Abeed Azad

🔻വളരെ ത്രില്ലിങ്ങ് ആയ ഇൻവെസ്റ്റിഗേഷനിലേക്ക് ഇന്ത്യൻ മിത്തോളജിയെ ഗംഭീരമായി ലയിപ്പിച്ചിരിക്കുകയാണ് അസുർ എന്ന സീരീസ്. സാധാരണ കണ്ടുവരുന്ന ബൈബിൾ കില്ലേഴ്‌സിനേക്കാൾ നമ്മുടെ ആസ്വാദനത്തെ മിത്തോളജി സ്വാധീനിക്കുന്നുണ്ട്. സംസ്കൃത വചനങ്ങളും അത് പേറുന്ന അർത്ഥതലങ്ങളുമൊക്കെ വ്യത്യസ്തമായ രീതിയിൽ ഉപയോഗിച്ചിടത്താണ് അസുർ ഇന്ത്യൻ സീരീസുകളിലെ തന്നെ നാഴികക്കല്ലായി മാറുന്നത്.

Year : 2020
Episode : 8
Run Time : 40-60 min

🔻തന്റെ ബേക്കറിയിൽ ജോലിയിൽ ഏർപ്പെട്ടിരുന്ന ഒരു സ്ത്രീ അതിക്രൂരമായി കൊല്ലപ്പെടുന്നിടത്താണ് കഥ തുടങ്ങുന്നത്. വികലമാക്കപ്പെട്ടു ആ മൃതദേഹം പോസ്റ്റ്മാർട്ടം ചെയ്ത DJ ആ Modus operandiയെ മറ്റ് രണ്ട് കൊലപാതകങ്ങളുമായി ചേർത്തുവെക്കുന്നു. അതൊരു തുടക്കം മാത്രമായിരുന്നു. പല ലൊക്കേഷനുകളിലായി, പല കോർഡിനേറ്റുകളിലായി നടക്കപെടുന്ന സീരിയൽ കില്ലിങ്ങുകളുടെ തുടക്കം.

ആ കൊലപാതകങ്ങളിൽ മറ്റൊരാളുടെ പങ്കാളിത്തം ശ്രദ്ധേയമായിരുന്നു. ഓരോ കൊലപാതകങ്ങൾ നടക്കുമ്പോഴും ആ കോർഡിനേറ്റുകൾ മുൻ CBI ഓഫീസറായിരുന്ന നിഖിലിന്റെ ഫോണിലേക്ക് മെസേജായി വന്നുകൊണ്ടിരുന്നു. തുടർന്ന് അന്വേഷണത്തിൽ അദ്ദേഹത്തിനും പങ്കാളിയാവേണ്ടി വരുന്നു. പിന്നീട് അത്യന്തം ഉദ്വേഗജനകമായ മുഹൂർത്തങ്ങളാണ് നമ്മെ കാത്തിരിക്കുന്നത്.

🔻ഇന്ത്യൻ സീരീസുകളിൽ ശ്രദ്ധേയമായിരുന്നു Sacred Gamesഉം Breatheഉം. രണ്ടും ഒരുപാട് പ്രേക്ഷകശ്രദ്ധയും പിടിച്ചുപറ്റി. അതിനോട് കിടപിടിക്കത്തക്ക നിലവാരമുള്ള ഗംഭീര ത്രില്ലറാണ് Asur. എന്നാൽ പ്രേക്ഷകരുടെ ശ്രദ്ധ വേഗമെത്തുന്ന പ്ലാറ്റ്ഫോമിൽ റിലീസ് ചെയ്യാനായില്ല എന്നതാണ് സീരീസിന് പിണഞ്ഞ അബദ്ധം. അതൊഴിച്ച് നിർത്തിയാൽ മികച്ച തിരക്കഥയും അതിനൊത്ത സംവിധായകമികവും ദർശിക്കാവുന്ന മികച്ച സൃഷ്ടി തന്നെയാണ് അസുർ. കഥയിലെന്ന പോലെ അവതരണത്തിലും പ്രത്യേകതകൾ ഏറെയാണ്. എല്ലാ എപ്പിസോഡുകളുടെയും ആദ്യ രംഗവും അവസാനരംഗവും കഥയുടെയും കഥാപാത്രങ്ങളുടെയും വളർച്ചക്ക് സഹായകമാവുന്നുണ്ട്. ഒപ്പം ക്ലിഫ്‌ഹാങ്ങറുകളുടെ നീണ്ട നിരയും കാണാം. അവയുടെയൊക്കെയും ആസ്വാദനം വർദ്ധിപ്പിക്കുന്ന തലത്തിലാണ് പശ്ചാത്തലസംഗീതവും ക്യാമറവർക്കുകളും മികവ് പുലർത്തുന്നത്.

🔻Barun Sobtiയെ പറ്റി പറയാതിരിക്കാൻ കഴിയില്ല. പല വൈകാരികതലങ്ങളിലൂടെ സഞ്ചരിക്കുന്ന നിഖിലിന്റെ കഥാപാത്രത്തെ അതിഗംഭീരമാക്കിയിട്ടുണ്ട് Barun. സീരീസിൽ ഇമോഷണലി ഏറ്റവും ഇഷ്ടം തോന്നിയ കഥാപാത്രവും നിഖിലിന്റേതാണ്. അർഷദ് വർസിയും തന്റെ കഥാപാത്രത്തെ ഭംഗിയാക്കിയിട്ടുണ്ട്. ഇരുവരും മത്സരിച്ചഭിനയിക്കുകയായിരുന്നു എന്ന് തന്നെ പറയാം.

🔻ＦＩＮＡＬ ＶＥＲＤＩＣＴ🔻

ഇതുവരെ കണ്ട പരിമിതമായ ഇന്ത്യൻ സീരീസുകളിൽ ഏറ്റവും പ്രിയപ്പെട്ടതായി മാറിക്കഴിഞ്ഞു അസുർ. കൂടുതൽ പറഞ്ഞ് ഫ്രെഷ്നെസ്സ് നഷ്ടപ്പെടുത്തുന്നില്ല. Must Watch label നൽകി ഈ കുറിപ്പ് അവസാനിപ്പിക്കുന്നതാവും ഉത്തമം.

