Abeed Azad

🔻കഥാപാത്രങ്ങളെ എല്ലാം പരിചയപ്പെടുത്തി കഴിഞ്ഞു. എല്ലാവരെ കുറിച്ചും ഏകദേശ ധാരണയുമായി. അപ്പോൾ ട്വിസ്റ്റ് കണ്ടെത്തുന്നതിൽ എന്തെങ്കിലും പ്രയാസം ഉണ്ടാവേണ്ട എലമെന്റുകളാണ് ഒരു സീരീസിനെ മുന്നോട്ട് നയിക്കാൻ ആവശ്യം. അല്ലെങ്കിൽ അതിന് പിടിതരാത്ത അവതരണം. എന്നാൽ ഇത് രണ്ടു ഇല്ലാതെ പോയിടത്ത് ഫ്ലാറ്റായ ഒരു ഡ്രാമയായി പോവുന്നുണ്ട് Children Of Nobody.

Year : 2018
Episode : 32
Run Time : 30min each

🔻ചൈൽഡ് കൗൺസിലർ ആയി ജോലി ചെയ്യുകയാണ് Cha Woo Kyung. സന്തുഷ്ടമായ കുടുംബം നയിക്കുന്ന വ്യക്തി. ഒപ്പം ഗർഭിണിയും. എന്നാൽ അപ്രതീക്ഷിതമായി ഒരു ആക്സിഡന്റിൽ പെടുന്നതോടെ അവളുടെ ജീവിതം കൈവിട്ട് പോവുന്നു. ഒപ്പം ഒരു അന്വേഷണാർത്ഥം Kang Ji Hun  എത്തുന്നതോടെ ചുഴിയിൽ അകപ്പെട്ട ജീവിതമായി മാറി Woo Kyungന്റേത്.

🔻Child Abuse പ്രമേയമാക്കിയ കൊറിയൻ സിനിമകൾ ശക്തമായ രാഷ്ട്രീയം പറഞ്ഞവയാണ്. ഈ സീരീസും അതെ പ്രമേയം തന്നെയാണ് മുന്നോട്ട് വെക്കുന്നത്. അതിലൂടെ ഒരു സീരിയൽ കില്ലിങ്ങ് അന്വേഷണവും. ഒരു ത്രില്ലർ പ്രതീക്ഷിക്കേണ്ട. ഭൂരിഭാഗവും ഡ്രാമ എന്ന നിലക്കാണ് കഥ മുന്നോട്ട് പോകുന്നത്. ത്രിൽ മോഡിലേക്ക് വരുന്ന രംഗങ്ങൾ ഇടക്കുണ്ടങ്കിലും അത് അവിടെ മാത്രമായി ഒതുങ്ങുന്നു.

🔻ഒരു ഡ്രാമ എന്ന നിലയിലുള്ള ട്രീറ്റ്‌മെന്റ് ആയിരുന്നോ ഈ സീരീസിന് ആവശ്യം എന്ന് ചോദിച്ചാൽ അല്ല എന്നാണ് എന്റെ ഉത്തരം. കാരണം കഥാപാത്രങ്ങളുടെ മാനസികവ്യവഹാരങ്ങളെക്കാളേറെ അന്വേഷണത്തിനാണ് കഥ മുൻതൂക്കം നൽകുന്നത്. അപ്പോൾ ഡ്രാമയെന്ന ട്രീറ്റ്‌മെന്റ് ഒരു നെഗറ്റീവ് ഇഫക്ട് ഉണ്ടാക്കാനാണ് സാധ്യത. പലയിടത്തും ഇവിടെ സംഭവിച്ചതും അത് തന്നെയാണ്.

🔻മികച്ച തുടക്കം തന്നെയായിരുന്നു സീരീസിന്റെത്. പല കാര്യങ്ങളും പരിചയപ്പെടുത്തിയ വിവരവും നന്നായിരുന്നു. അത്തരത്തിൽ ഒരു പരിധി വരെ മാത്രമേ മുന്നോട്ട് പോവാനായുള്ളൂ. പിന്നീട് പല എപ്പിസോഡുകളും നിർവ്വികാരനായി കണ്ടുതീർത്തെന്ന് പറയാം. അപ്പോഴേക്കും അവസാനത്തേക്ക് കരുതി വെച്ചിരിക്കുന്ന പല കാര്യങ്ങളും എളുപ്പം ഊഹിക്കാം എന്ന നിലയിലായിട്ടുണ്ടാവും. തുടർന്ന് കുറച്ചുകൂടി  ,മിസ്റ്ററി നിറഞ്ഞ ട്രീറ്റ്മെന്റിലേക്ക് uplift ചെയുമ്പോഴേക്കും പല കാര്യങ്ങൾക്കും വേണ്ടത്ര പഞ്ച് ലഭിക്കാതെ പോവുന്നു. പ്രത്യേകിച്ച് വില്ലൻ ആരാണെന്ന് റിവീൽ ചെയ്ത നിമിഷങ്ങൾ.

🔻കുട്ടികളുടെ എക്‌സ്‌പോസിഷൻ ആണ് സീരീസിൽ ഏറ്റവും ഇഷ്ടപ്പെട്ട സംഗതി. അതിൽ പരമാവധി മിസ്റ്ററി നിറക്കാൻ സാധിച്ചിടത്ത് നല്ലൊരു ആസ്വാദനം ലഭിക്കുന്നുണ്ട്. അവരുടെ അഭിനയവും ഗംഭീരം. അവസാന രണ്ട് എപ്പിസോഡുകൾ പ്രിയപ്പെട്ടവയായി നിൽക്കുന്നത് അതുകൊണ്ടാണ്. സസ്പെൻസിനേക്കാൾ ആകർഷിച്ചതും ഈ കാര്യം തന്നെ.

🔻മികച്ച വിഷ്വൽസും പശ്ചാത്തലസംഗീതവും പേസിനോട് ചേർന്ന് നിൽക്കുന്നുണ്ട്. കുറച്ചുകൂടി വേഗത ഉണ്ടായിരുന്നെങ്കിൽ എന്ന് ചിലയിടങ്ങളിൽ തോന്നുമെങ്കിൽ പോലും ഒരിക്കലും മടുപ്പ് നൽകുന്നില്ല.

🔻ＦＩＮＡＬ ＶＥＲＤＩＣＴ🔻

ഗംഭീരമെന്നോ മികച്ചതെന്നോ അഭിപ്രായമില്ലെങ്കിലും മോശമല്ലാത്ത ഒരു സീരീസ് തന്നെയാണ് ഇത്. കണ്ടുകഴിയുമ്പോൾ നിരാശനായി മടങ്ങേണ്ടി വരില്ല എന്നുറപ്പ്. പോരായ്മകളുണ്ടെങ്കിൽ പോലും വിരസതയില്ലാതെ കണ്ടുതീർക്കാം.

ＡＢ ＲＡＴＥＳ ★★★☆☆

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

മലയാളസിനിമയെ കൂടുതൽ ഉയരങ്ങളിലേക്ക് എത്തിക്കാൻ ആത്മാർത്ഥമായി ആഗ്രഹിക്കുന്ന ഒരു നടനാണ് പൃഥ്വിരാജ്. തന്റെ ഓരോ സിനിമകളിലും പുതിയതായി എന്തെങ്കിലും കൊണ്ടുവരണമെന്ന് നിർബന്ധബുദ്ധി ഉള്ള ഒരു സിനിമാക്കാരൻ. ഇതിന് മുമ്പ് പല സിനിമകളിലും അത്തരത്തിലുള്ള ശ്രമങ്ങൾ പ്രകടമായിരുന്നെങ്കിലും പലപ്പോഴും അത് പ്രഹസനം മാത്രമായി തോന്നുകയാണ് ഉണ്ടായിട്ടുള്ളത്. അവിടെയാണ് ഈ ചിത്രം വ്യത്യസ്തമാവുന്നത്.

