറ്റുള്ള കഥാപാത്രങ്ങൾക്ക് തീരെ സ്‌ക്രീൻ സ്‌പേസ് ലഭിച്ചിട്ടില്ല. അതുകൊണ്ട് ധനുഷിന്റെ ഒറ്റയാൾ പ്രകടനം തന്നെ ശരണം. അത് പുള്ളിക്കാരൻ കിടു ആക്കിയിട്ടുണ്ട്. നായികയെന്ന് പറയാവുന്ന ഒരു കഥാപാത്രത്തെ കാണാൻ വളരെ ക്യൂട്ട് ആയിരുന്നു. ധനുഷിന്റെ ചെറുപ്പകാലം അവതരിപ്പിച്ച പയ്യൻ പക്കാ എനർജറ്റിക് ആയിരുന്നു. ആ ഭാഗങ്ങളൊക്കെ നല്ല രസകരമായി തോന്നി.

🔻ＦＩＮＡＬ ＶＥＲＤＩＣＴ🔻

നല്ലൊരു പ്ലോട്ടിനെ സമീപനത്തിലെ പിഴവുകൾ കൊണ്ട് ശരാശരി അനുഭവമാക്കിയ ചിത്രം ധനുഷിന്റെ ഒറ്റയാൾ പ്രകടനം കൊണ്ട് മാത്രം കണ്ടിരിക്കാൻ പ്രേരിപ്പിക്കുന്ന ഒന്നാണ്. ധനുഷിന് ഫക്കീറിന്റെ കഥാപാത്രത്തിലൂടെ നല്ലൊരു ഹോളിവുഡ് എൻട്രി കൊടുക്കാൻ കഴിഞ്ഞു എന്നത്  മാത്രമാണ് സിനിമക്ക് എടുത്തുപറയാവുന്ന മേന്മ.

ＭＹ ＲＡＴＩＮＧ :: ★★½

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻അൽഷിമേഴ്‌സും സീരിയൽ കില്ലിങ്ങും. വളരെ ഇന്ററെസ്റ്റിംഗ് ആയ ഒരു കോമ്പിനേഷൻ തന്നെ. അത് തന്നെയാണ് സഹ്‌സിയത്ത് കാണാൻ ആകാംഷ ഉണ്ടാക്കിയതും. എങ്ങനെയാവും അത് രണ്ടും ബന്ധപ്പെട്ട് കിടക്കുക.? അതിനുള്ള ഉത്തരം 12 എപ്പിസോഡുകളിലൂടെ സംവിധായകൻ കാട്ടിത്തരുകയായിരുന്നു.

🔻തന്റെ ചെറുപ്പം മുതലുള്ള ഓർമ്മകൾ മനസ്സിൽ നിന്ന് മാഞുകൊണ്ടിരിക്കുകയാണെന്ന വാർത്ത നമ്മളിലെത്തിയാൽ എന്താവും നമ്മുടെ പ്രതികരണം.? ചെറിയ ഞെട്ടൽ ആവില്ല അത് നമ്മിൽ ഏൽപ്പിക്കുക. അത് തന്നെയായിരുന്നു ആഗക്കും ഈ വാർത്ത ആദ്യം കേട്ടപ്പോൾ തോന്നിയത്. ഡോക്ടറുടെ ഈ വാക്കുകൾ അദ്ദേഹത്തെ ഒരുപാട് അസ്വസ്ഥനാക്കി. എന്നാൽ കുറച്ച് കഴിഞ്ഞ് ആ രോഗത്തിൽ അദ്ദേഹം സന്തോഷിച്ചു. അവിടെ തുടങ്ങുന്നു സീരീസിന്റെ ത്രില്ല്.

🔻ആഗ നടത്തുന്ന ഓരോ കൊലപാതകങ്ങളും മറ്റൊരാളിലേക്കുള്ള യാത്ര കൂടിയായിരുന്നു. ഹോമിസൈഡ് ഡിവിഷനിലെ ഒരേയൊരു പെൺതരിയായ നെവ്രയിലേക്ക്. നെവ്രയുടെ പേര് കൂടി അതിൽ ഉൾപെടുന്നതിലൂടെ കൊലപാതകങ്ങളുടെ ദുരൂഹത ഏറി വരുന്നു. തുടർന്ന് അന്വേഷണങ്ങൾ പലവഴിക്ക് തിരിയുന്നു.

