Abeed Azad

🔻ചില സിനിമകളോട് അവയുടെ പ്രമേയങ്ങൾക്കപ്പുറം നമുക്കൊരു അടുപ്പം തോന്നും. നമ്മെ ആകർഷിക്കത്തക്ക പുതുമയൊന്നും കഥയിൽ കാര്യമായി കാണാൻ സാധിക്കില്ല. എന്നാൽ ഉള്ള കാര്യങ്ങളെ പ്രേക്ഷകനോട് അടുപ്പിക്കുന്നതിൽ അണിയറപ്രവർത്തകരുടെ വൈദഗ്ധ്യം അനുഭവിച്ചറിയാൻ സാധിക്കും. അങ്ങനെ പ്രിയപ്പെട്ട ഒത്തിരി സിനിമകളുണ്ട്. ആ നിരയിലേക്ക് ചേക്കേറുകയാണ് Equals എന്ന ചിത്രവും.

Year : 2015
Run Time : 1h 41min

🔻മനോവികാരങ്ങൾ കുറ്റമായി കണക്കാക്കുന്ന ഒരു ലോകം. അവിടെ താമസിക്കുന്നവരെല്ലാം എല്ലാ ദിവസവും ഒരേ പതിവ് കാര്യങ്ങളിൽ ഏർപ്പെടുന്നവർ. മറ്റുള്ളവരുമായി യാതൊരു സ്നേഹബന്ധത്തിലും ഏർപ്പെടാത്തവർ. അവിടെയാണ് നിയയും സൈലസും താമസിക്കുന്നത്. അപ്രതീക്ഷിതമായാണ് അവർക്കിടയിൽ പ്രേമം മുളപൊട്ടുന്നതും. എന്നാൽ കൂടുതൽ പ്രശ്നങ്ങളിലേക്ക് വഴി തുറക്കുകയായിരുന്നു അത്.

🔻പ്രണയമെന്ന വികാരത്തെ അതിന്റെ തീക്ഷ്ണതയിൽ അവതരിപ്പിച്ചിരിക്കുന്നത് കാണാം ഈ ചിത്രത്തിൽ. എത്രത്തോളം ലളിതമാണോ അത്രത്തോളം ഹൃദ്യവുമാണ് നിയയുടെയും സൈലസിന്റെയും ആത്മബന്ധം. ഇരുവരും തമ്മിലുള്ള സംസാരങ്ങളിൽ പോലും നാം ഒരുപാട് സന്തോഷം കണ്ടെത്തും. ആ ലോകത്ത് അകപ്പെട്ടുകഴിഞ്ഞാൽ അവിടെയുണ്ടാകുന്ന ഓരോ ചലനങ്ങളും നമുക്കും ആസ്വദിക്കാം. ഒരുപക്ഷെ നമ്മിൽ തന്നെ അവരെ കണ്ടെത്താൻ സാധിക്കും നമുക്ക്.

🔻Kirsten Stewartന്റെ controlled acting ആ കഥാപാത്രത്തെ ഗംഭീരമാക്കുന്നുണ്ട്. ഏറെ ഇഷ്ടം തോന്നുന്ന നിയയെന്ന കഥാപാത്രത്തെ സിനിമ സമ്മാനിക്കുന്നു. ഹോൾട്ടിന്റെയും പ്രകടനം നന്നായിരുന്നു.Guy Pearceന്റെ കഥാപാത്രം സിനിമയിൽ വലിയൊരു പങ്ക് വഹിക്കുന്നുണ്ട്. ഒപ്പം വശ്യമനോഹര ദൃശ്യങ്ങളും കഥയോട് രംഗങ്ങളോട് ചേർന്ന് നിൽക്കുന്ന പശ്ചാത്തലസംഗീതവും ആസ്വാദനത്തിന്റെ മാറ്റ് കൂട്ടുന്നു.

🔻ＦＩＮＡＬ ＶＥＲＤＩＣＴ🔻

കഥയിൽ പുതു കണ്ടെത്താനായില്ല എന്നതൊഴിച്ചാൽ നല്ലൊരു അനുഭവം തന്നെയായിരുന്നു Equals എനിക്കായി കരുതിവെച്ചിരുന്നത്. മികച്ച പ്രകടനങ്ങളും അതിമനോഹരമായ ദൃശ്യങ്ങളും നൊമ്പരം സമ്മാനിച്ച ക്ലൈമാക്സുമടക്കം തൃപ്തികരമായ കാഴ്ച. വമ്പൻ സിനിമയെന്ന അഭിപ്രായമില്ലെങ്കിലും കണ്ടിരിക്കാം ഈ ചിത്രവും.

ＡＢ ＲＡＴＥＳ ★★★☆☆

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻ആ വീട്ടിലുള്ള ഓരോ വസ്തുവിനും സ്റ്റീവിന്റെ ജീവിതത്തിൽ വ്യക്തമായ വേഷമുണ്ടായിരുന്നു. വാർദ്ധക്യമെത്തിയ സ്റ്റീവിന്റെ ജീവിതത്തിലെ ഏതെങ്കിലുമൊരു ഘട്ടത്തിൽ നിർണ്ണായകമായ വഴിത്തിരിവുകൾ സൃഷ്ടിക്കുന്നതിൽ അവയൊക്കെയും പങ്ക് വഹിച്ചിരുന്നു. മരണത്തിന് കീഴടങ്ങാൻ തയ്യാറായി നിൽക്കുന്ന ഘട്ടത്തിൽ ജീവിതത്തിലേക്ക്, തന്റെ ഭൂതകാലത്തിലേക്ക് വെളിച്ചം വീശാൻ സ്റ്റീവിനെ പ്രേരിപ്പിച്ചതും അവയൊക്കെത്തന്നെയാണ്. ചെറുപ്പം മുതൽ തന്നെ ദുരിതപൂർണ്ണമായ ജീവിതം നയിച്ചുവന്ന സ്റ്റീവിന് ആശ്വാസമേകിയ തണൽവൃക്ഷങ്ങളായി ചിലർ വന്നുവെങ്കിലും ദൈവത്തിന്റെ പരീക്ഷണങ്ങൾ എപ്പോഴും അവനെ പിന്തുടർന്നുകൊണ്ടിരുന്നു,

