Abeed Azad

🔻ജോലി പോലും ഇല്ലാതെ കഷ്ടപ്പെടുന്ന സമയത്ത് ഫിജിയിലേക്ക് ഒരു ഫ്രീ ഹോളിഡേ ട്രിപ്പ് ഫ്രീയായി അടിച്ച വിവാനും സിയയും അതങ്ങ് തകർക്കാൻ തന്നെ തീരുമാനിച്ചു. മാത്രമല്ല തങ്ങളുടെ വെഡിങ്ങ് ആനിവേഴ്‌സറിയും അവിടെ തന്നെ ആഘോഷിക്കുകയും ചെയ്യാം. അങ്ങനെ ആ സുദിനത്തിൽ അവർക്കൊരു ഫ്രീ ഇൻവിറ്റേഷൻ കിട്ടി. അവിടെയെത്തിയ അവരെ കാത്തിരുന്നത് ഒരു വമ്പൻ ഓഫറായിരുന്നു. 21 കോടി രൂപ. അതിന് അവർക്ക് കടക്കേണ്ട കടമ്പ 8 ചോദ്യങ്ങളും അത്ര തന്നെ ടാസ്ക്കുകളും മാത്രം. And There Begins The Live Game Show 'Table No. 21"

Year : 2013
Run Time : 1h 48min

🔻ഇതേ പേരിലുള്ള ഒരു നോവലിന്റെ അഡാപ്റ്റേഷനാണ് ഈ ചിത്രം. ഒരു റൊമാന്റിക് മൂഡിൽ തുടങ്ങിയ ചിത്രം ചെന്നെത്തിയത് ഒരു സൈക്കോളജിക്കൽ ത്രില്ലറിലേക്കാണ്. നല്ല രീതിയിൽ ക്രിസ്പ് ആയ അവതരണം സിനിമയുടെ പ്ലോട്ടിനെ ടൈറ്റ് ആക്കിയിട്ടുണ്ട്. അതുകൊണ്ട് തന്നെ ഒരു ഫാസ്റ്റ് പേസ്ഡ് ത്രില്ലർ നമുക്ക് ആസ്വദിക്കാം. ഒപ്പം പറയാൻ ശ്രമിച്ച മെസേജുംഅഭിനന്ദനാർഹം തന്നെ. അത് പറഞ്ഞ വിധവും നന്നായി.

🔻തുടക്കം വിവാനെയും സിയയെയും കേന്ദ്രീകരിച്ച ചുരുക്കം ചില രംഗങ്ങൾ ഉണ്ട്. അത് മടുപ്പൊന്നും ഉണ്ടാക്കുന്നില്ലെങ്കിലും ത്രില്ലർ കാണാൻ നിൽക്കുമ്പോൾ ഇതെന്തിന് എന്ന് തോന്നിയിരുന്നു. എന്നാൽ അവയിൽ പല കാര്യങ്ങളും പലയിടത്തായി ഭംഗിയായി ഉപയോഗിച്ചിരിക്കുന്നത് കാണാം. അത്തരത്തിലുള്ള ക്യാരക്ടർ ഡെവലപ്മെന്റ് തിരക്കഥയുടെ ഘടനയ്ക്ക് ഗുണം ചെയ്തിട്ടുണ്ട്. ഒപ്പം രാജീവിന്റെ ഗംഭീര പ്രകടനവും ആ കഥാപാത്രത്തിന്റെ പൂർണ്ണതക്ക് വളരെ ഗുണം ചെയ്തിട്ടുണ്ട്. ചില പോരായ്മകളും ലൂപ്പ് ഹോളുകളും ഇടക്ക് തോന്നിയെങ്കിൽ കൂടി അവയൊന്നും കാഴ്ചക്ക് തടസം ആവുന്നതേ ഇല്ല.

🔻മികവ് പുലർത്തുന്ന ടെക്നിക്കൽ സൈഡും ത്രില്ലിങ് ആയ BGMഉം ചില രംഗങ്ങളിലെ കളർ ടോണും എല്ലാം ചിത്രത്തിന് മിഴിവേകുന്നുണ്ട്. വിഷ്വലി ക്വാളിറ്റി ഉറപ്പ് നൽകുന്ന അവതരണവുമാണ് സിനിമയിലുടനീളം. ചുരുക്കം ചില കഥാപാത്രങ്ങൾ മാത്രമേ ചിത്രത്തിൽ ഉള്ളൂ എങ്കിൽ കൂടി പരേഷ് റാവൽ ഉൾപ്പടെയുള്ള കാസ്റ്റിംഗും നന്നായി തന്നെ തോന്നി.

🔻ＦＩＮＡＬ ＶＥＲＤＩＣＴ🔻

നല്ലൊരു തീമും അതിന്റെ വ്യത്യസ്തമാർന്ന മേക്കിങ്ങും കൊണ്ട് വേറിട്ട അനുഭവമാകുന്നുണ്ട് Table No 21. ഒരു വമ്പൻ സിനിമ പ്രതീക്ഷിക്കാതെ ഈ ചിത്രത്തെ സമീപിച്ചാൽ ഉറപ്പായും നല്ലൊരു ആസ്വാദനം തന്നെ ലഭിച്ചേക്കും. പറയുന്ന കാര്യത്തിന്റെ ഗൗരവം കൊണ്ടും കഥയിലുടനീളം പുലർത്തുന്ന ത്രില്ലർ സ്വഭാവം കൊണ്ടും തൃപ്തി നൽകുന്നുണ്ട് ചിത്രം.

ＡＢ ＲＡＴＥＳ ★★★☆☆

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻ആനിമേഷൻ ചിത്രങ്ങളോടുള്ള കടുത്ത ഇഷ്ടം കാരണം കണ്ടതാണ് ഈ ചിത്രത്തിന്റെ ആദ്യ ഭാഗം. എന്നാൽ അത്ര തൃപ്തികരമായ അനുഭവമായിരുന്നില്ല അത്. ശരാശരി അല്ലെങ്കിൽ അതിന് താഴെ മാത്രം നിൽക്കുന്ന ഒരു ചിത്രമായി തോന്നിയിരുന്നു അത്. അതുകൊണ്ട് തന്നെ രണ്ടാം ഭാഗം അന്നൗൻസ് ചെയ്തപ്പോൾ യാതൊരു വിധത്തിലുള്ള പ്രതീക്ഷയും ഉണ്ടായിരുന്നില്ല. ചിത്രം കണ്ടുതുടങ്ങിയതും അങ്ങനെ തന്നെയാണ്.

Year : 2019
Run Time : 1h 26min

🔻ആദ്യ ഭാഗം പോലെ തന്നെ Petsന്റെ POVയിലൂടെയുള്ള കഥ പറച്ചിലാണ് ചിത്രത്തിന്റേത്. അവരുടെ ജീവിതത്തിലേക്ക് പുതിയ പലരുടെയും കടന്നുവരവിലൂടെയും അതുമൂലമുണ്ടാവുന്ന മാറ്റങ്ങളിലൂടെയും കഥ പുരോഗമിക്കുന്നു. Maxലേക്ക് മാത്രം കേന്ദ്രീകരിക്കാതെയുള്ള കഥ പറച്ചിലാണ് ഇത്തവണ ചിത്രത്തിന്റെ പ്രത്യേകത.

🔻Snowball, Gidget എന്നിവരെ കോമഡിക്കായി ഉപയോഗിച്ചിരിക്കുന്ന വിധം അതീവ രസകരമായിരുന്നു. ഇരുവർക്കും വേറൊരു ട്രാക്കിൽ കഥ നൽകി അതിലൂടെ ബന്ധിപ്പിച്ച വിധം നന്നായിരുന്നു. Maxന് അൽപ്പം സീരിയസ്സായ കഥ നൽകിയ ചിത്രം ആദ്യ ഭാഗത്തേക്കാൾ നിലവാരം പുലർത്തുന്നുണ്ട്. കഥയിലും നർമ്മത്തിലും അങ്ങനെ തന്നെ.

🔻പുതിയ കഥാപാത്രങ്ങളെ കൂടി ചിത്രത്തിൽ അവതരിപ്പിക്കുമ്പോളുള്ള ദൈർഖ്യക്കൂടുതൽ ഇവിടെയില്ല. ഒന്നര മണിക്കൂറിൽ കാര്യങ്ങൾ ഒതുക്കിയിട്ടുണ്ട്. ഒപ്പം മനോഹരമായ ക്രെഡിറ്റ് സീനും കിടിലൻ മിഡ് ക്രെഡിറ്റ് സീനും കൂടിയാവുമ്പോൾ തൃപ്തി തന്നെ ഫലം.

🔻ＦＩＮＡＬ ＶＥＲＤＩＣＴ🔻

ആദ്യ ഭാഗത്തേക്കാൾ എന്തുകൊണ്ടും നിലവാരം പുലർത്തുന്ന ചിത്രം തൃപ്തികരമായ അനുഭവമാണ് സമ്മാനിച്ചത്. ആനിമേഷൻ പ്രേമികൾക്ക് ചിരിക്കാനും നല്ല വർക്കുകൾ ആസ്വദിക്കാനും ചിത്രത്തിലൂടെ സാധിക്കുന്നു. നല്ലൊരു ടൈംപാസ്സ് ചിത്രമെന്ന നിലയിൽ സമയനഷ്ടമില്ലാത്ത ഒന്ന് തന്നെയായി ഈ ചിത്രവും.

ＡＢ ＲＡＴＥＳ ★★★☆☆

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻ടൈം-ലൂപ്പ് പ്രമേയമാക്കിയ സിനിമകൾ പലതും വന്നുപോയതാണ് കൊറിയൻ ഇൻഡസ്ട്രിയിൽ. ഓരോന്നും പുതു അനുഭവങ്ങൾ തന്നെയായിരുന്നു സമ്മാനിച്ചതും. എന്നാൽ അവയിൽ നിന്നൊക്കെ വേറിട്ട് നിൽക്കുന്ന, പുതുമ സമ്മാനിക്കുന്ന ചില ഘടകങ്ങളാണ് ഈ ചിത്രത്തെ മാറ്റി നിർത്തുന്നത്. ഒരുപക്ഷെ കാഴ്ചയിൽ ഏറെ ശ്രദ്ധ ആകർഷിച്ചതും അത്തരം കാര്യങ്ങൾ തന്നെയാണ്.

Year : 2017
Run Time : 1h 30min

🔻നാട്ടിലേക്ക് ഫ്‌ളൈറ്റ് വഴി മടങ്ങിവരുന്ന ഒരു സർജനിൽ നിന്നാണ് കഥ തുടങ്ങുന്നത്. നാട്ടിലെത്തിയ ശേഷം പ്രിയപ്പെട്ടവരെ കാണാനായി ഇറങ്ങുന്ന യങിന് കാണേണ്ടി വന്നത് ഒരു ദുരന്തകാഴ്ചയാണ്. അവിടെ അയാൾ വീണ്ടും ഉറക്കം ഉണരുന്നു. തുടർന്ന് സമയത്തിന്റെ കബളിപ്പിക്കലിൽ അയാൾ പെട്ടുപോവുന്നു.

🔻തുടക്കം മുതൽ തന്നെ ആഖ്യാനത്തിലൂടെ കാണികളെ കയ്യിലെടുത്താണ് കഥയുടെ പോക്ക്. ഒരുപക്ഷെ ഒരു നിമിഷം പോലും നമ്മുടെ ശ്രദ്ധ കഥയിൽ നിന്ന് വഴുതി മാറാത്ത വിധം വേഗതയിലുള്ള അവതരണം. അതിനൊപ്പം അപ്രതീക്ഷിതമായ ചില എലമെന്റുകൾ കൂടി ഇടയ്ക്കിടെ ഇട്ടുതരുന്നതോടെ കാര്യങ്ങൾ കൂടുതൽ interesting ആവുന്നുണ്ട്. അവിടെയാണ് ടൈം-ലൂപ്പ് അൽപ്പം പുതുമ നൽകുന്നത്.

