Abeed Azad

🔻സൗത്ത് ആഫ്രിക്കയിൽ വർണ്ണവിവേചനം കൊടുംപിരി കൊണ്ടിരിക്കുകയാണ്. ഏത് വിധേനയും അവയൊക്കെയും ചെറുക്കാനുള്ള സന്നദ്ധസംഘടനകളും രൂപപ്പെട്ടുകൊണ്ടിരിക്കുകയും ചെയ്യുന്നു. അവിടെയാണ് രണ്ട് വെളുത്ത വർഗക്കാർ ആ പ്രവർത്തനങ്ങളെയൊക്കെയും പിന്തുണച്ച് അവരോടൊപ്പം നിന്നത്. അവരാലാവും വിധം വിവേചനത്തിനിരയായവർക്ക് താങ്ങും തണലുമാവാൻ അവർ ശ്രമിച്ചുകൊണ്ടേയിരുന്നു. എന്നാൽ അവസാനം ജയിലിൽ ജീവിതത്തിന്റെ സിംഹഭാഗവും ചെലവഴിക്കാൻ ജഡ്ജി ഉത്തരവിടുകയായിരുന്നു. Tim Jenkin, Stephen  Lee എന്നിവരായിരുന്നു അവർ.

Year : 2020
Run Time : 1h 46min

🔻12 വർഷത്തേക്ക് ജയിൽശിക്ഷ വിധിക്കപ്പെട്ട ടിമ്മും ലീയും തങ്ങളുടെ ജീവിതത്തിലെ വിലപ്പെട്ട വർഷങ്ങൾ അവിടെ ചെലവഴിക്കാൻ ഒരുക്കമായിരുന്നില്ല. എന്ത് വിലകൊടുത്തും അവിടെ നിന്ന് രക്ഷപ്പെടാൻ അവർ തീരുമാനിച്ചു. എന്നാൽ അതിനുള്ള കടമ്പകൾ ചെറുതായിരുന്നില്ല. പ്രത്യേകിച്ച് വർണ്ണവിവേചനത്തിനെതിരെ പോരാടിയെത്തിയ രണ്ട് പേർക്ക്.

🔻Tim Jenkin തന്നെയെഴുതിയ തന്നെ തന്റെ ജയിൽ ചാട്ടം ആത്മകഥയായി ഒരുക്കിയിരുന്നു. ആ പുസ്തകത്തിനെ ചുവടുപിടിച്ചാണ് ചിത്രം ഒരുക്കിയിരിക്കുന്നത്. യഥാർത്ഥ സംഭവങ്ങളെ കേന്ദ്രീകരിച്ചുള്ള സിനിമയാവുമ്പോൾ കൈകടത്തലുകൾ ഒരു പരിധിക്കപ്പുറമായാൽ ആസ്വാദനത്തെ ഉറപ്പായും ബാധിക്കാൻ സാധ്യതയുണ്ട്. അവിടെയാണ് ഈ ചിത്രം സ്ഥിരം ഫോർമാറ്റുകളെ കവച്ചുവെക്കുന്നത്. യഥാർത്ഥ സംഭവങ്ങളോട് അങ്ങേയറ്റം നീതി പുലർത്തിയാണ് ചിത്രം ഒരുക്കിയിരിക്കുന്നത്. സാക്ഷാൽ Tim Jenkin തന്നെ സിനിമയുടെ ചിത്രീകരണവേളയിലുടനീളം ക്രൂവിനൊടൊപ്പം സജീവമായിരുന്നു. അതുകൊണ്ട് തന്നെ യാഥാർഥ്യത്തോട് ചേർന്ന് നിൽക്കുന്ന ഒരു പ്രിസൺ ബ്രേക്ക് ആസ്വദിക്കാം ഈ ചിത്രത്തിലൂടെ.

🔻ജയിലിൽ നിന്ന് രക്ഷപ്പെടാനുള്ള ഒരേയൊരു വഴിയേ വളരെ ഉദ്വേഗജനകമായ മുഹൂർത്തങ്ങളിലൂടെയാണ് അവതരിപ്പിച്ചിരിക്കുന്നത്. അവതരണത്തിൽ യാതൊരു അതിരുകളും സംവിധായകൻ ഭേദിക്കാൻ ശ്രമിച്ചിട്ടില്ല. ശ്വാസമടക്കി കാണേണ്ടി വരുന്ന രംഗങ്ങൾ കുറവാണെങ്കിലും ഈ കഥക്ക് ഏറ്റവും അനുയോജ്യമായ അവതരണശൈലി അത് തന്നെയാണ് എന്ന് കാഴ്ചയിൽ ബോധ്യമാവും. Daniel Radcliffeന്റെ ഗംഭീര പ്രകടനം പല രംഗങ്ങളെയും വേറൊരു തലത്തിലേക്ക് ഉയർത്തുന്നുണ്ട്. ഒപ്പം ചടുലമായ പശ്ചാത്തലസംഗീതവും പല ഘട്ടങ്ങളിലും ആകാംഷ നിറക്കുന്നുണ്ട്.

🔻ＦＩＮＡＬ ＶＥＲＤＩＣＴ🔻

യഥാർത്ഥസംഭവങ്ങളെ റിയാലിറ്റിയോട് ചേർന്ന് നിൽക്കും വിധം സിനിമാറ്റിക്ക് ഗിമ്മിക്കുകൾ അവഗണിച്ചുള്ള മികച്ച അവതരണമാണ് ഈ പ്രിസൺ ബ്രേക്ക് മൂവിയിൽ കാണാനാവുക. ഒന്നേമുക്കാൽ മണിക്കൂർ നെഞ്ചിടിപ്പോടെ കണ്ടുതീർക്കാൻ പറ്റിയ ഒരു കിടിലൻ ചിത്രമെന്ന നിലയിൽ തീർച്ചയായും നിലവാരം പുലർത്തുന്നുണ്ട് Escape From Pretoria.