Year : 2019
Run Time : 1h 21min

🔻ഒന്നര മണിക്കൂർ പോലുമില്ലാത്ത സിനിമയുടെ കഥ പറയുന്നില്ല. എന്നാൽ ആഖ്യാനത്തിലെ ചില പ്രത്യേകതകളോട് അങ്ങേയറ്റം ഇഷ്ടം തോന്നി. സ്റ്റീവിന്റെ വാർദ്ധക്യത്തിലെ മൗനം തന്നെയാണ് ഒരു ഘട്ടത്തിൽ ഏറെ വിഷമം നൽകിയത്. ഭൂതകാലത്തിന്റെ സകല കുറ്റബോധവും പേറിയ ആ കഥാപാത്രത്തെ മൗനം കൊണ്ടല്ലാതെ അടയാളപ്പെടുത്താൻ സാധിക്കില്ല. JK Simmonsന്റെ ഗംഭീര പ്രകടനം അതിന് മുതല്കൂട്ടാവുന്നുണ്ട്. ഭൂതകാലവും വർത്തമാനകാലവും ഇടകലർത്തിയുള്ള അവതരണശൈലി മനസ്സിനെ വല്ലാതെ ഉലക്കുന്നുണ്ട്. തന്റെ ജീവിതത്തിലുണ്ടായ ഓരോ സംഭവങ്ങളുടെയും പരിണിതഫലം വൃദ്ധനായ സ്റ്റീവിൽ പ്രകടമാണ്.

🔻സ്റ്റീവ് കണ്ണാടിയിൽ നോക്കുന്ന ചില രംഗങ്ങളുണ്ട്. സിനിമയിൽ ഒരു കഥാപാത്രം കണക്കെ പ്രാധാന്യമുള്ള സംഗതിയായി മാറുന്നുണ്ട് കണ്ണാടികൾ. വൃദ്ധനായ സ്റ്റീവ് കണ്ണാടിയിൽ നോക്കുമ്പോൾ പലപ്പോഴായി കാണുന്നത് തന്റെ മാതാപിതാക്കളെ തന്നെയാണ്. കള്ളുകുടിയനായ അച്ഛനും ദേഷ്യക്കാരിയായ അമ്മയും അവർക്കിടയിൽ സ്നേഹം കൊതിക്കുന്ന സ്റ്റീവിനെയും നമുക്ക് കാണാം. തന്റെ കൗമാരത്തിലേക്ക് വരുമ്പോൾ അതിൽ നിന്ന് ഒട്ടും വ്യത്യസ്തമല്ല തന്റെ ജീവിതത്തിലും സംഭവിച്ചത് എന്നൊരു ബോധ്യം സ്റ്റീവിനുണ്ടാവുന്നുണ്ട്. എന്നാൽ അതൊക്കെ നേർവഴിയിലാക്കാൻ ശ്രമിക്കുമ്പോഴും ജീവിതം കൈവിട്ടുപോവുകയാണ്. ഒരു കുട്ടിയുടെ ജീവിതത്തിൽ മാതാപിതാക്കളുടെ സ്വാധീനം എത്രത്തോളമുണ്ടെന്ന് കൃത്യമായി വരച്ചുകാട്ടുന്നുണ്ട് സംവിധായകൻ. ചില രംഗങ്ങൾ ശരിക്കും മനസ്സിൽ കൊണ്ടു എന്ന് തന്നെ പറയാം.

🔻J.K Simmons, Sebastian Stan, Iain Armitage തുടങ്ങിയവരുടെ മികച്ച പ്രകടനം സ്റ്റീവ് എന്ന കഥാപാത്രത്തെ വേറൊരു തലത്തിലേക്ക് ഉയർത്തുന്നുണ്ട്. സ്റ്റീവിന്റെ ഹർഷസംഘർഷങ്ങൾ കൃത്യമായി അടയാളപ്പെടുത്താൻ മൂവർക്കും ആയിട്ടുണ്ട്. ചില നേരങ്ങളിൽ സിമ്മൺസിന്റെ പ്രകടനം അപാരമാണ്. ഒരു സംഭാഷണം പോലുമില്ലാതെയാണ് ഇത്തരമൊരു പ്രകടനം എന്നതാണ് ശ്രദ്ധേയം.

🔻ＦＩＮＡＬ ＶＥＲＤＩＣＴ🔻

ആരും പറഞ്ഞ് കേട്ടിട്ടില്ലാത്ത, IMDBയിൽ പോലും ശരാശരി റേറ്റിങ്ങ് ഉള്ള ഒരു underrated മൂവി ആയിട്ടാണ് 'I'm Not Here' ഫീൽ ചെയ്തത്. ചുരുങ്ങിയ നേരം കൊണ്ട് ഹൃദ്യമായ ഒരനുഭവം സമ്മാനിക്കാൻ സാധിച്ചിടത്താണ് ചിത്രം പ്രിയപ്പെട്ടതായത്. നല്ലൊരു കുടുംബചിത്രം ആസ്വദിക്കാൻ ആഗ്രഹമുണ്ടെങ്കിൽ സമീപിക്കുക. നിരാശപ്പെടില്ലെന്ന് മനസ്സ് പറയുന്നു.