ＡＢ ＲＡＴＥＳ ★★★★☆

സീരീസ് ടെലിഗ്രാം ചാനലിൽ ലഭ്യമാണ്. Abi Suggests

🔻ആദ്യമായി കണ്ട കൊറിയൻ സിനിമ Train To Busan ആയിരുന്നു. സോമ്പി സിനിമകൾ കാര്യമായി കാണാത്തത് കൊണ്ടുതന്നെ അത് നന്നായി ആസ്വദിക്കാൻ സാധിച്ചു. അവിടെ തുടങ്ങിയതാണ് കൊറിയൻ സിനിമകളോടുള്ള പ്രേമം. Kingdom എന്ന netflixന്റെ ആദ്യ കൊറിയൻ ഒറിജിനൽ സീരീസ് സോമ്പി തീം തന്നെയാണ് കൈകാര്യം ചെയ്യുന്നത്. എന്നാൽ Joseon കാലഘട്ടത്തെ കേന്ദ്രീകരിച്ചിരിക്കുന്ന കഥയിൽ അത് മാത്രമല്ല പ്രതിപാദ്യവിഷയമായി വരുന്നത് എന്നതാണ് ശ്രദ്ധേയം.

Year : 2019- 2020
Episodes : 6 ep in each seasons
Run Time : 40-55min

🔻ആ കാലഘട്ടത്തിൽ രാജ്യം ഭരിച്ചുകൊണ്ടിരുന്ന രാജാവിന്റെ മഹാമാരിയിലാണ് കഥയുടെ തുടക്കം. അദ്ധേഹം മരിച്ചിട്ടില്ല എന്ന വാർത്ത മാത്രമാണ് മകനടക്കം ലഭിച്ചിരിക്കുന്നത്. രാജാവിനെ കാണാൻ അദ്ദേഹത്തിന് പോലും അനുമതിയില്ല. എന്നാൽ കാര്യങ്ങളിൽ ഏറെ സംശയം തോന്നിയ രാജകുമാരൻ സത്യാവസ്ഥ അന്വേഷിച്ച് ഇറങ്ങുകയാണ്. എന്നാൽ ലഭിക്കുന്നതോ ഞെട്ടിക്കുന്ന വിവരങ്ങളും. ഇതേ സമയത്താണ് സൂര്യാസ്തമയ ശേഷം മനുഷ്യമാസം തേടിയിറങ്ങുന്ന മനുഷ്യരെ അവർക്ക് നേരിടേണ്ടി വരുന്നത്. ഇതോടെ കാര്യങ്ങൾ കൂടുതൽ കുഴഞ്ഞുമറിയുന്നു.

🔻പരിചിതമായ തീമിനെ മികച്ച രീതിയിൽ ഒരു പിരീഡ് ഡ്രാമയുമായി കോർത്തിണക്കി ഗംഭീരമായി അവതരിപ്പിച്ചിരിക്കുകയാണ് Kingdom സീരീസ്. വയലൻസ് മാത്രമായി ഒതുങ്ങിയേക്കുമായിരുന്ന പ്രമേയത്തെ കഥാപാത്രനിർമ്മിതിയുടെ ദൃഢത കൊണ്ട് വേറൊരു തലത്തിലേക്ക് ഉയർത്തുകയാണ് സംവിധായകൻ. സോമ്പി എന്ന ആശയത്തോടുണ്ടാവുന്ന ഭയത്തോടൊപ്പം ആ രാജ്യത്തിന്റെ ഭരണ കാര്യത്തിലും ഒരുപോലെ നമ്മെ ആശങ്കാകുലരാക്കുന്നുണ്ട് സംവിധായകൻ. പക്വതയുള്ള എഴുത്തിന്റെയും സംവിധാനമികവിന്റെയും മേന്മ അനുഭവിച്ചറിയാൻ സാധിക്കുന്നുണ്ട് കാഴ്ചയിലുടനീളം.

🔻സോമ്പികൾ മാത്രമല്ല, തന്നോടൊപ്പമുള്ളവരിലും ശത്രുക്കളെ കണ്ടെത്തുന്ന രാജകുമാരന്റെ നിലനിൽപ്പിനായുള്ള പോരാട്ടമാണ് Kingdom. രാജ്യത്തിന്റെയും ജനങ്ങളുടെയും സുരക്ഷക്കായി ജീവൻ പോലും പണയം വെച്ച് വിശ്വസ്തരായ കൂട്ടാളികൾക്കൊപ്പമുള്ള പോരാട്ടം വളരെ ത്രില്ലിങ്ങായും എൻഗേജിങ് ആയും അവതരിപ്പിച്ചിരിക്കുകയാണ് സീരീസിലൂടെ. ടെൻഷൻ നിറഞ്ഞ മൊമന്റുകളും രോമാഞ്ചം നൽകുന്ന രംഗങ്ങളും ചോര ചീന്തുന്ന ആക്ഷൻ സീനുകളുമടക്കം എല്ലാം കൊണ്ടും ആസ്വാദ്യകരമാണ് ഈ സീരീസ്. ഒരു വൈഡ് ആംഗിൾ ഷോട്ടിൽ perfect cliffhangerൽ ആദ്യ സീസൺ അവസാനിച്ചപ്പോൾ പൂർണ്ണതൃപ്തി ആയിരുന്നു ഫലം. രണ്ടാം സീസൺ അതിനേക്കാൾ ഒരുപടി മുകളിൽ നിൽക്കുന്ന അനുഭവം സമ്മാനിച്ചു.

🔻സോമ്പികളെ കുറിച്ചുള്ള ഡീറ്റൈലിംഗ് ആണ് രണ്ടാം സീസണിൽ ഏറെ ഇഷ്ടപ്പെട്ട സംഗതി. മനസ്സിൽ ഉണ്ടായിരുന്ന ഒരുപാട് ചോദ്യങ്ങൾക്ക് ഉത്തരം നൽകുവാൻ രണ്ടാം സീസണ് സാധിച്ചിട്ടുണ്ട്. ഒപ്പം കഥാപാത്രങ്ങൾ തമ്മിലുള്ള കോൺഫ്ലിക്റ്റുകൾ ശക്തമായി അടയാളപ്പെടുത്തുവാനും സാധിച്ചിട്ടുണ്ട്. ആഖ്യാനത്തിന്റെ വേഗതയും ആദ്യ സീസണെക്കാൾ കൂടിയിട്ടുണ്ട്. ഇതിനെല്ലാം പുറമെ Political drama എന്ന രീതിയിലും കഥയെ നന്നായി ഡെവലപ്പ് ചെയ്യാൻ സാധിച്ചിട്ടുണ്ട്. കഥാഗതിയിൽ അത് നന്നായി ഉപയോഗപ്പെടുത്തിയിട്ടുമുണ്ട്. ഒടുവിൽ എല്ലാം ഒടുങ്ങിയെന്ന് തോന്നിച്ചിടത്ത് ഒരു കിടിലൻ സർപ്രൈസ് അപ്പിയറൻസിലൂടെ അടുത്ത cliffhanger കൂടി നൽകി രണ്ടാം സീസൺ അവസാനിച്ചപ്പോൾ നീണ്ട കാത്തിരിപ്പിനെ കുറിച്ചോർത്തുള്ള ദുഃഖം മാത്രം ബാക്കിയായി.