ＡＢ ＲＡＴＥＳ ★★★½

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻നല്ല തണുത്ത വെളുപ്പാൻകാലത്ത് രണ്ടുപേർ സൈക്കിളിൽ വരികയാണ്. ചുറ്റും മഞ്ഞുമൂടിയ കാലാവസ്ഥയാണെങ്കിലും അവയൊക്കെയും തൃണവത്കരിച്ചുകൊണ്ട് എന്തോ ലക്ഷ്യത്തോടെയാണ് അവരുടെ യാത്ര.  ഒരുപാട് നേരത്തെ യാത്രക്ക് ശേഷം ഒരു വീടിന് മുന്നിൽ അവർ സൈക്കിൾ നിർത്തി. ശേഷം കൈകളിലിരുന്ന താക്കോൽ ഉപയോഗിച്ച് വീടിനുള്ളിലേക്ക് കയറി.

Year : 2018
Run Time : 1h 42min

🔻ആ യാത്രയത്രയും ഒരു കൊലപാതകം ചെയ്യുക എന്ന ലക്ഷ്യത്തോടെയായിരുന്നു. അതിനുള്ള തയ്യാറെടുപ്പുകൾ നേരത്തെ ചെയ്ത് വെക്കാനാണ് ഇത്ര നേരത്തെ അവർ വീട്ടിലെത്തിയത്. ആ കൊലപാതകത്തിലൂടെ അവർക്ക് പല ലക്ഷ്യങ്ങളുമുണ്ട്. എന്നാൽ അവർ അതിലത്ര വിദഗ്ദരല്ല. സിനിമയെ രസകരമാക്കുന്ന സംഗതിയും അതാണ്.

🔻അവർ സഹോദരങ്ങളാണ്. ജെഫും ടെറിയും. ആ കൊലപാതകത്തിന്റെ മേൽനോട്ടം ജെഫിനാണ്. അതിനായി അദ്ദേഹത്തിന്റെ കയ്യിൽ ഒരു to-do list ഉണ്ട്. സിനിമയിൽ ബ്ലാക്ക് ഹ്യൂമറിന്റെ ഉപയോഗം അവിടെ തുടങ്ങുകയാണ്. പിന്നീടങ്ങോട്ട് സംഭാഷണങ്ങളിലുടനീളം കോമഡി നിറഞ്ഞുനിൽക്കുന്നത് അതീവ രസകരമാണ്. ഒരു ത്രില്ലർ എന്ന നിലയിലേക്ക് കടക്കുമ്പോൾ അതിലേക്ക് മാത്രം ശ്രദ്ധ കേന്ദ്രീകരിക്കുകയാണ് സംവിധായകൻ. അത് സസൂക്ഷ്മം അവതരിപ്പിക്കാനും സാധിച്ചിട്ടുണ്ട്. അത്തരത്തിൽ ജേണറിനോട് നീതി പുലർത്താൻ പൂർണ്ണമായി സംവിധായകന് സാധിച്ചിട്ടുണ്ട്.

🔻ജേണറുകളിൽ ഉണ്ടാവുന്ന ഷിഫ്റ്റ് ആസ്വാദനത്തെ ബാധിക്കാതെ തുലനം ചെയ്ത് കൊണ്ടുപോവാൻ ഭംഗിയായി സാധിച്ചിട്ടുണ്ട് ചിത്രത്തിന്. കഥ ആവശ്യപ്പെടുന്ന വേഗത മാത്രമാണ് ചിത്രത്തിനുള്ളതെങ്കിലും അതൊരിക്കലും ബോറടിയിലേക്ക് നയിക്കുന്നില്ല. കാണികളിൽ താൽപര്യം ജനിപ്പിക്കുന്ന രീതിയിൽ ആഖ്യാനം കൊണ്ടുപോവുന്നതിൽ സംവിധായകൻ വിജയിച്ചിട്ടുണ്ട്. ഒപ്പം ഗംഭീര ഛായാഗ്രഹണമികവും ഒറ്റ ലൊക്കേഷനിലെ കഥയുടെ അവതരണവുമൊക്കെ ശ്രദ്ധ ജനിപ്പിക്കുന്ന ഘടകങ്ങളാണ്.

🔻ＦＩＮＡＬ ＶＥＲＤＩＣＴ🔻

വിരളമായി മാത്രം ആസ്വദിക്കാൻ സാധിക്കുന്ന ഡാർക്ക് കോമഡി-ത്രില്ലർ ജേണറിൽ കഥയൊരുക്കുന്നതിൽ വിജയിച്ച രസകരമായൊരു ത്രില്ലറാണ് Brothers Nest. ചടുലത നിറഞ്ഞ അവതരണശൈലി പിൻപറ്റുന്ന ഒന്നല്ല ചിത്രം. കഥ ആവശ്യപ്പെടുന്ന വേഗതയിൽ നർമ്മങ്ങളും മുൾമുനയിൽ നിർത്തുന്ന രംഗങ്ങളുമെല്ലാമടങ്ങിയ നല്ലൊരു ചിത്രം. ഇത്തരം പരീക്ഷണങ്ങൾ ഇഷ്ടപ്പെടുന്നവർ തീർച്ചയായും കാണുക.

ＡＢ ＲＡＴＥＳ ★★★½

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻അരക്ക് കീഴ്പ്പോട്ട് തളർന്നു കിടക്കുന്ന, ഓരോ നിമിഷങ്ങളും എണ്ണപ്പെട്ട് ജീവിക്കുന്ന ട്രെവറിന് ചെറിയ സ്വപ്‌നങ്ങൾ മാത്രമാണ്  ഇനി അവശേഷിക്കുന്നത്. ആ സമയങ്ങളിൽ വിഷണ്ണനായി ജീവിക്കാൻ ട്രെവറിന് താൽപര്യമില്ല. ഇപ്പോഴും ഊർജ്ജസ്വലനാണ് പുള്ളിക്കാരൻ. അങ്ങനെയൊരാളുടെ ജീവിതത്തിലേക്കാണ് care giver ബെന്നിന്റെ വരവ്.