ＡＢ ＲＡＴＥＳ ★★★½

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

Year : 2019
Run Time : 2h 14min

🔻വരുണും ദീപ്തിയും ഏഴ് വർഷമായി കുട്ടികൾക്കായി ട്രൈ ചെയ്തുകൊണ്ടിരിക്കുകയാണ്. തങ്ങളുടെ കയ്യിലുള്ള ട്രൈ മുഴുവൻ സമർപ്പിച്ച ശേഷവും അത്ഭുതങ്ങളൊന്നും സംഭവിക്കാത്തത് കൊണ്ട് അടുത്ത സ്റ്റെപ്പായ IVFനെക്കുറിച്ച് അവർ ചിന്തിക്കുന്നു. അതിനായി ഡോക്ടർ ജോഷിയുടെ ലാബിൽ അവർ എത്തിച്ചേരുന്നു. സന്തോഷത്തിന്റെയും പ്രതീക്ഷയുടെയും ദിവസങ്ങൾ അവരുടെ ജീവിതത്തിലൂടെ കടന്ന് പോവുന്ന സമയത്താണ് ജോഷിയുടെ ഒരു കോൾ അവരെത്തേടി വന്നത്. വേഗം ലാബിലേക്ക് വരണം എന്നായിരുന്നു ആഞ്ജ. അതോടെ അവരുടെ പ്രതീക്ഷകൾ തകിടം മറിയുകയാണ്.

🔻അക്ഷയ് കുമാറിന്റെയും കരീനയുടെയും കോമ്പിനേഷൻ സീനുകളിലെ വൺ ലൈനറുകളിൽ നിന്നായിരുന്നു ചിരിയുടെ തുടക്കം. ആ കൂട്ടത്തിലേക്ക് ദിൽജിത്തും കിയാറയും കൂടി ചേർന്നപ്പോൾ ഈയടുത്ത് കണ്ടതിൽ ഏറെ ചിരിപ്പിച്ച ബോളിവുഡ് മൂവിയായി Good Newwz. കഥയിൽ പുതുമകൾ യാതൊന്നും പ്രതീക്ഷിക്കാത്തത് കൊണ്ട് തന്നെ അതിൽ വന്ന കോമഡികൾ നന്നായി ആസ്വദിക്കാനായി. സിറ്റുവേഷൻ കോമഡികൾ ആവോളമുണ്ടായിരുന്നു പിടിച്ചിരുത്താൻ. ഒരു രംഗത്തിലെ വെറുപ്പിക്കൽ ഒഴികെ ബാക്കിയെല്ലാം നന്നെ ബോധിക്കുകയും ചെയ്തു.

🔻കഥയിൽ പുതുമയും മറ്റും പ്രതീക്ഷിക്കാതെ entertainment എന്ന ഘടകം മാത്രമാണ് തേടുന്നതെങ്കിൽ ഗുഡ് ന്യൂസ് നല്ലൊരു ചോയ്‌സ് തന്നെയാണ്. അവസാനരംഗങ്ങളിൽ അൽപ്പം മെലോഡ്രാമയുണ്ടെങ്കിൽ കൂടി അവയൊന്നും മടുപ്പിക്കാതെ കൈകാര്യം ചെയ്തിട്ടുണ്ട്. ടൈം പാസ്സ് ഫ്ലിക്ക് എന്ന ലേബൽ എന്തുകൊണ്ടും ചേരും ഈ ചിത്രത്തിന്.

ＡＢ ＲＡＴＥＳ ★★★☆☆

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻സിനിമ വെറും വിനോദോപാധി മാത്രമല്ല, ശക്തമായ രാഷ്ട്രീയത്തിന്റെ വക്താവ് കൂടിയാണ്. ഭരണഗൂഢവുമായി നിരന്തരം കലഹിക്കുന്ന കലാകാരന്മാരെ ലോകത്ത് കാണാൻ സാധിക്കും. ഇറാനിയൻ സംവിധായകൻ ജാഫർ പനാഹിയുടെ ജീവിതം അതിനുദാഹരണമാണ്. അദ്ദേഹത്തിന്റെ സിനിമകളുടെ ഉള്ളടക്കം എപ്പോഴും ഇറാനിയൻ ചട്ടക്കൂടിനുമപ്പുറം സംവദിക്കുന്നവയാണ്. ഇറാനിലെ കുട്ടികളുടെയും സ്ത്രീകളുടെയും സ്വാതന്ത്ര്യത്തെ പ്രമേയമാക്കി സിനിമകൾ അദ്ദേഹം ഒരുക്കിയിട്ടുണ്ട്. അത് അദ്ദേഹത്തെ പ്രതികൂലമായി ബാധിച്ചിട്ടുമുണ്ട്. പലപ്പോഴും ജയിൽ ശിക്ഷ അനുഭവിക്കേണ്ടി വരികയും സിനിമയിൽ നിന്ന് വിലക്ക് നേരിടേണ്ടി വരികയും ചെയ്തിട്ടുണ്ട്.