🔻ലളിതമായ കഥയാണ് ചിത്രത്തിന്റേത്. എന്നാൽ അവതരണത്തിൽ അത്തരത്തിലൊരു ചിന്ത നമ്മിൽ ജനിപ്പിക്കുന്നില്ല സംവിധായകൻ. ഓരോ നിമിഷവും നമ്മെക്കൊണ്ട് ചിന്തിപ്പിച്ചുകൊണ്ടിരിക്കുന്നിടത്താണ് അദ്ദേഹത്തിന്റെ മിടുക്ക് അനുഭവിക്കാൻ സാധിക്കുക. കഥാപാത്രങ്ങളെ അത്ര നന്നായി ബന്ധിപ്പിക്കുന്നുണ്ട് ആ ചെറിയ കഥയിലൂടെ. ഒപ്പം പല ഇമോഷനുകളും കൃത്യമായി ബ്ലെൻഡ് ചെയ്ത് പോവാനും സാധിച്ചിട്ടുണ്ട് എന്നത് ശ്രദ്ധേയമാണ്.

🔻ഗംഭീര പ്രകടനങ്ങളാണ് ചിത്രത്തിന്റെ മറ്റൊരു കരുത്ത്. ആ കഥാപാത്രങ്ങൾ എത്ര effective ആയാണ് കഥയിലേക്ക് ഇഴുകിച്ചേരുന്നതെന്ന് കണ്ടറിയണം. അത്ര മികവ് പുലർത്തുന്നുണ്ട് അഭിനേതാക്കൾ. ഒപ്പം ചടുലതയേറിയ എഡിറ്റിംഗും ആസ്വാദനത്തിന് മുതൽക്കൂട്ടാണ്.

🔻ＦＩＮＡＬ ＶＥＲＤＩＣＴ🔻

ടൈം-ലൂപ്പ് കൺസെപ്റ്റിൽ തന്നെ അൽപ്പം വ്യത്യസ്തത പുലർത്തുന്ന ചിത്രമെന്ന നിലയിൽ നല്ലൊരു അനുഭവമാണ് 'A Day' സമ്മാനിച്ചത്. ഒന്നര മണിക്കൂറിൽ തൃപ്തികരമായ ആസ്വാദനം പ്രദാനം ചെയ്യുന്ന ചിത്രം തീർച്ചയായും നിരാശ നൽകാത്ത ഒന്നാവും.

ＡＢ ＲＡＴＥＳ ★★★½

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻ഒരു ത്രില്ലർ ജേണറിലുള്ള സിനിമയിൽ ഹ്യൂമർ കണ്ടന്റ് കൊണ്ടുവരികയെന്നത് വളരെ ശ്രമകരമായ കാര്യമാണ്. അത്തരത്തിലുള്ള സിനിമകൾ അധികം കണ്ടിട്ട് പരിചയിച്ചിട്ടുമില്ല. അല്ലെങ്കിൽ പലതിലും ത്രിൽ ഫാക്റ്ററുകളുടെ രസം  കെടുത്തുന്ന ഒന്നായി മാറും ഹ്യൂമർ കണ്ടന്റ്. എന്നാൽ ഈ സിനിമയിൽ നമുക്ക് കാണാനാവുക ത്രില്ലിന്റെയും ഹ്യൂമറിന്റെയും പെർഫെക്റ്റ് ബ്ലെന്റ് ആണ്. അതാണ് മറ്റ് ത്രില്ലറുകളിൽ നിന്ന് ഈ ചിത്രത്തെ വേറിട്ട് നിർത്തുന്നതും.

Year : 2019
Run Time : 2h 28min

🔻സസ്പെൻസ്-ത്രില്ലർ സിനിമകളുടെ കഥ പറയുന്നത്/അറിയുന്നത് പോലെ ദേഷ്യമുള്ള മറ്റൊരു സംഗതി ഇല്ല. എല്ലാവർക്കും അങ്ങനെയാവണമെന്നില്ല. എന്റെ കാര്യമങ്ങനെയായത് കൊണ്ട് കഥയിലേക്ക് കടക്കുന്നില്ല. ഫ്രഷ് ആയി അപ്രോച്ച് ചെയ്യുന്നതാണ് ഇനി കാണാനുള്ളവർക്ക് ഗുണകരം. ആദ്യ 30 മിനിറ്റ് ഇടവേളയില്ലാതെ ചിരിപ്പിച്ച് മനസ്സ് കൂളാക്കിയതിന് ശേഷം പിന്നീട് കാഴ്ച വെക്കുന്നത് ഒരു ഗംഭീര സിനിമാനുഭവം തന്നെയാണ്. ഒരുപക്ഷെ രാക്ഷസന് ശേഷം ഏറ്റവും  ത്രില്ലടിപ്പിക്കുകയും ഇഷ്ടപ്പെടുകയും ചെയ്ത സിനിമയായി മാറി ഈ Sherlock Holmes Adaptation.

🔻പറയാനുദ്ദേശിച്ച കഥക്ക് ആവശ്യമായ രംഗങ്ങൾ മാത്രമാണ് സിനിമയിൽ ഉള്ളത്. നായകൻ എത്ര ബ്രില്യന്റ് ആണെന്ന് കാണിക്കേണ്ടത് ആവശ്യമായത് കൊണ്ട് തന്നെ അതിനായി കുറച്ച് രംഗങ്ങൾ ഉണ്ട്. എന്നാൽ അത് പിന്നീട് സഹായകമാവുന്നുണ്ട്. തുടർന്ന് ട്രാക്കിലേക്ക് പ്രവേശിക്കുമ്പോൾ ഒരിക്കൽ പോലും വഴുതി മാറാത്ത വിധം ടൈറ്റ് ആവുന്നുണ്ട് തിരക്കഥ. കൈകാര്യം ചെയ്യുന്നതും മികച്ച തീം തന്നെയാണ്. കൂടെ തൃപ്തികരമായ സസ്‌പെൻസും  കൂടിയാവുമ്പോൾ നാമറിയാതെ തന്നെ ഗംഭീരമെന്ന് പറഞ്ഞുപോവും. ലൂപ്പ് ഹോളുകൾ ഒന്നും തോന്നാത്ത വിധം വേഗതയേറിയ കഥപറച്ചിൽ തന്നെയാണ് സിനിമയുടെ ഹൈലൈറ്റ്.

🔻നായകൻ ജയിലിൽ കിടക്കുമ്പോൾ കൂട്ടുകാരൻ ജാമ്യത്തിലെടുക്കാൻ വരുന്ന സമയത്ത് പറയുന്നൊരു ഡയലോഗുണ്ട്. എന്ത് പറയണം എന്നറിയില്ല. സാക്ഷാൽ ഹോളിവുഡ് ഷെർലോക്ക് പറയുന്നത് പോലെ തന്നെ തന്നെ തോന്നിപ്പോവും. അമ്മാതിരി പെർഫെക്ഷൻ ആണ് ആ കഥാപാത്രത്തിന് നായകൻ നൽകിയിരിക്കുന്നത്. അദ്ദേഹം കൂടി ഭാഗമായ തിരക്കഥയിൽ അദ്ദേഹത്തിന് വേണ്ടി സൃഷ്ടിച്ച റോൾ പോലെ തോന്നും ആത്രേയയുടെ കഥാപാത്രം. അതിഗംഭീര പ്രകടനം തന്നെ. ഡയലോഗ് ഡെലിവറിയും കോമിക് ടൈമിങ്ങുമെല്ലാം അപാരം തന്നെ. കൂടെയുള്ളവരെയെല്ലാം നിഷ്പ്രഭമാക്കിയ പ്രകടനമെന്നെ പറയാനാവൂ.

🔻പശ്ചാത്തലസംഗീതവും ചടുലത നിറഞ്ഞ എഡിറ്റിംഗും ആസ്വാദനത്തിന് വലിയ പങ്ക് വഹിച്ചിട്ടുണ്ട്. ത്രില്ലർ എന്ന നിലയിൽ തിരക്കഥക്ക് യോജിക്കും വിധം മികവ് പുലർത്തി. ഒപ്പം ക്യാമറ വർക്കുകളും. ഡാർക്ക് ആവേണ്ട സ്ഥലങ്ങളിൽ അതിനൊത്ത ഫീൽ നൽകുന്നുണ്ട് ഛായാഗ്രഹണം.

🔻ＦＩＮＡＬ ＶＥＲＤＩＣＴ🔻

Brilliant Brilliant Brillinat. ഇതിനപ്പുറം ഒന്നും പറയുന്നില്ല. തീർച്ചയായും ആത്രേയ മികച്ച അനുഭവം തന്നെയാവുമെന്ന കാര്യത്തിൽ യാതൊരു സംശയവും ഇല്ല. ഈ കഥാപാത്രത്തെ ലീഡ് ആക്കിയുള്ള അടുത്ത സിനിമകൾക്കായി അക്ഷമയോടെ കാത്തിരിപ്പ് തുടരുന്നു.

ＡＢ ＲＡＴＥＳ ★★★★☆

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

"ഭക്ഷണം വായിൽ വെച്ച് തരാം. അത് ചവച്ച് തരാൻ പറയരുത്."


ഏതാണ്ട് 2011ഓടെയാണ് മലയാളസിനിമയിൽ മാറ്റത്തിന്റെ കാറ്റ് വീശാൻ തുടങ്ങിയത്. പതിവ് ഫോർമുലകളിൽ നിന്നും താരകേന്ദ്രീകൃത സിനിമകളിൽ നിന്നുമൊക്കെ മാറ്റം കണ്ടെത്താൻ ഒരുപറ്റം യുവനിരക്ക് കഴിഞ്ഞു എന്നതാണ് സത്യം. കഥയിലേക്ക് അധികം കേന്ദ്രീകരിക്കാതെ, സംഭാഷണങ്ങളെ മാത്രം ആശ്രയിക്കാതെ ദൃശ്യശൈലിയിലൂടെ കഥ പറഞ്ഞ സിനിമകൾ മലയാളസിനിമയുടെ മുന്നോട്ടുള്ള പ്രയാണത്തിന് ശക്തമായ പിന്തുണ നൽകിയിട്ടുണ്ട്. ലിജോ ജോസ് പെല്ലിശേരിയും ആഷിക്ക് അബുവും സമീർ താഹിറും അമൽ നീരദുമൊക്കെ ആ ശ്രേണിയിൽ പെടുന്നവരാണ്. സ്പൂൺ ഫീഡിങ്ങ് പരമാവധി ഒഴിവാക്കി സംവിധായകരുടെ ആവിഷ്കാരസ്വാതന്ത്ര്യം നടപ്പിലാക്കാനുള്ള ശ്രമങ്ങൾ നടന്നുകൊണ്ടിരുന്നു ആ കാലഘട്ടത്തിൽ. എന്നാൽ ഇവരിലെല്ലാം ഒരുപോലെ കാണാൻ കഴിയുന്ന ഒരു ഘടകം കൂടിയുണ്ട്. മലയാളസിനിമയുടെ മാറ്റത്തിനൊപ്പം സഞ്ചരിച്ച് നവശൈലീസിനിമകൾക്ക് മുഖമേകുന്നതിൽ മുൻനിരയിലുണ്ടായിരുന്ന നടൻ. ഫഹദ് ഫാസിൽ അഥവാ ഷാനു.