🔻താരങ്ങളുടെ തകർപ്പൻ പ്രകടനങ്ങൾ കൊണ്ട് ശ്രദ്ധേയമാണ് ഓരോ കഥാപാത്രങ്ങളും. ചെറിയ റോളുകളിൽ വന്നുപോകുന്നവർ പോലും മനസ്സിൽ തങ്ങിനിൽക്കും വിധം സിഗ്നേച്ചർ പതിപ്പിക്കാൻ അവസരം നല്കിയിട്ടുണ്ടാവും ഏതെങ്കിലും തരത്തിൽ. ആക്ഷൻ കൊറിയോഗ്രാഫി ഗംഭീരമാണ്. അതുപോലെ തന്നെ പിരീഡ് ഡ്രാമയായി ഒരുക്കുമ്പോൾ ശ്രദ്ധിക്കേണ്ട ആർട്ട് വർക്കുകൾ, geography തുടങ്ങി എല്ലാ തലങ്ങളിലും ഒന്നിനൊന്ന് മികവ് പുലർത്തുന്നുണ്ട് ടെക്നിക്കൽ വശങ്ങൾ. ത്രസിപ്പിക്കുന്ന പശ്ചാത്തലസംഗീതവും കിടിലൻ ഫ്രെയിമുകളുമൊക്കെയായി വിരുന്ന് തന്നെയാണ് ഈ സീരീസ്.

🔻ＦＩＮＡＬ ＶＥＲＤＩＣＴ🔻

പൊളിറ്റിക്കൽ ഡ്രാമയെ സോമ്പി തീമുമായി ഗംഭീരമായി സമന്വയിപ്പിച്ചിരിക്കുകയാണ് Kingdom. ആക്ഷൻ രംഗങ്ങൾ കാണാൻ ആഗ്രഹിക്കുന്നവർക്ക് ഒന്നൊന്നര വിരുന്ന് തന്നെയാണ് ഈ സീരീസ്. ഗംഭീര പ്രകടനങ്ങൾ കൊണ്ടും ത്രസിപ്പിക്കുന്ന രംഗങ്ങൾ കൊണ്ടും top notchലുള്ള ടെക്നിക്കൽ പെർഫെക്ഷൻ കൊണ്ടും പൂർണ്ണ തൃപ്തിയാണ് സീരീസ് സമ്മാനിച്ചത്. 6 എപ്പിസോഡുകൾ വീതം മാത്രമുള്ള 2 സീസണുകൾ ആയതുകൊണ്ട് തന്നെ Binge watchന് ഉത്തമമാണ്. അത് തന്നെയാണ് ആസ്വാദനത്തിനും ഗുണം ചെയ്യുക. ഒരിക്കലും ഒഴിവാക്കാതിരിക്കുക. നല്ല ക്വാളിറ്റിയിൽ തന്നെ കാണുക.

ＡＢ ＲＡＴＥＳ ★★★★☆

സീരീസ് ടെലിഗ്രാം ചാനലിൽ ലഭ്യമാണ്. Abi Suggests

🔻Absurdity മാത്രം നിറഞ്ഞ ഒരു പ്രദേശത്തെയും അവിടുത്തെ ജനങ്ങളെയും satirically വിശേഷിപ്പിക്കാൻ ഉപയോഗിക്കുന്ന വാക്കാണ് Absurdistan. മണ്ടത്തരങ്ങൾ മാത്രമായത് കൊണ്ടുതന്നെ വളരെ രസകരമാവും അവരുടെ ജീവിതം. അത്തരത്തിൽ ഒരു പ്രദേശത്തെ കഥയാണ് ചിത്രം മുന്നോട്ട് വെക്കുന്നത്. 14 കുടുംബങ്ങൾ മാത്രം വസിക്കുന്ന absurdistan.

Year : 2008
Run Time : 1h 28min

🔻അവിടെയുള്ള ജനങ്ങളിൽ യൗവ്വനത്തിൽ ഉള്ളത് ആകെ രണ്ട് പേരാണ്. Ayaയും Temelkoയും. ചെറുപ്പം മുതൽ തന്നെ ഇരുവരും പ്രണയത്തിലാണ്. ആയയുടെ മുത്തച്ഛിയാണ് അവരുടെ ശാന്തിമുഹൂർത്തം കുറിച്ച് കൊടുത്തത്. അതിനിനീയും വർഷങ്ങളോളം ബാക്കിയുള്ളതിനാൽ പഠനത്തിനായി Temelko വണ്ടികയറി. താൻ സ്വപ്നം കണ്ട ആ ദിവസം മനസ്സിൽ കണ്ട് തിരിച്ചുവന്ന temelkoവിന് മുന്നിൽ പ്രതിസന്ധിഘട്ടങ്ങൾ വരുന്നതോടെ സിനിമ കൂടുതൽ രസകരമാവുന്നു.

🔻മാജിക്കൽ റിയലിസം അതിന്റെ മൂർദ്ധന്യാവസ്ഥയിൽ അവതരണശൈലിയായി ഉപയോഗിച്ചിരിക്കുന്ന ചിത്രമാണ് absurdistan. ഏറെ ലളിതമായ പ്രശ്നത്തെ അതിലേറെ രസകരമായി അവതരിപ്പിച്ചിരിക്കുന്നിടത്താണ് ചിത്രം കാണികളെ കയ്യിലെടുക്കുന്നത്. തുടക്കം മുതൽ ഒടുക്കം വരെ ഒരുപാട് നർമ്മമുഹൂർത്തങ്ങൾ നിറഞ്ഞ് നിൽക്കുന്നുണ്ട് സിനിമയിൽ. കഥാപാത്രങ്ങളെ establish ചെയ്തിരിക്കുന്നത് അത്തരത്തിലാണ്. മടിയന്മാരായ, എന്നാൽ sexന്റെ കാര്യത്തിൽ മാത്രം ഒരു കുറവും ഇല്ലാത്ത ആണുങ്ങളും വെള്ളത്തിന് ഏറെ ക്ഷാമമുള്ള പ്രദേശത്ത് ദിവസവും വെള്ളം കാത്ത് നിൽക്കുന്ന പെണ്ണുങ്ങളും തമ്മിലുള്ള യുദ്ധമാണ് നമുക്ക് കാണാനാവുക.

