Abeed Azad

Gone Girl (2014) - 149 min

'ത്രില്ലർ' എന്ന വിഭാഗം ഓർമവരുമ്പോൾ മനസിലേക്ക് ആദ്യം ഓടി എത്തുന്ന പേരുകളിൽ ഒന്നാണ് 'David fincher'.. വ്യത്യസ്തമാർന്ന ത്രില്ലറുകൾ ഒരുക്കി പ്രേക്ഷക മനസ്സ് കവർന്ന സംവിധായകൻ..Seven, zodiac,Fight club തുടങ്ങിയ ചിത്രങ്ങളിലൂടെ ശ്രദ്ധേയനായ Fincher 2014ൽ പുറത്തിറക്കിയ ചിത്രമാണ് Gone Girl..

സന്തുഷ്ടമായ കുടംബജീവിതം നയിച്ചവരികയായിരുന്നു 'നിക്കും' 'ആമി'യും.. തങ്ങളുടെ അഞ്ചാം വിവാഹവാർഷികത്തിന്റെ അന്ന് വീട്ടിലെത്തുന്ന നിക്ക്, തന്റെ ഭാര്യയെ കാണാനില്ല എന്ന് മനസിലാക്കുകയും തുടർന്ന് പോലീസിൽ പരാതിപ്പെടുകയും ചെയ്യുന്നു.. അന്വേഷണത്തിൽ വീട്ടിൽ രക്തപ്പാടുകളും ബലപ്രയോഗം നടന്നതിന്റെ ലക്ഷണവും പോലീസ് കണ്ടെടുക്കുകയും തുടർന്ന് അതൊരു കൊലപാതകം ആവാം എന്ന നിഗമനത്തിൽ എത്തിച്ചേരുകയും ചെയ്യുന്നു.. ആമിയെ കേന്ദ്രകഥാപാത്രമാക്കി അവളുടെ മാതാപിതാക്കൾ Amazing Amy എന്ന കുട്ടികളുടെ പുസ്തകം ഇറക്കിയിരുന്നതിനാൽ വെറുമൊരു മിസ്സിംഗ് കേസ് ആവാതെ ആമിയുടെ തിരോധാനം വൻ മാധ്യമ ശ്രദ്ധയും ആമിയെ കണ്ടെത്തുന്നതിന് വൻ ജനശ്രദ്ധയും നേടുന്നു.. തുടർന്ന് കേസന്വേഷണം പുരോഗമിക്കുന്നു..

ആദ്യം സംശയത്തിന്റെ വിരലുകൾ ചൂണ്ടുന്നത് നിക്കിലേക്കാണ്.. അന്വേഷണത്തിൽ നിക്ക് നൽകുന്ന തീരെ തൃപ്തികരമല്ലാത്ത ഉത്തരങ്ങളും പ്രതികരണങ്ങളുമാണ് അവയ്ക്ക് കാരണമായത്.. തുടർന്ന് അതിനെ ചുറ്റിപ്പറ്റി മുന്നോട്ട് പോവുന്ന കേസന്വേഷണം പുതിയ വഴിത്തിരിവുകളിലേക്ക് നീങ്ങുന്നു.. ആരും പ്രതീക്ഷിക്കാത്ത വഴിത്തിരിവുകളിലേക്ക്..

2012ൽ Gillian Flynnഎഴുതിയ Gone Girl എന്ന പുസ്തകത്തെ ആസ്പദമാക്കിയാണ് അതേ പേരിൽ ചിത്രം തയ്യാറാക്കിയിരിക്കുന്നത്.. Rosamund Pike, Ben Affleck തുടങ്ങിയവർ യഥാക്രമം ആമി, നിക്ക് എന്നീ കേന്ദ്രകഥാപാത്രങ്ങളെ അവതരിപ്പിച്ചു.. ഗംഭീര പ്രകടനമാണ് ഇരുവരും കാഴ്ച്ചവെച്ചത്.. Pikeയുടെ പ്രകടനം എടുത്ത് പറയേണ്ട ഒന്നാണ്.. അപാര സ്ക്രീൻ പ്രസൻസുമായി ചിത്രത്തിലുടനീളം നിറഞ്ഞ് നിന്നു Pike.. Neil patrick Harris, Tyler Perry, Carrie Coon, Kim Dickens തുടങ്ങിയവർ മറ്റ് പ്രമുഖ റോളുകൾ മികച്ചതാക്കി..

ചിത്രത്തിന്റെ ഏറ്റവും മികച്ച ഘടകം തിരക്കഥയും സംവിധാനവും തന്നെയാണ്..ഏത് തലത്തിലേക്കാണ് കഥ നീങ്ങുന്നതെന്ന് കാണികൾക്ക് ഊഹിക്കാൻ ഒരവസരവും നൽകാത്ത രീതിയിലുള്ള ആഖ്യാന രീതിയാണ് ചിത്രത്തിന്റേത്.. കാണികളെ പിടിച്ചിരുത്തുന്ന ഘടകവും അത് തന്നെ.. മികച്ച തിരക്കഥക്ക് അതിനേക്കാൾ മികച്ച സംവിധാനം കൂടി ആയപ്പോൾ കാണികളെ ത്രില്ലിന്റെ കൊടുമുടി കയറ്റുന്ന ഒരു സൃഷ്ടി ആയി ഈ ചിത്രം..

BAFTA അവാർഡ്, അക്കാഡമി അവാർഡ്,ഗോൾഡൻ ഗ്ലോബ് അവാർഡ്, സ്ക്രീൻ ആക്ടേഴ്സ് ഗിൾഡ് അവാർഡ് എന്നിവയിൽ മികച്ച നടിക്കുള്ള നോമിനേഷനുകൾ pike ആമിയുടെ റോളിലൂടെ കരസ്ഥമാക്കി.. ഗോൾഡൻ ഗ്ലോബ് അവാർഡിൽ മികച്ച സംവിധായകനുള്ള നോമിനേഷേൻ ഫിഞ്ചറും ഗോൾഡൻ ഗ്ലോബ്, BAFTA അവാർഡ്, ക്രിട്ടിക്സ് ചോയിസ് അവാർഡ് എന്നിവയിൽ മികച്ച തിരക്കഥക്കുള്ള നോമിനേഷൻ ഫ്ളിന്നും കരസ്ഥമാക്കി..

ഡേവിഡ് ഫിഞ്ചറിന്റെ ഏറ്റവും കൂടുതൽ പണം വാരിയ ചിത്രം എന്ന പ്രത്യേകതയും Gone Girl സ്വന്തമാക്കി.. ത്രില്ലർ ഇഷ്ടപ്പെടുന്നവർക്ക് ഒരു വിരുന്ന് തന്നെയാണ് ചിത്രം.. 0ne of his Best..