ആ സാഹചര്യത്തിൽ തന്നെ അദ്ദേഹം ഒരുക്കിയ ചിത്രമാണ് Taxi Tehran. ഒരു mainstream movie ആയിട്ടല്ല അദ്ദേഹം ആ സിനിമ സംവിധാനം ചെയ്തത്. ഒരു കാർ യാത്രയിൽ ക്യാമറയുമായി അദ്ദേഹം നഗരം ചുറ്റാനിറങ്ങി. അതിനിടയിൽ ആ കാറിൽ വന്നുപെട്ട തന്റെ അനന്തരവളോടും ഒരു C.D വില്പനക്കാരനോടുമടക്കം അദ്ദേഹം സംസാരിച്ചു. അതിലൊക്കെയും ഇറാന്റെ തനത് സിനിമാശൈലികളെ പറ്റി വാചാലനായിരുന്നു അവരൊക്കെയും. Wajib എന്ന സിനിമ കണ്ടപ്പോൾ എനിക്കോർമ്മ വന്നത് Taxi Tehranന്റെ അവതരണമാണ്. Wajibഉം ഒരു കാർ യാത്രയാണ്. അച്ഛനും മകനും ഒരു കല്യാണം വിളിക്കാൻ പോകുന്ന യാത്ര.

Year : 2017
Run Time : 1h 36min

🔻അച്ഛനും മകനും മെറ്റഫറായി നിലനിൽക്കുകയാണ് ഈ സിനിമയിൽ. യുദ്ധകലുഷിതമായ പലസ്തീനിയൻ ജനതയുടെ രണ്ട് അറ്റങ്ങളാണ് അബൂ ഷാദിയും മകൻ ഷാദിയും. ചിതറിക്കിടക്കുന്ന ജനതയെ ഐക്യപ്പെടുത്താൻ ആഗ്രഹിക്കുന്നവരുടെ പ്രതിരൂപമായി നിലകൊള്ളുകയാണ് അബൂ ഷാദി. തന്റെ മകളുടെ കല്യാണം വിളിക്കാൻ പലരെയും കണ്ടുമുട്ടുന്ന വഴിയിൽ മകനെ പറ്റി പറയുന്ന കള്ളത്തരങ്ങൾ ഓരോന്നും ആ ഐക്യം നഷ്ടപ്പെടാതിരിക്കാനാണ്. എന്നാൽ ഷാദിയാവട്ടെ ഒരിക്കൽ ഭരണഗൂഢത്തിനെതിരെ പ്രഷേധിക്കുകയും ഒടുക്കം നാട് വിടേണ്ടി വരികയും ചെയ്ത യുവാവ്. ആ ഇടവേളയിൽ അദ്ദേഹത്തിന്റെ സ്വഭാവത്തിന് കാര്യമായ മാറ്റങ്ങൾ ഉണ്ടായിട്ടുണ്ട്. ഒരുപക്ഷെ പലസ്തീനിയൻ കൽച്ചറിൽ നിന്ന് തന്നെ അദ്ദേഹത്തിന് വ്യതിയാനം സംഭവിച്ചിട്ടുണ്ട്. ഷാദിയുടെ സംഭാഷണങ്ങളിൽ അത് വ്യക്തമാണ്.

🔻ഷാദിയുടെ കാമുകിയുടെ അച്ഛൻ അബൂ ഷാദിയെ ഫോണിൽ വിളിക്കുമ്പോഴുള്ള സംഭാഷണശകലങ്ങളിൽ ഫലസ്തീനിന്റെ സാമൂഹികാന്തരീക്ഷത്തെ വരച്ചിടുന്നുണ്ട്. യുദ്ധഭീതിയിൽ കഴിയുന്ന ജനങ്ങളെയും ശത്രുവാണോ മിത്രമാണോ എന്ന സംശയം പോലും നിഴലിക്കുന്ന ജനങ്ങളെയും അവർക്ക് ചുറ്റും കാണാൻ സാധിക്കുന്നുണ്ട്. അവരുടെ സംഭാഷണങ്ങളിൽ പോലുമുണ്ട് അഭിപ്രായങ്ങളിലെ വൈരുധ്യങ്ങൾ. ഒരുപക്ഷെ പലസ്തീനിൽ യുദ്ധമില്ലാത്ത സാഹചര്യം ഉണ്ടായാൽ ആ പ്രദേശം എങ്ങനെയാവും എന്നൊരു സൂചന കൂടി ചിത്രം നൽകുന്നുണ്ട്.

🔻ജീവിതത്തിൽ അച്ഛനും മകനുമായ അബൂ ഷാദിയും ഷാദിയുമാണ് ലൈംലൈറ്റിൽ ഗംഭീര പ്രകടനം കാഴ്ചവെക്കുന്നത്. വെറുമൊരു ഡ്രാമയെ വേറൊരു തലത്തിലേക്ക് ഉയർത്തുന്നത് ഇരുവരുടെയും പ്രകടനമാണ്. പക്കാ റിയലിസ്ടിക്ക് അപ്രോച്ചാണ് സംവിധായകൻ അവലംബിച്ചിട്ടുള്ളത്. അതുകൊണ്ട് തന്നെ ഇത്തരം ഡ്രാമകൾ ആസ്വദിക്കാത്തവർക്ക് മടുപ്പ് അനുഭവപ്പെട്ടേക്കാം.

