Abeed Azad

🔻12 വർഷം മുമ്പ് ഒന്നും പറയാതെ ഷാമിലിന്റെ വീട്ടിൽ നിന്ന് ഇറങ്ങിപ്പോയതാണ് മകൻ ഗാബിൽ. ഭാര്യയെ വാപ്പയോടൊപ്പം വീട്ടിൽ ഉപേക്ഷിച്ച് പോയശേഷം അവരെങ്ങനെയാണ് ജീവിക്കുന്നതെന്ന് പോലും തിരക്കാണ് ഗാബിൽ കൂട്ടാക്കിയിട്ടില്ല. എന്നാൽ 12 വർഷങ്ങൾക്കിപ്പുറം ഒരു രാത്രി തന്റെ അനാർ തോട്ടങ്ങൾക്കിടയിലൂടെ മകൻ ഗാബിൽ നടന്നുകയറുന്നത് കണ്ടപ്പോൾ ഏതൊരു പിതാവും ചെയുന്നത് പോലെ അദ്ദേഹവും ഗാബിലിനെ സ്നേഹപൂർവ്വം വീട്ടിലേക്ക് ക്ഷണിച്ചു. സ്വന്തം മകളെ പോലെ കരുതുന്ന ഗാബിളിന്റെ ഭാര്യ സാറക്കും മകൻ ജലാലിനും കൂട്ടാവുമെന്ന പ്രതീക്ഷയോടെ..

Year : 2017
Run Time : 1h 30min

🔻12 വർഷം തങ്ങൾ അനുഭവിച്ച യാതനകളും മുറിപ്പാടുകളും പതിയെ മായ്ക്കാനുള്ള ശ്രമം കൂടിയായിരുന്നു ഗാബിലിന്റെ ഭാഗത്ത് നിന്നുണ്ടായത്. ഭാര്യയേയും മകനെയും വേണ്ടിവന്നാൽ വാപ്പയെയും റഷ്യയിലേക്ക് കൊണ്ടുപോവുകയാണ് ആ വരവിന്റെ ഉദ്ദേശ്യം. എന്നാൽ തന്റെ അനാർ തോട്ടങ്ങൾ വിട്ട് പോരാൻ ഷാമിൽ കൂട്ടാക്കാത്തതോടെ പ്രതിസന്ധിയിലായത് മകൻ ജലാലിന്റെ കാര്യം കൂടിയാണ്. വാപ്പുപ്പയെ വിട്ട് തൻ വരില്ലെന്ന് കടുപ്പിച്ച് പറഞ്ഞ 12 വയസ്സുകാരൻ ജലാലിന്റെ മുന്നിൽ ഗാബിൽ പതറിപ്പോവുകയാണ്. പേരിന് മാത്രം വാപ്പയെന്ന ലേബൽ ജലാൽ തനിക്ക് ചാർത്തിത്തരുമ്പോഴും സ്വന്തം മകനോട് എങ്ങനെ പെരുമാറണമെന്ന് അറിയാതെ ഗാബിൽ കുഴഞ്ഞുനിൽക്കുന്നത് കാണാം. ഒരു ഡ്രാമയെന്ന നിലയിൽ ചിത്രം നമ്മോട് അടുക്കുന്നത് ആ ഘട്ടം മുതൽക്കാണ്.

🔻അതിമനോഹരമായ ഫ്രെയിമുകൾ കഥ പറയുന്ന ചിത്രമാണ് Pomegranate Orchard. വിളഞ്ഞ്‌നിൽക്കുന്ന മാതളങ്ങൾ നിറഞ്ഞ തോട്ടങ്ങളിലൂടെ പലപ്പോഴും വൈഡ് ഷോട്ടിലും ക്ലോസ്സ് ഷോട്ടിലുമൊക്കെ കഥാപാത്രങ്ങൾ സംവദിക്കുന്നത് കാണാം. കഥയുടെ ഭൂരിഭാഗവും അരങ്ങേറുന്നത് തന്നെ തോട്ടങ്ങൾക്കിടയിലാണ്. അവർ തങ്ങളുടെ ജീവിതത്തിന്റെ സിംഹഭാഗവും ജീവിച്ച് തീർത്തതും ആ തോട്ടങ്ങൾക്കിടയിലാണ്. അപാരമായ Visual Beauty അനുഭവിച്ചറിയാം ഛായാഗ്രഹണമികവിലൂടെ. ഒപ്പം അഭിനേതാക്കളുടെ ഗംഭീര പ്രകടനങ്ങളും. അവസാനരംഗങ്ങളൊക്കെ വേറൊരു തലത്തിലേക്ക് ഉയർത്തുന്നതിന് അവയൊക്കെ സഹായിച്ചിട്ടുണ്ട്.