🔻ആദ്യം കാണുന്ന തുർക്കി സീരീസ് ആൺ സഹ്‌സിയ്യത്ത്. കെട്ടുറപ്പുള്ള തിരക്കഥയുടെ ഗംഭീര അവതരണമാണ് സീരീസിന്റെ ഏറ്റവും വലിയ കരുത്ത്. ഓരോ കഥാപാത്രങ്ങളും അത്ര പതിയുന്നുണ്ട് കാണുന്നവരുടെ മനസ്സിൽ. അവരുടെ സ്വഭാവങ്ങളും ചാഞ്ചല്യങ്ങളുമൊക്കെ വ്യക്തമാണ്. അതുകൊണ്ട് തന്നെ എപ്പോഴും എന്തും സംഭവിക്കാം എന്ന അവസ്ഥയാണ്. ആഗയുടെ കഥാപാത്രം തന്നെയാണ് അതിൽ മികവ് പുലർത്തുന്നത്.

🔻ഓരോ എപ്പിസോഡിലും ത്രിൽ എലമെൻറ്സ് നിലനിർത്തുന്നുണ്ട് സംവിധായകൻ. അതിനെ രോഗാവസ്ഥയുമായി ബന്ധപ്പെടുത്തുന്നതൊക്കെ മികച്ച് നിൽക്കുന്നുണ്ട്. അതോടൊപ്പം മിസ്റ്ററി മറനീക്കി വരുന്ന ഭാഗമൊക്കെ പെർഫെക്റ്റ് ആയി സ്‌ക്രീനിൽ എത്തിച്ചിട്ടുണ്ട്. എടുത്ത് പറയേണ്ടതാണ് ആ ഭാഗങ്ങൾ. കൂടെ സീരീസിന്റെതായ ചില ബിജിഎമ്മുകൾ ചില രംഗങ്ങളിൽ വരുമ്പോഴുള്ള ചടുലത നൽകുന്ന ത്രില്ല് ചില്ലറയല്ല. ഛായാഗ്രഹണവും പശ്ചാത്തലസംഗീതവും ഒന്നിനൊന്ന് മികച്ച് നിൽക്കുന്നുണ്ട്.

🔻ആഗയുടെ കഥാപാത്രം തന്നെയാണ് സീരീസിന്റെ ഹൈലൈറ്റ്. ചില നേരങ്ങളിലുള്ള പുള്ളിയുടെ ഒരു ചിരിയുണ്ട്. വല്ലാതെ ആകർഷിക്കുന്നുണ്ട് അവ. അതോടൊപ്പം സംസാരശൈലിയും രസകരമായിരുന്നു. നെവ്രയും ആതിസും ഫിറോസുമൊക്കെ ശ്രദ്ധയാകർഷിക്കുന്ന കഥാപാത്രങ്ങളാവുന്നുണ്ട്. എങ്കിലും അവസാനം ചിലരുടെ കാര്യത്തിൽ കുറച്ചുകൂടി ഡീറ്റൈലിംഗ് ആവാമായിരുന്നെന്ന് തോന്നി.

🔻ＦＩＮＡＬ ＶＥＲＤＩＣＴ🔻

പതിവ് തീമിനെ വ്യത്യസ്തമായ രീതിയിൽ സമീപിച്ച് മികച്ച അനുഭവമാക്കിയ സീരീസ് എല്ലാം ക്രൈം ത്രില്ലർ പ്രേമികൾക്കും നല്ലൊരു വിരുന്ന് തന്നെയാണ്. മികവ് പുലർത്തുന്ന കഥയും അവതരണവും കാഴ്ചക്ക് ശേഷവും മനസ്സിൽ അവശേഷിക്കും എന്നുറപ്പ്.