🔻"No Water, No Sex" എന്ന ആശയം പെണ്ണുങ്ങൾ മുന്നോട്ട് വെക്കുന്നതോടെ രസച്ചരട് മുറുകുകയാണ്. അത്രനേരമുണ്ടായ ചിരിയെ ടോപ്പ് ഗിയറിലേക്ക് ഷിഫ്റ്റ് ചെയ്യുകയാണ് ഈ സ്ലോഗൺ. പിന്നീട് കാര്യങ്ങൾ അതീവ രസകരമാണ്. അവസാനത്തേക്കടുക്കുമ്പോൾ അവതരണം ഒരൽപം കൈവിട്ടുപോയി എന്ന് തോന്നിയെങ്കിലും അധികം വൈകാതെ തന്നെ ട്രാക്കിലാവാനും ചിത്രത്തിന് സാധിച്ചിട്ടുണ്ട്. ആദ്യം മുന്നോട്ട് വെക്കുന്ന പ്രണയമെന്ന ആശയത്തെ കോമഡി കവച്ച് വെക്കുന്നത് രസകരമായ കാഴ്ചയുമാണ്.

🔻ＦＩＮＡＬ ＶＥＲＤＩＣＴ🔻
മാജിക്കൽ റിയലിസം നിറഞ്ഞുനിൽക്കുന്ന സിനിമകൾ ഇഷ്ടമുള്ളവർ തീർച്ചയായും കണ്ടുനോക്കുക absurdity നിറഞ്ഞ ഈ പ്രദേശത്തിന്റെ കഥ. ഒന്നര മണിക്കൂർ ഒരു കിടിലൻ ഫൺ റൈഡ് എന്നുതന്നെ വിശേഷിപ്പിക്കാം ചിത്രത്തെ. So Don't Miss It..

ＡＢ ＲＡＴＥＳ ★★★½

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻'Chase Your Dreams' എന്ന വാക്യം പോലെ തന്റെ സ്വപ്നങ്ങളെ വെട്ടിപ്പിടിക്കാൻ നഗരത്തിലേക്ക് ചേക്കേറിയതാണ് Hye-Won. എന്നാൽ നിരാശയായി നാട്ടിലേക്ക് തിരിച്ച് മടങ്ങാനായിരുന്നു വിധി. എങ്കിലും അതിൽ പിൻവാങ്ങാൻ അവൾ തയ്യാറായിരുന്നില്ല. കുറച്ചുനാൾ അമ്മയുടെ വീട്ടിൽ താമസിച്ച ശേഷം വീണ്ടും തിരിച്ചുപോവാനുള്ള ഒരുക്കത്തിലാണ് Hye. അവിടെയാണ് തന്റെ സുഹൃത്തുക്കളെ അവൾ കണ്ടുമുട്ടുന്നത്. തുടർന്ന് നമ്മെ കുറെ ഓർമ്മകളിലേക്ക് കൊണ്ടുപോവുകയാണ് ചിത്രം.

Year : 2018
Run Time : 1h 43min

🔻കഥയുടെ പല ഘട്ടങ്ങളിലായി തന്റെ ഓർമ്മകളോട് Hye സംവദിക്കുന്നുണ്ട്. അമ്മയുടെ കൈപ്പുണ്യം അറിഞ്ഞ് താൻ രുചിച്ചിരുന്ന ഭക്ഷണങ്ങളിലൂടെ, കാലം മാറുന്നതനുസരിച്ച് വരുന്ന കാലാവസ്ഥാവ്യതിയാനങ്ങളിലൂടെ, തനിക്ക് ചുറ്റും കടന്നുവരുന്ന പരിചിതമായ മുഖങ്ങളിലൂടെ എന്നുവേണ്ട പല കാര്യങ്ങളും സിനിമയിൽ മെറ്റഫറായി ഉപയോഗിച്ചിരിക്കുന്നത് കാണാം. അത് തന്നെയാണ് സിനിമയെ ഏറെ മനോഹരമാക്കുന്നത്. സാധാരണക്കാർക്ക് പോലും ഏറെ ലളിതമായി മനസ്സിലാവും വിധം ഇത്തരം മെറ്റഫറുകൾ ഉപയോഗിച്ചിട്ടുണ്ട്. അമ്മയുമായുള്ള ആത്മബന്ധം എങ്ങോ നഷ്ടപ്പെട്ടെന്ന് കരുതുമ്പോഴും ആ വീടിനുള്ളിലെ ഓരോ കാഴ്ചകളും ഭൂതകാലത്തേക്ക് നയിക്കുകയാണ് അവളെ. അമ്മ തന്റെ ജീവിതത്തിൽ എത്രത്തോളം സ്വാധീനം ചെലുത്തിയിട്ടുണ്ട് എന്ന തിരിച്ചറിവിലേക്കാണ് Hye നടന്നുനീങ്ങുന്നത്. ഒപ്പം തന്റെ സത്വത്തെ തേടിയുള്ള യാത്രയും.

🔻അനാവശ്യമായ മെലോഡ്രാമ പേരിന് പോലും സിനിമയിൽ കാണാനാവില്ല. കഥാപാത്രങ്ങൾ തമ്മിലുള്ള ആത്മബന്ധം അത്ര ജീവസ്സുറ്റതാണ്. Hyeവും അമ്മയും തമ്മിലുള്ള രംഗങ്ങൾ തന്നെ നോക്കുക. എത്ര തന്മയത്വത്തോടെയാണ് അവയൊക്കെയും അവതരിപ്പിച്ചിരിക്കുന്നത്. താൻ വളരുന്നതനുസരിച്ച് അമ്മയോടുള്ള ഹൃദ്യമായ ബന്ധം വളരുന്നതൊക്കെ മനോഹരമായി സ്‌ക്രീനിൽ പതിഞ്ഞിട്ടുണ്ട്. ഒപ്പം സുഹൃദ്ബന്ധവും അങ്ങനെ തന്നെ. വളരെ ലളിതമായ രംഗങ്ങളിലൂടെയാണ് അവയുടെ അവതരണം. മനസ്സിന് വല്ലാത്ത കുളിർമയേകുന്നുണ്ട് അവ പലപ്പോഴും.