മലയാളികളുടെ സ്വന്തം ലാലേട്ടനെ സിനിമയിലേക്ക് കൈപിടിച്ചുകയറ്റിയ ഫാസിൽ തന്നെയായിരുന്നു ഫഹദിനെയും മലയാളികൾക്ക് മുന്നിൽ അവതരിപ്പിച്ചത്. അതുവരെയുള്ള കാമുകസങ്കൽപങ്ങൾക്കും പാകമായ മുഖമായിരുന്നു ഫഹദിന്റേത്. നിഷ്കളങ്കത തുളുമ്പുന്ന മുഖവും പ്രണയം തുടിക്കുന്ന കണ്ണുകളും ഏതാണ്ട് പല സിനിമകളിലെയും കുഞ്ചാക്കോ ബോബനെ അനുസ്മരിപ്പിക്കുന്നുണ്ട്. എന്നാൽ അടിതെറ്റി വീണ അരങ്ങേറ്റമായിരുന്നു ഫഹദിന്റേത്. സിനിമയെക്കുറിച്ചോ അഭിനയത്തേയോക്കുറിച്ചോ വേണ്ടത്ര ബോധമില്ലാതെ ആദ്യസിനിമ ചെയ്ത ഫഹദിന് പലരിൽ നിന്നും പഴി കേൾക്കേണ്ടി വന്നു. ഒരുപക്ഷെ ആദ്യചിത്രം തന്നെ തന്റെ കരിയറിന്റെ അന്ത്യം കുറിച്ചെന്ന തോന്നൽ ഫഹദിനുണ്ടായിക്കാണും. അതുകൊണ്ടാവാം അഭിനയത്തിൽ നിന്ന് പിൻവാങ്ങുകയും പഠനത്തിൽ കൂടുതൽ കേന്ദ്രീകരിക്കാനും തുടങ്ങിയത്.

പിന്നീട് ഫഹദിനെ മലയാളികൾ കണ്ടത് ഏഴ് വർഷങ്ങൾക്ക് ശേഷമാണ്. ചെറിയ വേഷങ്ങളണിഞ്ഞ് പ്രമാണിയിലും കേരള കഫേയിലും സ്‌ക്രീനിലെത്തിയപ്പോൾ അഭിനയത്തിലും ശരീരത്തിലും പക്വത രൂപപ്പെട്ടിരുന്നു. ഇരു സിനിമകളിലെയും സ്വാഭാവിക അഭിനയത്തിൽ ആ പക്വത പ്രകടമായിരുന്നു. എന്നാൽ ആ പഴയ ഫഹദല്ല ഏഴ് വർഷങ്ങൾക്ക് ശേഷം തിരിച്ചുവന്നിരിക്കുന്നത് എന്ന് ഊട്ടിയുറപ്പിച്ച് പറയാൻ സാധിച്ചത് 'ചാപ്പാക്കുരിശി'ലെ അർജുൻ എന്ന കഥാപാത്രത്തിലൂടെയാണ്. സച്ചിൻ എന്ന ചോക്ലേറ്റ് ബോയ്യിൽ നിന്നും അർജുൻ എന്ന നാഗരികയുവാവിലേക്കുള്ള പാകപ്പെടൽ ആ സിനിമയിൽ നിന്ന് വ്യക്തമായിരുന്നു. തൻറെ സംസാരത്തിലും ശരീരഭാഷ്യത്തിലുമൊക്കെ ആ പാകപ്പെടൽ സ്വാഭാവികമായി കൊണ്ടുവരിക, അല്ലെങ്കിൽ അതുപോലെ പെരുമാറുക എന്ന ദൗത്യം ഭംഗിയായി നിർവ്വഹിക്കുകയായിരുന്നു ഫഹദ് എന്ന നടൻ. ഏഴ് വർഷക്കാലം ഒരു വ്യക്തിയിലുണ്ടായ മാറ്റങ്ങൾ പിന്നീടുള്ള തന്റെ ഓരോ കഥാപാത്രങ്ങളിലും പ്രകടമാക്കിയിട്ടുള്ള 'നടനാ'ണു ഫഹദ്.

2011 മുതൽ ഈ വർഷം വരെയുള്ള സിനിമകളുടെ സഞ്ചാരം നോക്കിയാൽ മനസ്സിലാവുന്ന ഒന്നുണ്ട്. ഇൻഡസ്ട്രിക്ക് പുതിയ രുചികളും പുതുപരീക്ഷണങ്ങളും പരിചയപ്പെടുത്തി മലയാളസിനിമക്ക് പുതിയ ഭാഷ്യം സമ്മാനിച്ച കാലഘട്ടത്തിലൂടെയായിരുന്നു നമ്മുടെ പോക്ക്. പരീക്ഷണസിനിമകളുടെ ഒരു നിര തന്നെ എടുത്ത് കാട്ടാനുണ്ട് ഈ കാലഘട്ടത്തിൽ. അവയിലെല്ലാം ഏറ്റവും കൂടുതൽ പരീക്ഷണങ്ങൾക്ക് വിധേയനായ നടൻ ഏതാണെന്ന് ചോദിച്ചാൽ ഒറ്റ ഉത്തരമേ കാണൂ. അത് ഫഹദ് ഫാസിലാണ്. അതുവരെയുണ്ടായിരുന്ന പഴഞ്ചൻ ഫോർമുലകളെ പാടെ പിഴുതുമാറ്റി മലയാളസിനിമക്ക് പരിചിതമല്ലാത്ത ഒരു പുതുവഴി വെട്ടിയിട്ട ചെറുപ്പക്കാർ ഏറ്റവും കൂടുതൽ തവണ പരീക്ഷണം നടത്തിയിട്ടുള്ളത് ഈ നടനിലാണെന്ന് പറയേണ്ടി വരും. ഡയലോഗുകളേക്കാൾ ദൃശ്യങ്ങൾ കഥപറഞ്ഞ സിനിമകളിൽ പലവുരു ആവർത്തിക്കപ്പെട്ടു മുഖം ഫഹദിന്റേതാണ്.

ചാപ്പാകുരിശിന് ശേഷം ഫഹദ് ഞെട്ടിച്ചത് ആരും കൈവെക്കാൻ മടിക്കുന്ന സിറിൽ എബ്രഹാമിന്റെ വേഷപ്പകർച്ചയിലൂടെയാണ്. 22 FK എന്ന ഫീമെയിൽ ഓറിയന്റഡ് സബ്ജെക്റ്റിൽ വില്ലനായി അഭിനയിച്ചപ്പോൾ അസാധ്യ പ്രകടനമാണ് ഫഹദ് കാഴ്ചവെച്ചത്. വില്ലനിസം നിറഞ്ഞ പാവത്താനായി നിറഞ്ഞാടിയപ്പോൾ ക്ലൈമാക്സിലെ നോട്ടവും ആ മുഖഭാവവുമൊക്കെ വേട്ടയാടുന്ന ഒന്നായി മാറി. ഒരുപക്ഷെ നായികയെ കവച്ചുവെക്കുന്ന പ്രകടനം എന്നുതന്നെ പറയാം.

പിന്നീട് കണ്ടത് മലയാളിയായ അരുൺ കുമാറെന്ന ധൂർത്തൻ ഡോക്ടറിന്റെ പ്രവാസവാസമാണ്. ഏതൊരു ടിപ്പിക്കൽ മലയാളിയുവാക്കളുടെയും പ്രതീകമായിരുന്നു ഒരുതരത്തിൽ ആ കഥാപാത്രം. പല അവാർഡുകൾക്കും അർഹമായ ആ വേഷം ഒരു വെല്ലുവിളിയും ഇല്ലാതെതന്നെ ഭംഗിയാക്കുകയായിരുന്നു ഫഹദ്. പിന്നീട് ആലപ്പുഴയിലെ ഓട്ടോറിക്ഷക്കാരനായും രംഗപ്രവേശം ചെയ്തപ്പോൾ തന്മയത്വത്തോടെ ആ കഥാപാത്രവും ഭംഗിയാക്കി. അതിനുശേഷം വന്ന കുറച്ച് ചിത്രങ്ങളിൽ ഫഹദിന്റെ കരിയറിലെ നിർണ്ണായക കഥാപാത്രങ്ങളാണ് പതിയിരുന്നത്.


കണ്ടവരാരും മറക്കാൻ തരമില്ലാത്ത കഥാപാത്രമായിരുന്നു 'അന്നയും റസൂലും സിനിമയിലെ റസൂൽ. നിഷ്കളങ്കത തന്റെ വാക്കിലും നോക്കിലും പ്രകടമാക്കിയ ആ കഥാപാത്രത്തെ ഗംഭീരമാക്കുകയായിരുന്നു ഫഹദ് ചെയ്തത്. റിയലിസ്റ്റിക്ക് സിനിമകൾ എന്തെന്ന് മലയാളികൾ രുചിച്ച ആ ചിത്രം ഫഹദിന്റെ കരിയറിലെ പൊൻതൂവൽ തന്നെയാണ്. പിന്നീട് വന്നത്‍ 'നത്തോലി ഒരു ചെറിയ മീനല്ല' എന്ന വലിയ പരീക്ഷണവുമായാണ്. നിസ്സഹായതയിൽ കുറ്റം പറയുന്നവരോട് എഴുത്തിലൂടെ പ്രതികാരം ചെയ്യുന്ന പ്രേമനും നരേന്ദ്രനും ഒറ്റ സിനിമയിലൂടെ ചേക്കേറിയപ്പോൾ സിനിമ ശ്രദ്ധിക്കപ്പെടാതെ പോയി. എങ്കിലും ഇപ്പോഴും എന്റെ ഇഷ്ടചിത്രങ്ങളിൽ ഒന്നാണ് നത്തോലി.

അവതരണത്തിലെ പാളിച്ചകൾ കൊണ്ട് മോശം അഭിപ്രായം കേട്ട സിനിമയായിരുന്നു 'റെഡ് വൈൻ'. എന്നാൽ അതിലെ സഖാവ് അനൂപ് ഇന്നും മറക്കാൻ സാധിക്കാത്ത കഥാപാത്രമാണ്. ഒരുപക്ഷെ മലയാളസിനിമകളിൽ വന്നുപോയതിൽ എനിക്ക് ഏറ്റവും ഇഷ്ടം തോന്നിയിട്ടുള്ള സഖാവ്, അത് അനൂപാണ്. യാതൊരു നാടകീയതോ അതിഭാവുകത്വമോ ഇല്ലാതെ വളരെ സ്വാഭാവികമായ നിലകൊണ്ട കഥാപാത്രം. ഇപ്പോഴുള്ള കുട്ടിസഖാക്കൾക്ക് മാത്രകയാക്കാൻ പറ്റിയ സഖാവാണ് അനൂപ്.

2012ൽ ഏതാണ്ട് 12 സിനിമകൾ ഫഹദിന്റേതായി ഇറങ്ങിയപ്പോൾ അവയിൽ ഭൂരിഭാഗവും ബോക്സ് ഓഫിസിൽ ഗതി പിടിക്കാതെ പോയി. എന്നാൽ പല ചിത്രങ്ങളിലും ഫഹദിന്റെ കഥാപാത്രം ഇന്നും മനസ്സിൽ നിൽക്കുന്നതാണ്. 'ആമേനി'ലെ സോളമൻ എന്ന ഉൾവലിഞ്ഞ കാമുകന് എന്ത് ഭാവഭദ്രമായാണ് ഫഹദ് ജീവൻ പകർന്നത്. ഒരു നാട്ടിൻപുറത്തുകാരനായി അതിവേഗം പാകപ്പെട്ടത്. ലിജോ ജോസിന്റെ മാന്ത്രികസ്പർശമേറ്റ ചിത്രത്തിലെ സോളമൻ എന്ന കഥാപാത്രം ഫഹദിന്റെ കരിയറിലെയും വൈവിധ്യം നിറഞ്ഞ ഒന്നായി. അതിന് ശേഷം 'ഇമ്മാനുവലിലെ' ജീവൻ എന്ന നെഗറ്റീവ് ഷെയ്ഡ് ഉള്ള കഥാപാത്രമായും മമ്മൂക്കക്കെതിരെ ഒപ്പത്തിനൊപ്പം നിന്നു.