Year : 2016
Run Time : 1h 37min

🔻ഒരു യാത്രയിലൂടെയാണ് ട്രെവറും ബെന്നും അടുത്തറിയുന്നത്. ജീവിതത്തിൽ വലിയൊരു ദുരന്തം നേരിടേണ്ടി വന്ന ബെന്നിന് ഈ ജോലി വെറുമൊരു ഉപജീവനമാർഗ്ഗം മാത്രമല്ല. അതിലുപരി അതിജീവനം കൂടെയാണ്. ഡിവോഴ്സ് പേപ്പറുമായി നിൽക്കുന്ന ഭാര്യയിൽ നിന്നും തുടരെത്തുടരെ വേട്ടയാടുന്ന ഭൂതകാലത്തിൽ നിന്നുമുള്ള അതിജീവനം. അധികദൂരം സഞ്ചരിച്ചിട്ടില്ലാത്ത ട്രെവറിനും ആ യാത്ര അനിവാര്യമായിരുന്നു. ഒരു യാത്രയിലൂടെ അവരുടെ ജീവിതം പുതിയൊരു ഘട്ടത്തിലേക്ക് കടക്കുകയാണ്.

🔻സിനിമയുടെ പേര് കേട്ടപ്പോൾ ഒരു ഡോക്യൂമെന്ററി ആണെന്നാണ് പ്രതീക്ഷിച്ചത്. എന്നാൽ അതിമനോഹരമായ ഒരു ഫീൽ ഗുഡ് മൂവിയാണ് കാഴ്ചയിൽ ലഭിച്ചത്. ഒരു ചട്ടക്കൂടിൽ ജീവിച്ച് തീർക്കേണ്ടി വരുമെന്ന് കരുതിയ തങ്ങളുടെ ജീവിതങ്ങൾക്ക് പ്രതീക്ഷയുടെ പുതിയ വാതായനങ്ങൾ തുറക്കുന്ന ചില മനുഷ്യരുടെ കഥ. ചിത്രം കൈകാര്യം ചെയ്യുന്നത് ഇപ്പറഞ്ഞ മനുഷ്യരുടെ കഥയാണ്. ബെന്നും ട്രെവറും അവരിൽ മുൻനിരയിൽ നിൽക്കുന്നവരും.

🔻പുതിയ അനുഭവങ്ങളും പാഠങ്ങളും സമ്മാനിക്കുന്ന യാത്രയാണ് അവരുടേത്. ഒപ്പം പരസ്പരം അടുത്തറിയാനുള്ള മാർഗവും. ചില രംഗങ്ങൾ നൽകുന്ന പറഞ്ഞറിയിക്കാനാവാത്ത അനുഭൂതിയുണ്ട്. സന്തോഷത്തിന്റെ ആഴങ്ങളിലേക്ക് നമ്മെ തള്ളിയിടുന്ന ചില രംഗങ്ങൾ. പറഞ്ഞറിയിക്കാനാവാത്ത വിധം ആനന്ദദായകമായിരുന്നു അവയൊക്കെയും. കഥാപാത്രങ്ങൾക്ക് നൽകിയ ഇമോഷണൽ ബാക്ക്ഡ്രോപ്പ് മികച്ച രീതിയിൽ ഉപയോഗിച്ചിട്ടുണ്ട് ആഖ്യാനത്തിൽ. കഥാപാത്രങ്ങളെ നമ്മോട് ചേർത്ത് നിർത്തുന്നതിൽ അവയൊക്കെയും നല്ല പങ്ക് വഹിച്ചിട്ടുണ്ട്.

🔻Paul Rudd, Craig Roberts എന്നിവരുടെ കോമ്പിനേഷൻ സീനുകൾ ഗംഭീരമായിരുന്നു. മികച്ച കെമിസ്ട്രി വർക്ഔട് ആയിട്ടുണ്ട് ഇരുവരും തമ്മിൽ. Selena Gomezന്റെ റോൾ രസകരമായ ഒന്നായിരുന്നു. പുള്ളികാരിയെ കാണാനും ക്യൂട്ട് ആയിട്ടുണ്ട്. യാത്രയിലുടനീളം വിഷ്വലി നിലവാരം പുലർത്തുന്ന ഛായാഗ്രഹണവും ലളിതമായ പശ്ചാത്തലസംഗീതവും പല രംഗങ്ങളെയും വേറൊരു തലത്തിലേക്ക് ഉയർത്തുന്നുണ്ട്.

🔻ＦＩＮＡＬ ＶＥＲＤＩＣＴ🔻

ലോക്ക്ഡൗണിന്റെ ആയാസത്തിൽ ഇരിക്കുന്ന മനസ്സിനെ ഉന്മേഷം നിറഞ്ഞ ഒന്നാക്കാനായി ധൈര്യമായി കാണാവുന്ന ഒന്നൊന്നര ഫീൽ ഗുഡ് മൂവി എന്ന നിലയിൽ ഏവർക്കും സജസ്റ്റ് ചെയ്യുകയാണ് ഈ ചിത്രം. ലാളിത്യം നിറഞ്ഞ പ്രമേയവും ആഖ്യാനവും സുന്ദരമായ കഥാപാത്രവുമെല്ലാം മികച്ച അനുഭൂതി തന്നെ സമ്മാനിക്കുന്നുണ്ട്. സമയദൈർഖ്യവും കുറവായത് കൊണ്ട് ചുമ്മാ കണ്ടുനോക്കൂ

ＡＢ ＲＡＴＥＳ ★★★½

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻സുഹൃത്തുക്കളായ ബെക്കിയുടെയും ബെന്നിന്റെയും മാതാപിതാക്കളുടെ മരണം നേരിൽ കണ്ടതാണ് റീഗൻ. സ്‌കൂളിലെ ഏറ്റവും മികച്ച വിദ്യാർത്ഥിയും പിയർ കൗൺസിലറുമൊക്കെയായ റീഗൻ അവരുടെ ഭാവിയെ പറ്റി ആശങ്കാകുലനായിരുന്നു. അവർക്കായി ക്രൗഡ് ഫണ്ടിങ്ങ് നടത്താനുള്ള വഴിവരെ റീഗൻ തയ്യാറാക്കി. എന്നാൽ ആ ഷോക്കിൽ നിന്ന് സമൂഹം മുക്തമാവുന്നതിന് മുമ്പ് തന്നെ വീണ്ടും ആ സ്‌കൂളിലെ മറ്റൊരു വിദ്യാർത്ഥിയുടെ കുടുംബത്തിന് കൂടി അപകടം സംഭവിക്കുന്നു.