🔻ＳＴＯＲＹ ＬＩＮＥ🔻

പല ലെയറുകൾ ഉള്ള കഥയും പ്രമേയവുമാണ് സിനിമയുടേത്. അതുകൊണ്ട് തന്നെ അത് ഫ്രഷ് ആയി, ബ്ലാങ്ക് മൈന്റോടെ സമീപിക്കുന്നതാണ് നല്ലത്. അതിനാൽ കഥ ഒഴിവാക്കുന്നു. ഇനിയും കാണാനുള്ളവർക്ക് അതാണ് ഏറ്റവും ഗുണകരം.

🔻ＢＥＨＩＮＤ ＳＣＲＥＥＮ🔻

'100 Days Of Love' എന്ന ചിത്രം കണ്ട് മുഴുവിപ്പിക്കാൻ സാധിക്കാത്ത ഒന്നായിരുന്നു. പിന്നീട് അതിനായി മുതിർന്നിട്ടുമില്ല. ആ സംവിധായകനിൽ നിന്ന് പിന്നീടൊന്നും പ്രതീക്ഷിച്ചതുമില്ല. എന്നാൽ '9'ന്റെ ട്രെയിലറും ടീസറും അത്ഭുതപ്പെടുത്തി എന്ന് പറയാതെ വയ്യ. സിനിമ കണ്ടപ്പോഴും മേക്കിങ്ങിന്റെ കാര്യത്തിൽ സംവിധായകൻ ഒരുപാട് മുന്നോട്ട് പോയതായി തോന്നി. തന്നിലെ സംവിധായകന്റെ പക്വത പ്രകടമായിരുന്നു സിനിമയിലുടനീളം. എന്നാൽ അത് തിരക്കഥയിൽ പൂർണ്ണമായി കാണാൻ സാധിക്കാതിരുന്നിടത്താണ് ആസ്വാദനം താഴേക്ക് പോയത്.

സയൻസ് ഫിക്ഷൻ എന്ന നിലയിൽ കഥ പറഞ്ഞ് തുടങ്ങുമ്പോൾ മലയാളത്തിൽ പറഞ്ഞ് കേട്ടിട്ടില്ലാത്ത പ്രമേയമായത് കൊണ്ട് തന്നെ നല്ല രീതിയിൽ ആകാംഷ സൃഷ്ടിക്കാൻ സംവിധായകന് സാധിച്ചു. അത് ഇടവേള വരെ നീളുന്നതിനും കഥ പറച്ചിൽ സഹായകമായി. എന്നാൽ അതിന് ശേഷമുള്ള ജേണർ മിക്സ് അത്യാവശ്യം മടുപ്പായി തോന്നി. പിന്നീട് അതിൽ പലതും നമ്മുടെ interpretationൽ ഉപകാരപ്പെടുമെങ്കിലും കൺഫ്യൂഷൻ സൃഷ്ടിക്കുന്നതിനും അത് കാരണമായിട്ടുണ്ട്. അവിടെ തിരക്കഥ കൈവിട്ടത് പോലെ പലയിടങ്ങളിലും തോന്നി. ഓരോ ജേണറിലും ഓരോ വ്യാഖ്യാനങ്ങൾ ഉണ്ടാക്കാമെങ്കിലും മറ്റുള്ളവ അതിന് തടസ്സമായി വരും. അത്തരത്തിൽ എവിടെയും പൂർണ്ണത തോന്നിക്കാത്ത രീതിയിലുള്ള തിരക്കഥ കുറേക്കൂടി മെച്ചപ്പെടുത്താമായിരുന്നു.

പൃഥ്വിരാജ് ചിത്രത്തിൽ ട്വിസ്റ്റ് മസ്റ്റ് ആണെന്ന് അറിയാമല്ലോ. എന്നാൽ ഇവിടെ ആ ട്വിസ്റ്റ് ചടപ്പിച്ചു എന്ന് പറയാതെ വയ്യ. എങ്കിലും അതിന് ശേഷമുള്ള രംഗങ്ങൾ കൺവിൻസിങ് ആയി തന്നെ അവതരിപ്പിച്ചിട്ടുണ്ട്. അതുകൊണ്ട് ആ ചടപ്പിക്കലിന്റെ ആയുസ്സ് അൽപ്പനേരം മാത്രമേ നീണ്ടുനിന്നുള്ളൂ. തുടർന്ന് ക്ലൈമാക്സിലേക്ക് വരുമ്പോൾ അൽപ്പം curious ആയുള്ള ഒരു അവസാനം പ്രതീക്ഷിച്ചെങ്കിലും മോശമാക്കിയില്ല എന്ന് പറയാൻ പാകത്തിന് ഒന്ന് മാത്രമായി അവസാനിച്ചു സിനിമ. തുടർന്ന് end credit സീൻ പുതിയ ചർച്ചകൾക്ക് വഴി തെളിച്ചിടുമ്പോൾ ലൂപ്പ് ഹോളുകൾ നിറഞ്ഞ, എങ്ങുമെത്താതെ പോവുന്ന നിർവ്വചനങ്ങൾ ബാക്കിയാകുന്നു ചിത്രം.

അച്ഛൻ-മകൻ ബന്ധം സിനിമക്ക് ആവശ്യമായ രീതിയിൽ തന്നെ അവതരിപ്പിച്ച് ഫലിപ്പിക്കാൻ സാധിച്ചിട്ടുണ്ട്. അതുകൊണ്ട് തന്നെ ഒരു തവണ കൂടി കണ്ടാൽ ചിലപ്പോൾ പുതിയ തിയറികൾക്ക് അത് കൂടുതൽ സഹായകമാവും. അതുപോലെ ഈവ എന്ന കഥാപാത്രത്തിന്റെ അവതരണം നന്നായി ചെയ്തിട്ടുണണ്ട്. എങ്കിലും എവിടെയൊക്കെയോ കാര്യങ്ങൾ കുഴഞ്ഞ് മറിഞ്ഞ് കിടക്കുന്നത് പോലെയൊരു തോന്നൽ. ആ രംഗങ്ങളാണ് തിയറികൾക്ക് മുന്നിൽ വൻ മതിലായി നിൽക്കുന്നതും. ചില സന്ദർഭങ്ങൾ ഡ്രമാറ്റിക്ക് ആയി മാറുന്നതിലും അൽപ്പം വിരസത ഉണ്ട്.

മലയാളസിനിമയ്ക്ക് പുതിയൊരു വഴിത്തിരിവ് തന്നെയാണ് ഈ ചിത്രം എന്നാണ് എന്റെ അഭിപ്രായം. കൂടുതൽ ശക്തമായ പ്രമേയങ്ങൾ കൊണ്ടുവരാനും തിരക്കഥയിൽ കൂടുതൽ ശ്രദ്ധ കേന്ദ്രീകരിച്ചാൽ മികച്ച ഔട്ട്പുട്ട് പ്രേക്ഷകരിലേക്ക് എത്തിക്കുവാനും ജെനുസ് മുഹമ്മദ് എന്ന സംവിധായകന് തീർച്ചയായും സാധിക്കും. അത്തരത്തിലുള്ളവരെ കൂടി പ്രേക്ഷകർ എന്ന നിലയിൽ നമ്മൾ പ്രോത്സാഹിപ്പിക്കേണ്ടതുണ്ട്.

