Abeed Azad

🔻ആബിയുടെ ശവക്കല്ലറയിൽ നിന്നാണ് കഥയുടെ തുടക്കം. തങ്ങളുടെ എട്ടാമത്തെ വയസ്സിൽ ആബിയും സാമും തുടങ്ങിവെച്ച പ്രണയകഥ. ഏറെനാൾ പിന്നിട്ടിട്ടും പൂർണ്ണശക്തിയോടെ മുന്നോട്ട് പോയപ്പോൾ അവരൊരു തീരുമാനമെടുത്തു. കല്യാണം കഴിച്ച് ഒഫീഷ്യൽ ആക്കിയേക്കാം കാര്യങ്ങൾ. താൻ ഗർഭിണിയാണോ എന്നൊരു സംശയം കൂടി ആബിയെ അലട്ടിയിരുന്നു ആ സമയത്ത്. എന്നാൽ അതിനായി നടത്തിയ ടെസ്റ്റിലാണ് തനിക്ക് ക്യാൻസർ ആണെന്ന സത്യം ആബി മനസ്സിലാക്കിയത്.

Year : 2018
Run Time : 1h 36min

🔻ചില സിനിമകൾ നമ്മിൽ ചെറിയ നോവേൽപ്പിക്കാൻ വലിയ കാര്യങ്ങളൊന്നും വേണമെന്നില്ല. ചെറിയ മുഹൂർത്തങ്ങൾ പോലും നമ്മെ വല്ലാതെ വേട്ടയാടും. ഈ സിനിമയും അങ്ങനെ തന്നെയാണ്. പ്രണയത്തിന്റെ മൂർദ്ധന്യാവസ്ഥയാണ് പലപ്പോഴും മുന്നോട്ട് വെക്കുന്ന പ്രമേയം. ക്യാൻസർ ട്രീറ്റ്മെന്റിലുള്ള ആബിക്ക് തന്റെ കാര്യത്തേക്കാൾ ആശങ്ക സാമിന്റെ ഭാവിയെക്കുറിച്ചോർത്താണ്. സാമിനാവട്ടെ ആബിയെ കുറിച്ചോർക്കാത്ത നിമിഷങ്ങളില്ല. എന്നാൽ ഇരുവരും ഒരുമിച്ചുള്ള സമയങ്ങളിൽ പരമാവധി വിഷമതകൾ അറിയിക്കാതെ സസൂക്ഷ്മം മുന്നോട്ട് പോവാൻ ശ്രദ്ധിക്കുന്നുമുണ്ട്. അത്തരത്തിൽ പ്രണയം വമിക്കുന്ന സുന്ദരമായ കഥയാണ് ചിത്രം കൈകാര്യം ചെയ്യുന്നത്.

🔻അതിമനോഹരമായ ചില രംഗങ്ങളുണ്ട് സിനിമയിൽ. ആദ്യ രംഗം തന്നെ വല്ലാത്തൊരു അനുഭൂതിയാണ് സമ്മാനിക്കുക. തുടർന്ന് ക്യാൻസറിനെ പറ്റി അറിയുന്ന രംഗവും കല്യാണത്തിനെക്കുറിച്ച് ചർച്ച ചെയ്യുന്ന രംഗവുമൊക്കെ ഏറെ ഹൃദ്യമായിരുന്നു.  അവതരണത്തിലെ ലാളിത്യമാണ് അതിന് കാരണം. വളരെ ലളിതമായാണ് കഥയെ അവതരിപ്പിച്ചിരിക്കുന്നത്. അനാവശ്യമായ യാതൊരു പെരുപ്പിക്കലും ചിത്രത്തിൽ കാണാൻ സാധിക്കില്ല. ഒപ്പം വളരെ talented ആയ ലീഡ് കൂടിയാവുമ്പോൾ ആ കഥാപാത്രങ്ങളും ഭംഗിയായി നിലയുറപ്പിക്കുന്നു. ഛായാഗ്രഹണവും പശ്ചാത്തലസംഗീതവും അവതരണത്തോട് ചേർന്ന് നിൽക്കുന്നു.

🔻ＦＩＮＡＬ ＶＥＲＤＩＣＴ🔻

കഥയിലെ പുതുമയല്ല, കാഴ്ചയിൽ നമുക്ക് സമ്മാനിക്കുന്ന അനുഭൂതിയാണ് Irreplaceable You നൽകുന്ന വാഗ്ദാനം. പ്രണയപൂരിതമായ രണ്ട് ജീവിതങ്ങളെ സുന്ദരമായി അവതരിപ്പിച്ചിരിക്കുകയാണ് ചിത്രം. ചെറുചിരികളും നോവുകളും സമ്മാനിച്ച ചിത്രം വലിയ പ്രതീക്ഷകളൊന്നുമില്ലാതെ കണ്ടാൽ ഇഷ്ടമാവും എന്നുറപ്പ്.