My Rating:: ★★★★½

0Comments

, by Abeed Azad

In 3 star movies, Action

Oru Mexican Aparatha (2017) - 143 min

സമീപകാലത്ത് ഒരു സിനിമക്ക് ലഭിക്കാവുന്ന ഏറ്റവും മികച്ച പ്രീ റിലീസ് പ്രമോഷൻ ആയിരുന്നു ഒരു മെക്‌സിക്കന്‍ അപാരതയുടേത്.. ടൊവിനോയെ മലയാള സിനിമയുടെ പുതിയൊരു സ്റ്റാറായി പ്രതിഷ്ഠിച്ച ചിത്രം.. തന്ത്രപരമായ പ്രമോഷൻ പരിപാടികളിലൂടെ കേരളത്തിലെ യുവത്വത്തിന്റെ മനസ്സിൽ 'മെക്സിക്കൻ അപാരത' എന്ന പേര് പതിപ്പിക്കുവാൻ അണിയറ പ്രവർത്തകർക്കായി.. കട്ടക്കലിപ്പ് പാട്ടിലൂടെയും ട്രെയ്ലറിലൂടെയുമൊക്കെ ചിത്രം വളരേയേറെ പ്രതീക്ഷകൾ എല്ലാവരുടെയും മനസ്സിൽ മുളപ്പിച്ചു.. ഒരു പക്കാ ക്യാമ്പസ് രാഷ്ട്രീയ സിനിമ എന്ന ലേബൽ ആദ്യം തന്നെ ചിത്രം സമ്പാദിച്ചു.. അതിന്റെ ഫലമാണ് ആദ്യ ദിവസത്തെ കോളേജ് പിള്ളേർടെ തള്ളിക്കയറ്റവും ഹൗസ്ഫുൾ ഷോകളും.. ഇനി ചിത്രത്തിലേക്ക്..

ചിത്രത്തിന്റെ കഥ നടക്കുന്നത് എറണാകുളം മഹാരാജാസ് കോളേജിലാണ്.. 'നീല'ക്ക് സർവ്വാധിപത്യമുള്ള കോളേജ്.. നീലയുടെ നേതാവായി രൂപേഷ് എന്ന യുവാവും.. ഒരു ചുവപ്പ് കൊടി നാട്ടാനായി പലരും വെമ്പൽ കൊള്ളുന്നതും എന്നാൽ ഭയക്കുന്നതുമായ കലാലയം.. അവിടേക്കാണ് പോളിന്റെ വരവ്.. കോളേജ് ജീവിതം ആസ്വദിക്കാനെത്തിയ പോളിനെയാണ് നമുക്ക് ആദ്യം കാണാൻ കഴിയുക.. കുട്ടുകാരനായി സഖാവ് സുഭാഷും ഉണ്ട്.. ഇത്തവണ ചുവപ്പ് കൊടി നാട്ടൽ ദൗത്യത്തിന് നേതൃത്വം കൊടുക്കുന്ന ആൾ.. ഒരു പാർട്ടിയുടെയും പ്രവർത്തകനായല്ല പോളിനെ ആദ്യം കാണിക്കുന്നത്.. ഒരു പാർട്ടിയോടും ചായ്വില്ലാതെ പോൾ പെട്ടെന്ന് ഒരു സുപ്രഭാതത്തിൽ തന്റെ വിപ്ലവ വീര്യം പുറത്തെടുത്ത് ചുവപ്പിനോടൊപ്പം ചേരുന്നതും ചെഗുവേരയെ മാതൃകാ പുരുഷനാക്കുന്നതും ഒട്ടും വിശ്വസനീയമായ രീതിയിലല്ല ചിത്രീകരിച്ചിരിക്കുന്നത്.. അത് തന്നെയാണ് ചിത്രത്തിന്റെ ഏറ്റവും വലിയ പോരായ്മയും.. അതിനേക്കാൾ സംവിധായകൻ ശ്രദ്ധ ചെലുത്തിയത് ഒരു ക്യാമ്പസ് പാക്കേജിന്റെ ചേരുവകളായ പ്രണയവും തമാശകളും ഹോസ്റ്റൽ ജീവിതവുമൊക്കെ ഉൾകൊള്ളിക്കാനാണ്.. എന്നാൽ അവ പൂർണ്ണമായി ആസ്വാദനത്തിന് വഴിവെച്ചതുമില്ല.. അങ്ങനെ അത്ര രസം പകരാതെ ഇടക്കിടെ ചിരിപ്പിച്ച് ആദ്യ പകുതി അവസാനിച്ചു.. രണ്ടാം പകുതിയിൽ എന്തെങ്കിലുമൊക്കെ കാണുമെന്ന പ്രതീക്ഷ നൽകുന്ന തരത്തിൽ..

രണ്ടാം പകുതിയിൽ നീലയും ചുവപ്പും തമ്മിലുള്ള വീറും വാശിയുമാണ്.. കോളേജ് ഇലക്ഷനിൽ മത്സരിക്കാൻ ശ്രമിക്കുന്ന എസ് എഫ് വൈ നേരിടേണ്ടി വരുന്ന ബുദ്ധിമുട്ടുകളും അവ തരണം ചെയ്യുന്ന രീതിയും കാണിക്കുകയാണ് ചിത്രത്തിൽ.. യുവാക്കൾക്ക് ആവേശം പകരുന്ന ഡയലോഗുകളും രംഗങ്ങളും ആവോളം ഉൾപെടുത്തിയിട്ടുണ്ട് രണ്ടാം പകുതിയിൽ.. അവിടെയാണ് കാണികളെ തെല്ലെങ്കിലും കയ്യിലെടുക്കുന്നതിൽ ചിത്രം വിജയിച്ചത്.. എതിർ പാർട്ടിയിലെ മാത്രമല്ല സ്വന്തം പാർട്ടിയിലെ കൊള്ളരുതായ്മകളും കുതന്ത്രങ്ങളും തുറന്ന് കാട്ടുന്നുണ്ട് സിനിമ.. അവസാനം തിരുത്തൽവാദി നയത്തിലൂടെ കാണികളുടെ കയ്യടിയും വാങ്ങി.. ആവേശത്തിലാഴ്ത്തുന്ന ക്ലൈമാക്സ് രംഗങ്ങളാണ് ചിത്രത്തിൽ ഏറ്റവും മികച്ച് നിന്നത്.. ഏറ്റവും കൂടുതൽ കയ്യടി ലഭിച്ചതും അതിന് തന്നെ.. അവസാനം കട്ടക്കലിപ്പ് ഗാനത്തോടെ ചിത്രം അവസാനിക്കുന്നു..
വളരെ കുറച്ച് കഥാപാത്രങ്ങൾക്ക് മാത്രമേ ചിത്രത്തിൽ കൃത്യമായ നിർവചനം കൊടുത്തിട്ടുള്ളൂ എന്നതും ഒരു പോരായ്മയാണ്..