Year : 2019
Run Time : 1h 26min

🔻തീമിന്റെ വൺ ലൈനർ കേൾക്കുമ്പോൾ ദുരൂഹത നിറഞ്ഞ ഒരു ത്രില്ലർ ആവും ആരും പ്രതീക്ഷിക്കുക. സിനിമയുടെ സഞ്ചാരം ഏറെക്കുറെ അങ്ങനെയൊക്കെയാണ്. എന്നാൽ ഡാർക്ക് ഹ്യൂമർ നിറഞ്ഞ സന്ദർഭങ്ങൾ കൊണ്ട് അവതരണം കൂടുതൽ രസകരമാവുകയാണ് ചിത്രത്തിൽ. മനസ്സിന് പിരിമുറുക്കമുണ്ടാക്കും വിധം കാര്യമായ tightly packed thriller ഒന്നുമല്ലെങ്കിലും ഒന്നര മണിക്കൂറിൽ നമ്മെ തൃപ്തിപ്പെടുത്താനുള്ള എലമെന്റുകൾ സിനിമയിലുണ്ട്. വലിയ പുതുമകൾ അവകാശപ്പെടാനില്ലെങ്കിലും കാഴ്ചയിലുടനീളം കാണികളെ രസിപ്പിക്കാൻ സംവിധായകന് സാധിച്ചിട്ടുണ്ട്.

🔻മരണം സംഭവിക്കുന്ന വിധം അത്രമേൽ വിശ്വസനീയം അല്ലെങ്കിലും ഒഴുക്കിൽ കൊണ്ടിരിക്കുമ്പോൾ പോരായ്മയായി തോന്നില്ല. റീഗന് മേൽ ഡോക്കിൻസിനുണ്ടാവുന്ന സംശയം വമ്പൻ ത്രില്ലർ സമ്മാനിക്കുമെന്ന് വിചാരിച്ചെങ്കിലും രസികൻ രംഗങ്ങളുടെ വിരുന്ന് തന്നെയാവുന്നുണ്ട് അവ. കൂടുതൽ പറഞ്ഞാൽ സ്പോയിലർ ആവും എന്നതിനാൽ നിർത്തുന്നു. കോളിൻ ഫോഡിന്റെ പ്രകടനം ശ്രദ്ധേയമായിരുന്നു. ഒപ്പം അനാവശ്യമായ ഒറ്റ രംഗം പോലുമില്ലാതെ ചുരുങ്ങിയ നേരം കൊണ്ട് എല്ലാം പറഞ്ഞവസാനിപ്പിച്ചിട്ടുണ്ട്. Tail End പ്രതീക്ഷിച്ചത് പോലെ തന്നെയായെങ്കിലും അതും നന്നേ ബോധിച്ചു.

🔻ＦＩＮＡＬ ＶＥＲＤＩＣＴ🔻

ത്രില്ലർ-ബ്ലാക്ക് ഹ്യൂമർ കോമ്പിനേഷനിലുള്ള ചെറിയൊരു ത്രില്ലർ ഒന്നര മണിക്കൂറിൽ ആസ്വദിക്കാനായി ചിത്രം കാണൂ. യാതൊരു പ്രതീക്ഷകളും ഇല്ലാതെ കാണുക. തൃപ്തികരമാവും ഈ ചിത്രം.

ＡＢ ＲＡＴＥＳ ★★★☆☆

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻സോണി എപ്പോഴാണ് ജനിച്ചതെന്ന് എവിടെയും രേഖകളില്ല. ചെറുപ്പം മുതൽ തന്നെ ഏറെ ക്ലേശകരമായ വഴികളിലൂടെ തന്നെയാണ് അദ്ദേഹം വളർന്നു വന്നത്. ക്രൂരമായ മർദ്ദനങ്ങൾ സ്വന്തം പിതാവിൽ നിന്ന് തന്നെ ഏൽക്കേണ്ടി വന്ന, നല്ല ഓർമ്മകൾ യാതൊന്നും അവശേഷിക്കാത്ത ബാല്യത്തിലൂടെ കടന്നുവന്ന വ്യക്തി. സ്വാഭാവികമായും കുറ്റകൃത്യങ്ങളുടെ വഴിയേ അദ്ദേഹത്തിനും സഞ്ചരിക്കേണ്ടി വന്നു. എന്നാൽ ഒരു ഘട്ടത്തിൽ മനസ്സിലുണ്ടായ ചെറിയൊരു ചാഞ്ചാട്ടം അദ്ദേഹത്തിന്റെ ജാതകം തന്നെ മാറ്റിയെഴുതി. ലോകം വാഴ്ത്തിയില്ലെങ്കിൽ പോലും തന്റെ കഴിവ് കൊണ്ട് ശ്രദ്ധയാർജ്ജിച്ച ബോക്സറായി അദ്ദേഹം വളർന്നു.

Year : 2019
Run Time :1h 30min

🔻ബോക്സിങ്ങിന്റെ പര്യായമായി മാറിയ പേരാണ് മുഹമ്മദ് അലി. എന്നാൽ അദ്ദേഹം ശരവേഗത്തിൽ എങ്ങനെയാണ് റിങ്ങുകൾ കീഴടക്കിയതെന്ന് ചിന്തിച്ചിട്ടുണ്ടോ? അദ്ദേഹത്തിന്റെ വിജയത്തോടൊപ്പം ചേർത്ത് വായിക്കേണ്ട പേരാണ് സോണി ലിസ്റ്റൺ. അലിയുടെ ജീവിതത്തിൽ പ്രത്യക്ഷത്തിൽ അദ്ദേഹത്തിന് സ്വാധീനമൊന്നും ഉണ്ടായിരുന്നില്ല. എന്നാൽ സോണിയെ പരാജയപ്പെടുത്തിയതിലൂടെയാണ് അലിയുടെ കരിയർ വൻ കുതിച്ചുചാട്ടം നടത്തിയത്. തുടർന്ന് ഇരു ജീവിതങ്ങളും പ്രതീക്ഷകൾക്കുമപ്പുറം മാറ്റങ്ങളാൽ മൂടുകയായിരുന്നു.