ＡＢ ＲＡＴＥＳ ★★★☆☆

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻പീറ്ററും കൂട്ടരും ഇപ്പോഴും Mcgregor മുത്തച്ഛന്റെ തോട്ടത്തിൽ നിന്ന് പഴങ്ങളും പച്ചക്കറികളും അടിച്ചുമാറ്റിത്തന്നെയാണ് വിശപ്പടക്കുന്നത്. അപ്പൂപ്പൻ എത്രയൊക്കെ തടയാൻ നോക്കിയാലും ആ കടമ്പകളൊക്കെയും കടന്ന് അവർ തോട്ടത്തിനുള്ളിൽ എത്തിയിരിക്കും. എന്നാൽ ഒരു ദിവസം അവരുടെ കണ്മുന്നിൽ വെച്ച് അപ്പൂപ്പൻ മരണപ്പെടുന്നു. അതോടെ തങ്ങൾ സ്വതന്ത്രരായെന്ന സന്തോഷത്തിൽ തോട്ടത്തിലും വീട്ടിലും തകർത്തടുക്കിയ പീറ്ററിനും കൂട്ടർക്കും നേരിടേണ്ടി വന്നത് പുതിയൊരു കുരിശാണ്.

Year : 2018
Run Time : 1h 35min

🔻പീറ്റർ റാബിറ്റ് 19s kidsന് നൽകുന്ന ഒരു നൊസ്റ്റാൾജിയയുണ്ട്. അത് പ്രതീക്ഷിച്ച് ആരും ഈ സിനിമയെ സമീപിക്കേണ്ട. വലിയ തോതിൽ നൊസ്റ്റാൾജിയ ഇതിൽ നിന്ന് ലഭിക്കുന്നില്ലെങ്കിലും എന്റർടെയ്ൻമെന്റ് എന്ന സംഗതി പീറ്റർ റാബിറ്റ് നൽകുന്ന വലിയൊരു വാഗ്ദാനമാണ്. തുടക്കം മുതൽ ഒടുക്കം വരെ ഒരുപാട് ചിരിക്കാനും ഉല്ലസിച്ച് കാണുവാനും പറ്റിയൊരു ചിത്രമാണ് പീറ്റർ റാബിറ്റ്. ഒരു നിമിഷം പോലും ബോറടിയില്ലെന്ന് മാത്രമല്ല പ്രതീക്ഷിച്ചതിനുമപ്പുറം മുന്നിട്ട് നിൽക്കുന്ന നല്ലൊരു ഫൺ റൈഡ് കൂടിയായി ചിത്രം. രസകരമായ ഡയലോഗുകളും കൗണ്ടറുകളും കഥാപാത്രങ്ങളുമൊക്കെയായി ഒന്നര മണിക്കൂർ സമയം പോവുന്നതറിയില്ല.

🔻നൊസ്റ്റാൾജിയ വേണ്ട എന്റർടെയ്ൻമെന്റ് മാത്രം മതി എന്ന മൈന്റ് സെറ്റ് ആണെങ്കിൽ ധൈര്യമായി കണ്ടോളൂ പീറ്റർ റാബിറ്റിന്റെ അഭ്യാസങ്ങൾ. കുട്ടികൾക്കും മുതിർന്നവർക്കും ഒരുപോലെ ആസ്വദിക്കാം എന്നതും ചിത്രം മുന്നോട്ട് വെക്കുന്ന സ്പെഷ്യലിറ്റിയാണ്.

ＡＢ ＲＡＴＥＳ ★★★☆☆

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻തന്റെ കൈയ്യകലത്തിൽ മകൾ പെറി ആഴമുള്ള ആ കോൺക്രീറ്റ് ഫ്ലോറിലേക്ക് വീഴുമ്പോഴും റേ കരുതിയിരുന്നില്ല തന്റെ ജീവിതം തന്നെ മാറിമാറിയാൻ പോവുകയാണെന്ന്. ഭാര്യ ജൊവാന്റെ അഭിപ്രായപ്രകാരം അടുത്തുള്ള ആശുപത്രിയിലെത്തിച്ചപ്പോഴും മകളെ ജീവിതത്തിലേക്ക് തിരിച്ചുകൊണ്ടുവരിക എന്ന ഒറ്റ ചിന്ത മാത്രമേ അവർക്കുണ്ടായിരുന്നുള്ളൂ. ആശുപത്രി അധികൃതരുടെ അനാസ്ഥ ആദ്യ മുതൽക്കേ തന്നെ അവരെ ചൊടിപ്പിച്ചെങ്കിലും പ്രതീക്ഷിച്ചതിനുമപ്പുറം ഒരു വിപത്താണ് അവരെ കാത്തിരുന്നതെന്ന് അവർ അറിഞ്ഞിരുന്നില്ല.

Year : 2019
Run Time : 1h 39min

🔻ഈയൊരു ചെറിയ പ്ലോട്ടിലാണ് ഒന്നര മണിക്കൂർ നീളുന്ന ചിത്രം കെട്ടിപ്പടുത്തിരിക്കുന്നത്. അതിനപ്പുറം പറഞ്ഞാൽ കഥയിലേക്ക് കടന്നുകയറുകയാണെന്ന് സിനിമ കാണുന്നവർക്ക് തോന്നിയേക്കും. ആസ്വാദനവും അതിനനുസരിച്ച് ഏറ്റക്കുറച്ചിലുകൾക്ക് വിധേയമായേക്കും. ഒരു ഫാമിലി ഡ്രാമ പോലെ മുന്നേറിയ ശേഷം ഒരു പോയിന്റിൽ പൊടുന്നനെ ത്രില്ലറിലേക്ക് ചാടുകയാണ് ചിത്രം. അവിടെ മുതൽ നമ്മെ കുഴപ്പിക്കുന്ന അവതരണത്തിലൂടെ സുന്ദരമായി മുന്നേറുന്നുമുണ്ട്. ആരുടെ ഭാഗത്താണ് സത്യമെന്ന് നിരന്തരം നമ്മെ ചിന്തിപ്പിക്കുന്നതിൽ സംവിധായകൻ വിജയിച്ചിട്ടുണ്ട്. അത്ര മികവ് പുലർത്തുന്നുണ്ട് ആഖ്യാനത്തിലെ കൃത്യത.