പോൾ, കൊച്ചനിയൻ എന്നീ രണ്ട് കഥാപാത്രങ്ങളെ ടൊവിനൊ അവതരിപ്പിച്ചു.. രണ്ട് വേഷങ്ങളും നല്ല രീതിയിൽ കൈകാര്യം ചെയ്തു നായകൻ.. രുപം കൊണ്ടും ഭാവം കൊണ്ടും മികച്ചതാക്കി രണ്ട് കഥാപാത്രങ്ങളും.. എന്നാൽ ടൊവിനോയേക്കാൾ മികച്ച് നിന്നത് നീരജ് അവതരിപ്പിച്ച സഖാവ് സുബാഷും രൂപേഷ് പീതാംബരൻ അവതരിപ്പിച്ച കെ എസ് ക്യൂവിന്റെ നേതാവ് രൂപേഷിന്റെ വേഷവുമാണ്.. ഇരുവരുടെയും സ്ക്രീൻ പ്രസൻസ് മികച്ചതായിരുന്നു.. ഗായത്രി പതിവുപോലെ എന്തിനോവന്ന് നിരാശപ്പെടുത്തിയിട്ട് കളം വിട്ടു.. അവസാനം നായകന്റെ ഒരു മാസ് ഡയലോഗിന് സാക്ഷിയാവാൻ വീണ്ടും ഒന്നു കൂടി മുഖം കാണിച്ചു.. സുധീർ കരമന, ഹരീഷ് പേരടി, വിഷ്ണു, സുബീഷ് സുധി എന്നിവർ മറ്റ് വേഷങ്ങൾ ചെയ്തു.. മറ്റാരും പ്രകടനം മോശമാക്കിയില്ല..

ടെക്നിക്കൽ വൈസ് നോക്കുകയാണെങ്കിൽ ഒരു മാസ് അപ്പീൽ നൽകുവാൻ ഛായാഗ്രഹണവും പശ്ചാത്തല സംഗീതവും മികച്ച പങ്ക് വഹിച്ചിട്ടുണ്ട്.. എഴുപതുകൾ ചിത്രീകരിക്കുന്നതിൽ അദ്ധേഹം വിജയം കണ്ടു.. ഫ്രെയിമുകൾ പലതും മികച്ചതായിരുന്നു.. തിയേറ്ററുകളിൽ ഓളമുണ്ടാക്കുന്ന പശ്ചാത്തല സംഗീതവും സിനിമയെ നല്ല രീതിയിൽ പിന്തുണച്ചു.. പാട്ടുകൾ ശരാശരിയിൽ ഒതുങ്ങി.. പ്രണയ ഗാനം ശരാശരിയിലും താഴെ..' ഏമാൻമാരേ' പാട്ട് പാക്കേജിന്റെ ഭാഗമായി വെറുതെ ഉൾപ്പെടുത്തി..

ഇനി കാര്യത്തിലേക്ക്.. വിരോധാഭാസം എന്തെന്നാൽ മഹാരാജാസിന്റെ ചരിത്രത്തിൽ നടന്ന സംഭവങ്ങള്ളെല്ലാം സിനിമയിൽ പറഞ്ഞതിന് വിപരീതമായിരുന്നു എന്നതാണ് സത്യം.. യഥാർഥത്തിൽ അവിടെ നീലക്ക് പകരം ചുവപ്പായിരുന്നു.. ചുവപ്പിന്റെ സ്ഥാനത്ത് നീലയും..മലയാളികളുടെ മനസ്സിൽ ചുവപ്പിനോടുള്ള പ്രത്യേക താൽപര്യം വാണിജ്യ തന്ത്രമായി സംവിധായകൻ ഉപയോഗിച്ചു.. അതിൽ വിജയിക്കുകയും ചെയ്തു എന്ന് പറയാം.. ഇനീഷ്യൽ ഡേ കളക്ഷനിൽ മറ്റ് പല താരങ്ങളേയും പിന്നിലാക്കി അപാരത മുന്നേറിയത് അതിന് തെളിവാണ്..എങ്കിലും ചരിത്രം ചരിത്രമല്ലാതാവുന്നില്ല എന്നത് ഒരു വസ്തുതയാണ്..

ചരിത്രത്തിലേക്ക് ചികഞ്ഞു നോക്കാതെ ഒരു തിയറ്റർ എക്സ്പീരിയൻസ് മാത്രം ആഗ്രഹിച്ച് ചെല്ലുന്നവരെ നിരാശപ്പെടുത്തില്ല ചിത്രം.. വലിയ പ്രതീക്ഷയോ ആവേശമോ ഇല്ലാതെ ചിത്രം കാണാൻ പോകുന്നവർക്ക് ശരാശരിയോ അതിന് മുകളിലോ സംതൃപ്തി നൽകും ചിത്രം.. വൻ വിജയത്തിലേക്ക് കുതിക്കുന്ന ചിത്രം പല അഭിനേതാക്കളുടെയും ജീവിതത്തിൽ ഒരു വഴിത്തിരിവാകും എന്നത് സംശയമില്ലാത്ത കാര്യമാണ്..

My Rating:: ★★★☆☆

0Comments

, by Abeed Azad

In 3 star movies, Adventure

Home (2015) - 94 min

ആനിമേഷൻ ചിത്രങ്ങൾ എനിക്ക് എന്നും പ്രിയപ്പെട്ടവ ആണ്..' ലോജിക്കി'ന്റെ കെട്ടുമാറാപ്പുകൾ തലയിൽ നിന്ന് ഇറക്കി വെച്ച് ഒരു കൊച്ചുകുട്ടിയുടെ മനസ്സോടെ കുറച്ച് നേരത്തേക്ക് നമുക്ക് മതിമറന്ന് ചിരിക്കാൻ വക നൽകുന്നവ..