🔻ＯＮ ＳＣＲＥＥＮ🔻

പൃഥ്വിരാജ് തന്റെ വേഷം മോശമാക്കിയില്ല ഇത്തവണയും. എങ്കിലും ഡ്രമാറ്റിക്ക് ആവുന്നിടത്ത് പലപ്പോഴും കേൾക്കാറുള്ള പഴി ഇവിടെയും പ്രകടമാണ്. വാമിഖയാണ് ഇത്തവണ ഭാഗ്യവതി. തന്റെ രണ്ടാം മലയാള സിനിമയിലും മികച്ച വേഷം തന്നെ ലഭിച്ചു. അത് നല്ല രീതിയിൽ അവതരിപ്പിക്കാൻ വാമിഖക്ക് സാധിച്ചു. പൃഥ്വിയുടെ മകനായി അഭിനയിച്ച കുട്ടിയുടെ പ്രകടനം വളരെ നന്നായിരുന്നു. അധികം എക്‌സ്‌പോസിഷൻ ഉള്ള മറ്റ് കഥാപാത്രങ്ങൾ ഇല്ലാത്തത് കൊണ്ട് ഇവർ തന്നെയാണ് ഫോക്കസ്.

🔻ＭＵＳＩＣ & ＴＥＣＨＮＩＣＡＬ ＳＩＤＥＳ🔻

സിനിമയുടെ നട്ടെല്ലായി നിൽക്കുന്നത് ക്യാമറ വർക്കുകളും പശ്ചാത്തലസംഗീതവുമാണ്. ഗംഭീരം എന്നെ പറയാനുള്ളൂ. അതിൽ പശ്ചാത്തലസംഗീതം പ്രത്യേകം എടുത്തു പറയുന്നു. വളരെ വളരെ മികച്ചുനിന്നു. വെളിച്ചം കുറവുള്ള ദൃശ്യങ്ങൾ പോലും ഭംഗിയായി കാണാൻ തക്ക വിധത്തിൽ വിഷ്വൽസ് മികവ് പുലർത്തുന്നു. ഡാർക്ക് മൂഡ് ക്രിയേറ്റ് ചെയ്യാൻ ഇരു വിഭാഗവും നന്നായി പരിശ്രമിച്ചിട്ടുണ്ട്. ഒപ്പം പരമാവധി പൂർണ്ണത പുലർത്തുന്ന VFX വർക്കുകളും. വേഗതയുള്ള എഡിറ്റിങ്ങും പേസിന് ഗുണം ചെയ്യുന്നുണ്ട്.

🔻ＦＩＮＡＬ ＶＥＲＤＩＣＴ🔻

പൂർണ്ണതയുള്ള ഒരു ചിത്രമല്ല 9. എങ്കിലും ഇനിയും ഇത്തരത്തിൽ മികവുള്ള പരീക്ഷണചിത്രങ്ങൾ സൃഷ്ടിക്കാൻ ഒരു ഇൻഡസ്ട്രിക് തന്നെ ഊർജ്ജമേകുന്ന ചിത്രമാണ് എന്നാണ് എന്റെ അഭിപ്രായം. ഇതുവരെ കണ്ടതിൽ പ്രമേയം കൊണ്ടും മേക്കിങ്ങ് കൊണ്ടും മറ്റുള്ളവയെക്കാൾ ഒരുപടി മുകളിൽ നിൽക്കുന്ന പരീക്ഷണം. ഒഴിഞ്ഞ കസേരകളോട് കഥ പറയേണ്ട ഗതി ഈ ചിത്രത്തിന് ഉണ്ടാവരുതെന്ന് ആത്മാർത്ഥമായി ആഗ്രഹിക്കുന്നു.

ＡＢ ＲＡＴＥＳ ★★★☆☆

🔻പല സിനിമകളുടെ ഒരു ബ്ലെൻഡ്. അതിൽ 'The Fault In Our Stars', 'Me & Earl & The Dying Girl' 'Bucket List' എന്നിവ ഉൾപ്പെടും. അത് മാത്രമാണ് ചിത്രമെങ്കിലും മോശം എന്ന് പറയിപ്പിക്കുന്നില്ല എന്നതാണ് ഈ ചിത്രത്തിന്റെ പ്രത്യേകത.

Year : 2018
Run Time : 1h 37min

🔻ഒരു ക്യാൻസർ സപ്പോർട്ട് ഗ്രൂപ്പിലാണ് കാൽവിനും സ്കൈയും കണ്ടുമുട്ടുന്നത്. കാൻസർ ഉണ്ടെന്ന് വിധിയെഴുതിയ സ്കൈയും രോഗമില്ലെങ്കിലും ഇപ്പോഴും രോഗിയാണെന്ന ആശങ്ക മനസ്സിൽ ഉള്ള കാൽവിനും രണ്ട് ധ്രുവത്തിലുള്ള സ്വഭാവക്കാരായിരുന്നു. എന്നാൽ ഇടക്ക് അവർക്കിടയിൽ സൗഹൃദം പുലരുന്നതോടെ പല മാറ്റങ്ങൾക്കും അവർക്കുണ്ടാവുന്നു.

🔻പുതുമയെന്ന് തോന്നിക്കും വിധം യാതൊന്നും ചിത്രതിലില്ല. എല്ലാം അവിടിവിടുന്നായി അൽപ്പാൽപ്പം ചുരണ്ടിയതാണെന്ന് കണ്ടമാത്രയിൽ ബോധ്യമാകും. പക്ഷെ ഫീൽ ഗുഡ് സിനിമകൾ സ്ഥിരം പുലർത്തുന്ന ഫോർമുല തന്നെ ഇവിടെയും പ്രയോഗിക്കുമ്പോൾ അത് വർക്ക്ഔട്ട് ആവുന്നുണ്ട് എന്നതാണ് പോസിറ്റിവ് ആയി പറയേണ്ട കാര്യം.

🔻കഥയേക്കാളേറെ Asaയുടെ നിഷ്കളങ്കത നിറഞ്ഞ അഭിനയവും Maisieയുടെ എനർജെറ്റിക്ക് പെർഫോമൻസുമാണ് ചിത്രത്തിന്റെ ഹൈലൈറ്റ്. അതിനേക്കാൾ എനിക്കിഷ്ടപ്പെട്ടത് Ninaയുടെ ക്യൂട്ട്നെസ്സ് ആണ്. ഇവർ മൂവരും തമ്മിലുള്ള കെമിസ്ട്രി സ്‌ക്രീനിൽ കാണാൻ നല്ല ഭംഗിയായിരുന്നു. അതിനൊപ്പം പലപ്പോഴും രംഗങ്ങളെ മുന്നോട്ട് നയിക്കുന്ന ഗാനങ്ങൾ മികച്ച ഫീൽ സമ്മാനിക്കുന്നുണ്ട്. ഒപ്പം വിഷ്വലി റിച്ച് ആയ ക്യാമറ വർക്കുകളും.