🔻എന്നാൽ ക്ലൈമാക്സിലേക്ക് എത്തുമ്പോൾ കാര്യങ്ങൾ പ്രതീക്ഷക്കൊത്ത് ഉയരാതെ പോയിടത്താണ് Fractured അത് അർഹിക്കുന്ന പ്രശംസ നേടാതിരുന്നത്. ഇത്തരമൊരു തീമിന് open-ended അല്ലെങ്കിൽ പ്രതീക്ഷിക്കാത്ത ഒരു പരിസമാപ്തി നിർണ്ണയിക്കേണ്ടത് ആവശ്യമെന്നിരിക്കെ തന്നെ ആർക്കും ഊഹിക്കാവുന്ന ഒന്നിലേക്ക് ഒതുക്കിക്കളയുകയാണ് ചെയ്തിരിക്കുന്നത്. എങ്കിലും ആകെ മൊത്തത്തിൽ തൃപ്തികരം എന്ന വാക്കിൽ ഒതുക്കാം ചിത്രത്തെ. അതിൽ Samന്റെ പ്രകടനത്തിന്റെ പങ്ക് നിർണ്ണായകമാണ്. ഗംഭീര പ്രകടനമാണ് അദ്ദേഹം കാഴ്ചവെച്ചിരിക്കുന്നത്. മറ്റാരും മനസ്സിൽ അവശേഷിക്കാത്ത വിധം ഭാവഭദ്രം.

🔻ＦＩＮＡＬ ＶＥＲＤＩＣＴ🔻

മികച്ച രീതിയിൽ ത്രില്ലടിപ്പിച്ച് മുന്നോട്ട് സഞ്ചരിച്ചുകൊണ്ടിരുന്ന ത്രില്ലറിനെ ക്ലൈമാക്സിലെ അലസത ഒരൽപം പിന്നോട്ട് വലിക്കുന്നുണ്ടെങ്കിലും ആകെ മൊത്തത്തിൽ തൃപ്തികരമായ ഒരനുഭവമാണ് Fractured സമ്മാനിച്ചത്. കാഴ്ചയിലുടനീളം പ്രേക്ഷകനെ കുഴക്കുന്നതിൽ സംവിധായകൻ വിജയിച്ചപ്പോൾ ഒന്നര മണിക്കൂറിൽ നല്ലൊരു ചിത്രം നമുക്ക് ലഭിക്കുന്നു.

ＡＢ ＲＡＴＥＳ ★★★☆☆

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻ഹാലോവീൻ ദിവസം തന്റെ കാമുകനുമായി പിരിയേണ്ടി വന്നതിന്റെ വിഷമത്തിലാണ് ഹാർപ്പർ. ആ സമയത്താണ് തന്റെ സുഹൃത്തുക്കൾ ഹാലോവീൻ ആഘോഷിക്കാനായി പുറത്തേക്ക് പോവാൻ വിളിക്കുന്നത്. പബ്ബിൽ അൽപ്പം ആഘോഷിച്ച ശേഷം അവിടെ നിന്ന് സുഹൃത്തുക്കളെയും കൂട്ടി അവർ ആഘോഷത്തിന്റെ ആക്കം കൂട്ടാൻ ഹാലോവീൻ സ്പെഷ്യലായ 'Haunted House' തിരക്കയിറങ്ങി. കുറച്ച് തിരച്ചിലുകൾക്കൊടുവിൽ അവർ തങ്ങളുടെ ലക്ഷ്യത്തിലേക്ക് എത്തിച്ചേരുന്നു. എന്നാൽ അവർ പ്രതീക്ഷിച്ചതിനുമപ്പുറം ഭയാനകമായ സംഗതികളാണ് അവരെ കാത്തിരുന്നത്.

Year : 2019
Run Time : 1h 32min

🔻ഒരു പുതുമയുമില്ലാത്ത പ്രമേയമാണെന്നറിയാം. എപ്പോഴോ ഫോണിൽ കയറിക്കൂടിയതാണ് ഈ ചിത്രം. ഒരു പ്രതീക്ഷയുമില്ലാതെയാണ് കണ്ടുതുടങ്ങിയത്. എന്നാൽ അധികം ഹൊറർ കാണാത്ത വ്യക്തിയെന്ന നിലയിൽ എന്നെ തൃപ്തിപ്പെടുത്താൻ പോന്ന ചേരുവകളൊക്കെയും ചിത്രത്തിലുണ്ടായിരുന്നു. സൂപ്പർ നാച്ചുറൽ എലമെന്റുകളും ആവശ്യത്തിന് മാത്രം ഉപയോഗിച്ചിരിക്കുന്ന ഹൊറർ സീനുകളും സ്ലേഷർ എന്ന് തോന്നിക്കുന്ന ചില രംഗങ്ങളുമൊക്കെയായി ചുരുങ്ങിയ നേരം കൊണ്ട് തൃപ്തി തന്ന ഡീസന്റ് സിനിമ. മറ്റ് സാധ്യതകൾ ഒന്നും തന്നെയില്ലാഞ്ഞിട്ടും പുതുമ സമ്മാനിക്കാനുള്ള ആത്മാർത്ഥമായ ശ്രമങ്ങൾ ചിലയിടങ്ങളിലെങ്കിലും കാണാനാവുന്നുണ്ട്.