'ആർട്ടിസ്റ്റ്, നോർത്ത് 24 കാതം' എന്നീ ചിത്രങ്ങൾ ഫഹദിന് മികച്ച നടനുളള കേരള സ്റ്റേറ്റ് അവാർഡിന് അർഹനാക്കിയതാണ്. രണ്ടും വ്യത്യസ്ത വേഷങ്ങൾ. ആർട്ടിസ്റ്റിലെ 'മൈക്കിളഞ്ചലോയെ' കണ്ടവരാരും മറക്കാൻ സാധ്യതയില്ല. പല വൈകാരിക മുഹൂർത്തങ്ങളിലൂടെ പോവുമ്പോഴും ഭാവഭദ്രത ആ കഥാപാത്രത്തിൽ പ്രകടമായിരുന്നു. അവസാനരംഗങ്ങളിലുള്ള തന്റെ പ്രകടനം കൊണ്ട് കാണികളെ സ്തബ്ദരാക്കി കളഞ്ഞു ഫഹദ്. നോർത്ത് 24 കാതത്തിലെ 'ഹരികൃഷ്ണനും എന്ന കഥാപാത്രത്തെ വളരെ രസകരമാക്കി അവതരിപ്പിക്കുന്നതിലും ഫഹദ് വിജയിച്ചു.

കോമഡി വഴങ്ങില്ലെന്ന് പറഞ്ഞവർക്കുള്ള മറുപടിയായിരുന്നു ഇന്ത്യൻ പ്രണയകഥയിലെ അയ്മനം സിദ്ധാർത്ഥൻ എന്ന കൗശലക്കാരനായ രാഷ്ട്രീയക്കാരൻ. തന്റേതായ മാനറിസങ്ങളിലൂടെ സിനിമയിലുടനീളം ചിരിപ്പിക്കാനായി ഫഹദിന്. അതിന് ശേഷം പൗരുഷത്തിന്റെ പ്രതിരൂപമായ അലോഷിയെ സ്‌ക്രീനിൽ ഗംഭീരമാക്കിയടുത്ത് വീണ്ടും കയ്യടി നേടി. ബാംഗ്ലൂർ ഡെയ്സിലെ ദാസിലൂടെ വീണ്ടും ഉൾവലിഞ്ഞ വേഷത്തിലേക്ക് ചേക്കേറിയപ്പോൾ ഒരുപാട് രഹസ്യങ്ങൾ ഒളിപ്പിച്ച ആ കഥാപാത്രമായി പക്വതയോടെ പെരുമാറുകയായിരുന്നു അദ്ദേഹം.

കൊമേഴ്ഷ്യൽ സിനിമകളിൽ കൈവെക്കാൻ നോക്കിയപ്പോൾ കൈപൊള്ളാനായിരുന്നു ഫഹദിന്റെ വിധി. സിനിമകൾ ഭൂരിഭാഗവും ബോക്സ്ഓഫീസിൽ കരകയറാതിരിക്കുകയും തുടർപരാജയങ്ങളിലേക്ക് നയിക്കുകയും ചെയ്തു. ആ സമയത്ത് സ്വയം പിന്നിലേക്ക് വലിഞ്ഞ് കുറച്ച് ഗ്യാപ് എടുത്ത അദ്ദേഹം പിന്നീട് നടത്തിയത് തന്റെ കരിയറിലെ തന്നെ ഏറ്റവും വലിയ മുന്നേറ്റമാണ്. ബോക്സ് ഓഫീസ് സക്സസ് ഇല്ലെന്ന് പറഞ്ഞവർക്കുള്ള ഉത്തരമായും, ഏതൊരാൾക്കും ഇഷ്ടപ്പെടുന്ന ചിത്രമായും 'മഹേഷിന്റെ പ്രതികാരം' അവതരിച്ചു. ഒരിടവേളക്ക് ശേഷം തന്റെ തിരിച്ചുവരവ് വ്യക്തമായി രേഖപ്പെടുത്തുകയായിരുന്നു ഫഹദ്.

ആ വർഷത്തെ സാമ്പത്തിക വിജയങ്ങളിൽ ഒന്നായി മാറിയ മഹേഷ് അവാർഡുകളും വാരിക്കൂട്ടി. ഫഹദ് ഫാസിലിന് ഒരു ബ്രേക്‌ത്രൂ ആവാൻ മഹേഷിനെക്കൊണ്ട് സാധിച്ചു. മഹേഷ് ഭാവന എന്ന ഫോട്ടോഗ്രാഫർ ഇന്നും മലയാളികൾക്ക് പ്രിയപ്പെട്ടവനാണ്. മനസ്സിൽ തങ്ങിനിൽക്കുന്ന എത്രയെത്ര മുഹൂർത്തങ്ങൾ. സംഘർഷകലുഷമായ തന്റെ മനസ്സും ഉൾവ്യഥയുമൊക്കെ ഒരു ചിരിയിലൂടെ പ്രേക്ഷകരിലേക്ക് പകർന്നിടത്താണ് ഫഹദ് വിജയിക്കുന്നത്. മറ്റുള്ള സമകാലീകാർക്ക് മാതൃകയാവുന്നത്.

മുറിവേറ്റ വിജയം കൈവരിച്ചവനിൽ നിന്ന് രക്ഷാദൗത്യത്തിന് ചുക്കാൻ പിടിക്കുന്ന മനോജിലേക്ക് എത്തിയപ്പോൾ തുച്ഛമായ സമയം സ്‌ക്രീനിൽ ചെലവഴിച്ചുകൊണ്ട് കയ്യടി കൊണ്ടുപോവുകയായിരുന്നു.തന്റേതായ മാനറിസവും ഡയലോഗ് ഡെലിവറിയും കൊണ്ട് വേറിട്ടതാക്കി. പിന്നീട് തന്റെ കരിയറിലെ ഏറ്റവും സങ്കീർണ്ണമായ കഥാപാത്രവുമായി എത്തി അത്ഭുതപ്പെടുത്തി.

മാന്ത്രികന്റെ കൗശലവിദ്യയുള്ള കള്ളൻ പ്രസാദ്. ഞൊടിയിടയിൽ ഭാവമാറ്റങ്ങൾ കൊണ്ടും ഭിന്നവികാരങ്ങളിലേക്കുള്ള മാറിമറിയലുകൾ കൊണ്ടും പകരം വെക്കാനില്ലാത്ത നടനായി മാറുന്നുണ്ട് ഫഹദ്. ഒരേസമയം അനേകം വികാരങ്ങൾ വെച്ചുമാറുന്ന കഥാപാത്രങ്ങൾ ചെയ്യാൻ യുവനിരയിൽ മറ്റാരുണ്ടെന്ന ചോദ്യം ബാക്കിവെക്കുകയാണ് കള്ളൻ പ്രസാദിലൂടെ ഫഹദ്. നാഷണൽ അവാർഡിന് വരെ അർഹമായ ആ കഥാപാത്രം 2017ലെ തന്നെ ഏറ്റവും സമീപ വർഷങ്ങളിലെ തന്നെ ഏറ്റവും മികച്ചതെന്ന് നിസ്സംശയം പറയാം.


വേലൈക്കാരനിലൂടെ തമിഴകത്തും തന്റെ സാന്നിധ്യം അറിയിച്ചു ഫഹദ്. ശിവകാർത്തികേയനൊപ്പം കിടിലൻ വില്ലൻ കഥാപാത്രമായി സിനിമയിലുടനീളം നിറഞ്ഞ് നിന്നു. തമിഴകത്തിന്റെ പ്രശംസക്കും അർഹമായി ആ കഥാപാത്രം. ഒരുതരത്തിൽ അവസാനമൊഴികെ മറ്റെല്ലായിടത്തും നായകനെ കവച്ചുവെക്കുന്ന വില്ലനിസമായിരുന്നു ഫഹദിൽ.

വേണുവെന്ന സംവിധായകൻ തന്റെ ഏറ്റവും പുതിയ സൃഷ്ടിയായ 'കാർബണി'ലേക്ക് ഫഹദിനെ കാസ്റ്റ് ചെയ്തത് ആ കഥാപാത്രത്തിന്റെ കാഠിന്യവും ഫഹദിന്റെ കഴിവും വിളിച്ചോതുന്നു. ജീവിതത്തെ ഫാന്റസിയായി കാണുന്ന സിബിയെ എത്ര ഗംഭീരമായിട്ടാണ് ഫഹദ് തിരശീലയിൽ അവതരിപ്പിച്ചത്. അവസാനരംഗങ്ങളിലൊക്കെയും ഒറ്റയാൾ പ്രകടനം കൊണ്ട് ഞെട്ടിച്ചു കളയുന്നുണ്ട് പലപ്പോഴും.

അമൽ നീരദിനൊപ്പമുള്ള വരത്തനിൽ അഭിനയപ്രാധാന്യമുള്ള  കഥാപാത്രമായി തോന്നില്ലെങ്കിൽ കൂടി ആക്ഷൻ സീനുകളിലെ പ്രാവീണ്യം പറയാതെ വയ്യ. ആ രംഗങ്ങളിൽ സാധാരണ ഒരു നടനിലെ സ്‌ട്രെയിൻ അവരുടെ മുഖത്ത് പ്രകടമാവുമെങ്കിൽ അതില്ലാത്തിടത്താണ് ഫഹദിന്റെ വിജയം. ഒരു കൂസലുമില്ലാതെ അപാര മെയ്‌വഴക്കത്തോടെ അവയോരോന്നും ഗംഭീരമാക്കി. അതിരനിലും ഇത് തന്നെയാണ് കാണാനാവുക. രണ്ട് ചിത്രങ്ങളിലും നായികാപ്രാധാന്യമുള്ള കഥകളാണെങ്കിൽ കൂടി അവസാനത്തേക്കടുക്കുമ്പോൾ കാണികളെ കയ്യിലെടുക്കുന്നുണ്ട് ഫഹദ്. ആക്ഷൻ രംഗങ്ങളിൽ മറ്റാരേക്കാളും ത്രസിപ്പിക്കുന്ന അവതരണമാവുന്നുണ്ട് ഫഹദിന്റേത്.

സത്യൻ അന്തിക്കാടിന്റെയും ശ്രീനിവാസന്റെയും തിരിച്ചുവരവ് എന്ന് വിശേഷിപ്പിക്കാവുന്ന 'ഞാൻ പ്രകാശനി'ൽ ഫഹദിന്റെ പ്രകടനം ശ്രദ്ധേയമാണ്. ഒരുപക്ഷെ കോമഡി ക്യാരക്ടറുകൾ അധികം ചെയ്തിട്ടില്ലാത്തത് കൊണ്ടാവാം പ്രകാശനിൽ പൂർണ്ണത കൈവരിക്കാത്തതായി തോന്നിയത്. പോരായ്മകൾ ഒന്നോ രണ്ടോ രംഗങ്ങളിൽ മാത്രമായി ചുരുങ്ങിയ കാര്യവും ഓർമ്മപ്പെടുത്തുന്നു. കഥാപാത്രം ആവശ്യപ്പെടുന്നതനുസരിച്ച് ഉടായിപ്പ് മുഖത്തും ശരീരത്തിലും ഒരുപോലെ കൊണ്ടുനടന്നിടത്ത് പ്രകാശൻ ഒരു വിജയമാവുന്നുണ്ട്. ചെറു പോരായ്മകൾ ഉണ്ടെങ്കിൽ കൂടി അവയൊന്നും വലിയ ഇമ്പാക്ട് ഉണ്ടാക്കാത്ത വിധം ഭംഗിയാക്കിയിട്ടുണ്ട് ഫഹദെന്ന പ്രതിഭ.