🔻ഒരു ജിഗ്‌സോ പസിൽ പോലെ കുഴങ്ങിയ ജീവിതമായിരുന്നു സോണിയുടേത്. ആ ജീവിതമാണ് Showtimeന്റെ 90 മിനിറ്റ് നീണ്ട TV Movie നമുക്ക് കാട്ടിത്തരുന്നത്. ഒരു ഡോക്യൂമെന്ററി എന്നതിനപ്പുറം പല കാര്യങ്ങളും ചിത്രം കൈകാര്യം ചെയ്യുന്നതിൽ വിജയിച്ചിട്ടുണ്ട്. സോണിയുടെ വിവാദങ്ങൾ നിറഞ്ഞ ജീവിതത്തെ വെള്ളപൂശാതെ പെർഫെക്ട് ആയി അവതരിപ്പിച്ചിരിക്കുന്നത് കാണാം. വർഗ്ഗവിവേചനത്തിനെതിരെ പോരാടുന്നവരോട് പുച്ഛഭാവത്തിൽ സംവദിക്കുന്ന, പ്രശസ്തിക്കപ്പുറം ജനങ്ങൾ തന്നോട് സ്നേഹത്തോട് പെരുമാറണമെന്ന് മാത്രം ആഗ്രഹിച്ച ആ ജീവിതത്തെ ഗംഭീരമായി അവതരിപ്പിക്കാൻ സാധിച്ചിട്ടുണ്ട്. ഒറിജിനൽ ഫൂട്ടേജുകൾക്കൊപ്പം ഫിക്ഷണൽ ഫൂട്ടേജുകളും ഭംഗിയായി കോർത്തിണക്കിയിരിക്കുന്നത് കാണാം. അതൊക്കെയും കാണികൾക്ക് നൽകുന്ന അനുഭൂതി പറഞ്ഞറിയിക്കാൻ സാധിക്കാത്തതാണ്. പൂർണ്ണമായി ഒരു ത്രില്ലർ സ്വഭാവം സ്വീകരിക്കുന്ന ചിത്രം ഒന്നര മണിക്കൂറിൽ വെടിപ്പായി കാര്യങ്ങൾ പറഞ്ഞുവെക്കുന്നുണ്ട്.

🔻സോണിയുടെ ജീവിതം പോലെ തന്നെ മരണവും ദുരൂഹമായിരുന്നു. ദിവസങ്ങളോളം തന്റെ മുറിയിൽ മരിച്ചുകിടന്ന സോണിയുടെ ഘാതകനെ ഇതുവരെ കണ്ടെത്താനായിട്ടില്ല. സ്വാഭാവികമരണമായി വിധിയെഴുതിയെങ്കിലും അതങ്ങനെയല്ല എന്ന് വാദിക്കുന്നവരാണ് ഭൂരിഭാഗവും. അതുകൊണ്ട് തന്നെ സംശയത്തിന്റെ നിഴലിൽ നിൽക്കുന്നവർ അനവധിയാണ്. അത്ര ദുർഘടമായ ജീവിതമായിരുന്നു സോണിയുടേത്.

🔻സിനിമയുടെ എഡിറ്റിങ്ങ് എടുത്ത് പറയേണ്ടതാണ്. വളരെ ക്രിസ്പ്പ് ആയി ഉദ്വേഗജനകമായ നിമിഷങ്ങളിലൂടെ കടന്നുപോവുന്നു എന്ന് തോന്നിക്കും വണ്ണം ചടുലതയാണ് ആഖ്യാനത്തിന്. അതിനൊത്ത വേഗതയാണ് ഓരോ രംഗങ്ങൾക്കും. രോമാഞ്ചം നൽകുന്ന രംഗങ്ങളാൽ സമൃദ്ധമാണ് ചിത്രം. ബോക്‌സർ ആവണമെന്ന് മനസ്സിലുറപ്പിച്ച് മുന്നിട്ടിറങ്ങുന്ന സോണിയെ പരിചയപ്പെടുത്തുന്ന രംഗം അപാരം. അത്തരത്തിൽ ടെക്നിക്കലി വൻ മികവ് പുലർത്തുന്നുണ്ട് ചിത്രം.

🔻ＦＩＮＡＬ ＶＥＲＤＩＣＴ🔻

ഡോക്യൂമെന്ററി എന്നതിനപ്പുറം വിവാദപരമായ ജീവിതത്തെയും മരണത്തെയും തേടിയുള്ള സഞ്ചാരമാണ് ഈ TV Movieയിലൂടെ നമുക്ക് കാണാൻ സാധിക്കുക. ഒന്നര മണിക്കൂറിൽ ഒരു ത്രില്ലർ കാണും വിധം ഗംഭീരമായ അവതരണശൈലി സ്വായത്തമാക്കിയ ചിത്രം എല്ലാ തലങ്ങളിലും ഒരുപോലെ മികവ് പുലർത്തുന്നുണ്ട്. തീർച്ചയായും കണ്ടിരിക്കുക. വ്യത്യസ്തമായ ഒരനുഭവമാവും ചിത്രം സമ്മാനിക്കുക.

ＡＢ ＲＡＴＥＳ ★★★★☆

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻Can we get married? Have kids?