🔻ＦＩＮＡＬ ＶＥＲＤＩＣＴ🔻

എടുത്ത് പറയാൻ യാതൊരു പുതുമകളുമില്ല. പല സിനിമകളിലായി കണ്ടുവന്നിട്ടുള്ള സ്വഭാവം തന്നെയാണ് ഈ ചിത്രവും പിന്തുടരുന്നത്. എങ്കിലും മടുപ്പില്ലാതെ, നല്ലൊരു അനുഭൂതി സമ്മാനിക്കുന്ന ചിത്രമായി മാറുന്നുണ്ട് Then Came You.

ＡＢ ＲＡＴＥＳ ★★★☆☆

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

പത്രങ്ങളിലും സോഷ്യൽ മീഡിയയിലും ദിനംപ്രതി വർധിച്ചുകൊണ്ടിരിക്കുന്ന വാർത്ത ഏതെന്ന് ചോദിച്ചാൽ സ്ത്രീകൾക്കെതിരെയുള്ള അക്രമം എണ്ണവും എന്റെ ഉത്തരം. മറ്റേത് കുറ്റകൃത്യങ്ങളെക്കാളും, എന്തിനേറെ കൊലപാതകങ്ങളെക്കാളും മോശമെന്നും നീചമെന്നും ഉറപ്പുള്ള കുറ്റം. സ്ത്രീകളുടെ സംരക്ഷകരാകേണ്ടവർ തന്നെ അവരുടെ ജീവിതം നശിപ്പിക്കുന്ന കാഴ്ചകളും ഇന്ന് സുലഭമാണ്.

Year : 2017
Run Time : 1h 40min

🔻ഒരു കോളേജ് പാർട്ടിയിലാണ് മറിയമിന്റെ ആ രാത്രി തുടങ്ങിയത്. അവിടെ വെച്ച് കണ്ടുമുട്ടിയ യൂസഫ് എന്ന ചെറുപ്പക്കാരനോട് തോന്നിയ പ്രണയം. അവനുമായി കുറച്ച് സമയം ചെലവഴിക്കണമെന്ന ആഗ്രഹത്തോടെ അടുത്തുള്ള ബീച്ചിലേക്ക് ഒരു നടത്തം. എന്നാൽ തുടർന്ന് സംഭവിച്ചത് ഏതൊരു പെണ്ണും മറക്കാനാഗ്രഹിക്കുന്ന സംഭവങ്ങളും. ക്രൂരമായ ബലാത്സംഗത്തിന് ഇരയാവുകയായിരുന്നു മറിയം.

🔻സിനിമയുടെ പ്ലോട്ട് ഇതാണ്. എന്നാൽ 9 ചാപ്റ്ററുകളിലായി സംവിധായിക പറഞ്ഞുവെക്കുന്ന സംഭവങ്ങളുടെ രാഷ്ട്രീയം വളരെ വളരെ ഗൗരവകരമാണ്. ടുണീഷ്യയിൽ ഒരു സ്ത്രീ നേരിയിടേണ്ടി വന്ന ആക്രമത്തെ കടമെടുത്ത് തന്റേതായ ആശയങ്ങൾ കൂടി ഉൾപ്പെടുത്തി മനസ്സിനെ നടുക്കുന്ന കാഴ്ച്ച സമ്മാനിക്കുകയാണ് ഈ ചിത്രം.

🔻സ്ത്രീകൾ വെറും അടിമകളാണെന്ന പൊതുബോധത്തിൽ നിന്നാണ് കഥയുടെ പല വശങ്ങളും ഉടലെടുക്കുന്നത്. റേപ്പ് ചെയ്യപ്പെട്ടെന്ന് പറയുന്ന സ്ത്രീയോടുള്ള സംസാരവും പെരുമാറ്റവും ഇതൊക്കെയും ഒരു സാധാരണ സംഭവമെന്ന നിലക്കാണ്. കുറ്റം പറയാൻ പറ്റില്ല. ഇപ്പോൾ ഇതൊരു സാധാരണ സംഭവം തന്നെയാണ്. ഒറ്റപ്പെട്ട് നിൽക്കുന്ന ഏതൊരു സ്ത്രീയും തങ്ങളുടെ വികാരങ്ങൾ തീർക്കാനുള്ള മാർഗ്ഗമെന്ന് കരുതുന്ന പുരുഷവർഗ്ഗത്തിന്റെ മേൽക്കോയ്‌മ കൂടി കാണാനാവും ഇവിടെ. സ്ത്രീയുടെ സുരക്ഷിതത്വത്തേക്കാൾ തങ്ങൾക്കൊപ്പം ജോലി ചെയുന്ന ആളുടെ സംരക്ഷണമാണ് വലുതെന്ന് വിശ്വസിക്കുന്ന ഒരുകൂട്ടം നിയമപാലകർ ഒരു നിസാരകാര്യമല്ല. Moral Trafficking തുടങ്ങിയ വിഷയങ്ങളെയും പ്രതിപാദിക്കുന്നുണ്ട് പലയിടത്തും. അതിന്റെ ഭീകരത അടയാളപ്പെടുത്തുന്നുണ്ട് ആ രംഗങ്ങളിലൊക്കെയും. അത്തരത്തിൽ രാജ്യത്തിൻറെ പൊതു അന്തരീക്ഷത്തെ തന്നെ മറയില്ലാതെ കാട്ടിത്തരുകയാണ് സംവിധായിക.

🔻വെർബൽ റേപ്പ് എന്ന സംഗതിയെ ഫോക്കസ് ചെയ്ത് വളരെ ഭീകരമായ സത്യങ്ങളെ കൂടി പുറത്ത് കൊണ്ടുവരികയാണ് ചിത്രം. മാധ്യമങ്ങൾക്ക് ഇത് വെറുമൊരു എക്സ്‌ക്‌ളൂസീവ്  മാത്രമായി മാറുമ്പോൾ പീഡനത്തിനിരയായവരുടെ മാനസിക സംഘർഷങ്ങളിലൂടി സഞ്ചരിക്കുകയാണ് സംവിധായിക ഇവിടെ. കഥാപാത്രത്തേക്കാൾ കഥാഗതിക്ക് പ്രാധാന്യം കൊടുക്കുന്നുണ്ടെങ്കിലും അതിലൂടെ അവരുടെ ഭയത്തെയും ആശങ്കകളെയും നല്ല രീതിയിൽ അവതരിപ്പിക്കാൻ സാധിച്ചിട്ടുണ്ട്. സംസാരത്തിൽ പോലും കാമാസക്തി വെളിവാക്കുന്ന ചില കഥാപാത്രങ്ങളെ ഭയപ്പാടോടെയല്ലാതെ സമീപിക്കാനാവില്ല.

🔻ഓരോ ചാപ്റ്ററുകളും ഓരോ സിംഗിൾ ടേക്കുകളിലൂടെയാണ് പകർത്തിയിരിക്കുന്നത്. ഒരുപക്ഷെ ഇത്തരത്തിലൊരു ചിത്രം ഏറ്റവും ആവശ്യപ്പെടുന്ന അവതരരീതി അത് തന്നെയാവണം. കാരണം ആ രംഗങ്ങളുടെ കൊറിയോഗ്രാഫിയിൽ തന്നെ ഒരു റിയാലിറ്റി പ്രത്യക്ഷപ്പെടുന്നുണ്ട്. കഥാപാത്രങ്ങളുടെ ഇടുങ്ങിയ മനസ്സ് കാണാനാവുന്നുണ്ട്. ഒരു സിനിമയെന്ന് തോന്നിക്കാത്തവിധം റിയലിസ്റ്റിക്ക് പരിചരണം സാദ്ധ്യപ്പെടുത്തുന്നുണ്ട് ഇത്തരത്തിലുള്ള ഷോട്ടുകൾ. ഒപ്പം ചില രംഗങ്ങൾ സ്‌ക്രീനിൽ ഉൾപ്പെടുത്താതെ തന്നെ അതിന്റെ തീവ്രത പറന്നു നൽകുന്ന സംഭാഷണശകലങ്ങളും ഗംഭീരം.