ക്യാപ്റ്റൻ സ്മെക്ക് നയിക്കുന്ന ഒരു സംഘം അന്യഗ്രഹജീവികളാണ് 'ബൂവു'കൾ.. സ്വന്തം കാര്യം മാത്രം നോക്കി ജീവിക്കുന്ന, ആരുമായും ചങ്ങാത്തം കൂടാത്ത, നേതാവിനെ അങ്ങേയറ്റം വിശ്വസിക്കുന്ന ഒരു കൂട്ടം ജീവികൾ.. തങ്ങളുടെ വാസസ്ഥലത്തെ നശിപ്പിക്കുവാൻ തക്കം പാർത്തിരിക്കുന്ന 'ഗോർഗി'ൽ നിന്നും രക്ഷപെടാൻ പുതിയൊരു ഗ്രഹം കണ്ടെത്തുക എന്നത് അനിവാര്യമായി വരുന്നു അവർക്ക്.. ക്യാപ്റ്റൻ സ്മെക്ക് കണ്ടുപിടിച്ച പരിഹാരമാവട്ടെ നമ്മുടെ 'ഭൂമിയും'.. തുടർന്ന് അവർ ഭൂമിയിലേക്ക് കുടിയേറുന്നു..

മേൽപറഞ്ഞവ ബൂവുകളുടെ പൊതുസ്വഭാവം ആണെങ്കിലും അവയിൽ നിന്നൊക്കെ വ്യത്യസ്തനായ ഒരാളുണ്ട്.. എല്ലാവരുമായും ചങ്ങാത്തം ആഗ്രഹിക്കുന്ന, എപ്പോഴും വാതോരാതെ സംസാരിച്ച് കൊണ്ടിരിക്കുന്ന 'Oh'.. ആ പേര് വീണതും രസകരമായ ഒരു കഥയാണ്.. Oh കാരണം ബൂവുകൾക്ക് ഭൂമിയിലും പ്രശ്നങ്ങൾ ഉണ്ടാവുന്നു.. തുടർന്ന് Tip എന്ന പെൺകുട്ടിയുമായി ചങ്ങാത്തത്തിലാവുന്ന Oh അവൾക്കൊപ്പം Tipന്റെ അമ്മയെ തേടി ഇറങ്ങുന്നു.. തുടർന്നുണ്ടാവുന്ന രസകരമായ സംഭവങ്ങളാണ് Tim Johnson സംവിധാനം ചെയ്ത് 2015ൽ പുറത്തിറങ്ങിയ 'Home' എന്ന ചിത്രത്തിൽ പറയുന്നത്..

2007ൽ Adam Rex കുട്ടികൾക്കായി എഴുതിയ 'The True meaning of Smekday' എന്ന ബുക്കിനെ ആധാരമാക്കിയാണ് ചിത്രം ഒരുക്കിയിരിക്കുന്നത്..Tom J. Astle,Matt Ember എന്നിവർ ചേർന്നാണ് ചിത്രത്തിന് തിരക്കഥ ഒരുക്കിയിരിക്കുന്നത്.. വളരെ രസകരമായാണ് ചിത്രം മുന്നോട്ട് പോവുന്നത്.. ചെറിയ നർമ്മമുഹൂർത്തങ്ങൾ ആവോളമുണ്ട് ചിത്രത്തിൽ..2 പാട്ടുകൾ ഇടക്കിടെ വന്ന് പോവുന്നുണ്ട് സിനിമയിൽ.. രണ്ടും മികച്ച ഫീൽ സമ്മാനിക്കുന്ന പാട്ടുകൾ.. Jim parടonട, Rihanna, Steve Martin, Jennifer Lopez, Matt Jones തുടങ്ങിയവരാണ് ചിത്രത്തിന് ശബ്ദം നൽകിയിരിക്കുന്നത്..

കാണികളിൽ ചെറുചിരി പകരുന്ന ചിത്രം തെല്ലും ബോറടിപ്പിക്കാതെ അവസാനിക്കുന്ന ഒന്നാണ്.. 'ലോജിക്ക്' എന്ന വസ്തുതയേ ആലോചിക്കാതെ കണ്ടിരിക്കാവുന്ന ഒന്ന്.. ആനിമേഷൻ സിനിമകൾ ഇഷ്ടപ്പെടുന്നവർക്ക് തീർച്ചയായും മിനിമം ഒരു തവണ കണ്ടിരിക്കാവുന്ന ചിത്രമാണ് Home..

My Rating:: ★★★☆☆

0Comments

, by Abeed Azad

In 3 star movies, Action

Blind (2011) - 111 min

പോലീസ് അക്കാഡമിയിലെ മികച്ച ഒരു വിദ്യാർഥിനിയും ഭാവി വാഗ്ദാനവും ആയിരുന്നു Min Soo-ah.. എന്നാൽ അപ്രതീക്ഷിതമായി ഉണ്ടാവുന്ന ഒരു കാറപകടത്തിൽ Min Soo-ahന് തന്റെ കാഴ്ച്ച നഷ്ടപ്പെടുകയും സഹോദരൻ കൊല്ലപ്പെടുകയും ചെയ്യുന്നു.. തുടർന്ന് തന്റെ വളരെക്കാലത്തെ ആഗ്രഹമായ പോലീസ് ജോലിക്ക് തിരശ്ശീല വീഴുന്നു..

ഒരിക്കൽ രാത്രി Min സഞ്ചരിച്ച ഒരു ടാക്സി കാർ യാത്രക്കിടയിൽ എന്തിലോ ഇടിക്കുന്നു.. അത് എന്നാണെന്ന് ആദ്യം Minന് മനസിലാവുന്നില്ലെങ്കിലും തന്റെ ചില നിഗമനങ്ങൾ വെച്ച് അതൊരു മനുഷ്യനെയാണ് ഇടിച്ചതെന്ന് Min ഉറപ്പുവരുത്തുന്നു.. ആ സമയത്ത് തന്നെ ഉടലെടുത്ത ഒരു യൂണിവേഴ്സിറ്റി വിദ്യാർഥിനിയുടെ മിസ്സിംഗ് കേസുമായി ബന്ധമുണ്ടെന്ന് സംശയം തോന്നുന്ന Min പോലീസിന് മുന്നിൽ കാര്യങ്ങൾ അവതരിപ്പിക്കുന്നു.. എന്നാൽ അവിടെയും തന്റെ അന്ധത ഒരു പരിമിതിയായി വരുന്ന സാഹചര്യത്തിൽ Min തന്റെ ചില നിഗമനങ്ങൾ ഉയർത്തിക്കാട്ടി തന്റെ സംശയം ശരിയാണെന്ന് ബോധ്യപ്പെടുത്തുന്നു.. തുടർന്ന് കൊലയാളിക്ക് വേണ്ടിയുള്ള അന്വേഷണമാണ് ചിത്രം..