കുമ്പളങ്ങിയിലെ ഷമ്മിയെ പറ്റി പറയാൻ തുടങ്ങിയാൽ അതൊരു ഉപന്യാസത്തിലാവും അവസാനിക്കുക. Male Chauvinismത്തിന്റെ ആൾ മാതൃകയാണ് ഷമ്മി. തന്നിലെ താരത്തെക്കാൾ നടനെയാണ് ഫഹദ് മുൻഗണന നൽകുന്നതെന്നതിനുള്ള ഉത്തമ ഉദാഹരണം കൂടിയാണ് ഷമ്മി. കള്ളൻ പ്രസാദിന് ശേഷം കബളിപ്പിക്കുന്ന ചിരിയുമായി ഷമ്മി അരങ്ങ് വാഴുമ്പോൾ ഗംഭീരമെന്നല്ലാതെ ആ പ്രകടനത്തെ വിശേഷിപ്പിക്കാൻ വാക്കുകളില്ല. ഒരുപക്ഷെ ഫഹദിന്റെ പ്രകടനത്തിലൂടെ പകരം വെക്കാനില്ലാത്ത, മുൻ മാതൃകകൾ തൊട്ടുതീണ്ടിയിട്ടില്ലാത്ത ഒരു കഥാപാത്രം കൂടി മലയാളികൾക്കു ലഭിച്ചു എന്ന് വേണം പറയാൻ. ഫഹദിന് പകരം മറ്റാര് എന്നൊരു ചോദ്യം തന്നെ അവശേഷിപ്പിക്കുന്നില്ല ഷമ്മിയുടെ പെർഫെക്ഷൻ. ഫഹദിന്റെ കരിയറിലെ ഒരു പൊൻതൂവലായി മാറി ഷമ്മി.

'സൂപ്പർ ഡീലക്സ്' എന്ന ഗംഭീര ചിത്രത്തിലൂടെ തമിഴിൽ വീണ്ടും തന്റേതായ കയ്യൊപ്പ് ചാർത്തി ഫഹദ്. വിജയ് സേതുപതിയെന്ന മികവുറ്റ നടനൊപ്പം സ്‌ക്രീനിൽ തകർത്താടുകയായിരുന്നു ഫഹദ്. ഒരുപാട് പ്രശംസകൾ ഏറ്റുവാങ്ങിയ ഫഹദിന്റെ കഥാപാത്രം സിനിമ പോലെ തന്നെ മികവുറ്റ ഒന്നായി.

അൻവർ റഷീദിനൊപ്പമുള്ള 'ട്രാൻസ്' സമകാലീന മലയാള സിനിമയുടെ തന്നെ ഏറ്റവും വലിയ കാത്തിരിപ്പാവുന്നു. അല്ലെങ്കിലും പ്രതിഭകൾ ഒന്നിക്കുമ്പോൾ സിനിമാസ്നേഹികൾക്ക് കൗതുകം കൂടുക സ്വാഭാവികം. ഒരുപക്ഷെ മലയാളസിനിമയ്ക്ക് മറ്റൊരു വഴിത്തിരിവ് തന്നെ സമ്മാനിക്കുമെന്ന് വിശ്വസിക്കുന്നു. ഇനിയും അഭിനയിച്ച് ആർത്തി തീരാത്ത ഫഹദിൽ നിന്നും മികവുറ്റ കഥാപാത്രങ്ങളും സിനിമകളും ഒരുപാട് ലഭിക്കുമെന്ന ശുഭപ്രതീക്ഷ തന്റെ സമീപകാല സിനിമകളിലൂടെ ഫഹദ് സമ്മാനിക്കുന്നു. കാണികളെ തൃപ്തരാക്കുന്നത് കൂടാതെ തീയേറ്ററിലും ഫഹദിന്റെ സിനിമകൾ വൻ വിജയമാവുന്നത് ഇത് തന്നെയാണ് സൂചിപ്പിക്കുന്നത്. മറ്റാരും അസൂയയോടെ നോക്കിക്കാണുന്ന തലത്തിലേക്ക് ഫഹദെന്ന നടന്റെയും ക്രൗഡ് പുള്ളറുടെയും വളർച്ച എത്തിക്കഴിഞ്ഞു.

"കണ്ണുകൾകൊണ്ട് കഥപറയുന്നവൻ"


ഫഹദിൽ ഏറ്റവും ആകർഷകമായി തോന്നിയിട്ടുള്ളത് അദ്ദേഹത്തിന്റെ കണ്ണുകളാണ്. ഫഹദിന്റെ പല കഥാപാത്രങ്ങളൂം കണ്ണുകളിലൂടെ സംവദിക്കാറുണ്ട്. തന്റെ കണ്ണുകൾ കൊണ്ട് വികാരങ്ങളെ കാണികളിലേക്ക് എടുത്തെറിയുന്നുണ്ട് അദ്ദേഹം. റസൂലിൽ നിന്ന് തുടങ്ങുന്നു കണ്ണുകളിലൂടെയുള്ള ആ കഥപറച്ചിൽ. അന്നയോടുള്ള തന്റെ പ്രണയം മുഴുവൻ ആ കണ്ണുകളിൽ കൊണ്ടുനടക്കുന്നുണ്ട് റസൂൽ. ഓരോ നോട്ടത്തിലും അവ അന്നയിലേക്ക് പകര്ന്നുമുണ്ട്. ഒരുതരം കാന്തികശക്തിയുള്ള നോട്ടമാണ് അദ്ദേഹത്തിന്റേത്. 22 FKയിൽ ക്ലൈമാക്സിൽ അഭിനയിക്കുന്നത് അദ്ദേഹത്തിന്റെ കണ്ണുകളാണ്. ടെസ്സയോടുള്ള ദേഷ്യവും അമർഷവും ക്ഷോഭവും ആ കണ്ണിൽ കത്തിജ്വലിക്കുന്നുണ്ട്. ബോഡി ലാങ്ഗ്വേജിനേക്കാളേറെ കണ്ണുകൾ പലപ്പോഴും നിരീക്ഷണവസ്തുവാകുന്നുണ്ട്.

ആമേനിലെ സോളമനിൽ തന്റെ നിസ്സഹായാവസ്ഥ കണ്ണിൽ പേറി നടക്കുന്ന ഒരുവനായാണ് ഫഹദിനെ കാണാനാവുക. നത്തോലിയിലെ പ്രേമനിലും ഏതാണ്ട് അതുപോലെ തന്നെ. അതോടൊപ്പം ചില ഭാഗങ്ങളിൽ പകയും കാണാം. 5 സുന്ദരികളിലെ ആമിയിൽ ഫഹദിനെ പരിചയപ്പെടുത്തുന്നത് റിയർ വ്യൂ മിററിലെ നോട്ടത്തോടെയാണ്. പിന്നീടാണ് കഥാപാത്രത്തിലേക്ക് കടക്കുക. അന്ധനായിട്ട് കൂടി ആർട്ടിസ്റ്റിലെ മൈക്കിളാഞ്ചലോയിലെ നിരാശകളും സ്വപ്നങ്ങളും ആ കണ്ണുകളിൽ പ്രകടമാണ്. പൗരുഷം ഒറ്റ നോട്ടത്തിൽ തന്നെ വെളിപ്പെടുത്തുന്നവനായിരുന്നു അലോഷി.

ഫഹദിന്റെ കണ്ണുകളെ ഏറ്റവും നന്നായി ഉപയോഗിച്ച സംവിധായകൻ ദിലീഷ് പോത്തനാണ്. മഹേഷിന്റെ പ്രതികാരത്തിലും തൊണ്ടിമുതലും ദൃക്‌സാക്ഷിയിലും കഥാപാത്രത്തെ പൂർണ്ണതയിലെത്തിക്കുന്നതിൽ കണ്ണുകൾക്ക് വലിയ പങ്കുണ്ട്. മഹേഷിൽ സൗമ്യയുടെ കല്യാണദിവസമുള്ള ഒറ്റ നോട്ടം കണക്കിലെടുത്താൽ മതി. തൊണ്ടിമുതലിൽ പ്രസാദിനെ പരിചയപ്പെടുത്തുന്നത് തന്നെ കണ്ണുകളിലൂടെയാണ്. അതിനുശേഷം പലയിടങ്ങളിലും കണ്ണുകളെ ഫോക്കസ് ചെയ്തിട്ടുമുണ്ട്. കണ്ണുകൾ വരെ ഇങ്ങനെ അഭിനയിക്കുന്ന നടനെ ഫഹദിലല്ലാതെ മറ്റാരിലും കണ്ടിട്ടില്ല എന്നതാണ് സത്യം. ഷമ്മിയുടെ കണ്ണുകളിലുമുണ്ട് അത്തരത്തിൽ അർഥങ്ങൾ പേറുന്ന നോട്ടങ്ങൾ. എന്നാൽ ഷമ്മിയിൽ കണ്ണുകളേക്കാളേറെ ചിരിയിലാണ് കഥാപാത്രത്തിന്റെ വളർച്ച .ഉൾക്കൊള്ളിച്ചിരിക്കുന്നത്.

"ചിരിയിൽ വൈകാരികതകൾ പേറുന്നവൻ"


വളരെ കുറച്ച് കഥാപാത്രങ്ങളെ ചെയ്തിട്ടുള്ളൂവെങ്കിലും അതിലെല്ലാം തന്റേതായ സിഗ്നേച്ചർ പതിപ്പിച്ച നടനാണ് ഫഹദ്. അതിൽ പല കഥാപാത്രങ്ങളിലും ആവർത്തിച്ച് കണ്ടുവരുന്നതാണ് അദ്ദേഹത്തിന്റെ മുഖത്ത് വിടരുന്ന ചിരി. എന്നാൽ ഓരോ ചിരിക്കും പല വ്യാഖ്യാനങ്ങളാവും. റസൂലിൽ നിഷ്കളങ്കതയായിരുന്നുവെങ്കിൽ സിറിളിലേക്കെത്തുമ്പോൾ അടക്കാനാവാത്ത അമർശത്തിന്റെയും പരിഹാസത്തിന്റെയും ആകെത്തുകയാണ്. തോൽക്കുമ്പോൾ വരെ ചിരിച്ചുകൊണ്ട് നിൽക്കുക. വളരെ വിരളമായി മാത്രം കൊണ്ടുവരുന്നതാണ് അത്തരം മാനറിസങ്ങൾ. സഖാവ് അനൂപിലുമുണ്ടൊരു ചിരി. സൗഹൃദത്തിന്റെയും ആത്മാർത്ഥതയുടെയും അംശം അതിൽ കാണാം.

മഹേഷിലെ ചിരി ആരും മറക്കാൻ സാധ്യതയില്ലാത്തതാണ്.  ഉള്‍വ്യഥയും സംഘര്‍ഷവുമെല്ലാം ഒറ്റ ചിരിയിലൂടെ പ്രേക്ഷകരിലേക്ക് എത്തിക്കുന്നുണ്ട് മഹേഷ്. തൊണ്ടിമുതലിലെ ചെറുചിരികൾ പോലും രസമുളവാക്കുന്നവയാണ്. ചുറ്റുമുള്ളവരെ പറ്റിക്കുന്നത് ആസ്വദിച്ച് നിൽക്കുന്നുണ്ട് പലപ്പോഴും. ഇടവേളയിലെ ചിരി ആ സിനിമയിലെ തന്നെ ഏറ്റവും രസകരമായ മുഹൂർത്തമാണ് മാറി. വേലൈക്കാരനിൽ അവസാനനിമിഷം തോക്കുമ്പോഴും ആ മുഖത്ത് നിന്ന് മാറാതെ നിൽക്കുന്നൊരു ചിരിയുണ്ട്. തോൽവി വഴങ്ങിയിട്ടും തോൽക്കാൻ മനസ്സില്ലാത്തവനെ കാണാനാവുന്നുണ്ട് ആ രംഗങ്ങളിൽ. കാർബണിൽ അത്യാർത്തിയുള്ളവന് നിധികിട്ടുമ്പോഴുള്ള സന്തോഷം പല സന്ദർഭങ്ങളിൽ പല ഭാവങ്ങളിൽ എത്തിക്കുന്നുണ്ട് സിബി.