🔻സിനിമയുടെ ടെക്നിക്കൽ വശങ്ങളെ പറ്റി പറയാൻ വാക്കുകളില്ല. വശ്യസുന്ദരമായ ഛായാഗ്രഹണവും ഭക്ഷണവും മനം മയക്കും. ആരുടേയും വായിൽ വെള്ളമൂറിപ്പോവും അത് കാണുമ്പോൾ. ഇതുവരെ കണ്ടുശീലിച്ചിട്ടില്ലാത്തവയാണെങ്കിലും ഒന്ന് കഴിക്കാൻ ആഗ്രഹം തോന്നിപ്പോയി എന്നതാണ് സത്യം. ഓരോ ഫ്രെയിമുകളും വാൾപേപ്പർ ആക്കാൻ സാധിക്കും എന്ന വിശേഷണം ഈ സിനിമക്ക് 100% യോജിക്കും. കണ്ടറിയുക ദൃശ്യവിരുന്ന്.

🔻ＦＩＮＡＬ ＶＥＲＤＩＣＴ🔻

കൊറിയൻ ഫീൽ ഗുഡ് സിനിമകളിലേക്ക് മനോഹരമായ ഒരു കൂട്ടിച്ചേർക്കലാണ് Little  Forest. പതിഞ്ഞ താളത്തിലാണ് അവതരണമെങ്കിൽ കൂടി അതിലേക്ക് അലിഞ്ഞ് ചേർന്നാൽ മനസ്സ് നിറക്കും വിധം ആസ്വദിക്കാം. ദൃശ്യമനോഹാരിത കൊണ്ടും ഭക്ഷണപ്രിയൻ ആയത് കൊണ്ടും സ്‌ക്രീനിൽ നിന്ന് കണ്ണെടുക്കാൻ തോന്നിയില്ല. ഒടുവിൽ ചുണ്ടിലൊരു പുഞ്ചിരിയുമായി കാഴ്ച്ച അവസാനിപ്പിക്കാം.

ＡＢ ＲＡＴＥＳ ★★★½

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻ലോകത്തിലെ ഏറ്റവും മികച്ച super spy. അതാണ് ലാൻസ്. ഒരുപാട് ആരാധകർ. എല്ലാ മിഷനിലും വിജയം. അത്തരത്തിൽ ഒരാൾക്ക് തന്റെ ഏജൻസിയിലെ പാവത്താനായ വാൾട്ടറുമായി ചേർന്ന് പ്രവർത്തിക്കേണ്ടി വരുന്ന ഒരു റെസ്ക്യൂ ഓപ്പറേഷനാണ് രസകരമായി അവതരിപ്പിച്ചിരിക്കുന്നത്.

Year : 2019
Run Time : 1h 42min

🔻നല്ല കിടിലൻ എന്റർടൈൻമെന്റ് വാല്യൂ ഉള്ള സിനിമയാണ് spies in disguise. തുടക്കം മുതൽ ഒടുക്കം വരെ നിർത്താതെ ചിരി സമ്മാനിക്കുന്ന പ്രമേയവും അവതരണവും. ലാൻസിന്റെ സ്റ്റൈലിഷ് എൻട്രിയോടെയാണ് കാര്യങ്ങളുടെ തുടക്കം. അപ്പോൾ തന്നെയൊരു അടിപൊളി ആക്ഷൻ സീൻ ഉണ്ട്. വാൾട്ടറിനെ പറ്റിയും ഒരു ചെറിയ സൂചന തുടക്കം നൽകുന്നുണ്ട്. തീരെ പ്രതീക്ഷിക്കാതെ കഥയിൽ വന്ന ഒരു പ്രത്യേക എലമെന്റിൽ സുഹൃദ്ബന്ധത്തിന്റെ കഥ കൂടിയായി ചിത്രം മുന്നോട്ട് വെക്കുന്നത്. പിന്നീടങ്ങോട്ട് ആക്ഷനും കോമഡിയും എല്ലാം ചേർന്നൊരു പൂരമാണ്.

🔻വിൽ സ്മിത്തിന്റേയും ടോം ഹോളണ്ടിന്റെയും കോമഡി ടൈമിങ്ങ് അപാരമാണ്. ആ കഥാപാത്രങ്ങൾക്ക് അമ്മാതിരി വോയിസ് ആണ് ഇരുവരും നൽകിയിരിക്കുന്നത്. സിനിമയുടെ ഹൈലൈറ്റും അത് തന്നെയാണ്. ഒപ്പം പെർഫെക്റ്റ് എന്ന് തോന്നിയ ആനിമേഷൻ വർക്കുകളും കാഴ്ചാവിരുന്ന് തന്നെയായിരുന്നു.

🔻Spies In Disguise Is Super-Duper Cool. Just Watch & Get Entertained In Every Sense..!!

ＡＢ ＲＡＴＥＳ ★★★½

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻ഇറാനിയൻ സിനിമകൾ ഭൂരിഭാഗവും സംഭാഷണകേന്ദ്രീകൃതമായാണ് മുന്നേറുന്നത്. ഒരു പ്രത്യേക രംഗത്തിൽ നിന്ന് തുടങ്ങി അതിലേക്ക് കൂടുതൽ കണ്ണികളെ വലിച്ചിടുകയും അതിലൂടെ കഥാതന്തുവിനെ കൂടുതൽ സങ്കീർണ്ണമാക്കുകയും ചെയ്യുകയാണ് പതിവ്. കാണുന്നവർ അറിയാതെ തന്നെ അതിലേക്ക് വഴുതിവീഴുന്ന അവസ്ഥ ഇറാനിയൻ സിനിമകളിലാണ് ഏറ്റവും കൂടുതൽ അനുഭവിച്ചറിഞ്ഞിട്ടുള്ളത്. അതുകൊണ്ട് തന്നെയാണ് ഏറ്റവും പ്രിയപ്പെട്ട ഇൻഡസ്ട്രിയായി ഇറാനിയൻ ഇൻഡസ്ട്രി വളരുന്നതും. ആ ഇഷ്ടത്തിന് ആക്കം കൂട്ടുന്ന, ആ നിരയിലേക്ക് നെഞ്ചോട് ചേർത്ത് വെക്കാനാവുന്ന ഒരു ചിത്രം ചിത്രം കൂടി. അതാണ് Castle Of Dreams.