Tallulahയുടെ കാമുകൻ നീക്കോ അവളോട് ചോദിക്കുന്ന ചോദ്യമാണിത്. എന്നാൽ കേട്ടപാടെ നിരസിച്ച് അതിനോടുള്ള എതിർപ്പ് Tallulah അറിയിക്കുന്നുണ്ട്. തല ചായ്ക്കാൻ ഒരിടം പോലുമില്ലാത്ത, കല്യാണവും കുടുംബവുമൊന്നും തന്റെ ആലോചനയിൽ പോലുമില്ലാത്ത ഒരാൾക്ക് ജീവിതത്തിൽ അമ്മയാകേണ്ടി വന്നാലോ? ഇത് അങ്ങനെയൊരാളുടെ കഥയാണ്.

Year : 2016
Run Time : 1h 51min

🔻ഒരു സുപ്രഭാതത്തിൽ കൂടെയുള്ള കാമുകൻ ഒരു വാക്ക് പോലും പറയാതെ എങ്ങോട്ടോ പോയതിന്റെ വിഷമത്തിലിരിക്കുന്ന Tallulahക്ക് മുന്നിൽ മറ്റ് വഴികളൊന്നുമുണ്ടായിരുന്നില്ല. വിശപ്പടക്കാൻ പോലും സ്വന്തമായി കാശില്ലാത്ത അവസ്ഥ. എവിടെ നിന്നെങ്കിലും ഭക്ഷണം കിട്ടുമോ എന്ന് നോക്കാൻ പോയ tallulah തിരിച്ച് വരുന്നത് ഒരു കൈക്കുഞ്ഞുമായാണ്. നേരെ പോയത് നിക്കോയുടെ വീട്ടിലേക്കും. രണ്ട് വർഷമായി മകനെ കാണാതെ ജീവിക്കുന്ന അമ്മയ്ക്ക് മുന്നിലേക്ക് മകന്റെ ഭാര്യയായി പരിചയപ്പെടുത്തുകയാണ് Tallulah.

🔻ഒരു കുഞ്ഞിന് ചുറ്റുമുള്ള മൂന്ന് അമ്മമാരുടെ ജീവിതമാണ് ചിത്രം കൈകാര്യം ചെയ്യുന്നത്. സ്വന്തം മകനും ഭർത്താവും ഉപേക്ഷിച്ചുപോയ, ഏകാന്തതയിൽ അക്വേറിയത്തിലെ ആമ മാത്രം കൂട്ടുള്ള മാർഗോ, ഒരു വാനിൽ തന്റെ ജീവിതം മുഴുവൻ ജീവിച്ചുതീർക്കുന്ന Tallulah, ഒരു കുഞ്ഞുണ്ടായത് കൊണ്ട് ജീവിതം ആസ്വദിക്കാൻ കഴിയാത്ത കരോളിൻ എന്നിവരാണവർ. അവർക്കിടയിൽ ഒരു വയസ്സ് മാത്രമുള്ള കുട്ടി കൊണ്ടുവരുന്ന മാറ്റങ്ങളാണ് നമുക്ക് കാണാനാവുക. മാതൃത്വത്തിന്റെ മഹത്വത്തെ വിളിച്ചോതുന്ന സുന്ദരമായ ഒരനുഭവം.

🔻വ്യക്തിത്വം കൊണ്ട് നിലയുറപ്പിക്കുന്ന കഥാപാത്രങ്ങളെ കേന്ദ്രീകരിച്ച് വരുന്നത് കൊണ്ട് തന്നെ അവർക്കിടയിലുണ്ടാവുന്ന മാറ്റങ്ങൾ ലളിതമായി മനസ്സിലാക്കാൻ സാധിക്കും. ഏകാന്തതയിൽ കൂട്ടായി മാർഗോയുടെ മുന്നിലേക്ക് Tallulah എത്തുമ്പോൾ ആദ്യം അമർഷമെങ്കിലും പിന്നീട് പ്രകാശപൂരിതമാവുന്നത് മനോഹരമായ കാഴ്ചയാണ്. തനിക്ക് ചുറ്റുമുള്ളതൊന്നും വകവെക്കാതെ ജീവിക്കുമ്പോഴും ഒരു കുഞ്ഞ് തന്റെ ജീവിതത്തിലേക്ക് കടന്നുവരുമ്പോഴുണ്ടാകുന്ന Tallulahയുടെ മാറ്റങ്ങളും സുന്ദരമായി അവതരിപ്പിച്ചിട്ടുണ്ട്. നഷ്ടപ്പെടുമ്പോൾ മാത്രം ജീവനുകളുടെ വിലയറിയുന്ന കരോലിന്റെ കഥാപാത്രവും ശ്രദ്ധേയമാണ്. ഇവർ തമ്മിലുള്ള കെമിസ്ട്രി മികച്ച രീതിയിൽ വർക്ഔട് ചെയ്യാൻ സാധിച്ചിടത്താണ് ഹൃദയസ്പർശിയായ സിനിമയായി Tallulah മാറുന്നത്.

🔻Ellen Page, Allison Janney എന്നിവരുടെ കഥാപാത്രങ്ങൾ തമ്മിലുള്ള കോമ്പിനേഷൻ സീനുകൾ അത്യന്തം ശ്രദ്ധ നേടുന്നവയാണ്. ഇരുവരും തമ്മിലുള്ള രംഗങ്ങൾ സിംഹഭാഗവും സ്‌ക്രീൻ കയ്യടക്കുന്നതോടെ മനസ്സിൽ നിന്ന് മായാത്ത കഥാപാത്രങ്ങളാവുന്നു അവർ. ഇരുവർക്കും പറയാൻ ഒട്ടേറെ കഥകളുണ്ട്. അതൊക്കെയും കേവലം സംഭാഷണങ്ങളിലൂടെ വരച്ചിടുവാനും ഇരുവരുടെയും പ്രകടനങ്ങൾ കൊണ്ട് സാധിക്കുന്നുണ്ട്. ക്ലൈമാക്സ് രംഗമൊക്കെ നൊമ്പരമായി മാറുന്നത് ഭാവഭദ്രമായി ആ കഥാപാത്രങ്ങളെ അവതരിപ്പിച്ചിടത്താണ്.