ചിരിയിൽ കള്ളൻ പ്രസാദിന്റെ മറ്റൊരു പകർപ്പാണ് ഷമ്മി. പ്രസാദിൽ കബളിപ്പിക്കുന്ന ചിരിയാണെങ്കിൽ ഷമ്മിയിൽ ദേഷ്യവും വില്ലനിസവും പോലും ചിരി അടയാളപ്പെടുത്തുന്നുണ്ട്. ആദ്യ രംഗത്തിൽ തന്നെ കണ്ണാടി നോക്കി തന്റെ ആണെന്ന പ്രിവിലേജിനെ ഉന്മാദമാകും വിധം ആസ്വദിക്കുന്നുണ്ട് ഷമ്മി. ശേഷം ഭാര്യയുമായുള്ള രംഗങ്ങളിലും കൺഫ്യൂഷൻ സൃഷ്ടിക്കും വിധം ചിരി നമ്മെ വേട്ടയാടുന്നുണ്ട്. ആ നിമിഷം ഷമ്മിയുടെ മനസ്സിലെന്താണെന്ന് ആർക്കും പ്രവചിക്കാൻ സാധിക്കാത്ത വിധം ഗംഭീരമായ പോട്രേയലിന് ആ ചിരി വഴിയൊരുക്കുന്നുണ്ട്.

"അവൻ ഊമയല്ല എരുമയായി വരെ അഭിനയിക്കും"

മറ്റ് യുവതാരങ്ങളിൽ നിന്ന് ഫഹദിനെ മാറ്റിനിർത്തുന്ന വസ്തുത എന്തെന്നാൽ തന്നിലൊരു താരത്തെ കാണാതെ, ഒരു നടനെ മാത്രം കാണുവാനേ അദ്ദേഹം ശ്രമിച്ചിട്ടുള്ളൂ എന്നതാണ്. അത്‌കൊണ്ട് തന്നെയാണ് സിനിമയുടെ എണ്ണത്തിൽ മറ്റുള്ളവരെക്കാൾ പിന്നിൽ നിൽക്കുകയും, എന്നാൽ കഥാപാത്രങ്ങളുടെ വൈവിധ്യത്തിന്റെ കാര്യത്തിൽ ബഹുദൂരം മുന്നിൽ നിൽക്കുകയും ചെയ്യുന്നത്. അർജുനിൽ തുടങ്ങി ഇപ്പോൾ ഷമ്മി വരെ എത്തിനിൽക്കുമ്പോൾ മറ്റാർക്കും താണ്ടിക്കയറാൻ കഴിയാത്തത്ര പടവുകൾ താണ്ടിക്കഴിഞ്ഞിരിക്കുന്നു ഫഹദിലെ നടൻ. നാഷണൽ അവാർഡ് ഉൾപ്പടെ പ്രമുഖ അവാർഡുകളെല്ലാം കൈപ്പിടിയിലാക്കി തന്റെ ജൈത്രയാത്ര തുടർന്നുകൊണ്ടേയിരിക്കുന്നു അദ്ദേഹം.

തന്റേതായ രീതിയിൽ വികസിപ്പിച്ചെടുത്ത ഒരുതരം ഭാവവിനിമയരീതി, അല്ലെങ്കിൽ അണ്ടർപ്ലേയിലൂടെ ഓരോ കഥാപാത്രങ്ങളെയും പകരം വെക്കാനില്ലാത്തതാക്കുന്നുണ്ട് ഫഹദ്. നമുക്ക് ചുറ്റും ഉള്ളവർ തന്നെയെന്ന് നമ്മെക്കൂടി വിശ്വസിപ്പിച്ചെടുക്കുന്ന തരത്തിൽ തന്നെത്തന്നെ ആ കഥാപാത്രമാക്കുക. ഒരാൾ അഭിനയിക്കുകയാണെന്ന് തോന്നാത്തവണ്ണം കാണികളെ വിശ്വസിചിപ്പിച്ചെടുക്കുക. ഒരു കഥാപാത്രത്തിൽ നിന്ന് മറ്റൊന്നിലേക്ക് കൂടുവിട്ട് കൂടുമാറ്റം നടത്തുമ്പോൾ അവ ഓരോന്നിലും ഭാവഭദ്രത സ്വായത്തമാക്കുന്നുണ്ട് അദ്ദേഹം.

ഒരു ചിത്രത്തിൽ നിന്ന് അടുത്തതിലേക്ക് ഭാവപ്രയാണം നടത്തുമ്പോൾ ഹർഷസംഘർഷങ്ങളിലൂടെ അനായാസേന പകർന്നാട്ടം നടത്താറുണ്ട് അദ്ദേഹം. താനെന്ന താരത്തെ നോക്കാതെ കഥാപാത്രത്തെ നോക്കി മാത്രം സിനിമ തെരഞ്ഞെടുക്കുന്നത് അദ്ദേഹത്തിന്റെ പല സിനിമകളിലും വ്യക്തമാണ്. ആമേനിൽ അവരുടെ പ്രണയമാണ് വിഷയമെങ്കിൽ അത് വളരുന്നത് കൂടെയുള്ള കഥാപാത്രങ്ങളിലൂടെയാണ്. മഹേഷിൽ പ്രതികാരം എന്ന തീം നിലനിൽക്കുമ്പോഴും മഹേഷിനെപ്പോലെ തന്നെ പ്രാധാന്യം ചുറ്റുമുള്ളവർക്കും ഉണ്ട്. ഒരു സിനിമ എത്ര മോശമായാലും ഫഹദിന്റെ അഭിനയം മോശമെന്ന ഇതുവരെ തോന്നിയിട്ടില്ല. എന്നാൽ ഫഹദ് പറയുന്നത് അങ്ങനെയല്ല.

"സിനിമ കഴിഞ്ഞ് വിളിക്കുന്നവരില്‍ നിന്ന് സിനിമ ഗംഭീരമായെന്ന് കേള്‍ക്കാനാണ് ഞാന്‍ ആഗ്രഹിക്കുന്നത്. ഞാന്‍ എങ്ങനെയുണ്ട് എന്ന് അന്വേഷിക്കാറില്ല. ഞാന്‍ നന്നായെങ്കില്‍ സിനിമയും നന്നാകും എന്നാണ് തോന്നിയിട്ടുള്ളത്. മറിയംമുക്കിലും ഗോഡ്‌സ് ഓണ്‍ കണ്‍ട്രിയിലും മണിരത്‌നത്തിലും വണ്‍ ബൈ ടുവിലും ഒക്കെ ഞാന്‍ ബോറായിട്ടുണ്ടെന്നാണ് എനിക്ക് തോന്നിയിട്ടുള്ളത്. ശ്രദ്ധിക്കപ്പെടാതെ പോയ സിനിമകളില്‍ ഞാനും മോശമായിരുന്നു എന്ന് തന്നെയാണ് തോന്നിയിട്ടുള്ളത്. എന്നെ അറിയാവുന്ന ആളുകള്‍ക്കാണ് എന്നെ നന്നായി എക്‌സ്‌പ്ലോര്‍ ചെയ്യാന്‍ പറ്റിയിട്ടുളളത് എന്ന് തോന്നുന്നു. എന്നെ അറിയാവുന്നവര്‍ക്ക് എന്ത് ചെയ്താല്‍ നന്നായിരിക്കും എന്ത് ചെയ്താല്‍ മോശമാകും എന്ന് അറിയാം. അത് സിനിമകളില്‍ വര്‍ക്ക് ചെയ്തിട്ടുമുണ്ട്."

മലയാളസിനിമ ഇപ്പോൾ ഏറ്റവും കൂടുതൽ പരീക്ഷണവസ്തു ആക്കിയിട്ടുള്ളതും ഇനിയും ഒരുപാട് പരീക്ഷണങ്ങൾ നടത്താൻ ശേഷിക്കുന്നതുമായ നടനാണ് ഫഹദ്. അദ്ദേഹം പറഞ്ഞത് പോലെ അദ്ദേഹത്തെ നേരിട്ടറിയാവുന്നവർക്കാണ് അദ്ദേഹത്തെ ഏറ്റവും നന്നായി എക്‌സ്‌പ്ലോർ ചെയ്യാൻ സാധിക്കുക. ഫാൻസ്‌ അസോസിയേഷൻ വേണ്ടെന്ന് അദ്ദേഹം പറയുമ്പോഴും ഓരോ സിനിമ കഴിയുമ്പോഴും കാണികളെ തന്റെ ആരാധകനാക്കി മാറ്റുകയാണ് അദ്ദേഹം. ആരെയും വെറുപ്പിക്കാതെ ആരുടേയും ദേഷ്യത്തിന് പാത്രമാവാതെ തന്നിലെ വ്യക്തിത്വത്തെ കൂടി കാത്തുസൂക്ഷിക്കുന്നതിൽ അതീവ ശ്രദ്ധ ചെലുത്തുന്നുമുണ്ട് ഫഹദ്. നല്ല സിനിമകളെ കൈ പിടിച്ചുയർത്തുന്നതിൽ ഫഹദെന്ന പ്രൊഡ്യൂസറും വലിയ പങ്ക് വഹിക്കുന്നുണ്ട്. പ്രൊഡ്യൂസറിന്റെ മേലങ്കി ഇയ്യോബിന്റെ പുസ്തകത്തിൽ ധരിച്ച ഫഹദ് പിന്നീട് വരത്തനിലും കുമ്പളങ്ങിയിലും ഒരു ഭാഗമായി. സൂപ്പർ ഡീലക്സ് കേരളത്തിൽ റിലീസ് ചെയ്യുന്നതിൽ നിർണ്ണായക പങ്ക് വഹിച്ചതും ഫഹദ് ആയിരുന്നു. അത്തരത്തിൽ നല്ല സിനിമകളുടെ ഉയർച്ചക്കായി തന്നാലാവും വിധം പ്രയത്നിക്കുന്നുമുണ്ട് ഫഹദ്.

പ്രതിഭയാണ് പ്രതിഭാസമാണ്. ഇനിയും പ്രേക്ഷകരെ അത്ഭുതപ്പെടുത്താൻ സാധിക്കട്ടെ. ഇനിയും നല്ല കഥാപാത്രങ്ങളുമായി കമോണ്ട്രാ ഫഹദേ.

ഒരുപാടിഷ്ടത്തോടെ പ്രിയനടന് പിറന്നാളാശംസകൾ നേരുന്നു.

അബീദ്
#AB

ഒരുപക്ഷെ കൈയ്യെത്തും ദൂരത്ത് വിജയിച്ചിരുന്നെങ്കിലോ...!!!

Design Courtesy :: Midhun Nanbanz & Ashindh T.
Interview Contents : Maneesh Narayanan - Fahadh Faasil Interview
NB : പല വായനകളും എഴുത്തിനെ സ്വാധീനിച്ചിട്ടുണ്ടാവും. കുറിപ്പിൽ അതും പ്രകടമായേക്കാം.

🔻ത്രില്ലറുകൾ ഒരുക്കുന്നതിൽ കൊറിയൻ ഇൻഡസ്ട്രിയുടെ കഴിവ് അസൂയാവഹമാണെങ്കിൽ അതിൽ മിസ്റ്ററി സൃഷ്ടിച്ചെടുക്കുന്നതിന്റെ കാര്യത്തിൽ സ്പാനിഷ് സിനിമകളോടാണ് അസൂയ. എത്ര ഭംഗിയായാണ് അവ നമ്മുടെ മനസ്സിലേക്ക് ഇരച്ചുകയറുകയെന്ന് പറയുക പ്രയാസകരമാണ്. ഒരുപാട് ഉദാഹരണങ്ങൾ അതിനായി നിരത്താനും സാധിക്കും. അത്തരത്തിൽ മിസ്റ്ററിയുടെ സാന്നിധ്യം ഉപയോഗിച്ചുകൊണ്ട് ലളിതമായൊരു പ്രമേയത്തെ കാണികളെ വേട്ടയാടുന്ന ഒന്നായി മാറ്റിയിരിക്കുകയാണ് The Son.