🔻ＦＩＮＡＬ ＶＥＲＤＩＣＴ🔻

എപ്പോഴും വാർത്തകളിൽ നിറയുന്ന പലസ്തീനിന്റെ സാമൂഹികാന്തരീക്ഷം ശക്തമായ ഭാഷയിൽ വാജിബ് നമുക്ക് ചൂണ്ടിക്കാണിക്കുന്നുണ്ട്. വെറും കല്യാണം വിളികളിൽ ഒതുങ്ങാതെ രണ്ട് കഥാപാത്രങ്ങളിലൂടെ ഒരു സമൂഹത്തെ തന്നെ പ്രതിനിധീകരിച്ചുള്ള സംഭാഷണങ്ങൾക്ക് തന്നെ സാക്ഷിയാവാൻ ചിത്രത്തിലൂടെ സാധിക്കുന്നുണ്ട്. ഇത്തരം പൊളിറ്റിക്കലി പ്രാധാന്യമുള്ള ഡ്രാമകൾ ഇഷ്ടപ്പെടുന്നവർ മാത്രം കാണുക. ഒപ്പം Taxi Tehran കൂടി അത്തരക്കാർക്ക് നിർദ്ദേശിക്കുന്നു.

ＡＢ ＲＡＴＥＳ ★★★½

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻ക്രിസ്മസിന് മുമ്പുള്ള രാത്രി ആ Morgueൽ ഡോക്ടറും നേഴ്‌സും തങ്ങളുടെ ജോലികളെല്ലാം തീർത്ത് വീട്ടിലെത്താനുള്ള ഒരുക്കത്തിലാണ്. അങ്ങനെ എല്ലാം അവസാനിപ്പിച്ച് ഇറങ്ങാറാവുമ്പോഴാണ് മുഖംമൂടി ധരിച്ച 3 പേർ അവിടേക്കെത്തിയത്. കൈയിൽ തോക്കേന്തിയ അവർ ഡോക്ടറോട് ഒരു ആവശ്യം മുന്നോട്ട് വെച്ചു. ആ മോർഗിലുള്ള ഒരു മൃതശരീരത്തിൽ നിന്ന് വെടിയുണ്ട ഓപ്പറേറ്റ് ചെയ്ത് തരണമെന്ന്.

Year : 2019
Run Time : 1h 34min

🔻ചെറിയൊരു പ്രമേയത്തെ കേവലം ഒന്നര മണിക്കൂറിൽ ഒതുക്കി അവതരിപ്പിച്ചിടത്താണ് ഈ സിനിമ മോശമല്ലാത്ത അനുഭവം സമ്മാനിക്കുന്നത്. ഒരു മോർഗിൽ മാത്രം ഒതുങ്ങുന്ന ക്യാറ്റ് & മൗസ് ഗെയിം അത്യാവശ്യം വൃത്തിയായി തന്നെ അവതരിപ്പിച്ചിട്ടുണ്ട്. അതിൽ തന്നെ ബുദ്ധിപരമായ നീക്കങ്ങളും ഒപ്പം ക്ലിഷേകളും നമുക്ക് കാണാം. കഥയുടെ പോക്ക് വളരെ വേഗത്തിലായത് കൊണ്ട് അതൊന്നും വലിയ കാര്യമായി എടുക്കാനുള്ള അവസരം ലഭിക്കുന്നില്ലെന്ന് മാത്രം.

🔻രാത്രിയുടെ വന്യതയെ മോർച്ചറിയുടെ തണുപ്പിനോട് ലയിപ്പിച്ച് ഈ തീമിന് വേണ്ട കൃത്യമായ ആഖ്യാനം സംവിധായകൻ ഒരുക്കിയിട്ടുണ്ട്. ആ മോർഗിലുള്ള ഓരോ എലമെന്റും അതിനായി വഴിയൊരുക്കുന്നുണ്ട്. ഒപ്പം നമുക്ക് മുന്നിൽ നിരത്തുന്ന ചോദ്യങ്ങൾക്ക് വ്യക്തമായ ഉത്തരം നൽകാനും ഒടുക്കം സാധിച്ചിട്ടുണ്ട്. ടെക്നിക്കലി നല്ലൊരു ഔട്ട്പുട്ട് തന്നെയാണ് ലഭിച്ചിരിക്കുന്നത്. ഛായാഗ്രഹണവും പശ്ചാത്തലസംഗീതവും പ്രമേയത്തോട് ചേർന്ന് നിൽക്കുന്നുണ്ട്.

🔻ＦＩＮＡＬ ＶＥＲＤＩＣＴ🔻

കേവലം ഒന്നരമണിക്കൂർ മാത്രമുള്ള സിനിമയെ പറ്റി കൂടുതൽ പറഞ്ഞാൽ സ്പോയിലർ ആവുമെന്നത് കൊണ്ട് ഇവിടെ നിർത്തുന്നു. ചുരുങ്ങിയ സമയം മാത്രമുള്ള ഡീസന്റ് ത്രില്ലർ ആണ് നമുക്കായി കാത്തിരിക്കുന്നത്. പ്രതീക്ഷകൾ ഒന്നും വെച്ചുപുലർത്താതെ സമീപിച്ചാൽ തൃപ്തികരമായി അവസാനിപ്പിക്കാം ആ കാഴ്ച.