Year : 2019
Run Time : 1h 22min

🔻തന്റെ ഭാര്യാസഹോദരിയുടെ വീട്ടിലേക്ക് നാളുകൾക്ക് ശേഷം വരികയാണ് ജലാൽ. ICUവിൽ മരണത്തോട് മല്ലടിക്കുന്ന ഭാര്യയെ ഒരു നോക്ക് കാണാൻ കൂട്ടാക്കാതെ, വർഷങ്ങൾക്ക് മുമ്പ് ആ വീട്ടിൽ ഏൽപ്പിച്ച തന്റെ മക്കളെ പറ്റി ഒരു വാക്ക് പോലും ചോദിക്കാതെ, ഭാര്യയുടെ പേരിലുള്ള കാർ വിൽക്കുക എന്ന ലക്ഷ്യത്തോടെ മാത്രം. എന്നാൽ ഒരു പ്രത്യേക സാഹചര്യത്തിൽ മനസ്സില്ലാമനസ്സോടെ മക്കളെയും തന്റെയൊപ്പം കൂട്ടേണ്ടി വരുന്നു ജലാലിന്. അപ്പോഴും അദ്ധേഹത്തിന്റെ മനസ്സിൽ മറ്റ് പല പദ്ധതികളുമായിരുന്നു.

🔻ഇറാനിയൻ സിനിമകളുടെ PR മാനേജർമാരായിരുക്കും അതിൽ അഭിനയിക്കുന്ന കുട്ടികൾ. ഒരു നോക്ക് കണ്ടാൽ പിന്നെയൊരിക്കലും മറക്കാൻ സാധിക്കില്ല ആ മുഖങ്ങൾ. അത്രമേൽ നമ്മുടെ മനസ്സിൽ പതിയും നിഷ്കളങ്കമായ ആ മുഖങ്ങൾ. Children Of Heavenഉം Colour Of Paradiseഉം സിനിമാസ്നേഹികൾക്ക് എത്രത്തോളം പ്രിയപ്പെട്ടതാണെന്ന് പ്രത്യേകിച്ച് പറയേണ്ട ആവശ്യമില്ലല്ലോ. ഈ സിനിമയിലൂടെയും കിട്ടി രണ്ട് പ്രിയപ്പെട്ട കഥാപാത്രങ്ങളെ. സാറയും അലിയും. ഒരുപക്ഷെ ജലാലിന് ശേഷം സിനിമയുടെ മുഴുവൻ സംഘർഷങ്ങളും പേറുന്ന രണ്ടുപേർ. കഥ വികസിക്കുന്നത് തന്നെ പ്രധാനമായും ഇവരിലൂടെയാണ്. ഇരുവരുടെയും ഭാവിയെ ചൊല്ലി ആവലാതിപ്പെടുകയാവും ഭൂരിഭാഗം സമയവും നാം.

🔻മക്കളെയും കൊണ്ടുള്ള യാത്രയിലൂടെ ജലാൽ കണ്ടുമുട്ടുന്ന, യാത്രയിൽ അനുഗമിക്കുന്ന കഥാപാത്രങ്ങളിലൂടെയാണ് ജലാലിന്റെ കഥാപാത്രം രൂപാന്തരം പ്രാപിക്കുന്നത്. ഒരു സാധാരണ മനുഷ്യൻ എന്നതിനപ്പുറം അദ്ധേഹത്തിന്റെ ഭൂതകാലത്തെ വ്യക്തമായി വരച്ചിടുന്നുണ്ട് അവരുമായുള്ള സംഭാഷണങ്ങൾ. നജ്മയുമായുള്ള വിവാഹം കഴിഞ്ഞ കാര്യം ആരും അറിഞ്ഞില്ലെന്നത് മുതൽ തുടങ്ങുന്നുണ്ട് രഹസ്യങ്ങളുടെ കലവറ. സാറയോട് തന്റെ ഉമ്മ പറഞ്ഞിരുന്ന വാപ്പയുടെ സങ്കല്പങ്ങൾ ചീട്ടുകൊട്ടാരം പോലെ തകർന്നുപോവുന്ന ചില സന്ദർഭങ്ങളുണ്ട്. കാര്യങ്ങൾ മനസ്സിലാക്കാനുള്ള പ്രായം സാറക്ക് ആയിട്ടില്ലെങ്കിലും പ്രായത്തിനേക്കാൾ പക്വതയുള്ള അലി സന്ദർഭോചിതമായി സാറയെ പറഞ്ഞ് മനസ്സിലാക്കുന്നുണ്ട്. 'Partner For Life' അടക്കമുള്ള പ്രയോഗങ്ങൾ അത്തരത്തിൽ ഉദിച്ചതാണ്. അത്തരത്തിൽ ഓരോ നിമിഷവും മനുഷ്യമനസ്സിനെ സങ്കീർണ്ണമാകുന്ന ആഖ്യാനത്തിലൂടെ പിടിച്ചിരുത്തുന്നുണ്ട് ചിത്രം.

🔻ഓരോ അഭിനേതാക്കളുടെയും ഗംഭീര പ്രകടനങ്ങളാണ് കഥാപാത്രങ്ങളുടെ ഹർഷസംഘർഷങ്ങൾ നമ്മിലേക്ക് എടുത്തെറിയാൻ സഹായിക്കുന്നത്. ആ കുരുന്നുകൾ എത്ര നിഷ്കളങ്കരാണ്..! ആ പുഞ്ചിരിയും കണ്ണീർ പൊടിഞ്ഞ കണ്ണുകളുമൊന്നും അത്ര വേഗം മനസ്സിൽ നിന്ന് പോവില്ല. ജലാലിന്റെ കഥാപാത്രം ഹമീദ് എന്ന നടനിൽ അങ്ങേയറ്റം സുരക്ഷിതമായിരുന്നു. ഇതോടൊപ്പം തന്നെ ഇറാനിയൻ കാലാവസ്ഥയെ ഭംഗിയായി ഒപ്പിയെടുത്തിട്ടുണ്ട് സംവിധായകൻ. ഏറെ റിയലിസ്റ്റിക്കായ അവതരണത്തിൽ അലിഞ്ഞ് ചേരുന്നു ഛായാഗ്രഹണവും.

🔻ＦＩＮＡＬ ＶＥＲＤＩＣＴ🔻

ഭൂതകാലം വേട്ടയാടുന്ന പിതാവിന്റെ പക്കൽ അദ്ധേഹത്തിന്റെ മക്കൾ സുരക്ഷിതരായിരിക്കുമോ എന്ന ചോദ്യം സിനിമ ബാക്കിവെക്കുന്നുണ്ട്. നിഷ്കളങ്കതയുടെ മുന്നിൽ ധാർഷ്ട്യം മുട്ടുമടക്കുന്ന കാഴ്ച്ച ഹൃദയസ്പർശിയായിരുന്നു. ജീവസ്സുറ്റ ഒരുപിടി കഥാപാത്രങ്ങളും സമ്മാനിച്ച് നെഞ്ചിൽ എരിയുന്ന കനലും കോരിയിട്ട് ആ യാത്ര തുടരുകയാണ്. പ്രേക്ഷകനുമായി പൂർണ്ണ അർത്ഥത്തിൽ സംവദിക്കുന്നിടത്താണ് ചിത്രം മറക്കാനാവാത്ത അനുഭവമായി മാറുന്നത്. ഒരു കുടുംബത്തെ തന്റെ ക്യാമറാഫ്രെയിമിനുള്ളിൽ ഒതുക്കാനുള്ള സത്യസന്ധമായ സംവിധായകന്റെ ശ്രമം അടുത്തറിയുക. ഒരിക്കലും നഷ്ടപ്പെടുത്തരുത് ഈ അനുഭവം.