🔻ＦＩＮＡＬ ＶＥＲＤＩＣＴ🔻

പണ്ടൊക്കെ ഒറ്റപ്പെട്ട സംഭവമെന്ന് ഊന്നിയൂന്നി പറയുമായിരുന്ന ഇത്തരം ക്രൂരതകൾ ഇപ്പോൾ ദൈവത്തിന്റെ സ്വന്തം നാടെന്ന് വിശേഷിപ്പിക്കുന്ന ഈ കൊച്ചുകേരളത്തിൽ വളരെ ഗണ്യമായി വർദ്ധിച്ചുകൊണ്ടിരിക്കുമ്പോൾ ഇത്തരത്തിൽ ഒരു ചിത്രത്തിന്റെ പ്രസക്തി ലോകമാസകലം പടർന്ന് കിടക്കുകയാണ്. വെറുമൊരു സിനിമയായി മാത്രം കണ്ടുമറക്കാൻ ആവില്ല ഈ ചിത്രം. കാരണം ഇതിൽ ജീവിതങ്ങളുണ്ട്. പൗരസംരക്ഷണത്തിനായി മുന്നിട്ടിറങ്ങേണ്ട നിയമപാലകർ തന്നെ അതിനെ കടന്നാക്രമിക്കുമ്പോൾ തകർന്നുപോവുന്ന മനസ്സുകളുണ്ട്. റേപ്പ് എന്നതിനപ്പുറം വെർബൽ റേപ്പ് കൂടുതൽ നോവ് പകരുമ്പോൾ പല ജീവിതങ്ങളുടെയും നേർക്കാഴ്ച്ച കൂടിയാവുന്നു ഈ ചിത്രം. ടുണീഷ്യയുടെ ഓസ്കാർ എൻട്രി ആയിരുന്ന ചിത്രം നിർബന്ധമായും കണ്ടിരിക്കേണ്ട ഒന്നാണ്. മനസ്സിൽ നിന്നും അത്ര പെട്ടെന്നൊന്നും മായാത്ത ഒരു മുറിപ്പാടായി ചിത്രം അവിടെയുണ്ടാകും.

ＡＢ ＲＡＴＥＳ ★★★★☆

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻ചെറുപ്പം മുതലേ മോഷണമായിരുന്നു അവനെ ലഹരി പിടിപ്പിച്ചിരുന്നത്. ബാക്കിയുള്ള സമയങ്ങളേക്കാൾ നിർഭയത്തോടെ അവൻ കാണപ്പെട്ടത് മോഷണസമയത്താണ്. ചെറിയ വീടുകളിലും കടകളിലും മാത്രം മോഷണം നടത്തിയിരുന്ന കാർലോസ് പിന്നീട് വലിയ ദൗത്യത്തിലേക്ക് എത്തുകയാണ്. അവിടെ വെച്ചാണ് അവന് തന്റെ ആദ്യ കൊലപാതകം ചെയ്യേണ്ടി വന്നത്. എന്നാൽ ഇത്തവണ മോഷണത്തേക്കാൾ അവനിൽ കൗതുകം നിറച്ചത് ആ മരണമാണ്. തുടർന്ന് അവിടെ ഉടലെടുത്തതോ അർജന്റീനയിലെ തന്നെ ഏറ്റവും വലിയ സീരിയൽ കില്ലറും.

Year : 2018
Run Time : 1h 58min

🔻കഥ പറഞ്ഞത് കാടുകയറിപ്പോയെന്ന് തോന്നുന്നുണ്ടെങ്കിൽ പേടിക്കണ്ട. ഇതുക്കും മേലെ പല കാര്യങ്ങളുമാണ് ചിത്രം കരുതിവെച്ചിരിക്കുന്നത്. ഒരു ട്രൂ സ്റ്റോറി ആയതുകൊണ്ട് തന്നെ പല കൂട്ടിച്ചേർക്കലുകളും ഉണ്ടെങ്കിലും അതിൽ എരിവും പുളിയും പ്രേക്ഷകന്റെ അഭിരുചിക്ക് പാകത്തിന് കലർത്തിയിരിക്കുന്നത് കിടിലനൊരു സിനിമാറ്റിക്ക് ആസ്വാദനത്തിനാണ് വഴിവെക്കുന്നത്. രണ്ട് മണിക്കൂറിനടുത്ത് മാത്രം ദൈർഖ്യമുള്ള ചിത്രം നല്ലൊരു അനുഭവം തന്നെയാണ് നൽകുക.

🔻മോഷണമുതലുകൾ കൈകാര്യം ചെയ്യുന്ന രീതിയൊക്കെ കാണിച്ചിരിക്കുന്നത് വളരെ ഭംഗിയായിട്ടാണ്. മറ്റുള്ളവർ കണ്ടാലും യാതൊരു കൂസലുമില്ലെന്ന തരത്തിലുള്ള കാർലോസിന്റെ ഡയലോഗുകൾ കേൾക്കാൻ നല്ല രസകരമായിരുന്നു. ഒപ്പം അവന്റെ ജീവിതസാഹചര്യങ്ങൾ കാട്ടിയ വിധവും വളരെ താൽപര്യം ജനിപ്പിക്കുന്ന രീതിയിൽ തന്നെ.പണത്തേക്കാളേറെ മോഷണം എന്ന പ്രക്രിയ ആസ്വദിക്കുന്ന കാർലോസിന്റെ കഥാപാത്ര വികസനം കയ്യടി അർഹിക്കുന്നുണ്ട്.

🔻കാർലോസായി ലോറൻസോയുടെ കിക്കിടിലൻ പ്രകടനം തന്നെയാണ് ചിത്രത്തിന്റെ ഹൈലൈറ്റ്. സ്‌ക്രീൻ പ്രസൻസ് അപാരം തന്നെ. തന്റെ ചിരികൊണ്ട് പോലും ശ്രദ്ധ കേന്ദ്രീകരിക്കാൻ ലോറൻസോക്ക് സാധിച്ചിട്ടുണ്ട്. അദ്ദേഹത്തിനോളം തിളങ്ങാൻ സാധിക്കുന്ന റോൾ മറ്റാർക്കും ഇല്ലെങ്കിലും എല്ലാവരും ഭംഗിയാക്കിയിട്ടുണ്ട് തങ്ങളുടെ വേഷങ്ങൾ.

🔻അതിശയിപ്പിക്കുന്ന മികവ് പുലർത്തുന്ന ടെക്നിക്കൽ വശങ്ങൾ ആസ്വാദനത്തെ വളരേയേറെ ഉയർത്തുന്നുണ്ട്.കിടിലൻ വിഷ്വൽസും പശ്ചാത്തലസംഗീതവും പല രംഗങ്ങൾക്കും സന്ദർഭങ്ങൾക്കും വേഗതയേകുന്നുണ്ട്. 1970കളെ വിശ്വസനീയമാം വിധം അവതരിപ്പിക്കുന്നുണ്ട് ചിത്രം.