🔻ＦＩＮＡＬ ＶＥＲＤＩＣＴ🔻

മാതൃത്വത്തിന്റെ സുന്ദരമായ തലത്തെ വരച്ചിടുകയാണ് Tallulahയിലൂടെ സംവിധായിക. വൈകാരികമായി ഹൃദ്യമായ ഒരനുഭവമാണ് ചിത്രം സമ്മാനിച്ചത്. കഥാപാത്രങ്ങൾ തമ്മിലുള്ള സമ്പർക്കത്തെ ഗംഭീരമായി പറഞ്ഞുവെക്കുന്നതിൽ സംവിധായിക വിജയിച്ചിടത്ത് ഫീൽ ഗുഡ് ലേബലിൽ പൂർണ്ണതൃപ്തി നൽകുന്നു ചിത്രം.

ＡＢ ＲＡＴＥＳ ★★★½

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻20 വർഷങ്ങൾക്ക് ശേഷം അതേ കൊലപാതകരീതികൾ പിന്തുടരുന്ന രണ്ട് മൃതദേഹങ്ങൾ കൂടി ലഭിച്ചിരിക്കുകയാണ്. വര്ഷങ്ങള് മുമ്പ് നടന്ന കൊലപാതകങ്ങളുടെ സൂത്രധാരൻ ഇപ്പോഴും ജയിലിൽ ആണെങ്കിലും ഒരു ഡീറ്റൈൽ പോലും കുറയാതെ അവ വീണ്ടും ആവർത്തിക്കുകയാണ്. ഒന്നുകിൽ ഇദ്ദേഹത്തിന് കൊലപാതകങ്ങളിൽ ഒരു പങ്കാളി ഉണ്ടായിരുന്നു. അല്ലെങ്കിൽ ഒരു copycat. എന്താവും സത്യം.? അത് തേടിയിറങ്ങുകയാണ് ഇസ്മായീൽ.

Year : 2019
Run Time : 1h 50min

🔻കൊലപാതകങ്ങൾ എങ്ങനെയാണ് അരങ്ങേറുന്നതെന്നും കൊല്ലേണ്ടവരെ തിരഞ്ഞെടുക്കുന്ന Pattern എങ്ങനെയെന്നും ആദ്യ രംഗത്തിൽ തന്നെ വിവരിക്കുന്നതിലൂടെ നമ്മുടെ ശ്രദ്ധ തുടക്കം തന്നെ അപഹരിക്കാൻ സിനിമാക്കാവുന്നുണ്ട്. തുടർന്ന് അവ അന്വേഷിക്കാൻ ഇസ്മായീലും ആൽബയും വരുന്നതോടെ അന്വേഷണം ചൂടുപിടിക്കുന്നു. ദുരൂഹതകളുടെ ഭണ്ഡാരം അഴിയുകയാണ് അവരിലൂടെ.

🔻ഭൂരിഭാഗവും ഒരേ പേസിൽ സഞ്ചരിക്കുന്ന ചിത്രമാണ് Twin Murders. കൊലപാതകിയെ തേടിയുള്ള പോരാട്ടങ്ങളും വഴിമുടക്കുന്ന കാര്യങ്ങളും അവരുടെ ആത്മബന്ധങ്ങളുമൊക്കെ കൃത്യമായി സന്നിവേശിപ്പിച്ചിട്ടുണ്ട് സംവിധായകൻ. കൊലപാതരീതികൾക്ക് മതപരമായ ബന്ധങ്ങൾ സ്ഥാപിക്കുന്നതിലൂടെ സിനിമയുടെ ആഖ്യാനത്തിന് വേഗതയേറുകയാണ്. ഉടൻ തന്നെ കൊലപാതകിയെ നമുക്ക് കാട്ടിത്തരികയുമാണ്. തുടർന്നങ്ങോട്ട് സസ്പെൻസ് ത്രില്ലറിന് പകരം cat & mouse ഗെയിം ആയി മാറുന്നു ചിത്രം.

🔻അവതരണത്തിലെ കൃത്യമായ വേഗതയാണ് ചിത്രത്തെ നല്ലൊരു ത്രില്ലറാക്കി മാറ്റുന്നത്. ക്ലൈമാസിൽ ഒരല്പം സിനിമാറ്റിക്ക് ലിബർട്ടി ഉപയോഗിച്ചത് പോരായ്മയായി തോന്നി എന്നതൊഴിച്ചാൽ പ്രമേയത്തിലെ ദുരൂഹതയും അത് ജനിപ്പിക്കുന്ന താൽപര്യവുമൊക്കെ ശ്രദ്ധേയമാണ്. അനാവശ്യമായ രംഗങ്ങൾ ഭൂരിഭാഗം ഒഴിവാക്കാനും ചിത്രത്തിന് സാധിച്ചിട്ടുണ്ട്. അതുകൊണ്ട് തന്നെ അന്വേഷണത്തിൽ തന്നെ ശ്രദ്ധ കേന്ദ്രീകരിക്കാനാവുന്നുണ്ട്. ഡാർക്ക് മൂഡിനോട് ചേർന്ന് നിൽക്കുന്ന അവതരണത്തിന് ടെക്നിക്കൽ വശങ്ങളുടെ പിന്തുണ ഏറെ ഗുണം ചെയ്തിട്ടുണ്ട്. Belen Reuda നല്ലൊരു വേഷം ചിത്രത്തിൽ കൈകാര്യം ചെയ്തിട്ടുണ്ട്.

🔻ＦＩＮＡＬ ＶＥＲＤＩＣＴ🔻

IMDBയിലടക്കം ഈ സിനിമക്ക് ഇത്ര റേറ്റിങ്ങ് കുറഞ്ഞെതെന്തെന്ന് ഇതുവരെ മനസ്സിലായിട്ടില്ല. പെർഫെക്റ്റ് എന്ന് പറയാൻ സാധിക്കില്ലെങ്കിലും നിരാശ നൽകാത്ത ഡീസന്റ് ത്രില്ലറാണ് Twin Murders. കൊലപാതകങ്ങളോട് മതവും സംസ്കാരവും ഇഴചേർന്ന് വരുമ്പോഴുണ്ടാകുന്ന താൽപര്യം നന്നായി ഉപയോഗിക്കാൻ സംവിധായകന് സാധിച്ചിട്ടുണ്ട്. തീർച്ചയായും കണ്ടുനോക്കുക.