🔻ＦＩＮＡＬ ＶＥＲＤＩＣＴ🔻

 ജീവസ്സുറ്റ കഥാപാത്രങ്ങൾ കൊണ്ട് നമ്മുടെ മനസ്സിനെ നേരിയ തോതിൽ വൃണപ്പെടുത്തി ഒടുങ്ങുന്ന മികച്ചൊരു ഡ്രാമയാണ് Pomegranate Orchard. ബന്ധങ്ങളുടെ ദൃഢത സുന്ദരമായി മനസ്സിലാക്കിത്തരുന്ന രംഗങ്ങൾ കൊണ്ടും സ്നേഹത്തിന്റെ ഭാഷ്യമായി മാറുന്ന കഥാപാത്രങ്ങൾ കൊണ്ടും മനസ്സ് സന്തോഷപൂരിതമാവുമ്പോഴും ഒടുക്കം ഒരു തീരാനോവ് തന്നെ അവശേഷിപ്പിക്കുന്നു ചിത്രം. തന്റെ ജനാലകൾക്കിടയിലൂടെ അനാർ തോട്ടത്തിലേക്ക് നോക്കിനിൽക്കുന്ന ഷാമിലിന്റെ കലങ്ങിയ കണ്ണുകൾ തന്നെയാണ് നമ്മുടെ ദൃഷ്ടിയിലും ഉണ്ടാവുക. തീർച്ചയായും കാണുക ഈ ഫാമിലി ഡ്രാമ.

ＡＢ ＲＡＴＥＳ ★★★½

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

യുദ്ധകഥകൾ ഒരുപാട് കണ്ടിട്ടുണ്ട്. പ്രണയകഥകൾ അതിലേറെയും. എന്നാൽ യുദ്ധവും പ്രണയവും ഒരുപോലെ പ്രാധാന്യ വരുന്ന കഥകൾ വിരളമാണ്. അത്തരത്തിൽ ഒന്നാണ് അലിയുടെയും നിനോയുടെയും യുദ്ധത്തിലൂന്നിയ പ്രണയകഥ.


💢അസർബൈജാനിലെ അപ്പർ കാസ്റ്റ് മുസ്ലിം കുടുംബത്തിൽ പെട്ട രാജകുമാരനാണ് അലി. കാഴ്ചയിൽ സുമുഖൻ. അതോടൊപ്പം നല്ല സാമർഥ്യവും. അലി നിനോയെ ആദ്യമായി കാണുന്നത് ഒരു പാർട്ടിയിൽ വെച്ചാണ്. ജോർജിയയിൽ നിന്നുള്ള ക്രിസ്ത്യൻ കുടുംബത്തിൽ പെട്ട യുവതി. ആദ്യകാഴ്ചയിൽ തന്നെ ഇരുവരും ഇഷ്ടത്തിലായി. വിവാഹം ചെയ്ത് ഒരുമിച്ച് ജീവിക്കാൻ ആഗ്രഹിച്ചു.

ഒന്നാംലോക മഹായുദ്ധകാലത്ത് റഷ്യൻ സഖ്യത്തിന് കീഴിലായിരുന്നു അസർബൈജാൻ. ഭരണകാര്യങ്ങളിൽ തല്പരനായിരുന്നു അലിക്ക് രാജ്യം റഷ്യയുടെ കീഴിൽ നിന്ന് സ്വതന്ത്രമായി ഒരു റിപ്പബ്ലിക്ക് ആവണമെന്ന് ആഗ്രഹമുണ്ടായിരുന്നു. എന്നാൽ പ്രണയം ഇരുവരുടെയും ജീവിതത്തിൽ വലിയ പല വഴിത്തിരിവുകൾക്കും കാരണമായി. തുടർന്ന് ഓല ഋതുഭേദങ്ങളിലായി അവരുടെ പ്രണയം മുന്നേറുന്നു. ഒപ്പം അസർബൈജാന്റെ ഭാവിയും.