🔻ＦＩＮＡＬ ＶＥＲＤＩＣＴ🔻

അർജന്റീനയുടെ ഓസ്കകാർ എൻട്രി ആയിരുന്ന ചിത്രം ഒരു യഥാർത്ഥ ജീവിതമാണ് അവതരിപ്പിക്കുന്നത്. അർജന്റീനയിലെ ഏറ്റവും വലിയ സീരിയൽ കില്ലറും മോഷ്ടാവുമായ കാർലോസിന്റെ ജീവിതം. കാണാൻ മടിക്കേണ്ട. ഒരു കിടിലൻ അനുഭവം തന്നെയാവും ചിത്രം സമ്മാനിക്കുക.

ＡＢ ＲＡＴＥＳ ★★★★☆

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻Doomsdayൽ സൂപ്പർമാന്റെ മരണത്തിന് ശേഷം നാട് മുഴുവൻ ആശങ്കയിലായിരുന്നു. തങ്ങൾക്ക് ഒരു സംരക്ഷകനെയും ജസ്റ്റിസ് ലീഗിന് ഒരു നേതാവിനെയും നഷ്ടപ്പെട്ട വിഷമം. അതിനിടയിലാണ് അവിടേക്ക് പുതിയ കുറച്ചുപേർ പുതിയ സംരക്ഷകരെന്ന റോൾ ഏറ്റെടുത്തത്. അവർ അവരെത്തന്നെ വിളിച്ചത് സൂപ്പർമാൻ എന്നാണ്. തുടർന്ന് പല കാര്യങ്ങളും പരിധിക്കപ്പുറം പോവുന്നു.

Year : 2019
Run TIme : 1h 27min

🔻DCയുടെ പതിവ് സ്വഭാവം പോലെ തന്നെ സീരിയസ് മോഡിൽ തന്നെ കഥ പറയുന്ന ചിത്രം മോശമല്ലാത്ത ഒരു അനിമേഷൻ ചിത്രം തന്നെയാണ്. മുൻ ചിത്രത്തിന്റെ തുടർച്ചയായി കഥ പറയുന്ന ചിത്രം നമ്മൾ ഊഹിക്കുന്ന വഴികളിലൊക്കെയാണ് സഞ്ചരിക്കുന്നതെങ്കിലും ചില  സർപ്രൈസുകൾ നന്നായിരുന്നു. കൂടെ ആക്ഷൻ രംഗങ്ങളും മികച്ചത് തന്നെ. പലയിടത്തും ഗംഭീരമായി തോന്നിയ BGMഉം ആവേശം നൽകുന്നുണ്ട്.

🔻ＦＩＮＡＬ ＶＥＲＤＩＣＴ🔻

ആനിമേഷൻ സിനിമാപ്രേമികൾക്കും DC യൂണിവേഴ്‌സ് ആരാധകർക്കും ഒരുപോലെ കണ്ടിരിക്കാവുന്ന ചിത്രമാണ് ROS. പതിവ് പോലെ ഗൗരവകരമായി തന്നെയാണ് ഇത്തവണയും കഥയുടെ പോക്ക്. ചുരുക്കത്തിൽ തൃപ്തി തന്നെ ഫലം.

ＡＢ ＲＡＴＥＳ ★★★☆☆

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

ആൾക്കൂട്ടത്തിൽ ഒറ്റപ്പെട്ട് ജീവിക്കുന്ന ആളുകളിലേക്ക് തിരനോട്ടം നടത്തുകയാണ് തന്റെ ചിത്രങ്ങളിലൂടെ റാം ചെയ്യാറുള്ളത്. അവരുടെ കഥകളാണ് അദ്ദേഹത്തിന് ഏറ്റവും ഭംഗിയായി അവതരിപ്പിക്കാൻ സാധിക്കുന്നത് എന്ന് തോന്നിയിട്ടുണ്ട്. ചെറുകീടങ്ങൾ മുതൽ മനുഷ്യർക്ക് വരെ ഒരുപോലെ വല വിരിക്കുന്ന, ജീവിത സാഹചര്യങ്ങൾ ഒരുക്കുന്ന പ്രകൃതിയുടെ ഭാഷയിലാണ് ഇത്തവണ റാം തന്റെ കഥ പറയുന്നത്. അമുദവന്റെയും പാപ്പയുടെയും കഥ.

പ്രകൃതിയുമായി ബന്ധപ്പെട്ട പന്ത്രണ്ട് അധ്യായങ്ങളിലൂടെ തന്റെ കഥ പറയുകയാണ് അമുദവൻ. തനിക്കും മകൾക്കും മറ്റുള്ളവരെ പോലെ വേണ്ടത്ര പരിഗണന ലഭിക്കുന്നില്ലെന്ന തോന്നലാണ് അമുദവനെ ഒരു ഒളിച്ചോട്ടത്തിന് പ്രേരിപ്പിക്കുന്നത്. മനുഷ്യൻ വസിക്കാത്ത, കുരുവികൾ ചാകാത്ത ഒരിടം. കണ്ണഞ്ചിപ്പിക്കുന്ന വിഷ്വലികളിൽ നിന്ന് കരളലിയിക്കുന്ന കാഴ്ചകളിലേക്കാണ് തുടർന്ന് നമ്മെ കൊണ്ടുപോവുന്നത്.

ഒരച്ഛന്റെ നിസ്സഹായത തുറന്ന് കാട്ടുന്ന രംഗങ്ങളിൽ നിന്ന് പാപ്പയുമായി അടുപ്പം സ്ഥാപിക്കാൻ ശ്രമിക്കുന്ന അമുദവനെ അവതരിപ്പിക്കുന്നതാണ് സിനിമ കാണികളിലേക്ക് അടുക്കുന്നത്. തന്റെ ഉള്ളിലെ സങ്കടക്കടലത്രയും പുറന്തള്ളുമ്പോൾ വെറുമൊരു മനുഷ്യൻ മാത്രമാവുന്നു അമുദവൻ. അത്തരത്തിൽ ഒരുപറ്റം മനുഷ്യരുടെ ജീവിതമാണ് പേരൻപ്. പ്രകൃതി അവർക്കായി സുരക്ഷിതത്വം ഒരുക്കുമ്പോഴും എല്ലാം തങ്ങളുടെ കാൽചുവട്ടിലെന്ന് അഹങ്കരിക്കുന്ന മനുഷ്യരുടെ ഗർവ്വ് മൂലം ഒറ്റപ്പെട്ട് പോവുന്ന കുറച്ച് ജീവിതങ്ങൾ.

തന്റെ ലോകത്തെ പോലെ തന്നെ ചുറ്റുമുള്ളവരെയും ഒരുപോലെ സ്വീകരിക്കുന്ന ഒരുവനായാണ് അമുദവന്റെ കഥാപാത്ര നിർമ്മിതി. തുടക്കം മുതൽ അത് കാണാനാവും. സ്വന്തം മകളുടെ സന്തോഷം മാത്രം അയാൾ ആഗ്രഹിക്കുമ്പോൾ മറ്റുള്ളവരുടെ വിമുഖതകൾ പൂർണ്ണമായി മനസ്സിലാക്കിയുള്ള പെരുമാറ്റം. ഇടവേളക്ക് തൊട്ടുമുമ്പ് അഞ്ജലിയോട് പറയുന്ന സംഭാഷണത്തിൽ അത് പൂർണ്ണമായി ഉൾക്കൊണ്ടിരുന്നു. ഒരു എപ്പിസോഡ് ആയി മാറേണ്ടിയിരുന്ന സംഭവത്തെ ഒറ്റ ഡയലോഗ് കൊണ്ട് അവസാനിപ്പിച്ചത് സംവിധായകന്റെ അപാര മിടുക്ക് തന്നെയാണ്. അത്ര ഹൃദ്യമാണ് ആ രംഗം.