ＡＢ ＲＡＴＥＳ ★★★☆☆

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻സിനിമ കാണുമ്പോൾ ഫ്രഷ്‌നെസ്സ് വേണമെന്നുള്ളവർ തുടർന്ന് വായിക്കാതിരിക്കുക. ഈ സിനിമയുടെ കഥ അറിയുന്നത് അങ്ങനെയുള്ളവരുടെ ആസ്വാദനത്തെ അൽപ്പമെങ്കിലും ബാധിക്കാൻ ഇടയുണ്ട്. എന്നാൽ കഥയും ജേണറും അറിഞ്ഞിട്ടേ കാണൂ നിന്നുള്ളവർക്ക് ധൈര്യമായി വായന തുടരാം.

Year : 2014
Run Time : 1h 40min

🔻തന്റെ മകൾ സെലിബിന്റെ സുഹൃത്ത് എന്നാണ് ആ വാതിലിൽ മുട്ടിയ ചെറുപ്പകാരൻ ലോറയോട് പറഞ്ഞത്. യുദ്ധത്തിൽ സെലിബ് മരിച്ചപ്പോൾ അവന്റെ കൂടെയുണ്ടായിരുന്ന സുഹൃത്ത്. വളരെ സൗമ്യമായ പെരുമാറ്റം, അങ്ങേയറ്റം ബഹുമാനം, വിനയം മുഖമുദ്രയായി കൊണ്ടുനടന്ന ഡേവിഡ് എന്ന് നാമകരണം ചെയ്ത ആ ചെറുപ്പക്കാരനോട് ലോറക്ക് വല്ലാത്ത മതിപ്പ് തോന്നി. ഭാവിയെപ്പറ്റി യാതൊരു ആശയവുമില്ലാത്ത ഡേവിഡിന് രാത്രി തങ്ങാൻ വീട്ടിലിടവും കൊടുത്തു. വൈകാതെ ആ കുടുംബത്തിലൊരാൾ തന്നെയായി മാറി ഡേവിഡ്.

എന്നാൽ ഡേവിഡ് പരിചയപ്പെടുത്തിയത് പോലെ സെലിബിന്റെ കേവലമൊരു സുഹൃത്ത് മാത്രമാണോ അദ്ദേഹം.? ഈയൊരു സംശയം സെലിബിന്റെ സഹോദരിയായ അന്നയിൽ പുകഞ്ഞുകൊണ്ടേയിരുന്നു. തുടർന്ന് അതിനായുള്ള പോരാട്ടത്തിലായി അന്ന.

🔻സിനിമയെ പറ്റി യാതൊരു ഐഡിയയുമില്ലാതെയാണ് കാണാനിരുന്നത്. കേവലമൊരു ഡ്രാമ പോലെ പിന്നിടുമ്പോഴും കാണാനുള്ള താല്പര്യം പടിപടിയായി ഉയർന്നുവന്നു. പാതി പിന്നിട്ടപ്പോൾ പൊടുന്നനെ സിനിമയുടെ ട്രാക്ക് മാറുകയാണ്. നിഗൂഢത നിറഞ്ഞ ഒരുഗ്രൻ ത്രില്ലറാണ് സംവിധായകൻ കരുതിവെച്ചിരുന്നത്. കഥയെ പറ്റി വാചാലനാവാൻ പോലും സമയം നൽകാത്ത ആവേശത്തോടെയിരുന്ന് കാണാൻ സാധിച്ച അടിപൊളി സിനിമ. പ്രമേയം എന്തെന്ന് കാര്യമായ സൂചന സിനിമ അവസാനിക്കുമ്പോഴും ലഭിക്കുന്നില്ലെങ്കിലും രണ്ടാം ഭാഗത്തിനായുള്ള വഴി തുറന്നിട്ടിട്ടുണ്ട് ചിത്രം.

🔻Dan Stevens തന്റെ കൈപ്പിടിയിലൊതുക്കുകയാണ് സിനിമ മുഴുവൻ. ഉഗ്രൻ പ്രകടനം. പക്വത നിറഞ്ഞ ഡേവിഡ് എന്ന കഥാപാത്രമായി തകർക്കുമ്പോഴും ചില ഘട്ടത്തിലുള്ള മാറ്റങ്ങൾ കിടിലനായി അവതരിപ്പിച്ചിട്ടുണ്ട് പുള്ളിക്കാരൻ. ആക്ഷൻ സീനുകളിലെ മെയ്‌വഴക്കവും സ്റ്റൈലൻ ബോഡി ലാംഗ്വേജും പുച്ഛം കലർന്ന ചിരിയുമൊക്കെയായി സിനിമ മുഴുക്കെ തന്റേതാക്കുന്നുണ്ട് അദ്ദേഹം. അപാര സ്‌ക്രീൻ പ്രസൻസ് തന്നെയായിരുന്നു സിനിമയിലുടനീളം.

🔻ＦＩＮＡＬ ＶＥＲＤＩＣＴ🔻

ഒരു പ്രതീക്ഷയുമില്ലാതെ കണ്ടത് കൊണ്ടാവണം പൂർണ്ണ തൃപ്തി നൽകിയ ഒരുഗ്രൻ ത്രില്ലർ ആസ്വദിക്കാനായത്. പരമാവധി കഥ അറിയാതെ തന്നെ കാണുക. അതാണ് ഞാനും മുന്നോട്ട് വെക്കുക. ഒരു മുഴുനീള ത്രില്ലറല്ല സിനിമ. എന്നാൽ ട്രാക്കിലേക്ക് കടന്നാൽ ആസ്വാദനം ഉറപ്പ്.

ＡＢ ＲＡＴＥＳ ★★★½

ചിത്രം ടെലിഗ്രാം ചാനലിൽ ലഭ്യമാണ്. Abi Suggests