ＡＢ ＲＡＴＥＳ ★★★☆☆

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻Kenyaയിലെ Nairobiയിലേക്ക് എല്ലാ കണ്ണുകളും ഉറ്റുനോക്കുകയാണ്. Al-Shabaab എന്ന ടെററിസ്റ്റ് ഗ്രൂപ്പിന്റെ കണ്ണികളിൽ ചിലർ അവിടെയൊരു യോഗം ചേരുകയാണ്. ആ വിവരം ലഭിച്ച ബ്രിട്ടീഷ് സൈനിക മേധാവികൾ അവിടേക്ക് drone attack നടത്താനുള്ള കണക്കുകൂട്ടലുകളിലും. പല രാജ്യങ്ങളും കരിമ്പട്ടികയിൽ ചേർത്തിട്ടുള്ള ഇവരെ ഒരുമിച്ച് കിട്ടിയ സുവർണ്ണാവസരം പാഴാക്കാനാവില്ലെന്ന് കേണൽ പവലിന് നന്നായി അറിയാം. എന്നാൽ അതിനായുള്ള തയ്യാറെടുപ്പുകളിൽ അപ്രതീക്ഷിതമാം വിധം വെല്ലുവിളികൾ നിറയുന്നു.

Year : 2015
Run Time : 1h 42mi

🔻എല്ലായിപ്പോഴും ചർച്ചക്ക് വിധേയമായിക്കൊണ്ടിരിക്കുന്ന സാങ്കേതികവിദ്യകളിൽ ഒന്നാണ് Modern Warfare. ലോകത്തിന് ഭീഷണിയായി നിൽക്കുന്നവരെ, അല്ലെങ്കിൽ തങ്ങളുടെ രാജ്യങ്ങൾക്ക് ഭീഷണിയായവരുടെ നിലനിൽപ്പിനെ തന്നെ ഇല്ലായ്‌മ ചെയ്യാനുള്ള പുതു വിദ്യകളിൽ മുഴുകുകയാണ് ഭൂരിഭാഗം രാജ്യങ്ങളും. എന്നാൽ മനുഷ്യരാശിക്ക് ഇവ എത്രത്തോളം ദോഷം ചെയ്യുന്നുണ്ടെന്നത് ഇപ്പോഴും ചോദ്യചിഹ്നമാണ്. ഈ സിനിമ മുന്നോട്ട് വെക്കുന്നതും അങ്ങനെയൊരു ചർച്ചയാണ്. Drone attackന്റെ പ്ലാനിങിനിടയിലും അവർക്ക് മുന്നിൽ തടസ്സമായി നിൽക്കുന്നത് കേവലം കുറച്ച് ബ്രെഡ്ഡുകൾ. അതെങ്ങനെയെന്ന് സിനിമ കണ്ട് തന്നെ മനസ്സിലാക്കുക.

🔻ഒരു War മൂവി കാണികളിൽ സൃഷ്ടിച്ചെടുക്കുന്ന ഭീകരാന്തരീക്ഷമുണ്ട്. ഏത് നിമിഷവും എന്തും സംഭവിക്കാമെന്ന് മനസ്സിൽ ബോധം സൃഷ്ടിച്ചെടുക്കുന്ന വിദ്യ. പൂർണ്ണമായി ഒരു war movie എന്ന് വിശേഷിപ്പിക്കാനാവില്ലെങ്കിലും ഇതുമൊരു യുദ്ധമാണ്. മനുഷ്യത്വവും മതവെറിയും തമ്മിലുള്ള യുദ്ധം. എന്നാൽ നാമിപ്പോൾ സ്ഥിരം കേൾക്കുന്ന 'Collateral Damage' എന്ന വാക്ക് പ്രസക്തമാകുന്ന സന്ദർഭം ഇവിടെ വന്ന് ചേരുകയാണ്. അതോടെ യുദ്ധത്തിന്റെ ഉള്ളടക്കത്തിന് തന്നെ  വ്യതിയാനം സംഭവിക്കുന്നു.

🔻ചടുലത നിറഞ്ഞ ത്രില്ലർ അല്ല ഈ ചിത്രം. എന്നാൽ ഒരു പോയിന്റ് കഴിയുമ്പോൾ ഓരോ സംഭാഷണങ്ങളും നമ്മുടെ നെഞ്ചിടിപ്പ് കൂട്ടുകയാണ്. 'Refer Up' എന്ന code നമ്മെ അസ്വസ്ഥപ്പെടുത്തുന്നതിന് കയ്യും കണക്കുമില്ല. അനേകം ജീവനുകൾ നഷ്ടപ്പെടാൻ കെല്പുള്ള സാഹചര്യത്തിനും drone attackനുമിടയിൽ military operation ലീഡ് ചെയ്യുന്ന ഓരോരുത്തർക്കും വ്യക്തമായ വോയിസ് നല്കുന്നിടത്ത് മികച്ച മൊമന്റുകൾക്ക് ചിത്രം സാക്ഷ്യം വഹിക്കുന്നുണ്ട്. സിനിമാറ്റിക്ക് ഗിമ്മിക്കുകൾ കേവലം ചില രംഗങ്ങളിൽ മാത്രം സമർത്ഥമായി ഉപയോഗപ്പെടുത്തി, ബാക്കിയൊക്കെയും യാഥാർഥ്യത്തോട് ചേർന്ന് നിൽക്കും വിധം അവതരിപ്പിച്ച സംവിധായകൻ Gavin Hood പ്രശംസ അർഹിക്കുന്നുണ്ട്. അത്ര മികവുറ്റ രീതിയിൽ തന്മയത്വത്തോടെ ആഖ്യാനം ചെയ്തിട്ടുണ്ട് ഈ വിഷയത്തെ. ടെക്നിക്കലി ചില കാര്യങ്ങളിൽ സംശയമുണ്ടെങ്കിലും അതൊരു പോരായ്മയായി നിഴലിക്കുന്നില്ല.