Year : 2019
Run Time : 1h 32min

🔻ഒരുപാട് അവശതകളിലൂടെയുള്ള സഞ്ചാരമായിരുന്നു ലോറൻസോയുടെ ജീവിതം. പലപ്പോഴും ജീവിതം നിയന്ത്രണാതീതമായെന്ന് തോന്നിയെങ്കിലും നല്ലൊരു പുലർച്ചെക്കായി അദ്ദേഹം ജീവിതം നയിച്ചു. തന്റെ പാഷനായ പെയിന്റിങ്ങ് അദ്ദേഹം എല്ലായ്പ്പോഴും കൂടെ കൊണ്ടുനടന്നിരുന്നു. ഒടുവിൽ തന്റെ അമ്പതാമത്തെ വയസ്സിലാണ് തനിക്കും ഒരു ജീവിതമുണ്ടെന്ന് അദ്ദേഹത്തിന് ബോധ്യമായത്. ഭാര്യ സിഗ്രിഡുമായുള്ള ജീവിതത്തിൽ ഒരു ജൂനിയർ ലോറൻസോ പിറക്കാൻ പോവുന്നെന്ന വാർത്ത അദ്ദേഹത്തിന് എന്തെന്നില്ലാത്ത സന്തോഷം നൽകി. എന്നാൽ വിധി മറ്റൊന്നായിരുന്നു അദ്ദേഹത്തിനായി കരുതി വെച്ചത്.

🔻വളരെ ലളിതമാണ് സിനിമയുടെ basic plot. എന്നാൽ അതിനെ മോശമല്ലാത്ത രീതിയിൽ തിരക്കഥയാക്കി, മിസ്റ്ററി എലമെന്റുകൾ ഭംഗിയായി സംയോജിപ്പിച്ച് അവതരിപ്പിച്ചിടത്താണ് സംവിധായകന്റെ വിജയം. ചില പോരായ്മകൾ ഉണ്ടെങ്കിൽ പോലും അവ കാര്യമാക്കാതെ സിനിമയിലേക്ക് ശ്രദ്ധ ചെലുത്തി ഇരുത്തുന്നതും ആ കഴിവ് തന്നെയാണ്. ഈ ചിത്രത്തിന്റെ ഏറ്റവും മികച്ച വശവും മിസ്റ്ററി കൈകാര്യം ചെയ്തിരിക്കുന്ന രീതിയാണ്. പാരലൽ നറേഷനിലൂടെ നമ്മിൽ ആകാംഷ നിറക്കാൻ ചിത്രത്തിന് സാധിച്ചിട്ടുണ്ട്. മിസ്റ്ററിയെ സംബന്ധിച്ച ബാക്കി കാര്യങ്ങളിലേക്ക് കടക്കാത്തത് സ്പോയിലർ ആവുമെന്നതിനാലാണ്.

🔻സിനിമ അവസാനം ഒഴിച്ചിടുന്ന ചില ചോദ്യങ്ങളുണ്ട്. അവയ്ക്ക് നാം കണ്ടെത്തുന്ന ഉത്തരത്തിൽ നമുക്ക് തന്നെ തൃപ്തി തോന്നാത്തിടത്താണ് സിനിമയുടെ പോരായ്മ നിലനിൽക്കുന്നത്. Why എന്നതാണ് അവസാന ചോദ്യം എങ്കിൽ പോലും അതിന് തൃപ്തികരമായ ഒരുത്തരം എവിടെ നിന്നും ലഭിക്കുക സാധ്യമല്ല. എന്നാൽ അതിന് പകരം മറ്റൊരു counter question അവശേഷിപ്പിക്കുന്നിടത്ത് ആ പോരായ്മ ഒരു പരിധി വരെ തരണം ചെയ്യുന്നുണ്ട് ചിത്രം. ഒപ്പം disturbed ആയ ഒരു മനസ്സ് നമുക്ക് സമ്മാനിച്ച് ചിത്രം അവസാനിക്കുമ്പോൾ മിസ്റ്ററി-ത്രില്ലർ എന്ന നിലയിൽ സംതൃപ്തി നൽകുന്നു ചിത്രം.

🔻ഗംഭീരമെന്ന് തന്നെ വിശേഷിപ്പിക്കാവുന്ന ആർട്ട് വർക്കും പശ്ചാത്തലസംഗീതവുമാണ് ചിത്രത്തിന്റേത്. മിസ്റ്ററി കാത്തുസൂക്ഷിക്കുന്നതിന് ഏറ്റവും ഗുണം ചെയ്ത കാര്യവും ഇവ തന്നെയാണ് എന്ന കാര്യത്തിൽ സംശയമില്ല. സ്ലോ പേസ് ആണെങ്കിൽ കൂടി ആവശ്യമുള്ള സമയത്ത് എഡിറ്റിംഗും ക്യാമറ വർക്കുകളും നിലവാരത്തിനൊത്ത് ഉയരുന്നുണ്ട്. ഒപ്പം മികച്ച പെർഫോമൻസുകൾ കൂടി അടയാളപ്പെടുത്തുന്നുണ്ട് ചിത്രം.

🔻ＦＩＮＡＬ ＶＥＲＤＩＣＴ🔻

സ്പാനിഷ് മിസ്റ്ററി ത്രില്ലറുകളുടെ പാതയിൽ തന്നെ ചിത്രം സഞ്ചരിക്കുമ്പോഴും മുൻമാതൃകയില്ലാത്ത ഒരനുഭവമാകുന്നുണ്ട് The Son. ടെക്നിക്കൽ സൈഡുകൾ മിസ്റ്ററി എലമെന്റുകളെ ഭംഗിയായി കാത്തുസൂക്ഷിക്കുന്നിടത്ത് സിനിമ അവസാനിക്കുമ്പോഴുൾ നമ്മുടെ മനസ്സിൽ തോന്നുന്ന ചോദ്യങ്ങളുടെ ആഘാതം വർദ്ധിക്കുന്നുണ്ട്. സ്ലോ പേസ്ഡ് സിനിമകൾ ഇഷ്ടപ്പെടുന്നവർക്ക് തൃപ്തികരമായ ഒരനുഭവമാകും ചിത്രം നൽകുക.

ＡＢ ＲＡＴＥＳ ★★★☆☆

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻20 വർഷം മുമ്പുണ്ടായ കൊലപാതകങ്ങളുടെ അതെ Modus Operandi തന്നെയാണ് ഇപ്പോൾ നടക്കുന്നതിനും ഉള്ളത്. 'The Mantis' എന്ന് എല്ലാവരും വിശേഷിപ്പിച്ചിരുന്ന, ഒരു രാജ്യം മുഴുവനും ഭയത്തിന്റെ നിഴലിലാഴ്ത്തിയ കൊലപാതകങ്ങൾ. അത് വീണ്ടും ആവർത്തിക്കപ്പെട്ടിരിക്കുന്നു. ഒരുപക്ഷെ ആ സീരിയൽ കില്ലറുടെ Copycat ആവാം ഇപ്പോഴത്തെ കൊലയാളി. എന്നാൽ ഒരു തെളിവുകളും അവശേഷിപ്പിക്കാതെയുള്ള ഈ കൊലപാതകങ്ങൾ തെളിയിക്കാൻ ഒരാളുടെ സഹായം കൂടിയേ തീരൂ. Mantisന്റെ.

Year : 2017
Episde : 6
Run Time : 40-55min

🔻ഒരു സീരിയൽ കില്ലർ ഇൻവെസ്റ്റിഗേഷൻ എന്ന നിലയിലാണ് ഈ സീരീസ് കണ്ടുതുടങ്ങിയത്. എന്നാൽ അതൊരു ഇമോഷണൽ ഡ്രാമയിലേക്ക് കൂടി വഴുതിവീഴാൻ അധികം സമയമെടുത്തില്ല. ഒരുപക്ഷെ ഒരു ത്രില്ലറിന് നൽകാവുന്നതിനേക്കാളേറെ മികച്ച അനുഭവമായിരുന്നു ഈ സീരീസ് നൽകിയത്. Netflix റിലീസുകളിൽ ഏറെ ഇഷ്ടപ്പെട്ട ഒന്നായി മാറി 'La Mante' എന്ന ഫ്രഞ്ച് സീരീസ്.

🔻കഥാപാത്രങ്ങളെ കണക്റ്റ് ചെയ്ത വിധമാണ് സിനിമയിൽ ഏറ്റവും പ്രശംസ അർഹിക്കുന്നത്. അനാവശ്യമെന്ന് തോന്നിയ ഒരു കഥാപാത്രവും സീരീസിലില്ല. Who എന്ന ചോദ്യത്തിനേക്കാളേറെ നമ്മെ അലട്ടുന്ന മറ്റ് ചില കാര്യങ്ങൾ കഥയുടെ സഞ്ചാരവേളയിൽ മനസ്സിൽ കുറിച്ചിടുന്നുണ്ട്. ഒരുപക്ഷെ സീരീസ് അവസാനിക്കും വരെ അവ നമ്മെ വേട്ടയാടുകയും ചെയ്യും. ഒരുതരം Haunting അനുഭവം എന്ന് തന്നെ പറയാം ഈ സീരീസിനെ. സ്പോയിലർ ആവുമെന്നത് കൊണ്ട് കഥാപാത്രങ്ങളുടെ ബന്ധങ്ങൾ പരാമർശിക്കുന്നില്ല.

🔻കഥ ആവശ്യപ്പെടുന്ന വേഗതയിൽ മാത്രം സഞ്ചരിക്കുന്ന എപ്പിസോഡുകൾ നിലനിർത്തുന്ന ദുരൂഹത അപാരമാണ്. ചില വേളയിൽ ത്രസിപ്പിക്കും വിധമുള്ള വഴിത്തിരിവുകൾ പാകത്തിന് ഒരുക്കിവെച്ചിട്ടുണ്ട്. കൊലപാതകത്തിന്റെ അന്വേഷണം എന്നതിലുപരി മറ്റ് പല കാര്യങ്ങളിലേക്കും വെളിച്ചം വീശുമ്പോൾ ഒരു നടുക്കം പലപ്പോഴും ഉണ്ടാവുന്നു. അത്ര ഇമ്പാക്ട് ഉണ്ട് സീരീസിന്റെ തിരക്കഥക്ക്. ഒപ്പം ഗംഭീര പ്രകടനങ്ങളും കൂടിയാവുമ്പോൾ പല രംഗങ്ങളും വേറൊരു തലത്തിലേക്ക് ഉയരുന്നുണ്ട്.

🔻ഒരൽപം വയലൻസ് കടന്ന രംഗങ്ങൾ സീരീസിൽ പലയിടത്തായി വരുന്നുണ്ട്. അവയൊക്കെയും ആസ്വാദനത്തിന് ഗുണം ചെയ്യുന്നുണ്ട് എന്ന് തന്നെ പറയണം. അത്ര ക്രീപ്പി ഫീൽ അവ സമ്മാനിക്കുന്നുണ്ട് പല വേളകളിലും. പേസിങ്ങിലെ Ups & Downs ചില കഥാപാത്രങ്ങളുടെ മനസികാവസ്ഥയോട് ചേർന്ന് നിൽക്കുന്നുണ്ട്. ഈ സാഹചര്യങ്ങളിൽ ട്വിസ്റ്റുകൾ വരുന്നത് കാണികൾക്കും ഹരമേകുന്നുണ്ട്. ഒപ്പം ഗംഭീര പശ്ചാത്തല സംഗീതവും ചടുലത പുലർത്തുന്ന എഡിറ്റിംഗും വശ്യത നിറഞ്ഞ ഫ്രയിമുകളും കാഴ്ചയിൽ മിഴിവേകുന്നുണ്ട്.