Ahn sang-hoon സംവിധാനം ചെയ്ത് 2011ൽ പുറത്തിറങ്ങിയ ചിത്രമാണ് 'Blind'.. അന്ധയായ Min Soo-ahന്റെ വേഷം മികച്ചതാക്കിയത് Kim Ha-neul ആണ്.. ശ്രമകരമായ വേഷം kim മികച്ചതാക്കി.. Grand Bell അവാർഡ്സിലും Blue Dragon അവാർഡ്സിലും ആ വർഷത്തെ മികച്ച നടിക്കുള്ള പുരസ്കാരം Kim കരസ്ഥമാക്കി..Yoo seung-ho, Jo hee-bong, Yang young-jo, Choi Philip തുടങ്ങിയവർ ബാക്കിയുള്ള പ്രമുഖ വേഷങ്ങൾ കൈകാര്യം ചെയ്തു.. എല്ലാവരും അവർക്ക് കിട്ടിയ വേഷങ്ങളോട് നീതി പുലർത്തി..

ക്യാമറയും പശ്ചാത്തല സംഗീതവും കാണികളെ മികച്ച രീതിയിൽ ത്രില്ലടിപ്പിക്കാൻ പര്യാപ്തമായിരുന്നു.. എഡിറ്റിംഗും ഒരു ത്രില്ലർ ഒരുക്കേണ്ട തരത്തിൽ തന്നെ മികച്ചത്.. ക്ലൈമാക്സും നല്ലത്, എന്നാൽ ചിലർക്കെങ്കിലും മുൻകൂട്ടി മനസ്സിൽ കാണുവാൻ കഴിയും.. അത് ഒരു പോരായ്മയാണ്.. ആകെ മൊത്തത്തിൽ നല്ല ഒരു ത്രില്ലിംഗ് മോഡ് നമുക്ക് സമ്മാനിക്കും ചിത്രം.. തീർച്ചയായും കണ്ടിരിക്കാവുന്ന ഒന്ന്..

My Rating:: ★★★☆☆

0Comments

, by Abeed Azad

In 4 star movies, Based on real incidents

Rahasya (2015) - 123 min

മനീഷ് ഗുപ്ത സംവിധാനം ചെയ്ത് 2015ൽ പുറത്തിറങ്ങിയ ചിത്രമാണ് 'Rahasya'..പതിനെട്ട് വയസുകാരി ആയിശ മഹാജനിന്റെ കൊലപാതകത്തെ ചുറ്റിപ്പറ്റിയാണ് ചിത്രം പുരോഗമിക്കുന്നത്.. സ്വന്തം വീട്ടിൽ നിന്ന് കഴുത്തറുത്ത് കൊലപ്പെടുത്തിയ നിലയിലാണ് ആയിശയെ കണ്ടെടുക്കുന്നത്..

വിവാദമായ 'ആരുശി മർഡർ കേസി'ൽ നിന്ന് പ്രചോദനം ഉൾക്കൊണ്ടാണ് സംവിധായകൻ ചിത്രം ഒരുക്കിയിരിക്കുന്നത്.. കേസന്വേഷണത്തിൽ ആദ്യം തെളിവുകൾ വിരൽ ചൂണ്ടുന്നത് ആയിശയുടെ പിതാവായ ഡോ: സച്ചിൻ മഹാജനിലേക്കാണ്.. കോടതി അദ്ധേഹത്തെ റിമാൻഡ് ചെയ്യുകയും ചെയ്യുന്നു.. എന്നാൽ തുടർന്ന് CBI അന്വേഷണത്തിലേക്ക് വഴിതെളിക്കുന്ന കേസ് ചീഫ് സുനിൽ പരാസ്കർ ആണ് അന്വേഷിക്കുന്നത്.. തുടർന്ന് സിനിമ പുതിയ വഴികളിലേക്ക് കടക്കുന്നു..

ആദ്യ രംഗം മുതൽ തന്നെ പ്രേക്ഷകനിൽ ഭീതിയും ആകാംശയും നിറക്കാൻ സംവിധായകനായി.. ചിത്രത്തിലുടനീളം ഫാസ്റ്റ് പേസ് നിലനിർത്താൻ സംവിധായകന് കഴിഞ്ഞിട്ടുണ്ട്.. ഒരു നിഗമനത്തിലേക്ക് അന്വേഷണ ഉദ്യോഗസ്ഥർ എത്താറാവുമ്പോഴേക്കും പുതിയ വഴിത്തിരിവുകൾ ഉണ്ടാവുന്ന തെളിവുകളോ സംഭവങ്ങളോ അരങ്ങേറുന്നുണ്ട്.. അതൊക്കെ പ്രേക്ഷകനിൽ വളരെയേറെ ആകാംശ ചെലുത്തി സ്ക്രീനിൽ കാണിച്ചിട്ടുണ്ട്..മികച്ച തിരക്കഥയും അതിനൊത്ത് പക്വതയാർന്ന സംവിധാനവും ചിത്രത്തെ വളരെ മികച്ച ഒന്നാക്കുന്നു..

പാട്ടുകൾ ഒന്നും തന്നെ ഇല്ലാത്ത ചിത്രത്തിൽ പശ്ചാത്തല സംഗീതം വഹിക്കുന്ന റോൾ ചെറുതല്ല.. മികച്ച രീതിയിൽ സംവിധായകനെ അത് പിന്തുണച്ചിട്ടുണ്ട്.. ക്യാമറ വർക്കും അങ്ങനെ തന്നെ.. വളരെ മികച്ച ഷോട്ടുകളും ക്യാമറയും ചിത്രത്തെ വേഗത നിലനിർത്തുന്നതിൽ സഹായിച്ചിട്ടുണ്ട്.. ഗംഭീര ക്ലൈമാക്സും തൃപ്തി നൽകുന്നു..

CBI ദ്യോഗസ്ഥൻ ആയി Kay Kay Menon വേഷമിടുന്നു.. മികച്ച പ്രകടനം.. കാണികളിൽ ത്രിൽ ജനിപ്പിക്കുവാൻ ഇദ്ധേഹത്തിന്റെ സംഭാഷണങ്ങൾക്കും അഭിനയത്തിനും സാധിച്ചു.. Tisca Chopra, Ashish Vidyarthi, Mita Vashisht, Ashwini Kalsekar എന്നിവർ മറ്റു പ്രമുഖ വേഷങ്ങൾ ചെയ്തു.. എല്ലാവരും അവരുടെ വേഷങ്ങൾ മികച്ചതാക്കി.. ബോളിവുഡിൽ ഇതുവരെ കണ്ടതിൽ വെച്ച് മികച്ച ഒരു ത്രില്ലർ തന്നെയാണ് Rahasya.. തീർച്ചയായും കണ്ടിരിക്കേണ്ട ഒന്ന്..