ＭＹ ＲＡＴＩＮＧ :: ★★★½

സീരീസ് ടെലിഗ്രാം ചാനലിൽ ലഭ്യമാണ്. Abi Suggests

Year : 2018
Run Time : 45 min
🔻പത്തേമാരിയിൽ കേവലം ഒരു ഫോൺകോളിലൂടെ മനസ്സിൽ തട്ടിയ ചില സംഭാഷണങ്ങളുണ്ട്. ഭാര്യയും ഭർത്താവും വർഷങ്ങളോളം പിരിഞ്ഞിരിക്കേണ്ടി വന്ന വേദനകൾ സിനിമകളിലൂടെയല്ലാതെ നേരിട്ടും കണ്ടിട്ടുണ്ട്. ആ പ്രമേയം തന്നെയാണ് തനൂജ ചന്ദ്ര തന്റെ ചിത്രത്തിനായി തെരഞ്ഞെടുത്തത്.

🔻പണം സമ്പാദിക്കുകയെന്ന ഒറ്റ ലക്ഷ്യത്തോടെ ഗൾഫ് നാടുകളിലേക്ക് ചേക്കേറുന്ന പ്രവാസികളുടെ കുടുംബമാണ് സംവിധായിക ഇത്തവണ സ്‌ക്രീനിലെത്തിച്ചത്. കല്യാണം കഴിഞ്ഞയുടനെ ഭർത്താവ് ഗൾഫിലേക്ക് തിരിച്ച നൂർ ആണ് ചിത്രത്തിലെ കേന്ദ്ര കഥാപാത്രം. അവളുടെ ഏറ്റവും അടുത്ത സുഹൃത്ത് അൻവറും. നൂറിനെക്കാൾ പ്രായം കുറഞ്ഞ അൻവറിന് അവളോട് ഇഷ്ടമാണ്. ഒരു അവിഹിതത്തിന്റെ തുടക്കമെന്ന് നമ്മൾ വിചാരിക്കുന്നിടത്താണ് കഥ മറ്റൊരു ദിശയിലേക്ക് സഞ്ചരിക്കുന്നത്.

🔻ചില നല്ല മൊമന്റുകൾ ചിത്രത്തിനുണ്ട്. 40 മിനിറ്റ് മാത്രം നീളുന്ന ഈ സിനിമയിൽ എടുത്ത് പറയേണ്ടത് അത്തരം രംഗങ്ങളാണ്. അതിൽ മെഹർ എന്ന അഭിനേത്രിയുടെയും കാർത്തിക് ആര്യന്റെയും മികച്ച പ്രകടനങ്ങൾ ആ രംഗങ്ങൾ കൂടുതൽ മനോഹരമാക്കുന്നു. നായികക്ക് അഭിനയസാധ്യതകൾ ഒരുപാടുണ്ട് ഈ ചിത്രത്തിൽ. അവയൊക്കെ  മെഹർ ഭംഗിയാക്കിയപ്പോൾ അതേ രംഗങ്ങളുടെ ഹാങ്ങോവർ ആ സിനിമയിലുടനീളം നിലനിന്നുവെന്ന് ആ സംസാരത്തിൽ നിന്ന് വ്യക്തമായിരുന്നു. പിന്നെ ഇടക്കിടെയുള്ള കരച്ചിൽ ചില സമയങ്ങളിൽ അനാവശ്യമെന്ന തോന്നൽ ജനിപ്പിക്കുകയും ചെയ്തു.

🔻ＦＩＮＡＬ ＶＥＲＤＩＣＴ🔻

വളരെ ചുരുങ്ങിയ നേരം കൊണ്ട് നല്ലൊരനുഭവം സമ്മാനിച്ച സിൽവത്ത് പ്രമേയത്തിലെ പുതുമ കൊണ്ട് ശ്രദ്ധ പിടിച്ചുപറ്റുന്നുണ്ട്. ചില പോരായ്മകൾ കണ്ണിൽ പെട്ടുവെങ്കിൽ കൂടി അഭിനേതാക്കളുടെ മികച്ച പ്രകടനം കൊണ്ട് അവയെല്ലാം കവച്ചുവെക്കുന്ന ചിത്രം തൃപ്തികരമായ അനുഭവമാണ് സമ്മാനിച്ചത്.

ＭＹ ＲＡＴＩＮＧ :: ★★★☆☆

ചിത്രം ടെലിഗ്രാം ചാനലിൽ ലഭ്യമാണ്. Abi Suggests