സെക്ഷ്വാലിറ്റിയിലും ട്രാൻസ്‌ജെൻഡർ വിഷയങ്ങളിലും സ്ത്രീപക്ഷരാഷ്ട്രീയത്തിലും പുരോഗമനപരമായ ചിന്തകളിലൂടെ കടന്നുപോവുന്നുണ്ട് പല അധ്യായങ്ങളിലും. ട്രാൻസ്‌ജെൻഡർ വിഷയങ്ങളിൽ വിശ്വസനീയമാം വിധം അവതരണമികവ് പ്രകടമാവുന്നുണ്ട് ഓരോ രംഗങ്ങളിലും. അവരുടെ ജീവിതപരിസരങ്ങൾ ഒപ്പിയെടുത്തത് പോലെ കാണികളെ വിശ്വസിപ്പിക്കും വിധം ഗംഭീരം. ഒപ്പം ആർത്തവത്തെ കുറിച്ചുള്ള ബോധ്യപ്പെടുത്തലും സ്വാഭാവികമായി അമുദനിലൂടെ അവതരിപ്പിച്ചിട്ടുണ്ട്. അത്തരത്തിൽ ഒരുപാട് മുന്നോട്ട് പോയിട്ടുണ്ട് റാമിന്റെ ചിന്തകളും.

കഥാപാത്രങ്ങളുടെ ഭാവപ്രകടനങ്ങളിലൂടെ മാത്രം അവതരിപ്പിക്കുന്ന ചില വികാരങ്ങളുണ്ട്. ഒരച്ഛന്റെ സഹനമല്ല മകളുടെ അവസ്ഥയെ കുറിച്ചോർത്ത നിസ്സഹായതയാണ് അമുദനെന്ന് അടിവരയിടുന്ന പ്രകടനവുമായി മമ്മൂട്ടി വീണ്ടും അരങ്ങ് വാഴുമ്പോൾ പകരം വെക്കാനില്ലാത്ത അഭിനയമികവിന് സാക്ഷിയാവുന്നുണ്ട് പലപ്പോഴും. തന്റെ ഉൾ വ്യഥകൾ തുറന്ന് പറയാൻ ആരുമില്ലാതെ പ്രകൃതിയോട് മാത്രം സംവദിക്കുന്ന അമുദനെ തന്റെ മുൻ കഥാപാത്രങ്ങളുടെ നിഴൽ പോലും ഇല്ലാതെ അത്ഭുതപ്പെടുത്തുന്ന മികവോടെ അവതരിപ്പിച്ചിട്ടുണ്ട് മമ്മൂട്ടി. പാപ്പയിലൂടെയും മീരയിലൂടെയും പുതിയ ലോകത്തെ പഠിക്കുന്ന അമുദൻ മറക്കാനാവാത്ത ഒരു കഥാപാത്രത്തെ സമ്മാനിക്കുന്നുണ്ട്.

സാധനയുടെ പ്രകടനമാണ് പിന്നീട് എടുത്ത് പറയേണ്ടത്. ഒരു കൊച്ചുകുട്ടിയുടേതെന്ന് വിശ്വസിക്കാൻ സാധിക്കാത്തവണ്ണം അതിഗംഭീരമായ കഥാപാത്രം. പാപ്പ എന്ന കഥാപാത്രത്തെ ഇത്രമേൽ ഹൃദയസ്പർശിയായി അവതരിപ്പിക്കാൻ മറ്റാർക്കെങ്കിലും സാധിക്കുമോ എന്ന് തോന്നിക്കും വിധം പക്വമായ പ്രകടനം. വാക്കുകൾക്കതീതം. അഞ്ജലി അമീറിന്റെ മികച്ച പ്രകടനവും ചിത്രത്തിന് മികവേകുന്നുണ്ട്. കാസ്റ്റിങ്ങിൽ സംവിധായകന്റ മികവ്‌ കൂടി അടയാളപ്പെടുത്തുന്നിടത്താണ് പേരൻപ് തിളങ്ങുന്നത്.

ഛായാഗ്രഹണമികവിന്റെയും സംഗീതത്തിന്റെ അകമ്പടിയുടെയും വരികളിൽ പോലും ജീവൻ പേറുന്ന അർത്ഥതലങ്ങളുടെയും അടയാളപ്പെടുത്തൽ കൂടിയാണ് പേരൻപ്. ഓരോ നിമിഷവും അത്രമേൽ ആർദ്രമെന്ന് തോന്നിക്കും വിധം ഭംഗി നിറഞ്ഞുനിൽക്കുന്നുണ്ട് ചിത്രത്തിലുടനീളം. സാഹചര്യങ്ങളോട് ഏറ്റവും ചേർന്നുനിൽക്കുന്ന ടെക്നിക്കൽ വശങ്ങൾ കലാകാരന്മാരുടെ മികവ് അടയാളപ്പെടുത്തുന്നുണ്ട്.

🔻ＦＩＮＡＬ ＶＥＲＤＩＣＴ🔻

കാലഹരണപ്പെട്ട് പോയെന്ന് ബോധ്യപ്പെടുന്ന മനുഷ്യത്വത്തിന്റെ പുതിയ തെളിനീരുറവകൾ തേടിയുള്ള യാത്രയാണ് പേരൻപ്. മനുഷ്യന് വേണ്ടി പ്രകൃതിയല്ല, പ്രകൃതിക്ക് വേണ്ടി മനുഷ്യൻ മാറുമ്പോഴാണ് ഭൂമി പ്രശാന്തസുന്ദരമാവുകയെന്ന ബോധ്യപ്പെടുത്തൽ കൂടിയാണ് ചിത്രം. മെലോഡ്രാമയുടെ അകമ്പടിയോടെ കണ്ണ് നിറക്കുന്ന കേവലമൊരു സിനിമാറ്റിക്ക് വൈകാരികതയിലല്ല, കുറെയേറെ ജീവിതങ്ങളുടെ കഥ തെല്ലും അതിശയോക്തി ഇല്ലാതെ സ്‌ക്രീനിൽ തെളിയുന്നിടത്താണ് പേരൻപിൻറെ അഴക് വെളിവാകുന്നത്. കേവലം ഒരു തമിഴ് സിനിമയെന്നല്ല, ഇന്ത്യൻ സിനിമയെന്ന് അഭിമാനത്തോടെ, തെല്ല് അഹങ്കാരത്തോടെ ഉയർത്തിക്കാട്ടാം പേരൻപിനെ.