🔻Helen Mirren ഗംഭീരമായ സ്‌ക്രീൻ പ്രസൻസ് കൊണ്ട് കേന്ദ്രകഥാപാത്രമായി മാറുന്നുണ്ട്. Barkhad Abdi തന്റെ റോൾ ഭംഗിയാക്കിയിട്ടുണ്ട്. Aaron Paulന്റെ പ്രകടനം ഗംഭീരം. തനിക്ക് നിറഞ്ഞുനിൽക്കാൻ സാധിക്കുന്ന സീനുകളിൽ ആ കഥാപാത്രത്തിന്റെ ഹർഷസംഘർശങ്ങൾ മികവുറ്റ രീതിയിൽ അടയാളപ്പെടുത്തുന്നുണ്ട്. ഒരുപക്ഷെ മറ്റാരേക്കാളും ഓർമ്മ നിൽക്കുക ആ കഥാപാത്രമാവും.

🔻ＦＩＮＡＬ ＶＥＲＤＩＣＴ🔻

ആ നിശബ്ദതയിൽ നിന്ന് പെട്ടെന്നൊരു മോചനം ലഭിക്കുക കാണിയെന്ന രീതിയിൽ നമുക്ക് പ്രയാസകരമാണ്. മനുഷ്യരാശിക്ക് മുന്നിൽ ഒരു ചോദ്യചിഹ്നമായി നിൽക്കുന്ന വസ്തുതയെ ഗംഭീരമായി അവതരിപ്പിക്കാൻ സാധിച്ചിട്ടുണ്ട് ചിത്രത്തിന്റെ അണിയറപ്രവർത്തകർക്ക്. ഒന്നേമുക്കാൽ മണിക്കൂർ ഒരിക്കലും നഷ്ടബോധം തോന്നാത്ത വിധം മറക്കാനാവാത്ത അനുഭവം സമ്മാനിക്കുകയാണ് ഈ ചിത്രം.

ＡＢ ＲＡＴＥＳ ★★★½

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻To all the boys I've loved before എന്ന ചിത്രത്തിന്റെ പ്രമേയം അത്യന്തം രസകരമായിരുന്നു. 2018ലെ എന്റെ ഇഷ്ടം Rom-Com coming of age ചിത്രങ്ങളിൽ ഒന്നായിരുന്നു അത്. അതിന്റെ രണ്ടാം ഭാഗമാണ് ഇന്ന് netflix റിലീസ് ആയ I Still Love You.

Year : 2020
Run Time : 1h 41min

🔻താൻ പ്രണയിക്കുന്നവർക്ക് എഴുതിയ കത്തുകൾ ഉണ്ടാക്കിയ കുഴപ്പങ്ങളിൽ നിന്ന് കരകയറി സ്വസ്ഥമായ ജീവിതത്തിലേക്ക് കടക്കുകയാണ് ലാറ. ഒപ്പം തന്നെ ആദ്യ ഡേറ്റിനായി വിളിച്ച പീറ്ററുമുണ്ട്. ഇരുവരും തമ്മിലുള്ള ഇഷ്ടം പനപോലെ വളരുന്ന സമയത്താണ് അവർക്കിടയിലേക്ക് പുതിയൊരാളുടെ എൻട്രി. താൻ എഴുതിയ അഞ്ച് കത്തുകളുടെ ഉടമകളിൽ ഒരാളായ ജോൺ ആമ്പ്രൂസ്.

🔻ആദ്യ ഭാഗം കാണികൾക്ക് പകർന്ന് നൽകിയ ഫ്രഷ്‌നെസ്സ് ഈ ചിത്രത്തിന് പൂർണ്ണമായി നൽകാൻ സാധിച്ചില്ല എന്നതാണ് ഇത്തവണ പോരായ്മയായി തോന്നിയത്. വലിയ സങ്കീർണ്ണതകൾ നിറഞ്ഞ ജീവിതമൊന്നുമല്ല അവരുടേത്. എങ്കിലും ചെറിയ കാര്യങ്ങൾ പോലും അവരെ സന്തോഷിപ്പിക്കുകയും അത്യന്തം ദുഖത്തിലാഴ്ത്തുകയും ചെയ്യുന്നുണ്ട്. ഹോളിവുഡ് റോംകോമുകളിൽ സ്ഥിരം കണ്ടുവരുന്ന ക്ലിഷേകൾ ഇവിടെയും കാണാനാവും. എങ്കിലും മനോഹരമായ മറ്റ് ചില പ്രത്യേകതകൾ കൂടി നമുക്കായി ഒരുക്കുന്നുണ്ട് സംവിധായകൻ.

🔻ലാറ-ജോൺ ജോഡിയുടെ ഫ്ലാഷ്ബാക്ക് രംഗങ്ങളും കത്തുകളിൽ ലാറ കുറിച്ച അവളുടെ ചിന്തകളും അതിമനോഹരമാണ്. ഒരുപക്ഷെ പീറ്ററിനേക്കാൾ ജോണിനോട് അതിയായ സ്നേഹം തോന്നിപ്പോവും വിധം ഹൃദ്യം. ആ ഭാഗം മനോഹരമാക്കിയിടത്താണ് ചിത്രത്തിന്റെ രണ്ടാം ഭാഗം ആസ്വാദ്യകരമായത്. പീറ്ററും ലാറയും തമ്മിലുള്ള കോൺഫ്ലിക്റ്റുകൾ നന്നായി തന്നെ രേഖപ്പെടുത്താൻ ചിത്രത്തിന് സാധിച്ചിട്ടുണ്ട്. ഒരു silly matter എന്നതിൽ കവിഞ്ഞ് ആ പ്രശ്നങ്ങളെ നമുക്ക് മനസ്സിലാക്കാൻ സാധിക്കും. കൗമാരങ്ങളുടെ മനസ്സ് ഇപ്പോഴും ചാഞ്ചാട്ടത്തിൽ ആയിരിക്കുമല്ലോ. സ്വാഭാവികം. ലാറയും Gwenനുമായുള്ള രംഗമൊക്കെ നല്ല ഫീൽ സമ്മാനിച്ചു.