🔻യാതൊരു അവകാശവാദങ്ങളുമില്ല. ഹൊറർ സിനിമകൾ പാടേ അവഗണിക്കുന്ന ഒരാളിൽ നിന്നുള്ള അഭിപ്രായമായി മാത്രം ഇതിനെ കണ്ടാൽ മതി. ഒരു  ചാൻസ് എടുത്ത് സ്വയം വിലയിരുത്തുക. പോയാൽ കുറച്ച് സമയവും ഡേറ്റയും. കിട്ടിയാൽ തരക്കേടില്ലാത്ത ഒരു ചിത്രവും. അത്രമാത്രം.

ＡＢ ＲＡＴＥＳ ★★★☆☆

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻ഭൂമിയുടെ സ്പന്ദനം തന്നെ കൈപിടിയിലൊതുക്കിയ Yuan bead അതിന്റെ പരമാധികാരി രണ്ട് ഭാഗങ്ങളായി വിഭജിച്ച് അതിന് കാവൽക്കാരനെ നിശ്ചയിച്ചിരിക്കുകയാണ്. Spirit Bead & Demon Bead. ഇതാണ് ആ രണ്ട് ഭാഗങ്ങൾ. അതിൽ സ്പിരിറ്റ് ബീഡ് ഭൂമിയിൽ ഒരു മനുഷ്യനായി ജനനമെടുക്കുകയും മനുഷ്യരാശിയുടെ രക്ഷകനായി മാറുകയും ചെയ്യുമെന്നും അരുൾ ചെയ്തു. എന്നാൽ വഞ്ചനയുടെ ഫലനിമിത്തം ജനനമെടുത്തത് demon bead ആയിരുന്നു. Ne Zha എന്ന പേരിൽ ആ ബാലൻ വളർന്നു.

Year : 2019
Run Time : 1h 50min

🔻Ne Zhaയുടെ മാതാപിതാക്കൾ പ്രതീക്ഷിച്ചത് പോലെയായിരുന്നില്ല കാര്യങ്ങൾ. ഭരണാധികാരികൾ ആയിരുന്നെകിൽ പോലും Ne Zhaയുദ് ജനനദിവസം തന്നെ ജനങ്ങളിൽ നിന്ന് വലിയ വിമർശനം അവർക്ക് ഏറ്റുവാങ്ങേണ്ടി വന്നു. വളരെ അപകടകരമായ Demon Beadൽ നിന്ന് ജനിച്ചത് കൊണ്ട് തന്നെ Ne Zhaയുടെ സ്വഭാവവും കഴിവും അതിനെ ആശ്രയിച്ചിരുന്നു. അതായിരുന്നു ജനങ്ങൾക്ക് ആ കാലഘട്ടത്തിൽ നേരിടേണ്ടി വന്ന ഏറ്റവും വലിയ വെല്ലുവിളിയും. ഇതിനെ മറികടക്കാനുള്ള ശ്രമമായിരുന്നു പിന്നീട് മാതാപിതാക്കൾക്ക് മുന്നിലുണ്ടായിരുന്നത്.

🔻ആനിമേഷൻ സിനിമകൾ സിംഹഭാഗവും ഫെസ്റ്റിവ് മൂഡിൽ കാണാൻ വേണ്ടി മാത്രമാണ് മനസ്സ് പാകപ്പെട്ടിരിക്കുന്നത്. ഗൗരവകരമായ ചിന്തകളും അവതരണവുമുള്ള ചിത്രങ്ങൾ ചുരുക്കമാണ്. അത്തരം മൈൻഡ് സെറ്റിൽ തന്നെയാണ് Ne Zhaയും കാണാനിരുന്നത്. എന്നാൽ അക്ഷരാർത്ഥത്തിൽ ഞെട്ടിച്ചുകളഞ്ഞ, അതീവ ഗൗരവവും എന്നാൽ അല്പം രസകരവുമായ അനുഭവമായി മാറുകയായിരുന്നു ചിത്രം.

🔻പക്വത നിറഞ്ഞ അവതരണശൈലിയാണ് Ne Zhaയുടെ ഏറ്റവും വലിയ ഗുണം. ഒരു വശത്ത് കൈകാര്യം ചെയ്യുന്ന പ്രമേയത്തിന്റെ ഗൗരവം തെല്ലും തോരാതെ വളരെ ത്രസിപ്പിച്ച് നമ്മിലേക്ക് എത്തിക്കുമ്പോഴും പൊടുന്നനെ വിടരുന്ന ചില നർമ്മരംഗങ്ങളിൽ ചിരി മുളക്കുന്നുമുണ്ട്. അത് മറ്റ് രംഗങ്ങളുടെ ആസ്വാദനത്തെ ബാധിക്കുന്നില്ലെന്നതാണ് ഏറ്റവും അതിശയകരം. തകർപ്പൻ ആക്ഷൻരംഗങ്ങൾ വരിവരിയായി നിൽക്കുമ്പോഴും Ne Zha കുട്ടിത്തത്തെ അതിന്റെ മനോഹാരിത ചോരാതെ തന്നെ അവതരിപ്പിക്കുന്നുമുണ്ട്. അതിനായി ശക്തമായ ഒപ്പം രസകരമായ കഥാപാത്രങ്ങളും സന്ദർഭങ്ങളും സിനിമയിലുണ്ട്. അങ്ങേയറ്റം നിലവാരം പുലർത്തുന്ന അനിമേഷൻ വർക്കുകൾ മാസ്മരികമായ ഫാന്റസി സമ്മാനിക്കുന്നുണ്ട്. കഥാപാത്രങ്ങളെ ഇമോഷണലി നമ്മിലേക്ക് അടുപ്പിക്കുന്നതിലും ചിത്രം വിജയിച്ചിട്ടുണ്ട്.