ＡＢ ＲＡＴＥＳ ★★★★★

🔻മുമ്പൊരു റിവ്യൂവിൽ സൂചിപ്പിച്ച കാര്യം അടിവരയിട്ടുകൊണ്ട് തുടങ്ങുന്നു. Child Abuse എന്ന പ്രമേയത്തിൽ ഏറ്റവും കൂടുതൽ സിനിമകൾ സൃഷ്ടിക്കപ്പെട്ടിട്ടുള്ള ഇൻഡസ്ട്രിയാണ് കൊറിയൻ ഇൻഡസ്ട്രി. Silenced, Miss Baek തുടങ്ങിപല സിനിമകളും കാണികളെ വിടാതെ പിന്തുടരുമ്പോൾ എന്തെങ്കിലുമൊരു തലത്തിൽ പ്രതികരിക്കാൻ നമ്മളെയും പ്രേരിപ്പിക്കും. അത്തരത്തിൽ ഒന്നാണ് ഈ ചിത്രവും.

Year : 2013
Run Time : 2h 2min

🔻സന്തോഷകരമായ എന്ന് പറയാനാവില്ലെങ്കിലും സന്തുഷ്ടകരമായ ജീവിതം നയിക്കുന്ന ഒരു മിഡിൽ ക്ലാസ് ഫാമിലിയായിരുന്നു Dong-Hooവിന്റേത്. ഭാര്യയും ഒരു മകളും അടങ്ങിയ കുടുംബം. ജോലിത്തിരക്കുകൾക്കിടയിൽ കടുംബവുമായി സമയം ചിലവഴിക്കാൻ അദ്ദേഹത്തിന് അധികം സാധിച്ചിയുന്നില്ലെങ്കിലും തന്റെ മകളായ So-Wonനെ വളരെയേറെ ഇഷ്ടപ്പെട്ടിരുന്നു അദ്ദേഹം. എന്നാൽ ഒരിക്കൽ തന്റെ സ്‌കൂളിലേക്കുള്ള യാത്രക്കിടയിൽ Won ഒരു അപരിചിതന്റെ മുന്നിൽ എത്തിപ്പെടുന്നതോടെ ഒരു കുടുംബം തന്നെ ശിഥിലമാവുന്നു.

🔻തങ്ങൾ കൈമാറ്റം ചെയ്യാൻ ഉദ്ദേശിക്കുന്ന വികാരം ഏറ്റവും നന്നായി പ്രേക്ഷകരിലേക്ക് എത്തിക്കാൻ കൊറിയൻ ഇൻഡസ്ട്രിക്ക് ഒരു പ്രത്യേക കഴിവുണ്ട്. പല സിനിമകളിലായി എനിക്ക് തോന്നിയിട്ടുള്ള കാര്യമാണത്. ഇവിടെയും ആ കഴിവ് അതിന്റെ പൂർണ്ണതയിൽ ഉപയോഗപ്പെടുത്തിയിട്ടുണ്ട് സംവിധായകൻ. അവിടെ പിറന്നതോ മനസ്സ് അസ്വസ്ഥമാക്കുകയും അതോടൊപ്പം ഒരു ചെറു പുഞ്ചിരി നൽകുകയും ചെയ്യുന്ന അത്ഭുതസൃഷ്ടിയും.

🔻ഒരു കുട്ടിക്ക് തൻ നേരിടേണ്ടി വരുന്ന അക്രമത്തിൽ അനുഭവിക്കേണ്ടി വരുന്ന യാതനകൾ ഗംഭീരമായി സ്‌ക്രീനിലെത്തിക്കാൻ സാധിക്കുന്നിടത്ത് ചിത്രം പൂർണ്ണവിജയമായി എന്ന് പറയാം. മാതാപിതാക്കൾ അനുഭവിക്കുന്ന വേദനയും ടെൻഷനും അതെ തോതിൽ നമ്മിലേക്കും പകരുന്നിടത്ത് മനസ്സിനെ ആഴത്തിൽ മുറിവേൽപ്പിക്കുന്നുണ്ട് സംവിധായകൻ. പലപ്പോഴും ചെറു സംഭാഷണങ്ങളിൽ ഊന്നിയ ദൃശ്യകേന്ദ്രീകൃത കഥാവിഷ്‌കാരം റിയലിസ്റ്റിക്ക് അവതരണത്തോട് അങ്ങേയറ്റം ചേർന്നുനിൽക്കുന്നുണ്ട്.

🔻കേന്ദ്രകഥാപാത്രങ്ങൾ തമ്മിലുള്ള മനസികബന്ധം പരിചയപ്പെടുത്തുന്നത് ഒരു പാഠപുസ്തകം കണക്കെ നമുക്ക് വീക്ഷിക്കാം. തന്റെ മകളെ സന്തോഷപ്പെടുത്താൻ മാതാപിതാക്കൾ സഹിക്കുന്ന ത്യാഗങ്ങൾ ഒരിറ്റ് കണ്ണീരോടെയല്ലാതെ കണ്ടിരിക്കാൻ സാധിക്കില്ല. ആ സമയത്ത് ഉപയോഗിച്ചിരിക്കുന്ന ലളിതമായ മൊമന്റുകൾ അതിമനോഹരം എന്നെ പറയാനുള്ളൂ. അവരുടെ മനസികസംഘർഷങ്ങൾ തെല്ലും ചോർന്നുപോവാതെ സിനിമയിലുടനീളം അവതരിപ്പിക്കാൻ സാധിച്ചിട്ടുണ്ട്. ഒട്ടും സിനിമാറ്റിക്ക് ആവാതെ കഥാപരിസരങ്ങളോട് ചേർന്നുനിൽക്കുന്ന അവതരണം കാണികൾക്ക് വളരെ മികച്ച ഒരനുഭവം തന്നെയാവുന്നുണ്ട്.

🔻പുഞ്ചിരി കൊണ്ട് തന്നെ നമ്മുടെ മനസ്സ് കീഴടക്കുന്ന Re-Lee തന്നെയാണ് സിനിമയിലെ താരം. Dong-Hooവിന്റെ വേഷം Gu-Sol ഗംഭീരമാക്കിയപ്പോൾ ഇരുവരും തമ്മിലുള്ള കോമ്പിനേഷൻ രംഗങ്ങൾ മറക്കാനാവാത്ത ഒന്നായി ഹൃദയത്തിൽ തറച്ചു. ചെറു കഥാപാത്രങ്ങളായി വന്നവർ പോലും അത്ഭുതപ്പെടുത്തുമ്പോൾ ഓരോ നിമിഷവും നമുക്ക് അടുത്തറിയുന്നത് പോലെ അനുഭവപ്പെടും.

🔻ＦＩＮＡＬ ＶＥＲＤＩＣＴ🔻

യഥാർത്ഥ സംഭവങ്ങൾ സിനിമയാക്കുമ്പോൾ ഉണ്ടാവുന്ന കൂട്ടിച്ചേർക്കലുകൾ പോലും വിശ്വസനീയമാം വിധം അവതരിപ്പിച്ചിടത്ത് ഒരു ഗംഭീര അനുഭവമാകുന്നു ഈ ചിത്രം. നമ്മുടെ മനസ്സിനെ ഒരുപോലെ സംഘർഷത്തിൽ പെടുത്തുകയും തുടർന്ന് കണ്ണീരിൽ കുതിർന്ന പുഞ്ചിരിയും സമ്മാനിക്കുകയും ചെയ്യുന്നിടത്ത് ഒരിക്കലും മറക്കാനാവാത്ത ഒരനുഭവവും ഒപ്പം ഒരുപാട് പ്രതീക്ഷകളും ബാക്കിവെക്കുന്നുണ്ട് ഈ കുടുംബം.

ＡＢ ＲＡＴＥＳ ★★★★☆

ചിത്രം ടെലിഗ്രാം ചാനലിൽ ലഭ്യമാണ്. Abi Suggests