🔻പതിവ് പോലെ Lana Condor അതീവ സുന്ദരിയായി തന്നെ പ്രത്യക്ഷപ്പെട്ടു. ആ മുഖത്ത് വിരിയുന്ന ഭാവങ്ങൾക്കും ചിരികൾക്കും പോലും എന്താ അഴക്. സംസാരശൈലിയൊക്കെ കേൾക്കാൻ തന്നെ എന്താ സുഖം. ശരിക്കും പ്രേമം തോന്നിപ്പോയി എന്നതാണ് സത്യം. ജോണിന്റെ കഥാപാത്രം അഭിനയിച്ച നടനെ സ്‌ക്രീനിൽ കാണാൻ നല്ല graceful ആയിരുന്നു. ഭംഗിയുള്ള മൊമന്റുകൾ സൗണ്ട്ട്രാക്കുകളാൽ മനോഹരമാക്കാൻ ഇത്തവണയും ചിത്രം മറന്നിട്ടില്ല. Opening Shot തന്നെ നല്ലൊരു vibe പകരുന്നുണ്ട് കാണികൾക്ക്.

🔻ＦＩＮＡＬ ＶＥＲＤＩＣＴ🔻

ആദ്യഭാഗം കണ്ടതിന് ശേഷം മാത്രം ഇത് കാണുക. അതിനോളം ആസ്വാദനം ലഭിച്ചില്ലെങ്കിലും ഈ സിനിമക്ക് അതിന്റെതായ മൊമന്റുകൾ ഉണ്ട്. ലളിതവും സുന്ദരവും ഹൃദ്യവുമായ രംഗങ്ങളുണ്ട്. പ്രണയത്തെയും സൗഹൃദത്തേയും ആഴത്തിൽ സ്പർശിക്കുന്നുണ്ട്. നല്ലൊരു അനുഭവം തന്നെയാവും ചിത്രം സമ്മാനിക്കുക.

ＡＢ ＲＡＴＥＳ ★★★☆☆

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

Year : 2019
Run Time : 2h 6min

🔻പതിവ് കാർത്തിക് ആര്യൻ സിനിമ പോലെ തന്നെ മറ്റൊരു ചിത്രം. പുതുമയില്ലാത്ത കഥയാണെങ്കിലും ആവശ്യത്തിന് കോമഡി നമ്പറുകൾ ഭംഗിയായി കോർത്തിണക്കിയ നല്ലൊരു എന്റർടൈനർ ആണ് Pati Patni Aur Woh. കാർത്തിക്കിന് പതിവ് മാനറിസവും നെടുനീളൻ ഡയലോഗുകളും കൊണ്ട് തകർക്കാൻ സ്‌പേസ് ഉള്ളപ്പോഴും ശ്രദ്ധ നേടുന്നത് അപർശക്തിയുടെ ഫഹീം റിസ്‌വി എന്ന കഥാപാത്രമാണ്. പുള്ളിയെ സ്‌ക്രീനിൽ കണ്ടാൽ ചിരി ഗ്യാരന്റി എന്ന കണക്കെയാണ് സിനിമയുടെ പോക്ക്. കൺഫ്യൂഷൻ കോമഡി നന്നായി ചിരിക്കാനുള്ള വക നൽകുന്നുണ്ട്.

🔻നായികമാരായ ഭൂമിയെയും അനന്യയെയും അപാര ക്യൂട്ടിനെസ്സോടെ സിനിമയിൽ കാണാം. ഇരുവരുടെയും റോളുകൾ ഒട്ടും വെല്ലുവിളി ഉയർത്തുന്നതല്ലെങ്കിലും സംഗതി കളറായി. ഭൂമിയുടെയും കാർത്തികിന്റെയും ഇന്ററാക്ഷൻ സീനുകൾ രസകരമായിട്ടുണ്ട്. ആ രംഗങ്ങളിലെ ഡയലോഗുകളും. ഒടുക്കം ഊഹിക്കാവുന്ന സിമ്പിളായ ഒരു ഉപസംഹാരത്തിൽ എത്തിച്ചേരുന്നതോടെ ചിത്രം അവസാനിക്കുന്നു.

🔻കാർത്തിക്ക് ആര്യന്റെ luka chuppiയോളം ഇഷ്ടപ്പെട്ടില്ലെങ്കിലും നിരാശ നൽകാത്ത ഒരു എന്റെർറ്റൈനെർ ആണ് ഈ ചിത്രം. കഥയൊന്നും വകവെക്കാതെ നേരമ്പോക്ക് മാത്രമാണ് ഉദ്ദേശമെങ്കിൽ കുറെ ചിരിക്കാൻ വക നൽകുന്ന തൃപ്തികരമായ ടൈംപാസ്സ് ഫ്ലിക്ക്.

ＡＢ ＲＡＴＥＳ ★★½

ചിത്രം ടെലിഗ്രാം ചാനലിൽ ലഭ്യമാണ്. Abi Suggests