ＡＢ ＲＡＴＥＳ ★★★★☆

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻തായ്‌ലാന്റിലെ നാടോടിക്കഥകളിൽ സ്ത്രീകളുടെ മുഖവും തലക്ക് കീഴെ ആന്തരിക അവയവങ്ങളുമായി പറന്ന് നടക്കുന്ന ആത്മാക്കളെ Krasue എന്നാണ് വിളിക്കുന്നത്. വളരെ സുന്ദരികളാവും അവ. പല കാരണങ്ങളാലാണ് ആ രൂപത്തിലേക്ക് അവർ എത്തിപ്പെടുന്നത്. മനുഷ്യമാംസത്തെക്കാൾ അവർക്കിഷ്ടം മൃഗങ്ങളുടെ മാംസമാവും. ഈയൊരു രൂപകൽപ്പനയിൽ നിന്ന് പിറവിയെടുത്തതാണ് ഈ ചിത്രം.

Year : 2019
Run Time : 2h 2min

🔻നാല് കുട്ടികളുടെ സൗഹൃദത്തിൽ നിന്നാണ് കഥ തുടങ്ങുന്നത്. അവർ Hide & Seek കളിക്കാനായി കാടിനകത്തെ ഒഴിഞ്ഞ വീട്ടിലേക്ക് എത്തിച്ചേരുന്നു. ദുരൂഹത പടരുന്ന അന്തരീക്ഷം ഏവരിലും ഭയം നിറക്കുന്നു. എന്നാൽ അതിലൊരാളെ കാണാതാവുന്നതോടെ കാര്യങ്ങളുടെ ഗതി മാറുന്നു.

🔻ആദ്യ രംഗം മാത്രമാണ് മേൽ പറഞ്ഞത്. കൂടുതൽ പറഞ്ഞാൽ കഥയിൽ വരുന്ന exciting മൊമന്റുകൾ നഷ്ടപ്പെടും എന്ന് തോന്നുന്നു. പതിഞ്ഞ തുടക്കത്തിൽ നിന്ന് കൗതുകകരമായ വസ്തുതകൾ നമ്മിലേക്ക് ഇട്ടുതന്ന് താല്പര്യം ജനിപ്പിക്കുന്ന രീതി അവലംബിക്കുന്ന സിനിമയിൽ ഏതൊരു വഴിത്തിരിവും പറയുന്നത് സ്പോയിലർ ആവും. ഹൊറർ അത്ര താല്പര്യമുള്ള ജേണർ അല്ലെങ്കിലും ഇഷ്ടമുള്ള ഹൊറർ സിനിമകളിൽ ഒന്ന് Shutter ആണ്. പിന്നെ Pee Makഉം. Krasueവിൽ സംവിധായകൻ അന്തരീക്ഷത്തിൽ ഭയം സൃഷ്ടിച്ചെടുക്കുന്ന രീതി ഏറെ ഇഷ്ടപ്പെട്ടു. അനാവശ്യമായ ഹൊറർ രംഗങ്ങളോ jump scareകളോ ഇല്ലാതെ ഓരോ രംഗങ്ങളിലും ഉയർന്നുവരുന്ന ഭയപ്പാടുണ്ട്. അതിനൊപ്പം നമ്മിൽ ഉദിക്കുന്ന ടെൻഷനും. അത് തന്നെയാണ് സിനിമയുടെ ഹൈലൈറ്റ്.

🔻ഹൊററിനൊപ്പം ഫാന്റസിയും റൊമാൻസും പ്രധാനമായി കടന്നുവരുന്നുണ്ട്. അതുകൊണ്ട് തന്നെ കഥാപാത്രങ്ങളുമായി വേഗം കണക്റ്റ് ചെയ്യാൻ സാധിക്കുന്നുണ്ട്. അവർക്കിടയിലെ ആത്മബന്ധം ഏറെ ഹൃദ്യമാണ്. ഒരു നാടോടിക്കഥയെക്കാൾ ഉപരി വേറൊരു തലത്തിലേക്ക് ചില രംഗങ്ങൾ ഉയരുന്നുണ്ട്. ഒടുവിൽ ഒരൽപം മാനസികപിരിമുറുക്കം കാണികളിൽ സമ്മാനിച്ച് സൊമ്പരപ്പെടുത്തുന്ന പര്യവസാനവുമായി നല്ല ഓർമ്മകൾ സമ്മാനിച്ച് കഥക്ക് തിരശീല വീഴുകയാണ്.

🔻അഭിനേതാക്കളുടെ പ്രകനങ്ങളെ സ്മരിക്കാതെ വയ്യ. ഗംഭീര പ്രകടനം തന്നെയാണ് ഏവരും കാഴ്ച്ച വെച്ചിരിക്കുന്നത്. അതിൽ കേന്ദ്രകഥാപാത്രമായവർ മനസ്സ് കീഴടക്കുന്നുണ്ട്. VFX വർക്കുകൾ ക്ലൈമാക്സ് ഒഴികെ എല്ലായിടത്തും വളരെ മികവ് പുലർത്തുന്നുണ്ട്. കഥയുടെ ഡീറ്റെയ്‌ലിങ്ങ് ഉൾപ്പടെ അവതരണത്തിലെ സർവ്വ മേഖലകളിലും ഒന്നിനൊന്ന് മികച്ച് നിൽക്കുന്നത് കാണാം. ഭയാനകമായ അന്തരീക്ഷം സൃഷ്ടിക്കുന്നതിൽ ഛായാഗ്രഹണവും പശ്ചാത്തലസംഗീതവും പൂർണ്ണമായി വിജയിച്ചിട്ടുണ്ട്.