My Rating:: ★★★★☆

0Comments

, by Abeed Azad

In 4 star movies, Action

Angamaly Diaries (2017) - 132 min

ഒരു പ്രത്യേക സ്ഥലത്തെ മാത്രം കേന്ദ്രീകരിച്ച് കഥ പറയുന്ന നിരവധി ചിത്രങ്ങൾ മലയാളത്തിൽ വന്നിട്ടുണ്ട്.. അതിനുള്ള അവസാനത്തെ മികച്ച ഉദാഹരണമായിരുന്നു കമ്മട്ടിപ്പാടം.. അവയുടെ കൂട്ടത്തിലേക്ക് പുതിയ ഒന്നുകൂടി..' അങ്കമാലി ഡയറീസ്'..

86 പുതുമുഖങ്ങൾ, 11 മിനിറ്റ് നീളുന്ന ക്ലൈമാക്സ് ഷോട്ട്.. അങ്ങനെ കാരണങ്ങൾ നിരവധി ആയിരുന്നു ചിത്രത്തിന്റെ പ്രതീക്ഷ വർധിപ്പിക്കാൻ.. എന്നാൽ എന്നെ ആകർഷിച്ചത് 'ലിജോ ജോസ് പെല്ലിശ്ശേരി' എന്ന ഒറ്റ നാമമാണ്..

'വിൻസന്റ് പെപെ' എന്ന ഒരു സാധാരണ അങ്കമാലിക്കാരന്റെ ജീവിതമാണ് സിനിമയിൽ പറയുന്നത്.. അവന്റെ സുഹൃദ്വലയവും കുടുംബവും പ്രണയവും എല്ലാം സിനിമയിലെ പ്രതിപാദന വിഷയമാവുന്നുണ്ട്.. അങ്കമാലിക്കാരുടെ തനത് ജീവിതരീതിയാണ് സിനിമയിലൂടെ വരച്ചുകാട്ടുന്നത്.. കപ്പയും ബീഫും പോർക്കും കോമ്പിനേഷൻ ഇഷ്ടപ്പെടുന്ന, ചങ്കൂറ്റത്തോടെ എന്തിനും ഇറങ്ങി പുറപ്പെടുന്ന അങ്കമാലിക്കാരെ നമുക്ക് ചിത്രത്തിൽ കാണാൻ സാധിക്കും.. കഥയിലേക്ക് കൂടുതൽ കടക്കുന്നില്ല.. അത് ചിലപ്പോൾ രസംകൊല്ലി ആയേക്കാം..

ചിത്രം തികച്ചും സംവിധായകന്റെ സിനിമ തന്നെയാണ്.. താരങ്ങൾ അല്ല, മറിച്ച് തിരക്കഥയും അതിന്റെ ആവിഷ്കാരവുമാണ് ചിത്രത്തിന്റെ നട്ടെല്ല് എന്ന് അദ്ധേഹം ഒന്നുകൂടി തെളിയിച്ചിരിക്കുകയാണ്.. എത്ര അഭിനന്ദിച്ചാലും മതിവരില്ല അദ്ധേഹത്തിന്റെ ഈ പരിശ്രമത്തെ.. അതിന് മികച്ച പിന്തുണയുമായി താരങ്ങളും ടെക്നിക്കൽ സൈഡും..

വിൻസന്റ് ആയി അഭിനയിച്ച 'ആന്റണി വർഗീസ്' മലയാള സിനിമക്ക് ഒരു പുതു വാഗ്ദാനം തന്നെ.. ഭാവങ്ങൾ മിന്നി മായുന്നത് കാണാൻ നല്ല രസമുണ്ടായിരുന്നു.. ചിത്രത്തിലെ എല്ലാ കഥാപാത്രങ്ങൾക്കും അവരുടേതായ 'ഐഡന്റിറ്റി' ഉള്ളവരാണ് എന്നത് ശ്രദ്ധേയമായ കാര്യമാണ്.. എല്ലാവരും അവരുടെ റോളുകൾ ഗംഭീരമാക്കി.. പോർക്ക് വർക്കി, കണക്കുണ മാർട്ടി, അപ്പാനി രവി, ഭീമൻ, യൂ ക്ലാംപ് രാജൻ തുടങ്ങിയ കഥാപാത്രങ്ങൾ പ്രത്യേക ശ്രദ്ധ നേടി.. മൊത്തത്തിൽ പുതുമുഖങ്ങളെന്ന യാതൊരു ശങ്കയുമില്ലാതെ വളരെ മികച്ച പ്രകടനം ഏവരും കാഴ്ച്ചവെച്ചു..

വെറും 4 ചിത്രങ്ങൾ കൊണ്ട് പ്രേക്ഷക ശ്രദ്ധ ആർജിച്ച ഛായാഗ്രാഹകനാണ് ഗിരീഷ് ഗംഗാദരൻ.. ചിത്രത്തിന്റെ ഛായാഗ്രഹണം നിർവ്വഹിച്ചിരിക്കുന്നത് അദ്ധേഹമാണ്.. ഗംഭീരം എന്ന് നിസ്സംശയം പറയാവുന്ന ഒന്ന്.. ചിത്രത്തെ മുന്നോട്ട് നയിക്കുന്നതിൽ ക്യാമറ വഹിച്ച പങ്ക് ചെറുതല്ല.. ക്ലൈമാക്സിലെ 11 മിനിറ്റ് നീളുന്ന ഒറ്റ ഷോട്ട്.. അതിഗംഭീരം.!
സംവിധായകന്റെ ആഗ്രഹത്തിനൊത്ത് ക്യാമറ ചലിപ്പിക്കുവാൻ അദ്ധേഹത്തിനായി.. റിയലിസ്റ്റിക് എഫക്ട് തരാൻ പല രംഗങ്ങളിലും അത് സഹായിച്ചു..

പ്രശാന്ത് പിള്ള കൈകാര്യം ചെയ്ത സംഗീതമാണ് മറ്റൊരു ഘടകം.. 5 പാട്ടുകളോളം അടങ്ങിയ ചിത്രത്തിൽ അവ മനോഹരമായി സന്ദർഭത്തിനനുസരിച്ച് കോർത്തിണക്കിയിട്ടുണ്ട്.. നാടൻ പാട്ടുകൾ പോലെ കേൾക്കുമ്പോൾ താളം പിടിക്കാൻ തോന്നുന്ന പാട്ടുകൾ.. പശ്ചാത്തല സംഗീതവും മികച്ച് നിന്നു..