🔻ＦＩＮＡＬ ＶＥＲＤＩＣＴ🔻

ഗൗരവകരമായ പ്രമേയം ഉൾകൊണ്ട, ടെക്നിക്കലി ഗംഭീര നിലവാരം പുലർത്തുന്ന, ത്രസിപ്പിക്കുന്ന ആക്ഷൻ രംഗങ്ങളാൽ സമ്പന്നമായ, പുഞ്ചിരി വിടർത്തുന്ന നർമ്മരംഗങ്ങൾ സമയോചിതമായി കോർത്തിണക്കിയ ഒരുഗ്രൻ ആനിമേഷൻ ചിത്രമാണ് Ne Zha. ഒട്ടും പ്രതീക്ഷിക്കാതെ പൂർണ്ണതൃപ്തി നൽകിയ ഹൃദ്യമായ ചിത്രം  കുട്ടികൾക്കും മുതിർന്നവർക്കും ഒരുപോലെ ആസ്വദിക്കാവുന്ന അങ്ങേയറ്റം മികവ് പുലർത്തുന്ന ഒന്നാണ്.

ＡＢ ＲＡＴＥＳ ★★★½

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻ലോകത്ത് ജനസംഖ്യ വർധിച്ചുകൊണ്ടിരിക്കുന്നത് അപകടകരമായ സാഹചര്യമായി നോക്കിക്കാണുകയാണ് അധികാരികൾ. ജനസംഖ്യാ വർദ്ധനവ് മൂലം അധികനാൾ സന്തുലിതമായി മുന്നോട്ട് പോവാൻ ലോകത്തിനാവില്ല എന്നതാണ് ശാസ്ത്രം. അതുകൊണ്ട് തന്നെ അത് ക്രിയാത്മകമായി നിയന്ത്രിച്ചില്ലെങ്കിൽ വലിയ വിലയാവും കൊടുക്കേണ്ടി വരിക. അതിനായി അധികാരികൾ കണ്ടെത്തിയ തന്ത്രമാണ് One Child Policy. ഒരു കുടുംബത്തിൽ ഒന്നിൽ കൂടുതൽ കുട്ടികൾ ഉണ്ടാവാൻ പാടില്ല. അഥവാ അങ്ങനെയൊരു സാഹചര്യമല്ല അവിടെ നിലനിൽക്കുന്നതെങ്കിൽ cryosleep എന്ന ടെക്നിക്ക് അവിടെ പ്രയോഗിക്കും.

Year : 2017
Run Time : 2h 3min

🔻അത്തരത്തിൽ കടുത്ത നിയമങ്ങൾ പാലിച്ചുകൊണ്ടിരിക്കുന്ന കാലത്താണ് Terrence എന്ന വ്യക്തിയുടെ മകൾ ഐഡന്റിക്കലായ 7 പെൺകുട്ടികൾക്ക് ജന്മം നൽകുന്നത്. മരണത്തോടെ മകൾ മണ്മറഞ്ഞെങ്കിലും തന്റെ കൊച്ചുമക്കളെ നിയമത്തിന് മുന്നിൽ അടിയറവ് വെക്കാൻ അദ്ദേഹം തയ്യാറായിരുന്നില്ല. പൊലീസിന് പിടികൊടുക്കാതെ അവർ 7 പേരും അവിടെ ജീവിച്ചുപോന്നു. അതെങ്ങനെയെന്ന് കാട്ടിത്തരികയാണ് ചിത്രം.

🔻വളരെ കൗതുകകരമായ പ്രമേയമാണ് ചിത്രത്തിന്റേത്. ഡിസ്റ്റോപ്പിയൻ കാലഘട്ടം എന്ന് തന്നെ വിശേഷിപ്പിക്കാവുന്ന ഒരു കാലത്ത് നടക്കുന്ന കഥ. ഒരു ചെറിയ ആമുഖം നമുക്ക് നൽകി നേരിട്ട് കഥയിലേക്ക് കടക്കുകയാണ് ചിത്രം. പിന്നീടങ്ങോട്ട് ഒരു നിമിഷം പോലും പാഴാക്കാതെ നല്ല തകർപ്പൻ ത്രില്ലർ ഒരുക്കിയിരിക്കുകയാണ് സംവിധായകൻ. പ്രതീക്ഷിക്കാത്ത പ്ലോട്ട് ട്വിസ്റ്റുകളും വഴിത്തിരിവുകളുമൊക്കെയായി ത്രസിപ്പിച്ചിരിത്തുന്ന കിടിലൻ ചിത്രം. ഒപ്പം വൈകാരികമായി നമ്മെ അലട്ടുന്നുമുണ്ട് പല ഘട്ടത്തിലും.