🔻ＦＩＮＡＬ ＶＥＲＤＩＣＴ🔻

തായ്ലാന്റിന്റെ ഒഫിഷ്യൽ ഓസ്കർ എൻട്രി ആയിരുന്ന ചിത്രം മികച്ച അനുഭവമാണ് സമ്മാനിച്ചത്. നാടോടിക്കഥകൾ കാണുന്ന ലാഘവത്തോടെയല്ലെങ്കിൽ കൂടി ഏവർക്കും കണ്ടാസ്വദിക്കാൻ പാകത്തിനാണ് ചിത്രം ഒരുക്കിയിരിക്കുന്നത്. അവതരണം ഹൃദ്യമാണെന്നത് കൊണ്ട് തന്നെ ചെറിയൊരു വിഷമം മനസ്സിൽ കോറിയിട്ടു ചിത്രം. തീർച്ചയായും നിരാശരാവേണ്ടി വരില്ല എന്നുറപ്പ്.

ＡＢ ＲＡＴＥＳ ★★★½

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻ഇസ്രായേൽ-പലസ്തീൻ യുദ്ധഭീകരതയെ കുറിച്ച് ഒരു പരിചയപ്പെടുത്തൽ ആവശ്യമുണ്ടെന്ന് തോന്നുന്നില്ല. വംശഹത്യകൾ ദിനംപ്രതി വർദ്ധിച്ചുകൊണ്ടിരിക്കുന്ന മേഖലയിൽ മനുഷ്യജീവനുകൾ എപ്പോഴും അപകടത്തിലാണ്. പല സിനിമകളിലും ആ പ്രദേശത്തെയും ജനങ്ങളുടെയും ദുരിതങ്ങളെ പറ്റി പ്രതിപാദിക്കുന്നുണ്ട്. അവയൊക്കെയും ഗൗരവകരമായ ആഖ്യാനശൈലിയാണ് അവലംബിച്ചിരിക്കുന്നത്. അവിടെയാണ് 'Tel Aviv On Fire' വേറിട്ട് നിൽക്കുന്നത്.

Year :2018
Run Time : 1h 40min

🔻സിനിമയുടെ അതെ പേരിലുള്ള ടെലിവിഷൻ ഷോയുടെ അണിയറയിൽ സഹാഹിയായി ജോലി ചെയ്യുകയാണ് ജറുസലേമിൽ വസിക്കുന്ന പലസ്തീനിയനായ സലാം. ഒരു ഘട്ടത്തിൽ അദ്ദേഹത്തിന് ആ സീരീസിന്റെ തിരക്കഥയെഴുതാൻ അവസരം കിട്ടുന്നു. അതെ സമയം തന്നെ ഇസ്രായേൽ മിലിറ്ററി ഉദ്യോഗസ്ഥനുമായ അസി യാദൃശ്ചികമായി അദ്ദേഹത്തിന്റെ ജീവിതത്തിലേക്ക് കടന്നുവരുന്നു. തുടർന്ന് സലാമിന്റെ ജീവിതത്തിലുണ്ടാവുന്ന സമ്മർദ്ദങ്ങളാണ് ചിത്രം കൈകാര്യം ചെയ്യുന്നത്.

🔻അങ്ങേയറ്റം സങ്കീർണ്ണമായ വിഷയത്തെ അതിന്റെ പ്രാധാന്യം ഒട്ടും ചോരാതെ നർമ്മത്തിന്റെ മേമ്പൊടിയോടെ അവതരിപ്പിച്ചിരിക്കുകയാണ് സംവിധായകൻ. സിനിമയിൽ കാണാനാവുന്ന സീരീസിന്റെ ഉള്ളടക്കം തന്നെ ഇസ്രായേൽ-പലസ്തീൻ കോൺഫ്ലിക്ട് ആണ്. റൊമാന്റിക്ക് മൂഡിലാണ് സീരീസ് മുന്നേറുന്നതെങ്കിലും അവിടിവിടെയായി രാഷ്ട്രീയവും പറഞ്ഞ് പോവുന്നുണ്ട്. എന്നാൽ അസിയേ കാണുന്നത് മുതൽ സീരീസ് വേറൊരു തലത്തിലേക്ക് കൊണ്ടുപോവാൻ സലാം നിർബന്ധിതനാവുകയാണ്. അതോടെ ചർച്ച ചെയ്യപ്പെടുന്നത് ഇരു രാജ്യങ്ങളുടെയും രാഷ്ട്രീയമാണ്.

🔻ഇസ്രയേലിലും പലസ്തീനിലും ഒരുപോലെ ടെലികാസ്റ്റ് ചെയ്യപ്പെടുന്ന സീരീസ് എന്നതാണ് ഏറ്റവും വെല്ലിവിളി. ഇരുവരുടെയും വികാരം വൃണപ്പെടുത്താതെ നോക്കേണ്ടത് സലാമിനെ പോലെ അണിയറയിലുള്ളവരുടെയും സ്പോൺസർമാരുടെയും ആവശ്യമാണ്. എന്നാൽ നിർബന്ധിത സാഹചര്യത്തിൽ അദ്ദേഹത്തിന് അസിക്ക് മുന്നിൽ വഴങ്ങുകയല്ലാതെ മറ്റു വഴികൾ ഉണ്ടായിരുന്നില്ല. സീരീസിലെ രാഷ്ട്രീയമല്ല, റൊമാൻസ് ആസ്വദിക്കാനാണ് അത് കാണുന്നതെന്ന് ചില കഥാപാത്രങ്ങൾ പറയുന്നുണ്ടെങ്കിലും രാഷ്ട്രീയം അവതരിപ്പിക്കുകയല്ലാതെ മറ്റ് രക്ഷയുണ്ടായിരുന്നില്ല. തുടർന്നുള്ള രസകരമായ സംഭവങ്ങൾ ചിത്രത്തിൽ കാണാം.

🔻ＦＩＮＡＬ ＶＥＲＤＩＣＴ🔻

ഒരുപാട് പുരസ്കാരങ്ങൾ വാരിക്കൂട്ടിയ ചിത്രം ലക്സംബർഗിന്റെ ഒഫിഷ്യൽ ഓസ്കാർ എൻട്രി കൂടിയായിരുന്നു. ഇതുവരെ കണ്ടുശീലിച്ചതിനപ്പുറമുള്ള ആഖ്യാനശൈലി ആസ്വാദനത്തിന് മുതൽക്കൂട്ടാണ്. ഇത്തരത്തിലുള്ള അനുഭവങ്ങൾ വിരളമായത് കൊണ്ട് തന്നെ തീർച്ചയായും കാണുക ഈ ചിത്രം.

ＡＢ ＲＡＴＥＳ ★★★½

ചിത്രം ടെലിഗ്രാം ചാനലിൽ ലഭ്യമാണ്. Abi Suggests