ഷമീർ മുഹമ്മദ് നിർവഹിച്ച എഡിറ്റിംഗും മികച്ചു നിന്നു.. ഇടവേളക്ക് മുമ്പുള്ള സീനുകളൊക്കെ മികച്ചതാക്കിയത് അദ്ദേഹത്തിന്റെ മികവ്.. മൊത്തത്തിൽ തന്റെ ജോലി ഭംഗിയാക്കി..

തിരക്കഥയാണ് സിനിമയുടെ നട്ടെല്ല്.. ചെമ്പൻ വിനോദിന്റെ തിരക്കഥയും സംഭാഷണങ്ങളും തനി ലോക്കൽ എന്ന ലേബലിനോട് നീതി പുലർത്തും വിധമായിരുന്നു.. മികച്ച ഒന്ന്.. ഇനിയും കൂടുതൽ പ്രതീക്ഷക്ക് വക നൽകുന്ന ഒരു എഴുത്തുകാരനെ കൂടി അങ്ങനെ നമുക്ക് ലഭിച്ചു..

മലയാളത്തിന് ഇത് പുതിയൊരു പാഠമാണ്.. ധൈര്യം പകരുന്ന ഒന്ന്.. 86 പുതുമുഖങ്ങളെ വെച്ച് സിനിമയെടുക്കാൻ ലിജോ ജോസ് കാണിച്ച ധൈര്യം.. അതിന് കാശ് മുടക്കാൻ ഫ്രൈഡേ ഫിലിം ഹൗസ് കാണിച്ച ധൈര്യം.. കൂടുതൽ പുതുമുഖങ്ങളെ വെച്ച് സിനിമയെടുക്കുവാനും സംവിധായന്റെ സിനിമ എന്ന് ഊട്ടി ഉറപ്പിച്ച് പറയുന്ന രീതിയിൽ അത് ഒരുക്കുവാൻ സഹായിക്കാനും മനസ്സിനെ പാകപ്പെടുത്താൻ ആർജവം തരുന്ന ഒന്ന്.. ചിത്രം തിയേറ്ററുകളിൽ മികച്ച പ്രകടനം കാഴ്ച്ചവെക്കുമെന്നാണ് സിനിമ കഴിഞ്ഞപ്പോഴുണ്ടായ കരഘോഷങ്ങളിൽ നിന്ന് മനസിലായത്.. അത് അങ്ങിനെ തന്നെയാവട്ടെ എന്ന് ആശംസിക്കുന്നു..

My Rating:: 4/5

0Comments

, by Abeed Azad

In 3 star movies, Drama

IL mare (Siworae) (2000) - 105 min

വ്യത്യസ്ത കാലഘട്ടങ്ങളിലുള്ള മനുഷ്യർ തമ്മിൽ ബന്ധപ്പെടുന്ന പ്രമേയമുള്ള ഒരുപാട് ചിത്രങ്ങൾ കൊറിയനിലും ഹോളിവുഡിലുമൊക്കെ വന്നിട്ടുണ്ട്.. The phone, Time renegades തുടങ്ങിയവ അതിനുള്ള മികച്ച ഉദാഹരണങ്ങളാണ്.. നമുക്ക് ഒരു പുതു അനുഭവം നൽകുന്നവയാണ് ഇവയിലേറെയും..

കടലിനോടടുത്ത ഒരു വീട്ടിൽ നിന് Eun-joo താമസം മാറിപ്പോവാന്നടുത്ത് നിന്നാണ് ഈ കഥയുടെ തുടക്കം.. 'IL mare' എന്നാണ് വീടിന്റെ പേര്.. ഈ കഥയുടെയും.. ക്രിസ്തുമസ് അടുത്തതിന്നാൽ അടുത്തതായി താമസിക്കാൻ വരുന്ന ആൾക്ക് തപാൽ പെട്ടിയിൽ ഒരു ആശംസാകാർഡും നിക്ഷേപിക്കുന്നു Eun.. അതിനുള്ളിൽ വർഷവും രേഖപ്പെടുത്തുന്നു..1999..Sung-hyun, ഒരു ആർക്കിടെക്ട് അയി ജോലി ചെയ്യുന്ന വ്യക്തിയാണ്.. Eunന്റെ ആശംസാ കാർഡ് ലഭിക്കുന്നത് അദ്ധേഹത്തിനാണ്.. കുഴപ്പിക്കുന്ന കാര്യം എന്തെന്നാൽ ' IL Mare'യിലെ അദ്യത്തെ താമസക്കാരൻ അദ്ദേഹമാണ്.. ഇപ്പോൾ ജീവിക്കുന്നതാവട്ടെ 1997ലും..

Lee hyun-seung സംവിധാനം ചെയ്ത് 2000ൽ റിലീസ് ചെയ്ത ചിത്രമാണ് IL Mare.. വ്യത്യസ്ത കാലഘട്ടത്തിലുള്ള 2 പേർ കത്തുകൾ വഴി സംസാരിക്കുന്നതാണ് ചിത്രത്തിന്റെ പ്രമേയം.. തന്നെ ആരോ പറ്റിക്കുന്നതായാന്ന് ആണ് Sungന് ആദ്യം തോന്നുന്നത്.. എന്നാൽ കൂടുതൽ കത്ത് കൈമാറ്റം ചെയ്ത് കഴിയുമ്പോൾ അത് സത്യമാണെന്ന് ഇരുവർക്കും ബോധ്യപ്പെടുന്നു.. തുടർന്ന് അവരെ ഈ കത്തുകൾ ജീവിതത്തിൽ എന്തൊക്കെ മാറ്റങ്ങൾ ഉണ്ടാക്കുന്നുവെന്നതാണ് ചിത്രത്തിൽ പറയുന്നത്..

Jun ji-hyun, Lee jung-jae തുടങ്ങിയവരാണ് പ്രധാന കഥാപാത്രങ്ങളെ അവതരിപ്പിക്കുന്നത്.. അവരുടെ റോളുകൾ ഇരുവരും ഭംഗിയായി ചെയ്തു.. ബാക്കി ചിലർ ഇടക്ക് മുഖം കാണിച്ച് പോകുന്നവരായി.. വേറെ താരങ്ങൾക്കൊന്നും ചിത്രത്തിൽ വലിയ റോൾ ഉണ്ടായിരുന്നില്ല.. കഥക്ക് ആവശ്യമായ വേഗത ചിത്രത്തിലുടനീളം ഉണ്ട്.. അതുകൊണ്ട് തന്നെ പ്രേക്ഷകനിൽ മടുപ്പുളവാക്കുന്നില്ല ചിത്രം.. ക്യാമറയും സംഗീതവും സന്ദർഭാവിശ്യാനുസരണം ചെയ്തിട്ടുണ്ട്..