🔻Noomi Rapace 7 ഗെറ്റപ്പുകളിലൂടെ സ്‌ക്രീൻ സ്‌പേസ് മുഴുവൻ അപഹരിക്കുകയാണ്. ആക്ഷൻ രംഗങ്ങളിൽ നല്ല മെയ്‌വഴക്കവും ക്യൂട്ട് ആയി തോന്നുന്ന സന്ദർഭങ്ങളുമൊക്കെയായി Show stealer എന്ന് തന്നെ വിളിക്കാം Noomiയെ. ഒപ്പം ചടുലത നിറഞ്ഞ എഡിറ്റിംഗും നിലവാരമുള്ള CGI വർക്കുകളും പശ്ചാത്തലസംഗീതവുമെല്ലാം ഒന്നിനൊന്ന് മെച്ചം.

🔻ＦＩＮＡＬ ＶＥＲＤＩＣＴ🔻

വ്യത്യസ്തമായ പ്രമേയവും നമ്മുടെ ശ്രദ്ധ പൂർണ്ണമായി പിടിച്ചുപറ്റാൻ ആവും വിധം ഉദ്വേഗജനകമായ അവതരണവും സയൻസ് ഫിക്ഷനിന്റെ സാധ്യതകളെ പരമാവധി മുതലാക്കുകയും ചെയ്ത തകർപ്പനൊരു ത്രില്ലറാണ് 'What happened to monday'. കഥയിലേക്ക് കടന്നാൽ ഒരിക്കൽ പോലും കണ്ണെടുക്കാൻ സാധിക്കാത്ത വിധം ചടുലത നിറഞ്ഞ പേസിങ്ങ് ആൺ ചിത്രത്തിന്റെ മുതൽക്കൂട്ട്. തീർച്ചയായും മികച്ചൊരു അനുഭവം തന്നെയാവും ചിത്രം സമ്മാനിക്കുക.

ＡＢ ＲＡＴＥＳ ★★★½

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻നാസി കാലഘട്ടത്തെ ക്രൂരതകൾ കണ്ടുപരിചയമില്ലാത്ത സിനിമാസ്നേഹികൾ നന്നേ കുറവായിരിക്കും. ഒരുപക്ഷെ ലോകത്തെ ഏറ്റവും വലിയ ഫാസിസ്റ്റ് ഭരണഘൂടമെന്ന വിശേഷണം ചാർത്തപ്പെട്ട നാസി ഭരണഘൂടത്തോളം ക്രൂരമായ മറ്റൊന്നുണ്ടാവില്ല. അല്ലെങ്കിൽ ഇതുവരെ പിറവിയെടുത്തിട്ടില്ല. എല്ലാ സിനിമകളും അവരുടെ ക്രൂരതകൾ കാട്ടി നമ്മെ മുറിവേൽപ്പിക്കുമ്പോഴും അതിൽ നിന്നൊരൽപ്പം മാറിചിന്തിക്കുകയാണ് The Photographer Of Mauthausen.(TPOM)

Year : 2018
Run Time : 1h 50min

🔻ഫാർൻസിസ്കൊ ബൊയിക്സ് എന്നൊരു സ്പാനിഷ് ഫോട്ടോഗ്രാഫർ ആ കാലഘട്ടത്തിൽ ജീവിച്ചിരുന്നു. ഫാസിസത്തിനെതിരായുള്ള എല്ലാ പോരാട്ടങ്ങളിലും സജീവമായിരുന്നതിന്റെ പേരിൽ സ്‌പെയിനിൽ നിന്ന് പുറത്താക്കപ്പെട്ട ഒരാൾ. ഒടുവിൽ ഫ്രാൻസിലെത്തുകയും അവിടെ ഫ്രഞ്ച് സേനക്കായി സേവനമനുഷ്ഠിക്കുകയും ചെയ്തു. എന്നാൽ യുദ്ധത്തിനിടയിൽ നാസി പട്ടാളത്തിന്റെ പിടിയിലാവുകയും Mauthausen ക്യാമ്പിൽ അടക്കപ്പെടുകയും ചെയ്തു. ഒരു ഫോട്ടഗ്രാഫറെ ആയതുകൊണ്ട് മാത്രം അദ്ദേഹത്തിന് ചില പരിഗണനകൾ ലഭിച്ചു. ആ ക്യാമ്പിലെ നാസി ഫോട്ടോഗ്രാഫറുടെ അസിസ്റ്റന്റായി അദ്ദേഹം പകൽ സമയങ്ങളിൽ ജോലി നോക്കി. എന്നാൽ ബൊയിക്സ് അത് മറ്റൊരു രീതിയിൽ പ്രയോജനപ്പെടുത്താൻ വെമ്പൽ കൊള്ളുകയായിരുന്നു.