💢വെറും പ്രണയവും മതവും മാത്രം ചർച്ച ചെയ്യുന്ന സിനിമകളിൽ നിന്ന് വിഭിന്നമാണ് ഈ ചിത്രം. മതം ഇവിടെയൊരു വലിയ തടസ്സമാവുന്നില്ല. അതിനേക്കാളുപരി ഒരു രാജ്യത്തിന്റെ രാഷ്ട്രീയവും ഭാവിയുമാണ് ചിത്രം ചർച്ച ചെയ്യുന്നത്. അതിൽ പ്രണയവും വലിയ ഭാഗമായി എന്ന് മാത്രം. രണ്ട് കാര്യങ്ങൾക്കും ഒരേ പ്രാധാന്യം നൽകിയാണ് കഥ പറയുന്നത്. അതുകൊണ്ട് തന്നെ ഇരുകാര്യങ്ങളും ഒരേതരത്തിൽ നമ്മിൽ ആകാംഷ ജനിപ്പിക്കുന്നുണ്ട്.

💢പ്രണയത്തിന്റെ തീവ്രത അതേപടി തന്നെ പ്രേക്ഷകനിലേക്കും എത്തിക്കാൻ ശ്രമിക്കുന്നുണ്ട് ചിത്രം. ഏതാണ്ട് പാതി പിന്നിടുമ്പോൾ അത് അനുഭവിക്കാനും സാധിക്കും. ഒരു രാജ്യത്തിന്റെ സംസ്കാരവും പാരമ്പര്യവും പഠനവിധേയമാക്കാൻ കൂടിയ സഹായകമാണ് അലിയുടെയും നിനോയുടെയും പ്രണയത്തിലൂടെ.

💢ഒരു ദൃശ്യവിരുന്ന് തന്നെയാണ് സിനിമ പ്രദാനം ചെയ്യുന്നത്. അത് ഓരോ ഫ്രെയിമിലും ദർശിക്കാൻ സാധിക്കും. പല ഋതുക്കളിലൂടെ കഥ കടന്നുപോവുന്നുണ്ട്. അവയൊക്കെയും അതിമനോഹരമായി ചിത്രീകരിച്ചിട്ടുമുണ്ട്. അതോടൊപ്പം തന്നെ യുദ്ധരംഗങ്ങളും. ദൈർഖ്യം കുറവെങ്കിൽ കൂടി വളരെ മികവ് പുലർത്തുന്നുണ്ട് ആ സീക്വൻസുകളും. അത് പോലെ തന്നെ പശ്ചാത്തലസംഗീതവും.

💢ചിത്രത്തിൽ പ്രധാനവേഷം ചെയ്തിരിക്കുന്നവരെല്ലാം പല ഇൻഡസ്ട്രികളിൽ വർക്ക് ചെയ്യുന്നവരാണ്. അലിയെ അവതരിപ്പിച്ച Adam Bakri പലസ്തീൻ സിനിമകളിലെ പതിവ് മുഖമാണ്. നിനോയെ അവതരിപ്പിച്ച Valverde സ്പാനിഷ് നടിയും. അതുപോലെ തന്നെയാണ് ബാക്കിയുള്ളവരും.

🔻ＦＩＮＡＬ ＶＥＲＤＩＣＴ🔻

മനോഹരമായ പ്രണയകഥയും അതുപോലെ തന്നെ അസർബൈജാന്റെ രാഷ്ട്രീയവും ഒരുപോലെ സംസാരിക്കുന്ന ചിത്രം. അതോടൊപ്പം ദൃശ്യമികവ് പുലർത്തുന്ന കാഴ്ചകൾ കൂടിയാവുമ്പോൾ വീണ്ടും കാണാൻ പ്രേരിപ്പിക്കുന്ന ചിത്രമാവുന്നു ഇത്.

ＭＹ ＲＡＴＩＮＧ:: ★★★½