🔻ＦＩＮＡＬ ＶＥＲＤＩＣＴ🔻

ഒരു ഫാസ്റ്റ് പേസ്ഡ് ത്രില്ലർ എന്ന നിലയിൽ സമീപിക്കാതെ കഥാപാത്രങ്ങളുടെ ഇമോഷൻസിന് കൂടി പ്രാധാന്യം നൽകുന്ന ഒരു ത്രില്ലർ എന്ന നിലയിൽ ഈ സീരീസിനെ സമീപിച്ചാൽ മികച്ച അനുഭവം തന്നെയാവും എന്ന കാര്യത്തിൽ സംശയമില്ല. കഥ ആവശ്യപ്പെടുന്ന വേഗതയിൽ മാത്രം സീരീസ് സഞ്ചരിക്കുമ്പോഴും അപ്രതീക്ഷിതമായ വഴിത്തിരിവുകൾ കൊണ്ട് നമ്മെ അമ്പരപ്പെടുത്തുന്നുമുണ്ട് സംവിധായകൻ. സ്ലോ പേസ്ഡ് ത്രില്ലറുകൾ ഇഷ്ടപ്പെടുന്നവർക്ക് നല്ലൊരു വിരുന്ന് തന്നെയാണ് Mantis സമ്മാനിക്കുക.

ＡＢ ＲＡＴＥＳ ★★★★☆

സീരീസ് ടെലിഗ്രാം ചാനലിൽ ലഭ്യമാണ്. Abi Suggests

🔻ഹൊറർ സ്ലാഷർ വിഭാഗത്തിലുള്ള സിനിമകൾ പൊതുവെ കാണാറില്ല. ഒരൽപം പേടി തന്നെയാണ് എന്നതാണ് സത്യം. അതുകൊണ്ട് തന്നെ മികച്ച അഭിപ്രായങ്ങൾ നേടിയ പലതും കാണാതെ പോയിട്ടുമുണ്ട്. ഒരു സിനിമ കാണാൻ തുടങ്ങുമ്പോൾ കഥയെ പറ്റിയോ ജേണറിനെ പറ്റിയോ കൂടുതൽ തിരക്കാറില്ല. അങ്ങനെ തന്നെയാണ് ഈ ചിത്രവും കാണാൻ തുടങ്ങിയത്. ഒടുവിൽ ചെന്നെത്തിയതോ കാണാൻ മടിയുള്ള ആ ജേണറിലേക്ക് തന്നെ. എന്നാൽ അത് മാത്രമായിരുന്നില്ല ടക്കറും ഡേലും കരുതി വെച്ചിരുന്നത്.

Year : 2010
Run Time : 1h 29min

🔻അവധിക്കാലം ആസ്വദിക്കാനായി കാട്ടിലേക്ക് ട്രിപ്പ് വന്ന രണ്ട് കൂട്ടർ. ഒരുപറ്റം കൂട്ടുകാരും അൽപ്പം പഴഞ്ചനെന്ന് മറ്റുള്ളവർക്ക് തോന്നിക്കുന്ന രണ്ട് പേരും. Hillibilly എന്ന് പുതുതലമുറ കളിയാക്കി വിളിച്ചു ടക്കറിനെയും ഡേലിനേയും. ഇടക്ക് ചില ഉരസലുകൾ അവർക്കിടയിൽ ഉണ്ടായത് കൊണ്ട് തന്നെ ഇരുവരും പരസ്പരം സമീപിച്ചത് ഭയത്തോടെയാണ്. അതിനിടയിലാണ് ആലിസൺ അവർക്കിടയിലെ പാലമാവുന്നത്. തുടർന്ന് അവിടെ ഒരുങ്ങുന്നത് ഒരു ചോരക്കളമാണ്.

🔻മരണങ്ങൾ സംഭവിക്കുമ്പോൾ പൊട്ടിച്ചിരി ഉയരുന്നത് അത്ര രസമുള്ള കാര്യമില്ല. പക്ഷെ ഇവിടെ എത്ര വേണ്ടെന്ന് വെച്ചാലും നമ്മൾ നിയന്ത്രണം വിട്ട് ചിരിച്ച് പോവും. അത്തരത്തിലാണ് ഹൊറർ-സ്ലാഷർ ജേണറിനെ ഇവിടെ കൈകാര്യം ചെയ്തിരിക്കുന്നത്. ഒരുതരത്തിൽ സ്പൂഫും ഡാർക്ക് ഹ്യൂമറും ഹൊററിൽ മിക്സ് ചെയ്ത് പുതിയൊരു അനുഭവം സമ്മാനിക്കുന്നു ടക്കറും ഡേലും. ചോരക്കളിയിലും ആനന്ദം കണ്ടെത്തുന്ന സാഡിസ്റ്റുകൾ ആവും നാം കുറച്ച് നേരത്തേക്ക്.

🔻ക്യാരക്ടർ ഡെവലപ്പ് ചെയ്യുന്നത് മുതലുണ്ട് കഥയെ വിശ്വസനീയമാം വിധം അവതരിപ്പിക്കുന്നതിനുള്ള വൈദഗ്ധ്യം. ചുരുക്കം രംഗങ്ങളിലൂടെ സ്‌ക്രീനിൽ വരുന്ന ഭൂരിഭാഗം കഥാപാത്രങ്ങളുടെയും സ്വഭാവം നമുക്ക് മനസ്സിലാക്കാം. അത് കാര്യങ്ങൾ കൂടുതൽ രസകരമാക്കുന്നുണ്ട്. ചില രംഗങ്ങളിൽ ചിരി ഉയർത്തുന്ന കാര്യവും അത് തന്നെയാണ്. ഒപ്പം ടക്കർ-ഡേൽ ടീമിന്റെ കെമിസ്ട്രിയും നര്മ്മരംഗങ്ങൾ സൃഷ്ടിക്കുന്നുണ്ട്. ബാക്കി എന്തൊക്കെയാണ് കാര്യങ്ങളെന്ന് കണ്ടറിയുക.

🔻ഹൊറർ എന്ന നിലയിൽ ബ്ലഡ് ബാത്തും ഒരുതരം ക്രീപ്പി ഫീൽ നൽകുന്ന അറ്റ്മോസ്ഫിയരും ചിത്രം സൃഷ്ടിച്ചെടുക്കുന്നുണ്ട്. ഇടക്ക് അത്യാവശ്യം ഞെട്ടിക്കാൻ പാകത്തിന് രംഗങ്ങളും ഒരുക്കിയിട്ടുണ്ട്. കോമഡി എന്ന നിലയിൽ മാത്രമല്ല, ഹൊറർ എന്ന നിലയിലും ചിത്രം നിലവാരം പുലർത്തുന്നുണ്ട്. അതിൽ വിജയിച്ചതിന് ടെക്നിക്കൽ സൈഡുകൾ അഭിനന്ദനം അർഹിക്കുന്നുണ്ട്.

🔻ＦＩＮＡＬ ＶＥＲＤＩＣＴ🔻

പതിവ് ഹൊറർ ശ്രേണിയിലുള്ള ചിത്രങ്ങളിൽ നിന്ന് മാറി വേറിട്ട ഒരനുഭവനമാണ് ടക്കറും ഡേലും ഒരുക്കിവെച്ചിരിക്കുന്നത്. കേവലം ഒന്നര മണിക്കൂറിൽ ഒരുപാട് ചിരിക്കാനും അതോടൊപ്പം ചോരക്കളി ആസ്വദിക്കുവാനും വഴിയൊരുക്കുന്നു ഈ ചിത്രം. വ്യത്യസ്തമായ അനുഭവങ്ങൾ ആഗ്രഹിക്കുന്നവർക്ക് ധൈര്യമായി തല വെക്കാവുന്ന ചിത്രം തന്നെയാണിത്.

ＡＢ ＲＡＴＥＳ ★★★½

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻താൻ ചെയ്യുന്ന ജോലിയോട് പൂർണ്ണമായും നീതി പാലിക്കുന്ന ഒരുവനായിരുന്നു ഫ്രെഡ്. അതുകൊണ്ട് തന്നെ ഒരു ജേർണലിസ്റ്റ് എന്ന നിലയിൽ ഏതറ്റം വരെയും സാഹസിക്കാനാവാൻ അദ്ദേഹത്തിന്റെ മനസ്സും ഒരുക്കമായിരുന്നു.  എന്നാൽ താൻ ജോലി ചെയ്യുന്ന പത്രം ഒരു ബൂർഷ്വാ മുതലാളി വാങ്ങിയെന്നറിഞ്ഞപ്പോൾ പൊടിയും തട്ടി ഇറങ്ങിയതാണ് പുള്ളിക്കാരൻ. ഒടുവിൽ എത്തിപ്പെട്ടതോ പ്രസിഡൻഷ്യൽ പോസ്റ്റിലേക്ക് മത്സരിക്കാനൊരുങ്ങുന്ന, അമേരിക്കയിലെ ഏറ്റവും സ്വാധീനമുള്ള സ്ത്രീകളിൽ ഒരാളായ ഷാർലറ്റിന്റെ പക്കലും.

Year : 2019
Run Time : 2h 5min

🔻തുടക്കം മുതൽ ഒടുക്കം വരെ നർമ്മങ്ങളാൽ സമ്പന്നമാണ് ചിത്രം. പൊളിറ്റിക്കൽ ബാക്ക്ഗ്രൗണ്ടിലാണ് കഥ നടക്കുന്നതെങ്കിലും അതിനെ അത്യന്തം രസകരമായി ഒരുക്കിയിരിക്കുന്നിടത്താണ് ചിത്രം നമ്മെ തൃപ്തിപ്പെടുത്തുന്നത്. ചില വേളകളിൽ സറ്റയർ ആണെന്ന് തോന്നിക്കുമെങ്കിലും ഒരു റോം-കോം എന്ന നിലയിലാണ് കൂടുതൽ സമയം കാണപ്പെടുക. ഡയലോഗുകളിൽ അഡൾട്ട് കണ്ടന്റുകൾ അടക്കമുണ്ടെങ്കിലും അവയൊക്കെയും നമ്മെ ചിരിപ്പിക്കുന്നുണ്ട്.

🔻Charlize Theron-Seth Rogen ടീമിന്റെ കിടിലൻ കെമിസ്ട്രിയാണ് സിനിമയുടെ ഹൈലൈറ്റ്. Theron അന്യായ ക്യൂട്ടിനെസ്സുമായി കളം വാണപ്പോൾ Seth തന്റെ ടൈമിങ്ങ് കൊണ്ട് ചിരി സൃഷ്ടിക്കുന്നുണ്ട്. Sethന്റെ കുറെ One-Linerഉകൾ ശ്രദ്ധേയമാണ്. പക്കാ എനർജെറ്റിക്ക് ആയിരുന്നു ഇരുവരും. അതുകൊണ്ട് തന്നെ ഒരു നിമിഷം പോലും വിരസഥയില്ലാതെ ആസ്വദിക്കാം. കൂടെ നല്ല പാട്ടുകളും.

🔻ＦＩＮＡＬ ＶＥＲＤＩＣＴ🔻

രണ്ട്  മണിക്കൂർ പൂർണ്ണമായി കാണികളെ എന്റർട്ടൈൻ ചെയ്യാൻ പാകത്തിന് ഒരുക്കിയിരിക്കുന്ന രസകരമായ ചിത്രമാണ് Long Shot. കുറെ ചിരിക്കാനും നായിക-നായകൻ ടീമിന്റെ കിടിലൻ കെമിസ്ട്രി ആസ്വദിക്കാനും ധൈര്യമായി സമീപിക്കാം ഈ ചിത്രത്തെ. A Coulourful Entertainer Is waiting...

ＡＢ ＲＡＴＥＳ ★★★½

ചിത്രം ടെലിഗ്രാം ചാനലിൽ ലഭ്യമാണ്. Abi Suggests