🔻ഭൂരിഭാഗം സിനിമകളും ക്രൂരതകൾ കൊണ്ട് കണ്ണടപ്പിക്കുമ്പോഴും ഈ ചിത്രം അതിൽ നിന്ന് മാറിചിന്തിക്കുന്നത് അത് പറയാനുദ്ദേശിക്കുന്ന രാഷ്ട്രീയം കൊണ്ടാണ്. ഫാസിസ്റ്റ് ഭരണഘൂടങ്ങളുടെ തകർച്ചയെ മുൻനിർത്തി സംവദിക്കുന്ന സിനിമയാണ് TPOM. സ്നേഹബന്ധങ്ങളുടെ ഊഷ്മളമായ ദൃഢത അവതരിപ്പിക്കുമ്പോഴും അതിലെ കാപട്യവും ചോദ്യം ചെയ്യുകയാണ് ചിത്രം. ഫാസിസം വീട്ടുപടിക്കൽ എത്തിനിൽക്കുമ്പോഴും നിഷ്പക്ഷതയോളം അപകടകരമായ മറ്റൊരു വസ്തുത വേറെയില്ലെന്ന് ചൂണ്ടിക്കാണിക്കുക കൂടിയാണ് സംവിധായകൻ ചെയ്‌തിട്ടുള്ളത്. ചെറുപ്പം മുതൽക്കേ കുട്ടികളുടെ മനസ്സിനെ ഏത് ദിശയിലേക്ക് കൊണ്ടുപോവുകയാണ് ഭരണഘൂടം എന്ന വിഷമകരമായ സംഗതി കൂടി ചർച്ച ചെയ്യേണ്ടതാണ്. അത്തരത്തിൽ പ്രസക്തി അർഹിക്കുന്ന ഒട്ടനവധി വിഷയങ്ങൾ നമ്മുടെ മുന്നിലേക്ക് നിരത്തുകയാണ് സംവിധായകൻ.

🔻മനുഷ്യന് എത്രത്തോളം ക്രൂരനാവാൻ സാധിക്കും എന്ന് കാട്ടിത്തരുന്ന ചില രംഗങ്ങളുണ്ട്. ഒരുതരത്തിൽ മനുഷ്യത്വമുള്ളവർ തരിച്ചിരുന്നുപോവും ആ രംഗങ്ങളിലൂടെ കണ്ണോടിക്കുമ്പോൾ. അവിടെത്തന്നെ മനുഷ്യത്വത്തിലൂടെ മറുപടി വിളിച്ചോതുന്നുമുണ്ട് എന്നതാണ് ശ്രദ്ധേയം. അതിജീവനത്തിന്റെ പോരാട്ടവുമുണ്ട് ചിത്രത്തിൽ. ഒരുപക്ഷെ സമീപകാലത്തു നമുക്കേറെ ആവശ്യം വരിക ആ പോരാട്ടങ്ങളിൽ നിന്ന് ലഭിച്ച ഊർജ്ജങ്ങളാണ്.

🔻ＦＩＮＡＬ ＶＥＲＤＩＣＴ🔻

ഡൽഹിയിൽ തങ്ങളുടെ ശത്രുക്കളെന്ന് പറഞ്ഞ് പഠിപ്പിച്ചവരെ കൈകാര്യം ചെയ്യാനായി കയ്യിൽ വടികളുമേന്തി തെരുവിൽ നടക്കുന്ന ബാല്യങ്ങളുടെ ചിത്രങ്ങളായിരുന്നു ഈയിടെ മനസ്സിനെ ഏറെ നൊമ്പരപ്പെടുത്തിയത്. CAA പ്രതിഷേധസംഗമങ്ങളിലും ഫിലിം ഫെസ്റ്റുകളിലും ഏറെ ചർച്ചചെയ്യപ്പെട്ട ചിത്രമാണ് The Photographer Of Mauthausen. ഏതൊരു ഫാസിസ്റ്റ് ഭരണഘൂടത്തിനും ഒരുനാൾ അന്ത്യമുണ്ടെന്നും അവ ശിഥിലമാവുക തന്നെ ചെയ്യുമെന്നുമുള്ള പ്രത്യാശ സമ്മാനിക്കുകയാണ് ഈ ചിത്രം. അന്തിമവിജയം ജനങ്ങളുടേത് തന്നെയാണ്. അതെത്ര തന്നെ അടിച്ചമർത്താൻ ശ്രമിച്ചാലും ശരി. നിഷ്പക്ഷതയുടെ രാഷ്ട്രീയത്തെയും കടുത്ത ഭാഷയിൽ ചോദ്യം ചെയ്യുന്നുണ്ട് സംവിധായകൻ. Anti-Nazi ചിത്രങ്ങളിൽ ശക്തമായ ഭാഷയിൽ സംസാരിക്കുന്ന മറ്റൊരു ചിത്രം കൂടി രൂപം കൊള്ളുകയാണ് ഫോട്ടോഗ്രാഫറിലൂടെ.

ＡＢ ＲＡＴＥＳ ★★★★☆

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻12 വർഷം മുമ്പ് ഒന്നും പറയാതെ ഷാമിലിന്റെ വീട്ടിൽ നിന്ന് ഇറങ്ങിപ്പോയതാണ് മകൻ ഗാബിൽ. ഭാര്യയെ വാപ്പയോടൊപ്പം വീട്ടിൽ ഉപേക്ഷിച്ച് പോയശേഷം അവരെങ്ങനെയാണ് ജീവിക്കുന്നതെന്ന് പോലും തിരക്കാണ് ഗാബിൽ കൂട്ടാക്കിയിട്ടില്ല. എന്നാൽ 12 വർഷങ്ങൾക്കിപ്പുറം ഒരു രാത്രി തന്റെ അനാർ തോട്ടങ്ങൾക്കിടയിലൂടെ മകൻ ഗാബിൽ നടന്നുകയറുന്നത് കണ്ടപ്പോൾ ഏതൊരു പിതാവും ചെയുന്നത് പോലെ അദ്ദേഹവും ഗാബിലിനെ സ്നേഹപൂർവ്വം വീട്ടിലേക്ക് ക്ഷണിച്ചു. സ്വന്തം മകളെ പോലെ കരുതുന്ന ഗാബിളിന്റെ ഭാര്യ സാറക്കും മകൻ ജലാലിനും കൂട്ടാവുമെന്ന പ്രതീക്ഷയോടെ..