2006ൽ' The Lake House' എന്ന പേരിൽ ഹോളിവുഡിലേക്ക് റീമേക്ക് ചെയ്യപ്പെട്ടു ചിത്രം.. 2015ൽ ഒരു കന്നട ചിത്രത്തിൽ ILMareയുടെ തീമും ഉപയോഗിച്ചിട്ടുണ്ട്..
വ്യത്യസ്ത പ്രമേയങ്ങൾ ഇഷ്ടപ്പെടുന്നവർക്ക് കണ്ടിരിക്കാവുന്ന ഒരു 'ഫാന്റസി- റൊമാന്റിക്' ചിത്രമാണ് IL Mare...

My Rating:- 3/5

Link :- https://monova.org/torrent/7230776/Il-Mare-aka-Siworae-(2000)-720p.BRrip.Sujaidr.html

0Comments

, by Abeed Azad

In 3.5 star movies, Action

The phone (2015) - 115 min

Ko Dong-ho തന്റെ ബിസിനസ്സ് സാമ്രാജ്യം വിജയകരമായി പടുത്തുയർത്തിയ വ്യക്തിയാണ്.. ഭാര്യ Jo Yeong-Soo ഒരു ഡോക്ടറും.. എല്ലാ കുടുംബത്തിലേയും പോലെ ചില സൗന്ദര്യപ്പിണക്കങ്ങളൊക്കെയായി മുന്നോട്ട് പോവുന്ന കുടുംബം.. എന്നാൽ പെട്ടെന്നൊരു ദിവസം തന്റെ ഭാര്യയെ ആരോ കൊലപ്പെടുത്തിയതായി അറിയുന്ന K0 മാനസികമായി തളരുന്നു.. ഒരു വർഷം പരിശ്രമിച്ചിട്ടും കുറ്റവാളിയെ കണ്ടെത്താനാവാത്തത് അദ്ധേഹത്തെ ഒന്നുകൂടി അസ്വസ്ഥൻ ആക്കുന്നു..

എന്നാൽ കൊലപാതകം കഴിഞ്ഞ് കൃത്യം ഒരു വർഷത്തിന് ശേഷം അതേ ഡേറ്റിൽ അദ്ധേഹത്തിന്റെ ഫോണിലേക്ക് അദ്ധേഹത്തിന്റെ ഭാര്യയുടെ നമ്പറിൽ നിന്നും കോൾ വരുന്നു.. ഫോൺ എടുക്കുന്ന Ko കേൾക്കുന്നത് തന്റെ ഭാര്യയുടെ ശബ്ദവും.. ആദ്യം വലിയ ഞെട്ടലും അമ്പരപ്പും ഉണ്ടായിരുന്ന Ko പതിയെ അത് വിശ്വസിച്ച് തുടങ്ങി.. ഭാര്യ പറഞ്ഞ കാര്യങ്ങൾ വെച്ച് കണക്ക് കൂട്ടി നോക്കിയപ്പോൾ കൊലപാതകം നടന്ന ദിവസത്തിലാണ് ഭാര്യ ഇപ്പോൾ ഉള്ളതെന്ന് Ko മനസ്സിലാക്കുന്നു.. തുടർന്ന് കൊലപാതകത്തിൽ നിന്ന് ഭാര്യയെ രക്ഷപ്പെടുത്താനും കൊലപാതകി ആരെന്ന് കണ്ടുപിടിക്കാനുള്ള Koയുടെ ശ്രമമാണ് 'The phone' എന്ന ചിത്രത്തിൽ പറയുന്നത്..

സംവിധായകൻ Kim bong-ju ആദ്യ ചിത്രമാണ് 'The Phone' ഒരുക്കിയിരിക്കുന്നത്..Son hyun-ju, Uhn ji-won, Bae seong-woo, Hwang bo-ra തുടങ്ങിയവർ ചിത്രത്തിലെ പ്രധാന കഥാപാത്രങ്ങളെ അവതരിപ്പിച്ചിരിക്കുന്നു.. ചിത്രം കാണുമ്പോൾ ചില ഹോളിവുഡ് ചിത്രങ്ങളിൽ നിന്ന് പ്രചോദനം ഉൾക്കൊണ്ട് ഒരുക്കിയത് പോലെ തോന്നാം.. എന്നാലും ആദ്യ ചിത്രമെന്ന നിലയിൽ സംവിധായകന്റെ മികച്ച ഒരു വർക്കാണ് ചിത്രം.. പ്രേക്ഷകനെ സിനിമയിലുടനീളം ത്രില്ലടിപ്പിക്കാൻ സംവിധായകന് സാധിച്ചിട്ടുണ്ട്.

അഭിനേതാക്കൾ നല്ല പ്രകടനം ചിത്രത്തിലുടനീളം കാഴ്ച്ചവെച്ചു.. പശ്ചാത്തല സംഗീതവും ക്യാമറയും ചിത്രത്തിന് വേഗത നൽകുന്നതിന് സഹായിച്ചിട്ടുണ്ട്.. ചിത്രത്തിനിടക്ക് ചില സംശയങ്ങൾ ഉദിക്കുമെങ്കിലും അവസാനം അവ എല്ലാം നികത്തുന്നുണ്ട്.. മൊത്തത്തിൽ Mystery- Thriller വിഭാഗത്തിൽ പെടുന്ന,genreയോട് നീതി പുലർത്തിയ നല്ലൊരു ചിത്രമാണ് The Phone..

My Rating :: 3.5/5

Link :: https://monova.org/torrent/41079559/The.Phone.2015.DVDRip.450MB.Ganool.html

0Comments

, by Abeed Azad

Abeed Azad

Pages

Gone Girl (2014) - 149 min

Oru Mexican Aparatha (2017) - 143 min

Home (2015) - 94 min

Blind (2011) - 111 min

Rahasya (2015) - 123 min

Angamaly Diaries (2017) - 132 min

IL mare (Siworae) (2000) - 105 min

The phone (2015) - 115 min

Blog Archive

TOTAL VISITS

GENRE

STAR RATINGS

LANGUAGE

COUNTRY

THIS IS SPECIAL

MOST VIEWED