Year : 2017
Run Time : 1h 30min

🔻12 വർഷം തങ്ങൾ അനുഭവിച്ച യാതനകളും മുറിപ്പാടുകളും പതിയെ മായ്ക്കാനുള്ള ശ്രമം കൂടിയായിരുന്നു ഗാബിലിന്റെ ഭാഗത്ത് നിന്നുണ്ടായത്. ഭാര്യയേയും മകനെയും വേണ്ടിവന്നാൽ വാപ്പയെയും റഷ്യയിലേക്ക് കൊണ്ടുപോവുകയാണ് ആ വരവിന്റെ ഉദ്ദേശ്യം. എന്നാൽ തന്റെ അനാർ തോട്ടങ്ങൾ വിട്ട് പോരാൻ ഷാമിൽ കൂട്ടാക്കാത്തതോടെ പ്രതിസന്ധിയിലായത് മകൻ ജലാലിന്റെ കാര്യം കൂടിയാണ്. വാപ്പുപ്പയെ വിട്ട് തൻ വരില്ലെന്ന് കടുപ്പിച്ച് പറഞ്ഞ 12 വയസ്സുകാരൻ ജലാലിന്റെ മുന്നിൽ ഗാബിൽ പതറിപ്പോവുകയാണ്. പേരിന് മാത്രം വാപ്പയെന്ന ലേബൽ ജലാൽ തനിക്ക് ചാർത്തിത്തരുമ്പോഴും സ്വന്തം മകനോട് എങ്ങനെ പെരുമാറണമെന്ന് അറിയാതെ ഗാബിൽ കുഴഞ്ഞുനിൽക്കുന്നത് കാണാം. ഒരു ഡ്രാമയെന്ന നിലയിൽ ചിത്രം നമ്മോട് അടുക്കുന്നത് ആ ഘട്ടം മുതൽക്കാണ്.

🔻അതിമനോഹരമായ ഫ്രെയിമുകൾ കഥ പറയുന്ന ചിത്രമാണ് Pomegranate Orchard. വിളഞ്ഞ്‌നിൽക്കുന്ന മാതളങ്ങൾ നിറഞ്ഞ തോട്ടങ്ങളിലൂടെ പലപ്പോഴും വൈഡ് ഷോട്ടിലും ക്ലോസ്സ് ഷോട്ടിലുമൊക്കെ കഥാപാത്രങ്ങൾ സംവദിക്കുന്നത് കാണാം. കഥയുടെ ഭൂരിഭാഗവും അരങ്ങേറുന്നത് തന്നെ തോട്ടങ്ങൾക്കിടയിലാണ്. അവർ തങ്ങളുടെ ജീവിതത്തിന്റെ സിംഹഭാഗവും ജീവിച്ച് തീർത്തതും ആ തോട്ടങ്ങൾക്കിടയിലാണ്. അപാരമായ Visual Beauty അനുഭവിച്ചറിയാം ഛായാഗ്രഹണമികവിലൂടെ. ഒപ്പം അഭിനേതാക്കളുടെ ഗംഭീര പ്രകടനങ്ങളും. അവസാനരംഗങ്ങളൊക്കെ വേറൊരു തലത്തിലേക്ക് ഉയർത്തുന്നതിന് അവയൊക്കെ സഹായിച്ചിട്ടുണ്ട്.

🔻ＦＩＮＡＬ ＶＥＲＤＩＣＴ🔻

 ജീവസ്സുറ്റ കഥാപാത്രങ്ങൾ കൊണ്ട് നമ്മുടെ മനസ്സിനെ നേരിയ തോതിൽ വൃണപ്പെടുത്തി ഒടുങ്ങുന്ന മികച്ചൊരു ഡ്രാമയാണ് Pomegranate Orchard. ബന്ധങ്ങളുടെ ദൃഢത സുന്ദരമായി മനസ്സിലാക്കിത്തരുന്ന രംഗങ്ങൾ കൊണ്ടും സ്നേഹത്തിന്റെ ഭാഷ്യമായി മാറുന്ന കഥാപാത്രങ്ങൾ കൊണ്ടും മനസ്സ് സന്തോഷപൂരിതമാവുമ്പോഴും ഒടുക്കം ഒരു തീരാനോവ് തന്നെ അവശേഷിപ്പിക്കുന്നു ചിത്രം. തന്റെ ജനാലകൾക്കിടയിലൂടെ അനാർ തോട്ടത്തിലേക്ക് നോക്കിനിൽക്കുന്ന ഷാമിലിന്റെ കലങ്ങിയ കണ്ണുകൾ തന്നെയാണ് നമ്മുടെ ദൃഷ്ടിയിലും ഉണ്ടാവുക. തീർച്ചയായും കാണുക ഈ ഫാമിലി ഡ്രാമ.

ＡＢ ＲＡＴＥＳ ★★★½

ചിത്രം ടെലിഗ്രാം ചാനലിൽ ലഭ്യമാണ്. Abi Suggests